རྟ་མགྲིན་གྱི་སྒྲུབ་ཐབས་ཞེས་བྱ་བ།
རྒྱ་གར་སྐད་དུ། ཧྱ་གྲཱི་བ་སཱ་དྷ་ནཾ་ནཱ་མ། བོད་སྐད་དུ། རྟ་མགྲིན་གྱི་སྒྲུབ་ཐབས་ཞེས་བྱ་བ། རྟ་མགྲིན་ལ་ཕྱག་འཚལ་ལོ། །རྟ་མགྲིན་གྱི་ནི་སྒྲུབ་པའི་ཐབས། །དེ་ནས་ཡང་དག་
རབ་བཤད་བྱ། དང་པོ་རེ་ཞིག་སྔགས་པས་ཡིད་དང་རྗེས་སུ་མཐུན་པའི་གནས་སུ་བདུད་རྩི་ལྔས་བྱུགས་ལ་ཇི་ལྟར་འདོད་པའི་སྟན་ལ་ཉེ་བར་འདུག་སྟེ། རང་གི་སྙིང་གའི་ཧཱུ༵་ཡིག་ལས་འོད་ཟེར་འཕྲོས་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཉེ་བར་སྤྱོད་བ་ཐམས་ཅད་ཀྱིས་ཡང་དག་པར་མཆོད་པ་དང༌། ཕྱག་འཚལ་བ་དང༌། སྡིག་པ་བཤགས་པ་ལ་སོགས་པ་བྱས་ཏེ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭཱ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་ཡང་དག་པར་བརྗོད་དོ། །འདིའི་སྔགས་ཀྱིས་རང་དང་གཞན་སྟོང་པ་ཉིད་དུ་བསྒོམ་པར་བྱའོ། །དེ་ནས་བཅོམ་ལྡན་འདས་དཀྱིལ་འཁོར་གྱི་དབུས་སུ་པདྨ་འདབ་མ་བཞི་པའི་ལྟེ་བའི་སྟེང་དུ་ཟླ་བའི་དཀྱིལ་འཁོར་གྱི་གདན་ལ་ཐོད་པ་བདུད་རྩི་དང་བཅས་པ་དེར་བསམ་པར་བྱའོ། །དེར་ཧཱུཾ་ཡིག་ཡོངས་སུ་གྱུར་པ་ལས་བསམ་པར་བྱ་བའི་སངས་རྒྱས་ནི་དྲག་པོ་ཞལ་བཞི་པ་ཞབས་བཞི་པ། གཡས་པའི་ཞབས་བརྐྱང་བ། གཡོན་པའི་ཞབས་བསྐུམ་པའོ། །དཔའ་བོ་ཕྱག་བརྒྱད་བ། ལྷ་མོ་བཞིས་ཡོངས་སུ་བསྐོར་བ། གང་འདོད་པའི་དངོས་གྲུབ་ཀྱི་བདག་ཉིད་ཆེན་པོ་རྟ་མགྲིན་ནི། སྐུ་མདོག་དམར་པོ་མཆེ་བ་རྣོ་བ་གཙིགས་པ་སྤྱན་གསུམ་པ། རྩ་བའི་དང་གཡས་དང་གཡོན་གྱི་ཞལ་ནི་དམར་པོ་དང༌། །སྔོན་པོ་དང་དཀར་པོའོ། །སྤྱི་བོའི་རྟའི་ཞལ་གྱི་རྣམ་པ་དེའི་ཁ་དོག་ནི་ཤིང་པ་ལཱ་ཤ་བཞིན་ནོ། །ཐོད་པ་ཁྲག་དང་ཤ་ཆེན་པོས་གང་བ་སྔགས་རྣམས་ཀྱི་དབང་བསྐུར་བ་རབ་ཏུ་སྦྱིན་པར་བྱའོ། །རྟ་ཞལ་ལ་སོགས་པའི་དབུ་ལ་རྒྱན་ཐམས་ཅད་རྫོགས་པ། མགོ་བོའི་ཕྲེང་བས་བརྒྱན་པའོ། །གཡས་ཀྱི་ཕྱག་རྣམས་ཀྱིས་ལྕགས་ཀྱུ་དང༌། མདའ་དང༌། ཐོད་པ་དང་རྡོ་རྗེའོ། །གཡོན་པ་རྣམས་ན་ཞགས་པ་དང༌། གཞུ་དང༌། ཁ་ཊྭཱཾ་ག་དང༌། དྲིལ་བུའོ། །འདིར་སྒྲུབ་པ་པོས་དེ་འདྲ་བའི་བཅོམ་ལྡན་འདས་སུ་བསྒོམ་པར་བྱའོ། །མཆོད་པའི་བདག་ཉིད་བདུད་རྩི་ལྔས་ཡང་དག་པར་མཆོད་པར་བྱའོ། །མདུན་དུ་བཞུགས་པའི་ལྷ་མོ་རྡོ་རྗེ་རྟ་མ་འཇིགས་མ་ཆེན་མོ་ཧྲཱིཿཡིག་ལས་ཡང་དག་པར་བྱུང་བ་ཞལ་གཅིག་མ། ཕྱག་བཞི་མ་གཡོན་ན་གཞུ་དང་ཐོད་པ་བདུད་རྩི་དང་བཅས་པའོ། །གཡས་ཀྱིས་མདའ་དང་རྩེ་གསུམ་མོ། །སྣ་ཚོགས་པའི་
སྐུ་ཡིད་དུ་འོང་བའི་གཟི་བརྗིད་ཅན། རྒྱབ་ཏུ་བཞུགས་པའི་ལྷ་མོ་ཞལ་གཅིག་ཕྱག་བཞི་མ་ཧཾ་ལས་ཡང་དག་པར་བྱུང་བ། གཡོན་ན་ཁ་ཊྭཱཾ་ག་དང༌། ཞགས་པ་ཆེན་པོ་འཛིན་པའོ། །གཡས་ན་ཐོད་བ་ཁྲག་གིས་གང་བ་དང༌། དབྱིག་པའི་བརྟུལ་ཞུགས་འཆང་བའོ། །ཀ་པཱ་ལའི་གདན་གྱི་དབུས་ན་བཞུགས་པ་སྐུ་མདོག་དམར་མོ་འབར་མ་ཆེན་མོ་མཚན་ནི་ཕག་མོར་བརྗོད་དོ། །གཡས་སུ་ནི་རྡོ་རྗེ་ཁྲོས་མ་ཐོད་པའི་གདན་ལ་ཡང་དག་པར་བཞུགས་མ། ཧྲཱིཿལས་ཡང་དག་པར་བྱུང་བའི་ལྷ་མོ་སྐུ་མདོག་སེར་མོ་ཞལ་གཅིག་ཕྱག་བཞི་མ། གཡོན་ན་དུག་གིས་གང་བའི་ཐོད་པ་དང༌། ཞགས་པའི་རྒྱལ་མཚན་ནོ། །གཡས་སུ་ཌ་མ་རུ་དང༌། དབྱིག་པའི་བརྟུལ་ཞུགས་འཆང་བའོ། །གཡོན་དུ་བཞུགས་པའི་ལྷ་མོ་ཁ་དོག་དཀར་མོ་ཕྱག་ན་རྡོ་རྗེ་ཅན་ཏེ། འདབ་མ་བཞི་རྣམས་ལ་བཞུགས་པའོ། །རྟ་མགྲིན་འཁོར་བཅས་ལ་མཆོད་པར་བྱའོ། །ལྷ་མོ་ཐམས་ཅད་ཀྱི་དུག་དང༌། དྲི་ཆུ་དང་བཅས་པས་སོ། །ཞབས་འོད་ཀྱི་ཕྲེང་བ་ལ་བཞུགས་ཤིང་མགོ་བོས་བརྒྱན་པ། སྤྱན་གསུམ་པ་མཆེ་པ་རྣོ་བ་གཙིགས་པ་འཇིགས་པར་མཛད་པ། གང་འདོད་པའི་དངོས་གྲུབ་ཀྱི་བདག་ཉིད་ཅན་ནོ། །སྔགས་ཀྱི་རྒྱལ་པོ་རྗེས་སུ་དྲན་ན་དེར་འདིའི་སྔགས་ནི། ཨོཾ་ཧ་ཡ་གྲཱི་བ་ཧྲཱིཿཨ་ཧཾ་ཨ་ཧ་ཨཾ་ཨཾ་ཧཱུ༵་ཧཱུ༵་སྭཱ་ཧཱ། སྔགས་འདི་བསམ་པར་བྱའོ། །རྟག་ཏུ་བཟླས་པ་རྗེས་སུ་དྲན་པས། འབུམ་ཕྲག་གཉིས་དང་བྱེ་བ་