རྫོགས་པའི་རྣལ་འབྱོར་གྱི་ཕྲེང་བ་ཞེས་བྱ་བ།
འཇིགས་མེད་འབྱུང་གནས་སྦས་པ།
རྒྱ་གར་སྐད་དུ། ནིཥྤནྣ་ཡོ་ག་ཨ་བཱ་ལི་ནཱ་མ། བོད་སྐད་དུ། རྫོགས་པའི་རྣལ་འབྱོར་གྱི་ཕྲེང་བ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྡོ་རྗེ་ཅན་གང་འདི་ཡི་འོད་ཀྱིས་འགྲོ་བ་ལོང་བྱེད་མུན་རྣམས་ལས་རྒྱལ་བྱེད། །གང་ཞིག་གནས་སྐབས་མཐར་ཐུག་དབྱེར་མེད་དཔལ་ལྡན་ཡོན་ཏན་ཚོགས་ཀྱིས་མཛེས་པ་དང༌། གང་གི་སྙིང་རྗེའི་ཚོགས་ཀྱི་བདུད་རྩིས་རབ་ཏུ་བརླན་པའི་ཐུགས་ཀྱིས་ཤིན་ཏུ་སྤྲོས་པ་སྟེ། །དེ་དག་རྣམས་ཀྱིས་སྤྱོད་པ་རྨད་བྱུང་འདི་བསྟེན་ཤེས་རབ་རང་བཞིན་ཁྱེད་ལས་མྱུར་གྱུར་ཅིག །རྡོ་རྗེ་ཕྲེང་བས་བརྒྱན་པའི་དཀྱིལ་འཁོར་འདིར། །རྡོ་རྗེ་འཆང་སྤྱོད་ཤིན་ཏུ་མཛེས་པ་ཡིས། །སྣ་ཚོགས་སྐྱེས་པ་སྤྲུལ་པའི་ཚོགས་རྣམས་ཀྱིས། །མྱུར་དུ་དོན་ཡོད་ཕུན་སུམ་ཚོགས་པར་ཤོག །འདིར་ནི་ཆུང་དུ་དང་འབྲིང་པོ་དག་གི་རིམ་པས་ཏིང་ངེ་འཛིན་ལེགས་པར་བསྒོམས་པ་ལས་ཤེས་རབ་མཆོག་དང་ལྡན་པ་ལ།
བཅོམ་ལྡན་འདས་ཀྱིས་སྤྲོ་བ་དང་བསྡུ་བའི་བྱེད་པ་པོ། །རྣམ་པ་ཀུན་གྱི་མཆོག་ལྡན་པ། །ཡེ་ཤེས་སྐད་ཅིག་གིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །ཞེས་གསུངས་སོ། །དེ་ཡང་བདག་དང་སེམས་ཅན་ཐམས་ཅད་རྡོ་རྗེ་འཛིན་པ་ཉིད་ཐོབ་པར་འདོད་པའི་སྤྲོ་བ་དང་ལྡན་པས། ཕུང་པོ་དང་ཁམས་དང་སྐྱེ་མཆེད་ལ་སོགས་པ་གཟུགས་བརྙན་ལྟ་བུར་སྟོང་པ་ཉིད་དང་རོ་གཅིག་པར་ངེས་པར་བྱས་ནས། འོད་རབ་ཏུ་གསལ་བ་ལ་རབ་ཏུ་ཞུགས་ཏེ། སྐད་ཅིག་གི་ཡན་ལག་དང་བཅས་པའི་གཞལ་ཡས་ཁང་གི་དབུས་སུ་དཀྱིལ་འཁོར་དང་དཀྱིལ་འཁོར་པས་ཡོངས་སུ་བསྐོར་བའི་དཔལ་རྡོ་རྗེ་སེམས་དཔའ་དང་འཇམ་པའི་རྡོ་རྗེ་ལ་སོགས་པའི་སྐུ་སྟོང་པ་ཉིད་དང༌། སྙིང་རྗེ་རོ་གཅིག་པའི་བདེ་བ་ཆེན་པོའི་རང་བཞིན་རིགས་ཀྱི་བདག་པོས་དབུ་བརྒྱན་ཅིང་ཐུགས་ཀའི་ས་བོན་དང་ལྡན་པ་ལ་དེ་བཞིན་གཤེགས་པ་དང༌། ལྷ་མོ་དང༌། བྱང་ཆུབ་སེམས་དཔའ་དང༌། ཁྲོ་བོ་ལ་སོགས་པ་དཔག་ཏུ་མེད་པ་སྤྲོས་ཏེ། ཇི་ལྟར་གཞན་ལ་ཕན་པར་ནུས་པའི་ཆོས་སྟོན་པ་ལ་སོགས་པས་གཞན་བསོད་ནམས་ཀྱི་ཚོགས་མཐར་ཕྱིན་པ་ལ་གཞག་ཅིང༌། བསྡུ་བ་བྱས་པས་བསམ་གྱིས་མི་ཁྱབ་པའི་སྐུར་བསྐྱེད་པར་བྱའོ། །དེ་ལ་འདིའི་ཡན་ལགས་སོགས་པ་ནི་ས་འོག་གི་མཐར་ཐུག་པར་ཇི་ལྟར་མངོན་པར་འདོད་པའི་རྒྱར། གཅིག་ཏུ་སྲ་ཞིང་མཁྲེགས་ལ་འབར་བའི་རྡོ་རྗེའི་རང་བཞིན་གྱིས་ས་གཞི་དང་བསྐལ་པའི་མཐའི་མེ་འབར་བའི་འོད་ཟེར་གྱི་ཕྲེང་བ་དང་ལྡན་པས་མཚམས་བཅིང་བ་དང༌། ས་འོག་ནས་སྟེང་གི་བར་དུ་ཤིན་ཏུ་མཐོ་ཞིང་མཁྲེགས་ལ་སྲ་ཞིང་འབར་བའི་རྡོ་རྗེ་ར་བ་དང༌། རྡོ་རྗེའི་ར་བའི་སྟེང་དུ་བར་མཚམས་མེད་པར་དུམ་བུ་གཅིག་ཏུ་གྱུར་ཅིང་སྟེང་དུ་རྡོ་རྗེའི་མདའི་དྲ་བ་དང༌། འོག་ཏུ་རྡོ་རྗེའི་བླ་རེས་བརྒྱན་པའི་རྡོ་རྗེའི་གུར་འབར་བའོ། །དེའི་ནང་དུ་གནས་པའི་སྣ་ཆོགས་ཆུ་སྐྱེས་དང་ཉི་མ་ལ་གནས་པའི་འཁོར་ལོ་རྩིབས་བཅུ་པ་སེར་པོ་གཡས་སྐོར་དུ་འཁོར་བའོ། །དེའི་ཤར་གྱི་རྩིབས་ཡ་གཤིན་རྗེ་མཐར་བྱེད་ནག་པོ། ཞལ་དཀར་པོ་དང་དམར་པོ་རྡོ་རྗེའི་ཐོ་བ་ནག་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །ལྷོའི་རྩིབས་ལ་ཤེས་རབ་མཐར་བྱེད་དཀར་པོ་ཞལ་ནག་པོ་དང་དམར་པོ། རྡོ་རྗེས་མཚན་པའི་དབྱུག་པ་དགར་པོ་དང༌། རལ་གྲི་དང༌། ནོར་བུ་དང་པདྨ་འཛིན་པའོ། །ནུབ་
ཀྱི་རྩིབས་ལ་པདྨ་མཐར་བྱེད་དམར་པོ་ཞལ་སྔོན་པོ་དང་དཀར་པོ། པདྨ་དམར་པོ་དང་རལ་གྲི་དང་ནོར་བུ་དང་འཁོར་ལོ་འཛིན་པའོ། །བྱང་གི་རྩིབས་ལ་བགེགས་མཐར་བྱེད་ནག་པོ་ཞལ་དཀར་པོ་དང་དམར་པོ་ཁྲོ་བོའི་རྡོ་རྗེ་དང་རལ་གྲི་དང་ནོར་བུ་དང་པདྨ་འཛིན་པའོ། །མེར་འདོད་པའི་རྒྱལ་པོ་སྔོན་པོ་ཞལ་དཀར་པོ་དང་དམར་པོ། ལྕགས་ཀྱུ་དང་རལ་གྲི་དང་ནོར་བུ་དང་མཚོ་སྐྱེས་འཛིན་པའོ། །བདེན་བྲལ་དུ་དབྱུག་པ་སྔོན་པོ་ནག་པོ་ཞལ་དཀར་པོ་དང་དམར་པོ་དབྱུག་པ་སྔོན་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །རླུང་དུ་སྟོབས་པོ་ཆེ་ནག་པོ་ཞལ་དཀར་པོ་དང་དམར་པོ། རྩེ་གསུམ་པ་དང་རལ་གྲི་དང་ནོར་བུ་དང་པདྨ་བསྣམས་པའོ། །དབང་ལྡན་དུ་མི་གཡོ་བ་སྔོན་པོ་ཞལ་དཀར་པོ་དང་དམར་པོ་རལ་གྲི་དང་ནོར་བུ་དང་པདྨ་འཛིན་པའོ། །སྟེང་དུ་གཙུག་ཏོར་འཁོར་ལོས་སྒྱུར་བ་སེར་པོ་ཞལ་སྔོན་པོ་དང་དམར་པོ། འཁོར་ལོ་སེར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །འོག་ཏུ་གནོད་མཛེས་རྒྱལ་པོ་སྔོན་པོ་ཞལ་དཀར་པོ་དང་དམར་པོ་རྡོ་རྗེ་དང་རལ་གྲི་དང་ནོར་བུ་དང་པདྨ་བསྣམས་པའོ། །དེ་ལ་གཙུག་ཏོར་དང་འདོད་པའི་རྒྱལ་པོ་དང་མི་གཡོ་བ་དང་གནོད་མཛེས་རྣམས་ནི་རིན་པོ་ཆེའི་ཅོད་པན་ཅན། རིན་པོ་ཆེ་སྣ་ཚོགས་ཀྱིས་བརྒྱན་པར་གྱུར་པ། མཆེ་བ་ཅུང་ཟད་གཙིགས་པ་སྟོན་པ། སྨ་ར་དང་བྲལ་བའོ། །དེ་ལས་གཞན་པ་རྣམས་ནི་མི་སྡུག་པའི་གཟུགས་ཅན་སྨིན་མ་འཁྱོག་པ་དང་བཅས་པས་དབུ་སྐྲ་དམར་སེར་གྱེན་དུ་བརྫེས་པ། སྨིན་མ་དང་སྨ་ར་དམར་སེར་དང་བཅས་པ། ཞལ་གདངས་པ། མཆེ་བ་གཙིགས་པ། ལྗགས་འགྱུར་བ། གད་རྒྱངས་དང་ལྡན་པ། དྲག་པོའི་ཀླུ་བརྒྱད་ཀྱིས་བརྒྱན་པ་སྐུ་བོང་ཐུང་ཞིང་རགས་པ་ལྟོ་བ་འཕྱང་བའོ། །བཅུ་པོ་འདི་དག་ནི་གཡོན་བརྐྱང་བ་གཡས་བསྐུམ་པས་རྩིབས་ཀྱི་རྩེ་མོ་ལ་ཅུང་ཟད་མ་རེག་པའི་སྣ་ཚོགས་པདྨ་དང༌། ཉེ་མའི་གདན་དང་བཅས་པ་བརྟན་པར་གནས་པ། ཉི་མའི་འོད་ཅན་ཤིན་ཏུ་ཁྲོས་པ་དང་འབར་བས་ཤིན་ཏུ་འཇིགས་པ་བསྐལ་པ་འཇིག་པའི་དུས་ཀྱི་མེ་ལྟ་བུའི་འོད་དང་ལྡན་པའི་རང་གི་སྐུའི་སྤྲུལ་བ་དཔག་ཏུ་མེད་པའི་ཚོགས་ཀྱིས་ཀྱང་ཁམས་གསུམ་མཐའ་ཡས་པ་ན་གནས་བའི་བགེགས་ཀྱི་ཚོགས་མ་ལུས་པ་ཡང་དང་ཡང་དུ་བརླག་པར་བྱེད་པ་ཕྱག་དྲུག་པ་རྩ་བའི་
ཕྱག་དག་གིས་རང་དང་འདྲ་བའི་ཤེས་རབ་མ་ལ་འཁྱུད་པ། ཞལ་གསུམ་པ་ཁྱད་པར་དུ་རྩ་བའི་ཞལ་གྱི་མདོག་ནི་སྐུ་མདོག་ལྟ་བུ་སྟེ། གཡས་པ་དང་གཡོན་པ་ཡི་ནི་གོང་དུ་བརྗོད་དོ། །ཞལ་རེ་རེ་ལའང་དམར་ལ་ཟླུམ་པའི་སྤྱན་གསུམ་མོ། །འཁོར་ལོ་ཡང་རྒྱུན་མི་འཆད་པར་དྲག་ཏུ་འཁོར་བས་བརྟན་པར་གནས་པ་ལྟ་བུར་འབར་བའི་ཚོགས་དཔག་ཏུ་མེད་པ་འཕྲོ་བའོ། །དེའི་ལྟེ་བའི་ནང་དུ་འོག་གི་རྩིབས་ཀྱི་སྟེང་དུ་ཆོས་འབྱུང་གྲུ་གསུམ་དཀར་པོ་ཤིན་ཏུ་ཡངས་པའི་ནང་དུ་འོག་གི་ཟུར་ལ་གནས་པའི་སྣ་ཚོགས་པདྨའི་སྟེང་དུ་སྣ་ཚོགས་རྡོ་རྗེ་དང་བཅས་པའོ། །རྡོ་རྗེ་དེའི་ཕྱོགས་ཀྱི་ར་རྣམས་དང་ལྟེ་བ་ནི་ཇི་ལྟར་རིགས་པར་རྣམ་པར་སྣང་མཛད་ལ་སོགས་པའི་མདོག་དང་འདྲ་བའོ། །དེར་རིན་པོ་ཆེ་ཁ་དོག་ལྔ་ལས་ཡོངས་སུ་རྫོགས་པ་ཐུབ་པའི་དབང་པོའི་དཀྱིལ་འཁོར་འོད་གསལ་བ་ཕྱོགས་ཀྱི་འཁོར་ལོ་ཐམས་ཅད་སྣ་ཚོགས་པའི་འོད་ཟེར་གྱིས་ཁྱབ་པའི་གཞལ་ཡས་ཁང་ངོ༌། །དེའི་དབུས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའ་འཇམ་པའི་རྡོ་རྗེའི་སྐུ་གུར་གུམ་གྱི་མདོག་ལྟ་བུ་གཡས་དང་གཡོན་གྱི་ཞལ་ནག་པོ་དང་དཀར་པོ། རྩ་བའི་ཕྱག་དག་གིས་རང་དང་འདྲ་བའི་ཤེས་རབ་མ་ལ་འཁྱུད་པ། རལ་གྲི་དང་མདའ་དང་ཨུཏྤལ་དང་གཞུ་འཛིན་པ་རིན་པོ་ཆེའི་ཅོད་པན་ཅན་ནོ། །རིན་པོ་ཆེ་སྣ་ཚོགས་པས་བརྒྱན་པ། འོད་ཟེར་མཐའ་ཡས་པའོ། །དེའི་ཤར་གྱི་ཕྱོགས་སུ་རྣམ་པར་སྣང་མཛད་དཀར་པོ་གཡས་བ་དང་ཅིག་ཤོས་ཀྱི་ཞལ་ནག་པོ་དང་དམར་པོ་ཕྱག་རྣམས་ན་འཁོར་ལོ་རྩིབས་བརྒྱད་པ་དཀར་པོ་དང༌། རལ་གྲི་དང་ནོར་བུ་དང་པདྨའོ། །ལྷོར་རིན་ཆེན་འབྱུང་ལྡན་སེར་བོ་རིན་པོ་ཆེ་མརྐཏ་ཟུར་དགུ་པ་དང༌། རལ་གྲི་དང་འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་པདྨ་དམར་པོ་དང་རལ་གྲི་དང་ནོར་བུ་དང༌། འཁོར་ལོ་འཛིན་པའོ། །བྱང་དུ་དོན་ཡོད་གྲུབ་པ་ལྗང་གུ་རལ་གྲི་དང་འཁོར་ལོ་དང་ནོར་བུ་དང་པདྨ་འཛིན་པའོ། །འདི་གསུམ་གྱི་གཡས་པ་དང་ཅིག་ཤོས་ཀྱི་ཞལ་ནི་ནག་པོ་དང་དཀར་པོའོ། །དེ་བཞིན་གཤེགས་པ་འདི་དག་ཐམས་ཅད་རིན་པོ་ཆེའི་ཅོད་པན་དང་ལྡན་པ་རིན་པོ་ཆེ་སྣ་ཚོགས་ཀྱིས་བརྒྱན་པའོ། །མེར་སྤྱན་མ་རྣམ་སྣང་དང་མཚུངས་པའོ། །བདེན་བྲལ་དུ་མཱ་མ་ཀཱི་མི་བསྐྱོད་པ་ལྟ་བུ་ཨུཏྤལ་དམར་པོ་དང༌། རལ་གྲི་དང་ནོར་བུ་དང་པདྨ་
འཛིན་པ་སྟེ། སྒྲུབ་ཐབས་ཐམས་ཅད་ལས་དེ་ལྟར་བཤད་པའི་ཕྱིར་རོ། །རླུང་དུ་གོས་དཀར་མོ་སྣང་བ་མཐའ་ཡས་དང་མཚུངས་པའོ། །དབང་ལྡན་དུ་སྒྲོལ་མ་རིན་ཆེན་འབྱུང་ལྡན་ལྟ་བུ་ཨུཏྤལ་སེར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །དབུས་ཀྱི་རིམ་པ་ལས་ཕྱི་རོལ་དུ་མེའི་མཚམས་སུ་གཟུགས་རྡོ་རྗེ་མ་རྣམ་པར་སྣང་མཛད་ལྟ་བུ་རིན་པོ་ཆེའི་མེ་ལོང་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །སྲིན་པོར་སྒྲ་རྡོ་རྗེ་མ་མི་བསྐྱོད་པ་ལྟ་བུ་པི་ཝང་སྔོན་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །རླུང་དུ་དྲི་རྡོ་རྗེ་མ་རིན་ཆེན་འབྱུང་ལྡན་ལྟ་བུ་དྲི་ཆབ་ཀྱི་དུང་སེར་པོ་དང་རལ་གྲི་དང་འཁོར་ལོ་དང་ཆུ་སྐྱེས་འཛིན་པའོ། །དབང་ལྡན་དུ་རྡོ་རྗེ་མ་སྣང་བ་མཐའ་ཡས་དང་མཚུངས་པ་རོའི་སྣོད་དམར་པོ་དང་རལ་གྲི་དང་ནོར་བུ་དང་འཁོར་ལོ་འཛིན་པའོ། །ཤར་སྒོའི་གཡོན་ལོགས་སུ་རེག་བྱ་རྡོ་རྗེ་མ་དོན་ཡོད་གྲུབ་པ་དང་མཚུངས་པ་གོས་སྣ་ཚོགས་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །ཤར་སྒོའི་གཡས་ལོགས་སུ་ཆོས་ཀྱི་དབྱིངས་ཀྱི་རྡོ་རྗེ་མ་རྡོ་རྗེ་སེམས་དཔའ་དང་མཚུངས་པ་ཆོས་འབྱུང་དཀར་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །འཇམ་པའི་རྡོ་རྗེ་ལ་སོགས་པའི་ལྷ་འདི་རྣམས་ནི་ཞལ་གསུམ་པ་ཕྱག་དྲུག་པ་ཕྱག་མཚན་དང་པོ་གཉིས་ནི་གཡས་པ་དག་གིས་སོ། །གཞན་གཉིས་ནི་གཡོན་པ་དག་གིས་འཛིན་པའོ། །ཐམས་ཅད་ཀྱི་རྩ་བའི་ཞལ་ནི་སྐུ་མདོག་བཞིན་ནོ། །ཤར་ལ་སོགས་པའི་སྒོ་རུ་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་རྣམས་སོ། །འཇམ་པའི་རྡོ་རྗེ་དང་རྣམ་པར་སྣང་མཛད་དང་ལྷ་མོ་བཅུ་པོ་རྣམས་ནི་ཟླ་བའི་དཀྱིལ་འཁོར་ལ་རྡོ་རྗེ་སྐྱིལ་ཀྲུང་གིས་བཞུགས་པའོ། །གཞན་ནི་ཉི་མ་ལའོ། །ཟླ་བ་དང་ཉི་མའི་འོག་ཏུ་སྣ་ཚོགས་པདྨའོ། །དེ་བཞིན་གཤེགས་པ་རྣམས་ཀྱི་གཙོ་བོའི་ཕྱག་དག་གིས་རང་འོད་ཀྱི་ཤེས་རབ་དག་ལ་འཁྱུད་པ་སྟེ་དེ་བཞིན་དུ་ཤེས་རབ་རྣམས་འོད་ཀྱི་ཐབས་ལའོ། །དབུ་ལ་རིགས་ཀྱི་བདག་པོ་སྟེ་འཇམ་པའི་རྡོ་རྗེ་ལ་སོགས་པའི་དེ་བཞིན་གཤེགས་པ་རྣམས་དང༌། མཱ་མ་ཀཱི་དང་སྒྲ་རྡོ་རྗེ་མ་དང༌། སྲུང་བའི་འཁོར་ལོའི་ཁྲོ་བོ་བརྒྱད་ལ་ནི་མི་བསྐྱོད་པའོ། །སྤྱན་མ་དང་གཟུགས་རྡོ་རྗེ་མ་དང་གཤིན་རྗེ་གཤེད་རྣམས་ལ་ནི་རྣམ་པར་སྣང་མཛད་དོ། །དྲི་རྡོ་རྗེ་མ་ལ་ནི་རིན་
ཆེན་འབྱུང་ལྡན་ནོ། །གོས་དཀར་མོ་དང་རོ་རྡོ་རྗེ་མ་དང་པདྨ་མཐར་བྱེད་རྣམས་ལ་འོད་དཔག་མེད་དོ། །སྒྲོལ་མ་དང་རེག་བྱ་རྡོ་རྗེ་མ་ལ་ནི་དོན་ཡོད་གྲུབ་པའོ། །ཆོས་ཀྱི་དབྱིངས་ཀྱི་རྡོ་རྗེ་མ་ལ་ནི་རྡོ་རྗེ་འཛིན་པའོ། །གཞན་ནི་མི་བསྐྱོད་པའོ། །འདིར་རྡོ་རྗེ་སེམས་དཔའ་ནི་སྐུ་མདོག་དཀར་པོ་ལ་ཅུང་ཟད་དམར་པོའི་མདངས་དང་ལྡན་པ་གཡས་པ་དང་ཅིག་ཤོས་ཀྱི་ཞལ་ནི་སྔོན་པོ་དང་དམར་པོ་གཙོ་བོའི་ཕྱག་དག་གིས་རང་འོད་ཀྱི་ཤེས་རབ་ལ་འཁྱུད་པ་རྡོ་རྗེ་སྔོན་པོ་དང་རལ་གྲི་དང་ནོར་བུ་དང་པདྨ་འཛིན་པ། སྣ་ཚོགས་པདྨ་དང༌། ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་ཟླ་བའི་མདོག་ཅན་རིན་པོ་ཆེའི་ཅོད་པན་དང༌། རིན་པོ་ཆེའི་རྒྱན་དང་ལྡན་པ་དབུལ་མི་བསྐྱོད་པས་རྒྱས་བཏབ་པའོ། །འདིར་འཇམ་པའི་རྡོ་རྗེའི་ཐུགས་ཀར་དམ་ཚིག་སེམས་དཔའ་ལྟ་བུའི་ཡེ་ཤེས་སེམས་དཔའ་དེའི་ཐུགས་ཀར་ཟླ་བར་རལ་གྲིའི་ཡུ་བ་ལ་གནས་པའི་ས་བོན་མཾ་ངོ༌། །རྟག་པ་དང་རིན་འབྱུང་དང༌། འོད་དཔག་མེད་དང་དོན་ཡོད་གྲུབ་པ་དང་མི་བསྐྱོད་པ་རྣམས་ཀྱི་ཐུགས་ཀར་ཕྱག་མཚན་ལ་ཇི་ལྟར་རིགས་པར་ཟླ་བའམ། ཉི་མ་ལ། བྷྲཱུཾ། ཨཱཾ། ཛྲཱཾ། ཁཾ། ཧཱུཾ་ངོ༌། སྤྱན་ལ་སོགས་པའི་ལྷ་མོ་རྣམས་ལ་ལཱཾ་མཱཾ་པཱཾ་ཏཱཾ། ཛཿ་ཧཱུཾ་བཾ་ཧོཿ་ཁཾ་རཾ་མཾ། ཁྲོ་བོ་རྣམས་ལ་ཧཱུཾ་ངོ༌། །ལྷ་ཐམས་ཅད་ཀྱི་སྙིང་པོའི་སྔགས་ནི་རྡོ་རྗེའི་ཕྲེང་བར་བཤད་དོ། །འདིར་རྫོགས་པའི་རྣལ་འབྱོར་དུ་མིག་ལ་སོགས་པ་བྱིན་གྱིས་བརླབ་པ་དང་ཡེ་ཤེས་སེམས་དཔའ་དགུག་གཞུག་ལ་སོགས་པ་ནི་མ་བཤད་དོ། །དེ་མེད་ཀྱང་མིག་གི་མངོན་པར་ཤེས་པ་ལ་སོགས་པའི་ཡོན་ཏན་གྱི་ཚོགས་དཔག་ཏུ་མེད་ཅིང་བསམ་གྱིས་མི་ཁྱབ་པས་མཛེས་པར་བྱས་པའི་ཡི་དམ་གྱི་ལྷའི་སྐུ་ཅིག་ཅར་ཁོ་ན་ལ་ལེགས་པར་ཡོངས་སུ་དག་ཅིང་རྣམ་པ་ཐམས་ཅ་ཡོངས་སུ་རྫོགས་པར་རྒྱུན་དུ་ཡང་དང་ཡང་ལྷག་པར་མོས་པ་བརྟན་པར་བྱའོ། །སྙིང་པོའི་སྔགས་ལ་སོགས་པ་བསྟན་པ་ནི་བུམ་པ་ལྷག་པར་གནས་པ་ལ་སོགས་པ་ལ་ཉེ་བར་མཁོ་བའི་ཆེད་དུའོ། །གང་གི་ཚེ་དབུས་སུ་དེ་བཞིན་གཤེགས་པ་གཞན་གཙོ་བོར་གྱུར་པ་དེའི་དབུས་སུ་གནས་པ་གཞན་དེའི་གནས་སུ་དགོད་དོ། །འོད་དཔག་མེད་དཀར་པོར་ཡང་འགྱུར་ཏེ། ཆོས་རྣམས་དཀར་པོའི་རང་བཞིན་གྱིས། །འདིར་ནི་ངག་གི་དབང་ཕྱུག་དཀར། །ཞེས་གསུངས་པའི་ཕྱིར། འདི་དང་འཆད་པའི་དཀྱིལ་འཁོར་རྣམས་སུ་གང་གི་དཀྱིལ་
འཁོར་བའི་ལྷའི་གཙོ་བོའི་གནས་གང་དུ་བཤད་པ་དེ་ཉིད་དུ་གཙོ་བོ་དེ་དཀྱིལ་འཁོར་གྱི་དབང་པོ་ལ་མངོན་པར་ཕྱོགས་ཤིང་དེ་དང་འཁྱུད་པ་ནི་དེ་ལ་མངོན་དུ་ཕྱོགས་པ་ཉིད་དེ་གཞན་གྱི་གནས་སུ་ཕྱིན་པའི་ཕྱིར་རོ། །འདིར་ནི་གཞལ་ཡས་ཁང་གི་ཡན་ལག་རྣམ་པ་གསུམ་སྟེ། རྡོ་རྗེའི་ས་གཞི་ལ་སོགས་པས་ཡོངས་སུ་བསྐོར་བའི་རྡོ་རྗེའི་གུར་དང༌། སྲུང་བའི་འཁོར་ལོ་དང༌། ཆོས་འབྱུང་ངོ༌། །དེ་ལ་རྡོ་རྗེའི་གུར་ནི་འཆད་པར་འགྱུར་བའི་གཞལ་ཡས་ཁང་ཐམས་ཅད་ལའོ། །སྲུང་བའི་འཁོར་ལོ་དང༌། ཆོས་འབྱུང་ནི་འགའ་ཞིག་ཁོ་ན་ལ་འཆད་དོ། །བྲི་བར་བྱ་བའི་གཞལ་ཡས་ཁང་རྣམས་ལ་ནི་ཆོས་ཀྱི་དབྱིངས་ཀྱི་ངོ་བོ་ཆོས་འབྱུང་ངམ་ཆོས་ཀྱི་དབྱིངས་ཀྱི་ཁོངས་སུ་ཆུད་པར་མཚོན་པའི་ཆེད་དུ་རྡོ་རྗེ་ཕྲེང་བ་བྲི་བར་བྱའོ། །ཇི་ལྟར་ཕྱི་རོལ་དེ་བཞིན་ནང༌། ཞེས་པས་རྫོགས་རིམ་གྱི་དཀྱིལ་འཁོར་རྟོགས་པར་བྱ་བའི་ཆེད་དུ་འཇིག་རྟེན་ཁམས་ཀྱི་འཁོར་ཡུག་མཚོན་པའི་ཕྱིར་རྡོ་རྗེ་ཕྲེང་བ་བྲི་བ་ནི་ངེས་པར་རོ། །འདིར་སྲུང་པའི་འཁོར་ལོ་ནི་དེ་ལྟར་མ་ཡིན་པས་བྲི་མི་དགོས་ཏེ། བགེགས་བཟློག་པ་ནི་གཞན་གྱིས་ཀྱང་བྱེད་པས་སོ། །གཞན་ཡང་སྟོང་པ་ཉིད་ཁོ་ན། བཅོམ་ལྡན་འདས་ཀྱིས་བགེགས་ཀྱི་ཚོགས་མ་ལུས་པ་རྩ་བ་དང་བཅས་པ་བརླག་པར་བྱེད་པའི་ནུས་པ་རབ་ཏུ་གྱུར་པས། དེ་ལ་ལྷག་པར་མོས་པ་བརྟན་པ་ཉིད་བསྐྱེད་པའི་ཆེད་དུ་བྲི་བའི་དཀྱིལ་འཁོར་ལ་སྲུང་བའི་འཁོར་ལོ་བྲི་བར་མ་བསྟན་ཏོ། །བསྒོམ་བྱའི་དཀྱིལ་འཁོར་ལ་ཡང་ཁ་ཅིག་ཏུ་བསྒོམ་པར་གསུངས་པ་ལས་ཐམས་ཅ་དུ་མ་ཡིན་ནོ། །བགེགས་བསལ་བའི་རྗེས་ལ་སྟོང་པ་ཉིད་ལ་རབ་ཏུ་ཞུགས་པས་བསྒོམ་པར་བྱ་བའི་དཀྱིལ་འཁོར་ལ་སྲུང་པའི་འཁོར་ལོ་མེད་དེ་དེའི་ཕྱིར་མི་འདྲའོ་ཞེ་ན་དེ་ལྟར་ན་ཁོར་ཡུག་མཚོན་པའི་རྡོ་རྗེའི་ར་བ་ཡང་མི་འདྲི་བར་འགྱུར་རོ། །ཡན་ན་གཞལ་ཡས་ཁང་བསྐྱེད་པའི་དུས་སུ་དེ་ཡང་བསྐྱེད་དོ་ཞེ་ན། མ་ཡིན་ཏེ། བཅོམ་ལྡན་འདས་ཀྱིས་རྡོ་རྗེ་ར་བ་ལན་གསུམ་བསྐྱེད་པར་ནི་གང་ནས་ཀྱང་མ་གསུངས་སོ། །ལན་གཉིས་བསྐྱེད་པས་ཅི་ཞིག་བྱ་ཅིག་ཅར་རྫོགས་པ་ཉིད་ཀྱང་རྡོ་རྗེའི་ས་གཞི་དང་མཚམས་བཅིང་བ་དང་རྡོ་རྗེའི་ར་བ་ལ་སོགས་ཀུན་བརྟགས་མཐའ་དག་སྟོང་པ་ཉིད་ཀྱི་རང་བཞིན་སྒྱུ་མའི་ངོ་བོར་གནས་པ་ཉིད་དོ། །དེས་ནི་སྲུང་བའི་འཁོར་ལོ་ཡོད་ཀྱང་དཀྱིལ་འཁོར་དུ་མི་འདྲི་བའི་འཐད་པ་བརྗོད་པ་ཉིད་དོ། །ཁ་
ཅིག་ནི་ཁ་ཅིག་ལ་སྲུང་བའི་འཁོར་ལོ་བྲི་བར་བྱའོ་ཞེས་འདོད་དོ་ཞེས་བྱ་བ་ནི་འཇམ་པའི་རྡོ་རྗེའི་དཀྱིལ་འཁོར་རོ།། །།བསྡུས་པའི་རིམ་པར་གསུངས་པའི་དཀྱིལ་འཁོར་ལ་ནི་གཞལ་ཡས་ཁང་གི་བར་དུ་སྔ་མ་བཞིན་ནོ། །ཁྲོ་བོ་རྣམས་ཀྱི་ཁྱད་པར་ནི་བཤད་པར་བྱའོ། །གཞལ་ཡས་ཁང་གི་དབུས་སུ་མི་བསྐྱོད་པ་ནག་པོ་དྲག་པོ་གཡས་པ་དང་ཅིག་ཤོས་ཀྱི་ཞལ་དཀར་པོ་དང་དམར་པོ་ཕྱག་གཡས་པ་རྣམས་ནི་ཁྲོ་བོའི་རྡོ་རྗེ་དང་འཁོར་ལོ་དང་པདྨ་བསྣམས་པ། གཡོན་པ་རྣམས་ནི་དྲིལ་བུ་དང་ཡིད་བཞིན་གྱི་ནོར་བུ་དང་རལ་གྲི་འཛིན་པ་རང་དང་འདྲ་བའི་རེག་བྱ་རྡོ་རྗེ་མ་ལ་འཁྱུད་པའོ། །དེའི་ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་ལ་སོགས་པ་དང༌། མེ་ལ་སོགས་པའི་མཚམས་རྣམས་སུ་སྤྱན་མ་ལ་སོགས་པའོ། །དེ་ལ་རྣམ་པར་སྣང་མཛད་ནི་ཞི་བ་དཀར་པོའོ། །ཞལ་དཀར་པོ་དང་ནག་པོ་དང་དམར་པོ་འཁོར་ལོ་དང་རྡོ་རྗེ་དང་པདྨ་དཀར་པོ་དང་དྲིལ་བུ་དང་ནོར་བུ་དང་རལ་གྲི་འཛིན་པའོ། །བཤད་ཟིན་པ་དང་འཆད་པར་འགྱུར་བའི་ཕྱག་མཚན་དང་པོ་ནས་རིམ་པ་བཞིན་དུ་ཕྱག་གཡས་པར་སྟེང་ནས་འོག་ཏུ་དང༌། གཡོན་པར་འོག་ནས་སྟེང་དུ་རིག་པར་བྱའོ། །རིན་ཆེན་འབྱུང་ལྡན་ནི་སེར་པོ་སྟེ་ཞལ་སེར་པོ་དང་ནག་པོ་དང་དཀར་པོའོ། །ཞལ་གྱི་མདོག་གསུམ་ནི་རིམ་པ་བཞིན་དུ་རྩ་བ་དང་གཡས་པ་དང་གཡོན་ཡིན་ནོ། །ནོར་བུ་དང་རྡོ་རྗེ་དང་འཁོར་ལོ་དང༌། དྲིལ་བུ་དང་པདྨ་སེར་པོ་དང་རལ་གྲི་འཛིན་པའོ། །སྣང་བ་མཐའ་ཡས་དམར་པོ་ཞལ་དམར་པོ་དང་ནག་པོ་དང་དཀར་པོ་ཕྱག་གཡོན་པས་དྲིལ་བུ་དང་བཅས་པའི་པདྨ་དམར་པོའི་ཡུ་བ་ཐུགས་ཀར་བཟུང་བ། ཕྱག་གཡས་པས་ཁ་འབྱེད་པའོ། །གཞན་རྣམས་ཀྱིས་རྡོ་རྗེ་དང་འཁོར་ལོ་དང་རིན་པོ་ཆེ་དང༌། རལ་གྲི་འཛིན་པའོ། །དོན་ཡོད་གྲུབ་པ་ནི་ལྗང་གུ་ཞལ་གུ་ལྗང་གུ་དང་ནག་པོ་དང་དཀར་པོ་རལ་གྲི་དང་སྣ་ཚོགས་རྡོ་རྗེ་དང་འཁོར་ལོ་དང་དྲིལ་བུ་དང་པདྨ་ལྗང་གུ་དང་ནོར་བུ་འཛིན་པའོ། །དེ་བཞིན་གཤེགས་པ་ལྔ་པོ་འདི་དང་འཆད་པར་འགྱུར་བའི་ཀུན་དུ་བཟང་པོའི་བར་ནི་རལ་པའི་ཐོར་ཅོག་དང་རིན་པོ་ཆེའི་ཅོད་པན་དང་རིན་པོ་ཆེ་ལ་སོགས་པའི་རྒྱན་སྣ་ཚོགས་ཀྱིས་བརྒྱན་པའོ། །སྤྱན་མ་ནི་རྣམ་པར་སྣང་མཛད་དང་མཚུངས་པ་སྟེ། འོན་ཀྱང་པདྨ་དཀར་པོའི་གནས་སུ་ཨུཏྤལ་དཀར་པོའོ། །མཱ་མ་ཀཱི་ནི་མི་བསྐྱོད་པ་ལྟ་བུ་
སྟེ་འོན་ཀྱང་པདྨའི་གནས་སུ་ཨུཏྤལ་སྔོན་དམར་རོ། །གོས་དཀར་མོ་ནི་སྣང་བ་མཐའ་ཡས་དང་མཚུངས་པའོ། །སྒྲོལ་མ་ནི་དོན་ཡོད་གྲུབ་པ་ལྟ་བུ་སྣ་ཚོགས་རྡོ་རྗེ་དང་འཁོར་ལོ་དང་ཨུཏྤལ་སྡོ་སེར་དང་དྲིལ་བུ་དང་ནོར་བུ་རིན་པོ་ཆེ་དང་རལ་གྲི་འཛིན་པའོ། །རིམ་པ་གཉིས་པར་མེའི་མཚམས་སུ་གཟུགས་རྡོ་རྗེ་མ་སྤྱན་མ་ལྟ་བུ་སྟེ་འོན་ཀྱང་དང་པོའི་ཕྱག་དག་གིས་མེ་ལོང་དམར་པོ་འཛིན་པའོ། །བདེན་བྲལ་དུ་སྒྲ་རྡོ་རྗེ་མ་སེར་མོ་ཞལ་སེར་པོ་དང་ནག་པོ་དང་དཀར་པོ་དང་ལྡན་པ་རྩ་བའི་ཕྱག་གཉིས་ཀྱིས་པི་ཝང་སྔོན་མོ་བསྒྲིང་བའོ། །ཕྱག་ལྷག་མ་དག་གིས་རྡོ་རྗེ་དང་ཨུཏྤལ་སྔོན་མོ་དང་རིན་པོ་ཆེ་དང་རལ་གྲི་འཛིན་པའོ། །རླུང་དུ་དྲི་རྡོ་རྗེ་མ་ནི་གོས་དཀར་མོ་ལྟ་བུ་རྩ་བའི་ཕྱག་གཉིས་ཀྱིས་དྲིའི་དུང་ཆོས་སེར་པོ་འཛིན་པའོ། །དབང་ལྡན་དུ་རོ་རྡོ་རྗེ་མ་ལྗང་གུ་ཞལ་ལྗང་གུ་དང་ནག་པོ་དང་དཀར་པོ་ཕྱག་དང་པོ་གཉིས་རོའི་སྣོད་དམར་པོ་འཛིན་པའོ། །ལྷག་མ་རྣམས་ཀྱིས་རྡོ་རྗེ་དང་འཁོར་ལོ་དང་རིན་པོ་ཆེ་དང་རལ་གྲི་འཛིན་པའོ། །རིམ་པ་གསུམ་པའི་ཤར་གྱི་སྣམ་བུ་ལ་བྱམས་པ་དང་སའི་སྙིང་པོའོ། །ལྷོའི་སྣམ་བུ་ལ་ཕྱག་ན་རྡོ་རྗེ་དང་ནམ་མཁའི་སྙིང་པོའོ། །ནུབ་ཀྱི་སྣམ་བུ་ལ་སྤྱན་རས་གཟིགས་དང་འཇམ་པའི་དབྱངས་སོ། །བྱང་དུ་སྒྲིབ་པ་ཐམས་ཅད་རྣམ་པར་སེལ་བ་དང་ཀུན་དུ་བཟང་པོའོ། །བརྒྱད་པོ་འདི་དག་ནི་རང་གི་རིགས་ཀྱི་བདག་པོ་དང་མཚུངས་པ་སྟེ། འོན་ཀྱང་བྱམས་པ་ནི་རྩ་བའི་ཕྱག་གིས་འཁོར་ལོས་མཚན་པའི་ཡལ་ག་དང་བཅས་པའི་ཀླུ་ཤིང་གི་མེ་ཏོག་འཛིན་པའོ། །ཤར་ལ་སོགས་པའི་སྒོ་དང་མེ་ལ་སོགས་པའི་མཚམས་དང་སྟེང་དང་འོག་ཏུ་གོ་རིམས་བཞིན་དུ་ཁྲོ་བོ་བཅུའོ། །དེ་ལ་གཤིན་རྗེ་གཤེད་ནི་ནག་པོ་ནག་པོ་དང་དཀར་པོ་དང་དམར་པོ་རྡོ་རྗེའི་ཐོབ་དང་འཁོར་ལོ་དང་རྡོ་རྗེ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟྭ་འཛིན་པའོ། །ཤེས་རབ་མཐར་བྱེད་ནི་དཀར་པོ་ཞལ་དཀར་པོ་དང་ནག་པོ་དང་དམར་པོ། རྡོ་རྗེ་དང་རྡོ་རྗེས་མཚན་པའི་དབྱུག་པ་དཀར་པོ་དང༌། རལ་གྲི་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །པདྨ་མཐར་བྱེད་ནི་དམར་པོ་ཞལ་དམར་པོ་དང་ནག་པོ་དང་དཀར་པོ། པདྨ་དམར་པོ་དང་རལ་གྲི་དང་གཏུན་ཤིང་དང་དྲིལ་བུ་དང༌། དགྲ་སྟ་དང་ཞགས་པ་འཛིན་པའོ། །བགེགས་མཐར་བྱེད་
ནི་སྔོན་པོ་ཞལ་སྔོན་པོ་དང་དཀར་པོ་དང་དམར་པོ། སྣ་ཚོགས་རྡོ་རྗེ་དང་འཁོར་ལོ་དང་གཏུན་ཤིང་དང་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །མི་གཡོ་བ་ནི་སྔོན་པོ་ཞལ་སྔོན་པོ་དང་དཀར་པོ་དང་དམར་པོ། རལ་གྲི་དང་རྡོ་རྗེ་དང་འཁོར་ལོ་དང་སྡིགས་མཛུབ་དང་དགྲ་སྟ་དང་ཞགས་པ་འཛིན་པའོ། །འདོད་པའི་རྒྱལ་པོ་ནི་སྔོན་པོ་ཞལ་སྔོན་པོ་དང་དཀར་པོ་དང་དམར་པོ། ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་འཛིན་པ་གཞན་རྣམས་ཀྱིས་རྡོ་རྗེ་དང་རལ་གྲི་དང་ཞགས་པ་དང་ལྕགས་ཀྱུ་འཛིན་པའོ། །དབྱུག་པ་སྔོན་པོ་ནི་ནག་པོ་ཞལ་ནག་པོ་དང་དཀར་པོ་དང་དམར་པོ། རྡོ་རྗེས་མཚན་པའི་དབྱུག་པ་སྔོན་པོ་དང༌། རལ་གྲི་དང་འཁོར་ལོ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་དགྲ་སྟ་འཛིན་པའོ། །སྟོབས་པོ་ཆེ་ནི་ནག་པོ་ཞལ་ནག་པོ་དང་དཀར་པོ་དང་དམར་པོ་རྡོ་རྗེས་མཚན་པའི་དབྱུག་པ་ནག་པོ་དང་རལ་གྲི་དང་འཁོར་ལོ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་དགྲ་སྟ་འཛིན་པའོ། །གཙུག་ཏོར་འཁོར་ལོས་སྒྱུར་བ་ནི་ནག་པོ་ཞལ་ནག་པོ་དང་དཀར་པོ་དང་དམར་པོ། རྩ་བའི་ཕྱག་དག་གིས་གཙུག་ཏོར་སྤྱི་བོར་འཛིན་པའོ། །ཕྱག་ལྷག་མ་རྣམས་ཀྱིས་རྡོ་རྗེ་དང་པདྨ་དང་སྡིགས་མཛུབ་དང་རལ་གྲི་རྣམས་འཛིན་པའོ། །ལག་པ་གཉིས་ཐལ་མོ་གན་རྐྱལ་དུ་མཉམ་པར་བརྐྱང་བའི་སྲིན་ལག་གཉིས་ནི་སེན་མོའི་སྟེང་དུ་མཐེ་བོ་གཉིས་ཀྱི་སེན་མོས་མནན་ཏེ་མཐེའུ་ཆུང་གཉིས་བརྐྱང་ངོ༌། །དེ་བཞིན་དུ་གུང་མོ་གཉིས་ཀྱི་སེན་མོ་མཉམ་པར་ཡང་དག་པར་རྩེ་སྤྲད་ལ། མཛུབ་མོ་གཉིས་དབུས་སུ་རའི་རྣམ་པ་ནི་ཀུན་དུ་སྣང་བ་ཞེས་བྱ་བ་གཙུག་ཏོར་གྱི་ཕྱག་རྒྱའོ་ཞེས་ཁ་ཅིག་གོ །འགའ་ཞིག་ཏུ་ནི་གཞན་ནོ། །གནོད་མཛེས་རྒྱལ་པོ་ནག་པོ་ཞལ་ནག་པོ་དང་དཀར་པོ་དང་དམར་པོ། རྡོ་རྗེ་དང་འཁོར་ལོ་དང་རིན་པོ་ཆེ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་རལ་གྲི་འཛིན་པའོ། །མི་བསྐྱོད་པ་ལ་སོགས་པ་འདི་དག་ནི་སྣ་ཚོགས་པདྨའི་སྟེང་དུ་གོ་རིམས་བཞིན་དུ་རྡོ་རྗེ་རྩེ་ལྔ་པ་དང་འཁོར་ལོ་དང་རིན་པོ་ཆེ་མ་ར་ཀ་ཏ་ཆ་དགུ་པ་དང་པདྨ་དམར་པོ་དང་སྣ་ཚོགས་རྡོ་རྗེ་དང་འཁོར་ལོ་དང་རྡོ་རྗེ་དང་པདྨ་དང་སྣ་ཚོགས་རྡོ་རྗེ་དང་ཀླུ་ཤིང་གི་མེ་ཏོག་དང་འཁོར་ལོ་དང་
