བསྲུང་བ་ལྔའི་མཆོད་པའི་ཆོ་ག།
རྒྱ་གར་སྐད་དུ། པཉྩ་རཀྵཱ་རྩྩན་པི་དྷིཿ། བོད་སྐད་དུ། བསྲུང་བ་ལྔའི་མཆོད་པའི་ཆོ་ག །བཅོམ་ལྡན་འདས་མ་སོ་སོར་འབྲང་མ་ལ་ཕྱག་འཚལ་ལོ། །ཨོཾ་ཨཱཿདྤལ་ལྡན་རྡོ་རྗེ་ཞེས་པ་ལ་སོགས་པ་ནི་གནོད་སྦྱིན་ཤ་ཟ་སྲིན་པོའི་ཆོགས་ཀྱིས་སྐྲག་པར་བྱེད་ཅིང་བརྣག་དཀའི་འཇིགས་པ་རྣམས་དང༌། ལོ་ཉེས་ཉེས་འཚེ་ནད་དང་ཆུ་སྲིན་རྣམས་ཀྱིས་མནན་པའི་འགྲོ་བ་འདི་གཟིགས་ནས། །བརྩེར་ལྡན་ཐམས་ཅད་མཁྱེན་པ་ཡིས་ནི་སོ་སོར་འབྲང་མ་རྟག་ཏུ་བྱུང་བ་ཡིན། །བཅོམ་ལྡན་འདས་མི་མཆོག་གི་དབང་ཕྱུག་དོན་ཀུན་ཕུན་ཚོགས་མཛད་མ་དེ་ལ་འདུར། །ཨོཾ་ཨཱཿཧཱུཾ། སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སེམས་ཅན་ཐམས་ཅད་ཉེ་བར་གཟུང་བའི་སླད་དུ་བདག་ཉིད་སོ་སོར་འབྲང་མའི་གཟུགས་སུ་བསྒོམ་པར་བྱ་སྟེ། ལག་པ་གཡས་སུ་ཨཱཾ་ཡིག་གིས་ཉི་མའི་དཀྱིལ་འཁོར་དང་ལག་པ་གཡོན་པར་ཨཱ་ཡིག་གིས་ཟླ་བའི་དཀྱིལ་འཁོར་རོ། །ལག་པའི་དུང་དག་ལ་ཧཱུཾ་ཡིག་གིས་རྡོ་རྗེ་རྩེ་ལྔ་པར་རྣམ་པར་བསྒོམས་ནས། པད་སྐོར་གྱིས་དུང་བྱིན་གྱིས་བརླབ་བོ། །ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་ས་རེ་རཀྵ་རཀྵ་ཧཱུཾ་ཧཱུཾ་སྭཱ་ཧཱ། ཨོཾ་སརྦ་བིགྷཱཾ་ཨུཏྤཱ་ར་ཡ་ཧཱུཾ། ཨོཾ་པུཥྤེ་ཞེས་པ་ལ་སོགས་པས་མེ་ཏོག་ལ་སོགས་པ་བྱིན་གྱིས་བརླབ་བོ། །ཨོཾ་ཨ་ཀཱ་རོ་མུ་ཁཾ་ཞེས་བ་ལ་སོགས་པས་གཏོར་མ་བྱིན་གྱིས་བརླབ་བོ། །ཨོཾ་ཨཱཿཧཱུཾ་རཀྵ་རཀྵ་ཕཊ་སྭཱ་ཧཱ། ཨོཾ་སྠཱ་ནཾ་མེ་རཀྵ་ཧཱུཾ། ཨོཾ་ཡོ་ག་མེ་རཀྵ་ཧཱུཾ། ཨོཾ་ཨཱཏྨ་ནཾ་མེ་རཀྵ་ཧཱུཾ། དེ་ནས་རང་གི་སྙིང་གར་ཨ་ཡིག་གིས་ཟླ་བའི་དཀྱིལ་འཁོར་དེའི་སྟེང་དུ་པྲཾ་གྱི་ཡི་གེ་བསམས་ནས། དེའི་འོད་ཟེར་གྱིས་བླ་མ་དང་བྱང་ཆུབ་
སེམས་དཔའ་ལ་སོགས་པ་སྣང་བར་བྱས་ཤིང༌། སེམས་ཅན་གྱི་དོན་བྱས་ཤིང༌། འོག་མིན་གྱི་གནས་སུ་སོང་སྟེ། སོ་སོར་འབྲང་མ་ཆེན་མོ་འཁོར་དང་བཅས་པ་མདུན་གྱི་ནམ་མཁའི་གནས་སུ་བལྟས་ཤིང་དགུག་གོ །ཨོཾ་བཛྲ་ཙཀྲི་ཧཱུཾ། ཨོཾ་བཛྲཱཾ་ཀུ་ཤ་ཛཿ། ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲཱ་བེ་ཤ་ཧོཿ། ཨོཾ་ཨཱཿཧཱི་པཉྩ་རཀྵ་ཡཻ་པྲ་བ་ར་སཏྐ་རཱ་ཡ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་པ་ལ་སོགས་པའོ། །མེ་ཏོག་དགོད་པ་ནི། ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་ས་རེ་ཧཱུཾ་ཧཱུཾ་ཕཊ་སྭཱ་ཧཱ། དབུས་སུའོ། །ཨོཾ་ཨ་མྲྀ་ཏ་བ་རེ་བྲ་བ་ར་བི་ཤུདྡྷེ་ཧཱུཾ་ཧཱུཾ་ཕཊ་སྭཱ་ཧཱ། ཤར་དུའོ། །ཨོཾ་ཨ་མྲྀ་ཏཱ་བི་ལོ་ཀི་ནི་གརྦྡྷ་སཾ་རཀྵ་ཎི་ཨཱ་ཀཪྵ་ཎི་ཧཱུཾ་ཧཱུཾ་ཕཊ་སྭཱ་ཧཱ། ལྷོ་རུའོ། །ཨོཾ་བི་མ་ལེ་བི་པུ་ལེ་ཛ་ཡ་བ་རེ་ཛ་ཡ་ཧཱུཾ་ཧ་ནི་རུ་རུ་ཙ་ལེ་ཧཱུཾ་ཧཱུཾ་ཕཊ་སྭཱ་ཧཱ། ནུབ་ཏུའོ། །ཨོཾ་བྷ་ར་བྷ་ར་སཾ་བྷ་ར་སཾ་བྷ་ར་ཨིནྡྲི་ཡ་བ་ལ་བི་ཤོ་དྷ་ནི་ཧཱུཾ་ཧཱུཾ་ཕཊ་སྭཱ་ཧཱ། བྱང་དུའོ། །གྲྭ་རྣམས་སུ། ཨོཾ་ཀཱ་ལཱི་ཡེ་སྭཱ་ཧཱ། མེར་རོ། །ཨོཾ་ཀཱ་ལཱ་ར་ཏྲཱི་ཡེ་སྭཱ་ཧཱ། བདེན་བྲལ་དུའོ། །ཨོཾ་ཀཱ་ལ་ཀརྞྞཱི་ཡེ་སྭཱ་ཧཱ། རླུང་དུའོ། །ཨོཾ་ཤྭི་ཏཱི་ཡེ་སྭཱ་ཧཱ། དབང་ལྡན་དུའོ། །ཨོཾ་བཛྲཱཾ་ཀུ་ཤཱི་ཡེ་སྭཱ་ཧཱ། ཤར་སྒོར་རོ། །ཨོཾ་བཛྲ་པཱ་ཤཱི་ཡེ་སྭཱ་ཧཱ། ལྷོ་སྒོར་རོ། །ཨོཾ་བཛྲ་སྥོ་ཊཱི་ཡེ་སྭཱ་ཧཱ། ནུབ་སྒོར་རོ། །ཨོཾ་བཛྲཱ་བེ་ཤཱི་ཡེ་སྭཱ་ཧཱ། བྱང་སྒོར་རོ། །ཨོཾ་གནྡྷ་རྦྦེ་བྷྱཿསྭཱ་ཧཱ། ཤར་དུའོ། །ཨོཾ་ཀུམྦྷ་ཎྜེ་བྷྱཿསྭཱ་ཧཱ། ལྷོ་རུའོ། །ཨོཾ་ནཱ་གེ་བྷྱཿ་སྭཱ་ཧཱ། ནུབ་ཏུའོ། །ཨོཾ་ཡཀྵེ་བྷྱཿསྭཱ་ཧཱ། བྱང་དུའོ། །ཨོཾ་མེ་གྷོ་ལྐཱ་ཡཻ་སྭཱ་ཧཱ། ཨོཾ་ཤཱི་ཏཱཾ་ཤ་ཝེ་སྭཱ་ཧཱ། ཨོཾ་རཀྟཱཾ་ག་ཀུ་མཱ་རཱ་ཡ་སྭཱ་ཧཱ། ཨོཾ་བུདྷཱ་ཡ་སྭཱ་ཧཱ། ཨོཾ་བྷོ་ག་སྤ་དཱ་ཡ་སྭཱ་ཧཱ། ཨོཾ་ཨ་སུ་རོཏྟ་མཱ་ཡ་སྭཱ་ཧཱ། ཨོཾ་ཀྲྀཥྞ་ཝརྞྞ་ཡ་སྭཱ་ཧཱ། ཨོཾ་ཨ་མྲྀ་ཏ་པྲྀ་ཡཱ་ཡ་སྭཱ་ཧཱ། ཨོཾ་ཛྱེ་ཏི་ཀེ་ཏེ་པེ་སྭཱ་ཧཱ། ཨོཾ་ཀྲྀཏྟ་ཀཱ་ཡ་སྭཱ་ཧཱ། ཨོཾ་རོ་ཧི་ཎྱེ་སྭཱ་ཧཱ། ཨོཾ་མྲྀ་ག་ཤི་རཱ་ཡཻ་སྭཱ་འ། ཨོཾ་ཨཱརྡྲཱ་ཡ་སྭཱ་ཧཱ། ཨོཾ་པུ་ན་རྦ་ས་བེ་སྭཱ་ཧཱ། ཨོཾ་པུ་ཥྱཱ་ཡ་སྭཱ་ཧཱ། ཨོཾ་ཨ་ཤླེ་ཥཱ་ཡ་སྭཱ་ཧཱ། ཨོཾ་མ་གྷཱ་ཡ་སྭཱ་ཧཱ། ཨོཾ་པཱུརྦ་ཕ་ལྒུ་ནྱཻ་སྭཱ་ཧཱ། ཨོཾ་ཨུཏྟ་ར་ཕ་ལྒུ་ནྱཻ་སྭཱ་ཧཱ། ཨོཾ་ཧསྟཱ་ཡ་སྭཱ་ཧཱ། ཨོཾ་ཙཻ་ཏྲཱ་ཡ་སྭཱ་ཧཱ། ཨོཾ་སྭཱ་ཏ་ཡེ་སྭཱ་ཧཱ། ཨོཾ་བི་ཤཱ་ཥཱ་ཡ་སྭཱ་ཧཱ། ཨོཾ་ཨ་ནུ་ར་དྷཱ་ཡ་སྭཱ་ཧཱ། ཨོཾ་ཛྱེཥཱ་ཡ་སྭཱ་ཧཱ། ཨོཾ་མཱུ་ལཱ་ཡ་སྭཱ་ཧཱ། ཨོཾ་པཱུརྦཱ་ཥཱ་ཌྷཱ་ཡ་སྭཱ་ཧཱ། ཨོཾ་ཨུཏྟ་རཱཥཱ་ཎཱ་ཡ་སྭཱ་ཧཱ། ཨོཾ་ཨ་བྷི་ཛི་ཏ་ཡེ་སྭཱ་ཧཱ། ཨོཾ་ཤྲཱ་བ་ཎཱ་ཡ་སྭཱ་ཧཱ། ཨོཾ་དྷ་ནི་ཥྛཱ་ཡ་སྭཱ་ཧཱ། ཨོཾ་ས་ཏ་བྷིཥཱ་ཡ་སྭཱ་ཧཱ། ཨོཾ་བཱུརྦ་
བྷ་དྲཱ་ཡ་སྭཱ་ཧཱ། ཨོཾ་ཨུཏྟ་ར་བྷ་དྲཱ་ཡ་སྭཱ་ཧཱ། ཨོཾ་རེ་བ་ཏྱཻ་སྭཱ་ཧཱ། ཨོཾ་ཨ་ཤྭ་ནྱཻ་སྭཱ་ཧཱ། ཨོཾ་བྷ་རི་ཎྱཻ་སྭཱ་ཧཱ། ཨོཾ་ཨིནྡྲཱ་ཡ་སྭཱ་ཧཱ། ཨོཾ་ཡ་མཱ་ཡ་སྭཱ་ཧཱ། ཨོཾ་བ་རུ་ཎཱ་ཡ་སྭཱ་ཧཱ། ཨོཾ་ཀུ་བེ་རཱ་ཡ་སྭཱ་ཧཱ། ཨོཾ་ཨགྣ་ཡེ་སྭཱ་ཧཱ། ཨོཾ་ནེཾཉྫ་ཏྱཱ་ཡ་སྭཱ་ཧཱ། ཨོཾ་བཱ་ཡ་བེ་སྭཱ་ཧཱ། ཨོཾ་ཨི་ཤཱ་ནཱ་ཡ་སྭཱ་ཧཱ། ཨོཾ་པྲ་ཧྨ་ཎེ་སྭཱ་ཧཱ། ཨོཾ་པྲྀ་ཐི་བྱཻ་སྭཱ་ཧཱ། ཨོཾ་བེ་མ་ཙི་ཏྲི་བྷྱཿསྭཱ་ཧཱ། ཞེས་པས་མཆོད་དེ། །ཀུན་ད་དུང་དང་ཟླ་མདོག་འདྲ། །རྡོ་རྗེ་སེམས་དཔའི་བདག་ཉིད་མཆོག །ཕུན་སུམ་ཚོགས་ཀུན་སྦྱིན་མཛད་མ། །སོ་སོར་འབྲང་མ་ཁྱོད་ལ་འདུད། །ཁ་དོག་གནག་ཅིང་སྒྲ་ཆེན་མོ། །གདུག་པ་འཇིགས་ཤིང་འཇིགས་མཛད་མ། །གདུལ་དཀའི་འབྱུང་པོ་སྡུད་པར་མཛད། །ཁྲོ་མོའི་རྒྱལ་ལ་བདག་ཕྱག་འཚལ། །ལྷ་མོ་ཡེ་ཤེས་ཆེ་ལས་བྱུང༌། །གསེར་མདོག་གི་ནི་འོད་མཛད་མ། །ལྷ་མོ་ཆེན་མོ་རིག་སྔགས་རྒྱལ། །རྨ་བྱ་ལ་ཡང་བདག་ཕྱག་འཚལ། །ཁ་དོག་མཛེས་ཤིང་སྤྱན་རྒྱས་པ། །ཆུ་སྐྱེས་ཁ་བྱེ་བཞད་པ་མོ། །དམར་འབར་པདྨ་རཱ་ག་སྟེ། །འགྲོ་བའི་ཡུམ་ལ་ཕྱག་འཚལ་ལོ། །བཻ་ཌཱུཪྻ་ཡི་འོད་ལྟར་སྣང༌། །མྱོས་བྱེད་ལ་བརྩོན་རྣམ་པར་འཁོར། །ཀཱ་ཀོརྡྷ་ནི་གཅོད་མཛད་མ། །ལྷ་མོའི་གཟུགས་ཅན་ལ་ཕྱག་འཚལ། །དབང་མེད་བདག་གིས་མི་དགེ་བགྱིས་པ་དང༌། །བགྱིད་དུ་སྩལ་དང་ཡི་རང་བགྱིས་པ་གང༌། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ནི་སོ་སོར་བཤགས་པར་བགྱི། །མ་ལུས་འགྲོ་བའི་དོན་རྣམས་སྒྲུབ་མཛད་པ། །ཟབ་ཅིང་གཏིང་མེད་བདེ་གཤེགས་སྲས་རྣམས་ཀྱི། །ཚོགས་གཉིས་དང་ནི་དེ་ལས་གཞན་ལ་ཡང། །རྟག་ཏུ་བདག་ནི་རྗེས་སུ་ཡི་རང་ངོ༌། །ཞེས་པ་ནི། དང་པོའི་རྣལ་འབྱོར་རོ། །དེ་མ་ཐག་ཏུ་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་ཚངས་པའི་གནས་པ་བཞི་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿ། སརྦ་དྷརྨཱཿསྭ་བྷཱ་བ་ཤུདྡྷ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བཱཏྨ་ཀོ྅ཧཾ། དེ་ནས་ཡཾ་རཾ་ལཾ་བཾ་སུཾ་ལས་གསེར་གྱི་རི་དང་གླིང་རྒྱ་མཚོས་འཁོར་ཡུག་ཏུ་ཡོངས་སུ་བསྐོར་བ། རཾ་ཡིག་གི་ཉི་མའི་དཀྱིལ་འཁོར། དེའི་སྟེང་དུ་ཧཱུཾ་ལས་སྐྱེས་པའི་སྣ་ཚོགས་རྡོ་རྗེ་ལས་འོད་ཟེར་འཕྲོས་པ་ལས་རྡོ་རྗེའི་ས་གཞི་དང་རྡོ་རྗེའི་རབ་དང་རྡོ་རྗེའི་གུར་དང་རྡོ་རྗེའི་བླ་རེ་
བསྒོམ་པར་བྱའོ། །དེའི་སྟེང་དུ་བྷྲཱུཾ་ཡིག་གིས་གྲུ་བཞི་པ་སྒོ་བཞི་པ་རྟ་བབས་བཞིས་བརྒྱན་པའི་ཁངས་པ་བརྩེགས་པ་བསྒོམ་པར་བྱའོ། །དེའི་དབུས་སུ་བཾ་ཡིག་ལས་སྐྱེས་པའི་སྣ་ཚོགས་ཆུ་སྐྱེས། དེའི་སྟེང་དུ་ཟླ་བའི་གཟུགས་བརྙན། དེའི་སྟེང་དུ་པྲཾ་ཡིག་གི་ས་བོན་ལས་སྐྱེས་པའི་འོད་ཟེར་ལས་སྐྱེས་པའི་འཁོར་ལོ་དཀར་པོ་རྩིབས་བརྒྱད་པ་བསྒོམ་པར་བྱའོ། །རང་གི་ས་བོན་དང་མཚན་མ་ཡོངས་སུ་གྱུར་པ་ལས་སྣ་ཚོགས་ཆུ་སྐྱེས་དང་ཟླ་བ་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། དཀར་པོ་ཞལ་བཞི་པ། གཡས་ནག་པོ། རྒྱབ་སེར་པོ། གཡོན་ལྗང་གུ་།ཕྱག་བརྒྱད་པ། གཡས་ཀྱི་ཕྱག་དང་པོས་འཁོར་ལོ། གཉིས་པས་རྡོ་རྗེ། གསུམ་པས་མདའ། བཞི་པས་རལ་གྲི་།གཡོན་གྱི་དང་པོས་སྡིགས་མཛུབ་དང་རྡོ་རྗེའི་ཞགས་པ། གཉིས་པས་རྩེ་གསུམ། གསུམ་པས་གཞུ། བཞི་པས་དགྲ་སྟ་བསྣམས་