གཟའི་གདོན་ལས་གྲོལ་བར་བྱེད་པའི་ཆོ་ག་རིན་པོ་ཆེ་གྲོལ་བྱེད་ཅེས་བྱ་བ།
མར་མེ་མཛད་བཟང་པོ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །གང་དག་གཟའ་རྣམས་ཀྱིས་ཟིན་པ་ལས་གྲོལ་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས། དཀྱིལ་འཁོར་སྔ་མ་ལྟར་བྲིས་ལ། དཀྱིལ་འཁོར་གྱི་ཤར་ཕྱོགས་སུ་ཆུ་དང་ཁྲག་དང་འོ་མ་བསྲེས་པས་སྣོད་ཟངས་ལ་སོགས་པ་བཀང་ལ། གཟའ་གང་གིས་ཟིན་པའི་གཟུགས་བག་ཟན་ལ་ཞི་དཀར་སའི་ཕྱེ་མས་བསྲེས་པ་ལ་ཁྲུ་གང་པ་ཚོན་སྣ་ཚོགས་པས་རི་མོ་དང༌། ཐིག་ལེར་བྱས་ལ་གཞག་གོ །དེའི་ལུས་རྣམས་ལྟས་ངན་སྣ་ཚོགས་པའི་སྤུ་དང༌། སྟག་གཟིག་གི་རས་དང༌། སྨྱུག་མ་གཙང་མ་ལ་གདུགས་དང༌། རྒྱལ་མཚན་དང༌། བ་དན་ཀྱང་ཕྱར་རོ། །དེ་ནས་གཟུགས་དེ་ཆུའི་སྟེང་དུ་ཁྲི་བྱས་ལ་དར་དམར་པོའི་ཡོལ་བ་བྲེས་ལ་གཞག་གོ །དཀྱིལ་འཁོར་གྱི་ཕྱོགས་མཚམས་རྣམས་སུ་གཏོར་མ་གཙང་མ་བརྒྱད། སྤོས་དང་མར་མེ་དང་བཤོས་དང་ལྡན་པ་བཤམ་མོ། །སྟག་པའམ་ཤུག་པ་ཁྲུ་གང་བ་ཅིག་ལ་ཁྲམ་ཉི་ཤུ་རྩ་གཅིག་བཏོད་ལ། རྨ་བྱའི་སྒྲོ་དང་བལ་ཚོན་དང༌། དར་ཚོན་ལྔ་ཡིས་བྱས་པས་གཟས་ཟིན་པའི་ལུས་མགོ་མཇུག་བྱ་བ་སྟེ། ཆུ་དང་གཟུགས་ལ་བསྟིམ་མོ། །སྔགས་པ་གཙང་སྦྲ་ལྡན་པས་དམར་པོའི་གོས་གྱོན། མགོ་ལ་དམར་པོའི་ཐོད་བཅིངས་ལ། མེ་ལོང་ལྔ་བཙུགས་ལ་གཟའ་གང་གིས་ཟིན་པའི་སྙིང་པོ་ལ་འབུམ་ཕྲག་གཅིག་ཁྲམ་ཤིང་ལ་བཏབ་ལ་ཁྲམ་ཕྱིས་བྱད་བཀྲོལ་ཤོད་གཏོར་ཞེས་བརྗོད་ཅིང་ནད་པའི་ལུས་ལ་གཟའི་སྒོའི་ངོས་སུ་བྱ་སྟེ། གཟུགས་ལ་བསྟིམ། གཏོར་མ་ཆར་གྱིན་གཟའ་ལ་མཆོད་པ་དང་བསྟོད་པ་བྱ། ལྷག་མ་བདུན་པོའི་སྙིང་པོ་ལ་སྟོང་ཕྲག་རེ་ཆུ་ལ་བཟླས་ཤིང༌། གཟས་ཟིན་པའི་ལུས་ལ་བྱ་བ་བོ། །དབུང་ཤིག །ཚོགས་ཁྱེ། ངར་རྟུལ། དམག་
སོད། ཅེས་བརྗོད་ཅིང་བྲབ་པོ། །དེ་ནས་འབྲུ་མར་དང་རྩི་མར་ལ་སོགས་པ་རྙེད་ཚད་ལ་སྙིང་པོ་རྒྱས་བསྡུས་གང་ཡང་རུང་བ་བརྒྱ་རྩ་བརྒྱད་བཟླས་ཏེ། ནད་པའི་ལུས་མགོ་མཇུག་ཏུ་བསྐུ་མཉེ་བྱའོ། །དེ་ལྟར་ལན་གཅིག་ལས་མ་གྲོལ་ན་གཉིས་དང་གསུམ་དང་བདུན་བྱས་ན། གཟས་ཟིན་པ་ལས་མི་གྲོལ་མི་སྲིད་དོ། །དེ་ནས་ཆུ་རུངས་སུ་བཅས་པ་དེ་རྒྱ་མཚོ་ཆེན་པོའི་གླིང་ངམ། རི་བརྒྱད་འདུས་པའི་རྩེ་མོ་ལ་པི་ཝང་ལ་སོགས་པའི་སྒྲ་སྣ་ཚོགས་དང་ལྡན་པས་བསྐྱལ་ལོ། །གཏོར་མ་བརྒྱད་པོ་ཡང་ཕྱོགས་མཚམས་མ་ནོར་བར་གཏང༌། དེ་ལྟར་ཆོ་ག་རྫོགས་པར་བྱས་ནས། གཟས་ཟིན་པ་ལ་ཡང་གོང་གི་གཟའ་བརྒྱད་ཀྱི་དཀྱིལ་འཁོར་དུ་དབང་བསྐུར་ན། དུས་ཐམས་ཅད་དུ་གཟའ་རྣམས་ཀྱི་དམག་དཔོན་དུ་འགྱུར་རོ། །གལ་ཏེ་གཟའ་གང་གིས་ཟིན་པའི་དུས་མ་ཕྱེད་ན་གཟའ་བརྒྱད་ཆར་གྱི་གཟུགས་བྱས་ལ། བསྙེན་པ་འབུམ་ཕྲག་རེ་བསྐྱར་ལ་སྔ་མ་ལྟར་བྱའོ། །གཟའི་གདོན་ལས་གྲོལ་བར་བྱེད་པའི་ཆོ་ག་རིན་པོ་ཆེ་གྲོལ་བྱེད་ཅེས་བྱ་བ། དཔལ་མར་མེ་མཛད་བཟང་པོས་མཛད་པ་རྫོགས་སོ།།