རྡོ་རྗེ་དང་རིན་པོ་ཆེ་དང༌། པདྨ་དང་རྡོ་རྗེ་དང་སྣ་ཚོགས་རྡོ་རྗེ་དང་རྡོ་རྗེ་དང་ཐོབ་དང་རྡོ་རྗེ་དང་པདྨ་དམར་པོ་དང་སྣ་ཚོགས་རྡོ་རྗེ་དང་རལ་གྲིའི་ཡུ་བ་དང་རྡོ་རྗེ་དང་རྡོ་རྗེས་མཆན་པའི་དབྱུག་པ་སྔོན་པོ་དང་དབྱུག་པ་ནག་པོ་དང་རྡོ་རྗེ་དང་རྡོ་རྗེ་ལ་གནས་པའི་ཉི་མ་དང་ཟླ་བ་ལ་བཞུགས་པ་ཞལ་གསུམ་ཕྱག་དྲུག་པའོ། །ཡང་གཞན་ནས་ནི་རང་རང་གི་ལྷའི་མདོག་ལྟ་བུའི་རིན་པོ་ཆེ་ལས་བྱས་པའོ། །དེ་ལ་རྣམ་པར་སྣང་མཛད་དང་ལྷ་མོ་རྣམས་དང་བྱང་ཆུབ་སེམས་དཔའ་རྣམས་ཟླ་བ་ལ་གནས་པའོ། །གཞན་རྣམས་ནི་ཉི་མ་ལ་གནས་པའོ། །མི་བསྐྱོད་པ་ལ་སོགས་པ་རྣམས་ནི་རྡོ་རྗེའི་སྐྱིལ་ཀྲུང་ཅན་ནོ། །ཁྲོ་བོ་རྣམས་ནི་ཞབས་གཡོན་བརྐྱང་པ་གཡས་བསྐུམ་པ་ཞལ་སོ་སོ་ལ་དམར་ལ་ཟླུམ་པའི་སྤྱན་གསུམ་གསུམ་མངའ་བ་སྒྲ་སྒྲོགས་ཤིང་འབར་བ་སྟེ། ཤིན་ཏུ་འཇིགས་པ་སྲུང་བའི་འཁོར་ལོར་བརྗོད་པའི་འཇིགས་པའི་གཟུགས་ལ་སོགས་པའི་ཁྱད་པར་དང་ལྡན་པའོ། །འདིར་དཀྱིལ་འཁོར་གྱི་བདག་པོ་ཁོ་ན་ཡུམ་དང་བཅས་པ་སྟེ་གནོད་མཛེས་ཀྱི་བར་དུ་ལྷ་གཞན་རྣམས་ཡུམ་མེད་པའོ། །སྲུང་བའི་འཁོར་ལོ་གནས་པའི་གཤིན་རྗེ་གཤེད་ལ་སོགས་པ་ནི་རང་གི་འོད་ཀྱི་ཤེས་རབ་དང་ཅས་པ་སྟེ་དེ་རྣམ་ནི་གོ་རིམས་བཞིན་དུ་རྡོ་རྗེ་རོ་ལགས་མ་དང༌། གཞན་གྱིས་མི་ཐུབ་མ་དང་ཁྲེ་གཉེར་ཅན་དང་རལ་པ་གཅིག་མ་དང༌། སྣ་ཚོགས་རྡོ་རྗེ་མ་དང༌། སྣ་ཚོགས་རིན་ཆེན་མ་དང༌། སྣ་ཚོགས་པདྨ་དང༌། སྣ་ཚོགས་ལས་མ་དང༌། ནམ་མཁའ་རྡོ་རྗེ་མ་དང༌། ས་འཛིན་མ་རྣམས་སོ། །མི་བསྐྱོད་པའི་ཐུགས་ཀར་ཡེ་ཤེས་སེམས་དཔའ་ཕྱག་གཉིས་པ་དམར་པོ་ཡུམ་དང་བཅས་པའོ། །དེའི་ཐུགས་ཀར་ཏིང་ངེ་འཛིན་སེམས་དཔའ་ཧཱུཾ་ནག་པོའོ། །རྣམ་པར་སྣང་མཛད་ཀྱི་ཨོཾ། རིན་ཆེན་འབྱུང་ལྡན་གྱི་སྭཱ། སྣང་བ་མཐའ་ཡས་ཀྱི་ཨཱཿ་དོན་ཡོད་གྲུབ་པའི་ཧཱ། སྤྱན་མ་ལ་སོགས་པའི་ལྷ་མོ་རྣམས་ཀྱི་ལཱཾ་མཱཾ་པཱཾ་ཏཱཾ། ཛཿ་ཧཱུཾ་བཾ་ཧོཿ། རེག་བྱ་རྡོ་རྗེ་མའི་ཁཾ་ངོ༌། །བྱམས་པ་ལ་སོགས་པ་བྱང་ཆུབ་སེམས་དཔའ་བརྒྱད་པོ་རྣམས་ཀྱི་མཻ་ཐླིཾ། ཨོཾ་ཨོཾ་ཨོཾ་ཧཱུཾ་ཨོཾ་སཾ་ངོ༌། །ཁྲོ་བོ་བཅུ་པོ་རྣམས་ཀྱི་ཧཱུཾ་ངོ༌། །ལྷ་རྣམས་ཀྱི་སྙིང་པོའི་སྔགས་ནི་རྡོ་རྗེ་ཕྲེང་བར་བརྗོད་དོ། །རིགས་ཀྱི་བདག་པོ་ནི་མི་བསྐྱོད་པ་དང་ཀུན་དུ་བཟང་པོ་གཉིས་ཀྱི་གོང་དུ་བརྗོད་པའི་རྡོ་རྗེ་སེམས་དཔའ་སྟེ། འོན་ཀྱང་རྡོ་རྗེ་དང་འཁོར་ལོ་དང༌། པདྨ་དང་
དྲིལ་བུ་དང༌། ནོར་བུ་དང་རལ་གྲི་འཛིན་པ། རང་འདྲ་བའི་རྡོ་རྗེ་དབྱིངས་ཀྱི་དབང་ཕྱུག་མས་ཡང་དག་པར་འཁྱུད་པའོ། །དེ་བཞིན་གཤེགས་པ་རྣམས་དང་མཱ་མ་ཀཱི་དང༌། ཕྱག་ན་རྡོ་རྗེ་དང་འཇམ་དཔལ་དང་གཙུག་ཏོར་འཁོར་ལོས་སྒྱུར་བ་དང༌། གནོད་མཛེས་རྒྱལ་པོ་རྣམས་ཀྱི་ནི་མི་བསྐྱོད་པའོ། །སྤྱན་མ་དང་གཟུགས་རྡོ་རྗེ་མ་དང༌། བྱམས་པ་དང་སའི་སྙིང་པོ་དང་གཤིན་རྗེ་གཤེད་དང་མི་གཡོ་བ་རྣམས་ཀྱི་རྣམ་པར་སྣང་མཛད་དོ། །སྒྲ་རྡོ་རྗེ་མ་དང་ནམ་མཁའི་སྙིང་པོ་དང༌། ཤེས་རབ་མཐར་བྱེད་དང་འདོད་པའི་རྒྱལ་པོ་རྣམས་ཀྱི་ནི་རིན་ཆེན་འབྱུང་ལྡན་ནོ། །གོས་དཀར་མོ་དང༌། དྲི་རྡོ་རྗེ་མ་དང་སྤྱན་རས་གཟིགས་དང་པདྨ་མཐར་བྱེད་དང་དབྱུག་པ་སྔོན་པོ་རྣམས་ཀྱི་ནི་སྣང་བ་མཐའ་ཡས་སོ། །སྒྲོལ་མ་དང་རོ་རྡོ་རྗེ་མ་དང་རེག་བྱ་རྡོ་རྗེ་མ་དང་སྒྲིབ་པ་རྣམ་པར་སེལ་བ་དང༌། བགེགས་མཐར་བྱེད་དང༌། སྟོབས་པོ་ཆེ་རྣམས་ཀྱི་ནི་དོན་ཡོད་གྲུབ་པའོ། །རྒྱས་འདེབས་ཀྱི་དེ་བཞིན་གཤེགས་པ་ཐམས་ཅད་ནི་རང་འོད་ཀྱི་ཡུམ་དང་བཅས་པའོ། །དཔལ་ཀུན་ཏུ་ཁ་སྦྱོར་གྱི་རྒྱུད་ལས་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་སྲུང་བའི་འཁོར་ལོའི་ལྟེ་བའི་དབུས་སུ་རླུང་དང་མེ་དང་ཆུ་དང་སའི་དཀྱིལ་འཁོར་དང་རི་རབ་ཀྱི་སྟེང་དུ་ཆོས་འབྱུང་གི་དཀྱིལ་དུ་གཞལ་ཡས་ཁང་ངོ༌། །སྲུང་བའི་འཁོར་ལོར་གཤིན་རྗེ་གཤེད་ཕྱག་གཡས་པ་གསུམ་གྱིས་རྡོ་རྗེ་ལྕགས་ཀྱུ་དང་འཁོར་ལོ་དང༌། རྡོ་རྗེ་རྣམས་བསྣམས་པ། གཡོན་གསུམ་གྱིས་སྙིང་གར་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་དགྲ་སྟ་འཛིན་པའོ། །ཤེས་རབ་མཐར་བྱེད་ནི་རྡོ་རྗེ་ཞགས་པ་དང༌། རྡོ་རྗེ་དང་རལ་གྲི་དང་སྙིང་གར་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །པདྨ་མཐར་བྱེད་ནི་ལྕགས་སྒྲོག་དང་པདྨ་དང་རལ་གྲི་དང༌། དྲིལ་བུ་དང་དགྲ་སྟ་དང་ཞགས་པའོ། །བགེགས་དགྲ་ནི་རྡོ་རྗེ་དྲིལ་བུ་དང་རྡོ་རྗེ་རྒྱ་གྲམ་དང་འཁོར་ལོ་དང༌། སྙིང་གར་སྡིགས་མཛུབ་དང་བཅས་པའི་ཞགས་པ་དང་གཏུན་ཤིང་དང་དགྲ་སྟའོ། །མི་གཡོ་བ་ནི་རལ་གྲི་དང་འཁོར་ལོ་དང་རྡོ་རྗེ་དང་སྡིགས་མཛུབ་དང་དགྲ་སྟ་དང་ཞགས་པའོ། །འདོད་པའི་རྒྱལ་པོ་ནི་གཡས་དང་ཅིག་ཤོས་ཀྱི་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་དང་ལྕགས་ཀྱུ་དང་རལ་གྲི་དང་རྡོ་རྗེ་དང་ཞགས་པའོ། །དབྱུག་པ་སྔོན་པོ་ནི་རྡོ་རྗེས་མཚན་པའི་
དབྱུག་པ་སྔོན་པོ་དང༌། རལ་གྲི་དང་འཁོར་ལོ་དང་སྡིགས་མཛུབ་དང་བཅས་པའི་ཞགས་པ་དང་པདྨ་དང་དགྲ་སྟའོ། །སྟོབས་པོ་ཆེ་ནི་རྩེ་གསུམ་པ་དང་རལ་གྲི་དང་འཁོར་ལོ་དང༌། སྙིང་གར་སྡིགས་མཛུབ་དང་བཅས་པའི་ཞགས་པ་དང་པདྨ་དང་དགྲ་སྟའོ། །གཙུག་ཏོར་འཁོར་ལོས་སྒྱུར་བ་ནི་གཡས་དང་ཅིག་ཤོས་ཀྱི་ཕྱག་དང་པོ་གཉིས་ཀྱིས་སྤྱི་བོར་གཙུག་ཏོར་གྱི་ཕྱག་རྒྱ་དང་འཁོར་ལོ་དང་པདྨ་དང་སྡིགས་མཛུབ་དང་རལ་གྲིའོ། །གནོད་མཛེས་ནི་རྡོ་རྗེ་དང་འཁོར་ལོ་དང་རིན་པོ་ཆེ་དང༌། སྙིང་གར་སྡིགས་མཛུབ་དང་བཅས་པའི་ཞགས་པ་དང་པདྨ་དང་རལ་གྲིའོ། །བཅུ་པོ་འདི་དག་ནི་དབུ་ལ་ཐོད་པ་ལྔས་བརྒྱན་པ་འཁོར་ལོ་ལ་སོགས་པའི་ཕྱག་རྒྱ་ལྔ་དང་ལྡན་པ་མི་མགོའི་ཕྲེང་བ་སྐེ་ལ་འཆང་བ་གོ་རིམས་བཞིན་དུ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་དང་རྟག་པ་དང་རིན་ཆེན་འབྱུང་ལྡན་འོད་དཔག་མེད་དང་དོན་ཡོད་གྲུབ་པ་པ་དང་མི་བསྐྱོད་པ་དང་མི་བསྐྱོད་པས་རྒྱས་བཏབ་པའོ། །གཞལ་ཡས་ཁང་གི་དབུས་སུ་རྡོ་རྗེ་སེམས་དཔའ་ཞལ་འཛུམ་པ་དང་བཅས་པའི་སྐུ་མདོག་དཀར་པོ་ལ་ཅུང་ཟད་དམར་པའི་མདངས་དང་ལྡན་པ་རལ་པའི་ཐོར་ཅོག་ནག་པོ་ལ་གནས་པའི་ནོར་བུ་དང་སྣ་ཚོགས་རྡོ་རྗེ་དང་དེའི་འོག་ཏུ་གཡོན་ངོས་སུ་གནས་པའི་ཟླ་བ་ཕྱེད་པ་དྲི་མ་མེད་པ་དང༌། སངས་རྒྱས་ལྔའི་ཅོད་པན་ཅན་དཔྲལ་བའི་སྟེང་དུ་ཐོད་པ་ལྔ་དང་གཙུག་གི་འཁོར་ལོ་དང༌། རྣ་ཆ་དང་མགུལ་རྒྱན་དང་ལག་གདུབ་དང་སྐེ་རགས་དང་ཐལ་བ་རྣམས་ཀྱིས་བརྒྱན་པ་ཞལ་གསུམ་པ་གཡས་པ་དང་ཅིག་ཤོས་ཀྱི་ཞལ་སྔོན་པོ་དང་དམར་པོ་ཞལ་རེའི་ལ་སྤྱན་གསུམ་གསུམ་དང་ལྡན་པ་ཕྱག་དྲུག་པ་རྡོ་རྗེ་དང་རྡོ་རྗེ་དྲིལ་བུས་རྣམ་པར་མཛེས་པའི་ཕྱག་གཉིས་ཀྱིས་རང་དང་འདྲ་བའི་ཤེས་རབ་ལ་འཁྱུད་ཅིང་ཆུ་སྐྱེས་ལ་མཉམ་པར་སྦྱར་བའི་དགའ་བ་དང་ལྡན་པ་ཕྱག་གཡས་པ་དག་གིས་རལ་གྲི་དང་ལྕགས་ཀྱུ་འཛིན་པ་གཡོན་པ་དག་གིས་ཐོད་པ་དང་ཞགས་པ་འཛིན་པ་ཉི་མའི་འོད་ཀྱི་དཀྱིལ་འཁོར་ཅན་སྣ་ཚོགས་པདྨ་དང་ཐོད་པ་དང་ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ་གར་གྱི་ཉམས་དགུ་དང་ལྡན་པའོ། །དེའི་ཐུགས་ཀར་སྣ་ཚོགས་པདྨ་དང་ཟླ་བ་ལ་ཡེ་ཤེས་སེམས་དཔའ་སྐུ་མདོག་དཀར་དམར་སེམས་དཔའི་སྐྱིལ་ཀྲུང་ཅན་སངས་རྒྱས་ལྔའི་ཅོད་
པན་གྱིས་སྤྲས་པ་རིན་པོ་ཆེའི་རྒྱན་གྱིས་བརྒྱན་པ་རྡོ་རྗེ་དང་རྡོ་རྗེ་དྲིལ་བུ་དང་བཅས་པའི་ཕྱག་གཉིས་ཀྱིས། རང་དང་འདྲ་བའི་ཤེས་རབ་ལ་འཁྱུད་པ། དེའི་ཐུགས་ཀར་ཟླ་བ་ལ་ཏིང་ངེ་འཛིན་སེམས་དཔའི་རང་བཞིན་ཧཱུཾ་ནག་པོའི་རྣམ་བའོ། །འདིར་སེམས་དཔའ་གསུམ་གྱི་བདག་ཉིད་ཅན་རྡོ་རྗེ་འཆང་གི་ཤར་དུ་རྣམ་པར་སྣང་མཛད་དཀར་པོ་ཞི་བ་ཕྱག་བཞི་པ་གཡས་པ་དག་གིས་འཁོར་ལོ་དང་དྲིལ་བུ་དང་གཡོན་པ་དག་གིས་ཐོད་པ་དང་ཞགས་པ་བསྣམས་པའོ། །ལྷོར་ནི་རིན་ཆེན་འབྱུང་ལྡན་སེར་པོ་ཕྱག་བཞི་པ་གཡས་པ་དག་གིས་རིན་པོ་ཆེ་དང་ལྕགས་ཀྱུ་གཡོན་པ་དག་གིས་ཐོད་པ་དང་ཞགས་པ་བསྣམས་པའོ། །ནུབ་ཏུ་འོད་དཔག་མེད་དམར་པོ་ཕྱག་བཞི་པ་གཡས་པ་དག་གིས་མདའ་དང་པདྨ་གཡོན་པ་དག་གིས་གཞུ་དང་ཞགས་པ་འཛིན་པའོ། །བྱང་དུ་དོན་ཡོད་གྲུབ་པ་ལྗང་གུ་ཕྱག་བཞི་པ་གཡས་པ་དག་གིས་རྡོ་རྗེ་དང་ལྕགས་ཀྱུ། གཡོན་པ་དག་གིས་དྲིལ་བུ་དང་ཐོད་པ་འཛིན་པའོ། །དབང་ལྡན་དུ་སྤྱན་མ་དཀར་མོ་ཕྱག་བརྒྱད་མ་གཡས་རྣམས་ཀྱིས་འཁོར་ལོ་དང༌། རྡོ་རྗེ་དང་རལ་གྲི་དང་མདའ་རྣམས་སོ། །གཡོན་པ་རྣམས་ཀྱིས་ཐོད་པ་དང་དྲིལ་བུ་དང་ཞགས་པ་དང་གཞུ་རྣམས་སོ། །མེ་ར་མཱ་མ་ཀཱི་སྔོན་མོ་ཕྱག་བཅུ་གཉིས་པ་གཡས་པ་རྣམས་ཀྱིས་མདའ་དང་རལ་གྲི་དང་རྡོ་རྗེ་དང་འཁོར་ལོ་དང༌། རིན་པོ་ཆེ་དང་པདྨའོ། །གཡོན་པ་རྣམས་ཀྱིས་གཞུ་དང་ལྕགས་ཀྱུ་དང་དྲིལ་བུ་དང་ཞགས་པ་དང་ཐོད་པ་དང་ཁ་ཊྭཱཾ་གའོ། །བདེན་བྲལ་དུ་གོས་དཀར་མོ་དམར་མོ་ཕྱག་བརྒྱད་མ་གཡས་རྣམས་ཀྱིས་མདའ་དང་པདྨ་དང་རལ་གྲི་དང་རྡོ་རྗེ་རྣམས་སོ། །གཡོན་པ་རྣམས་ཀྱིས་གཞུ་དང་ཐོད་པ་དང་ཞགས་པ་དང༌། དྲིལ་བུ་བསྣམས་པའོ། །རླུང་དུ་སྒྲོལ་མ་ལྗང་གུ་ཕྱག་བརྒྱད་མ་གཡས་པ་རྣམས་ཀྱིས་ཨུཏྤལ་དམར་པོ་དང་རལ་གྲི་དང༌། ལྕགས་ཀྱུ་དང་མདའོ། །ཅིག་ཤོས་རྣམས་ཀྱིས་འཁོར་ལོ་དང་ཞགས་པ་དང་ཐོད་པ་དང་གཞུ་རྣམས་སོ། །རིམ་པ་གཉིས་པ་ལ་ཤར་གྱི་ཕྱོགས་སུ་རྡོ་རྗེ་དྲག་མོ་དཀར་མོ་ཕྱག་ན་མདའ་དང་ལྕགས་ཀྱུ་དང་གཞུ་དང་བྱང་ཆུབ་ཀྱི་སེམས་ཀྱིས་གང་བའི་ཐོད་པ་འཛིན་པའོ། །ལྷོར་རྡོ་རྗེ་གཟུགས་མ་སེར་མོ་ཕྱག་ན་རྡོ་རྗེ་དང༌། མདུང་དང་ཞགས་པ་དང་ཐོད་པ་ཁྲག་གིས་གང་བའོ། །ནུབ་ཏུ་འདོད་ཆགས་རྡོ་རྗེ་མ་དམར་མོ་
ཕྱག་ན་རལ་གྲི་དང་རྡོ་རྗེ་དང་ཆུས་གང་བའི་ཐོད་པ་དང་དྲིལ་བུའོ། །བྱང་དུ་རྡོ་རྗེ་ཞི་བ་མ་ལྗང་གུ་ནི་ཕྱག་ན་ཐལ་བ་ཐུང་ངུ་དང་བ་དན་གསུམ་པ་དང་རྡོ་རྗེས་མཚན་པའི་ཁ་ཊྭཱཾ་ག་དང་སྨན་གྱིས་གང་བའི་ཐོད་པ་རྣམས་སོ། །དབང་ལྡན་དུ་རྡོ་རྗེ་གནོད་སྦྱིན་མ་ནི་དཀར་སེར་གྱི་མདོག་ལ་ཕྱག་ན་དབྱུག་ཏོ་དང་ཨུཏྤལ་དང་ཐོད་པ་དང་ཌ་མ་རུའོ། །མེར་རྡོ་རྗེ་མཁའ་འགྲོ་མ་དམར་སེར་ཕྱག་ན་པདྨ་དང་མེ་ལོང་དང་རྐང་མར་གྱིས་གང་བའི་ཐོད་པ་དང་དགྲ་སྟའོ། །བདེན་བྲལ་དུ་སྒྲ་རྡོ་རྗེ་མ་སྔོན་དམར་ཕྱག་ན་ཤཀྟི་དང་དུང་དང་འཁོར་ལོ་དང་ཁྲག་གིས་གང་བའི་ཐོད་པའོ། །རླུང་དུས་རྡོ་རྗེ་མ་དཀར་ལྗང་པདྨ་དང་རྡོ་རྗེ་དང་བདུད་རྩི་ལྔ་དང་ཤ་ལྔས་གང་བའི་ཐོད་པ་མི་ལྤགས་ཀྱིས་གཡོགས་པ་དང་དྲིལ་བུའོ། །བརྒྱད་པོ་འདི་དག་ནི་ཕྱག་བཞི་པ་དང་པོའི་ཕྱག་མཚན་གཉིས་ནི་གཡས་པ་དག་གིས་འཛིན་པ་གཞན་གཉིས་ནི་གཡོན་པ་དག་གིས་འཛིན་པའོ། །རིམ་པ་གསུམ་པའི་ཤར་དུ་བཞད་མ་དམར་མོ་ཕྱག་གཉིས་རྡོ་རྗེ་དང་རྡོ་རྗེ་དྲིལ་བུ་དང་བཅས་པས་མངོན་པར་བཞད་པའི་ཚུལ་ཅན་ནོ། །ལྷོར་སྒེག་མོ་སྔོན་པོ་ཕྱག་གཉིས་རྡོ་རྗེ་དང་རྡོ་རྗེ་དྲིལ་བུ་འཛིན་པས་སྙེམས་པ་དང་བཅས་པས་མངོན་པར་སྒེག་པའི་ཚུལ་ཅན་ནོ། །ནུབ་ཏུ་གླུ་མ་སེར་མོ་ནི་སྐུ་ཅུང་ཟད་གཡོ་ཞིང་སྒེག་པའི་ཕྱག་གཉིས་ཀྱིས་ཏིང་ཏིང་ཤག་འཛིན་པའོ། །བྱང་དུ་གར་མ་ལྗང་གུ་པད་སྐོར་གྱི་ཚུལ་ལ་སོགས་པའི་གར་གྱིས་གཡོ་བའི་ཕྱག་གཉིས་ཀྱིས་རྡོ་རྗེ་རྩེ་གསུམ་པ་དང་རྡོ་རྗེ་དྲིལ་བུ་འཛིན་པའོ། །དབང་ལྡན་དུ་གླིང་བུ་མ་དམར་མོའོ། །མེར་པི་ཝང་མ་སེར་མོ་ཕྱག་གཉིས་མ་སྒེག་མོའི་ཉམས་ཀྱིས་བག་ཙམ་ལུས་གཡོ་བའོ། །བདེན་བྲལ་དུ་མུ་ཀུནད་མ་དཀར་མོའོ། །རླུང་དུ་རྫ་རྔ་མ་དུ་བའི་མདོག་ཅན་ནོ། །བཞི་པོ་འདི་དག་ནི་ཕྱག་གཉིས་ཀྱིས་རང་རང་གི་རོལ་ཆ་བརྡུང་བའོ། །དེ་ནས་ཕྱིའི་སྣམ་བུ་ལ་མེའི་མཚམས་སུ་མེ་ཏོག་མ་དཀར་མོ་ཕྱག་གཡོན་གྱིས་མེ་ཏོག་གི་ཕྲེང་བ་དང་གཅིག་ཤོས་ཀྱིས་འཁོར་ལོ་འཛིན་པའོ། །བདེན་བྲལ་དུ་བདུག་སྤོས་མ་དུ་བའི་མདོག་ཅན་ཕྱག་གཡོན་གྱིས་བདུག་སྤོས་ཀྱི་སྣོད་དང་ཅིག་ཤོས་ཀྱིས་རིན་པོ་ཆེའི་འཛིན་པའོ། །རླུང་དུ་མར་མེ་མ་གསེར་གྱི་མདོག་ཅན་ཕྱག་གཡོན་དུ་མར་མེའི་ཀོང་བུ་གཡས་སུ་པདྨ་འཛིན་པའོ། །དབང་ལྡན་དུ་དྲི་ཆབ་མ་དམར་མོ་ཕྱག་གཡོན་གྱིས་དྲིའི་དུང་ཆོས་དང་ཅིག་ཤོས་ཀྱིས་རལ་
གྲི་འཛིན་པའོ། །ཤར་གྱི་ཕྱོགས་སུ་མེ་ལོང་མ་དཀར་མོ་ཕྱག་གཉིས་ཀྱིས་མེ་ལོང་འཛིན་པའོ། །ལྷོར་རོ་མ་དམར་མོ་ཕྱག་གཉིས་ཀྱིས་རོའི་སྣོད་འཛིན་པའོ། །ནུབ་ཏུ་རེག་མ་ལྗང་གུ་ཕྱག་གཉིས་ཀྱིས་གོས་སྣ་ཚོགས་འཛིན་པའོ། །བྱང་དུ་ཆོས་མ་དཀར་མོ་ཕྱག་གཉིས་ཀྱིས་ཆོས་འབྱུང་དཀར་པོ་འཛིན་པའོ། །འདི་རྣམས་དང་རྣམ་པར་སྣང་མཛད་ལ་སོགས་པའི་ལྷ་རྣམས་ནི་ཞལ་གཅིག་སྤྱན་གསུམ་པ་རལ་བའི་ཅོད་པན་ནག་པོ་ལ་ཐོད་པ་ལྔ་དང་འཁོར་ལོ་ལ་སོགས་པས་བརྒྱན་པ། ལྷའི་ན་བཟའ་གོན་པ་སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །ཤར་སྒོར་རྡོ་རྗེ་ལྕགས་ཀྱུ་མ་ནམ་མཁའི་མདོག་ལྟ་བུ་སྔོ་བསངས་ཞལ་གཡས་ནག་པོ་གཡོན་དཀར་པོ་ཕྱག་དྲུག་པ་གཡས་པ་རྣམས་ཀྱིས་ལྕགས་ཀྱུ་དང་རལ་གྲི་དང་འཁོར་ལོ་འཛིན་པའོ། །གཡོན་རྣམས་ཀྱིས་ཞགས་པ་དང་སྡིགས་མཛུབ་དང་དྲིལ་བུའོ། །ལྷོ་སྒོར་རྡོ་རྗེ་ཞགས་པ་མ་དཀར་སེར་ཞལ་གཡས་ནག་པོ་གཡོན་དམར་པོ། ཕྱག་དྲུག་པ་གཡས་པ་རྣམས་ཀྱིས་ཞགས་པ་དང་རྡོ་རྗེ་དང་རལ་གྲིའོ། །གཡོན་པ་རྣམས་ཀྱིས་འཁོར་ལོ་དང་དྲིལ་བུ་དང་སྡིགས་མཛུབ་དང་བཅས་པའི་ཞགས་པའོ། །ནུབ་སྒོར་རྡོ་རྗེ་ལྕགས་སྒྲོག་མ་དམར་མོ་ཞལ་གཡས་ནག་པོ་གཡོན་དཀར་པོ་ཕྱག་དྲུག་པ་གཡས་རྣམས་ཀྱིས་ལྕགས་སྒྲོག་དང་རྡོ་རྗེ་དང་རལ་གྲིའོ། །གཡོན་རྣམས་ཀྱིས་འཁོར་ལོ་དང་དྲིལ་བུ་དང་ལྕགས་ཀྱུའོ། །བྱང་དུ་རྡོ་རྗེ་དྲིལ་བུ་མ་ལྗང་གུ་ཞལ་གཡས་ནག་པོ་གཡོན་དཀར་པོ་ཕྱག་དྲུག་པ་གཡས་པ་རྣམས་ཀྱིས་དྲིལ་བུ་དང་རྡོ་རྗེ་དང་རལ་གྲིའོ། །གཡོན་པ་རྣམས་ཀྱིས་འཁོར་ལོ་དང་ལྕགས་ཀྱུ་དང་ཞགས་པའོ། །བཞི་པོ་འདི་རྣམས་ནི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ་དབུ་སྐྲ་དམར་སེར་འབར་ཞིང་གྱེན་དུ་བརྫེས་པ་ཐོད་པ་ལྔ་དང་འཁོར་ལོ་ལ་སོགས་པས་བརྒྱན་པ་སྟག་གི་པགས་པ་གོན་པ་ཞབས་གཡས་བརྐྱང་བ་གཡོན་བསྐུམ་པས་གར་བྱེད་པའི་ཚུལ་གྱིས་སྣ་ཚོགས་པདྨ་དང་ཐོད་པ་དང་ཉི་མ་ལ་བཞུགས་པའོ། །རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་རྣམས་སྣ་ཚོགས་པདྨ་དང་ཐོད་པ་དང་ཉི་མའི་གདན་ལའོ། །ལྷ་གཞན་ཐམས་ཅད་ནི་སྣ་ཚོགས་པདྨ་དང་ཐོད་པ་ཟླ་བའི་གདན་ལ་གནས་པའོ། །ཐམས་
ཅད་ཀྱང་ཉི་མའི་འོད་ཟེར་ཅན་ཁོ་ནའོ། །འདིར་རྡོ་རྗེ་སེམས་དཔའ་ཁོ་ན་ཤེས་རབ་དང་བཅས་པ་སྟེ། ལྷ་གཞན་ཐམས་ཅད་ཤེས་རབ་མ་དང་བྲལ་བའོ་ཞེས་པ་ནི་ཕྱོགས་གཅིག་གོ །རང་ལྟ་བུའི་ཤེས་རབ་མ་དང་བཅས་པ་ཞེས་པ་ནི་ཕྱོགས་གཉིས་པའོ། །རིགས་ཀྱི་བདག་པོ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་རྣམས་དང་མཱ་མ་ཀཱི་དང་སྒྲ་རྡོ་རྗེ་མ་དང་གླུ་མ་དང་རེག་བྱ་རྡོ་རྗེ་མ་དང་ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མི་བསྐྱོད་པའོ། །སྤྱན་མ་དང་རྡོ་རྗེ་དྲག་མོ་དང་སའི་རྡོ་རྗེ་མ་དང་མེ་ཏོག་མ་དང༌། བཞད་མ་དང་གླིང་བུ་མ་དང་རྡོ་རྗེ་ལྕགས་ཀྱུ་མ་རྣམས་ཀྱི་རྣམ་པར་སྣང་མཛད་དོ། །རྡོ་རྗེ་མཁའ་འགྲོ་མ་དང་རྡོ་རྗེ་སྐུ་མ་དང་རྡོ་རྗེ་བདུག་སྤོས་མ་དང༌། སྒེག་མོ་དང་པི་ཝང་མ་དང་རྡོ་རྗེ་ཞགས་པ་མ་རྣམས་ཀྱི་རིན་འབྱུང་ངོ༌། །གོས་དཀར་མོ་དང་རྡོ་རྗེ་ཆགས་པ་མ་དང༌། མར་མེ་མ་དང་དྲི་ཆབ་མ་དང་མུ་ཀུནད་མ་དང་ལྕགས་སྒྲོག་མ་རྣམས་ཀྱི་སྣང་བ་མཐའ་ཡས་སོ། །སྒྲོལ་མ་དང་རྡོ་རྗེ་ཞི་བ་མ་དང་རྡོ་རྗེ་གནོད་སྦྱིན་མ་དང༌། གར་མ་དང་རོ་མ་དང༌། རྫ་རྔ་མ་དང་དྲིལ་བུ་མ་རྣམས་ཀྱི་དོན་ཡོད་གྲུབ་པའོ། །ཐུགས་ཀའི་ས་བོན་ནི་རྡོ་རྗེ་སེམས་དཔའ་ལ་སོགས་པ་རྣམས་དཀྱིལ་འཁོར་ལོ་དགོད་པའི་རིམ་པས། ཧཱུཾ་བྲུཾ། ཨཱཾ་ཧཱིཿ་ཁཾ་བྷྲཱུཾ། ཧཱུཾ་ཧྲཱིཿ་ཏཾ་ཨཾ་ཨཱཾ་ཨིཾ་ཨཱིཾ་ཨུཾ་ཨཱུཾ་ཨཾ་ཨཱཿ་རཾ་ཧཱཾ། ཨཱིཾ་རཱཾ་ལཾ་དྷཾ་ལིཾ། གཾ་བཾ་ལིཾ་ནཾ་རཾ། ཨོཾ་ཨོཾ་ཨེཾ་ཨཻཾ་ཛཿ་ཧཱུཾ་བཾ་ཧོཿ་ཞེས་པའོ། །རྡོ་རྗེ་སེམས་དཔའི་སྙིང་པོའི་སྔགས་ནི་ཨོཾ་བཛྲ་ཨ་མྲྀ་ཏ་མ་ཧཱ་སུ་ཁཾ་ཧཾ་སྭཱ་ཧཱ་ཞེས་པའོ། །རྡོ་རྗེ་དྲིལ་བུའི་སྔགས་ཨོཾ་ཨཱཿ་བཛྲ་གྷཎྜེ་ཧོཿ་ཧཾ་སྭཱ་ཧཱ་ཞེས་པ་ནི་ལས་ཐམས་ཅད་པའོ། །རྫོགས་པའི་རིམ་པའི་རྣལ་འབྱོར་པ་ལ་ནི་འཁོར་ལོའི་གཙོ་བོའི་སྙིང་པོའི་སྔགས་ཉིད་ཀྱིས་ལྷ་གཞན་རྣམས་ཀྱི་སྙིང་པོའི་སྔགས་ཀྱིས་བསྒྲུབ་བྱ་ཡང་འགྲུབ་པར་འགྱུར་བས་དེ་རྣམས་ནི་མ་བྲིས་ཏེ་གཞུང་མངས་པས་འཇིགས་པས་སོ། །དེ་བཞིན་དུ་ཐོག་མ་དང་ཐ་མ་ཡང་རིག་པར་བྱའོ། །ཡེ་ཤེས་མཁའ་འགྲོ་མའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་སྣ་ཚོགས་པདྨ་དང་སྣ་ཚོགས་རྡོ་རྗེའི་ལྟེ་བར་གནས་པའི་གཞལ་ཡས་ཁང་གི་དབུས་སུ་གདུགས་དཀར་པོ་དང་བཅས་པའི་སེང་གེ་ལ་གནས་པའི་སྣ་ཚོགས་པདྨ་དང་ཉི་མར་ཡེ་ཤེས་མཁའ་འགྲོ་མ་སྔོན་མོའོ། །འདིའི་ཅོད་པན་དར་གྱིས་བཅིངས་པའི་སྟེང་དུ་རྡོ་རྗེས་མཚན་པ་སངས་རྒྱས་ལྔ་འོད་འཕྲོ་བས་བརྒྱན་
པ། རྩ་བའི་ཞལ་ཁྲོ་ཞིང་གད་རྒྱངས་དང་བཅས་པ། གཡས་དཀར་བ་བཞད་པ་དང་བཅས་པ། གཡོན་དམར་བ་སྒེག་པ་དང་བཅས་པ། ཞལ་རེ་རེ་ལ་སྤྱན་གསུམ་གསུམ་པ། གཡས་པའི་ཕྱག་གསུམ་ན་སྟེང་དུ་བསྟན་པའི་ཁ་ཊྭཱཾ་ག་དང་དགྲ་སྟ་དང་རྡོ་རྗེའོ། །གཡོན་གྱི་གསུམ་ལ་དྲིལ་བུ་དང་ཁྲག་གིས་གང་བའི་ཐོད་པ་དང་རལ་གྲི་རྣམས་སོ། །འདིའི་ཤར་གྱི་ཕྱོགས་སུ་རྡོ་རྗེ་མཁའ་འགྲོ་མ་དཀར་མོ་སྒེག་པའི་ཉམས་དང་ལྡན་པའོ། །བྱང་ཕྱོགས་སུ་འཇིགས་བྱེད་མཁའ་འགྲོ་མ་གསེར་གྱི་མདོག་ཅན་ནོ། །ནུབ་ཏུ་རོ་ལངས་མ་དམར་མོའོ། །ལྷོ་ཕྱོགས་སུ་གཏུམ་མོ་སྔོན་མོའོ། བཞི་པོ་འདི་དག་ཀྱང་སེང་གེ་ལ་གནས་པའི་སྣ་ཚོགས་པདྨ་དང་ཉི་མ་ལ་གནས་པ་གཡས་པ་དང་ཅིག་ཤོས་ཀྱི་ཕྱག་གཉིས་ཀྱིས་སྟེང་དུ་བསྒྲེང་པའི་ཁ་ཊྭཱཾ་ག་དང་ཁྲག་གིས་བཀང་བའི་ཐོད་པ་འཛིན་པའོ། །དབང་ལྡན་དུ་སེང་གེ་མོ་ནི་སེང་གེའི་གདོང་པ་ཅན་གཡས་སེར་གཡོན་དཀར་བའི་ལུས་ཕྱེད་ཕྱེད་པ་གླང་པོ་ཆེ་དཀར་པོའི་གདན་ལ་བཞུགས་པའོ། །མེའི་མཚམས་སུ་སྟག་མོ་སྟག་གི་གདོང་པ་ཅན་གཡོན་སྔོན་མོ་གཡས་དཀར་བ་ཕྱེད་ཕྱེད་ཀྱི་སྐུ་རིན་པོ་ཆེ་བདུན་གྱི་ཕུང་པོ་ལ་གནས་པའོ། །སྲིན་པོའི་མཚམས་སུ་ཅེ་སྤྱང་མ་ཅེ་སྤྱང་གི་གདོང་ཅན་གཡས་དམར་བ་གཡོན་ནག་པོའི་ལུས་ཕྱེད་ཕྱེད་པ་མ་ཧེ་ལ་བཞུགས་པའོ། །རླུང་གི་མཚམས་སུ་འུག་པ་མོ་འུག་པའི་གདོང་ཅན་གཡོན་པ་དང་གཡས་པའི་ལུས་ཕྱེད་ཕྱེད་པ་སེར་པོ་དང་དམར་པོའོ། །ཀླུ་བརྒྱད་ཀྱི་གཞུག་མ་རྣམས་ལ་བཞུགས་པའོ། །བཞི་པོ་འདི་དག་ནི་གཡས་པ་དང་གཡོན་པའི་ཕྱག་གཉིས་རྡོ་རྗེ་ལྕགས་ཀྱུ་དང་སྡིགས་མཛུབ་དང་བཅས་པའི་རྡོ་རྗེ་ཞགས་པས་བརྒྱན་ཅིང་སྣ་ཚོགས་པདྨ་དང་ཉི་མ་ལ་གནས་པའོ། །དེའི་ཤར་སྒོར་རྒྱལ་བའི་དབང་ཕྱུག་མ་དཀར་མོ་ཕྱག་གཉིས་ཀྱིས་ཐལ་མོ་ཁར་བཅུག་པའོ། །བྱང་དུ་གསལ་བྱེད་མ་སེར་མོ་མར་མེ་ལྟ་བུའི་ཐལ་མོ་ཁ་སྦྱར་བ་སྤྱི་བོར་འཛིན་པའོ། །ནུབ་ཏུ་འཇིགས་བྱེད་མ་དམར་མོ་ཁྲག་གིས་གང་བའི་སྙིམ་པ་སྟེང་དུ་བྱས་ཏེ་ཁའི་ཐད་ཀར་བཟུང་ནས་ཁྲག་གི་རྒྱུན་འཐུང་བར་བྱེད་པའོ། །ལྷོར་ཀམྤོ་ཛི་ནག་པོ་རྡོ་རྗེའི་སྙིམ་པ་ལ་མཐེ་བོའི་རྩེ་མོ་གཉིས་ཕན་ཚུན་སྦྱར་ཏེ་སྡིགས་མཛུབ་གཉིས་ཀྱི་རྩེ་མོ་བརྐྱང་བ་སྦྱར་ནས་རང་གི་གསང་བའི་གནས་སྟོན་པར་
བྱེད་པའོ། །བཞི་པོ་འདི་དག་ནི་སྣ་ཚོགས་པདྨ་ལ་གནས་པའི་ཡི་དགས་ཀྱི་སྙིང་གར་ཉི་མའི་གདན་ལ་བཞུགས་པའོ། །རྡོ་རྗེ་མཁའ་འགྲོ་མ་ལ་སོགས་པ་བཅུ་གཉིས་ནི་ཞལ་གཅིག་ལ་སྤྱན་གསུམ་པའོ། །ལྷ་མོ་བཅུ་གསུམ་པོ་ཐམས་ཅད་ཀྱང་ལྷའི་གོས་དམར་པོ་མནབས་པ་དབུ་ལ་ཐོད་པ་ལྔའི་ཕྲེང་བ་དང་བཅས་པའི་ཕྱག་རྒྱ་ལྔ་དང་ལྡན་པ་སེམས་དཔའི་སྐྱིལ་ཀྲུང་ཅན་ཀླུའི་རྒྱལ་པོ་བརྒྱད་ཀྱིས་རྣམ་པར་བརྒྱན་པ་བསྐལ་པའི་མཐའི་མེ་འབར་བའི་འོད་ལྟ་བུའི་འོད་ཟེར་གྱི་ཚོགས་ཀྱིས་འཇིགས་པར་བྱེད་པ་གོ་རིམས་བཞིན་དུ་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང༌། དོན་ཡོད་གྲུབ་པ་དང་མི་བསྐྱོད་པ་དང༌། རྣམ་སྣང་དང་རིན་འབྱུང་དང་སྣང་མཐའ་དང༌། རྟག་པ་དང་འོད་དཔག་མེད་དང༌། དོན་ཡོད་གྲུབ་པ་རྣམས་ཀྱིས་རྒྱས་བཏབ་པའོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཨཱཾ་ཨཱིཾ་ཨཱུཾ་རཱྀཾ་ལཱྀཾ་ཨཻཾ་ཨཽཾ་ཨཱཿ་འདི་རྣམས་ནི་ཐུགས་ཀའི་ས་བོན་རྣམས་སོ། །ཨོཾ་ཧྲཱིཿ་སྭཱ་ཧཱ། ཞེས་བྱ་བ་ནི་ཡེ་ཤེས་མཁའ་འགྲོ་མའི་སྙིང་པོའི་སྔགས་སོ། །ཨོཾ་བེ་ཏཱ་ལཱི་ཧཱུཾ་སྭཱ་ཧཱ། ཞེས་བྱ་བ་ནི་རོ་ལངས་མའི་སྔགས་ཏེ་ལས་ཐམས་ཅད་པའོ།། །།བཅུ་བདུན་གྱི་བདག་ཉིད་ཀྱི་ཀྱེ་རྡོ་རྗེའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དཀྱིལ་ན་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ཟེ་འབྲུ་ལ་གནས་པའི་རོའི་སྙིང་གར་གནས་པའི་ཁྲག་གིས་གང་བའི་ཐོད་པའི་སྟེང་དུ་ཉི་མ་ལ་ཀྱེའི་རྡོ་རྗེ་རྣམ་པ་གསུམ་མོ། །བཞི་པ་ལ་ནི་རོ་དང་བྲལ་བའོ། །དེ་ལ་འཇིག་རྟེན་གསུམ་ཀུན་དུ་བསྐྱོད་པ་ནག་པོ་སྣ་ཚོགས་རྡོ་རྗེས་མཚན་པའི་དབུ་སྐྲ་ཁམ་སེར་གྱེན་དུ་བརྫེས་པ་ཐོད་པ་ལྔ་དང་ཕྱག་རྒྱ་དྲུག་དང༌། མི་མགོ་རློན་པའི་ཕྲེང་བས་བརྒྱན་པའོ། །རྒྱབ་ཀྱི་ཆར་སྟག་གི་པགས་པའི་སྨད་དཀྲིས་ཅན་ཞབས་གཡོན་པའི་བརླ་ལ་གཡས་པའི་ཞབས་ཀྱི་རྩེ་མོ་ཡང་དག་པར་བཞག་པའི་སྐྱིལ་ཀྲུང་ཕྱེད་པས་གནས་པ་སྤྱན་གསུམ་དམར་ལ་ཟླུམ་པ་ཞལ་གཅིག་ཕྱག་གཉིས་པ་ཕྱག་གཡོན་པས་ཐོད་པ་ཁྲག་གིས་གང་བ་རྡོ་རྗེས་མཚན་པ་འཛིན་པ། འཆད་པར་འགྱུར་བའི་རང་བཞིན་གྱིས་བདག་མེད་མ་ལ་འཁྱུད་པ། ཕྱག་གཡས་པ་རྡོ་རྗེ་རྩེ་ལྔ་པའི་དབྱུག་པ་བརྡེག་པའི་ཚུལ་གྱིས་འཛིན་པའོ། །ཡང་ན་ཕྱག་བཞི་པ་ཕྱག་གཉིས་པ་ལྟ་བུ་ཕྱག་གཞན་གཉིས་ཀྱིས་
