འཕགས་མ་གདུགས་དཀར་མོ་ཅན་གཞན་གྱིས་མི་ཐུབ་མ་ཞེས་བྱ་བའི་སྒྲུབ་ཐབས།
ཙནྡྲགོམིན།
རྒྱ་གར་སྐད་དུ། ཨཱཪྻ་སི་ཏཱ་ཏ་པ་ཏྲེ་ཨ་པ་རཱ་ཛི་ཏཱ་ནཱ་མ་ནོ་པི་ཀཱ །བོད་སྐད་དུ། འཕགས་མ་གདུགས་དཀར་མོ་ཅན་གཞན་གྱིས་མི་ཐུབ་མ་ཞེས་བྱ་བའི་སྒྲུབ་ཐབས། འཕགས་མ་གདུགས་དཀར་མོ་ཅན་ལ་ཕྱག་འཚལ་ལོ། །ལྷ་མོ་གདུགས་དཀར་ཅན་བསྒྲུབ་པར་འདོད་པས། གནས་དབེན་པར་ཁྲུས་བྱས་སྟན་བདེ་བ་ལ་འདུག་སྟེ། རང་སྐད་ཅིག་གིས་ལྷ་མོར་བསྐྱེད་པའི་ཨོཾ་གྱི་འོད་ཀྱིས་འཕགས་མ་རི་ཁྲོད་མ་དང་སངས་རྒྱས་ལ་སོགས་པ་སྤྱན་དྲངས་ལ་ཕྱག་བྱ་སྟེ། མཆོད་པ་ལ་སོགས་པའི་བདུན་རྣམ་དག་
གིས་ཚོགས་བསགས་ནས། ཚངས་བའི་གནས་བཞི་དང༌། ཡེ་ཤེས་ཀྱི་ཚོགས་བསག་པར་བྱའོ། །དེའི་ངང་ལས་སྙིང་གའི་ཨོཾ་ལས་འོད་འཕྲོས་དོན་གཉིས་བྱས། ཚུར་འདུས་པ་ལས་གདུགས་དཀར་མོ་ཨོཾ་གྱིས་མཚན་པར་གྱུར། དེ་ལས་འོད་ཟེར་སྐུ་ཕྲ་མོར་འཕྲོས་འདུས་པ་ལས་བདག་ཉིད་ལྷ་མོ་གདུགས་དཀར་ཅན་སྐུ་མདོག་དཀར་མོ་ཞལ་གཅིག་ཕྱག་གཉིས་པ། སྤྱན་གཉིས་ལས་བྱམས་པ་དང་སྙིང་རྗེའི་འོད་ཟེར་འཕྲོ་བ། གཡས་སྐྱབས་སྤྱིན། གཡོན་གདུགས་དཀར་མོ་བཟུང་བ། པད་ཟླའི་གདན་ལ་ཞབས་སྐྱིལ་ཀྲུང་གིས་བཞུགས་ཤིང་སྒེག་པའོ། །དེ་དབུ་རྒྱན་དང་རྣ་རྒྱན་ལ་སོགས་པའི་རིན་པོ་ཆེའི་རྒྱན་དུ་མས་སྤྲས་པར་ལྟའོ། །སྤྲོ་ན་རི་ཁྲོད་མ་དང་ལེགས་ལྡན་གྱིས་བསྐོར་བར་བསམ་མོ། །དེ་ལ་ཨོཾ་གྱི་འོད་ཀྱིས་ཡེ་ཤེས་པ་དགུག་གཞུག་ཅིང་དབང་དུ་བྱའོ། །དེ་ཉིད་ལ་དབང་བསྐུར་ལ། བཻ་རོ་ཙ་ནས་དབུ་རྒྱན་ནོ། །དེའི་ཐུགས་ཀར་འཕགས་མ་མཚོན་གང་བ་ཨོཾ་དང་བཅས་པར་བལྟའོ། །དེ་ཉིད་ལས་སྐྱོ་བར་གྱུར་ན་ཡེ་ཤེས་ཀྱི་ལྷ་མདུན་དུ་བཀུག་ལ་ཕྱག་དང་མཆོད་བསྟོད་བྱས་ནས་ཐུགས་ཀ་གཉིས་སུ་ཨོཾ་ལ་སྔགས་ཀྱིས་བསྐོར་བར་དམིགས་ནས། ཞལ་དང་ལྟེ་བར་འགལ་མེ་ལྟར་འཁོར་བས་རང་གཞན་ཐམས་ཅད་ཀྱི་ནད་གདོན་ལ་སོགས་པ་བསྲེགས་པར་བསམས་ནས། ཏདྱ་ཐཱ། ཨོཾ་ཨ་ན་ལེ་ཨ་ན་ལེ། བི་ཤ་དེ་བི་ཤ་དེ། བཻ་རེ་བཻ་རེ། བཛྲ་དྷ་རི། བནྡྷ་བནྡྷ་ནི་བཛྲ་པཱ་ཎི་ཕཊ། ཧཱུཾ་ཧཱུཾ་ཕཊ་ཕཊ་ཧཱུཾ་དྲུཾ་བནྡྷ་ཕཊ་སྭཱ་ཧཱ། འབུམ་ལ་སོགས་པ་བཟླས་པར་བྱའོ། །དེ་ནས་ཐུན་མཚམས་སུ་མདུན་གྱི་ཡེ་ཤེས་པ་ལ་དམིགས་པའི་མདོ་དང༌། ལྷ་མོ་ལེགས་ལྡན་ལ་གཏོར་མ་བཏང་ནས། སྤྱོད་ལམ་གྱི་རྣལ་འབྱོར་བྱའོ། །འཕགས་པ་གདུགས་དཀར་མོ་ཅན་གྱི་སྒྲུབ་ཐབས་སློབ་དཔོན་ཙནྡྲ་གོ་མིས་མཛད་པ་རྫོགས་སོ།། །།ལོ་ཙཱ་བ་འཕགས་པ་ཤེས་རབ་ཀྱིས་བསྒྱུར་བའོ།།