ཁྲོ་བོའི་རྒྱལ་པོ་འཕགས་པ་མི་གཡོ་བ་ལ་བསྟོད་པ།
མར་མེ་མཛད་ཡེ་ཤེས།
རྒྱ་གར་སྐད་དུ། ཨཱཪྻ་ཨ་ཙ་ལ་ཀྲོ་དྷ་རཱ་ཛ་སྟོ་ཏྲ་བོད་སྐད་དུ། ཁྲོ་བོའི་རྒྱལ་པོ་འཕགས་པ་མི་གཡོ་བ་ལ་བསྟོད་པ། བཅོམ་ལྡན་འདས་མི་བསྐྱོད་པ་ལ་ཕྱག་འཚལ་ལོ། །ཐུགས་རྗེའི་བདག་ཉིད་ཁྲོ་རྒྱལ་བརྟན་པའི་སྐུ། །བརྐྱང་བསྐུམ་ཐབས་ལས་བྱུང་བའི་ཁྲོ་རྒྱལ་དང༌། །བཅས་ཏེ་ནམ་མཁའི་འོད་ཀྱི་དཀྱིལ་ན་བཞུགས། །ཚངས་པ་
ལ་སོགས་འབུམ་ནི་སྐྲག་བྱེད་པ། ཉོན་མོངས་ཉེ་བའི་ཉོན་མོངས་རྣམས་དང་ནི། །ཀླུ་དང་གནོད་སྦྱིན་ཤ་ཟ་ཡི་དགས་སོགས། །འབྱུང་པའི་ཚོགས་རྣམས་མ་ལུས་སྐྲག་མཛད་པ། །ཁྲོ་རྒྱལ་ཁྱོད་ལ་བདག་ནི་སྐྱབས་སུ་མཆི། །སྣ་ཚོགས་པདྨ་ཉི་ཟླའི་གདན་ལ་བཞུགས། ཕྱག་གཡས་རལ་གྲི་འཕྱར་བསམ་རུངས་འདུལ། །རྣམ་རྟོག་འཇོམས་ཤིང་རབ་ཏུ་གྲིམས་པའི་སྐུ། །སྐུ་མདོག་མཐིང་ནག་ཆར་སྤྲིན་ནག་པོ་འདྲ། །དབུ་སྐྲ་ཨརྫ་ཀཡི་འབྲས་བུ་འདྲ། །སྐུ་ནི་ཤིང་མཆོག་ཡོངས་འདུས་བརྟོལ་འདྲ། །ཞབས་གཉིས་བརྐྱང་བསྐུམ་གྱད་ཀྱིས་ཁྲོས་ཁྲོས་འདྲ། །ལྷ་མཆོག་ཁྱོད་ལ་བདག་ནི་སྐྱབས་སུ་མཆི། །སྤྱན་མིག་པ་ལ་ཤ་ཡི་མེ་ཏོག་འདྲ། །མཆེ་བ་གཙིགས་པ་ཟླ་བ་ཚེས་པ་འདྲ། །ལྗགས་འགྱུར་བ་ནི་ནམ་མཁའི་གླེག་དང་འདྲ། །སྨིན་མའི་ཁྲོ་གཉེར་པྲིག་ཤའི་ལོ་མ་འདྲ། །རལ་གྲི་ཟླ་ཚེས་མཚོར་ལྷུང་འོད་དང་འདྲ། །སྦྲུལ་གྱི་ཞགས་བརྒྱ་མཚོའི་དབའ་རླབས་འདྲ། །སྐུ་ཡིས་ཕྱོགས་སྐྱོང་དབང་སྡུད་མ་རུངས་འདུལ། །ཁྲོ་རྒྱལ་མོ་གཡོ་མགོན་ལ་ཕྱགས་འཚལ་ལོ། །བགེགས་དང་ལོག་འདྲེན་མ་ལུས་ཞི་མཛད་ཅིང༌། འབྱུང་པའོ་འཁྲུགས་སོགས་ནད་རྣམས་ཞི་མཛད་པ། །མི་དང་མི་མིན་མཚོན་ཆས་འཇོམས་མཛད་པ། །དུས་མིན་འཆི་དང་སྡིག་པ་རྣམ་ལས་གྲོལ། །དབུས་དང་ཕྱོགས་བཞིའི་རིགས་ལྔའི་མི་གཡོ་སྟེ། །མཚམས་བཞི་ནས་ནི་ཁྲོ་བོ་བཞི་པོ་དང༌། །གྲུ་ཆད་ཕྱོགས་མཚམས་ལྷ་མོ་བརྒྱད་ལྡན་པའོ། །བཅོམ་ལྡན་མི་གཡོ་མགོན་ལ་ཕྱག་འཚལ་ལོ། །སྐུ་ལས་སྤྲུལ་པའི་ཁྲོ་བོ་བཅུ་པོ་ནི། །རྡོ་རྗེ་ཤུགས་ཅན་སྐུ་མདོག་མཐིང་ནག་སྟེ། །ང་དང་ངར་འཛིན་གནམ་ལྕགས་འཁོར་ལོ་བསྣམས། བགེགས་ཚོགས་སྐྲག་པར་མཛད་ལ་ཕྱག་འཚལ་ལོ། སྤྲུལ་པའི་ཁྲོ་རྒྱལ་རྡོ་རྗེ་ཆགས་ཆེན་ནི། །གདུལ་བྱའོ་དོན་དུ་སྐུ་མདོག་དམར་པོ་སྟེ། །ཆགས་དང་ཆགས་པའི་དོན་དུ་མདའ་གཞུ་བསྣམས། །མ་རུངས་འདུལ་བར་མཛད་ལ་ཕྱག་འཚལ་ལོ། །སྤྲུལ་པའི་ཁྲོ་བོ་རྡོ་རྗེ་རྣོན་པོ་ནི། །གདུལ་བྱའི་དོན་དུ་སྐུ་མདོག་ལྗང་གུ་སྟེ། །འཛིན་ཅིན་འཛིན་པའི་བདག་ཉིད་ལྕགས་ཀྱུ་བསྣམས། །འགྲོ་བ་འདྲེན་པ་ཁྱོད་ལ་ཕྱག་ཚལ་ལོ། །སྤྲུལ་པའི་ཁྲོ་བོ་རྡོ་རྗེ་འབར་བ་ནི། །སྐུ་མདོག་གངས་རིའི་རྩེ་ལ་ཉི་ཤར་
འདྲ། །མི་ཤེས་མི་ཤེས་འཇོམས་པའི་བྲག་འཛིན་པ། །མ་རུངས་འདུལ་བར་མཛད་ལ་ཕྱག་འཚལ་ལོ། །རྡོ་རྗེ་ཁྲོ་བོ་སྐུ་མདོག་སེར་པོ་སྟེ། །ཁྲོ་དང་ཁྲོ་བའི་བདག་ཉིད་རལ་གྲི་བསྣམས། །རྣལ་འབྱོར་བར་ཆད་བར་དུ་ཞི་མཛད་པ། །ཁྲོ་རྒྱལ་སྟོབས་ལྡན་ཁྱོད་ལ་ཕྱག་འཚལ་ལོ། །རྡོ་རྗེ་གཏུམ་ཆེན་སྐུ་མདོག་ལྗང་ནག་སྟེ། །བཏང་སྙོམས་བཏང་སྙོམས་འགྱུར་བའི་བདག་ཉིད་ཀྱི། །ཕྱག་མཚན་ཕྱག་ན་སྤྲིན་གྱི་ཞགས་བ་བསྣམས། །འགྲོ་བ་འདྲེན་པ་ཁྱོད་ལ་ཕྱག་འཚལ་ལོ། །སྤྲུལ་པའི་ཁྲོ་བོ་རྡོ་རྗེ་ཐབས་བདག་ནི། །སྐུ་མདོག་སེར་ནག་དུ་བའི་མདོག་འདྲ་བ། །བྱ་དང་བྱེད་པའི་བདག་ཉིད་རྫ་རྔ་བསྣམས། །སྒྲ་ཆེན་སྒྲོགས་བ་ཁྱོད་ལ་ཕྱག་འཚལ་ལོ། །སྤྲུལ་བའི་ཁྲོ་བོ་རྡོ་རྗེ་གཏུམ་ཆེན་ནི། །སྐུ་མདོག་མཐིང་ག་སྐུ་གསུམ་རང་བཞིན་ཅན། །སྨན་པའི་རང་བཞིན་གནམ་ལྕགས་འཁོར་ལོ་བསྣམས། །ཉོན་མོངས་སེལ་བ་ཁྱོད་ལ་ཕྱག་འཚལ་ལོ། །རྡོ་རྗེ་རྒྱུ་ཡི་སྟོབས་ནི་དམར་ནག་སྟེ། །རྟེན་འབྲེལ་རྟེན་ཅིང་འབྲེལ་པའི་བདག་ཉིད་ནི། །མ་རུངས་གདུལ་ཕྱིར་ཕྱག་ན་བེ་ཅོན་བསྣམས། །བདུད་རྣམས་སྐྲག་པར་འཛད་ལ་ཕྱག་འཚལ་ལོ། །རྡོ་རྗེ་རབ་བྱེད་སྣ་ཚོགས་ཕྲིན་ལས་ཀྱི། །འདོད་ཆགས་ཐམས་ཅད་ཐབས་ལས་གྲོལ་བ་ཡི། །བདག་ཉིད་ཅན་གྱི་རྡོ་རྗེ་རྩི་གཅིག་བསྣམས། །རྡོ་རྗེ་རབ་བྱེད་ཁྱོད་ལ་ཕྱག་འཚལ་ལོ། །གང་ཞིག་བསྟོད་པ་འདི་ཡི་སྟོད་བྱེ་ན། །བཅོམ་ལྡན་མི་གཡོ་མགོན་པོ་འཁོར་བཅས་ཀྱིས། །འཇིག་རྟེན་འཇིག་རྟེན་འདས་པའི་དངོས་གྲུབ་ཀུན། །བསྟོད་དང་བསྒྲུབ་པ་རྣམས་ལ་སྩོལ་བར་འགྱུར། །འདི་བསྟོད་འདི་ནི་མཆོད་བྱེད་ན། །དངོས་གྲུབ་མྱུར་དུ་ཐོབ་པར་འགྱུར། །འཕགས་པ་ཁྲོ་བོའི་རྒྱལ་པོ་མི་གཡོ་བ་ལ་བསྟོད་པ། །སློབ་དཔོན་ཆེན་པོ་དཔལ་མར་མེ་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང༌། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་བབ་པའོ།།