བདག་ཉིད་ལྟ་བུའི་རྡོ་རྗེ་ཕག་མོ་ལ་ཡང་དག་པར་འཁྱུད་པའོ་ཞེས་བྱ་བ་འདི་ནི་ཁྱད་པར་རོ། །ཡང་ན་ཕྱག་དྲུག་པ་ནག་པོ་ཞལ་གསུམ་པ་ནག་པོ་དང་དཀར་པོ་དང་དམར་པོ། ཞལ་རེ་རེ་ལ་སྤྱན་གསུམ་པ་རལ་པའི་ཅོད་པན་གྱིས་བརྒྱན་པ་ཕྱག་གཡས་པ་རྣམས་ནི་རྡོ་རྗེ་དང་མདའ་དང་རྩེ་གསུམ་པ་འཛིན་པ། གཡོན་པ་རྣམས་ཀྱིས་རྡོ་རྗེ་དྲིལ་བུ་དང་གཞུ་དང་ཐོད་པའོ། །རྡོ་རྗེ་དང་རྡོ་རྗེ་དྲིལ་བུ་དང་ལྡན་པའི་ཕྱག་གཉིས་ཀྱིས་བདག་ཉིད་ལྟ་བུའི་རྡོ་རྗེ་ལུ་གུ་རྒྱུད་མ་ལ་འཁྱུད་པ་སྟེ། གཞན་ནི་ཇི་ལྟར་རིགས་པར་སྔ་མ་བཞིན་ནོ། །ཧེ་རུ་ཀ་འདི་གསུམ་གྱི་ཤར་ལ་སོགས་པའི་འདབ་མ་བརྒྱད་ལ་རྡོ་རྗེ་དྲ་བ་མོ་ལ་སོགས་པ་བརྒྱད་དོ། །དེ་དག་གི་ཕྱི་རོལ་དུ་དབང་ལྡན་ལ་སོགས་པའི་མཚམས་སུ་གླིང་བུ་མ་དང་པི་ཝང་མ་དང་མུ་ཀུཎྜ་མ་དང་རྫ་རྔ་མ་རྣམས་སོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང༌། རྡོ་རྗེ་ཞགས་པ་མ་དང༌། རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་རྣམས་སོ། །ལྷ་མོ་བཅུ་དྲུག་པོ་འདི་རྣམས་ནི་གང་བཞིན་ཏེ། ཡབ་དང་བྲལ་བའོ། །ཧེ་རུ་ཀ་གསུམ་གྱི་རིགས་ཀྱི་བདག་པོ་མི་བསྐྱོད་པའོ། །ཐུགས་ཀའི་ས་བོན་ཧཱུཾ་ངོ༌། །སྙིང་པོའི་སྔགས་ནི་ཨོཾ་ཨཱཿ་ཧཱུཾ་ཧྲཱིཿ་སྭཱ་ཧཱ། སོ་སོའི་སྔགས་ནི་རིམ་པ་བཞིན་དུ་ཨོཾ་ཏྲཻ་ལོཀྱཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཛྲ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་སོ། །ཀྱེའི་རྡོ་རྗེ་བཞི་པ་ནི་ཕྱག་བཅུ་དྲུག་པ་མི་བསྐྱོད་པས་རྒྱས་བཏབ་པ་བདག་མེད་པ་དང་སྙོམས་པར་འཇུག་པ། འོན་ཀྱང་འདི་ལ་གོང་དུ་བཤད་པའི་རོའི་གནས་སུ་བདུད་བཞི་སྟེ། དེ་ལ་ཕུང་པོའི་བདུད་ཀྱི་རང་བཞིན་ཚངས་པ་སེར་པོ། ཉོན་མོངས་པའི་བདུད་ཁྱབ་འཇུག་ནག་པོ། འཆི་བདག་གི་བདུད་དབང་ཕྱུག་ཆེན་པོ་དཀར་པོ། ལྷའི་བུའི་བདུད་ནི་བརྒྱ་བྱིན་ཁམ་སེར་རོ། དེར་བཅོམ་ལྡན་འདས་ཞབས་བཞི་བའི་ཞབས་གཉིས་ཀྱིས་རྡོ་རྗེའི་སྐྱིལ་ཀྲུང་ཕྱེད་པ་རང་གཞན་གཉིས་ཀྱིས་ནི་གཡོན་བསྐུམ་པ་དང་གཡས་བརྐྱང་བས་བཞུགས་པ། སྐུ་མདོག་ནག་པོ་དང་སྣ་ཚོགས་རྡོ་རྗེ་ལ་སོགས་པ་ནས་སྟག་གི་པགས་པའི་བར་དུ་སྔར་བཤད་པའི་ཁྱད་པར་དང་ལྡན་པ་ཞལ་བརྒྱད་པ་སྤྱན་ཉི་ཤུ་རྩ་བཞི་པ་རྩ་བའི་ཞལ་ནག་པོ་གད་མོ་ཅན་གཡས་པ་དཀར་པོ་གཡོན་དམར་པོ་སྟེང་དུ་གནས་པའི་མཆེ་བ་གཙིགས་པ་ལྷག་མ་རྣམས་ནི་
ནག་པོའོ། །གཡས་པའི་ཕྱག་རྣམས་ནི་རྡོ་རྗེ་དང་རལ་གྲི་དང་མདའ་དང་འཁོར་ལོ་དང་ཐོད་པ་དང་དབྱུག་པ་དང་རྩེ་གསུམ་པ་དང་ལྕགས་ཀྱུ་རྣམས་སོ། །གཡོན་པ་རྣམས་སུ་དྲིལ་བུ་དང་པདྨ་དང་གཞུ་དང་ཁ་ཊྭཱཾ་ག་བསྒྲེང་བ་དང་ཐོད་བ་དང་རིན་པོ་ཆེ་དང་སྡིགས་མཛུབ་དང་ཞགས་པའོ། །ཤར་གྱི་འདབ་མར་གཽ་རཱི་དཀར་སེར་ཕྱག་གཡས་པ་གཉིས་ན་མདའ་ཕྱུང་བ་དང་རྡོ་རྗེ་གྲི་གུག་གོ །གཡོན་གཉིས་ན་གཞུ་དང་ཉ་རོ་ཧི་ཏ་དང་བཅས་པའི་ཁྲག་གིས་གང་བའི་ཐོད་པའོ། །ལྷོར་ཙཽ་རཱི་དམར་མོ་རྡོ་རྗེ་དང་ཌ་མ་རུ་དང་ལྕགས་ཀྱུ་དང་ཕག་པ་དང་བཅས་པའི་ཐོད་པ་ཁྲག་གིས་གང་བའོ། །ནུབ་ཏུ་རོ་ལངས་མ་ནི་སྐུ་མདོག་དཀར་སེར་རལ་གྲི་དང་རུས་སྦལ་དང་བཅས་པའི་ཐོད་པ་ཁྲག་གིས་གང་བ་དང་ཆང་གིས་གང་བའི་ཐོད་པ་དང་དྲི་ཆུས་གང་བའི་ཐོད་པའོ། །བྱང་དུ་གྷསྨ་རཱི་ལྗང་གུ་ཅུང་ཟད་སེར་བ་རྐང་མར་གྱིས་གང་བའི་ཐོད་པ་ལ་གནས་པའི་སྦྲུལ་དང་མི་འཇིགས་པའི་ཕྱག་རྒྱ་དང་རྡོ་རྗེས་མཚན་པའི་མེ་ཐབ་དང་དགྲ་སྟའོ། །དབང་ལྡན་དུ་པུཀྐ་སཱི་སེར་མོ་ཤས་གང་བའི་ཐོད་པ་ལ་གནས་པའི་སེང་གེ་དང་མཆོག་སྦྱིན་གྱི་ཕྱག་རྒྱ་དང་དཔག་བསམ་ཤིང་གི་ཡལ་ག་དང་རིན་པོ་ཆེའོ། །མེའི་མཚམས་སུ་ཤ་བ་རཱི་དཀར་མོ་བྱང་ཆུབ་སེམས་ཀྱིས་གང་བའི་ཐོད་པར་གནས་པའི་དགེ་སློང་དང་རྡོ་རྗེ་དང་ཁ་ཊྭཱཾ་ག་དང་ཞགས་པའོ། །སྲིན་པོའི་མཚམས་སུ་ཙཎྜཱ་ལཱི་སྔོན་མོ་གཡས་སུ་ཁྲག་གིས་གང་བའི་ཐོད་པ་ལ་སྟག་དང་གཡོན་དུ་པདྨ་དཀར་པོ་དང་ཕྱག་གཉིས་ན་རླུང་རས་སོ། །རླུང་གི་མཚམས་སུ་ཌོཾ་བི་ནི་ནག་མོ་ཆང་གིས་གང་བའི་ཐོད་པ་དང་རྩེ་གསུམ་པ་གྱེན་དུ་བསྟན་པ་དང་བདུད་རྩི་ལྔས་གང་བའི་ཐོད་པ་ལ་གནས་པའི་ཅེ་སྤྱང་དང་གཤོལ་ལོ། །དེ་དག་གི་ཕྱིའི་ཟུར་རྣམས་སུ་གླིང་བུ་མ་ལ་སོགས་པ་བཞི་སྔ་མ་བཞིན་དུའོ། །ཤར་གྱི་སྒོ་རུ་རྟ་གདོང་མ་ནག་མོ་ཞལ་རྣམས་ནག་མོ་དཀར་མོ་དང་སེར་མོ་དང་སྟེང་གི་རྟ་གདོང་ལྗང་གུའོ། །ལྷོ་རུ་ཕག་གདོང་མ་སེར་མོ་ཞལ་རྣམས་ནི་སེར་མོ་དང་ནག་མོ་དང་དཀར་མོའི་སྟེང་དུ་ཕག་ཞལ་དམར་པོའོ། །ནུབ་ཏུ་ཁྱི་གདོང་མ་དམར་པོ་ཞལ་རྣམས་ནི་དམར་མོ་དང་ནག་མོ་དང་དཀར་མོའི་སྟེང་དུ་ཁྱི་གདོང་སེར་བའོ། །བྱང་སྒོར་སེང་གདོང་མ་ལྗང་གུ་དང་ནག་མོ་དང་དཀར་མོའི་སྟེང་དུ་སེང་གེའི་གདོང་པ་དམར་པོའོ། །འདི་ལྟར་རྩ་བ་
དང་གཡས་པ་དང་ཅིག་ཤོས་དང་སྟེང་གི་རིམ་པས་ཞལ་བཞི་པའོ། །སྒོ་སྐྱོང་མ་རྣམས་ཕྱག་བཞི་པ་རྡོ་རྗེ་ལྕགས་ཀྱུ་མ་ལ་སོགས་པ་བཞིན་དུ་ཕྱག་མཚན་འཛིན་པ་སྣ་ཚོགས་པདྨ་དང་ཁྲག་གིས་གང་བའི་ཐོད་པ་ལ་གནས་པའི་རོའི་སྟེང་དུ་གཡས་བསྐུམ་པ་དང་གཡོན་བརྐྱང་བས་གནས་པ་དབུ་སྐྲ་དམར་སེར་གྱེན་དུ་བརྫེས་པའོ། །ལྷ་གཞན་རྣམས་ནི་སྐྱིལ་ཀྲུར་ཕྱེད་པ་དང་ལྡན་པ། ཐམས་ཅད་ཀྱང་ཞལ་རེ་རེ་ཞིང་སྤྱན་གསུམ་པ་ཕྱག་རྒྱ་ལྔ་ལ་སོགས་པས་བརྒྱན་པ་ཡབ་མེད་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །སྙིང་པོའི་སྔགས་ནི། ཨོཾ་དེ་ཝ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའོ། །གྷསྨ་རཱིའི་ཨོཾ་ཨོཾ་སྭཱ་ཧཱ། ཞེས་པ་ནི་ལས་ཐམས་ཅད་པའི་སྔགས་སོ། །བདག་མེད་མའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གནས་པའི་གཞལ་ཡས་ཁང་གི་ནང་དུ་སྣ་ཚོགས་པདྨའི་ལྟེ་བར་བདག་མེད་པའོ། །ཤར་ལ་སོགས་པའི་ཕྱོགས་ཀྱི་པདྨའི་འདབ་མར་རྡོ་རྗེ་མ་དང་གཽ་རཱི་མ་དང་ཆུ་མ་དང་རྡོ་རྗེ་མཁའ་འགྲོ་མ་རྣམས་སོ། །རིམ་པ་གཉིས་པར་སྣ་ཚོགས་པདྨ་རྣམས་ལ་ཤར་ལ་སོགས་པར་གཽ་རཱི། ཙཽ་རཱི་བེ་ཏཱ་ལཱི་གྷསྨ་རཱི་རྣམས་སོ། །དབང་ལྡན་ལ་སོགས་པར་པུཀྐ་སཱི་དང་ཤ་བ་རཱི་དང་ཙནྜ་ལཱི་དང་ཌོཾ་བི་ནཱི་རྣམས་སོ། །བདག་མེད་མའི་སྟེང་གི་ཤར་ངོས་ཀྱི་པདྨ་ལ་གནས་པའི་མཁའ་སྤྱོད་མ་སྟེང་ཞལ་ཅན་ནོ། །འོག་གི་ནུབ་ངོས་ཀྱི་པདྨ་ལ་གནས་པའི་ས་སྤྱོད་མའོ་གཞལ་ཅན་ནོ། །འདིར་ཕྱི་མ་ལ་གནས་པའི་གཽ་རཱི་ལ་སོགས་པ་བརྒྱད་ནི་ཕྱག་བཅུ་དྲུག་པའི་དཀྱིལ་འཁོར་ལྟ་བུར་སེར་པོ་ལ་སོགས་པའི་མདོག་ཅན་ནོ། །གཞན་བདུན་ནི་སྔོན་མོའོ། །བཅོ་ལྔ་པོ་ཡང་སྐྱིལ་ཀྲུང་ཕྱེད་པས་རོའི་སྙིང་གར་གནས་པའི་ཟླ་བའི་དཀྱིལ་འཁོར་ལ་གནས་པའོ། །ཞལ་གཅིག་པ་སྤྱན་གསུམ་པ་དམར་བ་དབུ་སྐྲ་དམར་སེར་གྱེན་དུ་བརྫེས་པ་སྟག་གི་པགས་པའི་ཤམ་ཐབས་ཅན་ཕྱག་བཞི་པ་གཡས་དག་གིས་རྡོ་རྗེ་དང་གྲི་གུག་གོ། །གཡོན་པ་དག་གིས་ཐོད་པ་དང༌། གྱེན་དུ་བསྒྲེང་བའི་ཁ་ཊྭཱཾ་ག་འཛིན་པའོ། །དབུ་ལ་ཐོད་པ་ལྔའི་ཕྲེང་བས་བརྒྱན་པ། ཕྱག་རྒྱ་ལྔ་དང་ལྡན་པའོ། །ཟུར་རྣམས་ལ་གླིང་བུ་མ་ལ་སོགས་པ་བཞི་ནི་སྔ་མ་བཞིན་ནོ། །ཤར་གྱི་སྒོར་རྟ་གདོང་མ་དཀར་སྔོ། ལྷོར་ཕག་གདོང་མ་སེར་སྔོ། ནུབ་ཏུ་
ཁྱི་གདོང་མ་དམར་སྔོ། བྱང་དུ་སེང་གདོང་མ་ལྗང་སྔོ། བཞི་པོ་འདི་དག་ཀྱང་གཡས་བརྐྱང་གཡོན་བསྐུམ་གྱིས་ཉི་མ་ལ་གནས་པའོ། །གཡས་དང་གཡོན་པའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མིང་གིས་རྗེས་སུ་མཐུན་པའི་ཞལ་གཅིག་མ་ཕྱག་གཉིས་གཉིས་དང་ལྡན་པའོ། །འདི་དག་གི་ཁྱད་པར་ནི་བདག་མེད་མ་དང་མཚུངས་པའོ། །བདག་མེད་མ་ལ་སོགས་པ་རྣམས་ལ་གོ་རིམས་བཞིན་དུ་མི་བསྐྱོད་པ་དང་རྟག་པ་དང༌། རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང༌། རྟག་པ་དང་རིན་ཆེན་འབྱུང་ལྡན་དང༌། སྣང་བ་མཐའ་ཡས་དང་རྣམ་པར་སྣང་མཛད་དང༌། རིན་ཆེན་འབྱུང་ལྡན་དང་སྣང་བ་མཐའ་ཡས་དང་རྣམ་པར་སྣང་མཛད་དང་མི་བསྐྱོད་པ་རྣམས་ཀྱིས་རྒྱས་བཏབ་པའོ། །གླིང་བུ་མ་ལ་སོགས་པ་དང་སྟག་གདོང་མ་ལ་སོགས་པ་རྣམས་ལ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཀྱིས་སོ། །བདག་མེད་མའི་ཐུགས་ཀའི་ས་བོན་ནི་ཨཱཾ། ཨོཾ་ཨཾ་སྭཱ་ཧཱ། ཞེས་བྱ་བ་ནི་གྷསྨ་རཱིའི་སྔགས་ཏེ་ལས་ཐམས་ཅད་པའོ། །ཡང་ན་བདག་མེད་མ་ལ་སོགས་པ་ལྷ་མོ་བཅོ་ལྔའི་བདག་ཉིད་ཀྱི་དཀྱིལ་འཁོར་རོ། །དེ་ལ་ལྷ་མོ་ཐམས་ཅད་སྐུ་མདོག་ནག་མོ་གཡས་གཡོན་གྱི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མཆོད་ཕྱིར་ཐོགས་པ་འདྲ་བའི་ཁ་ཊྭཱཾ་ག་དང་བཅས་པའོ། །གཞན་རྣམས་ནི་གོང་མ་བཞིན་ནོ། །ཨོཾ་ཨཱཿ་བཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ། ཞེས་བྱ་བ་ནི་གྷསྨ་རཱིའི་སྔགས་སོ།། །།གང་གི་ཚེ་དཀྱིལ་འཁོར་གྱི་བདག་པོ་ཀུ་རུ་ཀུལླེ་དམར་མོ་ཕྱག་བཞི་མ་གཡས་གཉིས་ཀྱིས་མདའ་དང་ལྕགས་ཀྱུ་འཛིན་པ། གཡོན་གཉིས་ཀྱིས་ཨུཏྤལ་ལ་དམར་པོ་དང་གཞུ་འཛིན་པ་ཞལ་གཅིག་པ་སྤྱན་གསུམ་པ་སྣང་བ་མཐའ་ཡས་ཀྱིས་རིགས་ཀྱི་བདག་པོ་བྱས་པ། རྡོ་རྗེ་མ་ལ་སོགས་བཅུ་བཞི་སྐུ་མདོག་དམར་མོ་ཕྱག་གཉིས་ཀྱིས་མདའ་དང་གཞུ་འཛིན་པ་བཅོ་ལྔ་པོ་ཐམས་ཅད་ཀྱང་པདྨ་དམར་པོ་དང་རོའི་སྙིང་གར་ཟླ་བ་སྐྱིལ་ཀྲུང་ཕྱེད་པས་གནས་པའོ། །ཀུ་རུ་ཀུལླེ་སྙིང་གའི་ས་བོན་ནི་ཧྲཱིཿ་ཨོཾ་ཀུ་རུ་ཀུ་ལླེ་ཧྲཱིཿ་སྭཱ་ཧཱ། ཞེས་བྱ་བ་ནི་སྙིང་པོའི་སྔགས་སོ། །གཞན་ནི་སྔར་བཞིན་དུ་སྟེ་དེའི་ཚེ་ཀུ་རུ་ཀུལླེའི་དཀྱིལ་འཁོར་དུ་འགྱུར་རོ། །རྡོ་རྗེ་བདུད་རྩིའི་དཀྱིལ་འཁོར་
ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ཟེ་འབྲུར་ཟླ་བ་ལ་དཔལ་རྡོ་རྗེ་བདུད་རྩི་སེམས་དཔའི་སྐྱིལ་ཀྲུང་གིས་གནས་པ་མེ་ཏོག་ཕྲི་ཡང་ཀུ་ལྟ་བུ་ལྗང་སེར། རྩ་བ་དང་གཡས་པ་དང་གཡོན་པའི་ཞལ་གསུམ་མེ་ཏོག་པྲི་ཡང་ཀུ་ལྟ་བུ་ལྗང་སེར་དང་དཀར་པོ་དང་དམར་པོ་སྣ་ཚོགས་པའི་ལག་གདུབ་དང་རྐང་གདུབ་ལ་སོགས་པ་དང་གོས་རྣམས་ཀྱིས་བརྒྱན་པ་ཕྱག་དྲུག་པ་རྡོ་རྗེ་དང་དྲིལ་བུར་བཅས་པའི་ཕྱག་གཉིས་ཀྱིས་རང་འོད་ཀྱི་ཤེས་རབ་མ་ལ་འཁྱུད་པ་གཡས་པ་གཉིས་ཀྱིས་འཁོར་ལོ་དང་རལ་གྲི། གཡོན་པ་གཉིས་ཀྱིས་ཞགས་བ་དང་ལྕགས་ཀྱུ་འཛིན་པ་འོད་དམར་པོའི་དཀྱིལ་འཁོར་ཅན་ཞི་བ་དང་སྒེག་པའི་ཉམས་ཀྱི་ཚོགས་ཅན་ནོ། །ཤར་གྱི་འདབ་མར་ཞི་བ་མོ་དཀར་མོ་ཞལ་གསུམ་ནི་དཀར་བ་དང་ནག་པ་དང་དམར་བའོ། །ལྷོར་ཞི་གདོང་མ་སེར་མོ་ཞལ་གསུམ་ནི་སེར་པོ་དང༌། དཀར་པོ་དང་དམར་པོའོ། །ནུབ་ཏུ་ཟླ་ལྡན་མ་དམར་མོ་ཞལ་གསུམ་ནི་དམར་པོ་དང་ནག་པོ་དང་དཀར་པོའོ། །བྱང་དུ་རི་བོང་ཅན་མ་ལྗང་གུ་ཞལ་གསུམ་ནི་ལྗང་གུ་དང་དཀར་པོ་དང་དམར་པོའོ། །མེའི་མཚམས་སུ་ཟླ་དཀྱིལ་མ་སྔོན་མོ་ཞལ་གསུམ་ནི་སྔོན་མོ་དང་དཀར་བོ་དང་དམར་པོའོ། །བདེན་བྲལ་དུ་ཟླ་ཚེས་མ་མེ་ཏོག་པྲི་ཡང་ཀུ་ལྟ་བུ་ལྗང་སེར་མོ་ཞལ་གསུམ་ནི་ལྗང་སེར་དང་དཀར་པོ་དང་དམར་པོའོ། །རླུང་དུ་ཡིད་འོང་མ་ཨུཏྤལ་སྔོན་མོའི་མདོག་ཅན་ཞལ་གསུམ་ནི་སྔོན་མོ་དང་དཀར་པོ་དང་དམར་པོའོ། །དབང་ལྡན་དུ་ཡིད་ཚིམ་བྱེད་མ་གསེར་གྱི་མདོག་ཅན་མ་ཞལ་གསུམ་ནི་སེར་པོ་དང་དཀར་པོ་དང་དམར་པོའོ། ལྷ་མོ་འདི་རྣམས་ནི་དཀྱིལ་འཁོར་གྱི་གཙོ་བོའི་ཕྱག་མཚན་ལྟ་བུ་འཛིན་པའོ། །འོན་ཀྱང་འཁོར་ལོའི་གནས་སུ་ཟླ་བའི་དཀྱིལ་འཁོར་འཛིན་པའོ། །ཟླ་ཚེས་མ་ནི་ཟླ་བའི་ཆ་གཅིག་འཛིན་པའོ། །རིམ་པ་གཉིས་པར་དབང་ལྡན་གྱི་མཚམས་སུ་མེ་ཏོག་མ་དཀར་པོ་ནི་ཞལ་གསུམ་པ་དཀར་པོ་དང་ནག་པོ་དང་དམར་པོའོ། །མེར་བདུག་སྤོས་མ་དུ་བའི་མདོག་ཅན་ཞལ་གསུམ་པ་དུ་བའི་མདོག་དང་དཀར་བ་དང་དམར་བའོ། །བདེན་བྲལ་དུ་མར་མེ་མ་གསེར་གྱི་མདོག་ཅན་མ་ཞལ་གསུམ་པ་གསེར་མདོག་དང་དཀར་པོ་དང་ནག་པོའོ། །རླུང་དུ་དྲི་ཆབ་མ་དམར་མོ་ཞལ་གསུམ་པ་དམར་པོ་དང་ནག་པོ་དང་དཀར་པོའོ།།
འདི་རྣམས་ནི་གོ་རིམས་བཞིན་དུ་གཡས་ཀྱི་དང་པོས་མེ་ཏོག་གི་ཟ་མ་ཏོག་དང་སྤོས་ཕོར་དང་མར་མེའི་མཆོད་སྡོང་དང་དྲིའི་དུང་ཆོས་འཛིན་པའོ། །ཕྱག་ལྷག་མ་རྣམས་ཀྱིས་གཙོ་བོའི་ཕྱག་མཚན་འཛིན་པའོ། །ཤར་ལ་སོགས་པའི་སྣམ་བུ་ལ་གླིང་བུ་མ་དང་པི་ཝང་མ་དང་མུ་ཀུནད་མ་དང་རྫ་རྔ་མ་རྣམས་ནི་དམར་པོ་དང་སེར་པོ་དང་དཀར་པོ་དང་དུ་བའི་མདོག་ཅན་གྱི་ཞལ་གཅིག་མ་ཕྱག་གཉིས་ཀྱིས་གླིང་བུ་ལ་སོགས་པའི་སྒྲ་སྒྲོགས་པར་བརྩོན་པའོ། །ཤར་གྱི་སྒོར་ཁྲོ་གཉེར་རིམ་པར་ལྡན་མ་སྔོན་པོ་ནམ་མཁའ་ལྟ་བུ་སྔོན་པོ་དང་དཀར་པོ་དང་དམར་པོའི་ཞལ་གསུམ་མོ། །ལྷོའི་སྒོར་འཇིགས་སྡིགས་དཀར་པོ་འཇིགས་སུ་རུང་བ་དཀར་པོ་དང་ནག་པོ་དང་དམར་པོའི་ཞལ་གསུམ་མོ། །ནུབ་སྒོར་རྟའི་གཟུགས་ཅན་དམར་མོ་དམར་པོ་དང་དཀར་པོ་དང་ནག་པོའི་ཞལ་གསུམ་མོ། །བྱང་སྒོར་ཚོགས་ཀྱི་གཙོ་བོ་ལྗང་གུ་ལྗང་གུ་དང་དཀར་པོ་དང་དམར་པོའི་ཞལ་གསུམ་པའོ། །འདི་དག་ནི་འགྱིང་བའི་ཁྲོ་བོ་འགྱིང་བའི་སྟང་སྟབས་ཀྱིས་བཞུགས་པ་དཀྱིལ་འཁོར་གྱི་གཙོ་བོའི་ཕྱག་མཚན་འཛིན་པའོ། །ཁྱད་པར་ནི་གཡས་དང་པོའི་ཕྱག་གིས་རིམ་པ་ཇི་ལྟ་བར་ལྕགས་ཀྱུ་དང་ཞགས་པ་དང༌། ལྕགས་སྒྲོག་དང་དྲིལ་བུ་འཛིན་པ་མཆེ་བ་ཅུང་ཟད་གཙིགས་པའོ། །འདིར་དཀྱིལ་འཁོར་གྱི་གཙོ་བོའི་གཟུགས་བརྙན་ནི་དེ་བཞིན་གཤེགས་པ་ལྔ་དང་རྡོ་རྗེས་མཚན་པའི་རིན་པོ་ཆེ་སྣ་ཚོགས་པའི་ཅོད་པན་དང་ལྡན་པའོ། །དེ་ལས་གཞན་པའི་ལྷ་ཉི་ཤུ་པ་རྣམས་ནི་རྡོ་རྗེ་དང་བདུད་རྩི་དང་པོ་ཏིས་མཚན་པའི་རིན་པོ་ཆེའི་ཅོད་པན་ཅན་ཟླ་བའི་དཀྱིལ་འཁོར་ལ་གནས་པ། དཀྱིལ་འཁོར་གྱི་གཙོ་བོ་ལྟ་བུ་རིན་པོ་ཆེ་སྣ་ཚོགས་ཀྱི་རྒྱན་གྱིས་བརྒྱན་པ་ལ་སོགས་པའོ། །མེ་ཏོག་མ་ལ་སོགས་པ་བཅུ་གཉིས་པ་རྣམས་ཀྱི་ཟླ་བའི་འོག་ཏུ་སྣ་ཚོགས་པདྨའོ། །རྡོ་རྗེ་བདུད་རྩིའི་ཐུགས་ཀའི་ས་བོན་ནི་ཧཿའོ། །ཨོཾ་ཧཿ་བཛྲ་ཨ་མྲྀ་ཏ་སྭཱ་ཧཱ། ཞེས་བྱ་བ་ནི་སྙིང་པོའི་སྔགས་སོ། །ལས་ཐམས་ཅད་པའི་སྔགས་ཀྱང་འདི་ཉིད་ཡིན་ནོ། །རྡོ་རྗེ་བདུད་རྩི་གཞན་རྣམ་པ་གསུམ་པོ་འདི་ལྟར་བསྒོམ་པའི་ཁྱད་པར་གྱི་རིམ་པ་ནི་རྡོ་རྗེ་བདུད་རྩིའི་རྒྱུད་ཉིད་ལས་ཤེས་པར་བྱའོ། །མངས་པས་འཇིགས་པས་འདིར་མ་བཤད་དོ།། །།དགུའི་བདག་ཉིད་ཀྱི་དགྱེས་པ་རྡོ་རྗེ་རྣམ་པ་བཞིའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གནས་པའི་ཆོས་འབྱུང་ལ་གནས་པའི་གཞལ་ཡས་ཁང་
ངོ། །ཕྱག་བཅུ་དྲུག་པ་ལ་སླར་ཡང་འཇམ་པའི་རྡོ་རྗེའི་དཀྱིལ་འཁོར་ལྟ་བུ་སྲུང་བའི་འཁོར་ལོ་རྩིབས་བཅུ་པ་ཡང་ཡོད་དོ་ཞེས་པ་ནི་ཕྱོགས་གཉིས་པའོ། །གཞལ་ཡས་ཁང་གི་དབུས་སུ་སྣ་ཚོགས་པདྨའི་ལྟེ་བའི་ནང་དུ་གན་རྐྱལ་དུ་གནས་པའི་ཚངས་པ་དང་ཁྱབ་འཇུག་དང་དབང་ཕྱུག་དང༌། ལྷའི་དབང་པོ་སྟེ། བདུད་རྣམ་པ་བཞིའི་རང་བཞིན་ཅན་གྱི་སྙིང་གར་གནས་པའི་ཉི་མ་ལ་ཞབས་བཞི་པ་གཅེར་བུ་གར་གྱི་ཉམས་དགུ་དང་ལྡན་པ། ཞབས་གཉིས་ཀྱིས་སྐྱིལ་ཀྲུང་ཕྱེད་པ་དང༌། ཞབས་གཉིས་ཀྱིས་གཡོན་བསྐུམ་པ་དང༌། གཡས་བརྐྱང་བའི་གང་གི་ཚུལ་གྱིས་གནས་པ་དང་སྤྱི་བོར་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ་དཔྲལ་བའི་སྟེང་དུ་པགས་པ་དང་བྲལ་བའི་མི་མགོ་སྐམ་པོ་ལྔས་བརྒྱན་པ་སངས་རྒྱས་ལྔའི་ཅོད་པན་ཅན། སྐུ་མདོག་ནག་པོ་ཕྱག་བཅུ་དྲུག་པ་ཞལ་བརྒྱད་པ། ཞལ་རེ་རེ་ལ་དམར་ཞིང་ཟླུམ་པའི་སྤྱན་གསུམ་གསུམ་ཡོད་པ་རྩ་བའི་ཞལ་ནག་པོ་གཡས་པ་རྣམས་ནི་དཀར་པོ་དང་ནག་པོ་དང་ནག་པོའོ། །གཡོན་པ་རྣམས་ནི་དམར་པོ་དང་ནག་པོ་དང་ནག་པོའོ། །སྟེང་གི་ཞལ་ནི་དུ་བའི་མདོག་ཅན་མི་སྡུག་པ་ཞལ་ཐམས་ཅད་ནི་སྨིན་མ་ཀྱོག་པོ་དང་བཅས་པ་ཁྲོ་གཉེར་ཅན་མཆེ་བའི་མྱུ་གུ་གཙིགས་པ་གཡས་པའི་ཕྱག་བརྒྱད་ཀྱིས་བསྣམས་པའི་ཐོད་པ་རྣམས་ལ་གླང་པོ་ཆེ་དང་རྟ་དང་བོང་བུ་དང༌། གླང་དང་རྔ་མོ་དང་མི་དང་ཤར་བྷ་དང་བྱི་ལ་རྣམས་འཛིན་པའོ། །གཡོན་པའི་ཕྱག་བརྒྱད་པའི་ཐོད་པ་རྣམས་ནི་ས་དང་ཆུ་དང་རླུང་དང་མེ་དང་ཟླ་བ་དང་ཉི་མ་དང་གཤིན་རྗེ་དང་ནོར་སྦྱིན་རྣམས་སོ། །གཙུག་གི་འཁོར་ལོ་དང་རྣ་ཆ་དང་མགུལ་རྒྱན་དང་ལག་གདུབ་དང་སྐ་རགས་དང་ཐལ་བ་རྣམས་དང་མི་མགོ་རློན་པ་ཁྲག་འཛག་པ་ལྔ་བཅུའི་ཕྲེང་བ་དང་དཔུང་རྒྱན་དང་རྐང་གདུབ་རྣམས་ཀྱིས་བརྒྱན་པའོ། །འདིའི་ཡུམ་བདག་མེད་མ་ནག་མོ་གཅེར་བུ་གྲི་གུག་དང་ཐོད་པར་ལྡན་པའི་ཕྱག་གཉིས་ཀྱིས་བཅོམ་ལྡན་འདས་ལ་ཡང་དག་པར་འཁྱུད་པ། གཡས་བསྐུམ་པ་གཡོན་བརྐྱང་བའི་གར་གྱིས་གནས་པ་ཕྱག་རྒྱ་ལྔ་དང་ལྡན་པ་ཞལ་གཅིག་པ་སྟན་གསུམ་པ་དམར་ལ་ཟླུམ་པ་མཆེ་བ་གཙིགས་པ་དབུ་སྐྲ་དམར་སེར་འབར་བ་གྱེན་དུ་མཛེས་པ། དཔྲལ་བའི་མཚམས་སུ་ཐོད་པ་ལྔས་བརྒྱན་པ། མགྲིན་པར་མི་མགོ་སྐམ་པོའི་ཕྲེང་བ་འཕྱང་བ་དང༌། རྐང་གདུབ་ལ་སོགས་
པས་བརྒྱན་པའོ། །ཤར་ལ་སོགས་པའི་ཕྱོགས་ཀྱི་འདབ་མར་གནས་པའི་ཚངས་པ་དང་དབང་པོ་དང་ཉེ་བའི་དབང་པོ་དང་དྲག་པོའི་སྙིང་གའི་སྟེང་དུ་ཟླ་བ་རྣམས་ལ་གཽ་རཱི་ལ་སོགས་པའོ། །དབང་ལྡན་ལ་སོགས་པའི་འདབ་མར་གནས་པའི་གཤིན་རྗེ་དང་ལུས་ངན་དང་སྲིན་པོ་དང༌། ཐགས་བཟངས་རིས་ཀྱི་སྙིང་གར་ཟླ་བའི་དཀྱིལ་འཁོར་ལ་གནས་པའི་པུཀྐ་སཱི་ལ་སོགས་པའོ། །དེ་ལ་གཽ་རཱི་ནག་མོ་གཡས་ན་གྲི་གུག་གཡོན་ན་རོ་ཧི་ཏའི་ཉ་འཛིན་པའོ། །ཙཽ་རཱི་དམར་མོ་གཡས་ཌ་མ་རུ་གཡོན་ཕག་པ་འཛིན་པའོ། །རོ་ལངས་མ་གསེར་གྱི་མདོག་ཅན་གཡས་གཡོན་གྱི་ཕྱག་གཉིས་ཀྱིས་རུས་སྦལ་དང་པདྨའི་སྣོད་འཛིན་པའོ། །གྷསྨ་རཱི་ལྗང་གུ་ཕྱག་གཡས་པ་ན་སྤྲུལ་གཡོན་པ་ན་རྣལ་འབྱོར་གྱི་སྣོད་འཛིན་པའོ། །པུཀྐ་སཱི་སྔོན་མོ་ཕྱག་གཡས་པ་ན་སེང་གེ་གཡོན་པ་ན་དགྲ་སྟ་འཛིན་པའོ། །ཤ་བ་རཱི་དཀར་མོ་ཕྱག་གཡས་པ་ན་དགེ་སློང་གཡོན་པ་ན་གསིལ་བྱེད་འཛིན་པའོ། །ཅཎྜ་ལཱི་ནམ་མཁའ་ལྟར་སྔོ་བསངས་མ་ཕྱག་གཡས་པ་ན་འཁོར་ལོ་གཡོན་པ་ན་གཤོལ་འཛིན་པའོ། །ཌོཾ་བི་ནཱི་ཁྲ་མོ་ཕྱག་གཡས་པ་ན་རྡོ་རྗེ་གཡོན་པ་སྡིགས་མཛུབ་འཛིན་པའོ། །བརྒྱད་པོ་འདི་དག་ནི་སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །ཁྱད་པར་གཞན་ནི་སྔར་བརྗོད་པའི་བདག་མེད་མ་བཞིན་ནོ། །ཧེ་རུ་ཀ་དང་བདག་མེད་མ་དག་གི་རིགས་ཀྱི་བདག་པོ་མི་བསྐྱོད་པའོ། །གཽ་རཱི་ལ་སོགས་པ་རྣམས་ནི་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་སོ། །པུཀྐ་སཱི་ལ་སོགས་པ་རྣམས་ཀྱི་ཡང་ངོ༌། །ཡང་ན་དཀྱིལ་འཁོར་གྱི་གཅོ་བོ་ཕྱག་གཉིས་པ་གཡས་པས་རྡོ་རྗེ་གྱེན་དུ་འཕྱར་བ་གཡོན་པ་རྡོ་རྗེས་མཚན་པའི་ཐོད་པ་འཛིན་པས་བདག་མེད་མ་ལ་འཁྱུད་པ་ཁ་ཊྭཱཾ་ག་དཔུང་པ་གཡོན་པ་ལ་བརྟེན་པའོ། །ཡང་ན་དཀྱིལ་འཁོར་གྱི་གཙོ་བོ་ཕྱག་བཞི་པ་སྔོན་པོ་ཕྱག་གཡས་པས་རྡོ་རྗེ་འཛིན་པ་གཡོན་པས་ཐོད་པ་ཁྲག་གིས་གང་བ་འཛིན་པ་ཕྱག་ལྷག་མ་དག་རང་དང་མཚུངས་པའི་རྡོ་རྗེ་ཕག་མོ་ལ་འཁྱུད་པའོ། །ཡང་ན་དཀྱིལ་འཁོར་གྱི་གཅོ་བོ་ཕྱག་དྲུག་པ་སྔོན་པོ་རྩ་བ་དང་གཡས་གཡོན་གྱི་ཞལ་གསུམ་སྔོན་པོ་དང་དཀར་པོ་དང་དམར་པོ། ཕྱག་གཡས་པ་དག་གིས་རྡོ་རྗེ་དང་གྲི་གུག་དང་གཡོན་པ་དག་གིས་རྩེ་གསུམ་པ་དང་དྲིལ་བུ་འཛིན་པ་ལྷག་མ་དག་གིས་རྡོ་རྗེ་ལུ་གུ་རྒྱུད་མ་ལ་འཁྱུད་པའོ། །རྡོ་རྗེ་ལུ་གུ་རྒྱུད་མ་ནི་སྐུ་མདོག་དང་ཞལ་དང་ཕྱག་མཚན་ལ་སོགས་པ་རྣམས་
བདག་མེད་མ་དང་མཚུངས་པར་ཡན་ལག་མེད་པའི་རྡོ་རྗེའི་ཞབས་ཀྱིས་གསུངས་སོ། །ཕྱག་གཉིས་པ་ལ་སོགས་པ་འདི་རྣམས་སྣ་ཚོགས་པདྨའི་ཟེ་འབྲུ་ལ་རོའི་སྙིང་གར་ཉི་མ་ལ་སྐྱིལ་ཀྲུང་ཕྱེད་པས་གར་མཛད་པ་མི་བསྐྱོད་པས་རྒྱས་བཏབ་པ་སྣ་ཚོགས་རྡོ་རྗེས་མཚན་པ་དབུ་སྐྲ་དམར་སེར་གྱེན་དུ་བརྫེས་པ་མི་མགོ་ལྔས་དབུ་བརྒྱན་པ། སྨིན་མ་འཁྱོག་པ་དང་བཅས་པའི་ཁྲོ་གཉེར་ཅན་མཆེ་བ་གཙིགས་པ་ཕྱག་བཅུ་དྲུག་པ་བཞིན་དུ་གཙུག་གི་འཁོར་ལོ་ལ་སོགས་པས་བརྒྱན་པ་གཽ་རཱི་ལ་སོགས་པའི་ལྷ་མོ་རྣམས་ཀྱིས་བསྐོར་བའོ། །ལྷ་མོ་ཐམས་ཅད་ནི་ཐལ་བ་དང་བྲལ་བའོ། །རྡོ་རྗེ་ཕག་མོ་དང་རྡོ་རྗེ་ལུ་གུ་རྒྱུད་མ་ནི་མི་བསྐྱོད་པས་རྒྱས་བཏབ་པའོ། །ཀྱེའི་རྡོ་རྗེ་རྣམ་པ་བཞིའི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། །ཞེས་བྱ་བ་ནི་ཕྱག་བཅུ་དྲུག་པའི་སྙིང་པོའོ། །ཨོཾ་ཏྲཻ་ལོ་ཀྱཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་ཕྱག་གཉིས་པའོ། །ཨོཾ་ཛྭ་ལ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་བཞི་པའོ། །ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་དྲུག་པའོ། །ཨོཾ་ཨཱཿ་བཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ་ཞེས་བྱ་བ་ནི་གྷསྨ་རཱིའི་སྔགས་ཏེ་ལས་ཐམས་ཅད་པའོ།། །།སྒྱུ་འཕྲུལ་ཆེན་མོའི་དཀྱིལ་འཁོར་ལ་རྡོ་རྗེ་གུར་གྱི་ནང་ན་གནས་པའི་ཆོས་འབྱུང་གི་དབུས་སུ་གཞལ་ཡས་ཁང་ངོ༌། །ཁ་ཅིག་ནི་རྡོ་རྗེ་གུར་གྱི་ནང་དུ་ཆོས་འབྱུང་མེད་པར་གཞལ་ཡས་ཁང་ངོ་ཞེས་སོ། །གཞལ་ཡས་ཁང་གི་དབུས་སུ་པདྨ་དམར་པོ་འདབ་མ་བརྒྱད་པའི་ཟེ་འབྲུར་ཉི་མ་ལ་སྒྱུ་མ་ཆེན་མོ་ལས་བྱུང་བའི་ཧེ་རུ་ཀ་ནག་པོ་ཉི་མ་ལྟ་བུའི་འོད་ཟེར་ཅན་འབར་བའི་ཕྲེང་བ་དུ་མས་འཁྲིགས་པ་འགྱིང་བའི་ཁྲོ་བོ་དབུ་སྐྲ་དམར་སེར་འབར་བ་གྱེན་དུ་བརྫེས་པ་ཐོད་པས་བརྒྱན་པའི་ཅོད་པན་ཅན་རྩ་བ་དང་གཡས་དང་རྒྱབ་དང་གཡོན་གྱི་ཞལ་བཞི་སྔོན་པོ་དང་སེར་པོ་དང་དཀར་པོ་དང་ལྗང་གུའོ། །ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་པ་ཕྱག་བཞི་པའི་གཡས་གཉིས་ན་ཐོད་པ་དང་མདའ། གཡོན་གཉིས་ན་ཁ་ཊྭཱཾ་ག་དང་གཞུ་འཛིན་པ་ཕྱག་རྒྱ་དྲུག་དང་ལྡན་པ་མིའི་པགས་པའི་ན་བཟའ་འཛིན་པ། སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །སངས་རྒྱས་མཁའ་འགྲོ་མ་ནི་སྐུ་མདོག་དམར་མོ་གཙོ་བོ་ལྟ་བུའི་ཕྱག་མཚན་ཅན་ཕྱག་གཉིས་ཀྱིས་དེའི་མགུལ་ནས་འཁྱུད་པ། དམར་པོ་དང་སེར་པོ་དང་དཀར་པོ་དང་ལྗང་གུའི་ཞལ་ལོ། །ཤར་གྱི་འདབ་མར་རྡོ་རྗེ་
