སོ་སོར་འབྲང་མོའི་སྒྲུབ་ཐབས།
༈། །སོ་སོར་འབྲང་མའི་སྒྲུབ་ཐབས་བཞུགས། སོ་སོར་འབྲང་མ་ཆེན་མོ་ལ་ཕྱག་འཚལ་ལོ། །སྔར་བསྟན་བའི་ཆོ་གས་སྟོང་བ་ཉིད་བསྒོམས་པའི་རྗེས་ལ། ཨ་ལས་སྐྱེས་པའི་ཟླ་བའི་དཀྱིལ་འཁོར་དུ་ཡི་གེ་པྲཾ་སེར་པོ་འོད་ཟེར་སྣ་ཚོགས་ལས་སེམས་ཅན་གྱི་དོན་བྱེད་པ་སྟེ། དེ་ཡོངས་སུ་གྱུར་པ་ལས་སྐད་ཅིག་གིས་བཅོམ་ལྡན་འདས་མ་ཆེན་མོ་སོ་སོར་འབྲང་མར་བདག་ཉིད་བསྐྱེད་བར་བྱའོ། །མདོག་སེར་མོ་ཞལ་བཞི་པ་སྤྱན་གསུམ་པ། ཕྱག་བརྒྱད་པ་སྟེ། ཞལ་དང་པོ་སེར་པོ་དང༌། གཡས་པ་དཀར་པ། རྒྱབ་སྔོ་བ། གཡོན་དམར་པོ། གཡས་ཀྱི་ཕྱག་རྣམས་ཀྱིས་རལ་གྲི་དང༌། འཁོར་ལོ་དང༌། རྩེ་གསུམ་དང༌། མདའ་རྣམས་དང༌། གཡོན་གྱི་ཕྱག་རྣམས་ཀྱིས་གཞུ་དང༌། ཞགས་པ་དང༌། དགྲ་སྟ་དང༌། རྡོ་རྗེ་རྣམས་འཛིན་པའོ། །སྣ་ཚོགས་པདྨ་ཟླ་བའི་དཀྱིལ་འཁོར་གྱི་གདན་ལ་རོལ་པས་བཞུགས་པ། འོད་ཟེར་དམར་པོའི་དཀྱིལ་འཁོར་ཅན། རྒྱན་ཐམས་ཅད་ཀྱིས་བརྒྱན་པ། གོས་སྣ་ཚོགས་ཀྱི་ན་བཟའ་བསྣམས་པ། ཤིང་ང་དཔུང་ཆད་དང༌། རིན་པོ་ཆེ་སྣ་ཚོགས་ཀྱི་དབུ་རྒྱན་ཅན། འདི་ལྟར་བསམས་ལ། སྐུ་དང་གསུང་དང་ཐུགས་རྣམས་ཀྱི་ཟླ་བའི་དཀྱིལ་འཁོར་ལ། ཨོཾ་ཨཱཿཧཱུཾ་དཀར་པོ་དང༌། དམར་པོ་དང༌། སྔོན་པོའི་ཡི་གེ་གསུམ་བསམ་པར་བྱའོ། །དེ་ནས་ནུ་མའི་དབུས་སུ་ཟླ་བ་ལ་གནས་པའི་ཡི་གེ་པྲཾ་བསམས་ནས། སྣ་ཚོགས་པའི་ལྷ་མོ་རྣམས་ཀྱིས་བདག་ཉིད་མཆོད་པར་བསམས་ཏེ། ཇི་སྲིད་དུ་ངལ་བར་མ་གྱུར་བ་དེ་སྲིད་དུ་སྤྲོ་བས་བསྒོམ་པར་བྱའོ། །ངལ་བར་གྱུར་ན་རང་གི་སྙིང་གའི་ཟླ་བ་ལ་སྔགས་མུ་ཏིག་གི་ཕྲེང་བའི་ཚུལ་དུ་བཟླས་པར་བྱའོ། །ཨོཾ་ན་ཎི་དྷ་རི་
བཛྲི་མ་ཏཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བ་ནི་སྔགས་སོ། །སོ་སོར་འབྲང་མའི་སྒྲུབ་ཐབས་རྫོགས་སོ།།