པ། སྤྱན་གསུམ་པ། དབུ་ལ་མཆོད་རྟེན་གྱིས་བརྒྱན་པ། རྒྱན་ཐམས་ཅད་ཀྱིས་བརྒྱན་པའི་སོ་སོར་འབྲང་མ་བསྒོམ་པར་བྱའོ། །དེའི་ཤར་དུ་ཧཱུཾ་ཡིག་ས་བོན་ལས་བྱུང་བའི་སྟོང་ཆེན་མོ་རབ་ཏུ་འཇོམས་མ་སྣ་ཚོགས་ཆུ་སྐྱེས་དང་ཉི་མ་ལ་རོལ་པའི་སྟབས་ཀྱིས་བཞུགས་པ། སྐུ་མདོག་ནག་མོ། སྐྲ་སེར་སྐྱ་གྱེན་དུ་བརྫེས་པ། མིའི་ཐོད་པའི་ཕྲེང་བ་ཕྲག་པར་འཕྱང་བ། སྨིན་མ་ཁྲོ་གཉེར་ཅན། མཆེ་བ་གཙིགས་པའི་ཞལ། རྣ་རྒྱན་དང༌། དཔུང་རྒྱན་དང༌། མུ་ཏིག་གི་དོ་ཤལ་དང་གདུ་བུ་སྟེ་སྣ་ཚོགས་པས་བརྒྱན་པ། ཞལ་བཞི་མ། མདུན་ནག་མོ། གཡས་དཀར་མོ། རྒྱབ་སེར་མོ། གཡོན་ལྗང་གུ་།ཞལ་སོ་སོ་ལ་སྤྱན་གསུམ་མ། ཕྱག་བརྒྱད་པ། གཡས་ཀྱི་ཕྱག་དང་པོས་མཆོག་སྦྱིན། གཉིས་པས་ལྕགས་ཀྱུ། གསུམ་པས་མདའ། བཞི་པས་རལ་གྲི་།གཡོན་གྱི་ཕྱག་དང་པོས་སྡིགས་མཛུབ་དང་ཞགས་པ། གཉིས་པས་དགྲ་སྟ། གསུམ་པས་གཞུ། བཞི་པས་པདྨའི་སྟེང་དུ་རིན་པོ་ཆེ་ཆ་དྲུག་པ་བསྣམས་པ། སྣ་ཚོགས་པའི་རྒྱན་གྱིས་བརྒྱན་པ། སྟོབས་ཆེན་མོ་ཕ་རོལ་གནོན་པ། དྲག་མོའི་ཆ་བྱད་དུ་བསྒོམ་པར་བྱའོ། །ལྷོ་རུ་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་དབུས་སུ། མཾ་ཡིག་ལས་བྱུང་བའི་རྨ་བྱ་ཆེན་མོ་སེར་མོ།
སེམས་དཔའི་སྐྱིལ་ཀྲུང་ཅན། ཞལ་གསུམ་མ། ཞལ་སོ་སོ་ལ་སྤྱན་གསུམ་པ། རྩ་བའི་ཞལ་སེར་མོ། གཡས་ནག་མོ། གཡོན་དམར་མོ། ཕྱག་བརྒྱད་པ། གཡས་ཀྱི་དང་པོས་མཆོག་སྦྱིན། གཉིས་པས་རིན་པོ་ཆེའི་རྒྱུན་གྱི་བུམ་པ། གསུམ་པས་འཁོར་ལོ། བཞི་པས་རལ་གྲི་།གཡོན་གྱི་ཕྱག་དང་པོས་སྣོད་ཀྱི་སྟེང་དུ་དགེ་སློང༌། གཉིས་པས་རྨ་བྱའི་མདོངས། གསུམ་པས་བུམ་པའི་སྟེང་དུ་སྣ་ཚོགས་རྡོ་རྗེ། བཞི་པས་རིན་པོའི་རྒྱལ་མཚན་བསྣམས་པ། རིན་པོ་ཆེའི་ཅོད་བན་ཅན། རྒྱན་ཐམས་ཅད་ཀྱིས་རྣམ་པར་བརྒྱན་པ་བསྒོམ་པར་བྱའོ། །ནུབ་ཏུ་སྣ་ཚོགས་པདྨའི་སྟེང་དུ་ཉི་མའི་དཀྱིལ་འཁོར་གྱི་དབུས་སུ་ཏྲཾ་ཡིག་ལས་བྱུང་བའི་གསང་སྔགས་རྗེས་སུ་འབྲང་བ་ཆེན་མོ་དམར་བ། ཞལ་གསུམ་པ། ཞལ་སོ་སོ་ལ་སྤྱན་གསུམ་མ། རྩ་བའི་ཞལ་དམར་མོ། གཡས་ནག་མོ། གཡོན་དཀར་མོ། ཕྱག་བཅུ་གཉིས་མ། ཕྱག་དང་པོ་དག་གིས་ཆོས་ཀྱི་འཁོར་ལོའི་ཕྱག་རྒྱ་བྱས་པ། གཉིས་པ་དག་གིས་ཏིང་ངེ་འཛིན་གྱི་ཕྱག་རྒྱ། གསུམ་པ་དག་གིས་མཆོག་སྦྱིན་ཞགས་པ་འཛིན་པ། བཞི་པ་དག་གིས་མི་འཇིགས་པ་དང་པདྨས་མཚན་པའི་བུམ་པ་འཛིན་པ། ལྔ་པ་དག་གིས་རྡོ་རྗེ་དང་རིན་པོ་ཆེ་འཛིན་པ། དྲུག་པ་དག་གིས་མདའ་དང་གཞུ་འཛིན་པ། སེམས་དཔའི་སྐྱིལ་ཀྲུང་རིན་པོ་ཆེའི་ཅོད་པན་ཅན། རྒྱན་ཐམས་ཅད་ཀྱིས་བརྒྱན་པ། དར་ལ་བབ་བའི་ལང་ཚོ་དང་ལྡན་པ། ངོ་ཤལ་དང་གདུ་བུས་བརྒྱན་པ་བསྒོམ་པར་བྱའོ། །བྱང་དུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ། ཤཾ་ཡིག་ལས་བྱུང་བའི་བསིལ་བའི་ཚལ་ཆེན་མོ་ལྗང་གུ་།ཞལ་གསུམ་མ། ཞལ་སོ་སོ་ལ་སྤྱན་གསུམ་མ། རྩ་བའི་ཞལ་ལྗང་གུ་།གཡས་དཀར་མོ། གཡོན་དམར་མོ། གཡས་ཀྱི་ཕྱག་དང་པོས་མི་འཇིགས་པ། གཉིས་པས་རྡོ་རྗེ། གསུམ་པས་མདའ། གཡོན་གྱི་ཕྱག་དང་པོས་སྡིགས་མཛུབ་དང་རྡོ་རྗེ་ཞགས་པ། གཉིས་པས་རྒྱལ་མཚན། གསུམ་པས་གཞུ་བསྣམས་པ། རྒྱན་ཐམས་ཅད་ཀྱིས་བརྒྱན་པ་བསྒོམ་པར་བྱའོ། །མེར་སྣ་ཚོགས་ཆུ་སྐྱེས་དང་ཉི་མ་ལ་ནག་མོ་གནག་ཅིང་ཕྱག་དག་གིས་དུང་འཛིན་པ། བདེན་བྲལ་དུ་སྣ་ཚོགས་ཆུ་སྐྱེས་དང་
ཟླ་བ་ལ་དུས་མཚན་མ་སེར་མོ་ཕྱག་དག་གིས་དགྲ་སྟ་འཛིན་པ། རླུང་དུ་སྣ་ཚོགས་ཆུ་སྐྱེས་དང་ཉི་མ་ལ་རྣ་བ་ནག་མོ་དམར་བ། ཕྱག་དག་གིས་རྒྱལ་མཚན་འཛིན་པ། དབང་ལྡན་དུ་སྣ་ཚོགས་པདྨ་དང་ཟླ་བ་ལ་དཀར་མོ་དཀར་བ། ཕྱག་དག་གིས་རྩེ་གསུམ་འཛིན་པ། བཞི་པོ་འདི་རྣམས་རྡོ་རྗེའི་སྐྱིལ་ཀྲུང་དང༌། རིན་པོ་ཆེའི་ཅོད་པན་ཅན། སྤྱན་གསུམ་མ། དར་ལ་བབ་པའི་ལང་ཚོ་དང་ལྡན་པར་བསྒོམ་པར་བྱའོ། །ཤར་སྒོ་ཛཿཡིག་ལས་བྱུང་བའི་རྡོ་རྗེ་ལྕགས་ཀྱུ་མ་དཀར་མོ་ཕྱག་གཡས་པ་ལྕགས་ཀྱུའི་ཚུལ། ལྷོར་ཧཱུཾ་ཡིག་ལས་བྱུང་བའི་རྡོ་རྗེ་ཞགས་པ་མ་སེར་མོ་ཕྱག་གཡས་ཀྱིས་ཞགས་པ་འཛིན་པ། ནུབ་ཏུ་བཾ་ལས་བྱུང་བའི་རྡོ་རྗེ་ལྕགས་སྒྲོག་མ་དམར་མོ་ཕྱག་གཡས་རྡོ་རྗེའི་ལྕགས་སྒྲོག་གིས་མཚན་པ། བྱང་དུ་ཧོ་ཡིག་ལས་བྱུང་བའི་རྡོ་རྗེ་འབེབས་མ་སྔོ་བསངས་ཕྱག་གཡས་ཀྱིས་རྡོ་རྗེ་དྲིལ་བུ་འཛིན་པ། བཞི་པོ་འདི་རྣམས་སྣ་ཚོགས་པདྨ་དང་ཉི་མ་ལ་རྡོ་རྗེའི་སྐྱིལ་ཀྲུང་གིས་བཞུགས་པ། སྤྱན་གསུམ་མ། དར་ལ་བབ་བའི་ལང་ཚོས་བརྒྱན་པ། རྣམ་བར་བཀྲ་བའི་རིན་པོ་ཆེའི་རྒྱན་ཅན་བསྒོམ་པར་བྱའོ། །ཤར་ལུས་འཕགས་པོར་ལྷ་ཡུལ་བའི་རྣམ་བ་སྣ་ཚོགས་བའི་ཁ་དོག་གི་ཆ་བྱད་དང་ལྡན་པའི་དྲི་ཟ་རྣམས་སོ། །འཛམ་བུ་གླིང་དུ་སྲིན་པོ་ལྟར་སྣང་ཞིང་གཅིགས་པ་སྣ་ཚོགས་པའི་ཆ་བྱད་ཅན་གྱི་གྲུལ་བུམ་རྣམས་སོ། །ནུབ་བ་ལང་སྤྱོད་དུ་གདེངས་ཀས་མཚན་པའི་མགོ་པོ་སྣ་ཚོགས་པའི་ཆ་བྱད་ཅན་གྱི་རྒྱན་འཛིན་པའི་ཀླུ་རྣམས་སོ། །བྱང་སྒྲ་མི་སྙན་དུ་གནོད་སྦྱིན་གྱི་གཟུགས་སྣ་ཚོགས་པའི་ཆ་བྱད་འཛིན་བའི་ལུས་ངན་རྣམས་བསྒོམ་པར་བྱའོ། །དེ་ནས་ཕྱི་རོལ་དུ་ཤར་གྱི་ཕྱོགས་སུ་རྟ་བདུན་བའི་ཤིང་རྟ་ལ་གནས་པའི་ཉི་མ་དམར་པོ་གཡས་དང་གཞན་གྱི་ཕྱག་དག་གིས་པདྨ་འཛིན་པ། དེའི་གཡོན་དུ་ཟླ་བ་ངང་པ་ལ་ཞོན་པ་གཡས་དང་གཞན་གྱི་ཕྱག་དག་གིས་ཀུ་མུད་འཛིན་པ། མེར་མིག་དམར་ར་སྐྱེས་ལ་ཞོན་པ་གཡས་གྲི་ཀཊྚཱ་ར། གཡོན་གྱིས་མིའི་མགོ་བོ་འཛིན་པ། ལྷོ་རུ་གཟའ་ལྷག་སེར་པོ་པདྨ་ལ་གནས་པ་མངའ་དང་གཞུ་འཛིན་པ། བདེན་བྲལ་དུ་ཕུར་བུ་མདོག་དཀར་པོ་གླང་པོ་ཆེ་ལ་ཞོན་བ་ཕྲེང་བ་དང་སྤྱི་བླུགས་འཛིན་པ། ནུབ་ཏུ་པདྨ་ལ་པ་བསངས་དཀར་པོ་ཕྲེང་སྐུད་
