མིག་གི་དབང་པོ་ཉམས་པ་གསོ་བའི་ཆོ་ག་གསལ་བའི་སྣང་བ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །དབང་པོ་ཉམས་པ་གསོ་བར་བྱེད་པའི་ལས་ཀྱི་བྱེ་བྲག་ནི། དང་པོ་མིག་གི་ནད་ལས་གྲོལ་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས། ཁྲུས་ཀྱི་ཆོ་གནས་ཇི་ལྟར་འབྱུང་བའི་ཁྲུས་བྱས་ཏེ། གོས་གསར་པ་གྱོན་པ་དང་སྨྱུང་བར་གནས་པ་ལ་སོགས་པ་བྱས་ནས་ཁྲུས་ལན་བརྒྱ་རྩ་བརྒྱད་བྱས་ཏེ། དེ་ནས་བདག་ཉིད་ལྷའི་རྣལ་འབྱོར་དུ་བྱས་ལ། བདག་ཉིད་ཀྱི་སྙིང་གའི་ས་བོན་ལས་གཟུངས་ཀྱི་ལྷ་དཔག་ཏུ་མེད་པ་སྒྲོས་ཏེ། འཕགས་པ་མཆོད་ལ་སེམས་ཅན་གྱི་དོན་བྱ་པ་ལ་སོགས་པ་སངས་རྒྱས་ཀྱི་མཛད་པ་མ་ལུས་པར་བྱས་ནས་བདག་གི་མིག་ལ་ཐིམ་པས། སངས་རྒྱས་ཀྱི་སྤྱན་དྲི་མ་མེད་པ་ཐོབ་ཅིང་ཡོངས་སུ་དག་པར་མཁྱེན་པ་ཐམས་ཅད་ཡོངས་སུ་རྫོགས་པར་དམིགས་ཤིང༌། ཨུཏྤལ་སྔོན་པོ་དང་སྐྱེར་ཁཎྜ་ལ་སྙིང་པོ་རྒྱས་བསྡུས་ཀྱི་སྔགས་ཅི་རིགས་པར་བཟླས་ཤིང་བྱུག་གོ །ཚག་པ་ལ་ནི་སྤངས་མ་ལ་བཟླས་ཤིང་བྱུག་གོ །རབ་རིབ་ཅན་རྣམས་ལ་ནི་ཨ་རུ་རའི་ཁུ་བ་ལ་བསྔགས་ཏེ་བྱུག་གོ །ལིང་ཐོག་ཅན་རྣམས་ལ་མཚལ་དང་ཅོང་ཞིའི་ཁུ་བ་ལ་བསྔགས་ལ་བྱུག་གོ །ཤ་མཛེར་དང་ཟུག་ཆེ་བ་རྣམས་ལ་ཀ་ར་དང་མིའི་འོ་མ་ལ་བཟླས་ལ་བྱུག་གོ །དེ་ལྟར་བྱས་པས་གདོན་དང་ནད་གང་ཡིན་པ་ཡང་ཞི་བར་ངེས་སོ། །མིག་གི་དབང་པོ་ཉམས་པ་གསོ་བའི་ཆོ་ག་གསལ་བའི་སྣང་བ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།