མཁའ་འགྲོ་མ་སྔོན་མོ་སེར་པོ་དང་དཀར་པོ་དང་ལྗང་གུའི་ཞལ་རྡོ་རྗེ་དང་ཐོད་པ་དང་དྲིལ་བུ་དང་ཁ་ཊྭཱཾ་ག་འཛིན་པའོ། །ལྷོར་རིན་ཆེན་མཁའ་འགྲོ་མ་སེར་མོ་སེར་པོ་དང་སྔོན་པོ་དང་དཀར་པོ་དང་ལྗང་གུའི་ཞལ་རིན་པོ་ཆེའི་པ་ཏྲ་དང་ཏྲི་ཤཱུ་ལ་དང་མགྲིན་པ་བཙིར་བའི་ཅེ་སྤྱང་དང་བ་དན་འཛིན་པའོ། །ནུབ་ཏུ་པདྨ་མཁའ་འགྲོ་མ་དཀར་མོ་དཀར་པོ་དང་སེར་པོ་དང་དམར་པོ་དང༌། ལྗང་གུའི་ཞལ་སྣ་ཚོགས་པདྨ་དང་མདའ་དང་ཐོད་པ་དང་གཞུ་འཛིན་པའོ། །བྱང་དུ་སྣ་ཚོགས་མཁའ་འགྲོ་མ་ལྗང་གུ་དང་སེར་པོ་དང་དཀར་པོ་དང་སྔོན་པོའི་ཞལ་ལོ། །རལ་གྲི་དང་ཌ་མ་རུ་དང་ཞགས་པ་དང་ཐོད་པ་འཛིན་པའོ། །ཐམས་ཅད་ཀྱང་ཕྱག་རྒྱ་ལྔ་དང་ལྡན་པ། ཟླ་བའི་གདན་ལ་འོད་དང་ལྡན་པའོ། །འདི་རྣམས་ཀྱི་ཁྱད་པར་གཞན་རྣམས་ནི་གཙོ་བོ་ལྟ་བུའོ། །བཅོམ་ལྡན་འདས་ཀྱི་རིགས་ཀྱི་བདག་པོ་ནི་མི་བསྐྱོད་པའོ། །སངས་རྒྱས་མཁའ་འགྲོ་མ་ལ་སོགས་པ་རྣམས་ཀྱང་གོ་རིམས་ཇི་ལྟར་རྣམ་སྣང་དང༌། མི་བསྐྱོད་པ་དང་རིན་ཆེན་འབྱུང་ལྡན་དང་ངག་གི་དབང་ཕྱུག་དང་དོན་ཡོད་གྲུབ་པ་རྣམས་སོ། །བཅོམ་ལྡན་འདས་ཀྱི་ཐུགས་ཀྲཱི་ས་བོན་ནི་ཧཱུཾ་ངོ༌། །ཨོཾ་ཧཱུཾ་ཧཱུཾ་སྙིང་པོའི་སྔགས་སོ། །སངས་རྒྱས་མཁའ་འགྲོ་མ་ལ་སོགས་པ་རྣམས་ཀྱི་ཡང་ཨོཾ་ཨོཾ་ཧཱུཾ། ཨོཾ་ཧཱུཾ་ཧཱུཾ། ཨོཾ་སྭཱ་ཧཱུཾ། ཨོཾ་ཨཱཿ་ཧཱུཾ། ཨོཾ་ཧཾ་ཧཱུཾ། སྣ་ཚོགས་མཁའ་འགྲོ་མའི་སྔགས་ནི་ལས་ཐམས་ཅད་པའོ།། །།བཅོམ་ལྡན་འདས་སངས་རྒྱས་ཐོད་པ་ལྷ་དགུའི་བདག་ཉིད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་གི་ཆོས་འབྱུང་ལ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའོ། །དེའི་ཟེ་འབྲུ་ལ་རོའི་སྙིང་གར་ཉི་མའི་གདན་ལ་ཤེས་རབ་མ་དང་བྲལ་བའི་བཅོམ་ལྡན་འདས་སྐུ་མདོག་ལ་སོགས་པ་ཕྱི་ནས་འཆད་པའི་འཁོར་ལོ་གསུམ་ལ་གནས་པའི་དཔལ་སངས་རྒྱས་ཐོད་པ་བཞིན་ནོ། །ཤར་དང་བྱང་དང་ནུབ་དང་ལྷོའི་འདབ་མ་ལ་རིམ་པ་ཇི་ལྟ་བས་སྣ་ཚོགས་སྡེ་མ་དང་འདོད་མ་དང་ས་འོག་ན་གནས་མ་དང་ལེགས་བཟངས་མོ་རྣམས་ནི་སྐུ་མདོག་སྔོན་མོ་གཡས་བསྐུམ་པ་གཡོན་བརྐྱང་བ་སྟག་གི་པགས་པའི་ཤམ་ཐབས་ཅན་ཕྱག་གཡས་གཉིས་ཀྱིས་གྲི་གུག་དང་ཐོད་པ་གཡོན་གཉིས་ཀྱིས་ཁ་ཊྭཱཾ་དང་ཌ་མ་རུ་འཛིན་པའོ། །དབང་ལྡན་དང་མེ་དང་བདེན་བྲལ་དང༌། རླུང་གི་འདབ་མ་ལ་ཆང་འཚོང་མ་དང་འབྱུང་མོ་དང་ཕྱག་བཞི་མ་དང་ནམ་མཁའ་ལ་གནས་མ་
རྣམས་ནི་སེར་མོ་ན་བཟའ་སེར་པོ་གོན་པ་འོད་ཟེར་སེར་པོ་འཕྲོ་བ་ཞབས་གཉིས་ཀྱིས་གཡས་བརྐྱང་བ་གཡོན་བསྐུམ་པ་ཀླུ་བརྒྱད་ཀྱིས་བརྒྱན་པ། ཕྱག་གཡས་པ་གཉིས་ཀྱིས་གྲི་གུག་དར་ཌ་མ་རུ། གཡོན་གཉིས་ཀྱིས་ཁ་ཊྭཾ་ག་དང་པདྨའི་སྣོད་འཛིན་པའོ། །བརྒྱད་པོ་འདི་དག་ཀྱང་ཉི་མའི་དཀྱིལ་འཁོར་ལ་གར་གྱི་ཚུལ་གྱིས་གནས་པ་དབུ་སྐྲ་སེར་པོ་གྱེན་དུ་བརྫེས་པ། དབུ་ལ་ཐོད་པ་ལྔའི་ཕྲེང་བ་དང་ལྡན་པ་ཕྱག་རྒྱ་ལྔ་ལ་སོགས་པས་བརྒྱན་པ་མི་མགོ་རློན་པ་ལྔ་བཅུ་མགུལ་དུ་འཕྱང་བ་མཆེ་བ་ཅུང་ཟད་གཙིགས་པ་ཞལ་གཅིག་ཕྱག་བཞི་པ་སྤྱན་གསུམ་པའོ། །བཅོམ་ལན་འདས་ལ་མི་བསྐྱོད་པ་ལ་སོགས་པ་སངས་རྒྱས་ལྔས་རྒྱས་བཏབ་པའོ། །སྣ་ཚོགས་ལྡེམ་ལ་སོགས་པ་རྣམས་ལ་མི་བསྐྱོད་པ་དང་རྣམ་སྣང་དང་རིན་འབྱུང་དང་སྣང་མཐའ་རྣམས་ཀྱིས་སོ། །ཆང་འཚོང་མ་ལ་སོགས་པ་རྣམས་ཀྱི་ཡང་དེ་དག་རྣམས་སོ། །ཡང་ན་བཅོམ་ལྡན་འདས་འདི་དང་ཕྱོགས་ཀྱི་ལྷ་མོ་རྣམས་ཀྱང་མདོག་དཀར་མོ་མཚམས་ཀྱི་ལྷ་མོ་རྣམས་དམར་པོ་འདི་ནི་ཡུམ་དང་བྲལ་བའམ་ཡུམ་དང་བཅས་པའོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གཞལ་ཡས་ཁང་ངོ༌། །དེའི་དབུས་སུ་སྣ་ཚོགས་པདྨ་དང་ཉི་མའི་སྟེང་དུ་འཇིགས་བྱེད་དང་དུས་མཆན་གཡོན་བསྐུམ་གཡས་བརྐྱང་བས་མནན་པའི་འཇིག་རྟེན་གསུམ་ལས་རྣམ་པར་རྒྱལ་བའི་བཅོམ་ལྡན་འདས་ཁྲོ་བོ་ནི་བསྐལ་པ་འཇིག་དུས་མེ་ལྟ་བུའི་འོད་ཟེར་འབར་ཞིང་འགྲོ་བ་མ་ལུས་པའི་བགེགས་ཀྱི་ཚོགས་ཐམས་ཅད་རབ་ཏུ་བསལ་བར་མཛད་པ་སྐུ་མདོག་སྔོན་པོ་དང་སེར་པོ་དང་ལྗང་གུའི་ཞལ་རྩ་བ་དང་གཡས་དང་གཡོན་གྱི་མི་སྡུག་པ་གདངས་པ། མཆེ་བ་གཙིགས་པ་རབ་ཏུ་གཏུམ་པ་ལྗགས་འདྲིལ་བ་འཇིགས་སུ་རུང་བའི་ཞལ་གསུམ་པ་རེ་རེ་ཞིང་སྤྱན་གསུམ་པ་དམར་ལ་ཟླུམ་པ་སྨིན་མ་གཡོ་བ་ཁྲོ་གཉེར་དང་བཅས་པ། དཔྲལ་པའི་སྟེང་ན་ཐོད་པ་ལྔའི་ཕྲེང་བ་དང་ལྡན་པ། ཁྲག་འཛག་པའི་མི་མགོ་ལྔ་བཅུའི་ཕྲེང་བ་མགུལ་པར་འགྱང་བ་ཡུམ་དང་བཅས་པ་ཀླུ་མཐའ་ཡས་སྔོན་པོས་དབུ་སྐྲ་འབར་ཞིང་དམར་སེར་གྱི་གྱེན་དུ་བཅིངས་པ། ཀླུ་འཇོག་པོ་དམར་པོས་རྣ་རྒྱན་བྱས་པ། ཀླུ་པདྨ་ཆེན་པོ་པདྨའི་རྩ་བ་ལྟ་བུ་དཀར་པོས་མགུལ་རྒྱན་བྱས་པ། ཀླུ་ཀརྐོ་ཊ་དཱུར་བ་ལྟ་བུ་ལྗང་
གུས་མཆོད་ཕྱིར་ཐོགས་བྱས་བ་ནོར་རྒྱས་དཀར་པོས་སྐ་རགས་བྱས་པ། པདྨ་དཀར་པོ་ཀུན་དའི་མེད་ཏོག་ལྟ་བུར་མཛེས་པས་རྐང་གདུབ་བྱས་པ། དུད་སྐྱོང་སེར་པོས་ལག་གདུབ་བྱས་པ། རིགས་ལྡན་དུ་བ་ལྟ་བུ་ཁྲ་བོས་དཔུང་རྒྱན་བྱས་པ། རྡོ་རྗེ་སེམས་དཔས་དབུ་ལ་རྒྱས་བཏབ་པ། རྡོ་རྗེ་དྲིལ་བུ་འཛིན་པའི་ཕྱག་གཉིས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱས་རང་གི་ཡུམ་ལ་སྙོམས་པར་ཞུགས་པ་གང་ས་གཉིས་ཀྱིས་ལྕགས་ཀྱུ་དང་ཞགས་པ་དང་གཡོན་གཉིས་ཀྱིས་ཐོད་པ་དང་ཁ་ཊྭཾ་ག་འཛིན་པའོ། །འདིའི་ཤར་ཕྱོགས་སུ་རྡོ་རྗེ་དབྱུག་པ་སྔོན་པོ་དང་སེར་པོ་དང་ལྗང་གུ་ནི་རྩ་བ་དང་གཡས་དང་གཡོན་གྱི་ཞལ་ལོ། །གཡས་པ་གཉིས་ཀྱིས་རྡོ་རྗེ་ཐོབ་དང་སྡིགས་མཛུབ་དང་བཅས་པའི་རྡོ་རྗེ་གྱེན་དུ་འཕྱར་བ། གཡོན་པ་གཉིས་ཀྱིས་ཐོད་པ་དང་ཁ་ཊྭཾ་ག་འཛིན་པའོ། །བྱང་དུ་རྡོ་རྗེ་ཉི་མ་སེར་པོ་སེར་པོ་དང་སྔོན་པོ་དང་ལྗང་གུའི་ཞལ་ལོ། །ཁྱད་པར་དུ་ཕྱག་དང་པོས་རྡོ་རྗེ་དབྱུག་པ་འཛིན་པ། ཁྱད་པར་དུ་རྡོ་རྗེ་ལ་སོགས་པའི་ཕྱག་མཚན་རྣམས་ཀྱང་རྡོ་རྗེ་དབྱུག་པ་ལྟ་བུའོ། །འོག་ནས་འཆད་པ་རྣམས་ཀྱང་རྡོ་རྗེ་དབྱུག་པ་ལྟ་བུའོ། །འོག་ནས་འཆད་པ་རྣམས་ཀྱང་དེ་ལྟར་ཤེས་པར་བྱའོ། །བྱང་དུ་རྡོ་རྗེ་གཙུག་ཏོར་དམར་པོ་དང་ལྗང་གུའི་ཞལ་ལོ། །པདྨ་དམར་པོས་མཚན་པའི་ཕྱག་གོ །ལྷོར་རྡོ་རྗེ་འཁྱིལ་བ་ལྗང་གུ་ནི་ལྗང་གུ་དང་དཀར་པོ་དང་སེར་པོའི་ཞལ་ལོ། །སྣ་ཚོགས་རྡོ་རྗེས་མཚན་པའི་ཕྱག་གོ །མེར་རྡོ་རྗེ་གནོད་སྦྱིན་དུ་བའི་མདོག་དུ་བའི་མདོག་དང་སེར་པོ་དང་ལྗང་གུའི་ཞལ་ལོ། །ལྕགས་ཀྱུ་འཛིན་པའོ། །སྲིན་པོར་རྡོ་རྗེ་བདུད་རྩི་དམར་པོ་དམར་པོ་དང༌། སེར་པོ་དང་ལྗང་གུའི་ཞལ་ལོ། །དགྲ་སྟ་འཛིན་པའོ། །རླུང་དུ་ནག་པོ་ཆེན་པོ་སྔོན་པོ་དང་སེར་པོ་དང་ལྗང་གུའི་ཞལ་ཏྲི་ཤཱུ་ལ་འཛིན་པའོ། །དབང་ལྡན་དུ་རྡོ་རྗེ་འཇིགས་སུ་རུང་བ་ནག་པོ་ནག་པོ་དང༌། སེར་པོ་དང་ལྗང་གུའི་ཞལ་རལ་གྲི་འཛིན་པའོ། །རྡོ་རྗེ་དབྱུག་པ་ལ་སོགས་པ་བརྒྱད་པོ་འདི་རྣམས་ནི་རིམ་པ་ཇི་ལྟ་བར་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་དང་འདོད་པའི་རྒྱལ་པོ་དང༌། དབྱུག་པ་སྔོན་པོ་དང་སྟོབས་པོ་ཆེ་དང་མི་གཡོ་བ་རྣམས་ཀྱི་མིང་གཞན་ནོ། །སྟེང་དུ་གཙུག་ཏོར་འཁོར་ལོས་སྒྱུར་པ་དཀར་པོ་དང་སྔོན་པོ་དང་ལྗང་གུའི་ཞལ་འཁོར་ལོ་འཛིན་པའོ། །
འོག་ཏུ་རྡོ་རྗེ་ས་འོག་གནོད་མཛེས་ཀྱི་མིང་རྣམ་གྲངས་ཅན་སྔོན་པོ་སྔོན་པོ་དང་སེར་པོ་དང་ལྗང་གུའི་ཞལ་རོལ་པ་དང་བཅས་པའི་རྡོ་རྗེ་གཏུན་ཤིང་འཛིན་པའོ། །འདིའི་ཕྱག་གཉིས་ཀྱིས་ཀླུའི་ཞགས་པ་སྡིགས་མཛུབ་དང་བཅས་པ་དང་ཁ་ཊྭཱཾ་གའོ། །རྡོ་རྗེ་དབྱུག་པ་ལ་སོགས་པའི་ཁྲོ་བོ་འདི་རྣམས་ནི་ཕྱག་མཚན་གྱི་གཙོ་བོ་དང་ཐོད་པས་མཚན་པའི་ཕྱག་གཉིས་ཀྱིས་རང་དང་མཚུངས་པའི་ཡུམ་དང་མཉམ་པར་སྦྱོར་བའོ། །དབུ་སྐྲ་དམར་སེར་འབར་ཞིང་གྱེན་དུ་འཁྱིལ་བ་རང་རང་གི་རིགས་ཀྱི་བདག་པོས་ཅོད་པན་མཛེས་པར་བརྒྱན་པ་སྨིན་མ་གཡོ་བ་དང་བཅས་པའི་ཁྲོ་གཉེར་ཅན་མཆེ་བ་གཙིགས་པའི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ་དམར་ཞིང་ཟླུམ་པ་མི་མགོའི་ཕྲེང་བ་དང་ཕྱག་རྒྱ་ལྔ་ལ་སོགས་པ་དང་ཀླུའི་རྒྱལ་པོ་བརྒྱད་ཀྱིས་བརྒྱན་པ། སྣ་ཚོགས་པདྨ་དང་ཉི་མ་ལ་གནས་པའི་ཕྱོགས་སྐྱོང་བརྒྱད་དང་སྟེང་དུ་ཚངས་པ་དང་འོག་ཏུ་ཐགས་བཟངས་རིས་རྣམས་ལ་གཡས་བརྐྱང་གིས་མནན་ནས་བཞུགས་པ་རང་གི་རིགས་ཀྱི་བདག་པོས་དབུ་བརྒྱན་པ་སྟ། ཇི་ལྟར་འཇམ་པའི་རྡོ་རྗེའི་དཀྱིལ་འཁོར་གྱི་རྩིབས་བཅུ་པའི་སྲུང་པའི་འཁོར་ལོར་བཤད་པ་བཞིན་ནོ། །བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་ཁ་བཛྲ་དྷྲྀཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ་ཅེས་བྱ་བ་ནི་རྡོ་རྗེ་ཧཱུཾ་མཛད་ཀྱི་སྙིང་པོའི་སྔགས་སོ། །ལས་ཐམས་ཅད་པའི་སྔགས་ནི་ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ་སྭཱ་ཧཱ། ཞེས་བྱ་བའོ། །ཡང་ཤར་ལ་སོགས་པའི་ཕྱོགས་དང་ཕྱོགས་མཚམས་དང་སྟེང་དང་འོག་ཏུ་སྣ་ཚོགས་པདྨ་དང་ཉི་མའི་གདན་རྣམས་ལ་གཡས་སྐོར་གྱིས་གཤིན་རྗེ་མཐར་བྱེད་ལ་སོགས་པའི་ཁྲོ་བོ་བཅུའོ། །འདི་རྣམས་ཀྱི་གནས་དང་སྐུ་མདོག་ལ་སོགས་པ་བསྡུས་པའི་རིམ་པར་གསུངས་པའི་དཀྱིལ་འཁོར་ཇི་ལྟ་བ་བཞིན་ནོ། །ཡང་ན་འཇམ་པའི་རྡོ་རྗེ་སྲུང་བའི་འཁོར་ལོ་རྩིབས་བཅུ་པ་བཞིན་ནོ། །ཡང་ན་ཀུན་དུ་ཁ་སྦྱོར་གྱི་རྡོ་རྗེ་སེམས་དཔའི་དཀྱིལ་འཁོར་བཞིན་ནོ། །ཕྱོགས་འདི་གསུམ་ཀ་ལ་ཡང་ཨོཾ་ཨཱཿ་བིགྷཱ་ཏཀྲྀ་ཏ་ཧཱུཾ་ཞེས་བྱ་བས་བགེགས་མཐར་བྱེད་ཀྱི་སྔགས་ཏེ་ལས་ཐམས་ཅད་པའོ།། །།བདེ་མཆོག་ཏི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་དུ་སྣ་ཚོགས་པདྨའི་ཟེ་འབྲུ་ལ་གནས་པའི་སྣ་ཚོགས་རྡོ་རྗེའི་ལྟེ་བ་ལ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ལྟེ་བའི་སྟེང་དུ་
ཉི་མ་ལ་གནས་པའི་འཇིགས་བྱེད་དང་དུས་མཚན་མོ་གཡས་བརྐྱང་གི་ཞབས་གཉིས་ཀྱིས་མནན་པའི་བཅོམ་ལྡན་འདས་སྐུ་མདོག་ནག་པོ་ཤར་དང་བྱང་ལ་སོགས་པའི་ཞལ་བཞི་ནག་པོ་དང་ལྗང་གུ་དང་དམར་པོ་དང་སེར་པོ་ཞལ་རེ་རེ་ལ་སྤྱན་གསུམ་པ་སྟག་གི་པགས་པའི་ཤམ་ཐབས་ཅན། ཕྱག་བཅུ་གཉིས་པ་རྡོ་རྗེ་དང་དྲིལ་བུ་དང་བཅས་པའི་ཕྱག་གཉིས་ཀྱིས་རྡོ་རྗེ་ཕག་མོ་ལ་འཁྱུད་པ། ཕྱག་གཉིས་ཀྱིས་རྒྱབ་ཏུ་གླང་པོ་ཆེ་དཀར་པོའི་པགས་པ་ཁྲག་དང་བཅས་པ་བརྒྱངས་ནས་འཛིན་པ། དེ་ལས་གཞན་པའི་གཡས་པའི་ཕྱག་རྣམས་ཀྱིས་ཌ་མ་རུ་དང་དགྲ་སྟ་དང་གྲི་གུག་དང་རྩེ་གསུམ་འཛིན་པ། གཡོན་རྣམས་ཀྱིས་རྡོ་རྗེས་མཚན་པའི་ཁ་ཊྭཱཾ་གདང་ཁྲག་གིས་གང་བའི་ཐོད་པ་དང་རྡོ་རྗེ་ཞགས་པ་དང་ཚངས་པའི་མགོ་བོ་རྣམས་སོ། །མི་མགོ་རློན་པ་ལྔ་བཅུའི་ཕྲེང་བ་མགུལ་དུ་འཕྱང་བ། ཕྱག་རྒྱ་དྲུག་དང་ལྡན་པའི་མིའི་རྒྱུ་མས་མཆོད་ཕྱིར་ཐོགས་བྱས་པ། དཔྲལ་བའི་སྟེང་དུ་ཐོད་པ་ལྔ་དང་ལྡན་པ། ནོར་བུ་དང་གཡོན་ངོས་སུ་གནས་པའི་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོད་ཅོ་གནག་པོ་རྣམ་པར་འགྱུར་ཞིང་གདངས་པ། མཆེ་བ་གཙིགས་པའི་ཞལ་ཅན་གར་གྱི་ཉམས་དགུའི་ཚོགས་དང་ལྡན་པའོ། །རྡོ་རྗེ་ཕག་མོ་ནི་དམར་མོ་ཞལ་གཅིག་ཕྱག་གཉིས་སྤྱན་གསུམ་པ་སྐྲའི་ཚོགས་གྲོལ་བ་གཅེར་བུ་ཐོད་པའི་དུམ་བུའི་སྐ་གས་བཅིངས་པ་འཁྱུད་པའི་ཕྱག་གིས་བཟུང་བའི་ཐོད་པ་ཁྲག་གིས་བཀང་བ་འཛག་པའི་རྒྱུན་གཙོ་བོ་ལ་སྟོབ་པ། སྡིགས་མཛུབ་དང་བཅས་པ་རྡོ་རྗེ་སྟེང་དུ་འཕྱར་བའི་ཕྱག་གཡས་པས་གདུག་པ་རྣམས་ལ་སྡིགས་པར་བྱེད་པ་ཁྲག་དང་བྲལ་བའི་མི་མགོ་སྐམ་པོའི་ཕྲེང་བ་ཅན་ཉི་མའི་འོད་ཀྱི་དཀྱིལ་འཁོར་ཅན། ཕྱག་རྒྱ་ལྔ་དང་ལྡན་པ་ཅུང་ཟད་བཞད་པ་ཟླ་མཚན་འབབ་པ་དང་བཅས་པ་སྤུ་གྱེན་དུ་ལངས་པའོ། །དེ་ནས་ཤར་ལ་སོགས་པའི་ཕྱོགས་རྣམས་ལ་གཡོན་སྐོར་གྱི་དང༌། མེ་ལ་སོགས་པའི་ཕྱོགས་བྲལ་རྣམས་ལ་གཡས་སྐོར་གྱིས་དགོད་དོ། །དེ་ལ་ཕྱོགས་ཀྱི་འདབ་མ་ལ་མཁའ་འགྲོ་མ་དང༌། ལཱ་མཱ་དང༌། དུམ་སྐྱེས་མ་དང༌། གཟུགས་ཅན་མ་རྣམས་ནི་ནག་མོ་དང་ལྗང་གུ་དང་དམར་མོ་དང༌། སེར་མོའི་མདོག་ཅན་རྣམས་ཞལ་གཅིག་པ་སྤྱན་གསུམ་པ་དབུ་སྐྲ་གྲོལ་བ་ཕྱག་བཞི་མ་གཡོན་པ་གཉིས་ཀྱིས་ཁ་ཊྭཱཾ་ག་
དང་ཐོད་པ་འཛིན་པ། གཡས་པ་དག་གིས་ཌ་མ་རུ་དང་གྲི་གུག་འཛིན་པ། གཡས་བརྐྱང་བས་གནས་པ་རྣམས་སོ། །མཚམས་ཀྱི་འདབ་མར་བྱང་ཆུབ་ཀྱི་སེམས་དང་ཁྲག་དང་བདུད་རྩི་ལྔ་དང་ཤ་ལྔ་རྣམས་གྲུབ་པའི་བཅུད་ལྟ་བུའི་བདུད་རྩིར་གྱུར་བས་གང་བའི་པདྨའི་སྣོད་རྣམས་སོ། །ཡང་ན་བཞི་ཆར་ཡང་བདུད་རྩི་ལྔས་གང་བའོ། །དེ་ནས་ཐུགས་ཀྱི་འཁོར་ལོའི་ཤར་གྱི་རྩིབས་སུ་ཐོད་པའི་དམ་བུ་དང་རབ་ཏུ་གཏུམ་མོའོ། །བྱང་དུ་ཀེང་རུས་ཆེན་པོ་དང་གཏུམ་པའི་མིག་ཅན་མའོ། །ནུབ་ཏུ་ཀེང་རུས་དང་འོད་ལྡན་མའོ། །ལྷོ་རུ་མཆེ་བ་རྣམ་པར་གཙིགས་པ་དང་སྣ་ཆེན་མའོ། །མེར་ཆང་དགྲ་མ་དང་དཔའ་བོའི་བློ་གྲོས་མའོ། །སྲིན་པོར་འོད་དཔག་མེད་དང་མིའུ་ཐུང་མའོ། །རླུང་དུ་རྡོ་རྗེ་འོད་དང་ལང་ཀའི་དབང་ཕྱུག་མའོ། །དབང་ལྡན་དུ་རྡོ་རྗེའི་ལུས་དང་ཤིང་གྲིབ་མའོ། །རིམ་པ་དེ་བཞིན་དུ་གསུང་གི་འཁོར་ལོ་ལ་མྱུ་གུ་ཅན་དང་ས་སྲུང་མའོ། །རྡོ་རྗེ་རལ་པ་ཅན་དང་འཇིགས་བྱེད་ཆེན་མོའོ། །དཔའ་བོ་ཆེན་པོ་དང་རླུང་གི་ཤུགས་ཅན་མའོ། །རྡོ་རྗེ་ཧཱུཾ་མཛད་དང་ཆང་འཐུང་མའོ། །རྡོ་རྗེ་བཟང་པོ་དང་ལྷ་མོ་སྔོ་བསངས་མའོ། །རྡོ་རྗེ་འོད་དང་ཤིན་ཏུ་བཟང་མོའོ། །འཇིགས་བྱེད་ཆེན་མོ་དང་རྟ་རྣ་མའོ། །མིག་མི་བཟང་དང་བྱ་གདོང་མའོ། །དེ་བཞིན་དུ་སྐུའི་འཁོར་ལོ་ལ་སྟོབས་པོ་ཆེ་དང་འཁོར་ལོའི་ཤུགས་ཅན་མའོ། །རིན་ཆེན་རྡོ་རྗེ་དང་དུམ་སྐྱེས་མའོ། །རྟ་མགྲིན་དང་ཆང་འཚོང་མའོ། །ནམ་མཁའི་སྙིང་བོ་དང་འཁོར་ལོའི་གོ་ཆ་འཛིན་པའོ། །དཔལ་ཧེ་རུ་ཀ་དང་ཤིན་ཏུ་བཟང་མོའོ། །པདྨ་གར་གྱི་དབང་ཕྱུག་དང་སྟོབས་ཆེན་མའོ། །རྣམ་བར་སྣང་མཛད་དང་འཁོར་ལོས་སྒྱུར་མའོ། །རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །དེ་ལ་ཐོད་པའི་དུམ་བུ་ལ་སོགས་པ་དཔའ་བོ་རྣམས་ཞལ་གཅིག་པ་སྤྱན་གསུམ་པ་རལ་པའི་ཐོར་ཚུགས་ཅན་དཔྲལ་བར་གནས་པའི་རྡོ་རྗེ་ཕྲེང་བས་མཚན་པའི་དཔའ་བོའི་དར་དཔྱངས་ཅན་ཕྱག་བཞི་པ་འཁྱུད་པའི་ཕྱག་གཉིས་ཀྱིས་རྡོ་རྗེ་དང་རྡོ་རྗེ་དྲིལ་བུ་གཡོན་པས་ཁ་ཊྭཱཾ་ག་དང་གཡས་པ་ཌ་མ་རུ་བསྣམས་པ། ཚངས་པའི་སྐུད་པ་དང་དཔུང་རྒྱན་ཅན་མཆེ་བ་གཙིགས་པའི་ཞལ། ཕྱག་རྒྱ་ལྔ་དང་ལྡན་པ་གཡས་བརྐྱང་གིས་གནས་པའོ། །རབ་ཏུ་གཏུམ་མོ་ལ་སོགས་བའི་ལྷ་མོ་རྣམས་ཞལ་གཅིག་པ་སྤྱན་གསུམ་པ་དྲག་པོའི་གཟུགས་ཅན་མ་
དབུ་སྐྲ་གྲོལ་བའི་གཅེར་བུ་མ། ཕྱག་གཉིས་པ་འཁྱུད་པའི་ཕྱག་གིས་ཐོད་པ་འཛིན་པ། གཡས་པ་གདུག་པ་རྣམས་བསྡིགས་པའི་གྲི་གུག་འཛིན་པའོ། །སྒོ་རྣམས་ལ་ཁྭ་གདོང་མ་དང་འུག་གདོང་མ་དང་ཁྱི་གདོང་མ་དང་ཕག་གདོང་མ་རྣམས་ནི་མཁའ་འགྲོ་མ་ལ་སོགས་པ་བཞིན་ནོ། །ཁྱད་པར་དུ་འདི་རྣམས་ཀྱི་ཞལ་ནི་མིང་གི་རྗེས་སུ་མཐུན་པའོ། །མཚམས་རྣམས་སུ་གཤིན་རྗེ་བརྟན་མ་དང༌། གཤིན་རྗེ་ཕོ་ཉ་མ་དང༌། གཤིན་རྗེ་མཆེ་བ་མ་དང་གཤིན་རྗེ་འཇོམས་མ་རྣམས་ནི་མིའི་ཞལ་ལོ། །གཡས་དང་གཡོན་གྱི་ཕྱོགས་ཀྱི་ལྷ་མོ་གཉིས་ཀྱི་གཡས་དང་གཡོན་གྱི་སྐུ་ཕྱེད་ཕྱེད་འདྲ་བའོ། །བརྒྱད་པོ་འདི་རྣམས་ནི་རོའི་གདན་ཅན་ནོ། །ཌཱ་ཀི་མ་ལ་སོགས་པའི་ལྷ་མོ་རྣམས་ནི་མི་མགོའི་ཕྲེང་བ་ཅན་རྡོ་རྗེ་ཕྲེང་བས་དབྲལ་བར་བརྒྱན་པ་ཕྱག་རྒྱ་ལྔ་དང་ལྡན་པ་སྐ་རགས་ལ་སྒྲ་དང་བཅས་པའི་གཡེར་ག་ལ་སོགས་པས་བརྒྱན་པའོ། །རིགས་ཀྱི་བདག་པོ་ནི་བཅོམ་ལྡན་འདས་ཀྱིས་མི་བསྐྱོད་པའོ། །རྡོ་རྗེ་ཕག་མོའི་རྣམ་པར་སྣང་མཛད་དོ། །ཌཱ་ཀི་མ་ལ་སོགས་པའི་རིན་ཆེན་འབྱུང་ལྡན་དང༌། ཐུགས་དང་གསུང་དང་སྐུའི་འཁོར་ལོ་གནས་པ་རྣམས་ནི་མི་བསྐྱོད་པ་དང་སྣང་བ་མཐའ་ཡས་དང་རྟག་པ་རྣམས་སོ། །དམ་ཚིག་གི་འཁོར་ལོ་ལ་གནས་པ་རྣམས་ནི་དོན་ཡོད་གྲུབ་བའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནཱི་ཛཱ་ལ་སཾ་བ་རཾ་སྭཱ་ཧཱ། སྙིང་པོའོ། །ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ་ཅེས་བྱ་བ་ནི་དུམ་སྐྱེས་མའི་སྔགས་ཏེ་ལས་ཐམས་ཅད་པའོ། །ལྷ་གཞན་རྣམས་ཀྱི་ནི་ཁོ་བོས་དཔལ་བདེ་མཆོག་གི་མངོན་པར་རྟོགས་པའི་སྒྲུབ་ཐབས་སུ་བཤད་པའོ། །ཡང་དཀྱིལ་འཁོར་གྱི་དབང་ཕྱུག་ལ་སོགས་པ་ནས་གཤིན་རྗེ་འཇོམས་མའི་བར་ཐམས་ཅད་ནི་ཞལ་གཅིག་པ་ཕྱག་གཉིས་པ་དེ་ལ་དབའ་བོ་ཉི་ཤུ་རྩ་ལྔས་འཁྱུད་པའི་གཡས་གཡོན་གྱི་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཌཱ་ཀི་མ་ལ་སོགས་པ་བཞི་དང་ཁྭ་གདོང་མ་ལ་སོགས་པ་རྣམས་ནི་གཡོན་པས་ཐོད་པ་དང་དཔུང་པ་ལ་བརྟེན་པའི་ཁ་ཊྭཱཾ་ག་དང་གཡས་པ་ཌཱ་མ་རུ་འཛིན་པ་གཞན་ཐམས་ཅད་ནི་གོང་བཞིན་ནོ། །ཡང་ན་འདིར་འཁོར་ལོའི་དབང་ཕྱུག་ལ་སོགས་པ་ཕྱག་གཉིས་པ་ཉིད་ཀྱིས་ཕྱོགས་ལ་དཔལ་བདེ་མཆོག་དང་རྡོ་རྗེ་
ཕག་མོ་གཉིས་ཀྱིས་གསེར་གྱི་མདོག་གམ་སྔོན་པོས་ཡང་སྟེ། བཅོམ་ལྡན་འདས་ནི་ཕྱག་གཡས་པས་རྡོ་རྗེ་གསོར་བ་ལ་མཆོག་ཏུ་བརྩོན་པ་གཡོན་པས་ཐོད་པ་དང་ཁ་ཊྭཱཾ་ག་འཛིན་པའམ། ཡང་ན་རྡོ་རྗེ་དང་དྲིལ་བུའི་ཕྱག་གཉིས་ཀྱིས་འཁྱུད་པས་གནས་པའོ། །ཌཱ་ཀི་མ་ལ་སོགས་པ་བཞི་ནི་སེར་མོ་གཡས་པ་ཌཱ་མ་རུ་འཛིན་པ་རྣམས་སོ། །ཐུགས་ཀྱི་འཁོར་ལོའི་དཔའ་བོ་རྣམས་ནག་པོ་རྡོ་རྗེ་དང་རྡོ་རྗེ་དྲིལ་བུ་འཛིན་པ་དཔའ་མོ་རྣམས་དཀར་མོ་ཕྱག་གཡས་པས་རྡོ་རྗེ་དང་བཅས་པའི་སྡིགས་མཛུབ་ཅན་རྣམས་སོ། །གསུང་གི་འཁོར་ལོའི་དཔའ་བོ་རྣམས་ནི་དམར་པོ་པདྨ་དང་པདྨའི་དྲིལ་བུ་འཛིན་པའོ། །ཌཱ་ཀི་མ་རྣམས་ནི་ནག་མོ་ཕྱག་གཡས་པ་ན་པདྨ་དང་བཅས་པའི་སྡིགས་མཛུབ་མཛད་པའོ། །སྐུའི་འཁོར་ལོའི་དཔའ་བོ་རྣམས་ནི་དཀར་པོ་འཁོར་ལོ་དང་འཁོར་ལོའི་དྲིལ་བུ་འཛིན་པའོ། །ལྷ་མོ་རྣམས་ནི་དམར་མོ་གཡས་པས་སྡིགས་མཛུབ་དང་བཅས་པའི་འཁོར་ལོ་འཛིན་པ་རྣམས་སོ། །དཔའ་བོ་ཐམས་ཅད་ནི་ཡུམ་ལ་འཁྱུད་པར་བརྩོན་པ་གཡས་བརྐྱང་གིས་བཞུགས་པ་རྣམས་སོ། །དཔའ་མོ་རྣམས་ནི་དེའི་བརླ་གཉིས་ལ་འཁྲིལ་བའི་ཚུལ་ལོ། །ཁྭ་གདོང་མ་ལ་སོགས་བ་རྣམས་ནི་གཡས་སྡིགས་མཛུབ་དང་བཅས་པའི་གྲི་གུག་འཛིན་པའོ། །ལྷ་མོ་ཐམས་ཅད་ནི་གཡོན་པས་ཐོད་པ་འཛིན་པའོ། །གཤིན་རྗེ་བརྟན་མ་ལ་སོགས་པ་ནི་གཡས་པས་ཌཱ་མ་རུ་གཡོན་པས་སྡིགས་མཛུབ་དང་བཅས་པའི་མི་མགོ་འཛིན་པའོ། །ཌཱ་ཀི་མ་ལ་སོགས་པ་རྣམས་དང་ཁྭ་གདོང་མ་ལ་སོགས་པ་རྣམས་ཀྱི་གཡོན་པའི་དཔུང་པ་ལ་ཁ་ཊྭཱཾ་གའོ། །བཅུ་གཉིས་པོ་འདི་རྣམས་ནི་སྐྱིལ་ཀྲུང་ཕྱེད་པའི་གར་གྱིས་གནས་པ་ཁྱད་པར་གཞན་ཐམས་ཅད་ནི་གོང་བཞིན་ནོ། །འདི་ནི་བདེ་མཆོག་གི་དཀྱིལ་འཁོར་རྣམ་པ་གསུམ་མོ།། །།གང་གི་ཚེ་འདི་རྣམས་ལ་དཔའ་བོ་ཉི་ཤུ་རྩ་ལྔ་མི་བསྒོམ་པར་རྡོ་རྗེ་ཕག་མོ་དཀྱིལ་འཁོར་གྱི་གཙོ་བོར་གྱུར་པ་དེའི་ཚེ་རྡོ་རྗེ་ཕག་མོའི་དཀྱིལ་འཁོར་གསུམ་མོ། །རྡོ་རྗེ་ཕག་མོའི་སྙིང་གའི་ས་བོན་ནི་བཾ་མོ། །ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཧཱུཾ་ཕཊ་ཅེས་པ་ནི་སྙིང་པོའོ། །བདེ་མཆོག་གི་ཕྱག་གཉིས་པ་ལ་སོགས་པ་ལྷ་འདི་རྣམས་ཀྱི་ཕྱག་གཡས་སུ་གནས་པའི་ཕྱག་མཚན་ནི་བྲི་བྱའི་དཀྱིལ་འཁོར་ལ་བྲི་བར་བྱའོ།། །།བཅོམ་ལྡན་འདས་སངས་རྒྱས་ཐོད་
པ་ལྷ་ཉི་ཤུ་རྩ་ལྔའི་བདག་ཉིད་ཅན་གྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་ཆོས་འབྱུང་གི་དབུས་སུ་གནས་པའི་གཞལ་ཡས་ཁང་གི་ནང་དུ་འཁོར་ལོ་རྩིབས་བརྒྱད་པ་ནག་པོ་ལ་གནས་པའི་སྣ་ཚོགས་པདྨ་འདབ་བརྒྱད་ཀྱི་ཟེ་འབྲུར་རོ། །གན་རྐྱལ་གྱི་སྙིང་གར་ཉི་མའི་དཀྱིལ་འཁོར་ལ་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་ནག་པོ་སྐྱིལ་ཀྲུང་ཕྱེད་པ་གར་གྱི་ཉམས་དགུས་གར་བྱེད་པ་ཞལ་གཅིག་པ་ཕྱག་བཞི་པ་སྤྱན་གསུམ་དམར་ལ་ཟླུམ་པ་གཡས་ཀྱི་ཕྱག་གཉིས་ན་ཌཱ་མ་རུ་དང་གྲི་གུག་གཡོན་གྱི་ཕྱག་གཉིས་ན་ཐོད་པ་དང་ཁ་ཊྭཱཾ་ག་འཛིན་པའོ། །ཕྱག་རྒྱ་དྲུག་པ་མི་མགོ་རློན་པ་ལྔ་བཅུའི་ཕྲེང་བ་མགྲིན་པ་ལ་འཕྱང་བ། གཉིས་འཐུང་གི་པགས་པའི་ཤམ་ཐབས་ཅུང་ཟད་རྒྱབ་ན་ཉིལ་བ་སྣ་ཚོགས་རྡོ་རྗེ་དང་ཟླ་བ་ཕྱེད་པས་མཚན་པའི་རལ་བའི་ཐོར་ཅོག་ནག་པོ་ཅན་དཔྲལ་བའི་སྟེང་དུ་ཐོད་པ་ལྔས་བརྒྱན་པ་སངས་རྒྱས་ལྔའི་དབུ་རྒྱན་ཅན་ནོ། །མངའ་བདག་འདིའི་བཙུན་མོ་ནི་སྣ་ཚོགས་སྡེ་མ་གཅེར་བུ་མི་མགོའི་ཕྲེང་བ་ཅན་སྐྲ་སིལ་བུར་འགྲོ་ཞིང་གྱེན་དུ་འབར་བ་ཐོད་པ་ལྔས་དབུ་བརྒྱན་པ། མཆེ་བ་ཅུང་ཟད་གཙིགས་པ་སྐུ་མདོག་དམར་པོ་ཞལ་གཅིག་ཕྱག་གཉིས་སྤྱན་གསུམ་མ། ཡབ་ཀྱི་མགྲིན་པ་ལ་ཆགས་པའི་ཕྱག་གཡོན་པས་ཐོད་པ་ཁྲག་གི་རྒྱུན་འཛག་པ་ཡབ་ལ་སྟོབ་པ། གཡས་ཀྱི་ཕྱག་གིས་གྲི་གུག་བརྡེག་པའི་ཚུལ་ལོ། །ཤར་གྱི་རྩིབས་ནག་པོའི་སྟེང་གི་འདབ་མ་ལ་ལེགས་ཕྲེང་ཅན་མའོ། །བྱང་དུ་ཐོད་པ་ཅན་མའོ། །ནུབ་ཏུ་འཇིགས་ཅན་མའོ། །ལྷོར་མི་ཐུབ་མའོ། །དབང་ལྡན་ལ་སོགས་པའི་འདབ་མ་རྣམས་ལ་གཡས་སྐོར་གྱིས་བྱང་སེམས་དཀར་བ་དང་དམར་བ་དང་བདུད་རྩི་ལྔ་དང་སྒྲོན་མེ་ལྔས་གང་བའི་ཐོད་པ་རྣམས་སོ། །རིམ་པ་དང་པོ་འདི་ནི་རྡོ་རྗེ་ཕྲེང་བ་སྔོན་པོས་བསྐོར་བའོ། །དེ་ནས་རིམ་པ་གཉིས་པ་ནི་རྩིབས་བརྒྱད་དམར་པོ་ལ་གནས་པའི་པདྨ་བརྒྱད་ཀྱི་ཕྱི་རིམ་རྡོ་རྗེ་དམར་པོའི་ཕྲེང་བས་བསྐོར་བའོ། །དེའི་ཤར་གྱི་རྩིབས་ལ་དགེ་བའི་སྐ་རགས་མའོ། །བྱང་དུ་ནི་གཟུགས་ཅན་མའོ། །ནུབ་ཏུ་རྣམ་རྒྱལ་མའོ། །ལྷོར་འདོད་ཅན་མའོ། །དབང་ལྡན་དུ་དུས་ཅན་མའོ། །མེར་ནི་མཚོ་ཆེན་མའོ། །བདེན་བྲལ་དུ་བྱེད་མའོ། །རླུང་དུ་གསོད་མའོ། །དེ་ནས་རིམ་པ་གསུམ་པ་
ལ་ནི་འཁོར་ལོ་དཀར་པོ་རྩིབས་བརྒྱད་པ་ལ་གནས་པའི་པདྨ་བརྒྱད་དེ་རྡོ་རྗེ་དཀར་པོའི་ཕྲེང་བས་བསྐོར་བའོ། །དེའི་ཤར་གྱི་རྩིབས་ལ་སྒྲོལ་མའོ། །བྱང་དུ་འཇིགས་མཐོང་མའོ། །ནུབ་ཏུ་ལེགས་མཐོང་མའོ། །ལྷོར་ཐུབ་དཀའ་མའོ། །དབང་ལྡན་དུ་དགེ་མའོ། །མེར་གྲིབ་ནོན་མའོ། །བདེན་བྲལ་དུ་དུས་མཚན་མའོ། །རླུང་དུ་གྲགས་ཆེན་མའོ། །ཤར་གྱི་སྒོའི་པདྨ་ལ་མཛེས་མའོ། །བྱང་གི་སྒོའི་པདྨ་ལ་ནོར་འཛིན་མའོ། །ནུབ་སྒོའི་པདྨ་ལ་སྐལ་བཟངས་མའོ། །ལྷོ་སྒོའི་པདྨ་ལ་མཐོང་ན་ཡིད་འོང་མའོ། །འདི་རྣམས་ཐམས་ཅད་གཡས་གཡོན་གྱི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་སོ་ཅུང་ཟད་སྟོན་པ་ཞལ་གཅིག་མ་སྤྱན་གསུམ་མ་རུས་པའི་རྒྱན་གྱིས་བརྒྱན་པ་མི་མགོའི་ཕྲེང་བ་དང་བྲལ་བ། དབུ་སྐྲ་སིལ་བུ་དམར་སེར་གྱི་ཚོགས་གྱེན་དུ་བརྫེས་པ་བྱང་སེམས་འཛག་པ་ཉི་མའི་གདན་ལ་སྐྱིལ་ཀྲུང་ཕྱེད་པའི་གང་གི་ཚུལ་གྱིས་གནས་པ་རྣམས་སོ། །སྒོ་སྐྱོང་མ་རྣམས་ནི་གཡས་བསྐུམ་གཡོན་བརྐྱང་བའོ། །ཐམས་ཅད་ཀྱང་སྟག་གི་པགས་པ་གྱོན་མ་སྐུ་མདོག་སྔོན་མོའོ། །ཡང་ན་ལེགས་ཕྲེང་ཅན་མ་ལ་སོགས་པ་བཞི་ནག་མོའོ། །རིམ་པ་གཉིས་མ་ལ་གནས་པ་རྣམས་དཀར་སེར་རོ། །རིམ་པ་གསུམ་པ་ལ་གནས་པ་རྣམས་ལྗང་གུ་མའོ། །སྒོའི་ལྷ་མོ་རྣམས་ནག་མོའོ། །བཅོམ་ལྡན་འདས་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པའོ། །སྣ་ཚོགས་སྡེ་མ་ནི་རྣམ་པར་སྣང་མཛད་ཀྱིས་སོ། །ལེགས་ཕྲེང་ཅན་མ་ལ་སོགས་པ་བཞི་ནི་རིན་འབྱུང་གིས་སོ། །རིམ་པ་གཉིས་པ་ལ་གནས་པ་རྣམས་ནི་སྣང་བ་མཐའ་ཡས་ཀྱིས་སོ། །རིམ་པ་གསུམ་པ་ལ་གནས་པ་རྣམས་ནི་རྣམ་པར་སྣང་མཛད་ཀྱིས་སོ། །སྒོའི་ལྷ་མོ་རྣམས་ཀྱི་དོན་ཡོད་གྲུབ་པའོ། །བཅོམ་ལྡན་འདས་ཀྱི་སྙིང་གའི་ས་བོན་ནི་ཧཱུཾ་ངོ༌། །ཨོཾ་བུདྡྷ་ཀ་པཱ་ལི་ནཱི་ཨཱཿ་ཧཱི་ཧེཿ་ཧཱུཾ་ཕཊ་སྙིང་པོའོ། །སྔགས་འདི་ཉིད་ཀྱིས་དཀྱིལ་འཁོར་འདིའི་ལས་ཐམས་ཅད་པའོ།། །།དཔལ་རྣལ་འབྱོར་ནམ་མཁའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་སའི་དཀྱིལ་འཁོར་གྱི་སྟེང་དུ་རྒྱ་མཚོ་ཆེན་པོ་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྟེང་དུ་སྣ་ཚོགས་པདྨ་དང་རྡོ་རྗེ་རྒྱ་གྲམ་གྱི་ལྟེ་བ་ལ་
