ཚ་བའི་རིམས་ཀྱིས་དགྲ་བསད་པའི་རལ་གྲིའི་འཁོར་ལོ་ཞེས་བྱ་བ།
ཡེ་ཤེས་རྡོ་རྗེ།

---

^{[མ་དཔེ་གཟིགས་ན་འདིར་གནོན།]}

དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །བསྒྲུབ་བྱ་རྣམས་ཚ་བའི་རིམས་ཀྱིས་རྨུགས་ཤིང་མྱོས་པར་བྱེད་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས། མཎྜལ་གྲུ་གསུམ་པར་ར་དམར་པོའི་ཁྲག་གིས་བྱུགས་པའི་སྟེང་དུ་བུམ་པ་ཚད་ལྡན་ལ་ཁྲག་སྣ་ཚོགས་བྱུགས་ལ། དེའི་ནང་དུ་ཚ་བའི་སྨན་སྣ་ཚོགས་དང༌། དུག་སྣ་ཚོགས་བླུགས་ལ་གཙོ་བོ་ལ་མཆོད་པ་ལ་སོགས་པ་བྱས་ལ། བུམ་པའི་ནང་དུ་བསྒྲུབ་བྱ་དེ་བཀུག་ཅིང་ཚ་བ་སྣ་ཚོགས་ལ་སྔགས་འདི་འབུམ་ཕྲག་བདུན་བཟླས་ལ་བུམ་པར་བླུགས་སོ། །ན་མཤྩཎྜ་བཛྲ་པཱ་ཎི་ཨ་མུཀ་མཱ་ར་ཡ་ཕཊ་ཅེས་ལས་སྦྱོར་གྱི་དུས་ན་བུམ་པའི་ཁྲག་དང་ཆུ་ལ་སོགས་པ་སྟེ། བསྒྲུབ་བྱའི་ཁང་པ་ལ་གཏོར་ན་ཚ་བའི་རིམས་བབས་ཏེ། བསྒྲུབ་བྱ་མ་རུངས་པར་འགྱུར་བར་ངེས་སོ། །ཚ་བའི་རིམས་ཀྱིས་དགྲ་བསད་ཕའི་རལ་གྲིའི་འཁོར་ལོ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།