མཆོད་རྟེན་སྒྲུབ་པའི་ཆོ་གའི་རིམ་པ་ཞེས་བྱ་བ།
ཙནྡྲགོམིན།
རྒྱ་གར་སྐད་དུ། ཙཻ་ཏྱ་སཱ་དྷ་ན་པི་དྷི་ཀྲ་མནཱ་མ། བོད་སྐད་དུ། མཆོད་རྟེན་སྒྲུབ་པའི་ཆོ་གའི་རིམ་པ་ཞེས་བྱ་བ། བཅོམ་ལྡན་འདས་ཤཱཀྱ་ཐུབ་པའི་དབང་པོ་ལ་ཕྱག་འཚལ་ལོ། །ཐུན་མཚམས་ལས་དང་དང་པོ་ཡི། །གང་ཟག་དག་ནི་སྒྲུབ་པ་ཡི། །མཆོད་རྟེན་ཆོ་ག་མདོར་བསྡུས་པ། །བླ་མ་དམ་པའི་གདམས་པས་དགོད། །དང་པོ་གནས་ཁང་བྱི་དོར་བྱས། །མཆོད་པ་ལ་སོགས་བཤམས་དེ་ནས། །རང་གི་ལྷ་ཡི་བསྐྱེད་རིམ་སྒོམ། །དེ་ནས་བདེན་པའི་ཚིག་འདི་ཡིས། །ས་ཡི་བདག་པོས་ས་བླང་བྱ། །བདག་ནི་གཞན་དོན་བསྒྲུབ་པ་ལ། །ལྷ་མོས་མཆོད་རྟེན་ནས་སླང་གི །དགྱེས་པས་བདག་ལ་སྩལ་དུ་གསོལ། །ཞེས་བྱས་བརྐོས་ཏེ་འདག་པ་ལ། །འོད་ཀྱིས་སྦྱངས་ཏེ་རིན་ཆེན་བསམ། །དེ་ནས་འབི་འབི་ལེགས་བྱས་ཏེ། །མར་གྱིས་བསྐུས་ལ་སྐོལ་ཕོར་སྩལ། །ལེགས་བཏོན་ལྷ་མོ་རང་དུ་བསམ། དེ་ལ་མཆོད་དང་གསོལ་བ་གདབ། །དེ་རྣམས་ཐམས་ཅད་བསྒྲུབ་པའི་སྔགས། །ཙ་བའི་སྔགས་ཉིང་ཁོ་ནས་བྱ། །དེ་ནས་ན་བཟའ་ལེགས་གསོལ་ལ། །སངས་རྒྱས་དཀྱིལ་འཁོར་ལ་སོགས་ཀུན། །བསྟིམས་ཏེ་མཆོད་བསྟོད་ལེགས་བྱ་སྟེ། །རྟེན་བྲེལ་སྔགས་ཀྱིས་བརྟན་པར་བྱ། །དེ་ནས་མཆོད་ལ་གསོལ་བ་གདབ། །ཡོན་བདག་ལ་སོགས་སྨོན་ལམ་གདབ། །དེ་ནས་
དགེ་འདུན་མཆོད་སྟོན་བྱ། །འབྱུང་བ་ཆུ་རླུང་ནམ་མཁའ་དང༌། །ཡིད་ཀྱི་བསྒྲུབ་པ་ལ་སོགས་ཀུན། །བླ་མའི་གདམས་པ་ལྡན་པས་གདབ། །དེ་ལྟར་མཆོད་རྟེན་ཆོ་ག་ནི། །མདོར་བསྡུས་པ་ཡི་ཆོ་ག་ལས། །གྲུབ་པས་སེམས་ཅན་མ་ལུས་བ། །འཁོར་ལོས་སྒྱུར་རྒྱལ་ཐོབ་ནས་ནི། །རིམ་གྱིས་གཙུག་ཏོར་ལྷ་མོ་ཡི། ཞལ་རྫོགས་པར་ནི་མཐོང་བར་ཤོག །མཆོད་རྟེན་བསྒྲུབ་པའི་ཆོ་གའི་རིམ་པ་མདོར་བསྡུས་པ། སློབ་དཔོན་ཙནྡྲ་གོ་མིས་མཛད་པ་རྫོགས་སོ།། །།ཟངས་དཀར་ལོ་ཙའ་བའི་འགྱུར་རོ།།