ཕྲག་གཅིག་གིས་དེ་ནད་མེད་པར་འགྱུར་རོ། །གང་ཡང་སྔར་བསགས་པའི་སྡིག་བ་འཇོམས་པ་དང༌། དུས་ཐམས་ཅད་དུ་རྣལ་འབྱོར་གྱི་དབང་ཕྱུག་གིས་བསྲུང་བར་འགྱུར་རོ། །འདི་ཉིད་ཀྱི་ལྷ་མོ་རྟ་གདོང་མ་ནི་བརྟན་པ་སའི་དངོས་པོ་དང༌། བྱམས་པ་འཕྲོ་བའི་སེམས་དང་མེ་ལོང་ལྟ་བུའི་རྣལ་འབྱོར་རོ། །གཡས་གཡོན་གྱི་ལྷ་མོ་ནི་ཆུ་དང༌། སྙིང་རྗེ་དང་མཉམ་ཉིད་དང་མེ་དང་དགའ་བ་དང༌། སོ་སོར་རྟོག་པའི་རང་བཞིན་ནོ། །ལྷ་མོ་གླང་གདོང་མ་ནི་རླུང་གི་དངོས་པོ་དང་བཏང་སྙོམས་ཀྱི་སེམས་སུ་དྲན་ཞིང་བྱ་བ་རྗེས་སུ་གྲུབ་པའི་རྣལ་འབྱོར་རོ། །སྣ་ཚོགས་པའི་གཟུགས་ནི་སྣ་ཚོགས་བའི་ཚུལ་དུ་བརྗོད་དོ། །ཁ་དོག་སྔོན་མོ་ནི་གཉིས་སུ་མེད་བར་བྱེད་པ་ཆོས་ཀྱི་སྒྲ་སྒྲོགས་བ་བསྡིགས་བར་མཛད་པའོ། །ཁ་དོག་སེར་མོ་ནི་
དྲི་མ་མེད་པར་རྟོགས་སོ། །ཁ་དོག་དམར་མོ་ནི་ཆོས་རྣམས་ལ་ཆགས་པའི་སེམས་ཀྱིས་དེ་བཞིན་གཤེགས་པའོ། །ཞབས་བཞིའི་རྣམ་དག་ནི་འཕགས་པའི་རྫུ་འཕྲུལ་གྱི་རྐང་པ་བཞིའོ། །རྟའི་གདོང་པ་ནི་གཞན་པ་མེད་པའི་སེམས་ཀྱི་རང་བཞིན་འདི་ཆོས་ཀྱི་དབྱིངས་རྣམ་པར་དག་པ་དང། ལམ་རྣམ་པར་དག་པར་གཞོལ་བར་མངོན་པར་བརྗོད་དོ། །རྒྱུའི་དེ་ཉིད་གང་ལ་ལྟ་བ་དང༌། འབྲས་བུའི་དེ་ཉིད་ཀྱི་ཕྱག་རྒྱ་ནི་སངས་རྒྱས་བཅོམ་ལྡན་འདས་ཐར་པ་ལ་སྤྱན་གསུམ་གྱིས་གཟིགས་པའོ། །ཐོག་མ་མེད་པའི་ཡེ་ཤེས་ཀྱི་སེམས་དུད་འགྲོའི་ཞལ་དུ་བསྟན་ཏོ། །ཡིད་སྦྱོང་བའི་རྣལ་འབྱོར་པས་རི་ལྟར་རྟག་ཏུ་གནས་པར་བྱའོ། །རྒྱུད་ཐམས་ཅད་ཀྱི་སྙིང་པོ་བླ་ན་མེད་པ་རྟ་མགྲིན་གྱི་སྒྲུབ་ཐབས་ཞེས་བྱ་བ། པཎྜི་ཏ་པྲ་བྷཱ་ཀ་རས་མཛད་པ་རྫོགས་སོ།། །།རྒྱ་གར་ཡུལ་བཱ་རཱ་ཎ་སཱིའི་པཎྜི་ཏ་པུ་རུ་ཥོཏྟ་མའི་ཞལ་སྔ་ནས་ལེགས་བར་མཉན་ཏེ། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་བླ་མ་དམ་པའི་བཀས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྐྱུར་བའོ།།