དང་སྤྱི་བླུགས་འཛིན་པ། རླུང་དུ་རུས་སྦལ་ལ་སྤེན་པ་ནག་པོ་དབྱུག་པ་དང་ཕྲེང་བ་འཛིན་པ། བྱང་དུ་སྒྲ་གཅན་དམར་ནག་ཉི་མ་དང་ཟླ་བ་འཛིན་པ། དབང་ལྡན་དུ་མཇུག་རིང་གནག་ཅིང་དུ་བའི་མདོག་རལ་གྲི་དང་སྤྲུལ་ཞགས་འཛིན་པའོ། །དེ་ནས་ཕྱི་རོལ་གྱི་ཁོར་ཡུག་ལ་ཤར་གྱི་ཕྱོགས་སུ་མེ་ཐབ་ཀྱི་སྟན་ལ་གནས་པའི་སྨིན་དྲུག་སྔོ་བསངས། ཁྱུ་མཆོག་ལ་ཞོན་པའི་སྣར་མ་དཀར་མོ། རི་དགས་ལ་ཞོན་པའི་མགོ་ནག་མོ། སྤྲུལ་ཆེན་ལ་གནས་པའི་ལག་སེར་མོ། པདྨ་ལ་གནས་པའི་ནབ་སོ་སེར་མོ། བུམ་པ་ལ་གནས་པའི་རྒྱལ་སྔོ་བསངས་བྱ་རོག་གི་སྟན་ལ་སྐག་དཀར་མོ། ལྷོ་རུ་མ་ཧེའི་སྟན་ལ་མཆུ་གུར་ཀུམ་ལྟ་བུ། རྡོའི་སྟན་ལ་གྲེ་ལྗང་གུ་།རྡོའི་སྟན་ལ་སྤོ་ལྗང་གུ་།གླང་པོ་ཆེ་ལ་ཞོན་པའི་མེ་བཞི་དཀར་མོ། རྨ་བྱ་ལ་གནས་པའི་ནག་པ་ལྗང་གུ་།ཁྱོགས་ལ་ཞོན་པའི་ས་རི་སེར་མོ། ལུག་ལ་གནས་པའི་ས་ག་ནག་མོ། ནུབ་ཏུ་ངང་པ་ལ་གནས་པའི་ལྷ་མཚམས་སྔོ་བསངས། རུས་སྦལ་ལ་གནས་པའི་སྣོན་སེར་མོ། ལ་ཕུག་ལ་གནས་པའི་སྣུབས་སེར་མ། སྟན་ནང་ཚངས་ཅན་ལ་གནས་པའི་ཆུ་སྟོད་ནག་མོ། ཤིང་ཤར་ལ་གནས་པའི་ཆུ་སྨད་དཀར་མོ། སེང་གེའི་སྟན་ལ་གྲོ་བཞིན་སྔོ་བསངས། རོ་ལ་གནས་པའི་བྱི་བཞིན་དཀར་མོ། དོམ་ལ་གནས་པའི་མོན་གྲུ་སེར་སྐྱ། སྤྲིན་ལ་གནས་པའི་མོན་གྲེ་ནག་མོ། ངང་པ་ལ་གནས་པའི་ཁྲུམས་སྟོང་ལྗང་གུ་མོན་གྲུ་ནས་ཁྲུམས་སྨད་ཀྱི་བར་གྱི་བཞི་པོ་མ་ཕྱི་ལ་ཆང་པ་ཁ་སྐང་བ་ཡིན་ཡང་གང་ན་འདི་རྣམས་མ་ངེས་པས་སྤར་དཔྱང་དགོས་།གླང་ལ་ཞོན་པའི་ཁྲུམས་སྨད་སེར་མོ། འཁོར་ལོ་ལ་གནས་པའི་ནམ་གྲུ་སེར་སྐྱ། རྟ་ལ་ཞོན་པའི་དབྱུ་གུ་དཀར་མོ། ཡི་དགས་ཀྱི་སྟན་ལ་བྲ་ཉེ་ལྗང་གུ་སྟེ། ལྷ་མོ་ཉི་ཤུ་རྩ་བརྒྱད་པོ་འདི་རྣམས་གཡོ་བའི་སྟོད་གཡོགས་གྱོན་པ། ཐལ་མོ་སྦྱར་བ་དག་ཏུ་བསྒོམ་པར་བྱའོ། །དེའི་ཕྱི་རོལ་འཁོར་ཡུག་གསུམ་པ་ལ་ཤར་དུ། ས་སྲུང་དཀར་པོ་ལ་ཞོན་པའི་དབང་པོ་རྡོ་རྗེ་འཛིན་པ། ལྷོ་རུ་མ་ཧེ་ལ་ཞོན་པའི་གཤིན་རྗེ་ནག་པོ་དབྱུག་པ་འཛིན་པ། ནུབ་ཏུ་ཆུ་སྲིན་ལ་ཞོན་པའི་ཆུ་ལྷ་དཀར་པོ་གདེངས་ཀ་བདུན་དང་ལྡན་པ། སྤྲུལ་ཞགས་དང་དུང་འཛིན་པ། བྱང་དུ་མི་ལ་ཞོན་པའི་ཀུ་བེ་ར་སེར་པོ་ལྕགས་ཀྱུ་དང་བེ་ཅོན་འཛིན་པ། མེར་ར་སྐྱེས་ལ་ཞོན་པའི་མེ་ལྷ་དམར་པོ་བླུགས་གཟར་དང་སྤྱི་བླུགས་
