ཚངས་པའི་གདོན་ལས་ཐར་བར་བྱེད་པའི་མན་ངག།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཚངས་པའི་གདོན་ལས་ཐར་བར་འདོད་པས། སྔོན་དུ་འཇུག་དུས་དང་མཚན་ཉིད་བསྟན་ཏེ། ཁ་ཏོན་དང་དཀའ་ཐུབ་ལ་དགའ་བ་དང༌། ཚངས་པར་སྤྱོད་པའི་མི་ལ་ཡར་ངོའི་ཚེས་བརྒྱད་དང་ཉ་ལ་ཚངས་པའི་གདོན་གྱིས་འཛིན་ཏེ། ཡང་ན་བྲམ་ཟེ་དང་ཚངས་སྤྱོད་ཉམས་པ་ལ་འཇུག །ཞུགས་པའི་མཚན་མ་ནི་གཤེ་བ་དང༌། ཁ་རྒོད་པ་དང་གར་བྱེད་པ་དང༌། ཅིས་ཀྱང་མི་སྐྲག །སྨྲ་བར་མི་བྱེད། རང་གི་ལུས་ལ་རྡོ་ལ་སོགས་པས་རྡེག་པ་དང༌། རིག་བྱེད་བསྟན་བཅོས་སྨྲ་བར་བྱེད་པ་སྔགས་འཆང་བ་ལ་ལན་ལྡོན་པར་བྱེད་པའོ། །དེ་ནས་གདོན་ལས་ཐར་པའི་ཐབས་ནི་གཏོར་མ་སྦྱིན་ཏེ། ནས་བྲེ་གསུམ་བཙོས་པའི་ཆང་དང༌། ཁུར་པ་དང༌། མེ་ཏོག་ཕྲེང་བ་དམར་པོ་དང༌། ཤིང་ཐོག་སྣ་ཚོགས་པ་དང༌། ཏིལ་ནག་པོ་དང་བཅས་པའི་གཏོར་མ་རི་རྩེ་ལ་བྱིན་ལ། དེ་ནས་ནད་པ་དེ་གོས་སྔོན་པོ་གྱོན་ལ་ལྷོ་ཕྱོགས་སུ་ཁྲུས་བྱས་ལ་ཤིང་ཀ་ར་བཱི་རའི་རྩ་བ་མེ་ཏོག་ཤུན་ལྤགས་སུ་བཅས་པ་ཤིང་པ་ཏ་ལ་དང༌། གསོ་མ་
དང། བིལ་བའི་རྩ་བ་དང༌། སྒྲོན་ཤིང་དང༌། ཤིང་རྩ་པི་པི་ལིང་དང། ན་ལེ་ཤམ་དང༌། རྩ་བ་ལྔ་དང༌། སྒོག་སྐྱ་རྣམས་དང༌། མར་ཕུལ་བདུན་དང༌། བའི་གཅིན་སྲང་ཉི་ཤུ་སེང་ལྡིང་ཤུན་ལྤགས་བཤུས་པ་སྲང་ཉི་ཤུ་རྩ་བཞི་བཙོས་ནས་སྔ་མ་ལྟར་བྱིན་ན་ཚངས་པའི་གདོན་ཐམས་ཅད་ལས་ཐར་བར་ངེས་སོ། །སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།