གནས་པའི་གཞལ་ཡས་ཁང་གི་དཀྱིལ་དུ་དབུས་ཀྱི་རིམ་པའི་ལྟེ་བར་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་དཔལ་རྣལ་འབྱོར་ནམ་མཁའ་ནག་པོ་རྩ་བ་དང་གཡས་གཡོན་གྱི་ཞལ་གསུམ་ནག་པོ་དང་དཀར་པོ་དང་དམར་པོ་ཞལ་རེ་རེ་ལ་སྤྱན་གསུམ་གསུམ་པ་ཕྱག་རྒྱ་དྲུག་དང་ལྡན་པ་དཔྲལ་བར་གནས་པའི་ཐོད་པ་ལྔའི་ཕྲེང་བ་དང་ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པ་ནག་པོའི་ཅོད་པན་ཅན། དེ་བཞིན་གཤེགས་པ་ལྔ་འཕྲོ་བའི་དབུ་རྒྱན་ཅན་སྟག་གི་པགས་པའི་ཤམ་ཐབས་རྒྱབ་ཏུ་ཅུང་ཟད་ཉིལ་བ། ཕྱག་དྲུག་པ་རྡོ་རྗེ་དང་རྡོ་རྗེ་དྲིལ་བུ་བསྣམས་བའི་ཕྱག་གཉིས་ཀྱིས་ཡེ་ཤེས་ཀྱི་ཌཱ་ཀི་མ་ནག་མོའམ་དཀར་མོ་ལ་འཁྱུད་པ། ལག་པ་གཡས་པ་གཉིས་ཀྱིས་ནུ་མ་དང་མདའ་འཛིན་པ་གཡོན་པ་གཉིས་ཀྱིས་པད་སྣོད་དང་གཞུ་འཛིན་པའོ། །དེ་ནས་ཤར་གྱི་རེ་མིག་ལ་གླང་པོ་ཆེའི་རྒྱལ་པོ་ལ་འགྱིང་བའི་ཚུལ་གྱིས་གནས་པའི་རྡོ་རྗེ་ཌཱ་ཀི་མ་དཀར་མོ། བྱང་དུ་རྨ་བྱ་ལ་སྐྱིལ་ཀྲུང་ཕྱེད་པས་གནས་པའི་འཇིགས་བྱེད་ཌཱ་ཀི་མ་སེར་མོ་སྦྲུལ་གྱིས་བརྒྱན་པ། ནུབ་ཏུ་བྱ་ཁྱུང་ལ་ཙོག་པུར་གནས་པའི་རོ་ལངས་མ་དམར་མོ། ལྷོར་ཁོལ་པོའི་གདན་ལ་བྱིན་པའི་སྐྱིལ་ཀྲུང་གིས་གནས་པའི་གཏུམ་མོ་སྔོན་མོ་དབུ་སྐྲ་དམར་པོ་འགྲམ་པར་གྲོལ་ཞིང་སྤྱི་བོར་ཐལ་མོ་སྦྱོར་བའོ། །འདིར་ཡེ་ཤེས་ཀྱི་ཌཱ་ཀི་མ་ལ་སོགས་པ་ལྔ་ནི་གཡས་དང་གཡོན་གྱི་ཕྱག་གཉིས་ཀྱིས་ཁ་ཊྭཱཾ་ག་དང་ཐོད་པ་འཛིན་པའོ། །རྡོ་རྗེ་མཁའ་འགྲོ་མ་ལ་སོགས་པ་རྣམས་ནི་གླང་པོ་ཆེ་ལ་སོགས་པ་ལ་གནས་པའི་པདྨ་དང་ཉི་མ་ལ་གནས་པ་གླང་པོ་ཆེའི་པགས་པ་སྨད་ལ་གོན་པ་མིའི་པགས་པ་སྟོད་ལ་གོན་བའོ། །དབང་ལྡན་དུ་སེང་གེ་ལ་འགྱིང་བའི་ཚུལ་གྱིས་གནས་བའི་སེང་གེ་མ་དཀར་སེར་ཕྱག་གཉིས་མ་གཡས་པས་སྟེང་དུ་འཕྱར་བའི་ཁ་ཊྭཱཾ་ག་འཛིན་པ། གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །མེར་རྡོ་རྗེ་ཕག་མཆུ་མ་ཟླུམ་པོའི་ཚུལ་གྱིས་བཞུགས་པའི་སྟག་མོ་ཁ་དོག་དཀར་ནག་མོ་ཕྱག་གཉིས་མ་གཡས་མ་དང་ཅིག་ཤོས་ཀྱིས་ལྕགས་ཀྱུ་དང་ཞགས་པ་འཛིན་པའོ། །བདེན་བྲལ་དུ་མ་ཧེ་ལ་སྐྱིལ་ཀྲུང་ཕྱེད་པས་བཞུགས་པ་ཅེ་སྤྱང་མ་ཅེ་སྤྱང་གི་གདོང་ཅན་སྐུ་མདོག་དམར་ནག་དགྲ་སྟ་དང་ཞགས་
པ་འཛིན་པའི་ཕྱག་གཉིས་སོ། །རླུང་དུ་ཅེ་སྤྱང་གི་གདན་ལ་ཙོག་པུར་བཞུགས་པའི་འུག་པ་མ་འུག་པའི་གདོང་ཅན་དམར་སེར་མོ་ཕྱག་གཉིས་ཀྱིས་དབྱུག་པ་དང་ཞགས་པ་འཛིན་པའོ། །འདི་རྣམས་ནི་རང་རང་གི་ཆིབས་རྣམས་ལ་པདྨ་དང་ཉི་མར་གནས་པའོ། །ཤར་དུ་རྡོ་རྗེ་ཌཱ་ཀི་མའི་རྒྱབ་ཏུ་ཌཱ་ཀི་མ་དཀར་མོ་ཕྱག་གཉིས་རྩེ་མོ་ཁར་བཅུག་པའོ། །བྱང་དུ་འཇིགས་བྱེད་ཌཱ་ཀི་མའི་རྒྱབ་ཏུ་མར་མེ་མ་སེར་མོ་སྤྱི་བོར་མར་མེ་ལྟ་བུར་ཐལ་མོ་སྦྱར་བ་དང་བཅས་པའོ། །ནུབ་ཏུ་རོ་ལངས་མའི་རྒྱབ་ཏུ་འཇིགས་བྱེད་མ་དམར་མོ་སྙིམ་པ་ཁྲག་གིས་བཀང་བ་ཞལ་དུ་གསོལ་བའོ། །ལྷོར་གཏུམ་མོའི་རྒྱབ་ཏུ་ཀམྤོ་ཇི་ནག་མོ། ཕྱག་གཉིས་ཀྱིས་ཐུགས་ཀར་གཏུན་ཤིང་འཕྱར་བའོ། །བཞི་པོ་འདི་རྣམས་པདྨ་དང་ཉི་མ་དང་རོ་ལ་གནས་པའོ། །དེ་ནས་རྡོ་རྗེ་ཕྲེང་བ་དང་འོད་ཟེར་གྱི་ཟླུམ་པོའི་རིམ་པ་བསྐོར་བ་ལ་པདྨ་དང་ཟླ་བ་རྣམས་ལ་ཤར་ཕྱོགས་སུ་པུཀྐ་སཱི་དང་ཌཱི་མི་ཌཱི་དང་གཏུམ་མོ་རྣམས་ཕྱག་གཉིས་ཀྱིས་བདུད་རྩིའི་སྣོད་འཛིན་པའོ། །བྱང་དུ་འཇིགས་བྱེད་མ་དང་གྲགས་མ་དང་ཤ་མ་རྣམས་ནི་ཤ་ལྔས་བཀང་བའི་པདྨའི་སྣོད་འཛིན་པའོ། །ནུབ་ཏུ་དྲག་ཤུལ་མ་དང་འབར་མ་དང་མི་སྡུག་མ་རྣམས་གཏོར་མའི་སྣོད་འཛིན་བའོ། །ལྷོར་ཐོད་པ་མ་དང་རྡོ་རྗེ་མ་དང་བུམ་པ་མ་རྣམས་བཏུང་བའི་སྣོད་འཛིན་པའོ། །དབང་ལྡན་དུ་སྒེག་མོ་སྙེམས་པའི་ཕྱག་རྒྱ་ཅན་དང་དྲི་ཆབ་མ་དྲིའི་སྣོད་འཛིན་པའོ། །མེའི་མཚམས་སུ་པི་ཝང་མ་པི་ཝང་བསྒྲེང་བ་དང་མེ་ཏོག་མ་མེ་ཏོག་འཐོར་བའོ། །བདེན་བྲལ་དུ་གླུ་མ་ཁའི་ཐ་དཀར་མཛུབ་མོ་གཡོ་བ་དང༌། བདུག་སྤོས་མ་སྤོས་དང་བཅས་པའི་སྤོས་ཕོར་འཛིན་པའོ། །རླུང་དུ་གར་མ་གར་གྱི་ཚུལ་གྱིས་སྟེང་དུ་ཐལ་མོ་སྦྱར་བ་དང༌། མར་མེ་མ་མར་མེ་དང་བཅས་པའི་མར་མེའི་སྣོད་འཛིན་པའོ། །ཡེ་ཤེས་ཌཱ་ཀི་མ་ལ་སོགས་པའི་ལྷ་མོ་སུམ་ཅུ་རྩ་གསུམ་པོ་འདི་དག་ནི་ཞལ་གཅིག་པ་ཕྱག་གཉིས་པ་སྤྱན་གསུམ་པ་དང་སྐྲ་གྲོལ་བ། དབུ་ལ་ཐོད་པ་ལྔའི་ཕྲེང་བ་ཅན་ནོ། །འཇིགས་བྱེད་ཌཱ་ཀི་མ་ནི་དབུ་སྐྲ་གྱེན་ལ་བརྫེས་བ། སེང་གེ་མ་ལ་སོགས་པ་ནི་གོས་དམར་པོ་གྱོན་པའོ། །པུཀྐ་སཱི་ལ་སོགས་པ་དང་མེའི་མཚམས་ཀྱི་ལྷ་མོ་རྣམས་དཀར་མོའོ། །འཇིགས་བྱེད་ཌཱ་ཀི་མ་ལ་སོགས་པ་དང་དབང་ལྡན་གྱི་ལྷ་མོ་དག་སེར་མོའོ། །དྲག་ཤུལ་མ་ལ་སོགས་པ་དང་རླུང་མཚམས་ཀྱི་ལྷ་མོ་དག་
དམར་མོའོ། །ཐོད་པ་མ་ལ་སོགས་བ་དང་བདེན་བྲལ་གྱི་ལྷ་མོ་དག་ནག་མོའོ། །དེ་ནས་རྡོ་རྗེ་ཕྲེང་བ་ཟླུམ་པོའི་ཕྱི་རོལ་གྱི་རིམ་པའི་སྒོ་རྣམས་དང་སྣམ་བུ་རྣམས་ལ་ཆུ་སྐྱེས་དང་ཟླ་བའི་གདན་རྣམས་སོ། །དེ་ལ་ཤར་སྒོར་ཁྱབ་འཇུག་ནག་པོ་དང༌། བྱང་དུ་ཚངས་པ་སེར་པོ་དང༌། ནུབ་ཏུ་དབང་ཕྱག་ཆེན་པོ་དཀར་པོ་དང༌། ལྷོར་གདོང་དྲུག་དམར་བོ་དང༌། དབང་ལྡན་དུ་དབང་པོ་སེར་པོ་དང༌། མེར་ལུས་ངན་སེར་པོ་དང༌། སྲིན་བོར་གཤིན་རྗེ་ནག་པོ་དང༌། རླུང་དུ་ཆུ་ལྷ་དཀར་པོའོ། །ལྷའི་སྣམ་བུ་ལ་ཤར་དུ་ཀེང་རུས་འཇིགས་བྱེད་དང་ཁ་ཊྭཱཾ་གའི་སྲིན་པོ་དང་ཚོགས་ཀྱི་དབང་ཕྱུག་དང༌། དྲིལ་བུའི་རྣ་བ་ཅན་རྣམས་དཀར་པོའོ། །བྱང་དུ་གཏུམ་མོའི་དབང་ཕྱུག་དང་མདུན་སའི་ལྷ་དང་རིགས་ཀྱི་དབང་ཕྱུག་དང༌། ཛྷཾ་གར་འཇིགས་སུ་རུང་བ་རྣམས་སེར་པོའོ། །ནུབ་ཏུ་དྲག་པོའི་འདོད་པ་དང་ཥ་ཎ་ཌི་ལའི་དབང་ཕྱུག་དང་ཌ་མ་རུའི་འདུལ་བྱེད་དང་རྔ་སྒྲས་འཇིགས་བྱེད་རྣམས་དམར་པོའོ། །ལྷོ་རུ་ཏུམ་བུ་རའི་དབང་ཕྱུག་དང་སྠཱ་ར་ན་དང༌། མཆེ་བ་གཙིགས་པ་དང་གཞུ་འཛིན་པ་རྣམས་ནི་ནག་པོའོ། །ཁྱབ་འཇུག་ལ་སོགས་པ་ཉི་ཤུ་རྩ་བཞི་པོ་འདི་རྣམས་ནི་ཞལ་གཅིག་ཕྱག་བཞི་པ་སྤྱན་གསུམ་པ། ཕྱག་གཡས་པ་གཉིས་ཀྱིས་ཁ་ཊྭཱཾ་ག་དང་རྩེ་གསུམ་པ་འཛིན་པའོ། །གཡོན་པ་གཉིས་ཀྱིས་ལྷ་མོ་ལ་འཁྱུད་པ་དང་ཐོད་པ་འཛིན་པའོ། །རལ་པ་ནག་པོའི་ཐོར་གཙུག་ཅན་རྣམས་ཐོད་པ་ལྔའི་ཕྲེང་བས་དབུ་ལ་བརྒྱན་པ་ཕྱག་རྒྱ་ལྔ་དང་ལྡན་པ། སྟག་གི་པགས་པའི་ཤམ་ཐབས་ཅན་ནོ། །འདི་རྣམས་ཀྱི་ཡུམ་ལྷ་མོ་རྣམས་ཀྱང་ཕྱག་གཡས་པ་དང་ཅིག་ཤོས་ཀྱིས་ཁ་ཊྭཱཾ་ག་དང་ཐོད་པ་འཛིན་པའོ། །འདིར་དཔལ་རྣལ་འབྱོར་ནམ་མཁའ་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པའོ། །ཡེ་ཤེས་ཀྱི་མཁའ་འགྲོ་མ་ལ་མི་བསྐྱོད་པའམ། རྡོ་རྗེ་རྣམ་པར་སྣང་མཛད་ཀྱི་རྒྱས་བཏབ་པའོ། །རྡོ་རྗེ་ཌཱ་ཀི་མ་ལ་སོགས་པ་བཞི་ལ་རྟག་པ་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་དང༌། དོན་ཡོད་གྲུབ་པ་རྣམས་ཀྱིས་སོ། །སེང་གེ་མ་ལ་སོགས་པ་བཞི་ནི་མི་བསྐྱོད་པ་དང་རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་རྣམས་ཀྱིས་སོ། །ཚངས་པ་ལ་རྣམ་པར་སྣང་མཛད་ཀྱིས་
སོ། །དབང་ཕྱུག་ཆེན་པོ་ལ་སྣང་བ་མཐའ་ཡས་ཀྱིས་སོ། །ལྷ་གཞན་དཀར་པོ་རྣམས་ལ་རྣམ་པར་སྣང་མཛད་ཀྱིས་སོ། །སེར་པོ་རྣམས་ཀྱི་ནི་རིན་ཆེན་འབྱུང་ལྡན་གྱིས་སོ། །དམར་པོ་རྣམས་ལ་སྣང་བ་མཐའ་ཡས་ཀྱིས་སོ། །ནག་པོ་རྣམས་ལ་མི་བསྐྱོད་པའོ། །དཀྱིལ་འཁོར་གྱི་དབང་ཕྱུག་གི་སྙིང་གའི་ས་བོན་ཧཱུཾ་ངོ༌། །ཨོཾ་ཧཱུཾ་ཧཿ་སྭཱ་ཧཱ། ཞེས་པ་ནི་སྙིང་པོའི་སྔགས་སོ། །ཨོཾ་གྷུཾ་གྷཿ་སྭཱ་ཧཱ། རོ་ལངས་མའི་ལས་ཐམས་ཅད་པའི་སྔགས་སོ་ཞེས་བྱ་བ་ནི། རིམ་པ་གསུམ་གྱི་དཀྱིལ་འཁོར་རོ། །དབུས་ཀྱི་དཀྱིལ་འཁོར་གཞལ་ཡས་ཁང་ལྟ་བུ་ལ་ཌཱ་ཀི་མ་ལ་སོགས་པ་བཞི་པོ་རྣམས་ནི་སྒོ་རྣམས་སུའོ་ཞེས་པ་གཞན་ནོ། །རིམ་པ་གཉིས་པ་ཡང་གཞལ་ཡས་ཁང་གི་དབྱིབས་སོ་ཞེས་པ་ནི་གཞན་ནོ། །དེ་ཡང་ཟླུམ་པོའོ་ཞེས་བྱ་བ་ནི་ཁ་ཅིག་གོ། །།བཅོམ་ལྡན་འདས་གཤིན་རྗེ་གཤེད་ཀྱི་དཀྱིལ་འཁོར་ལ་རྡོ་རྗེ་གུར་དབུས་སུ་ཆོས་འབྱུང་གི་ལྟེ་བར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་མཚོ་སྐྱེས་དང་ཉི་མའི་སྟེང་དུ་གནས་པའི་མ་ཧེ་ནག་པོ་ཁྲོས་པ་རུས་པའི་རྒྱན་གྱིས་བརྒྱན་པའི་རྒྱབ་ཏུ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་གཤིན་རྗེའི་གདན་ལ་གཡས་བསྐུམ་པ་གཡོན་བརྐྱང་བས་མནན་ནས་བཞུགས་པའི་གཤིན་རྗེ་གཤེད་ནག་པོ་སྨིན་མ་དང་ཨག་ཚོམ་གྱེན་དུ་ལངས་ཤིང་དབུ་སྐྲ་དམར་སེར་གྱེན་དུ་བརྗེས་པ། རྡོ་རྗེའི་རྒྱན་གྱིས་བརྒྱན་པ་སྐུ་བོང་ཐུང་ཞིང་གསུས་པ་འཕྱང་བ་དྲེགས་པ་མི་མགོའི་ཕྲེང་བ་མགུལ་པར་འཕྱང་བ། ལྗགས་འགྱུ་བ་མཆེ་བ་འབར་བ་གཙིགས་པ། རྩ་བ་དང་གཡས་དང་གཡོན་གྱི་ཞལ་ནག་པོ་དང་དཀར་པོ་དང་དམར་པོ། ཕྱག་དྲུག་པ་གྲི་གུག་ཐོད་པར་ལྡན་པའི་གཡས་དང་ཅིག་ཤོས་ཀྱི་ཕྱག་གཉིས་ཀྱིས་རང་འོད་ཀྱི་ཤེས་རབ་མ་ལ་འཁྱུད་པ། གཡས་བ་གཉིས་ཀྱིས་རྡོ་རྗེ་དང་རལ་གྲི། གཡོན་པ་གཉིས་ན་འཁོར་ལོ་དང་པདྨ་འཛིན་པའོ། །འཇིག་རྟེན་གསུམ་ལས་རྣམ་པར་རྒྱལ་བ་བཞིན་དུ་མཐའ་ཡས་ལ་སོགས་པའི་ཀླུས་བརྒྱན་པའོ། །འདིའི་ཤར་དུ་རྣམ་པར་སྣང་མཛད་དཀར་པོ་སྟེ། རྩ་བ་དང་གཡས་དང་ཅིག་ཤོས་ཀྱི་ཞལ་དཀར་པོ་དང་ནག་པོ་དང་དམར་པོ་ཕྱག་གཡས་གཉིས་ན་འཁོར་ལོ་དང་རལ་གྲིའོ། །གཡོན་གྱི་ཕྱག་གཉིས་ན་རིན་པོ་ཆེ་དང་པདྨ་འཛིན་པའོ། །ལྷོ་ཕྱོགས་
སུ་རིན་ཆེན་འབྱུང་ལྡན་གསེར་བཙོ་མའི་མདོག་ལྟ་བུ་ཞལ་གསུམ་སེར་པོ་དང་སྔོན་པོ་དང༌། དཀར་པོ་གཡས་ཀྱི་ཕྱག་དག་ན་རིན་པོ་ཆེ་དང་རལ་གྲིའོ། །གཡོན་པ་དག་ན་འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་ཞལ་གསུམ་དམར་པོ་དང་ནག་པོ་དང་དཀར་པོའོ། །གཡས་པ་དག་ན་པདྨ་དང་རལ་གྲིའོ། །གཡོན་པ་དག་ན་ནོར་བུ་དང་འཁོར་ལོ་འཛིན་པའོ། །བྱང་ཕྱོགས་སུ་ཕྲག་དོག་གཤིན་རྗེ་གཤེད་ལྗང་གུ་ཞལ་གསུམ་ལྗང་གུ་དང་ནག་པོ་དང༌། དཀར་པོ་གཡས་པ་དག་ན་འཁོར་ལོ་དང་རལ་གྲི། གཡོན་པ་དག་ན་ནོར་བུ་དང་པདྨ་འཛིན་པའོ། །བཞི་ཆར་ཡང༌། ཁྲོ་བོ་འཁོར་ལོའི་བདག་པོའི་མཚན་ཉིད་ཅན་གཡས་པ་དང་ཅིག་ཤོས་ཀྱི་རྩ་བའི་ཕྱག་དག་གིས་གྲི་གུག་དང་ཐོད་པ་འཛིན་ཅིང་རང་དང་འདྲ་བའི་ཡུམ་ལ་འཁྱུད་པའོ། །མེའི་མཚམས་སུ་རྡོ་རྗེ་རྩ་རྩི་ཀ་མ་ནི་སྐེམ་ཞིང༌། གཟུགས་དང་ཕྱག་མཚན་རྣམས་ནི་གཏི་མུག་གཤིན་རྗེ་གཤེད་ལྟ་བུའོ། །བདེན་བྲལ་དུ་རྡོ་རྗེ་ཕག་མོ་ཕག་ཞལ་ཅན་མ་ཞེ་སྡང་གཤིན་རྗེ་གཤེད་ལྟ་བུའོ། །རླུང་དུ་རྡོ་རྗེ་དབྱངས་ཅན་མ་འདོད་ཆགས་གཤིན་རྗེ་གཤེད་ལྟ་བུའོ། །དབང་ལྡན་དུ་དཀར་པོ་ཕྲག་དོག་གཤིན་རྗེ་གཤེད་ལྟ་བུའོ། །འདིར་རྣམ་པར་སྣང་མཛད་ལ་སོགས་པ་ནི་སྣ་ཚོགས་རྡོ་རྗེའི་རའི་རྩ་བ་རྣམས་སུའོ། །རྡོ་རྗེའི་ར་མཚམས་རྣམས་སུ་རྡོ་རྗེ་ཙ་ཙི་ཀ་ལ་སོགས་པ་བཞི་ནི་རང་འོད་དང་འདྲ་བའི་ཐབས་དང་བཅས་པའོ། །ཤར་སྒོར་ཐོ་བ་གཤིན་རྗེ་གཤེད་ནག་པོ་ཞལ་གསུམ་ནི་ནག་པོ་དང་དཀར་པོ་དང་དམར་པོའོ། །གཡས་དག་གིས་རྡོ་རྗེ་ཐོ་བ་དང་རལ་གྲི། གཡོན་དག་གིས་ནོར་བུ་དང་པདྨ་འཛིན་པའོ། །ལྷོ་སྒོར་དབྱུག་པ་གཤིན་རྗེ་གཤེད་དཀར་པོ་ཞལ་གསུམ་དཀར་པོ་དང་སྔོན་པོ་དང་དམར་པོའོ། །གཡས་པ་དག་གིས་དབྱུག་པ་དང་རལ་གྲི། གཡོན་པ་དག་གིས་འཁོར་ལོ་དང་པདྨ་འཛིན་པའོ། །ནུབ་སྒོར་པདྨ་གཤིན་རྗེ་གཤེད་འདོད་ཆགས་གཤིན་རྗེ་གཤེད་ལྟ་བུའོ། །བྱང་སྒོར་རལ་གྲི་གཤིན་རྗེ་གཤེད་ཕྲག་དོག་གཤིན་རྗེ་གཤེད་ལྟ་བུ་ལ་ཅུང་ཟད་སྔོ་པའོ། །ཐམས་ཅད་ཀྱང་མ་རུངས་པ་འཇིགས་པ་གད་རྒྱངས་ཅན་དབུ་སྐྲ་དམར་སེར་འབར་བ་གྱེན་ལ་བརྫེས་ཤིང་མཆེ་བ་གཙིགས་པའི་ཞལ་ཅན་རྩ་བའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་ཅིང་རང་འོད་ཀྱི་
ཤེས་རབ་མ་ལ་འཁྱུད་པའོ། །འདིར་རྣམ་པར་སྣང་མཛད་དང་ལྷ་མོ་རྣམས་ནི་སྣ་ཚོགས་པདྨ་དང་ཟླ་བ་ལ་གནས་པའོ། །ལྷ་གཞན་རྣམས་ནི་སྣ་ཚོགས་པདྨ་དང་ཉི་མར་གནས་པའོ། །དཀྱིལ་འཁོར་གྱི་མེ་ལ་སོགས་པའི་མཚམས་བཞིར་སྣ་ཚོགས་པདྨ་ལ་གནས་པའི་ཐོད་པ་བཞི་ནི་བྱང་སེམས་དཀར་བ་དང་དམར་བ་དང་བདུད་རྩི་ལྔ་དང་སྒྲོན་མ་ལྔས་བཀང་བའོ། །གཤིན་རྗེ་གཤེད་ནག་པོའི་རིགས་ཀྱི་བདག་པོ་ནི་སྤྱི་བོར་མི་བསྐྱོད་པའི་བདག་ཉིད་དོ། །རྣམ་པར་སྣང་མཛད་ལ་སོགས་པ་བཞི་ཡང་དེ་བཞིན་ནོ། །དེ་རྣམས་ནི་གོ་རིམས་ཇི་ལྟ་བར་སྤྱན་མ་ལ་སོགས་པ་བཞི་དང་ཐོ་བ་གཤིན་རྗེ་གཤེད་ལ་སོགས་པ་རྣམས་ཀྱིའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཡཾ་ངོ༌། །ཨོཾ་ཧྲཱིཿ་ཥྚྀཿ་བི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་སྙིང་པོ་སྔགས་དང་ལས་ཐམས་ཅད་པའི་སྔགས་ཀྱང་འདིའོ།། །།རྡོ་རྗེ་སྒྲོལ་མའི་དཀྱིལ་འཁོར་ལ། །རྡོ་རྗེ་གུར་གྱི་ནང་དུ་ཆོས་འབྱུང་གི་དཀྱིལ་དུ་གཞལ་ཡས་ཁང་གི་ལྟེ་བ་ལ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཟླ་བ་ལ་བཅོམ་ལྡན་འདས་མ་རྡོ་རྗེ་སྒྲོལ་མ་གསེར་བ་ཙོམ་ལྟ་བུ་སངས་རྒྱས་ལྔའི་ཅོད་པན་རྩ་བ་དང་གཡས་པ་དང་རྒྱབ་དང་གཡོན་གྱི་ཞལ་བཞི་གསེར་མདོག་དང་དཀར་པོ་དང་སྔོན་པོ་དང། དམར་པོ་ཕྱག་བརྒྱད་མ་གཡས་ཀྱི་ཕྱག་རྣམས་ཀྱིས་རྡོ་རྗེ་དང་ཞགས་པ་དང་མདའ་དང་དུང་རྣམས་འཛིན་པའོ། །གཡོན་པ་རྣམས་ཀྱིས་ཨུཏྤལ་སེར་པོ་དང་གཞུ་དང་ལྕགས་ཀྱུ་དང་སྡིགས་མཛུབ་པོ། །ཤར་གྱི་འདབ་མར་མེ་ཏོག་སྒྲོལ་མ་དཀར་མོ་ནི་ཕྱག་གཉིས་ཀྱི་མེ་ཏོག་གི་ཕྲེང་བ་འཛིན་པ། ལྷོར་བདུག་སྦོས་སྒྲོལ་མ་ནག་མོ་ནི་ཕྱག་གཉིས་ཀྱིས་བདུག་སྤོས་འཛིན་པའོ། །ནུབ་ཏུ་མར་མེའི་སྒྲོལ་མ་སེར་མོ་ནི་ཕྱག་གཉིས་ཀྱིས་མར་མེའི་གོང་བུ་འཛིན་པའོ། །བྱང་དུ་དྲིའི་སྒྲོལ་མ་དམར་མོ་ནི་ཕྱག་གཉིས་ཀྱིས་དྲི་ཆབ་ཀྱི་དུང་འཕྱར་བའོ། །ལྷ་མོ་བཞི་པོ་འདི་རྣམས་ནི་ཟླ་བ་ལ་གནས་པའོ། །མེ་ལ་སོགས་པའི་འདབ་མ་རྣམས་ལ་རྣམ་པར་སྣང་མཛད་ལ་སོགས་པའི་མདོག་ལྟ་བུ་འཁོར་ལོ་དང་རྡོ་རྗེ་དང་པདྨ་དང་རལ་གྲིའོ། །རིམ་པ་གཉིས་པའི་ཤར་སྒོར་རྡོ་རྗེ་ལྕགས་ཀྱུ་མ་དཀར་མོ་ནི་གཡས་པ་ན་ལྕགས་ཀྱུ་འཛིན་པའོ། །ལྷོ་རུ་རྡོ་རྗེ་ཞགས་པ་མ་སེར་མོ་ནི་ཕྱག་
གཡས་པ་ཞགས་པ་འཛིན་པའོ། །ནུབ་ཏུ་རྡོ་རྗེ་ལྕགས་སྒྲོག་མ་དམར་མོ་ནི་ལྕགས་སྒྲོག་ལ་རྡོ་རྗེས་མཚན་པ་ཕྱག་གཡས་སུའོ། །བྱང་དུ་རྡོ་རྗེ་དྲིལ་བུ་མ་ལྗང་གུ་མ་ནི་ཕྱག་གཡས་པ་རྡོ་རྗེས་མཚན་པའི་དྲིལ་བུ་འཛིན་པའོ། །མེ་ལ་སོགས་པའི་མཚམས་སུ་གནས་པའི་སྣ་ཚོགས་པདྨ་རྣམས་ལ་སྤྱན་མ་ལ་སོགས་པ་རྣམ་པར་དག་པའི་བྱང་སེམས་ཀྱི་བུམ་པ་དང༌། རི་རབ་དང་མེ་ཐབ་དང་རྒྱལ་མཚན་ཆེན་པོའོ། །སྟེང་དུ་གཙུག་ཏོར་རྣམ་པར་རྒྱལ་མ་དཀར་མོ་ནི་འཁོར་ལོ་འཛིན་པའི་ཕྱག་གཡས་པའོ། །འོག་ཏུ་གནོད་མཛེས་མ་སྔོན་མོ་ནི་གཡས་པ་ཀླུའི་ཞགས་པ་འཛིན་པའོ། །ལྷ་མོ་དྲུག་པོ་འདི་རྣམས་ནི་ཕྱག་གཡོན་པ་སྡིགས་མཛུབ་དང་བཅས་པ་སྣ་ཚོགས་པདྨ་དང་ཉི་མར་གནས་པའོ། །བཅུ་པོ་འདི་རྣམས་ཀྱང་ཞལ་གཅིག་ཕྱག་གཉིས་པའོ། །བཅུ་གཅིག་པོ་རྣམས་ཀྱང་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་གསེར་གྱི་རྣ་ཆ་གཡོ་བས་བརྒྱན་པ་གོས་སྣ་ཚོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་པདྨ་རཱ་གའི་འོད་ཟེར་འཕྲོ་བའོ། །རྡོ་རྗེ་སྒྲོལ་མའི་རིགས་བདག་ནི་རིན་ཆེན་འབྱུང་ལྡན་ནོ། །མེ་ཏོག་སྒྲོལ་མ་ལ་སོགས་པ་ནི་རྣམ་པར་སྣང་མཛད་དང་མི་བསྐྱོད་པ་དང༌། སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཏེ་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱི་ཡང་ངོ༌། །གཙུག་ཏོར་རྣམ་པར་རྒྱལ་མའི་རིན་འབྱུང་ངོ༌། །གནོད་མཛེས་མའི་མི་བསྐྱོད་པའོ། །བཅོམ་ལྡན་འདས་མའི་སྙིང་གའི་ས་བོན་ནི་ཏཱཾ་ངོ༌། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་པ་ནི་སྙིང་བོའི་སྔགས་དང་ལས་ཐམས་ཅད་པའི་ཡང་སྔགས་སོ།། །།འོད་ཟེར་ཅན་མའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་གནས་པའི་ཆོས་འབྱུང་གི་ནང་དུ་གཞལ་ཡས་ཁང་ངོ༌། །ཁ་ཅིག་གི་ལུགས་ལ་ཆོས་འབྱུང་མེད་དོ། །རི་རབ་ཀྱི་སྟེང་དུ་གཞལ་ཡས་ཁང་ངོ་ཞེས་སོ། །གཞལ་ཡས་ཁང་གི་ལྟེ་བར་མཆོད་རྟེན་གྱི་ཕུག་གི་དཀྱིལ་དུ་སྣ་ཚོགས་པདྨ་ལ་གནས་པའི་ཟླ་བའམ་ཉི་མ་ལ་གཡས་བསྐུམ་པ་གཡོན་བརྐྱང་བས་གནས་པའི་བཅོམ་ལྡན་འདས་མ་འོད་ཟེར་ཅན་མ་སེར་མོ་རིན་པོ་ཆེ་སྣ་ཚོགས་ཀྱི་ཅོད་པན་ཅན་དབུ་སྐྲ་ལ་མཆོད་རྟེན་གྱིས་བརྒྱན་པ། རིན་པོ་ཆེ་རྣམ་པ་སྣ་ཚོགས་ཀྱི་རྒྱན་གྱིས་བརྒྱན་པ། ཞལ་གསུམ་པ་རྩ་བའི་ཞལ་སེར་པོ་
གཡས་དཀར་པོ་གཡོན་ཞལ་ནག་པོ་ཕག་པའི་ཞལ་ཁྲོས་པས་ཁྲོ་གཉེར་དང་ཟུར་མིག་དང་ལྡན་པ། ལྗགས་འདྲི་ལ་བ་འཇིགས་པར་བྱེད་མ་ཕྱག་དྲུག་མ་གཡས་པ་རྣམས་ཀྱིས་མདའ་དང་རྡོ་རྗེ་དང་ཁབ་འཛིན་པའོ། །གཡོན་པ་རྣམས་ཀྱིས་གཞུ་དང་སྐུད་པ་དང༌། མྱ་ངན་མེད་པའི་ཤིང་མེ་ཏོག་དང་བཅས་པའི་ཡལ་ག་འཛིན་པའོ། །སྨད་གོས་སྔོན་པོ་གྱོན་པ་སྟོད་གཡོགས་རྣམ་པར་བཀྲ་བའི་གོས་སྔོན་པོ་ཅན། གསེར་མདོག་ལྟ་བུའི་ཕག་པའི་གདན་ལ་བཞུགས་པ་རང་གི་མདོག་ལྟ་བུའི་ཕག་པས་ཡོངས་སུ་བསྐོར་བ། མྱ་ངན་མེད་པའི་མེ་ཏོག་གི་ཕྲེད་བ་དབུ་ལ་བརྒྱན་པ། ཤར་ཕྱོགས་སུ་ཨརྐ་མ་སཱེ་ཞེས་བྱ་བ་མེ་ཏོག་བནྡུ་ཀའི་མདོག་ལྟ་བུ་ཁབ་དང་སྐུད་པ་འཛིན་པ། གཡས་གཡོན་གྱི་ཕྱག་གོ །ལྷོ་རུ་མ་རྐ་མ་སཱི་ཞེས་བྱ་བའི་ལྷ་མོ་གསེར་གྱི་མདོག་ལྟ་བུའི་གཡས་པས་སྐུད་པ་དང་བཅས་པའི་ཁབ་དང༌། གཡོན་པས་མྱ་ངན་མེད་པའི་ཤིང་གི་ཡལ་ག་འཛིན་པའོ། །ནུབ་ཏུ་ཨནྟ་ར་དྷྭཾ་ན་མ་སཱི་སེར་མོ་ནི་གཡས་པ་མྱ་ངན་མེད་པའི་ཡལ་ག་གཡོན་པ་སྡིགས་མཛུབ་དང་བཅས་པའི་ཞགས་པ་འཛིན་པའོ། །བྱང་དུ་ནི་ར་མ་སཱི་ཞེས་བྱ་བ་སྐུ་མདོག་དམར་མོ་ཕྱག་གཉིས་ཀྱིས་གཞུ་དང་མདའ་འཛིན་པའོ། །མེའི་མཚམས་ལ་སོགས་པར་ཨུ་ད་ཡ་མ་སཱི་དང༌། གུལྨ་མ་སཱི་དང༌། བ་ན་མ་སཱི་དང༌། ཙཱི་བ་ར་མ་སཱི་རྣམས་རིམ་པ་ཇི་ལྟ་བ་བཞིན་དུ་ཨརྐ་མ་སཱི་ལ་སོགས་པའི་མདོག་དང་ཕྱག་མཚན་བཞིན་ནོ། །རིམ་པ་གཉིས་པའི་ཤར་གྱི་སྣམ་བུ་ལ་མ་ཧཱ་ཙཱི་བར་མ་སཱི་དང༌། བ་རཱ་ཧ་མུ་ཁི་ནི་ནག་མོ་མཆེ་བ་གཙིགས་པ་འཇིགས་སུ་རུང་བ། གཡས་བ་རྡོ་རྗེ་ལྕགས་ཀྱུ་དང་གཡོན་པས་རྡོ་རྗེ་ཞགས་པ་འཛིན་པའོ། །ལྷོ་རུ་པ་དཱ་ཀྲ་མ་སཱི་དང་བ་རཱ་ལི་སེར་མོ་ནི་གཡས་པས་མྱ་ངན་མེད་པའི་ཡལ་ག་དང་གཡོན་པས་རྡོ་རྗེ་འཛིན་པའོ། །ནུབ་ཏུ་པ་ར་ཀྲ་མ་སཱི་དང་བི་ད་ལི་དམར་མོ་ནི་གཡས་པ་དང་གཡོན་མདའ་དང་གཞུ་འཛིན་པའོ། །བྱང་དུ་ཨཱུར་མ་སཱི་དང༌། བ་རཱ་ལི་ལྗང་གུ་ཁབ་དང་སྐུད་པ་འཛིན་པ། གཡས་པ་དང་གཡོན་གྱི་ཕྱག་གོ །མེའི་མཚམས་སུ་བ་ཏཱ་ལི་དམར་མོ་གཡས་གཡོན་གྱི་ཕྱག་གཉིས་ཀྱིས་ཁབ་དང་སྐུད་པ་འཛིན་པའོ། །བདེན་བྲལ་དུ་བ་ཧཱ་ལི་སེར་མོ་ནི་
གཡས་པ་སྐུད་པ་དང་བཅས་པའི་ཁབ་དང་གཡོན་པས་ཡལ་འདབ་དང་བཅས་པའི་མྱ་ངན་མེད་པའི་མེ་ཏོག་གི་ཆུན་པོ་འཛིན་པའོ། །རླུང་དུ་བ་རཱ་ལི་སྐུ་མདོག་དཀར་མོ་གཡས་པ་དང་གཡོན་པ་གཉིས་ཀྱིས་མྱ་ངན་མེད་པའི་ཡལ་ག་དང་ཞགས་པ་འཛིན་པའོ། །དབང་ལྡན་དུ་བཱ་རཱ་ཧ་མུ་ཁི་དམར་མོ་ནི་ཕྱག་གཉིས་ཀྱིས་མདའ་དང་གཞུ་འཛིན་པའོ། །ཤར་ལ་སོགས་པའི་སྒོར་ཨཱ་ལོ་དང་ཏཱ་ལོ་དང་ཀཱ་ལོ་དང་ས་ཙྪ་ལོ་སམྤ་ཏ་མུརྡྷི་ཊཱི་རྣམས་ནི་རིམ་པ་ཇི་ལྟ་བ་བཞིན་དུ་དཀར་པོ་དང་སེར་པོ་དང་དམར་པོ་དང་ལྗང་གུ་ཕྱག་གཉིས་མ་རྡོ་རྗེ་ལྕགས་ཀྱུ་དང་ཞགས་པ་དང་ལྕགས་སྒྲོག་དང༌། དྲིལ་བུ་འཛིན་པའོ། །ཨརྐ་མ་སཱི་ལ་སོགས་པའི་ལྷ་མོ་ཉི་ཤུ་རྩ་བཞི་པོ་འདི་རྣམས་ནི་མངོན་པར་གསར་དུ་བྱུང་བའི་ལང་ཚོ་ཅན་མཆོད་རྟེན་གྱིས་དབུ་ལ་བརྒྱན་པ་རིན་པོ་ཆེ་སྣ་ཚོགས་ཀྱིས་བརྒྱན་པ། སྣ་ཚོགས་པའི་གོས་སྔོན་པོས་སྟོད་གཡོགས་བྱས་པ་ཕག་ཞལ་གཅིག་མ་ཕྱག་གཉིས་པ་སྤྱན་གསུམ་པ་གསེར་མདོག་ལྟ་བུའི་ཕག་པའི་ཚོགས་ཀྱིས་བསྐོར་བ་དང་ལྡན་པ་གསེར་མདོག་ལྟ་བུའི་ཕག་པ་ལ་ཆིབས་པའོ། །སྒོ་སྐྱོང་མ་རྣམས་ནི་སྣ་ཚོགས་པདྨ་དང་ཉི་མ་ལ་གཡོན་བསྐུམ་པ་གཡས་བརྐྱང་བས་གནས་པའོ། །གཞན་ཉི་ཤུ་པོ་ནི་སྣ་ཚོགས་པདྨ་དང་ཟླ་བ་ལ་གཡས་བསྐུམ་གཡོན་བརྐྱང་བས་གནས་པའོ། །འོད་ཟེར་ཅན་མའི་རིགས་བདག་བརྟག་པའོ། །ཤར་ལ་སོགས་པའི་ཕྱོགས་ལ་གནས་པ་རྣམས་ཀྱི་མི་བསྐྱོད་པ་དང་རིན་ཆེན་འབྱུང་ལྡན་དང༌། སྣང་བ་མཐའ་ཡས་དང་དོན་ཡོད་གྲུབ་པ་རྣམས་སོ། །མེ་ལ་སོགས་པའི་ཕྱོགས་བྲལ་རྣམས་སུ་ཡང་དེ་བཞིན་ནོ་ཁ་ཅིག་གོ ། ཡང་ན་དཀར་པོ་རྣམས་ལ་རྣམ་སྣང་ནག་པོ་རྣམས་ལ་མི་བསྐྱོད་པ། སེར་པོ་རྣམས་ལ་རིན་ཆེན་འབྱུང་ལྡན། དམར་པོ་རྣམས་ལ་སྣང་མཐའ་ལྗང་གུ་རྣམས་ལ་དོན་ཡོད་གྲུབ་བའོ་ཞེས་པ་ནི་གཞན་ནོ། །འོད་ཟེར་ཅན་གྱི་སྙིང་གའི་ས་བོན་ནི་མཱཾ་ངོ༌། །ཨོཾ་མཱ་རཱི་ཙྱཻ་སྭཱ་ཧཱ། ཞེས་པ་ནི་སྙིང་པོའི་སྔགས་སོ། །ཨོཾ་མཱ་རཱི་ཙྱཻ་ཧཱུཾ་སརྦ་བིགྷྣཱཾ་ཨུཚ་དྷ་ཡ་ཧཱུཾ་ཕཊ་སྭཱ་ཧཱ། ཞེས་པ་ནི་ལས་ཐམས་ཅད་པའི་སྔགས་སོ།། །།བསྲུང་བ་ལྔའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་དུ་གཞལ་ཡས་ཁང་གི་དབུས་སུ་སྣ་ཚོགས་རྡོ་རྗེའི་ལྟེ་བར་གནས་པའི་སྣ་ཚོགས་པདྨ་དང་ཟླ་བ་ལ་བཅོམ་
ལྡན་འདས་མ་སོ་སོར་འབྲང་མ་ཆེན་མོ་ནི་འོད་ཟེར་དམར་པོའི་དཀྱིལ་འཁོར་ཅན་ཞལ་བཞི་པ་ཕྱག་བཅུ་གཉིས་པ་རྩ་བའི་ཞལ་སེར་པོ་གཡས་དཀར་པོ་ནུབ་སྔོན་པོ་གཡོན་དམར་པོའོ། །གཡས་པ་རྣམས་ཀྱིས་རིན་པོ་ཆེའི་པ་ཏྲ་དང་འཁོར་ལོ་དང་རྡོ་རྗེ་དང་མདའ་དང་རལ་གྲི་དང༌། མཆོག་སྦྱིན་གྱི་ཕྱག་རྒྱའོ། །གཡོན་པ་རྣམས་ཀྱིས་རྡོ་རྗེ་དང་ཞགས་པ་དང་རྩེ་གསུམ་པ་དང༌། གཞུ་དང་དགྲ་སྟ་དང་དུང་རྣམས་འཛིན་པའོ། །དབུལ་མཆོད་རྟེན་གྱིས་བརྒྱན་པ་རྡོ་རྗེའི་སྐྱིལ་ཀྲུང་ཅན་མའོ། །དེའི་ཤར་ཕྱོགས་སུ་སྟོང་ཆེན་མོ་རབ་ཏུ་འཇོམས་མ་ནི་སྣ་ཚོགས་པདྨ་དང་ཟླ་བ་ལ་རོལ་པའི་ཀུན་ནས་བསྐྱོད་པས་བཞུགས་པ་སྐུ་མདོག་དཀར་པོ་ཟླ་བའི་འོད་ཀྱི་དཀྱིལ་འཁོར་ཅན་ཞལ་བཞི་མ་རྩ་བའི་ཞལ་དཀར་པོ་གཡས་སྔོན་པོ་རྒྱབ་སེར་པོ་གཡོན་པ་ལྗང་གུའོ། །དེའི་གཡས་པ་རྣམས་ཀྱིས་པདྨ་ལ་གནས་པའི་འཁོར་ལོ་རྩིབས་བརྒྱད་པ་དང་མཆོག་སྦྱིན་པ་དང་ལྕགས་ཀྱུ་དང་མདའ་དང་རལ་གྲི་རྣམས་སོ། །གཡོན་པ་རྣམས་ཀྱིས་རྡོ་རྗེ་དང་སྡིགས་མཛུབ་དང༌། ཞགས་པ་དང་གཞུ་དང་དགྲ་སྟ་རྣམས་སོ་ཞེས་བྱ་བའི་ཕྱག་བཅུའོ། །ལྷོ་རུ་སྣ་ཚོགས་པདྨ་དང་ཉི་མར་གནས་པའི་ཉི་མའི་འོད་ཅན་གྱི་གསང་སྔགས་རྗེས་སུ་འཛིན་མ་ཆེན་མོ་ནི་རྡོ་རྗེ་སྐྱིལ་ཀྲུང་ཅན་མ་ནག་མོ་ནག་མོ་དང་དཀར་པོ་དང་དམར་པོ་ནི་རྩ་བ་དང་གཡས་པ་དང་གཡོན་པའི་ཞལ་ལོ། །ཕྱག་བཅུ་གཉིས་པ་གཡས་པ་དང་གཡོན་པའི་ཕྱག་གཉིས་ཀྱིས་ཆོས་འཆད་ཀྱི་ཕྱག་རྒྱ་འཛིན་པ། གཞན་རྣམ་པ་གཉིས་ཀྱིས་བསམ་གཏན་གྱི་ཕྱག་རྒྱའོ། །གཡས་པའི་གཞན་རྣམས་ཀྱིས་རྡོ་རྗེ་དང་མདའ་དང༌། མཆོག་སྦྱིན་དང་མི་འཇིགས་པའི་ཕྱག་རྒྱའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང༌། གཞུ་དང་རིན་པོ་ཆེའི་པ་ཏྲ་དང་པདྨས་མཚན་པའི་བུམ་པ་འཛིན་པའོ། །ནུབ་ཏུ་སྣ་ཚོགས་པདྨ་དང་ཉི་མ་ལ་སྐྱིལ་ཀྲུང་ཕྱེད་པས་བཞུགས་པ། ཉི་མའི་འོད་ཅན་གྱི་བསིལ་བའི་ཚལ་ཆེན་པོ་ནི་དམར་མོ་དམར་པོ་དང་དཀར་པོ་དང་ནག་པོ་དང་རྩ་བ་དང་གཡས་པ་དང་གཡོན་པའི་ཞལ་ལོ། །ཕྱག་བརྒྱད་པའི་གཡས་རྣམས་ཀྱིས་པདྨ་དང་བཅས་པའི་མི་འཇིགས་པའི་ཕྱག་རྒྱ་དང་
མདའ་དང་རྡོ་རྗེ་དང་རལ་གྲིའོ། །གཡོན་བ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང༌། རིན་པོ་ཆེའི་རྒྱལ་མཚན་དང་སྙིང་གར་གནས་པའི་པོ་ཏི་འཛིན་པའོ། །བྱང་དུ་སྣ་ཚོགས་པདྨ་དང་ཟླ་བ་ལ་ཟླ་བའི་འོད་ཅན་སེམས་དཔའི་སྐྱིལ་ཀྲུང་ཅན། རྨ་བྱ་ཆེན་མོ་ལྗང་གུ་ནི་ལྗང་གུ་དང་ནག་པོ་དང་དཀར་པོ་ནི་རྩ་བ་དང་གཡས་དང་གཡོན་གྱི་ཞལ་ལོ། །ཕྱག་བརྒྱད་མ་གཡས་པ་རྣམས་ཀྱིས་རྨ་བྱའི་གཞུག་སྒྲོ་དང་མདའ་དང་མཆོག་སྦྱིན་དང་རལ་གྲིའོ། །གཡོན་པ་རྣམས་ཀྱིས་ལྷུང་བཟེད་ལ་གནས་པའི་དགེ་སློང་དང་གཞུ་དང་པང་དུ་གནས་པའི་བུམ་པ་རིན་པོ་ཆེ་འབར་བ་འབབ་པ་ཅན་དང༌། སྣ་ཚོགས་རྡོ་རྗེ་ལ་རིན་པོ་ཆེས་མཚན་པའི་རྒྱལ་མཚན་འཛིན་པའོ། །རིམ་པ་གཉིས་པ་ལ་མེའི་མཚམས་སུ་ནག་པོ་ནི་ཕྱག་གཉིས་ཀྱིས་དུང་འཛིན་པའོ། །བདེན་བྲལ་དུ་དུས་མཚན་མ་སེར་མོ་ཕྱག་གཉིས་ཀྱིས་རྡོ་རྗེས་མཚན་པའི་རྒྱལ་མཚན་འཛིན་པའོ། །རླུང་གི་མཚམས་སུ་རྣ་བ་ནག་མོ་དམར་མོ་ཕྱག་གཉིས་ཀྱིས་དགྲ་སྟ་འཛིན་པའོ། །དབང་ལྡན་གྱི་མཚམས་སུ་དཀར་མོ་སྐུ་མདོག་དཀར་མོ་ཕྱག་གཉིས་ཀྱིས་རྩེ་གསུམ་པ་འཛིན་པའོ། །བཞི་པོ་འདི་རྣམས་ནི་ཞལ་གཅིག་ཕྱག་གཉིས་པའོ། །དགུ་པོ་འདི་དག་ནི་རཏྣ་སྣ་ཚོགས་ཀྱི་རྒྱན་དང་གོས་དང་རིན་པོ་ཆེའི་ཅོད་པན་ཅན། ཞལ་རེ་རེ་ལ་སྤྱན་གསུམ་གསུམ་པ་རིམ་པ་ཇི་ལྟ་བ་བཞིན་དུ་རིན་ཆེན་འབྱུང་ལྡན་དང༌། རྣམ་པར་སྣང་མཛད་དང༌། མི་བསྐྱོད་པ་དང༌། སྣང་བ་མཐའ་ཡས་དང༌། དོན་ཡོད་གྲུབ་པ་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་དང། རྣམ་པར་སྣང་མཛད་ཀྱིས་རྒྱས་བཏབ་པའོ། །ཤར་ལ་སོགས་པའི་སྒོར་སྣ་ཚོགས་པདྨ་དང་ཉི་མ་ལ་རྡོ་རྗེ་ལྕགས་ཀྱུ་མ་དང༌། རྡོ་རྗེ་ཞགས་པ་མ་དང༌། རྡོ་རྗེ་ལྕགས་སྒྲོག་མ་དང༌། རྡོ་རྗེ་དྲིལ་བུ་མ་རྣམས་ཀྱི་ཡང་སྔར་བཞིན་ནོ། །སོ་སོར་འབྲང་མ་ལ་སོགས་པ་རྣམས་ཀྱིས་བོན་ནི་བྲམ་ངོ༌། །ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་ཅེས་བྱ་བ་ནི་སྙིང་པོའོ། །ས་བོན་ནི་བྲུཾ་མོ། །ཨོཾ་ཨཱཿ་མ་ཧཱ་ས་ཧཱ་སྲ་པྲ་མ་རྡ་ནི་བྲཱུཾ་ཧཱུཾ་སྙིང་པོའོ། །ས་བོན་ཧཱུཾ་ངོ༌། །ཨོཾ་ཨཱཿ་མ་ཧཱ་མནྟྲ་ཨ་ནུ་སཱ་རི་ནི་ཧཱུཾ་ཧཱུཾ་སྙིང་པོའོ། །ས་བོན་ནི་ཛྲཱིཾ་ངོ༌། ཨོཾ་ཨཱཿ་མ་ཧཱ་ཤི་ཏ་བ་ཏི་བཛྲི་ཧཱུཾ་སྙིང་པོའོ། །ས་བོན་ནི་མཾ་ངོ༌། །ཨོཾ་མ་ཧཱ་
མཱ་ཡཱུ་ར་བིདྱ་རཱ་ཛྙཱ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་སྙིང་པོའོ། །དགོས་བའི་དབང་གིས་འདི་རྣམས་གང་ཡང་རུང་བས་འཁོར་ལོའི་དབང་ཕྱུག་མ་བྱའོ། །དཀྱིལ་འཁོར་གྱི་དབང་ཕྱུག་མའི་སྙིང་པོའི་སྔགས་ཀྱིས་ནི་ལས་ཐམས་ཅད་པའི་སྔགས་ཀྱང་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་གླིང་དང་ཉེ་བའི་གླིང་ཕྲན་དང་རྒྱ་མཚོ་དང་རི་བདུན་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྟེང་གཞལ་ཡས་ཁང་སྟེ་དེའི་དབུས་སུ་སེང་གེའི་སྟེང་དུ་སྣ་ཚོགས་པདྨའི་ཟེ་འབྲུ་ལ་བཅོམ་ལྡན་འདས་རྣམ་པར་སྣང་མཛད་དཀར་པོ་རྡོ་རྗེ་སྐྱིལ་ཀྲུང་གིས་གནས་པ་ཉི་མའི་འོད་ཅན། སངས་རྒྱས་ལྔས་སྦྲས་པའི་རཏྣའི་ཅོད་པན་གྱིས་བརྒྱན་པའི་རལ་པའི་ཐོར་ཅོག་ཅན་རཏྣ་སྣ་ཚོགས་པའི་རྒྱན་དང་གོས་དང་ལྡན་པ་ཞི་བའི་ཞལ་བཞི་དཀར་པོ་དང་སེར་པོ་དང་དམར་པོ་དང་ལྗང་གུ་དང༌། ཕྱག་བརྒྱད་པ་གཡས་པ་དང་གཡོན་པ་གཉིས་ཀྱིས་རྡོ་རྗེ་དང་བཅས་པའི་བྱང་ཆུབ་མཆོག་གི་ཕྱག་རྒྱ་མཛད་པའོ། །གཞན་གཉིས་ཀྱིས་བསམ་གཏན་གྱི་ཕྱག་རྒྱ་འཛིན་པའོ། །གཡས་པ་གཉིས་ཀྱིས་བགྲང་ཕྲེང་དང་མདའ་འཛིན་པའོ། །གཡོན་པ་གཉིས་ཀྱིས་འཁོར་ལོ་དང་གཞུ་འཛིན་པའོ། །ཡང་ན་འདི་ནི་ཞལ་གཅིག་ཕྱག་གཉིས་པ་སྐུ་མདོག་དཀར་པོ་རྡོ་རྗེ་དང་བཅས་པའི་བྱང་ཆུབ་མཆོག་གི་ཕྱག་རྒྱ་འཛིན་པའོ། །གཡོན་པའི་རྡོ་རྗེའི་ཁུ་ཚུར་གྱི་མཛུབ་མོ་ལངས་པ་ལ་གཡས་པ་རྡོ་རྗེ་ཁུ་ཚུར་གྱིས་བཟུང་བ་བྱང་ཆུབ་མཆོག་གི་ཕྱག་རྒྱའོ། །ཤར་གྱི་འདབ་མ་ལ་སེམས་མ་རྡོ་རྗེ་མ་སྔོན་མོ་གཡས་པས་རྡོ་རྗེ་རྩེ་ལྔ་པ་དམར་པོ་འཛིན་པ་གཡོན་པས་སྡིགས་མཛུབ་དང་བཅས་པ་ཞགས་པ་འཛིན་པའོ། །ལྷོར་རིན་ཆེན་རྡོ་རྗེ་མ་སེར་མོ་གཡས་པས་རྡོ་རྗེ་རྩེ་ལྔ་པས་མཚན་པའི་རིན་པོ་ཆེ་འཛིན་པ། གཡོན་པས་སྡིག་པར་བྱེད་པའི་སྡིགས་མཛུབ་པོ། །ནུབ་ཏུ་ཆོས་ཀྱི་རྡོ་རྗེ་མ་དམར་མོ་ནི་རྡོ་རྗེ་རྩེ་ལྔ་པས་མཚན་པའི་པདྨ་འདབ་མ་བརྒྱད་པ་དཀར་དམར་གཡས་པས་འཛིན་པ། གཡོན་པས་པདྨ་འཛིན་པའོ། །བྱང་དུ་ལས་ཀྱི་རྡོ་རྗེ་མ་ལྗང་གུ་གཡས་པ་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་དེ་བཞིན་གཤེགས་པ་ལྔའི་ཁ་དོག་ཅན་འཛིན་པ། གཡོན་པས་སྡིགས་མཛུབ་སྡིགས་པར་བྱེད་པའོ། །དེ་ནས་ཤར་ཕྱོགས་
སུ་གླང་པོ་ཆེའི་དབང་པོའི་སྟེང་དུ་སྣ་ཚོགས་པདྨའི་ལྟེ་བར་མི་བསྐྱོད་པ་སྔོན་པོ་རྡོ་རྗེ་སྐྱིལ་ཀྲུང་གིས་གནས་པ། ཕྱག་གཡས་པ་གུང་མོས་རྡོ་རྗེ་རྩེ་ལྔ་པ་སྔོན་པོ་བཟུང་ནས་ས་གནོན་གྱི་ཚུལ་བྱེད་ཅིང་ཕྱག་གཡོན་པ་གན་རྐྱལ་དུ་པང་དུ་བཞག་པའོ། །ཤར་གྱི་འདབ་མར་རྡོ་རྗེ་སེམས་དཔའ་དཀར་པོ་ཕྱག་གཡས་པའི་གུང་མོས་སྙིང་གར་འགྱིང་བའི་ཚུལ་གྱིས་རྡོ་རྗེ་གསོར་བའི་སྦྱོར་བའོ། །གཡོན་པའི་རྡོ་རྗེ་ཁུ་ཚུར་གྱིས་ང་རྒྱལ་དང་བཅས་པའི་དྲིལ་བུ་དཀུར་བརྟེན་པའོ། །ལྷོར་རྡོ་རྗེ་རྒྱལ་པོ་སེར་པོ་གཡས་པར་གནས་པའི་རྡོ་རྗེ་ལྕགས་ཀྱུས་འགུགས་པའི་ཚུལ་བྱེད་ཅིང་ཕྱག་གཡོན་པས་ཞགས་པ་འཛིན་པའོ། །ཁ་ཅིག་ནི་ཕྱག་གཉིས་ཀྱིས་རྡོ་རྗེ་ལྕགས་ཀྱུ་འཛིན་པས་འགུགས་པའི་ཚུལ་བྱེད་པའོ་ཞེས་སོ། །བྱང་དུ་རྡོ་རྗེ་ཆགས་པ་དམར་པོ་ཕྱག་གཡོན་དང་ཅིག་ཤོས་རྣམ་པ་གཉིས་ཀྱིས་གཞུ་དང་མདའ་འཛིན་པའོ། །ནུབ་ཏུ་རྡོ་རྗེ་ལེགས་པ་མརྒད་ཀྱི་མདོག་ལྟ་བུ་རྡོ་རྗེ་དང་བཅས་པའི་ཕྱག་གཉིས་ཀྱིས་སྙིང་གར་ལེགས་སོ་སྦྱིན་པའི་ཚུལ་བྱེད་པའོ། །ལྷོར་རྟའི་རྒྱབ་ཏུ་སྣ་ཚོགས་པདྨའི་ལྟེ་བར་རིན་ཆེན་འབྱུང་ལྡན་སེར་པོ་རྡོ་རྗེ་སྐྱིལ་ཀྲུང་གིས་བཞུགས་པ། གཡས་པས་རྡོ་རྗེས་མཚན་པའི་རིན་པོ་ཆེ་གུང་མོས་བཟུང་སྟེ་མཆོད་སྦྱིན་གྱི་ཚུལ་བྱེད་པ། གཡོན་པ་མཉམ་བཞག་གོ །ཤར་གྱི་འདབ་མར་རྡོ་རྗེ་རིན་ཆེན་སེར་པོ་ནི་གཡས་པའི་རྡོ་རྗེ་ཁུ་ཚུར་གྱི་མཐའ་གཉིས་ལ་རྡོ་རྗེ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་རང་གི་དབང་བསྐུར་བའི་གནས་སུ་འཆིང་བར་བྱེད་ཅིང་གཡོན་པས་རྡོ་རྗེ་དྲིལ་བུ་སྙེམས་པ་དང་བཅས་པས་དཀུར་བརྟེན་པའོ། །ལྷོ་རུ་རྡོ་རྗེ་གཟི་བརྗིད་དམར་པོ་སྙིང་གར་ཕྱག་གཉིས་ཀྱིས་འཛིན་པའི་ཉི་མས་གསལ་བར་བྱེད་པའོ། །བྱང་དུ་རྡོ་རྗེ་ཏོག་ལྗང་གུ་གཡོན་གྱི་བར་དུ་ལྷུར་གནས་པའི་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་ཅིང་འཕྱར་བའོ། །ནུབ་ཏུ་རྡོ་རྗེ་བཞད་པ་དཀར་བོ་གཡས་པས་སོའི་ཕྲེང་བ་དང་ལྡན་པའི་རྡོ་རྗེ་འཛིན་པ། གཡོན་པས་ཀྱང་དེ་བཞིན་ཏེ་སོའི་ཕྲེང་བ་དང་ལྡན་པའི་རྡོ་རྗེ་གཉིས་ཁར་བཞག་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་པདྨའི་ཟེ་འབྲུ་ལ་སྣང་བ་མཐའ་ཡས་རྡོ་རྗེ་སྐྱིལ་ཀྲུང་ཅན་དམར་པོ་ཕྱག་གཡོན་པ་དང་ཅིག་ཤོས་གན་རྒྱལ་དུ་བྱས་
པ་ཕང་པའི་སྟེང་དུ་བཞག་པ་ཏིང་ངེ་འཛིན་གྱི་ཕྱག་རྒྱའི་གཡས་པའི་གུང་མོས་རྡོ་རྗེས་མཚན་པའི་པདྨ་འཛིན་པའོ། །ཤར་གྱི་འདབ་མར་རྡོ་རྗེ་ཆོས་དམར་སྐྱ་གཡོན་པ་འགྱིང་བའི་ཚུལ་དང་བཅས་པས་པདྨའི་ཡུ་བ་འཛིན་ཅིང་གཡས་པས་ཁ་འབྱེད་པའོ། །ལྷོ་རུ་རྡོ་རྗེ་རྣོན་པོ་ནམ་མཁའ་ལྟ་བུ་སྔོན་པོ་གཡོན་པས་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་ལུ་སྟི་འཛིན་པ་གཡས་པས་རལ་གྲི་འཕྱར་བའི་ཚུལ་དུ་འཛིན་པའོ། །བྱང་དུ་རྡོ་རྗེ་རྒྱུ་གསེར་བཙོ་མའི་མདོག་ཅན་གཡོན་པར་གནས་པའི་འཁོར་ལོ་རྩིབས་བརྒྱད་པ་གཡས་བའི་གུང་མོ་མགལ་མེ་ལྟ་བུ་བསྐོར་ཞིང་ཆོས་ཀྱི་འཁོར་ལོའི་ཕྱག་རྒྱ་འཛིན་པའོ། །ནུབ་ཏུ་རྡོ་རྗེ་སྨྲ་བ་དམར་པོ་གཡོན་པ་ཆོས་ཀྱི་དུང་དང་གཡས་པས་རྡོ་རྗེ་རྩེ་གཅིག་པའི་ལྕེ་འཛིན་པའོ། །བྱང་དུ་ཁྱུང་གི་སྟེང་དུ་སྣ་ཚོགས་པདྨའི་ལྟེ་བར་དོན་ཡོད་གྲུབ་པ་ལྗང་གུ་རྡོ་རྗེ་སྐྱིལ་ཀྲུང་གིས་བཞུགས་པ། ཕྱག་གཡས་པའི་གུང་མོས་སྣ་ཚོགས་རྡོ་རྗེ་འཛིན་པས་མི་འཇིགས་པ་སྦྱིན་པའི་ཚུལ་བྱེད་ཅིང་གཡོན་པ་གན་རྐྱལ་དུ་པང་པར་བཞག་པའོ། །ཤར་གྱི་འདབ་མར་རྡོ་རྗེ་ལས་ལྗང་གུ་གཡས་པས་སྙིང་གར་བསླང་བའི་སྦྱོར་བས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་འཛིན་པ། གཡོན་པ་སྣ་ཚོགས་རྡོ་རྗེས་མཚན་པའི་དྲིལ་བུ་དཀུར་བརྟེན་པ། ཡང་ན་ལག་པ་གཉིས་ཀྱིས་ཐལ་མོ་སྤྱི་བོར་སྦྱར་ནས་སྣ་ཚོགས་རྡོ་རྗེ་སྤྱི་བོར་འཛིན་པའོ། །ལྷོར་རྡོ་རྗེ་བསྲུང་བ་སེར་པོ་ཕྱག་གཉིས་ཀྱི་རྡོ་རྗེའི་གོ་ཆ་འཛིན་པའོ། །བྱང་དུ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཐེ་ཆུང་གཉིས་ཀྱི་རྡོ་རྗེ་མཆེ་བའི་མཚོན་གྱི་རྩེ་མོ་གཉིས་རང་གི་ཁར་བཅུག་པས་གདུག་པ་རྣམས་སྡིགས་པར་བྱེད་པའོ། །ནུབ་ཏུ་རྡོ་རྗེ་ཁུ་ཚུར་སེར་པོ་ཁུ་ཚུར་གྱི་མཚམས་སུ་རྡོ་རྗེ་སྟེ། རྡོ་རྗེ་ཁུ་ཚུར་དག་གིས་བཟུང་བའི་རྡོ་རྗེ་རྩེ་ལྔ་པ་བསྡམས་པའོ། །དབུས་ཀྱི་གཞལ་ཡས་ཁང་གི་མེའི་པདྨ་རྡོ་རྗེ་སྒེག་མོ་དཀར་མོ་རྡོ་རྗེ་དཀུར་བརྟེན་པའི་ཕྱག་རྒྱའི་ཕྱག་གཉིས་ཀྱིས་རྡོ་རྗེ་གཉིས་འཛིན་པའོ། །བདེན་བྲལ་དུ་པདྨ་ལ་ཕྲེང་བ་མ་སེར་མོ་ཕྱག་གཉིས་ཀྱིས་རཏྣའི་ཕྲེང་བ་འཛིན་པའོ། །རླུང་དུ་པདྨ་ལ་གླུ་མ་དམར་མོ་ཕྱག་གཉིས་ཀྱིས་པི་ཝང་གི་རྒྱུད་སྦྲེང་བའོ། །དབང་ལྡན་དུ་པདྨ་ལ་གར་མ་ལྗང་གུ་རྡོ་རྗེ་རྩེ་གསུམ་པ་གཉིས་བཟུང་
ནས་ཕྱག་གཉིས་ཀྱིས་གར་བྱེད་པའོ། །དབུས་ཀྱི་གཞལ་ཡས་ཁང་གི་ཕྱི་རུ་སྣམ་བུ་ལ་ཤར་དུ་པདྨ་རྣམས་ལ་བྱམས་པ་དང་མཐོང་བ་དོན་ཡོད་དང་ངན་སོང་ཀུན་འདྲེན་དང༌། མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་རྣམས་ནི་མི་བསྐྱོད་བ་ལྟ་བུའོ། །ལྷོར་པདྨ་རྣམས་ལ་སྦོས་ཀྱི་གླང་པོ་དང༌། དཔའ་བར་འགྲོ་བ་དང༌། ནམ་མཁའ་མཛོད་དང༌། ཡེ་ཤེས་ཏོག་རྣམས་ནི་རིན་ཆེན་འབྱུང་ལྡན་ལྟ་བུའོ། །ནུབ་ཏུ་པདྨ་རྣམས་ལ་འོད་དཔག་མེད་དང༌། ཟླ་བའི་འོད་དང་བཟང་སྐྱོང་དང་དྲ་བ་ཅན་གྱི་འོད་རྣམས་ནི་འོད་དཔག་མེད་ལྟ་བུའོ། །བྱང་དུ་པདྨ་རྣམས་ལ་རྡོ་རྗེ་སྙིང་པོ་དང༌། བློ་གྲོས་མི་བཟད་པ་དང༌། སྤོབས་པ་བརྩེགས་པ་དང༌། ཀུན་དུ་བཟང་པོ་རྣམས་ནི་དོན་ཡོད་གྲུབ་པ་ལྟ་བུའོ། །ཡང་ན་ཤར་ལ་སོགས་པའི་སྣམ་བུ་རྣམས་ལ་བསྐལ་པ་བཟང་པོའི་བྱང་ཆུབ་སེམས་དཔའ་བྱམས་པ་ལ་སོགས་པ་སྟོང་དུ་བཞིས་མཚང་བ་བསྒོམ་པར་བྱའོ། །དེའི་མཚན་རྣམས་མངས་པས་འཇིགས་པས་མ་བཤད་དོ། །མེའི་མཚམས་སུ་པདྨ་ལ་རྡོ་རྗེ་བདུག་སྦོས་མ་དཀར་མོ་དང་བདེན་བྲལ་གྱི་པདྨ་ལ་རྡོ་རྗེ་མེ་ཏོག་མ་སེར་པོ་དང༌། རླུང་གི་པདྨ་ལ་རྡོ་རྗེ་མར་མེ་མ་དཀར་དམར་དང༌། དབང་ལྡན་གྱི་པདྨ་ལ་རྡོ་རྗེ་དྲི་ཆབ་མ་ལྗང་གུ། བདུག་སྦོས་མ་ལ་སོགས་པ་འདི་རྣམས་གང་བཞིན་དུ་ཕྱག་མཚན་འཛིན་པའོ། །ཤར་ལ་སོགས་པའི་སྒོའི་པདྨ་རྣམས་ལ་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང༌། རྡོ་རྗེ་ལྕགས་སྒྲོག་དང༌། རྡོ་རྗེ་འབེབས་པ་རྣམས་རིམ་པ་བཞིན་དུ་དཀར་པོ་དང་སེར་པོ་དང་དམར་པོ་དང་ལྗང་གུ་རྣམས་ནི་གོང་བཞིན་དུ་ཕྱག་མཚན་འཛིན་པའོ། །འདིར་བཅོམ་ལྡན་འདས་རྡོ་རྗེ་དབྱིངས་ལས་གཞན་པའི་ལྷ་རྣམས་ནི་ཞལ་གཅིག་ཕྱག་གཉིས་པ་གོས་དང་རཏྣ་སྣ་ཚོགས་ཀྱིས་བརྒྱན་པ་རཏྣའི་ཅོད་པན་ཅན་རྡོ་རྗེ་སེམས་དཔའ་ལ་སོགས་པ་མ་གཏོགས་པ་དཀྱིལ་འཁོར་གྱི་དབང་ཕྱུག་ལ་མངོན་དུ་ཕྱོགས་པའོ། །རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་བཅུ་དྲུག་ནི་རང་གི་རིགས་ཀྱི་བདག་པོ་དེ་བཞིན་གཤེགས་པ་ལ་མངོན་དུ་ཕྱོགས་པའོ། །རྣམ་པར་སྣར་མཛད་ལ་སོགས་པ་ནས་རྡོ་རྗེ་འབེབས་པའི་བར་གྱི་ལྷ་རྣམས་ནི་ཇི་ལྟར་གསུངས་པའི་ལྟེ་བ་དང་འདབ་མ་རྣམས་ལ་གནས་ཤིང་ཉི་མའི་འོད་ཟེར་ཅན་ནོ། །དེ་བཞིན་གཤེགས་
བ་ལྔ་ལས་གཞན་པའི་ལྷ་བཞི་བཅུ་ཞེ་བརྒྱད་ནི་སེམས་དཔའི་སྐྱིལ་ཀྲུང་གིས་བཞུགས་པའོ། །འདིར་བཅོམ་ལྡན་འདས་རྡོ་རྗེ་དབྱིངས་རྣམ་པར་སྣང་མཛད་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་ལ་རང་འདྲ་བའི་རྡོ་རྗེ་སེམས་དཔས་རྒྱས་བཏབ་པའོ། །མེ་ལོང་ལྟ་བུའི་ཡེ་ཤེས་ལ་སོགས་པའི་བདག་ཉིད་ཀྱིས་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞིའི་རིགས་ཀྱི་བདག་པོ་ནི་རྣམ་པར་སྣང་མཛད་དོ། །སེམས་མ་རྡོ་རྗེ་མ་དང་རྡོ་རྗེ་སེམས་དཔའ་ལ་སོགས་པ་བཞི་དང་སྒེག་མོ་དང་བདུག་སྤོས་མ་དང་བྱམས་པ་ལ་སོགས་པ་བཞི་དང༌། རྡོ་རྗེ་ལྕགས་ཀྱུ་རྣམས་ཀྱི་མི་བསྐྱོད་པའོ། །རིན་ཆེན་རྡོ་རྗེ་མ་དང་རྡོ་རྗེ་རིན་ཆེན་ལ་སོགས་པ་བཞི་དང༌། ཕྲེང་བ་མ་དང་མེ་ཏོག་མ་དང་སྤོས་ཀྱི་གླང་པོ་ལ་སོགས་པ་བཞི་དང་རྡོ་རྗེ་ཞགས་པ་རྣམས་ཀྱི་རིན་ཆེན་འབྱུང་ལྡན་ནོ། །ཆོས་ཀྱི་རྡོ་རྗེ་མ་དང་རྡོ་རྗེ་ཆོས་ལ་སོགས་པ་བཞི་དང་གླུ་མ་དང༌། མར་མེ་མ་དང། འོད་དཔག་མེད་ལ་སོགས་པ་བཞི་དང༌། རྡོ་རྗེ་ལྕགས་སྒྲོག་རྣམས་ཀྱི་སྣང་བ་མཐའ་ཡས་སོ། །ལས་ཀྱི་རྡོ་རྗེ་མ་དང༌། རྡོ་རྗེ་ལས་ལ་སོགས་པ་བཞི་དང༌། གར་མ་དང་དྲི་ཆབ་མ་དང༌། རྡོ་རྗེ་སྙིང་པོ་ལ་སོགས་པ་བཞི་དང་རྡོ་རྗེ་འབེབས་པ་རྣམས་ཀྱི་དོན་ཡོད་གྲུབ་པའོ། །འདིར་ནང་གི་གཞལ་ཡས་ཁང་གི་སྒོ་རྣམས་སུ་འང༌། རྡོ་རྗེ་ལྕགས་ཀྱུ་ལ་སོགས་པ་སྒོ་སྐྱོང་བཞི་བསྒོམ་པར་བྱའོ་ཞེས་པ་ཕྱོགས་གཞན་ནོ། །རྣམ་པར་སྣང་མཛད་ཀྱི་སྙིང་གའི་ས་བོན་ཨཱཿ་ཨོཾ་སརྦ་ཏ་ཐཱ་ག་ཏཱ་མ་ཧཱ་ཡོ་གཱི་ཤྭ་ར་ཧཱུཾ་ཞེས་པ་ནི་སྙིང་པོའོ། །ཨོཾ་བཛྲ་ཡཀྵ་ཧཱུཾ་ཞེས་པ་ནི་རྡོ་རྗེ་གནོད་སྦྱིན་གྱི་ལས་ཐམས་ཅད་པའི་སྔགས་སོ། །གང་ཡང་རྡོ་རྗེ་རྩེ་མོ་ལ་སོགས་པའི་རྒྱུད་གཞན་གྱིས་ཀྱང་ལྷའི་རྣམ་པའི་ཁྱད་པར་གསུངས་པ་དེ་ནི་འདིར་མངས་ཀྱིས་དགོས་པས་མ་བཤད་དོ།། །།བཞི་བཅུ་རྩ་གསུམ་གྱི་བདག་ཉིད་ཅན། འཇམ་པའི་རྡོ་རྗེའི་དཀྱིལ་འཁོར་ལ་རྡོ་རྗེ་གུར་གྱི་ནང་ལ་སོགས་པ་གཞལ་ཡས་ཁང་བར་དུ་དང་པོར་བཤད་པའི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ། །འོན་ཀྱང་འདིར་ཁྲོ་བོ་རྣམས་ནི་འོག་ནས་འཆད་པའི་གཟུགས་ཅན་ནོ་ཞེས་པ་ནི་ཕྱོགས་གཅིག་གོ །རྡོ་རྗེ་གུར་གྱི་ནང་ན་རི་རབ་ཀྱི་སྟེང་ན་སྣ་ཚོགས་པདྨའི་ལྟེ་བར་གནས་པའི་སྣ་ཚོགས་རྡོ་རྗེའི་ལྟེ་བར་གཞལ་
ཡས་ཁང་ཞས་པ་ནི་ཕྱོགས་གཉིས་པའོ། །ཕྱོགས་གཉིས་ཀ་ལ་ཡང་མཆོད་རྟེན་དཀར་པོའི་ནང་དུ་གཞལ་ཡས་ཁང་ངོ༌། །དེའི་ལྟེ་བ་ལ་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་སྐུ་མདོག་གསེར་བཅོ་མ་ལྟ་བུ་སྡུག་ཅིང་ཡིད་དུ་འོང་བ་མེ་ཏོག་སྣ་ཚོགས་ཀྱིས་མཛེས་པའི་གཙུག་ཕུད་ཅན་གསུམ་གྱིས་རྣམ་པར་བརྒྱན་པ་རྩ་བ་དང་གཡས་དང་གཡོན་གྱི་ཞལ་སེར་པོ་དང་སྔོན་པོ་དང་དཀར་པོ་ཕྱག་དྲུག་པ་གཡས་པ་རྣམས་ཀྱི་རལ་གྲི་དང༌། མཆོག་སྦྱིན་དང་མདའ་དང༌། གཡོན་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་དང་ཆུ་སྐྱེས་སྔོན་པོ་དང་གཞུ་འཛིན་པའོ། །བདག་ལྟ་བུའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སྙོམས་པར་ཞུགས་པའོ། །དེའི་ཤར་ཕྱོགས་ཀྱི་ལེ་ཚེ་ལ་གླང་པོ་ཆེའི་སྟེང་དུ་སྣ་ཚོགས་པདྨ་དང་ཉི་མ་ལ་མི་བསྐྱོད་པ་སྔོན་པོ་འགྱིང་བའི་ཚུལ་གྱིས་གནས་པ་རྩ་བ་དང་གཡས་གཡོན་གྱི་ཞལ་སྔོན་པོ་དང་དཀར་པོ་དང་དམར་པོ་ཕྱག་བརྒྱད་པ་གཡས་པའི་གུང་མོས་སྙིང་གར་རྡོ་རྗེ་གྱེན་དུ་བསྒྲེང་བ། གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་དཀུ་ལ་བརྟེན་པ། གཡས་གཞན་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་རྣམས་སོ། །གཡོན་པ་རྣམས་ཀྱིས་ནུ་མ་དང་ཞགས་པ་དང་གཞུ་འཛིན་པའོ། །ལྷོ་རུ་རྟའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་རིན་ཆེན་འབྱུང་ལྡན་སེར་པོ་སེམས་དཔའི་སྐྱིལ་ཀྲུང་གིས་བཞུགས་པ། སེར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་རྩ་བའི་ཕྱག་དག་གིས་མཉམ་གཞག་གི་ཕྱག་རྒྱ་བྱས་ལ། གཡས་པའི་ཕྱག་གཉིས་ཀྱིས་རིན་པོ་ཆེ་དང་རལ་གྲི་འཛིན་པའོ། །གཡོན་པ་གཉིས་ཀྱིས་ནུ་མ་དང་རྡོ་རྗེ་འཛིན་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་སེམས་དཔའི་སྐྱིལ་མོ་ཀྲུང་གིས་གནས་པའི་སྣང་པ་མཐའ་ཡས་དཀར་པོ་དཀར་པོ་དང་སྔོན་པོ་དང་དམར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་གཡོན་པ་སྒེག་པ་དང་བཅས་པའི་པདྨའི་ཡུ་བ་སྙིང་གར་བཟུང་སྟེ། གཡས་པས་ཁ་འབྱེད་པའོ། །གཡས་པ་གཉིས་ཀྱིས་བགྲང་ཕྲེང་དང་རྡོ་རྗེ་འཛིན་པའོ། །གཡོན་པ་གཉིས་ཀྱིས་ནུ་མ་དང་སྤྱི་བླུགས་འཛིན་པའོ། །བྱང་དུ་ཁྱུང་
གི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་དོན་ཡོད་གྲུབ་པ་སེམས་དཔའི་སྐྱིལ་ཀྲུང་གིས་བཞུགས་པ་ཁ་དོག་དམར་པོ་དམར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་དང་པོ་གཉིས་ཀྱིས་བསམ་གཏན་གྱི་ཕྱག་རྒྱ་བཅིང་བའོ། །གཡས་པ་གཉིས་ཀྱིས་རལ་གྲི་དང་རྡོ་རྗེ་འཛིན་པའོ། །གཡོན་པ་གཉིས་ཀྱིས་ནུ་མ་དང་ལྕགས་ཀྱུ་འཛིན་པའོ། །དབང་ལྡན་དུ་སྤྱན་མ་སེར་མོ་ནི་སེམས་དཔའི་སྐྱིལ་ཀྲུང་ཅན། ཕྱག་བརྒྱད་མ་གཡས་པ་རྣམས་ཀྱིས་མཆོག་སྦྱིན་དང་མི་འཇིགས་པ་དང་རྡོ་རྗེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང༌། རིན་པོ་ཆེའི་སྙེ་མ་དང་བགྲང་ཕྲེང་དང་གཞུ་འཛིན་པའོ། །མེར་མཱ་མ་ཀཱི་སེམས་དཔའི་སྐྱིལ་ཀྲུང་ཅན་མ་སྔོན་མོ་ནི་ཁྲོ་བ་དང་བཅས་པས་དགོད་པ་ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་དང༌། གཡོན་པ་རྣམས་ཀྱིས་སྡིགས་མཛུབ་དང་ཞགས་པ་དང་གཞུ་འཛིན་པའོ། །བདེན་བྲལ་དུ་གོས་དཀར་མོ་དམར་པོ་ནི་ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའོ། །གཡོན་པ་རྣམས་ཀྱིས་པདྨ་དང་བགྲང་ཕྲེང་དང་གཞུ་འཛིན་ཅིང་འགྱིང་བའི་ཆུས་ཀྱིས་གནས་པའོ། །རླུང་དུ་སྒྲོལ་མ་མརྒད་ལྟ་བུའི་མདོག་ཅན་མ་སེམས་དཔའི་སྐྱིལ་ཀྲུང་གིས་གནས་པ། ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་ཨུཏྤལ་དང་གཞུ་འཛིན་པའོ། །རིམ་པ་གཉིས་པ་ལ་ཤར་ལ་སོགས་པའི་ཕྱོགས་རྣམས་སུ་སེམས་མ་རྡོ་རྗེ་མ་དང་རིན་ཆེན་རྡོ་རྗེ་མ་དང་ཆོས་ཀྱི་རྡོ་རྗེ་མ་དང༌། ལས་ཀྱི་རྡོ་རྗེ་མ་རྣམས་རིམ་པ་བཞིན་དུ་སྐུ་མདོག་དང༌། ཕྱག་མཚན་ནི་མི་བསྐྱོད་པ་ལ་སོགས་པ་བཞིན་ནོ། །འོན་ཀྱང་ནུ་མ་འཛིན་པ་མེད་པས་སེམས་མ་རྡོ་རྗེ་མ་རིན་ཆེན་རྡོ་རྗེ་མ་ལས་ཀྱི་རྡོ་རྗེ་མ་རྣམས་སྡིགས་མཛུབ་འཛིན་པའོ། །ཆོས་ཀྱི་རྡོ་རྗེ་མ་ནི་ཞགས་པ་འཛིན་པའོ། །དབང་ལྡན་དུ་ཙུནད་དཀར་མོ་ཟླ་བའི་མདོག་ཅན་ཕྱག་ཉི་ཤུ་རྩ་དྲུག་མ་རྩ་བའི་ཕྱག་གཉིས་ཀྱིས་སྙིང་གར་རྩ་བའི་ཕྱག་རྒྱ་དང༌། གཡས་པ་རྣམས་ཀྱིས་མི་འཇིགས་པ་དང་རལ་གྲི་དང་རཏྣའི་ཕྲེང་བ་དང་བི་ཛ་པཱུ་ར་དང་མདའ་དང་དགྲ་སྟ་དང་མདུང་ཐུང་དང་ཐོབ་དང་
ལྕགས་ཀྱུ་དང་རྡོ་རྗེ་དང་བ་དན་གསུམ་གྱི་ཚུལ་དང་བགྲང་ཕྲེང་ངོ༌། །གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང༌། པདྨ་དང་སྤྱི་བླུགས་དང་ཞགས་པ་དང་གཞུ་དང་ཤག་ཏི་དང་འཁོར་ལོ་དང་རལ་གྲི་དང་སྡིགས་མཛུབ་དང་བུམ་པ་བཟང་པོ་དང་བི་དི་བ་ལ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏིའོ། །ཀན་ཛཱི་ཀའི་སྟོད་གཡོགས་བཅིངས་པ་བླ་གོས་ཕྲག་པ་ལ་གཟར་བ་གར་གྱི་ཉམས་དགུའི་རང་བཞིན་རྩ་བའི་ཞལ་དཀར་པོ་གཡས་པའི་སྔོན་པོ་ལྗགས་འགུལ་ཞིང་མཆེ་བ་བག་ཙམ་གཙིགས་པ། གཡོན་པ་སེར་པོ་མ་མཆུ་མནན་པ། ཐལ་མོ་སྦྱར་ཏེ་མཛུབ་མོ་གཉིས་གུང་མོའི་ཚིགས་པར་ཟླུམ་པོའི་རྣམ་པར་བཞག་སྟེ་མཐེ་བོང་གཉིས་མཛུབ་མོའི་རྩ་བའི་ལོགས་ལ་གཞག་པར་བྱ་སྟེ། སྙིང་གར་བཞག་པ་འདི་ནི་རྩ་བའི་ཕྱག་རྒྱའོ། །མེར་ནི་རིན་ཆེན་སྐར་མདའ་སེར་མོ་ཕྱག་དྲུག་པ་གཉིས་ཀྱིས་སྙིང་གར་རིན་པོ་ཆེ་ཁ་སྦྱོར་འཛིན་པའོ། །གཡས་པ་གཉིས་མི་འཇིགས་པ་དང་མདའ་འཛིན་པ་གཡོན་པ་གཉིས་ཀྱིས་སྡིགས་མཛུབ་དང་གཞུ་འཛིན་པའོ། །བདེན་བྲལ་དུ་ཁྲོ་གཉེར་ཅན་དཀར་མོ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་སྤྱི་བླུགས་དང་གཞུ་འཛིན་པའོ། །རླུང་དུ་རྡོ་རྗེ་ལྕགས་སྒྲོག་མ་ལྗང་གུ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་རྡོ་རྗེ་ལུ་གུ་རྒྱུད་དང་མདའ་འཛིན་པ་གཡོན་པ་རྣམས་ཀྱིས་སྡིགས་མཛུབ་པ་དང་ཞགས་པ་དང་གཞུ་འཛིན་པའོ། །སྤྱན་མ་ལ་སོགས་པའི་ལྷ་མོ་བཅུ་གཉིས་པོ་འདི་རྣམས་ནི་རོལ་པའི་ཀུན་དུ་བསྐྱོད་པ་དང་ལྡན་པ་ཟླ་བའི་གདན་ལ་བཞུགས་ཤིང་འོད་དམར་པོའི་དཀྱིལ་འཁོར་ཅན། རང་རང་གི་རིགས་ཀྱི་བདག་པོ་བཞིན་དུ་ཞལ་གསུམ་པའོ། །རིམ་པ་གསུམ་པའི་དཀྱིལ་འཁོར་དུ་ཤར་གྱི་སྣམ་བུ་ལ་བྱམས་པ་གསེར་གྱི་མདོག་ལྟ་བུ་ཕྱག་དང་པོ་གཉིས་ཆོས་འཆད་ཀྱི་ཕྱག་རྒྱ་དང༌། གཡས་པ་མཆོག་སྦྱིན་གྱི་ཕྱག་རྒྱ་དང་གཡོན་པ་མེ་ཏོག་དང་བཅས་པའི་ཀླུ་ཤིང་གི་ཡལ་ག་འཛིན་པའོ། །འཇམ་དཔལ་ནི་བརྗོད་ཟིན་པའི་གཟུགས་ཅན་ཏེ། ཁྱད་པར་དུ་ཤེས་རབ་མ་དང་བྲལ་བའོ། །སྤོས་ཀྱི་གླང་པོ་ལྗང་གུ་གཡོན་པས་བུམ་པར་གནས་པའི་གླང་པོ་ཆེའི་
