སྣའི་དབང་པོ་ཉམས་པ་དང་ན་བ་གསོ་བ་དྲི་མ་དང་བྲལ་བའི་སྦྱོང་བྱེད་ཅེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །སྣའི་ནད་གསོ་བར་བྱེད་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས་ཁྲུས་ཀྱི་ཆོ་ག་ལན་གྲངས་བརྒྱ་རྩ་བརྒྱད་བྱས་ཏེ། དེ་ནས་རྡོ་རྗེ་རྣམ་འཇོམས་ཀྱི་ང་རྒྱལ་དུ་གནས་པའི་ཐུགས་ཀའི་ས་བོན་ལས་འོད་སྔ་མ་ལྟར་འཕྲོས་པ་ལས་དོན་གཉིས་བྱས་བའི་ཐ་མ་དྲིའི་ལྷ་མོ་རྣམས་བདག་ཉིད་ཀྱི་སྣ་ལ་ཐིམ་པས་སངས་རྒྱས་ཐམས་ཅད་ཀྱི་ཤངས་དྲི་མ་མེད་པ་ཡོངས་སུ་དག་པ་ཡེ་ཤེས་ཚོགས་པའི་ཕུང་པོ་ལས་གྲུབ་པ་མཁྱེན་པའི་ཡེ་ཤེས་གོ་མ་འགགས་པ་སངས་རྒྱས་ཀྱི་མཁྱེན་པ་དང་ལྡན་པར་དམིགས་ཤིང་སྙིང་པོ་རྒྱས་བསྡུས་ཅི་རིགས་བར་བཟླས་སོ། །དེ་ལྟར་སྣ་ཚུབ་པ་རྣམས་ལ་འབྲུ་མར་ལ་བཟླས་ལ་བླུགས་སོ། །ཁྲག་འབབ་ཅིང་དབུགས་སྟོང་པ་བཀབ་ན་ཙནྡན་དཀར་པོ་ལ་བཟླས་སོ། །ཟུག་ཆེ་བ་རྣམས་ལ་གི་ཝང་འོ་མ་ལ་སྦྱར་བ་ལ་བཟླས་ཤིང་སྣ་ཕུག་ཏུ་བླུགས་སོ། །སྣའི་དབང་པོ་ཉམས་པ་དང་ན་བ་གསོ་བ་དྲི་མ་དང་བྲལ་བའི་སྦྱོང་བྱེད་ཅེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།