འཕགས་པ་མི་གཡོ་བའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཨ་ཙ་ལ་སཱདྷ་ནཾ། བོད་སྐད་དུ། འཕགས་པ་མི་གཡོ་བའི་སྒྲུབ་ཐབས། འཕགས་པ་མི་གཡོ་བ་ལ་ཕྱག་འཚལ་ལོ། །ཐོག་མར་སྔགས་པས་གསུམ་ལ་སྐྱབས་སོང་ཞིང༌། །བྱང་ཆུབ་མཆོག་ཏུ་སེམས་བསྐྱེད་བྱས་རྗེས་སུ། །སྐད་ཅིག་ཙམ་གྱིས་སྟོང་པར་རབ་དམིགས་ནས། །རབ་དཀར་པདྨ་ཉི་མའི་དཀྱིལ་འཁོར་བལྟ། །དེ་སྟེང་མགོན་པོ་མི་གཡོ་སྐུ་མདོག་དཀར། །གཡས་གཡོན་ཕྱག་གིས་རལ་གྲི་སྡིགས་མཛུབ་
མཛད། །ཞབས་གཉིས་བུས་མོ་མཐིལ་གྱིས་རབ་བཞུགས་པ། །རིན་ཆེན་དར་གྱིས་བརྒྱན་པ་བསྒོམ་པར་བྱ། །ལྷག་པའི་ཁྲོ་རྒྱལ་དེ་ཡི་མདུན་དུ་ཡང༌། །དེ་ཉིད་ཇི་ལྟའི་བཅོམ་ལྡན་འདས་བསམ་བྱ། །དེ་དག་ཐུགས་ཀར་པདྨ་ཉི་མ་ལ། །ཧཱུ༵་ལ་གཞན་གྱིས་བསྐོར་བ་དམར་བར་བལྟ། །དེ་ནས་ཡི་གེ་འབྲུ་བཅུ་བཟླས་བྱ་སྟེ། །སྔགས་ཕྲེང་ཁ་ནས་ཁར་ཞུགས་ཡེ་ཤེས་དགུག །ལྟེ་བ་ནས་འཐོན་དེར་ཞུགས་བདག་ཉིད་ཀྱི། །སྙིང་གར་བསླན་པ་འཁོར་ལོ་བཞིན་དུ་བསམ། །དེ་ལྟར་ཞག་གྲངས་ཉི་ཤུ་རྩ་གཅིག་ཏུ། །ཐུན་གསུམ་ཉིད་དུ་བསྒོམ་པ་གང་ཡིན་དེས། །བཀའ་དང་བསྟན་བཅོས་ཀུན་གྱི་ཚིག་དང་དོན། །བལྟས་བཙམ་གྱིས་ཁོང་དུ་ཆུད་པར་འགྱུར། །གཞན་ཡང་ཀུན་ལ་མི་འཇིགས་སྤོབས་པ་འཐོབ། །སྙན་དངགས་བསྟན་བཅོས་ཐོགས་མེད་རྩོམ་ནུས་ཤིང༌། །དེ་ཡི་སྨྲ་བ་སུས་ཀྱང་བཟློག་མི་ནུས། །དེ་ཕྱིར་འདི་འདྲ་གར་ཡང་རྙེད་པར་དཀའ། །འཕགས་པ་མི་གཡོ་བའི་སྒྲུབ་ཐབས་རྫོགས་སོ།། རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་དཱ་ན་ཤཱི་ལས་རང་འགྱུར་དུ་མཛད་པའོ།།