སྣ་འཛིན་པའོ། །གཡས་ཀྱི་མཆོག་སྦྱིན་ནོ། །ཡེ་ཤེས་ཏོག་སེར་པོ་གཡོན་པས་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །གཡས་མཆོག་སྦྱིན་ནོ། །ལྷོ་རུ་བཟང་སྐྱོང་སྐུ་མདོག་དམར་པོ། །གཡོན་པ་རཏྣ་འཛིན་པ་གཡས་པས་མཆོག་སྦྱིན་ནོ། །བློ་གྲོས་རྒྱ་མཚོ་དཀར་པོ་ཕྱག་གཉིས་ཀྱི་སོར་མོ་ཐམས་ཅད་བརྐྱང་པས་ཆུ་རླབས་ཀྱི་ཚུལ་བྱེད་པའོ། །བློ་གྲོས་མི་ཟད་པ་གསེར་གྱི་མདོག་ལྟ་བུ་གཡོན་པའི་ཁུ་ཚུར་སྙིང་གར་བཞག་སྟེ། གཡས་པས་མཆོག་སྦྱིན་ནོ། །སྤོབས་པ་བརྩེགས་པ་ལྗང་གུ་གཡོན་པས་ཁུ་ཚུར་མཁལ་ཁུང་དུ་བཞག་པའོ། །གཡས་པས་སེ་གོལ་གཏོགས་པའོ། །ནུབ་ཏུ་མཐུ་ཆེན་ཐོབ་དཀར་པོ་གཡོན་པས་བག་ཙམ་ཁ་ཕྱེ་བའི་པདྨ་དཀར་པོའོ། །གཡས་པས་མཆོག་སྦྱིན་ནོ། །ངན་སོང་ཀུན་འདྲེན་དཀར་པོ་ཕྱག་གཉིས་ཀྱིས་སྡིག་པ་སྤྲུག་པའི་ཚུལ་ལོ། །མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་གསེར་གྱི་མདོག་ལྟ་བུ་ཕྱག་གཉིས་ཁ་སྦྱར་བརྡབས་པའི་ཚུལ་ལོ། །དྲ་བ་ཅན་གྱི་འོད་དམར་པོ་གཡོན་པས་ཨུཏྤལ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །གཡས་པས་མཆོག་སྦྱིན་ནོ། །བྱང་དུ་ཟླ་འོད་སྐུ་མདོག་ཟླ་བའི་འོད་ལྟ་བུ་གཡོན་པས་ཨུཏྤ་ལར་གནས་པའི་ཟླ་བའི་དཀྱིལ་འཁོར་འཛིན་པ་གཡས་པས་མཆོག་སྦྱིན་ནོ། །འོད་དཔག་མེད་དམར་པོ་ཕྱག་གཉིས་ཀྱིས་དབང་བསྐུར་བའི་བུམ་པ་འཛིན་པའོ། །ནམ་མཁའ་མཛོད་སྐུ་མདོག་གསེར་ལྟ་བུས་གཡོན་པས་རྡོ་རྗེ་ཁུ་ཚུར་འགྱིང་པས་དཀུར་བརྟེན་པ། གཡས་པས་ནམ་མཁའ་ལ་བསྐོར་བའོ། །སྒྲིབ་པ་ཐམས་ཅད་རྣམ་པར་སེལ་བ་སྔོན་པོ་འམ་དཀར་པོ་གཡོན་པས་ས་ལ་རེག་པ། གཡས་པའི་ཁུ་ཚུར་གྱིས་མཐེ་བོང་དང་སྡིགས་མཛུབ་སྦྱར་ཏེ། དྲི་བའི་ཚུལ་གྱིས་གནས་པའོ། །བྱམས་པ་ལ་སོགས་པའི་བྱང་ཆུབ་སེམས་དཔའ་འདི་རྣམས་ནི་ཟླ་བའི་གདན་དང་ཟླ་བའི་འོད་ཅན་ནོ། །སེམས་དཔའི་སྐྱིལ་ཀྲུང་གིས་བཞུགས་པ་སྤྱན་གསུམ་པ་རང་ཕྱོགས་ཀྱི་བདག་པོ་བཞིན་དུ་ཞལ་གསུམ་པ་ཕྱག་དྲུག་པ་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་བྱས་པ། གཉིས་ཀྱིས་གཞུ་དང་མདའ་འཛིན་པའོ། །བྱམས་པ་དང་འཇམ་དབྱངས་གཉིས་
ལ་ནི་མཉམ་གཞག་གི་ཕྱག་རྒྱ་མེད་དོ། །འཇམ་པའི་རྡོ་རྗེ་ལ་སོགས་པའི་ལྷ་ཐམས་ཅད་གོས་སྣ་ཚོགས་པ་དང་རིན་པོ་ཆེའི་རྒྱན་དང་རལ་བའི་ཐོར་ཚུགས་དང་འཛུམ་པ་དང་བཅས་པའི་ཞལ་དང་སྒེག་པའི་ཉམས་དང་ལྡན་པའོ། །ཤར་གྱི་སྒོར་མ་ཧེའི་སྟེང་དུ་གཤིན་རྗེ་མཐར་བྱེད་ནག་པོ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་འཛིན་པའོ། །གཡོན་པས་ཞགས་པ་དང་བཅས་པའི་སྡིགས་མཛུབ་གྱེན་དུ་བསྒྲེངས་པས་སྡིགས་པར་བྱེད་པ། གཡོན་པའི་གཉིས་པས་འཁྱུད་པའི་ལྷ་མོའི་ནུ་མ་འཛིན་པའོ། །དེ་ཡང་ཞལ་གཅིག་པ་ཕྱག་གཉིས་པ་སྐུ་མདོག་དཀར་པོ་གཡོན་པས་པདྨ་དཀར་པོ་འཛིན་པ་ཕྱག་གཡས་པས་ཡབ་ལ་འཁྱུད་པར་བརྩོན་པའོ། །གཡོན་པའི་གསུམ་པས་དངུལ་གྱི་གཞུ་འཛིན་པའོ། །མ་རྒད་ལྟ་བུའི་ལྷ་མོ་ལྗང་གུ་ཕྱག་གཉིས་མ་གཡས་ཨུཏྤལ་སྔོན་པོ་འཛིན་པ་ཕྱག་གཡོན་པ་ཡབ་ཀྱི་སྐེ་ལ་འཁྱུད་པས་གཡས་ཕྱོགས་སུ་བརྒྱན་པ། ཞལ་དྲུག་པ་གསུས་པ་འཕྱང་བ། ཞལ་དྲུག་ནི་སྔོན་པོ་རྩ་བའི་ཞལ་དགྱེས་པའི་གད་མོས་བཞད་པ། གཉིས་པས་འཇིགས་པར་བྱེད་པ། གསུམ་པའི་ཞལ་གདངས་པ། བཞི་པ་འཇིགས་སུ་རུང་བ། ལྔ་པ་རྡོ་རྗེ་མཆེ་བ་ཅན། དྲུག་པ་མགོའི་སྟེང་དུ་གནས་པ་ལྗགས་འགུལ་པའོ། །ཡང་ན་སྟེང་གི་སྔོན་པོ་རྩ་བ་ལ་སོགས་པའི་ཞལ་རྣམས་ནི་གཡས་སྐོར་གྱིས་སྔོན་པོ་དང་དཀར་པོ་དང་སེར་པོ་དང་དམར་པོ་དང་ལྷང་གུ་རྣམས་སོ། །ལྷོ་སྒོར་གཞན་གྱིས་མི་ཐུབ་པ་སེར་པོ་སེར་པོ་དང་ནག་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་ཐོ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །ནུབ་ཏུ་མགྲིན་དམར་པོ་དམར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་ཀ་ན་ཡ་དང་མདའ་རྣམས་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །བྱང་དུ་བདུད་རྩི་འཁྱིལ་བ་སྔོན་པོ་རྐང་པས་བགེགས་མནན་པ། ཕྱག་དྲུག་པ་གཡས་པ་རྣམས་ཀྱིས་
རལ་གྲི་དང་དགྲ་སྟེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །དབང་ལྡན་གྱི་མཚམས་སུ་རཏྣའི་རི་བོའི་སྟེང་དུ་མི་གཡོ་བ་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་ཞགས་པ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །གཡོན་ངོས་སུ་འཕྱང་བའི་གོས་སྔོན་པོ་འཛིན་པའོ། །ཁྲག་གིས་བརླན་པའི་ལྗགས་འགུལ་བའི་ཞལ་གདངས་པའོ། །མེར་འདོད་པའི་རྒྱལ་པོ་སྔོན་པོ་ཕྱག་དྲུག་པ་དང་པོ་གཉིས་ཀྱིས་རང་གི་ཕྱག་རྒྱ་བྱས་པ་གཡས་པ་གཉིས་ཀྱིས་རྡོ་རྗེ་དང་མདའ་དང་གཡོན་པ་གཉིས་ནུ་མ་དང་གཞུ་འཛིན་པའོ། །རྡོ་རྗེ་ཁུ་ཚུར་གཉིས་ཕན་ཚུན་རྒྱབ་སྦྱར་ཏེ་མཐེའུ་ཆུང་གཉིས་བསྣོལ་ཏེ་སྡིགས་མཛུབ་གཉིས་ཕྱིར་བརྐྱང་ནས་ཞགས་པའི་ཚུལ་བྱས་པ་ནི་འདོད་པའི་རྒྱལ་པོའི་ཕྱག་རྒྱའོ། །བདེན་བྲལ་དུ་དབྱུག་པ་སྔོན་པོ་སྐུ་མདོག་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །རླུང་དུ་སྟོབས་པོ་ཆེ་སྔོན་པོ་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་རལ་གྲི་དང་མདའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་ཐོ་བ་དང་གཞུ་འཛིན་པའོ། །དཀྱིལ་འཁོར་གྱི་དབང་ཕྱུག་གི་སྟེང་དུ་གནོད་མཛེས་རྒྱལ་པོ་སྔོན་པོ་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་པ་གཡས་པ་གཉིས་ཀྱིས་རལ་གྲི་དང་མདའ་འཛིན་པའོ། །གཡོན་པ་གཉིས་ཀྱིས་ནུ་མ་དང་གཞུ་འཛིན་པའོ། །འདིར་འདོད་པའི་རྒྱལ་པོའི་ཕྱག་རྒྱ་དེ་ཉིད་ཀྱི་མཛུབ་མོ་གཉིས་གྱེན་དུ་བསྒྲེང་བ་ནི་གནོད་མཛེས་ཀྱི་ཕྱག་རྒྱའོ། །འོག་ཏུ་རྡོ་རྗེ་ས་འོག་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་ལྕགས་ཀྱུ་དང་མདའ་འཛིན་པའོ། །གཡོན་པ་རྣམས་ཀྱིས་ནུ་མ་དང་ཞགས་པ་དང་བཅས་པའི་རྩེ་གཅིག་པ་དང་གཞུ་འཛིན་པའོ། །བགེགས་མཐར་བྱེད་ལ་སོགས་པ་བདུན་པོ་ནི་སྔོན་པོ་དང་སེར་པོ་དང་དམར་པོ་རྩ་བ་དང་གཡས་གཡོན་གྱི་ཞལ་གསུམ་
མོ། །ཁྲོ་བོ་བཅུ་ཡང་ཁྲོས་པའི་ལྟ་སྟང་ཅན་སྤྱན་དམར་པོ་སྨིན་མ་གཡོ་བ་བག་ཙམ་རྩ་བའི་ཞལ་ཁ་ཕྱེ་བ། གཡས་པའི་ཞལ་གདངས་བ། གཡོན་པའི་ཞལ་མ་མཆུ་མནན་པ་མཆེ་བ་གཙིགས་པ་སྟག་གི་པགས་པས་སྨད་དང་སྟོད་ལ་གོན་པ་ཐོད་པའི་ཕྲེང་བས་དབུ་ལ་བརྒྱན་པ། དབུ་སྐྲ་འབར་བ་གྱེན་ལ་བཅིངས་ཤིང་འཁྱིལ་བ་སྤ་ར་དམར་སེར་རོལ་པའི་ཀུན་ཏུ་བསྐྱོད་པ་ཅན། ཀླུའི་རྒྱལ་པོ་བརྒྱད་ཀྱིས་བརྒྱན་པ། ཕུད་ཀྱི་སྒྲ་སྒྲོགས་པ་དང་བཅས་པའི་གདེངས་ཀ་ཅན་རྣམས་ཀྱིས་འཇིགས་པ་སྣ་ཚོགས་པདྨ་དང༌། ནི་མའི་གདན་ལ་གཡོན་བརྐྱང་བས་གནས་པའོ། །གཤིན་རྗེ་མཐར་བྱེད་ནི་གཡས་བརྐྱང་བའམ་རྡོ་རྗེ་སྐྱིལ་ཀྲུང་གིས་ཀྱང་བཞུགས་པའོ། །དཀྱིལ་འཁོར་འདི་ལ་གནོད་མཛེས་རྒྱལ་པོའི་གཟུགས་ཁོ་ནས་རྣམ་པར་གནས་པའི་ཕྱིར་གཙུག་ཏོར་འཁོར་ལོས་སྒྱུར་བ་ནི་དཀྱིལ་འཁོར་ཉིད་དུ་ཐ་དད་དུ་མ་བཤད་དེ། དཔལ་སྒྱུ་འཕྲུལ་དྲ་བའི་རྒྱུད་ལས་རྣལ་འབྱོར་རྒྱས་པར་བསྟན་པ་ལའོ། །འབྲིང་བོར་བསྟན་པ་ལ་ནི་འཇམ་པའི་རྡོ་རྗེའི་སྤྱི་བོའི་སྟེང་ན་རཏྣའི་རི་ལ་གནས་པའི་པདྨ་དང་ཉི་མ་ལ་རྡོ་རྗེ་སྐྱིལ་ཀྲུང་གིས་གནས་པའི་གཙུག་ཏོར་འཁོར་ལོས་སྐྱུར་བ་སེར་པོ་སེར་པོ་དང་སྔོན་པོ་དང་དཀར་པོ་རྩ་བ་དང་གཡས་དང་གཡོན་གྱི་ཞལ་ལོ། །ཕྱག་བརྒྱད་པའི་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་བྱས་པ། གཡས་པ་རྣམས་ཀྱིས་འཁོར་ལོ་དང་བགྲང་ཕྲེང་དང་མདའ་འཛིན་པའོ། །གཡོན་པ་རྣམས་ཀྱིས་འཁོར་ལོ་དང་ནུ་མ་དང་གཞུ་འཛིན་པའོ། །སྣ་ཚོགས་པའི་གོས་དང་རིན་པོ་ཆེའི་རྒྱན་ཅན། རལ་པའི་ཐོར་ཅོག་གི་ཅོད་པན་ཅན་གཞོགས་གཉིས་སུ་སྤྱན་མ་ལ་སོགས་པའི་ལྷ་མོ་བཞི་པོ་རྣམས་ཀྱིས་བརྒྱན་པའོ་ཞེས་གསུངས་སོ། །དེའི་རྗེས་སུ་འབྲངས་ནས་རྣལ་འབྱོར་རྒྱས་པ་ལ། ཡང་གཙུག་ཏོར་འཁོར་ལོས་སྒྱུར་བ་ནི་དཀྱིལ་འཁོར་བ་ཐ་དད་དུ་དང་དེའི་སྟེང་དུ་གནོད་མཛེས་རྒྱལ་པོ་ཤེས་པར་བྱའོ་ཞེས་པ་ནི་ཁ་ཅིག་གོ །ལྷ་གཞན་བཞི་བཅུ་ཞེ་གསུམ་པོ་རྣམས་ཀྱང་ཞལ་རེ་རེ་ལ་སྤྱན་གསུམ་གསུམ་པའོ། །འདིར་ནུ་མ་འཛིན་པར་བསྟན་པ་དེ་ཡང་མི་བསྐྱོད་པ་ལ་སོགས་པ་བཞི་བདག་ལྟ་
བུའི་ཤེས་རབ་མ་ལ་སྙོམས་པར་ཞུགས་པ་རྣམས་ཀྱིའོ། །ཁྲོ་བོ་རྣམས་ཀྱིས་ནི་བདག་ལྟ་བུའི་ཤེས་རབ་མ་གཡོན་ངོ་སུ་གནས་པའི་ནུ་མ་འཛིན་པའོ་ཞེས་ཤེས་པར་བྱའོ། །གཤིན་རྗེ་མཐར་བྱེད་ལས་གཞན་རྣམས་ལ་ཤེས་རབ་མ་མེད་ཀྱང་དེའི་ནུ་མར་འཛིན་པའི་ཚུལ་གྱིས་བདག་གི་ནུ་མར་འཛིན་པའོ་ཞེས་པ་ནི་གཞན་ནོ། །འདིར་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་ཀྱི་བདག་ཉིད་ལྟ་བུའི་རྡོ་རྗེ་སེམས་དཔས་རྒྱས་བཏབ་པ། མེ་ལོང་ལྟ་བུའི་ཡེ་ཤེས་ལ་སོགས་པའི་རང་བཞིན་མི་བསྐྱོད་པ་ལ་སོགས་པའི་དེ་བཞིན་གཤེགས་པ་བཞི་དང༌། སྤྱན་མ་དང་ཙུནད་རྣམས་ལ་འཇམ་པའི་རྡོ་རྗེས་རྒྱས་བཏབ་པ། མཱ་མ་ཀཱི་དང་སེམས་མ་རྡོ་རྗེ་མ་དང་བྱམས་པ་ལ་སོགས་པ་བཞི་དང༌། ཁྲོ་བོ་བཅུ་ལ་མི་བསྐྱོད་པས་རྒྱས་བཏབ་པ། རིན་ཆེན་རྡོ་རྗེ་མ་དང་རིན་ཆེན་སྐར་མདའ་མ་དང། བཟང་སྐྱོང་མ་ལ་སོགས་པ་བཞི་ལ་རིན་འབྱུང་གིས་རྒྱས་བཏབ་པ། གོས་དཀར་མོ་དང་ཆོས་ཀྱི་རྡོ་རྗེ་མ་དང་ཁྲོ་གཉེར་མ་དང་མཐུ་ཆེན་པོ་ཐོབ་ལ་སོགས་པ་བཞི་ལ་སྣང་བ་མཐའ་ཡས་ཀྱིས་རྒྱས་བཏབ་པ། སྒྲོལ་མ་དང་ལས་ཀྱི་རྡོ་རྗེ་མ་དང་རྡོ་རྗེ་ལྕགས་སྒྲོག་མ་དང༌། ཟླ་འོད་ལ་སོགས་པ་བཞི་ལ་དོན་ཡོད་གྲུབ་པས་རྒྱས་བཏབ་པའོ། །འཇམ་པའི་རྡོ་རྗེའི་ཐུགས་ཀར་ས་བོན་ནི་མུཿའོ། །ཨོཾ་ཨཱཿ་ཞེས་པ་སྙིང་པོའི་སྔགས་སོ། །ཨོཾ་ཨཱ་མྲྀ་ཏ་ཀུཎྜ་ལི་བིགྷྣཱ་ནྟ་ཀ་ཧཱུཾ་ཞེས་པ་ལས་ཐམས་ཅད་པའི་སྔགས་སོ།། །།ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་ལ། རྡོ་རྗེ་གུར་ལ་སོགས་པ་བསྒོམ་པར་རྣམ་པར་བཞག་པ་ནི་བཤད་མ་ཐག་པའི་དཀྱིལ་འཁོར་བཞིན་ནོ། །ཁྱད་པར་དུ་གཤིན་རྗེ་གཤེད་ལ་སོགས་པའི་ཁྲོ་བོ་རྣམས་ནི་འཆད་པར་འགྱུར་བའི་གཟུགས་ཅན་ནོ། །མཆོད་རྟེན་ནི་འདིར་མེད་དོ། །གཞལ་ཡས་ཁང་གི་ལྟེ་བ་ལ་སྣ་ཚོགས་པདྨའི་ཟེ་འབྲུ་ལ་གནས་པའི་སེང་གེའི་ལྟེང་དུ་སྣ་ཚོགས་པདྨ་དང་ཟླ་བ་ལ་འཇམ་པའི་དབྱངས་རྡོ་རྗེ་སྐྱིལ་ཀྲུང་དུ་བཞུགས་པ་ཉི་མ་འཆར་བའི་དཀྱིལ་འཁོར་འོད་དང་ལྡན་པ་སྐུ་མདོག་གསེར་ལྟ་བུ། ཨིཎྜྲ་ནཱི་ལ་ལྟ་བུའི་གཙུག་ཕུད་དང་ལྡན་པ། རྡོ་རྗེ་དང་རིན་པོ་ཆེ་དང་པདྨ་
དང་སྣ་ཚོགས་རྡོ་རྗེའི་ཕྲེང་བའི་ཅོད་པན་གྱི་སྟེང་དུ་སངས་རྒྱས་ལྔ་དང་རིན་པོ་ཆེའི་ཅོད་པན་ཅན། རཏྣ་སྣ་ཚོགས་ཀྱིས་བརྒྱན་པ་དང་ན་བཟའ་སྣ་ཚོགས་བསྣམས་པ། སྒེག་པའི་ཉམས་ཀྱི་ཚོགས་དང་ལྡན་པ། སེར་པོ་དང་སྔོན་པོ་དང་དམར་པོ་དང་དཀར་པོ་ནི་རྩ་བ་དང་གཡས་དང་ནུབ་དང་གཡོན་གྱི་ཞལ་ལོ། །ཕྱག་བརྒྱད་པའི་ཕྱག་གཉིས་ཀྱི་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །གཡས་པ་རྣམས་ཀྱིས་རལ་གྲི་དང་མདའ་དང་རྡོ་རྗེ་བསྣམས་པའོ། །གཡོན་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་བུ་སྟི་དང་གཞུ་དང་རྡོ་རྗེ་དྲིལ་བུ་བསྣམས་པའོ། །འདབ་མ་བརྒྱད་པ་ལ་སེང་གེའི་སྟེང་དུ་གནས་པའི་པདྨ་དང་ཟླ་བའི་དཀྱིལ་འཁོར་རྣམས་ལ་ཤར་ལ་སོགས་པའི་ཕྱོགས་རྣམས་སུ་གཙུག་ཏོར་ཆེན་པོ་དང་གདུགས་དཀར་པོ་དང་གཟི་བརྗིད་ཕུང་པོ་དང༌། རྣམ་པ་རྒྱལ་པའི་གཙུག་ཏོར་རྣམས་དང༌། དབང་ལྡན་ལ་སོགས་པའི་མཚམས་སུ་འོད་ཟེར་རྣམ་པར་འཕྲོ་བ་དང་འཕགས་པ་དང་ཆེར་འཕགས་པ་དང་རྒྱལ་བ་རྣམས་སོ། །གཙུག་ཏོར་བརྒྱད་པོ་འདི་རྣམས་ནི་རྡོ་རྗེ་སྐྱིལ་ཀྲུང་དང་རིན་པོ་ཆེའི་ཅོད་པན་ཅན་སྐུ་མདོག་སེར་པོ་ཕྱག་གཉིས་པའོ། །ཕྱག་གཡས་པས་འཁོར་ལོ་གྱེན་དུ་བཟུང་བ། གཡོན་པས་རང་གི་གདན་ལ་མནན་པ་རྣམས་སོ། །དེ་ནས་ཤར་གྱི་རེ་མིག་གི་དབུས་སུ་གླང་པོ་ཆེའི་རྒྱལ་པོ་ལ་མི་བསྐྱོད་པ་སྔོན་པོ། ཞལ་བཞི་པ་རྩ་བའི་ཞལ་སྔོན་པོ་བག་ཙམ་ཁྲོ་བ་དང་བཅས་པའི་རོལ་པ་དང་ལྡན་པ་གཡས་པ་དཀར་པོ་ཁ་གདངས་པ་དྲག་པོའོ། །ནུབ་ཀྱི་སེར་པོ་དཔའ་བོ་གཡོན་པ་དམར་པོ་མཆེ་བས་མ་མཆུ་མནན་པ་ཕྱག་བརྒྱད་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པའོ། །རྡོ་རྗེ་སེམས་དཔའ་དང༌། རྡོ་རྗེ་རྒྱལ་པོ་དང་རྡོ་རྗེ་ཆགས་པ་དང་རྡོ་རྗེ་ལེགས་པ་རྣམས་ཀྱིས་ཡོངས་སུ་བསྐོར་བའོ། །ལྷོའི་རེ་མིག་གི་དབུས་སུ་རྟ་མཆོག་གི་སྟེང་དུ་རིན་ཆེན་འབྱུང་ལྡན་སེར་པོ་སེར་པོ་དང༌། ནག་པོ་དང་དཀར་པོ་དང་དམར་པོའི་ཞལ་བཞི་པ་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་ལྕགས་ཀྱུའོ། གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང་རྡོ་རྗེ་
དྲིལ་བུ་དང་ཞགས་པ་དང་གཞུ་འཛིན་པའོ། །རྡོ་རྗེ་རིན་ཆེན་དང་རྡོ་རྗེ་ཉི་མ་དང་རྡོ་རྗེ་ཏོག་དང་རྡོ་རྗེ་བཞད་པ་རྣམས་ཀྱིས་ཡོངས་སུ་བསྐོར་བའོ། །ནུབ་ཀྱི་རེ་མིག་གི་དབུས་སུ་རྨ་བྱའི་སྟེང་དུ་སྣང་བ་མཐའ་ཡས་དམར་པོ་དམར་པོ་དང་ནག་པོ་དང་དཀར་པོ་དང་སེར་པོའི་ཞལ་བཞིའོ། །ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་མདའ་དང་རལ་གྲི་དང་ལྕགས་ཀྱུ་འཛིན་པའོ། །གཡོན་པ་རྣམས་ཀྱིས་པདྨ་དང་གཞུ་དང་ཞགས་པ་དང༌། དྲིལ་བུ་འཛིན་པའོ། །རྡོ་རྗེ་ཆོས་དང་རྡོ་རྗེ་རྣོན་པོ་དང༌། རྡོ་རྗེ་རྒྱུ་དང་རྡོ་རྗེ་གསུང་བ་རྣམས་ཀྱིས་ཡོངས་སུ་བསྐོར་བའོ། །བྱང་གི་རེ་མིག་གི་དབུས་སུ་ཁྱུང་གི་སྟེང་དུ་དོན་ཡོད་གྲུབ་པ་ལྗང་གུ་ཞལ་བཞི་པ་རྩ་བའི་ཞལ་ལྗང་གུ་མཆེ་བ་གཙིགས་པ་གཡས་སེར་པོ་ཞི་བ་ནུབ་དམར་པོ་སྒེག་པ་དང་བཅས་པ། གཡོན་དཀར་པོ་ཞི་བ་ཕྱག་བརྒྱད་པ། གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པའོ། །རྡོ་རྗེ་ལས་དང་རྡོ་རྗེ་བསྲུང་བ་དང་རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱིས་ཡོངས་སུ་བསྐོར་བའོ། །མི་བསྐྱོད་པ་ལ་སོགས་པ་དེ་བཞིན་གཤེགས་པ་རྣམས་རང་རང་གི་ཆིབས་ཀྱི་སྟེང་དུ་སྣ་ཚོགས་པདྨ་དང་ཉི་མའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ། རཏྣ་སྣ་ཚོགས་དང་གོས་ཀྱིས་བརྒྱན་པ། རིན་པོ་ཆེའི་ཅོད་པན་ནོ། །རྡོ་རྗེ་སེམས་དཔའ་ལ་སོགས་པ་བཅུ་དྲུག་པོ་འདི་རྣམས་ནི་དབང་ལྡན་ལ་སོགས་པའི་མཚམས་སུ་གནས་པའི་སྣ་ཚོགས་པདྨ་དང་ཟླ་བའི་གདན་ལ་གནས་པ་རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་རང་བཞིན་ཅན་རྣམས་སོ། །འདི་དག་ཀྱང་ཕྱོགས་སུ་གནས་པའོ་ཞེས་པའི་ཕྱོགས་ཀྱང་ཡོད་དོ། །དབང་ལྡན་ལ་སོགས་པའི་མཚམས་ལ་གནས་པའི་སྣ་ཚོགས་པདྨ་དང་ཟླ་བ་རྣམས་ལ་སེམས་དཔའི་སྐྱིལ་ཀྲུང་ཅན། སངས་རྒྱས་སྤྱན་མ་དང་མ་མ་ཀཱི་དང་གོས་དཀར་མོ་དང་སྒྲོལ་མ་རྣམས་རིམ་པ་ཇི་ལྟ་བ་བཞིན་དུ་འཇམ་པའི་དབྱངས་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པ་ལྟ་བུའོ། །ཤར་གྱི་སྒོ་རུ་རྡོ་རྗེ་ལྕགས་ཀྱུ་དམར་སེར་རྡོ་རྗེ་ལྕགས་ཀྱུ་འཛིན་པ། གཡས་བརྐྱང་གིས་བཞུགས་པའོ། །ལྷོ་རུ་རྡོ་རྗེ་ཞགས་པ་སེར་པོ་
རྡོ་རྗེ་ཞགས་པ་འཛིན་པ་གཡོན་བརྐྱང་གིས་གནས་པའོ། །ནུབ་ཏུ་རྡོ་རྗེ་ལྕགས་སྒྲོག་དམར་པོ་རྡོ་རྗེ་ལྕགས་སྒྲོག་ཕྱག་གཉིས་ཀྱིས་འཛིན་པས་གའི་སྟང་སྟབས་ཀྱིས་གནས་པའོ། །བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་རྡོ་རྗེ་བསྡམས་པས་རྡོ་རྗེ་དྲིལ་བུ་འཛིན་པ། ཟླུམ་པའི་སྟང་སྟབས་ཀྱིས་གནས་པའོ། །བཞི་པོ་འདི་དག་སྣ་ཚོགས་པདྨ་དང་ཉི་མ་ལ་གནས་པ་ཞལ་གཅིག་པ་ཕྱག་གཉིས་པ་སྤྱན་གསུམ་པ་དབུ་སྐྲ་དམར་སེར་གྱེན་དུ་བརྫེས་པ། སྨར་དམར་སེར་དང་ལྡན་པ་ཀླུ་ཆེན་པོ་བརྒྱད་ཀྱིས་བརྒྱན་པའོ། །ནང་གི་དཀྱིལ་འཁོར་འདི་ལས་དཀྱིལ་འཁོར་གཉིས་པ་ལ། ཤར་གྱི་ཕྱོགས་ཀྱི་དབང་ལྡན་ནས་བརྩམས་ནས་གཡས་སྐོར་དུ་རིམ་པ་བཞིན་དུ་ས་བཅུ་གཉིས་ཀྱི་ལྷ་མོ་རྣམས་ཞལ་གཅིག་ཕྱག་གཉིས་མ། གཡས་པ་ཐམས་ཅད་ཀྱིས་རྡོ་རྗེ་འཛིན་པ། གཡོན་པས་རང་རང་གི་ཕྱག་མཚན་འཛིན་པའོ། །དེ་ལ་མོས་པ་སྤྱོད་པའི་ས་མ་ནི་པདྨ་བཞིན་དུ་དམར་བ་པདྨ་དམར་པོ་འཛིན་པའོ། །རབ་ཏུ་དགའ་བ་དམར་མོ་ཡིད་བཞིན་གྱི་ནོར་བུ་འཛིན་པའོ། །དྲི་མ་མེད་མ་དཀར་མོ་ཆུ་སྐྱེས་དཀར་པོ་འཛིན་པའོ། །འོད་བྱེད་མ་དམར་མོ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །འོད་འཕྲོ་མ་མ་རྒད་ལྟ་བུའི་མདོག་ཨུཏྤ་ལ་སྔོན་པོ་འཛིན་པའོ། །སྦྱང་ཁ་མ་སེར་མོ་པང་བར་གནས་པའི་ཕྱག་གན་རྐྱལ་གྱིས་མ་ར་ག་ཏའི་ནོར་བུ་བསྣམས་པའོ། །མངོན་དུ་གྱུར་པའི་ས་མ་གསེར་གྱི་མདོག་ཅན་པདྨའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པའོ། །རིང་དུ་སོང་བ་མ་ནམ་མཁའ་ལྟར་སྔོ་བསངས་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །མི་གཡོ་བ་མ་སྟོན་ཀའི་ཟླ་བའི་མདོག་ལྟ་བུ་ཟླ་བ་གནས་པའི་རྡོ་རྗེ་རྩེ་ལྔ་བ་དམར་པོས་མཚན་པའི་པདྨའི་ཡུ་བ་འགྱིང་བ་དང་བཅས་པ་འཛིན་པའོ། །ལགས་པའི་བློ་གྲོས་མ་དཀར་མོ་རལ་གྲིས་མཚན་པའི་ཨུཏྤ་ལ་འཛིན་པའོ། །ཆོས་ཀྱི་སྤྲིན་མ་སེར་མོ་ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཕུ་སྟེ་འཛིན་པའོ། །ཀུན་ཏུ་འོད་མ་ཉི་མ་ཕྱེད་ཀྱི་ཉི་མའི་མདོག་ཅན་པདྨའི་སྟེང་དུ་ཡང་དག་པར་རྫོགས་པའི་བྱང་ཆུབ་མཚོན་པར་བྱེད་པའི་བདེ་བར་གཤེགས་པའི་སྐུ་
གཟུགས་འཛིན་པའོ། །ལྷོ་རུ་ཕ་རོལ་ཏུ་ཕྱིན་མ་བཅུ་གཉིས་ནི་ཕྱག་གཉིས་པ་གཡས་པ་ཐམས་ཅད་ཀྱིས་ཡིད་བཞིན་གྱི་ནོར་བུ་འཛིན་པའོ། །གཡོན་པས་རང་རང་གི་ཕྱག་མཚན་འཛིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་མ་ནི་ཕྱག་གཉིས་ཀྱིས་ལྷག་པའོ། །དེ་ལ་རིན་པོ་ཆེའི་པདྨའི་ཕ་རོལ་ཏུ་ཕྱིན་མ་དམར་མོ་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །སྦྱིན་པའི་ཕ་རོལ་ཏུ་ཕྱིན་མ་དཀར་དམར་གྱི་མདོག་ཅན་འབྲས་སོ་བའི་སྙེ་མ་སྣ་ཚོགས་འཛིན་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་མ་དཀར་མོ་མྱ་ངན་མེད་པའི་ཡལ་ག་དང་བཅས་པའི་མེ་ཏོག་གི་ཆུན་པོ་འཛིན་པའོ། །བཟོད་པའི་ཕ་རོལ་ཏུ་ཕྱིན་མ་སེར་མོ་ཆུ་སྐྱེས་དཀར་པོ་འཛིན་པའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་མ་མ་ར་ག་ཏ་ལྟ་བུའི་མདོག་ཅན་ཨུཏྤལ་སྔོན་པོ་འཛིན་པའོ། །བསམ་གཏན་གྱི་ཕ་རོལ་ཏུ་ཕྱིན་མ་ནམ་མཁའ་ལྟར་སྔོ་བསངས་པདྨ་དཀར་པོ་འཛིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་མ་གསེར་མདོག་ལྟ་བུ་ཡིད་དུ་འོང་མ་པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་མ། ཕྱག་གཉིས་ཀྱིས་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་མཛད་པའོ། །ཐབས་ཀྱི་ཕ་རོལ་ཏུ་ཕྱིན་མ་མེ་ཏོག་པྲི་ཡང་ཀུ་ལྟ་པུ་ལྗང་གུ་པདྨ་སེར་པོ་ལ་གནས་པའི་རལ་གྲི་དང་རྡོ་རྗེ་འཛིན་པའོ། །སྨོན་ལམ་གྱི་ཕ་རོལ་ཏུ་ཕྱིན་མ་ཨུཏྤལ་སྔོན་པོའི་མདོག་ཅན་ཨུཏྤལ་སྔོན་པོ་ལ་གནས་པའི་རལ་གྲི་འཛིན་པའོ། །སྟོབས་ཀྱི་ཕ་རོལ་ཏུ་ཕྱིན་མ་དམར་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་པའོ། །ཡེ་ཤེས་ཀྱི་ཕ་རོལ་ཏུ་ཕྱིན་མ་དཀར་མོ་རཏྣ་སྣ་ཚོགས་པའི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་འཛིན་པའོ། །རྡོ་རྗེ་ལས་ཀྱི་ཕ་རོལ་ཏུ་ཕྱིན་མ་ནི་སྐུ་མདོག་སྣ་ཚོགས་པ་ཨུཏྤལ་སྔོན་པོ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །ནུབ་ཏུ་དབང་བཅུ་མ་ནི་ཕྱག་གཉིས་གཡས་པ་རྣམས་ཀྱིས་པདྨ་འཛིན་པའོ། །གཡོན་པ་རྣམས་ཀྱིས་སྙེམས་པས་རང་རང་གི་ཕྱག་རྒྱ་འཛིན་པའོ། །དེ་ལ་ཚེ་ལ་དབང་བ་མ་ནི་དཀར་དམར་གྱི་མདོག་ཅན་ནོར་བུ་པདྨ་རཱ་ག་ལ་གནས་པའི་ཏིང་ངེ་འཛིན་གྱི་ཕྱག་རྒྱ་ཅན་གྱིས་སངས་རྒྱས་ཚེ་དཔག་མེད་ཀྱི་སྐུ་འཛིན་པའོ། །སེམས་ལ་དབང་བ་མ་ནི་དཀར་མོ་རྡོ་རྗེ་རྩེ་ལྔ་པ་དམར་པོ་འཛིན་པའོ། །ཡོ་བྱད་
ལ་དབང་བ་མ་ནི་སེར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །ལས་ལ་དབང་བ་མ་ནི་ལྗང་གུ་སྣ་ཚོགས་རྡོ་རྗེ་འཛིན་པའོ། །སྐྱེ་བ་ལ་དབང་བ་མ་ནི་སྐུ་མདོག་སྣ་ཚོགས་མ་མེ་ཏོག་ཛཱ་ཏི་ཁ་དོག་སྣ་ཚོགས་པའི་ཡལ་འདབ་འཛིན་པའོ། །རྫུ་འཕྲུལ་ལ་དབང་བ་མ་ནི་ནམ་མཁའ་ལྟར་སྔོ་བ་སངས་པདྨ་ལ་གནས་པའི་ཉི་མ་དང་ཟླ་བའི་དཀྱིལ་འཁོར་འཛིན་པའོ། །མོས་པ་ལ་དབང་བ་མ་ནི་པདྨའི་རྩ་བ་ལྟར་དཀར་བའི་པྲི་ཡང་ཀུའི་མ་ཏོག་གི་སྙེམ་འཛིན་པའོ། །སྨོན་ལམ་ལ་དབང་བ་མ་ནི་སེར་མོ་ཨུཏྤལ་སྔོན་པོ་འཛིན་པའོ། །ཡེ་ཤེས་ལ་དབང་བ་མ་སྔོན་མོ་ཨུཏྤ་ལ་སྔོན་པོ་ལ་གནས་པའི་རལ་གྲི་འཛིན་པའོ། །ཆོས་ལ་དབང་བ་མ་སྐུ་མདོག་དཀར་མོ་པདྨ་ལ་གནས་པའི་བུམ་པ་བཟང་པོ་འཛིན་པའོ། །དེ་བཞིན་ཉིད་མ་དཀར་མོ་ཕྱག་གཡས་པས་པདྨ་དཀར་པོ་འཛིན་པ། གཡོན་པས་རྡོ་རྗེ་རིན་པོ་ཆེའི་སྙེ་མ་འཛིན་པའོ། །སངས་རྒྱས་ཀྱི་བྱང་ཆུབ་མ་གསེར་གཞུ་ལྟ་བུའི་མདོག་ཅན་ཕྱག་གཡས་ཀྱིས་པདྨ་སེར་པོ་ལ་གནས་པའི་རྡོ་རྗེ་རྩེ་ལྔ་པ་འཛིན་པའོ། །གཡོན་པ་ཡིད་བཞིན་གྱི་ནོར་བུའི་རྒྱལ་མཚན་གྱི་སྟེང་དུ་འཁོར་ལོ་འཛིན་པའོ། །བྱང་དུ་གཟུགས་མ་བཅུ་གཉིས་ནི་ཕྱག་གཉིས་མ་གཡས་པ་རྣམས་ཀྱིས་སྣ་ཚོགས་རྡོ་རྗེ་དང་གཡོན་པ་རྣམས་སྙེམས་པ་དང་བཅས་པས་རང་རང་གི་མཚན་མ་འཛིན་པ་སྟེ། དེ་ལ་དབྱིག་གི་བློ་གྲོས་མ་སེར་མོ་འབྲས་ཀྱི་སྙེ་མ་འཛིན་པའོ། །རིན་ཆེན་སྐར་མདའ་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །གཙུག་ཏོར་རྣམ་པར་རྒྱལ་མ་དཀར་མོ་ནོར་བུ་ཟླ་བ་ཆུ་ཤེལ་གྱི་བུམ་པ་འཛིན་པའོ། །འོད་ཟེར་ཅན་དཀར་དམར་སྐུད་པ་དང་བཅས་པའི་ཁབ་འཛིན་པའོ། །རི་ཁྲོད་ལོ་མ་ཅན་ལྗང་གུ་རྨ་བྱའི་མཇུག་སྒྲོ་འཛིན་པའོ། །དགུ་སེལ་མ་དཀར་མོ་དུག་གི་མེ་ཏོག་གི་ཆུན་པོ་འཛིན་པའོ། །སྒོ་མཐའ་ཡས་མ་མེ་ཏོག་པྲི་ཡང་ཀུ་ལྟར་ལྗང་བུ་ཆུ་སྐྱེས་དམར་པོ་ལ་གནས་པའི་མི་ཟད་པའི་གཏེར་ཆེན་པོའི་བུམ་པ་འཛིན་པའོ། །ཙུནད་མ་དཀར་མོ་བགྲང་ཕྲེང་འཕྱང་བའི་རིལ་བ་སྤྱི་བླུགས་འཛིན་པའོ། །ཤེས་རབ་འཕེལ་མ་དཀར་མོ་ཨུཏྤལ་སྔོན་པོ་ལ་གནས་པའི་རལ་གྲི་འཛིན་པའོ། །ལས་