འཛིན་པ། བདེན་བྲལ་དུ་རོ་ལ་ཞོན་པའི་སྲིན་པོའི་བདག་པོ་སྔོན་པོ་རལ་གྲི་དང་ཕུབ་འཛིན་པ། རླུང་དུ་རི་དགས་ལ་ཞོན་པའི་རླུང་ལྷ་སྔོན་པོ་རླུང་རས་འཛིན་པ། དབང་ལྡན་དུ་ཁྱུ་མཆོག་ལ་ཞོན་པའི་དབང་ལྡན་དཀར་པོ། ཕྱག་ན་རྩེ་གསུམ་དང་ཐོད་པ་འཛིན་པ། འདིའི་གཡོན་ལོགས་སུ་ངང་པ་ལ་ཞོན་པའི་ཚངས་པ་སེར་པོ་གདོང་བཞི་པ་ཕྱག་བཞི་པ་ཐལ་མོ་སྦྱར་བའི་ཕྱག་དག་གིས་བགྲང་ཕྲེང་འཛིན་ཞིང་དབྱུག་པ་དང་སྤྱི་བླུགས་འཛིན་པ། བདེན་བྲལ་དང་ཆུ་ལྷ་དག་གི་བར་དུ་ནོར་འཛིན་མ་སེར་མོ་ཕྱག་ན་གསེར་གྱི་བུམ་པ། དེའི་གཡོན་ལོགས་སུ་གཤིན་རྗེའི་བྲན་མོ་སྔོ་བསངས་རལ་གྲི་དང་ཕུབ་འཛིན་པའོ། །དེ་ནས་ཡན་ལག་དགོད་པ་ནི། ཨོཾ་ཨཱཿཧཱུཾ་ས་སྭཱ་ཧཱ། མིག་དག་ལ་པྲཾ། རྣ་བ་དག་ལ་བུཾ། སྣ་དག་ལ་མཾ། ཁ་དག་ལ་ཏྲཾ། རེག་བྱ་དག་ལ་ཛྲིཾ་ངོ༌། །དེ་ནས་རང་གི་སྙིང་གར་གནས་པའི་འོད་ཟེར་གྱི་འོད་ཟེར་སྣ་ཚོགས་པའི་འཇིག་རྟེན་གྱི་ཁམས་སུ་སྤྲོས་ཏེ། དེས་ཡེ་ཤེས་སེམས་དཔའ་དང་དམ་ཚིག་སེམས་དཔའ་ལྷན་ཅིག་ཏུ་འོ་མ་དང་ཆུ་ལྟར་རོ་གཅིག་ཏུ་གྱུར་བར་བལྟས་ནས། ཨབྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏཱ་ཞེས་པས་དབང་བསྐུར་བར་གསོལ་བ་གདབ་པར་བྱ་ཞིང༌། ཇི་ལྟར་བལྟམས་པ་ཙམ་གྱིས་ནི། །ཞེས་པ་ལ་སོགས་པས་ཆུའི་དབང་བསྐུར་བར་བྱའོ། །དེ་ནས་མཆོད་པ་དང་བསྟོད་པ་བྱ་སྟེ། སངས་རྒྱས་ཐམས་ཅད་སྐྱེད་མཛད་ཅིང༌། །སེམས་ཅན་ཀུན་ལ་ཕན་མཛད་མ། །སེམས་ཅན་ཀུན་གྱི་དོན་བསྒྲུབ་ཕྱིར། །བསྲུང་བ་ལྔ་ལ་ཕྱག་བགྱིའོ། །གང་རྣམས་ཚིམ་པ་ཙམ་གྱིས་ནི། །སེམས་ཅན་དགེ་ཞིང་རྒྱལ་བར་མཛད། །ཕུན་ཚོགས་ཐམས་ཅད་སྦྱིན་མཛད་པའི། །གཟའ་རྣམས་དགུ་པོ་ཁྱོད་ལ་འདུད། །རྒྱུ་སྐར་ཉི་ཤུ་རྩ་བརྒྱད་པོ། །ཕྱོགས་རྣམས་སུ་ནི་བདུན་བདུན་གནས། །ནད་ཀུན་ཉེ་བར་ཞི་བའི་ཕྱིར། །དེ་རྣམས་ལ་ནི་གུས་ཕྱག་འཚལ། །གང་གི་བསྲུང་བའི་ཆོ་ག་ཡིས། །སེམས་ཅན་བདེ་ཞིང་རྒྱལ་བར་མཛད།། ཕྱོགས་དང་ཕྱོགས་བྲལ་བཞུགས་པ་ཡི། །འཇིག་རྟེན་སྐྱོང་ལ་ཕྱག་བགྱིའོ། །ཞེས་པ་ནི་རྣལ་འབྱོར་གཉིས་པའོ། །དེ་ནས་དཔྲལ་བ་དང་མགྲིན་པ་དང་སྙིང་ག་རྣམས་སུ་དཀར་པོ་དང་དམར་པོ་དང་ནག་པོའི་ཨོཾ་ཨཱཿཧཱུཾ་གི་ཡི་གེ་ངེས་པར་བརྟག་པར་བྱ་ཞིང༌། ཇི་སྲིད་འདོད་པར་བསྒོམ་
པར་བྱའོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དམ་ཚིག་སེམས་དཔའི་དཀྱིལ་འཁོར་ལྟ་བུའི་ཡེ་ཤེས་སེམས་དཔའི་དཀྱིལ་འཁོར་མདུན་གྱི་ནམ་མཁའི་ཕྱོགས་སུ་བཞུགས་པར་བལྟས་ནས་དགུག་པ་ལ་སོགས་པ་ནི་སྔར་བཞིན་དུ་བྱའོ་ཞེས་པ་ནི་ཕྲ་མོའི་རྣལ་འབྱོར་རོ། །དེའི་རྗེས་སུ་བཟླས་པ་བྱ་སྟེ། དགུག་པ་ལ་སོགས་པ་ཅན་སྔར་བཞིན་དུ་ཤེས་པར་བྱའོ་ཞེས་པ་ནི་བཟླས་པའི་རྣལ་འབྱོར་རོ། །བྷྲཱུཾ་ལས་རིན་པོ་ཆེའི་སྣོད་དུ་ཁཾ་ཡིག་ལས་བཟའ་བ་ལ་སོགས་པ། ཨོཾ་ཨཱཿཧཱུཾ་གིས་བྱིན་གྱིས་བརླབས་ནས། དེ་རྣམས་ཀྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་བཀུག་ནས་དེ་ཉིད་དུ་ཐིམ་པར་བསམ་པར་བྱའོ། །དེ་ནས་འཇིག་རྟེན་སྐྱོང་བ་རྣམས་དགུག་པའི་ཕྱག་རྒྱ་བསྟན་ལ། མཆོད་ཡོན་ལ་སོགས་པས་མཆོད་དེ། ཨོཾ་མ་ཧཱ་པྲ་ཏི་ས་རཱ་ཡཻ་སྭཱ་ཧཱ། ཨོཾ་མ་ཧཱ་སཱ་ཧ་སྲ་པྲ་མརྡྷ་ནྱི་སྭཱ་ཧཱ། ཨོཾ་མ་ཧཱ་མཱ་ཡཱུ་ཪྻཻ་སྭཱ་ཧཱ། ཨོཾ་མ་ཧཱ་ཤཱི་ཏ་བ་ཏྱཻ་སྭཱ་ཧཱ། ཨོཾ་མ་ཧཱ་མནྟྲཱ་ནུ་སཱ་རེ་ཎྱེ་སྭཱ་ཧཱ། སངས་རྒྱས་བདག་ཉིད་ཆེན་པོ་ཉིད། །རིག་པའི་ལྷ་མོ་སྟོབས་ཆེན་མོ། །བདག་གི་ཁྲོ་གཉེར་ཅན་ཉིད་དང༌། །ལྷ་མོ་སྒྲོན་མ་དེ་བཞིན་སྐྱོ། །རྡོ་རྗེ་ལྕགས་སྒྲོག་དཀར་མོ་གང༌། །དཀར་མོ་ཆེན་མོ་དེ་བཞིན་ཉིད། །རྡོ་རྗེ་ནག་མོ་ཕོ་ཉ་མོ། །དེ་བཞིན་རྡོ་རྗེའི་ཕོ་ཉ་གཞན། །ཞགས་བཟང་རྡོ་རྗེ་ཞགས་པ་མ། །རྡོ་རྗེ་ཞགས་པ་སྟོབས་ཆེན་མོ། །དེ་བཞིན་ནོར་ཅན་སྐལ་ཆེན་མ། །པདྨ་འཁྱིལ་པ་ཉིད་དང་ཡང༌། །མེ་ཏོག་སོ་མ་ནོར་བུའི་གཙུག །གསེར་གྱི་སྐྲ་མ་སེར་སྐྱ་མ། །གཟི་བརྗིད་ཆེན་མོ་དེ་བཞིན་དུ། །ནོར་ཅན་ལྷ་མོ་གློག་ཕྲེང་མ། །སྲིན་མོ་དང་ནི་རལ་གཅིག་མ། །སངས་རྒྱས་ཞིང་གི་འདྲེན་པ་མོ། །ཐོད་པ་ཅན་མ་སྐལ་ཆེན་མ། །དེ་བཞིན་ནོར་ཅན་ལང་ཀའི་དབང༌། །གཞན་ཡང་སེམས་ཅན་རྗེས་འཛིན་པའི། །རིག་མ་མང་པོ་འདི་ལྟ་སྟེ། །ནག་པོ་གཙིགས་མ་གྲུལ་བུམ་མ། །དུང་ཅན་མ་དང་པདྨའི་མཚན། །འཕྲོག་མ་སྐྲ་ལྗང་དཔལ་ལྡན་མ། །སེར་སྐྱ་མོ་ནི་ལྗང་གུ་སྟེ། །འཕྱང་མ་རབ་ཏུ་འཕྱང་བ་མོ། །ལྷ་མོ་ཞགས་ནག་བུམ་ལྟོ་མ། །གཤིན་རྗེའི་ཕོ་ཉ་གཤིན་རྗེའི་སྲིན། །འབྱུང་པོ་ཟ་མ་འབྱུང་མོ་རྣམས། །གཏོར་མ་མེ་ཏོག་བདུག་པ་དྲི། །སྒྲོན་མ་འདི་
ནི་སོ་སོར་བཞེས། །ཞལ་ཟས་དག་ཀྱང་དབུལ་བགྱི་ཞིང༌། །དུས་ཀུན་དུ་ནི་བསྲུང་བར་མཛོད། །རྣམ་པ་ཀུན་ནི་བདག་དང་ནི། །འཁོར་བཅས་མ་ལུས་སེམས་ཅན་གྱི། །ཉེ་བར་འཚེ་ཉིད་ཐམས་ཅད་དང༌། །འཇིགས་པ་ཐམས་ཅད་ཉམས་པར་གྱིས། །དེ་བཞིན་རྟག་ཏུ་མྱུར་བར་ནི། །འཆི་ལྟས་ཀུན་དང་ཆེར་འབབ་པའང༌། །ལོ་བརྒྱ་རུ་ནི་འཚོ་གྱུར་ཅིག །རྟག་ཏུ་སྟོན་བརྒྱ་མཐོང་བར་ཤོག །རྟག་ཏུ་གྲུབ་པའི་སྔགས་ཀྱི་གཞི། །བདེ་ལེགས་དང་ནི་གཞི་ཚུགས་གྱུར། །སླར་ཡང་མཆོད་དེ། མ་རྙེད་ཅེས་པ་ལ་སོགས་པས་བཟོད་པར་གསོལ་ཏེ་གཤེགས་སུ་གསོལ་བར་བྱའོ། བསྲུང་བ་ལྔའི་མཆོད་བའི་ཆོ་ག་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ། ནགས་ཀྱི་རིན་ཆེན་གྱི་ཞལ་སྔ་ནས་དང༌། གཞོན་ནུ་དཔལ་གྱིས་བསྒྱུར་བའོ།།