གཏུམ་པོ་དཀར་པོ་ཆེན་པོའི་སྒྲུབ་ཐབས།
རྒྱ་གར་སྐད་དུ། ཤུཀླ་ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་དཀར་པོ་ཆེན་པོའི་སྒྲུབ་ཐབས། གཏུམ་པོ་ཁྲོ་བོ་ཆེན་པོ་ལ་ཕྱག་འཚལ་ལོ། །སྔགས་པས་རེ་ཞིག་ཐོག་མར་སྟོང་པ་ཉིད་བསྒོམས་ཏེ། དེའི་ངང་ལས་སྣ་ཚོགས་པདྨ་དང་ཉི་མའི་སྟེང་དུ་ཞལ་གཅིག་ཕྱག་གཉིས་པ་སྐུ་མདོག་དཀར་པོ་རིན་པོ་ཆེའི་
རྒྱན་སྣ་ཚོགས་ཀྱིས་བརྒྱན་པ། རིན་པོ་ཆེའི་ཅོད་པན་ཅན། ཕྱག་གཡས་པ་རལ་གྲི་སྤྱི་བོར་འཕྱར་བ། གཡོན་པ་སྡིགས་མཛུབ་དང་བཅས་པའི་ཞགས་པ་སྙིང་གར་འཛིན་པ། ཞབས་གཡས་པ་ཙོག་པུར་བཞུགས་ཤིང༌། གཡོན་པའི་པུས་མོ་ཉི་མའི་དཀྱིལ་འཁོར་ལ་རབ་ཏུ་བཙུགས་པ། ལྷའི་ན་བཟའ་གོས་སུ་གྱོན་པ། སྙིང་གར་སྣ་ཚོགས་པདྨ་དང་ཉི་མའི་དབུས་སུ་ཡི་གེ་ཧཱུ༵་ལ་ཡི་གེ་དགུས་བསྐོར་བ་དང་བཅས་པའི་བཅོམ་ལྡན་འདས་བསྒོམ་པར་བྱའོ། །དེའི་མདུན་དུ་དེ་དང་ཁ་སྦྱོར་ཞིང་ཡང་དེ་ཁོ་ན་དང་འདྲ་བའི་བཅོམ་ལྡན་འདས་གཉིས་པ་བསྒོམ་བར་བྱའོ། །དེའི་རྗེས་སུ་རང་གི་སྙིང་གའི་སྔགས་ལས་འཕྲོས་པའི་སྔགས་ཀྱི་ཕྲེང་བ་རང་གི་ཁ་ནས་མདུན་གྱི་བཅོམ་ལྡན་འདས་ཀྱི་ཞལ་དུ་ཞུགས་ཤིང་དེའི་ལྟེ་བ་ནས་རང་གི་ལྟེ་བར་ཞུགས་ཤིང་ཡང་རང་གི་སྙིང་གར་འཐོན་ནས་དེ་ཁོ་ན་བཞིན་འཁོར་བར་བསྒོམ་པར་བྱའོ། །བཟླས་པའི་ཚེ་རང་གི་སྙིང་གའི་ཧཱུ༵་གི་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའི་ཡེ་ཤེས་ཀྱི་བདུད་རྩི་དང༌། ཟླ་བ་དང༌། སྐར་མ་དང༌། སྨན་དང༌། སྒྱུ་རྩལ་དྲུག་ཅུ་རྩ་བཞིའི་ནུས་པ་དང༌། རིག་པ་ལ་སོགས་པ་ལ་མཁས་པའི་ཡོན་ཏན་དང༌། གཞན་ཟིལ་གྱིས་གནོན་པའི་རྩོད་པ་དང༌། སྙན་ངག་ལ་སོགས་པའི་ཡོན་ཏན་མ་ལུས་པ་བཀུག་ནས་རང་གི་སྙིང་གའི་ཧཱུ༵་ལ་རབ་ཏུ་ཐིམ་ཞིང༌། བདག་ཉིད་རིག་པ་ལྔ་ལ་མཁས་པའི་པཎྜི་ཏ་ཡིན་ནོ་སྙམ་པའི་ང་རྒྱལ་དང་ལྡན་པའི་སྤོབས་པས་སྔགས་བཟླས་པར་བྱའོ། །ཞག་ཉི་ཤུ་རྩ་གཅིག་བཟླས་པས་སྙན་ངག་མཁན་ཆེན་པོར་འགྱུར་རོ། །གཏུམ་པོ་ཁྲོ་བོ་ཆེན་པོའི་ཤེས་རབ་བློ་འཕེལ་གྱི་སྒྲུབ་ཐབས་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་དཱ་ན་ཤཱི་ལས་རང་འགྱུར་དུ་མཛད་པའོ།།