དང་སྒྲིབ་པ་ཐམས་ཅད་རྣམ་པར་སེལ་བ་ལྗང་གུ་སྟེ་རྡོ་རྗེ་རྩེ་གསུམ་པས་མཚན་པའི་པདྨ་དཀར་དམར་འཛིན་པའོ། །ཡེ་ཤེས་མི་ཟད་པའི་ཟླ་མ་ཏོག་དམར་མོ་རཏྣའི་ཟ་མེ་ཏོག་འཛིན་པའོ། །སངས་རྒྱས་ཐམས་ཅད་ཀྱི་ཆོས་ཀྱི་མཛོད་མོ་སེར་མོ་པདྨ་ལ་གནས་པའི་རཏྣ་སྣ་ཚོགས་ཀྱི་དཔེ་སྒྲོམ་འཛིན་པའོ། །ཤར་ཕྱོགས་ཀྱི་སྒོར་ཆོས་སོ་ཡང་དག་པར་རིག་པ་མ་སྐུ་མདོག་དཀར་དམར་ཕྱག་གཉིས་ཀྱིས་རྡོ་རྗེ་ལྕགས་ཀྱུ་དང་ཞགས་པ་འཛིན་པའོ། །ལྷོ་ཕྱོགས་ཀྱི་སྒོར་དོན་སོ་སོ་ཡང་དག་པར་རིག་མ་མ་ར་ཀ་ཏའི་མདོག་ཅན་ཕྱག་གཡོན་གྱི་རིན་པོ་ཆེའི་ཞགས་པ་འཛིན་པའོ། །ནུབ་ཀྱི་སྒོར་ངེས་པའི་ཚིག་སོ་སོ་ཡང་དག་པར་རིག་པ་མ་དམར་པོའི་ཕྱག་གཉིས་ཀྱིས་མཐའ་གཉིས་སུ་པདྨས་མཚན་པའི་ལྕགས་སྒྲོག་འཛིན་པའོ། །བྱང་གི་སྒོར་སྤོབས་པ་སོ་སོ་ཡང་དག་པར་རིག་པ་མ་མ་ར་ཀ་ཏ་ལྟ་བུ་ལྗང་གུ་ཕྱག་གཉིས་ཀྱིས་རྡོ་རྗེ་རྩེ་གསུམ་པས་མཚན་པའི་དྲིལ་བུ་འཛིན་པའོ། །མེའི་མཚམས་སུ་སྒེག་མོ་སེར་མོ་སྒེག་པ་དང་བཅས་པའི་ཕྱག་གཉིས་ཀྱིས་རྡོ་རྗེ་གཉིས་འཛིན་པའོ། །བདེན་བྲལ་དུ་ཕྲེང་བ་མ་དམར་སེར་ཕྱག་གཉིས་རཏྣའི་ཕྲེང་བ་འཛིན་པའོ། །རླུང་དུ་གླུ་མ་དམར་མོ་ཕྱག་གཉིས་ཀྱིས་པི་ཝང་བསྒེང་བའོ། །དབང་ལྡན་དུ་གར་མ་ལྗང་གུ་ཕྱག་གཉིས་ཀྱིས་གར་བྱེད་པའི་ཚུལ་གྱིས་རྡོ་རྗེ་རྩེ་གསུམ་པ་དང་རྡོ་རྗེ་དྲིལ་བུ་འཛིན་པའོ། །མོས་པས་སྤྱོད་པའི་ས་ལ་སོགས་པའི་ལྷ་མོ་འདི་རྣམས་ཐམས་ཅད་ནི་རཏྣའི་རྒྱན་སྣ་ཚོགས་དང་གོས་དང་རཏྣའི་ཅོད་པན་དང་ལྡན་པ་དང་ཅུང་ཟད་འཛུམ་པ་དང་སྒེག་པའི་ཉམས་དང་ལྡན་པ་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །ཁྱད་པར་དུ་སྒོ་སྐྱོང་མ་རྣམས་ནི་ཉི་མའི་དཀྱིལ་འཁོར་ལ་བཞུགས་པའོ། །གཞན་ནི་དེ་རྣམས་ཀྱང་ཟླ་བ་ལ་གནས་པའོ་ཞེས་སོ། །དཀྱིལ་འཁོར་གསུམ་པ་དབང་ལྡན་ནས་བརྩམས་ནས་བྱང་ཆུབ་སེམས་དཔའ་རྣམས་ཏེ། དེ་ལ་ཤར་ཕྱོགས་ཀྱི་སྣམ་བུ་ལ་ཀུན་ཏུ་བཟང་པོ་སེར་པོ་ཕྱག་གཡས་པས་མཆོག་སྦྱིན་གཡོན་པས་ཨུཏྤལ་ལ་གནས་པའི་རལ་གྲི་འཛིན་པའོ། །བློ་གྲོས་མི་ཟད་པ་སེར་པོ་གཡས་པས་རལ་གྲི་དང་གཡོན་པས་མི་
འཇིགས་པས་པདྨ་འཛིན་པའོ། །སའི་སྙིང་པོ་སེར་པོ་གཡས་པས་ས་གནོན་མཛད་པ། གཡོན་པས་པདྨ་ལ་གནས་པའི་དཔག་བསམ་གྱི་ཤིང་འཛིན་པའོ། །ནམ་མཁའི་སྙིང་པོ་ལྗང་གུ་གཡས་པས་རཏྣ་སྣ་ཚོགས་ཀྱི་ཆར་འབེབས་པ། གཡོན་པས་ཡིད་བཞིན་གྱི་ནོར་བུ་འཛིན་པའོ། །ལྷོ་ཕྱོགས་ཀྱི་སྣམ་བུ་ལ་ནམ་མཁའ་མཛོད་སེར་པོ་གཡས་པས་ཡིད་བཞིན་གྱི་ནོར་བུ་འཛིན་པ། གཡོན་པས་བུམ་པ་བཟང་པོ་ལ་འཕྱང་བའི་དཔག་བསམ་གྱི་ཤིང་འཛིན་པའོ། །ཕྱག་ན་རིན་ཆེན་ལྗང་གུ་ཕྱག་གཡས་པས་རིན་པོ་ཆེ་དང་གཡོན་པས་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །བློ་གྲོས་རྒྱ་མཚོ་དཀར་པོ་གཡས་དུང་དང་གཡོན་པས་རྡོ་རྗེ་རལ་གྲི་འཛིན་པའོ། །རྡོ་རྗེ་སྙིང་པོ་ཨུཏྤལ་སྔོན་པོའི་ལོ་མ་ལྟ་བུའི་མདོག་ཅན་གཡས་པས་རྡོ་རྗེ་དང་གཡོན་པས་མདོ་སྡེ་ས་བཅུ་པའི་པུ་སྟེ་འཛིན་པའོ། །ནུབ་ཏུ་སྤྱན་རས་གཟིགས་དབང་ཕྱུག་གཡས་པས་མཆོག་སྦྱིན་གྱི་ཕྱག་རྒྱ་གཡོན་པས་ཆུ་སྐྱེས་དཀར་པོ་འཛིན་པའོ། །མཐུ་ཆེན་ཐོབ་སེར་པོ་གཡས་པས་རལ་གྲི་གཡོན་པས་པདྨ་འཛིན་པའོ། །ཟླ་འོད་དཀར་པོ་གཡས་པས་རྡོ་རྗེ་འཁོར་ལོ་དང་གཡོན་པས་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །དྲ་བ་ཅན་གྱི་འོད་དཀར་དམར་གཡས་པས་རལ་གྲི་དང་གཡོན་པས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །བྱང་དུ་འོད་དཔག་མེད་དཀར་པོ་གཡས་ན་སྣ་ཚོགས་པདྨ་དང་གཡོན་པས་པདྨ་ལ་གནས་པའི་བུམ་པ་འཛིན་པའོ། །སྤོབས་པ་བརྩེགས་པ་སེར་པོ་གཡས་པས་སེ་གོལ་གཡོན་པས་པདྨ་ལ་གནས་པའི་རལ་གྲི་འཛིན་པའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོགས་གུར་གུམ་ལྟ་བུ་གཡས་པ་རྡོ་རྗེ་རྩེ་ལྔ་པ་དང་གཡོན་པ་ཤཀྟི་འཛིན་པའོ། །སྒྲིབ་པ་ཐམས་ཅད་རྣམ་པར་སེལ་བ་སྔོན་པོ་གཡས་པས་རལ་གྲི་གཡོན་པས་སྣ་ཚོགས་རྡོ་རྗེ་ས་མཚན་པའི་བ་དན་འཛིན་པའོ། །བཅུ་དྲུག་པོ་འདི་དག་ནི་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པ་རིན་པོ་ཆེའི་ཅོད་པན་ཅན་རིན་པོ་ཆེ་དང་ན་བཟའ་སྣ་ཚོགས་པས་བརྒྱན་པ་ཞལ་གཅིག་པ་ཕྱག་གཉིས་པ་རྣམས་སོ། །ཤར་སྒོར་མ་ཧེ་ལ་གཤིན་རྗེ་མཐར་
བྱེད་ནག་པོ་ཞལ་དྲུག་པ་གསུས་པ་འཕྱང་བ་ཞབས་དྲུག་པ་ཕྱག་དྲུག་གི་གཡས་པ་རྣམས་ཀྱིས་ལྕགས་ཀྱུ་དང་རལ་གྲི་དང་མདའ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་གཞུ་འཛིན་པའོ། །ཞལ་དང་ཞབས་རྣམས་ཀྱི་བྱེ་བྲག་གོང་བཞིན་ནོ། །ལྷོ་སྒོར་ཤེས་རབ་མཐར་བྱེད་སེར་པོ་ཞལ་བཞི་པ་རྩ་བའི་ཞལ་སྒེག་པ་དང་བཅས་པའི་གཡས་གདངས་པ། ནུབ་ཏུ་དྲག་པོ་ཆེན་པོ་གཡོན་ཞི་བ་ཡང་ན་འདི་རྣམས་ནི་གོ་རིམས་ཇི་ལྟ་བས་སེར་པོ་དང་སྔོན་པོ་དང་དམར་པོ་དང་ལྗང་གུ་རྣམས་སོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་ཞགས་པ་དང་རྡོ་རྗེ་དང་རལ་གྲི་དང་མདའ་རྣམས་འཛིན་པའོ། །གཡོན་པ་རྣམས་ཀྱིས་སྙིང་གར་ལྕགས་ཀྱུ་དང་རྡོ་རྗེ་དྲིལ་བུ་དང་མདུང་དང་གཞུ་འཛིན་པའོ། །ནུབ་ཏུ་པདྨ་མཐར་བྱེད་དམར་པོ་ཞལ་བཞི་དམར་བ་སྒེག་པ་དང་དྲག་པོ་དང་བཞད་པ་དང་ཞི་བའི་ཉམས་དང་ལྡན་པ་ནི། རྩ་བ་དང་གཡས་དང་རྒྱབ་དང་གཡོན་པའི་ཞལ་རྣམས་སོ། །ཡང་ན་འདི་རྣམས་ནི་དམར་པོ་དང་ནག་པོ་དང་སེར་པོ་དང་དཀར་པོ་རྣམས་སོ། །ཕྱག་བརྒྱད་པ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པ་ཕྱག་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་འཛིན་པའོ། །གཡོན་པ་རྣམས་ཀྱིས་དྲིལ་བུ་དང་སྡིགས་མཛུབ་དང་བཅས་པའི་ཞགས་པ་དང་གཞུ་འཛིན་པའོ། །གསུམ་པོ་འདི་དག་ནི་རོལ་པའི་ཀུན་ཏུ་བསྐྱོད་པས་གནས་པའོ། །བྱང་དུ་བགེགས་མཐར་བྱེད་སྔོན་པོ་ཞལ་བཞི་སྔོན་པོའམ་ཡང་ན་སྔོན་པོ་དང་སེར་པོ་དང་དམར་པོ་དང་ལྗང་གུ་རྣམས་སོ། །ཕྱག་བརྒྱད་པ་གཉིས་ཀྱིས་རྡོ་རྗེ་བསྡམས་པའི་ཚུལ་གྱིས་རྡོ་རྗེ་དྲིལ་བུ་དང་གཡས་པ་རྣམས་ན་རལ་གྲི་དང་མདའ་དང་ལྕགས་ཀྱུ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང་དྲིལ་བུ་འཛིན་པའོ། །ཚོགས་ཀྱི་བདག་བོ་གཡོན་བརྐྱང་བས་ཀུན་ནས་མནན་ནས་བཞུགས་པའོ། །དབང་ལྡན་གྱི་མཚམས་སུ་འཇིག་རྟེན་གསུམ་ལས་རྣམ་པར་རྒྱལ་བ་སྔོན་པོ་ཞལ་བཞི་སྔོན་པོ་རྩ་བའི་ཞལ་ཁྲོ་བ་དང་བཅས་པའི་སྒེག་པ་དང་གཡས་དྲག་པོ་རྒྱབ་དཔའ་བ་གཡོན་མི་སྡུག་པའོ། །ཡང་ན་འདི་དག་སྔོན་པོ་དང་
སེར་པོ་དང་དམར་པོ་དང་དཀར་པོ་རྣམས་སོ། །འདི་ནི་ཕྱག་བརྒྱད་པ་ཕྱག་གཉིས་ཀྱིས་རྡོ་རྗེ་དང་དྲིལ་བུ་དང་ལྡན་པ་ཐུགས་ཀར་བཟུང་ནས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛད་པ་གཡས་པ་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་དང༌། གཡོན་པ་རྣམས་ཀྱིས་རྡོ་རྗེ་དང་ཞགས་པ་དང༌། གཞུ་འཛིན་པའོ། །གཡོན་བརྐྱང་བའི་སྟང་སྟབས་ཀྱིས་ཞབས་གཡོན་པས་དབང་ཕྱུག་ཆེན་པོའི་མགོ་མནན་པ་གཡས་པས་ཨུ་མའི་ནུ་མར་མནན་པའོ། །མེར་རྡོ་རྗེ་ཉི་མ་མེ་ལྟར་འབར་བ་ནག་པོ་སྒེག་པ་དང་དཔའ་བ་དང་འཇིགས་སུ་རུང་བ་དང༌། སྙིང་རྗེའི་རོ་དང་ལྡན་པའི་ཞལ་བཞི་ནག་པོ་འམ་ཡང་ན་འདི་དག་ནི་སྔོན་པོ་དཀར་པོ་སེར་པོ་དམར་པོ་རྣམས་སོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་འཁོར་ལོ་འཛིན་པའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་དང་གཞུ་དང་ཁ་ཊྭཱཾ་ག་ལ་འབྲེལ་པའི་བ་དན་འཛིན་པའོ། །ཆུང་མ་དང་བཅས་པའི་ཁྱབ་འཇུག་གཡས་བརྐྱང་གིས་མནན་པའོ། །བདེན་བྲལ་དུ་ཧེ་རུ་ཀ་རྡོ་རྗེ་སྔོན་པོ་སྔོན་པོའི་ཞལ་བཞི་པ་རྩ་བའི་ཞལ་དྲག་པོ་གཡས་པ་རབ་ཏུ་དགའ་བས་བཞད་པ་རྒྱབ་ནི་ཟ་བར་རྔམས་པ་གཡོན་པ་སྒེག་པའོ། །ཡང་ན་འདི་དག་ནི་སྔོན་པོ་དང་དམར་པོ་དང་ལྗང་གུ་དང་དཀར་པོའོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་རྩེ་ལྔ་པ་དང་མདའ་དང་ཁྲག་གིས་བཀང་བའི་ཐོད་པ་དང༌། གཡོན་པ་རྣམས་ཀྱིས་སྙིང་གར་པདྨ་ཁ་བྱེད་བ་དང༌། གཞུ་དང་དྲིལ་བུ་དང་བ་དན་དང་བཅས་པའི་ཁ་ཊྭཱཾ་ག་འཛིན་པའོ། །ཕྱག་གཉིས་ཀྱིས་འཇིགས་བྱེད་ཀྱི་པགས་པ་རླུང་གི་གོས་འདྲ་བ་འཛིན་པའོ། །ཆུང་མ་དང་བཅས་པའི་ཚངས་པ་གཡོན་བརྐྱང་བས་མནན་ནས་གནས་པའོ། །རླུང་དུ་རྟ་མཆོག་ལྗང་གུ་ལྗང་གུའི་ཞལ་བཞི་པ་ཙམ་པ་ཁྲོ་བོ་དང་བཅས་པའི་སྒེག་པ་གཡས་པ་དྲག་པོ་གཡོན་པའི་ཞལ་ཚངས་པ་ལྟ་བུ་སྟེ། ཡང་ན་ནི་འདི་ནི་ལྗང་གུ་དང་སྔོན་པོ་དང་དཀར་པོ་རྣམས་ཏེ། སྤྱི་བོར་རྟ་མགོ་ལྗང་གུའོ། །འདི་ནི་ཕྱག་བརྒྱད་པ་གཡས་དང་པོ་སྣ་ཚོགས་རྡོ་རྗེ་དང་བ་དན་གསུམ་པ་དང་ལྡན་པས་ཕྱག་བསྒྲེང་བའི་ཚུལ་བྱས་པ་གཉིས་པས་བ་དན་གསུམ་པའི་ཚུལ་བྱས་པ། ཕྱག་གཉིས་ཀྱིས་རལ་གྲི་དང་མདའ་འཛིན་པའོ། །
གཡོན་པས་ཕུབ་དང་བཅས་པའི་ཕྱག་གི་སྣ་ཚོགས་ཆུ་སྐྱེས་འཛིན་པ། ལྷག་མ་གསུམ་གྱིས་ཤ་ཀ་ཏི་དང་དབྱུག་པ་དང་གཞུ་རྣམས་འཛིན་པའོ། །ཞབས་གཡོན་བསྐུམ་པ་གཡས་བརྐྱང་བ་དང་གཡས་བསྐུམ་ཞིང་གཡོན་བརྐྱང་བའི་ཞབས་བཞིའོ། །གཡས་དང་པོ་གཅིག་གིས་དབང་མོ་དང་དཔལ་མོ། གཉིས་པས་དགའ་མོ་དང་ཚིམ་མོ། གཡོན་པ་གཅིག་གིས་དབང་པོ་དང་སྦྲང་རྩིར་བྱེད་པ་དང༌། གཉིས་པས་རྒྱལ་བར་བྱེད་པ་དང༌། དཔྱིད་ཀྱི་ལྷ་མནན་ནས་གནས་པའོ། །དཀྱིལ་འཁོར་གྱི་བདག་པོའི་སྟེང་དུ་ནམ་མཁའ་ལ་གཙུག་ཏོར་འཁོར་ལོས་སྒྱུར་བ་སེར་པོ་ཞལ་བཞི་སེར་བའམ་ཡང་ན་སེར་པོ་དང་སྔོན་པོ་དང་དམར་པོ་དང་དཀར་པོའོ། །ཕྱག་བརྒྱད་པའི་གཡས་པ་རྣམས་ཀྱིས་འཁོར་ལོ་དང་ལྕགས་ཀྱུ་དང་རལ་གྲི་དང་མདའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་དང་བགྲང་ཕྲེང་དང་གཞུ་བསྣམས་པ། རོལ་པའི་ཀུན་དུ་བསྐྱོད་པས་གནས་པའོ། །འོག་ཏུ་གནོད་མཛེས་རྒྱལ་པོ་ནག་པོ་ཞལ་བཞི་པ་དྲག་པོ་དང་ཞི་བ་དང༌། བཞད་པ་དང་སྒེག་པའི་ཉམས་དང་ལྡན་པའི་ནག་པོའོ། །ཡང་ན་ཞལ་བཞི་ནི་ནག་པོ་དང་དཀར་པོ་དང་དམར་པོ་དང་སེར་པོའོ། །ཕྱག་བརྒྱད་པའི་གཡས་པ་རྣམས་ནི་རྡོ་རྗེ་དང་ལྕགས་ཀྱུ་དང་རལ་གྲི་དང་མདའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་གསལ་ཤིང་རྩེ་གཅིག་པ་དང་གཞུ་རྣམས་འཛིན་པ་གཡོན་བརྐྱང་གིས་གནས་པའོ། །ཁྲོ་བོ་བཅུ་པོ་འདི་དག་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པ་ཞལ་རེ་རེ་ཞིང་སྤྱན་གསུམ་གསུམ་དམར་བ་སྨིན་མ་འཁྱོག་པ་སྟག་གི་པགས་པས་སྐུའི་སྟོད་སྨད་ལ་དཀྲིས་པ་ཐོད་པའི་ཕྲེང་བས་གཙུག་ཏོར་བྱས་པ་དབུ་སྐྲ་འབར་བ་དམར་སེར་གྱེན་དུ་བཅིངས་པ་སྨ་ར་དམར་སེར་དང་ལྡན་པ་ཀླུའི་རྒྱལ་པོ་བརྒྱད་ཀྱིས་འཇིགས་སུ་རུང་བའོ། །དཀྱིལ་འཁོར་གསུམ་པ་ཁོ་ནའི་གྲྭ་བཞིའི་ནང་ན་འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པ་ཁྲོ་བོ་བཞིའི་ཕྱིའི་རེ་ཁཱའི་ཕྱི་རོལ་གྱི་གནས་སུ་མེ་ལ་སོགས་པའི་ཟུར་ཐིག་བཞི་པོ་རྣམས་ཀྱི་གཡས་ལོགས་སུ་མེ་ཏོག་མ་ལ་སོགས་པ་བཞིའོ། །གཡོན་ལོགས་སུ་གཟུགས་རྡོ་རྗེ་མ་ལ་སོགས་པ་བཞིའོ།།
དེ་ལ་མེ་ཏོག་མ་སེར་མོ་ཕྱག་ན་མེ་ཏོག་གི་སྣོད་འཛིན་པའོ། །བདུག་སྤོས་མ་ནག་མོ་ཕྱག་ན་བདུག་སྤོས་ཀྱི་ཕོར་པ་འཛིན་པའོ། །མར་མེ་མ་དམར་མོ་ཕྱག་ན་རཏྣའི་སྒྲོན་མེའི་མཆོད་སྡོང་འཛིན་པའོ། །དྲི་ཆབ་མ་ལྗང་གུ་ཕྱག་ན་དྲིའི་དུང་ཆོས་འཛིན་པའོ། །རྡོ་རྗེ་གཟུགས་མ་སེར་མོ་ཕྱག་ན་མེ་ལོང་འཛིན་པའོ། །རྡོ་རྗེ་སྒྲ་མ་ལྗང་གུ་ཕྱག་ན་པི་ཝང་འཛིན་པའོ། །རྡོ་རྗེ་རོ་མ་དམར་མོ་ཕྱག་ན་རོའི་སྣོད་འཛིན་པའོ། །རྡོ་རྗེ་རེག་བྱ་མ་སྣ་ཚོགས་པའི་ཁ་དོག་ཅན་ཕྱག་ན་གོས་སྣ་ཚོགས་འཛིན་པའོ། །བརྒྱད་པོ་འདི་དག་ནི་ཞལ་གཅིག་ཕྱག་གཉིས་མ་རཏྣའི་ཅོད་པན་དང་ལྡན་པ་གོས་སྣ་ཚོགས་དང་རིན་པོ་ཆེས་བརྒྱན་པ་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །བཞི་པ་རྡོ་རྗེ་རིགས་ཀྱི་དཀྱིལ་འཁོར་ལ་དབང་པོའི་ཕྱོགས་སུ་དབང་པོ་སེར་པོ་གླང་པོ་ཆེ་ས་སྲུང་དཀར་པོའི་སྟེང་ན་གནས་པ་ཕྱག་གཡས་ན་རྡོ་རྗེ་གཡོན་པ་ནུ་མ་འཛིན་པའོ། །གཤིན་རྗེར་མ་ཧེ་ལ་གཤིན་རྗེ་ནག་པོ་ཕྱག་གཉིས་ཀྱིས་དབྱུག་པ་དང་རྩེ་གཅིག་པ་འཛིན་པའོ། །ཆུར་ཆུ་སྲིན་ལ་ཆུ་བདག་དཀར་པོ་སྦྲུལ་མ་གོའི་གདེངས་ཀ་བདུན་པ་ཀླུའི་ཞགས་པ་དང་དུང་དཀར་འཛིན་པའོ། །ལུས་ངན་དུ་མི་ལ་ལུས་ངན་སེར་པོ་ལྕགས་ཀྱུ་དང་དབྱུག་ཏོ་འཛིན་པའོ། །དབང་ལྡན་དུ་དབང་ལྡན་དཀར་པོ་གླང་གི་སྟེང་ན་གནས་པ་རྩེ་གསུམ་དང་ཐོད་པ་འཛིན་པ་ཐོད་པ་དང་རལ་པའི་ཐོར་ཅོག་དང་ཟླ་བ་ཕྱེད་པས་དབུ་བརྒྱན་པ། སྦྲུལ་གྱི་མཆོད་ཕྱིར་ཐོགས་དང་ལྡན་པ་མགྲིན་པ་སྔོན་པོའོ། །མེར་ར་ལ་མེ་ལྷ་དམར་པོ་བླུགས་གཟར་དང་སྤྱི་བླུགས་འཛིན་པའོ། །བདེན་བྲལ་དུ་སྲིན་པོའི་བདག་པོ་སྔོན་པོ་རོལ་གནས་པ་རལ་གྲི་དང་ཕུབ་འཛིན་པའོ། །རླུང་དུ་རླུང་ལྷ་སྔོན་པོ་རི་དགས་ལ་གནས་པ་རླུང་རས་འཛིན་པའོ། །བརྒྱད་པོ་འདི་དག་ནི་ཕྱག་བཞི་པ་ཕྱག་གཡས་པས་ཕྱག་མཚན་དང་པོ་འཛིན་པ། གཡོན་པས་ཕྱག་མཚན་གཉིས་འཛིན་ཅིང་རང་རང་གི་བཙུན་མོ་ལ་འཁྱུད་པ་ཕྱག་འོག་མ་གཉིས་གཙོ་བོ་ལ་འདུད་པའི་ཚུལ་གྱིས་སྤྱི་བོར་ཐལ་མོ་སྦྱོར་བའོ། །དབང་ལྡན་དང་ཉེ་བའི་ཕྱི་རོལ་དུ་དབང་ལྡན་གྱི་མཚམས་ནས་བརྩམས་ནས་རིམ་པས་
ཚངས་པ་ལ་སོགས་པ་སྟེ་དེ་ལ་ཚངས་པ་ནི་ངང་པ་ལ་ཞོན་པ་སེར་པོ་ཞལ་བཞི་ནི་སེར་པོའོ། །ཕྱག་བཞི་པ་དང་པོ་གཉིས་ཀྱིས་བགྲང་ཕྲེང་དང་པདྨ་འཛིན་པའོ། །འོག་མ་གཉིས་ཀྱིས་དབྱུག་པ་དང་སྤྱི་བླུགས་བཟུང་ནས་ཐལ་མོ་སྦྱར་བའོ། །ཁྱབ་འཇུག་ནག་པོ་ཁྱུང་ལ་ཞོན་པ་ཕྱག་བཞི་པ་དང་པོ་གཉིས་ཀྱིས་འཁོར་ལོ་དང་དུང་འཛིན་པ། གཡས་གཡོན་གཉིས་ཀྱིས་མདུང་ཐུང་དང་ས་རཾ་ཁའི་གཞུ་འཛིན་པ་སྤྱི་བོར་ཐལ་མོ་སྦྱར་བའོ། །དབང་ཕྱུག་ཆེན་པོ་དཀར་པོ་གླང་ལ་ཞོན་པ་རལ་པའི་ཐོར་ཅོག་ཅན་ཟླ་བ་ཕྱེད་པས་མཚན་པ། ཕྱག་བཞི་པ་སྤྱི་བོར་ཐལ་མོ་སྦྱར་བ་དང་རྩེ་གསུམ་པ་དང་ཐོད་པ་འཛིན་པའོ། །གདོང་དྲུག་དམར་པོ་རྨ་བྱ་ལ་ཞོན་པ་གདོང་དྲུག་པ་ཕྱག་དྲུག་པ་གཡས་པ་གཉིས་ཤ་ཀ་ཏི་དང་རྡོ་རྗེ་འཛིན་པ་གཡོན་པ་གཉིས་ཀྱིས་ཁྱིམ་བྱ་དང་དྲིལ་བུ་འཛིན་པའོ། །ལྷག་མ་གཉིས་ཀྱིས་སྤྱི་བོར་ཐལ་མོ་སྦྱར་བའོ། །འདི་རྣམས་ཀྱང་གོང་བཞིན་དུ་རང་གི་བཙུན་མོ་ལ་འཁྱུད་པའོ། །ཚངས་མ་ནི་ཚངས་པ་དང་མཚུངས་པའོ། །དྲག་མོ་ནི་དྲག་པོ་དང་མཚུངས་པའོ། །ཁྱབ་འཇུག་མ་ནི་ཁྱབ་འཇུག་དང་མཚུངས་པའོ། །གཞོན་དུ་མ་ནི་གདོང་དྲུག་དང་མཚུངས་པའོ། །དབང་མོ་ནི་དབང་པོ་དང་མཚུངས་པའོ། །ཕག་མོ་ནག་མོ་ནི་འུག་པ་ལ་ཞོན་པ་ཕྱག་བཞི་པ་ཕྱག་གཡས་གཡོན་གཉིས་ཀྱིས་རོ་ཧི་ཏའི་ཉ་དང་ཐོད་པ་འཛིན་པའོ། །གཞན་གཉིས་ཀྱིས་ཐལ་མོ་སྦྱར་བའོ། །ཙ་མུཎྜཱི་དམར་མོ་རི་དགས་ལ་ཞོན་པ་ཕྱག་བཞི་མ་གཡས་གཡོན་གྱིས་གྲི་གུག་དང་ཐོད་པ་འཛིན་པ་གཉིས་ཀྱིས་ཐལ་མོ་སྦྱར་བའོ། །བྷྲྀངྒི་རི་ཏི་ནག་མོ་ཤིན་ཏུ་སྐེམ་པ་ཕྱག་བཞི་པ་གཉིས་ཀྱིས་ཕྲེང་བ་དང་སྤྱི་བླུགས་འཛིན་པ་གཉིས་ཀྱིས་ཐལ་མོ་སྦྱར་བའོ། །ཚོགས་བདག་དཀར་པོ་བྱི་བ་ལ་ཞོན་པ་གླང་པོ་ཆེའི་གདོང་ཅན་སྤྲུལ་གྱི་མཆོད་ཕྱིར་ཐོགས་པ་ཅན་ཕྱག་བཞིའི་གཡས་གཉིས་ཀྱིས་རྩེ་གསུམ་པ་དང་ལ་དུ་གཡོན་གཉིས་ཀྱིས་དགྲ་སྟ་དང་ལ་ཕུག་འཛིན་པའོ། །ནག་པོ་ཆེན་པོ་ནག་པོ་རྩེ་གསུམ་པ་དང་ཐོད་པ་འཛིན་པའོ། །དགའ་བྱེད་དབང་ཕྱུག་ནག་པོ་རྫ་རྔ་ལ་ཞོན་པ་རྫ་རྔ་བརྡུང་བ་ལ་བརྩོན་པའོ། །ཉི་མ་དམར་པོ་རྟ་བདུན་གྱིས་འདྲེན་པའི་ཤིང་རྟ་ལ་ཞོན་པ་གཡས་པ་དང་གཡོན་པའི་ཕྱག་གཉིས་
པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །ཟླ་བ་དཀར་པོ་ངང་པ་ལ་ཞོན་པ་ཕྱག་གཡས་པ་དང་གཡོན་པས་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །མིག་དམར་དམར་པོར་ལ་ཞོན་པ་གཡས་ན་གྲི་གུག་གཡོན་པས་མི་མགོ་ཟ་བའི་ཚུལ་གྱིས་འཛིན་པའོ། །ལྷག་པ་སེར་པོ་པདྨའི་སྟེང་དུ་མདའ་དང་གཞུ་འཛིན་པའོ། །ཕུར་བུ་དཀར་པོ་ཐོད་པའམ་སྦལ་བ་ལ་ཞོན་པ་ཕྲེང་བ་དང་སྤྱི་བླུགས་འཛིན་པའོ། །པ་བ་སངས་དཀར་པོ་པདྨ་ལ་གནས་པ་ཕྲེང་བ་དང་སྤྱི་བླུགས་འཛིན་པའོ། །སྤེན་པ་ནག་པོ་རུས་སྦལ་ལ་གནས་པ་དབྱུག་པ་འཛིན་པའོ། །སྒྲ་གཅན་དམར་ནག་ཕྱག་གཉིས་ཀྱིས་ཉི་མ་དང་ཟླ་བ་འཛིན་པའོ། །མཇུག་རིངས་ནག་པོ་རལ་གྲི་དང་ཀླུའི་ཞགས་པ་འཛིན་པའོ། །སྟོབས་བཟངས་དཀར་པོ་གླང་པོ་ལ་གནས་པ་རལ་གྲི་དང་གཤོལ་འཛིན་པའོ། །རྒྱལ་བར་བྱེད་པ་ལྗང་གུ་བྱ་ཀོ་ཀི་ལའི་ཤིང་རྟ་ལ་ཞོན་པ་ལྗང་གུ་ཕྱག་བཞི་པ་གཡས་པ་གཉིས་ན་མེ་ཏོག་གི་ཕྲེང་བ་དང་མདའ་གཡོན་གཉིས་ཀྱིས་བཏུང་བའི་སྣོད་དང་གཞུ་འཛིན་པའོ། །སྦྲང་རྩིར་བྱེད་པ་དཀར་པོ་ནེ་ཙོའི་ཤིང་རྟ་ལ་གནས་པ་ཕྱག་བཞི་པ་གཡས་ཆུ་སྲིན་གྱི་རྒྱལ་མཚན་དང་མདའ་གཡོན་པ་གཉིས་ན་བཏུང་བའི་སྣོད་འཛིན་པའོ། །དཔྱིད་ཀྱི་ལྷ་དཀར་པོ་སྤྲེའུ་ལ་གནས་པ་ཕྱག་བཞི་པ་གཡས་པ་གཉིས་ཀྱིས་མདའ་དང་རལ་གྲི་གཡོན་པ་གཉིས་བཏུང་བའི་སྣོད་དང་གཞུ་འཛིན་པའོ། །ཀླུ་མཐའ་ཡས་དང་ནོར་རྒྱས་དང་འཇོག་པོ་དང་སྟོབས་ཀྱི་རྒྱུ་དང་པདྨ་དང་པདྨ་ཆེན་པོ་དང་བུང་སྐྱོང་དང་རིགས་ལྡན་རྣམས་སྦྲུལ་མགོ་བདུན་དང་ལྡན་པ་ཐལ་མོ་སྦྱར་བའོ། །ཡང་ན་རང་རང་གི་ཡབ་ཀྱི་གཡས་པའི་ཕྱག་མཚན་གྱི་གཙོ་བོ་དང་ལྡན་པས་ཐལ་མོ་སྦྱར་བའོ། །ཐགས་བཟངས་རིས་དང་སྟོབས་ལྡན་དང་ཚིམ་བྱེད་དང༌། རྣམ་པར་སྣང་བྱེད་ལ་སོགས་པ་ལྷ་མ་ཡིན་གྱི་དབང་པོ་ཆེན་པོ་རྣམས་མདོག་ནག་པོ་གཡུལ་འགྱེད་པའི་གོ་ཆ་སྣ་ཚོགས་བགོས་པ་རལ་གྲི་དང་ཕེ་ཏ་ཀ་ལ་སོགས་པའི་མཚོན་ཆ་སྣ་ཚོགས་ཕྱག་གིས་འཛིན་པའོ། །ནམ་མཁའ་ལྡིང་གི་དབང་པོ་གཤོག་པ་བརྐྱང་བ་པུས་མོའི་བར་དུ་དཀར་པོ་དེའི་སྟེང་དུ་ལྟེ་བའི་བར་དུ་སེར་པོ་དེའི་སྟེང་དུ་
མགྲིན་པའི་བར་དུ་དམར་པོ། །དེའི་སྟེང་དུ་མགོའི་བར་དུ་ནག་པོ་ཕྱག་གཉིས་ཐལ་མོ་སྦྱར་བའོ། །མིའམ་ཅིའི་རྒྱལ་པོ་ལྗོན་པ་དམར་སེར་ཕྱག་གཉིས་ཀྱིས་པི་ཝང་གི་སྒྲ་སྒྲོགས་པའོ། །དྲི་ཟའི་རྒྱལ་པོ་ཟུར་ཕུད་ལྔ་པ་སེར་པོ་ཕྱག་གཉིས་ཀྱིས་པི་ཝང་གི་སྒྲ་སྒྲོགས་པའོ། །རིག་པ་འཛིན་པའི་རྒྱལ་པོ་དོན་ཀུན་གྲུབ་པ་དཀར་པོ་མེ་ཏོག་གི་ཕྲེང་བ་འཛིན་པའོ། །གང་བ་བཟང་པོ་སྔོན་པོ། ནོར་བུ་བཟང་པོ་སེར་པོ། ནོར་སྦྱིན་དམར་པོ། རྣམ་ཐོས་ཀྱི་བུ་སེར་པོ། པི་ཙི་ཀུཎྜ་ལི་དམར་པོ། ཀི་ལི་མ་ལཱི་ལྗང་གུ། སྒོའི་དབང་པོ་སེར་པོ། སྤྱོད་པའི་དབང་པོ་སེར་པོ་སྟེ། གང་བ་བཟང་པོ་ལ་སོགས་པའི་གནོད་སྦྱིན་གྱི་བདག་པོ་འདི་དག་ནི་ཕྱག་གཉིས་ཀྱི་གཡས་ཀྱིས་ཤིང་ཐོག་པི་ཛ་པཱུ་ར་དང་གཡོན་ནེའུ་ལེ་འཛིན་པའོ། །འཕྲོག་མ་སེར་མོ་ཕྱག་གཉིས་ཀྱིས་ཟན་གྱི་ཆང་བུ་གཉིས་འཛིན་པ་བུ་དང་བཅས་པའོ། །ཐ་སྐར་དཀར་པོ་དང༌། བྲ་ཉེ་ལྗང་གུ་དང༌། སྨིན་དྲུག་སྔོ་བསངས་དང༌། སྣར་མ་དམར་སྐྱ་དང༌། མགོ་ནག་པོ་དང༌། ལག་སེར་པོ་དང༌། ན་བ་སོ་སོར་པོ་དང༌། རྒྱལ་སྔོ་བསངས་དང༌། སྐག་དཀར་པོ་དང༌། མཆུ་སེར་པོ་དང༌། གྲེ་མེ་ཏོག་བྲི་ཡང་ཀུ་ལྟ་བུ་ལྗང་སེར་དང༌། སྤོ་ལྗང་གུ་དང༌། མེ་བཞི་དཀར་པོ་དང༌། ནག་པ་ལྗང་གུ་དང༌། ས་རི་སེར་པོ་དང༌། ས་གནག་པོ་དང༌། ལྷ་མཚམས་ལྗང་གུ་དང༌། སྣོན་སེར་པོ་དང༌། སྣུབས་སེར་པོ་དང༌། ཆུ་སྟོད་ནག་པོ་དང༌། ཆུ་སྨད་དཀར་པོ་དང༌། གྲོ་བཞིན་དཀར་སེར་དང༌། མོན་གྲེ་ནག་པོ་དང༌། མོན་གྲུ་སེར་པོ་དང༌། ཁྲུམས་སྟོད་ལྗང་གུ་དང༌། ཁྲུམས་སྨད་སེར་པོ་དང༌། ནམ་གྲུ་དཀར་སེར་དང༌། བྱི་བཞིན་སྔོ་བསངས་སོ། །ཐ་སྐར་ལ་སོགས་པའི་ལྷ་མོ་འདི་རྣམས་ནི་སྟོད་གཡོགས་གཡོ་བ་དང་བཅས་པ་རྣམས་ཐལ་མོ་སྦྱར་བའོ། །གཞན་ཡང་ལྷ་རྣམས་ནི་ཤིང་རྟ་ལ་གནས་པར་ཤེས་པར་བྱའོ། །དབང་པོ་ལ་སོགས་པའི་ལྷ་རྣམས་པདྨ་ལ་གནས་པ་རེ་རེ་ལའང་འཁོར་དཔག་ཏུ་མེད་པས་བསྐོར་པའོ། །སྦྱོར་བ་ཇི་ལྟ་བ་བཞིན་དུ་རིན་པོ་ཆེ་དང་གོས་སྣ་ཚོགས་པས་བརྒྱན་པ། དཀྱིལ་འཁོར་གྱི་བདག་པོ་བཅོམ་ལྡན་འདས་ལ་ཕྱག་འཚལ་ཞིང་བཀྲ་ཤིས་ཀྱི་ཚིགས་སུ་བཅད་པའི་སྒྲ་ཕྱོགས་ཐམས་ཅད་དུ་སྒྲོགས་
བའོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་ལ་སོགས་པའི་སྒོ་སྐྱོང་རྣམས་ནི་ནང་གི་དཀྱིལ་འཁོར་བཞིན་ནོ། །འདིར་བཅོམ་ལྡན་འདས་རྣམ་པར་སྣང་མཛད་ཆེན་པོའི་བདག་ཉིད་འཇམ་པའི་དབྱངས་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ལ་བདག་ཉིད་ལྟ་བུའི་རྡོ་རྗེ་སེམས་དཔས་རྒྱས་བཏབ་པའོ། །མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་ངོ་བོ་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞི་དང་གཙུག་ཏོར་བརྒྱད་དང༌། སྤྱན་མ་ལ་འཇམ་པའི་དབྱངས་ཀྱིས་རྒྱས་བཏབ་པའོ། །རྡོ་རྗེ་སེམས་དཔའ་ལ་སོག་པ་བཞི་དང་མཱ་མ་ཀཱི་དང༌། རྡོ་རྗེ་ལྕགས་ཀྱུ་དང་ས་བཅུ་གཉིས་དང་ཆོས་སོ་སོ་ཡང་དག་པར་རིག་པ་མ་དང༌། སྒེག་མོ་དང་ཀུན་དུ་བཟང་པོ་ལ་སོགས་པ་བཞི་དང༌། ཁྲོ་བོ་བཅུ་དང་མེ་ཏོག་མ་དང༌། རྡོ་རྗེ་གཟུགས་མ་དང་ཤར་ཕྱོགས་ན་གནས་པའི་ལྷ་རྣམས་ལ་མི་བསྐྱོད་པས་སོ། །རྡོ་རྗེ་རིན་ཆེན་ལ་སོགས་པ་བཞི་དང་རྡོ་རྗེ་ཞགས་པ་དང༌། ཕ་རོལ་ཏུ་ཕྱིན་མ་བཅུ་གཉིས་དང་དོན་སོ་སོ་ཡང་དག་པར་རིག་པ་མ་དང་ཕྲེང་བ་མ་དང་ནམ་མཁའ་མཛོད་ལ་སོགས་པ་བཞི་དང༌། བདུག་སྤོས་མ་དང་རྡོ་རྗེ་སྒྲ་མ་དང་ལྷོའི་ཕྱོགས་ན་གནས་པའི་ལྷ་རྣམས་ལ་རིན་ཆེན་འབྱུང་ལྡན་གྱིས་སོ། །རྡོ་རྗེ་ཆོས་ལ་སོགས་པ་བཞི་དང་གོས་དཀར་མོ་དང༌། རྡོ་རྗེ་ལྕགས་སྒྲོག་དང་ཚེ་ལ་དབང་བ་མ་ལ་སོགས་པ་བཅུ་གཉིས་དང༌། ངེས་པའི་ཚིག་སོ་སོ་ཡང་དག་པར་རིག་པ་མ་དང་གླུ་མ་དང་སྤྱན་རས་གཟིགས་ལ་སོགས་པ་བཞི་དང༌། མར་མེ་མ་དང་རྡོ་རྗེ་རོ་མ་དང༌། ནུབ་ཕྱོགས་ན་གནས་པའི་ལྷ་རