སེམས་ཅན་ཚེ་ཟད་པ་སྲིང་བའི་ཆོ་ག་བསྒྲུབ་པ་པདྨ་དབྱིག་སྒྲུབ་ཅེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཚེ་དང་དཔལ་བསྐྱེད་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས། གནས་ཁང་ཡིད་དང་མཐུན་པར་དཀྱིལ་འཁོར་འཁོར་ལོ་རྩིབས་བཞི་པ་ཁ་དོག་སེར་པོ་ལྟེ་བ་སྔོན་པོ་མུ་ཁྱུད་ལྗང་གུ་སྒོ་བཞི་རིགས་དང་འདྲ་བ་བྲིས་ལ། ད་ལ་ལྷའི་མཚན་མས་བཏབ་ལ། བུམ་པ་ཚད་དང་ལྡན་པ་ལ་ལྷ་ལྔའི་མཚན་མས་བཏབ་ལ། འབྲུ་གཙང་མའི་ཕྱེ་ལ་ཚེ་བཤོས་ཟླ་གམ་ལ་མར་ལ་སོགས་པའི་རོ་མཆོག་རྣམས་ཀྱིས་བརྒྱན་ལ་ཚོན་སྣ་ལྔའི་སྐུད་པས་གཟུངས་ཐག་བཏགས། སྙིང་པོ་རྒྱས་བསྡུས་གང་ལ་མོས་པའི་གཞུག་ལ། ཨོཾ་བཛྲ་ཧཱུཾ་བྷྲཱུཾ། ཨོཾ་བུདྡྷ་ཨོཾ་བྷྲཱུཾ། ཨོཾ་རཏྣ་སྭཱ་བྷྲཱུཾ། ཨོཾ་པདྨ་ཨཱཿབྷྲཱུཾ། ཨོཾ་ཀརྨ་ཧཱ་བྷྲཱུཾ་ཞེས་བཟླས་ལ་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་ཚེའི་རྒྱུན་འབེབས་པ། ཁམས་གསུམ་གྱི་ཚེ་ཉམས་པ་གསོ་བར་བྱེད་པ། ཡེ་ཤེས་ཚེ་ལ་ལོངས་སྤྱོད་པར་བསྐྱེད་ལ། དེའི་ཐུགས་ཀའི་ཟླ་བ་ལ་དམིགས་ལ་སྔགས་བཟླས་སོ། །ཁམས་གསུམ་ཚེའི་བཅུད་བུམ་པར་བསྡུས་པར་དམིགས་ལ། ལྷ་ལྔའི་མཚན་ནས་བརྗོད་ཅིང་ཆེ་གེ་མོའི་ཚེ་ཁུག་ཅེས་བརྗོད་ཅིང་བསྟིམས་ལ་དབང་བསྐུར་རོ། །སེམས་ཅན་ཚེ་ཟད་པ་སྲིང་པའི་ཆོ་ག་བསྒྲུབ་པ་པདྨ་དབྱིག་སྒྲུབ་ཅེས་བྱ་བ། སློབ་དཔོན་ཡེ་ཤེས་རྡོ་རྗེ་མཛད་པ་རྫོགས་སོ།།