རྒྱུད་ཀྱི་རྒྱས་པ་ཞེས་བྱ་བའི་ཚིག་ལེགས་པར་སྒྲུབ་པ་རྡོ་རྗེ་རྣམ་འཇོམས་ཀྱི་རྒྱས་པར་བྱེད་པའི་སྦྱིན་སྲེག་གི་ཆོ་ག།
དཔལ་རྡོ་རྗེ་འཛིན་པ་ལ་ཕྱག་འཚལ་ལོ། །རྒྱས་པའི་སྦྱིན་སྲེག་བྱེད་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས་མེ་ཏོག་ལ་
སོགས་པ་དྲི་ཞིམ་པོས་བྱུགས་ལ། ཡང་ན་གནས་ཁང་གི་ནང་རྣམས་སུ་ས་སེར་པོའི་ལྡེ་གུའམ་པའི་ལྕི་བ་གུར་གུམ་གྱི་ཆུས་ལེགས་པར་སྦྱར་ལ་རྟག་ཏུ་བྱུག་པར་བྱའོ། །ད་ནས་རྒྱས་པའི་ཐབ་ཁུང་གྲུ་བཞི་པ། ངོས་རེ་ལ་ཁྲུ་རེ་ཡོད་པ་ཁ་ཁྱེར་མཐོ་གང་གི་ཚད་ཡོད་པ། ཡར་གྱི་དཔངས་སུ་མཐེ་བོང་གི་སེན་མོ་ལ་ཐུག་གི་ཚད་ལ་འཇིམ་པའི་འབུར་དུ་རྡོ་རྗེས་ཁྱབ་པར་དགོད་དོ། །དེའི་དབུས་སུ་པདྨ་མཛུབ་གང་པ་སེར་པོ་འབུར་དུ་དོད་པར་བྱའོ། །དེ་ཉིད་ཀྱི་དཔངས་སུ་སོར་བཞི་པ་བརྩིགས་ཏེ་བྱུག་སྤོས་སེར་པོ་ལ་སོགས་པས་བྱུག་པར་བྱའོ། །དེ་ལྟར་རྒྱས་པ་ལ་ནི་རྫས་ནི་མངར་གསུམ་དང༌། སྦྲང་རྩི་དང་མར་དང་ཞོ་སྦྱར་བ་དང༌། ཏིལ་ནག་པོ་དང༌། འབྲས་སཱ་ལུ་སྐམ་པོ་དང༌། ཞོ་སྦྱར་བ་ལ་སོགས་པ་གཟུང་སྟེ། བདག་ཉིད་བཀྲ་ཤིས་པའི་སྐྱིལ་མོ་ཀྲུང་གིས་ཁ་ཤར་ཕྱོགས་སུ་བལྟས་ཏེ་འདུག་པར་བྱའོ། །ཡམ་ཤིང་ཀུ་ཤ་དང་ཁམ་བུ་ལ་སོགས་པའི་འབྲས་བུ་དང༌། མངར་དང་ལྡན་པའི་ཤིང་ལས་བྱ་སྟེ། ཡམ་ཤིང་གི་ཚད་ནི་སྦོམ་ཕྲ་ཆག་གང་བ་སྲིད་དུ་ཁྲུ་གང་པ་ཞོ་དང་མར་སྦྱར་བས་བྱུགས་པའོ། །དེ་ཡང་ཉའི་སྔ་དྲོ་ནས་ཕྱི་མ་སྟོང་གི་བར་དུ་ཉིན་རེ་ལ་ལན་གསུམ་བྱའོ། །རྒྱལ་རིགས་སམ་རི་ལ་མེ་ཤོར་བ་ལས་མེ་བླངས་ཏེ། མེ་ལྷ་སྤྱན་དྲངས་པ་ལ་སོགས་པ་སྔ་གོང་གིས་བྱ། སྲེག་རྫས་དབུལ་བར་བྱའོ། །སྲེག་རྫས་དབུལ་བ་ལ་སོགས་པའི་དགང་བླུགས་ནི་གྲུ་བཞི་པ་ཕྱིའི་དབྱིབས་གཞུའི་དབྱིབས་ལྟ་བུ་ལ་རིན་པོ་ཆེས་མཚན་པར་དབུལ་བའོ། །དེ་ལྟར་བྱས་ན་ཚེ་དང་ལོངས་སྤྱོད་འཁོར་དང་སྡེ་ལ་སོགས་པ་རྒྱས་པར་འགྱུར་རོ། །རྒྱུད་ཀྱི་རྒྱས་པ་ཞེས་བྱ་བའི་ཚིག་ལེགས་པར་སྒྲུབ་པ། རྡོ་རྗེ་རྣམ་འཇོམས་ཀྱི་རྒྱས་པར་བྱེད་པའི་སྦྱིན་སྲེག་གི་ཆོ་ག་རྫོགས་སོ།།