སེམས་ཅན་ཐམས་ཅད་རྨུགས་པར་བྱེད་པའི་ལས་ཀྱི་མཐའ་གཟི་མདངས་ཆེན་མོ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །བསྒྲུབ་བྱ་མྱོས་པའི་ལས་རྨུགས་ཤིང་དྲན་པ་ཉམས་པར་འདོད་ན། ཤྲཱི་ཁཎྜའི་ཁུ་བ་ལ་སྙིང་པོ་བསྡུས་པ་སྟོང་ཕྲག་ལྔ་བཟླས་ནས། ད་དུ་རའི་ལོ་མ་བརྡུངས་པ་བཅིར་བའི་ཁུ་བ་དང་སྦྱར་ནས་སྙིང་པོའི་གཤམ་ལ་ཆེ་གེ་མོ་མྱོས་པར་གྱིས་ཤིག །ཅེས་བཟའ་བཏུང་གང་ཡང་རུང་བ་ལ་སྦྱར་ནས་བྱིན་ན། མྱོས་པར་འགྱུར་བ་ལ་ཐེ་ཚོམ་བྱ་མི་དགོས་སོ། །གྲོང་ཁྱེར་ཙམ་མྱོས་ཤིང་རྨུགས་པར་འདོད་ན། བསྙེན་པ་སྔ་མ་ལྟར་བྱས་ལ་བིལ་པའི་ཤིང་ལ་མེ་སྤར་ལ། གྲོང་ཁྱེར་གྱི་མཐའ་མ་བསྐོར་ཞིང་གྲོང་ཁྱེར་ཆེ་གེ་མོའི་མི་རྣམས་མྱོས་པར་གྱུར་ཅིག་སྭཱ་ཧཱ་ཞེས་བཟླས་པས་ཉིན་ཞག་བདུན་དུ་རྨུགས་ཤིང་དྲན་པ་ཉམས་པ་ལ་ཐེ་ཚོམ་བྱར་མེད་དོ། །ཡུལ་ཁམས་ཙམ་རྨུགས་པར་འདོད་ན་ཤིང་སྣ་བཅུ་བདུན་གྱི་དུ་བས་མཐའ་མ་བསྐོར་ཞིང་ཡུལ་ཆེ་གེ་མོའི་མི་རྣམས་རྨུགས་པར་གྱུར་ཅིག་སྭཱ་ཧཱ་ཞེས་བཟླས་པས་ཉིན་ཞག་བདུན་གྱི་བར་དུ་རྨུགས་པ་ལ་ཐེ་ཚོམ་མེད་དོ། །སེམས་ཅན་ཐམས་ཅད་རྨུགས་པར་བྱེད་པའི་ལས་ཀྱི་མཐའ་གཟི་མདངས་ཆེན་མོ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།