རང་རྟགས་རྡོ་རྗེའི་སྒྲུབ་པའི་ཐབས་བདུན་པ་ལས་ཀྱི་བྱེ་བྲག་བཅུ།
ཡེ་ཤེས་རྡོ་རྗེ།
དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གདོན་སྟོང་ཕྲག་བརྒྱད་ཅུ་དང་ནད་རྣམས་ལས་རྣམ་པར་རྒྱལ་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས་གནས་ཁང་ཡིད་དང་མཐུན་པར་མཎྜལ་གྱི་སྟེང་དུ་བུམ་པ་མཚན་ཉིད་དང་ལྡན་པའི་ནང་དུ། བུམ་རྐྱེན་རྣམས་རྫོགས་པར་བྱས་ནས། དེ་ནས་བདག་ཉིད་ཀྱི་ཚོགས་རྫོགས་པར་བྱ་བ་སྔར་དང་འདྲ་བར་བྱས་ལ། དེ་ནས་ཧཱུཾ་ལས་བྱུང་བའི་ཁྲོ་བོ་པདྨ་མཐར་བྱེད་སྐུ་མདོག་དམར་སྐྱ་ཞལ་བཞི་ཕྱག་བརྒྱད་པ། ལྕགས་ཀྱུ་དང་ཐོ་བ་དང༌། རྔེའུ་ཆུང་དང༌། ཆུ་སྲིན་དང༌། མ་ཧེ་དང༌། རྩེ་ལྔ་པ་དང༌། མདའ་གཞུ་འགེངས་པ་སྣ་ཚོགས་པའི་རྒྱན་གྱིས་བརྒྱན་པ། ཧཱུཾ་དང་ཕཊ་རྒྱུན་དུ་སྒྲོགས་པའི་གཟུགས་སུ་བྱས་ཏེ་ཡེ་ཤེས་ཀྱི་འཁོར་ལོ་རབ་ཏུ་བསྐུལ་ལ། དོན་གཉིས་བྱས་ལ་དེ་ནས་བདག་དོན་དུ་འདོད་པའི་དོན་ལེགས་པ་གང་ཡིན་པ་བསྒྲུབས་ཏེ་མ་རུངས་པར་བྱས་པའོ། །དེ་ནས་བུམ་པའི་ནང་དུ་བསྟིམས་ཏེ་ལེགས་པར་ངེས་པའི་འདོད་དོན་བྱས་ཏེ། ཉིད་ཀྱི་སྙིང་གའི་ཡེ་ཤེས་ཀྱི་རྡོ་རྗེ་ནས་ཙམ་ལ་དམིགས་ལ། ཡར་ངོའི་ཚེས་བརྒྱད་ལ་གོས་དམར་པོ་དྲི་མ་མེད་པ་གྱོན་ཏེ། ཨ་འབྲས་ཀྱི་ཕྱེ་མ་ལ་བསྔགས་ཏེ་བུམ་པ་ལ་བསྟིམ་པར་བྱའོ། །ཨོཾ་ཨ་པྲ་ཏི་ཧ་ཏ་བཛྲ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སྟོང་ཕྲག་གཉིས་བཟླས་ཏེ། དེ་ནས་འོད་དུ་ཞུ་ལ་ཡེ་ཤེས་ཀྱི་བདུད་རྩིར་དམིགས་ལ་ལེན་བདུན་ནམ་ཉི་ཤུ་རྩ་གཅིག་གམ་བརྒྱ་རྩ་བརྒྱད་དུ་ཁྲུས་ཆུ་ནས་བཏོན་ན་གང་ལ་ལས་ལ་སྦྱར་བ་དེ་ཉིད་གདོན་དང་ནད་ལས་ཐར་བར་འགྱུར་རོ། །དེ་དག་གིས་ནི་རྒྱུད་དུ་ཐམས་ཅད་དུ་མ་འཕམ་པ་ཞེས་བྱ་བའི་ཚིག་གིས་སྒྲུབ་པ་ལས་བཞིར་གཏན་ལ་ཕབ་པའོ། །རང་རྟགས་རྡོ་རྗེའི་སྒྲུབ་པའི་ཐབས་བདུན་པ་ལས་ཀྱི་བྱེ་བྲག་བཅུ་སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།