ཞི་བའི་སྦྱིན་སྲེག་གི་ཆོ་ག་རྒྱུད་ཀྱི་ཞི་བའི་མཚན་དོན།
དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །རྡོ་རྗེ་རྣམ་པར་འཇོམས་པའི་སྦྱིན་སྲེག་གི་ཆོ་ག་སྒྲུབ་པ་པོ་དམ་ཚིག་དང་ལྡན་པས། གནས་ཁང་ཡིད་དང་མཐུན་པར་སྦྱིན་སྲེག་གི་ལས་བརྩམ་པར་བྱའོ། །དེ་ལ་ཞི་བའི་ཐབ་ཁུང་ནི་ཟླུམ་པོ་དཔངས་སུ་སོར་དྲུག་པ། ཁ་ཁྱེར་ལ་སོར་བཞི་པ་རྡོ་རྗེ་ར་བ་དང་བཅས་པ་དབུས་པདྨ་འདབ་མ་བརྒྱད་པ་དཀར་པོ། གོང་རས་དཀར་པོ། མུ་ཁྱུད་སེར་པོ། ལོགས་རྣམས་ཀྱང་དཀར་པོ། མེ་ཏོག་གི་སིལ་མ་དཀར་པོའི་གཅལ་བཀྲམ་མོ། །དེ་ནས་རྩྭ་ཀུ་ཤའི་གདན་བྱས་ལ་ཡང་དོའི་ཚེས་གཅིག་ནས་བརྩམས་ཏེ། བདག་ཉིད་གོས་དཀར་པོ་དྲི་མ་མེད་པ་གྱོན་ལ་བྱང་དུ་ཁ་བལྟས་ལ་ཞི་བའི་སེམས་བསྒོམས་ཏེ། པདྨའི་དཀྱིལ་འཁོར་ནང་དུ་འདུག་ལ། རྫས་ནི་ནས་དང༌། འོ་ཐུག་དང༌། ཞོ་དང༌། འབྲས་དང༌། སྤོས་དང༌། ཏིལ་དང༌། སཱ་ལུའི་ཆན་དང༌། མེ་ཏོག་དཀར་པོ་དང༌།
ཐང་ཆུ་དྲི་ཞིམ་པ་ལ་སོགས་པ་དང༌། མར་ལ་སོགས་བ་རྣམས་བ་སོགས་ལ་ཡམ་ཤིང་རློན་བའི་དུས་ན་འོ་མ་ཡོད་པ་བཅད་ལ་བསྐམས་ཏེ། ཐབ་ཁུང་དུ་བཅེར་ལ་ཡམ་ཤིང་དྲི་ཞིམ་པོ་དགོན་པར་གནས་པའི་བ་ལང་གི་ལྕི་བ་སྤྲང་རྩི་དང་མར་གྱིས་བྱུགས་ལ་བཅེར། ཞི་བའི་དགང་གཟར་ཟླུམ་པོ་ཡིད་ཙམ་ཁ་གདེངས་པ་འཁོར་ལོས་མཚན་པའོ། །དགང་བླུགས་གཉིས་ཀའི་ཡུ་བ་སྲིད་དུ་ཆང་པ་ལྔའོ། །ཟབས་སུ་སོར་གཅིག་བརྐོས་ཏེ། མཐེ་བོང་གི་ས་ན་མོ་ལ་ཐུག་པའི་ཕྱེད་ནི་མར་ལའོ། །དེ་བས་ཆུང་བ་ཐ་མར་བྱའོ། །དེའི་རྒྱུ་ནི་ཞི་བ་དཀར་པོ་ཤིང་དག་དྲི་ཞིམ་པའི་ཤིང་ལས་བྱའོ། །དེ་ནས་མེ་ལྷ་དྲང་སྲོང་རིད་པ་སྤྱན་དྲངས་ཏེ་བསྟིམས་ལ། དེ་ཉིད་ཀྱི་ཡེ་ཤེས་སེམས་དཔའ་བསྟིམས་ལ་སྲེག་པའི་སྔགས་ནི། ཨེ་ཧྱེ་ཧི་མ་ཧཱ་བྷཱུ་ཏ་དེ་བྀ་ར་ཥི་དྭི་ཛ་བ་ར་མ། གྲྀ་ཧི་ཏྭཱ་ཧུ་ཏི་མ་ཧཱ་རཱཾསྨི་སཾནྣི་ཧི་ཏོ་བྷ་བཱ། ཨོཾ་ཨགྣ་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་སྭཱ་ཧཱ། དེ་ལྟར་མེ་ལྷ་སྤྱན་དྲངས་ལ་དགང་བླུགས་གསུམ་དབུལ་བར་བྱའོ། །མེ་ལྷ་སྲེག་རྫས་དབུལ་བའི་སྔགས། ཨོཾ་ཨགྣ་ཡེ་ཧ་བྱ་ཀ་བྱ་བ་ཧཱ་ན་ཡཱ་དི་བྱ་དི་བྱ་བ་ཧ་ན་ཡ་སྭཱ་ཧཱ། མེ་ལྷ་ལ་གཡས་སུ་བསྐོར་ཞིང་བསང་གཏོར་བྱའོ། །མར་ལ་སོགས་པ་སྲེག་པའི་སྔགས་ནི། ཨོཾ་ཀཱི་ལི་ཀཱི་ལ་ཡ་བཛྲ་བྷི་མ་རུ་དྲ་པྲ་ཀི་ཏི་མ་ཧཱ་ཀྲོ་དྷ་བི་ཛ་ནི་ཀྲྀནྡྷ་ཧཱུཾ་ཕཊ། བནྡྷ་བནྡྷ་ཧ་ཞེས་ཞི་བ་དང་རྒྱས་པ་དང་མངོན་སྤྱོད་གསུམ་ཀ་ལ་བྱའོ། །དང་པོ་རྡོ་རྗེ་རྣམ་པར་འཇོམས་པ་ལ་མཆོད་ཅིང་དེ་ནས་ཁྲོ་བོ་རྣམས་དང༌། རྒྱལ་པོ་བཞི་དང༌། ལྷ་མོ་བརྒྱད་དང༌། ཕྱོགས་སྐྱོང་བཅུ་དང༌། སྒོ་མ་རྣམས་རིམ་པས་མཆོད་ལ། བྱུག་སྤོས་མེ་ཏོག་དང༌། མཆོད་པས་མཆོད། དེ་ནས་ཡོན་བདག་གི་དོན་དུ་གཏོར་མ་བཏང༌། གཞན་དོན་དུ་བྱེད་ན་གོས་དང་ཁྲུས་ལ་སོགས་པ་ལེགས་པར་བྱ་སྟེ། དགའ་སྟོན་བྱའོ། །དམིགས་པའི་བགེགས་ལ་སྲེག་བླུགས་ཀྱིས་ལེགས་པར་མཆོད་ལ། ཆེ་གེ་མོའི་ནད་དང་རླུང་དང་མཁྲིས་པ་དང་བད་ཀན་དང་ལྡན་པ་དང༌། འདུས་པ་ལས་གྱུར་པ་རྣམས་ཞི་བར་གྱུར་ཅིག་སྭཱ་ཧཱ། ཞི་བའི་སྦྱིན་སྲེག་གི་ཆོ་ག་རྒྱུད་ཀྱི་ཞི་པའི་མཚན་དོན་རྫོགས་སོ།།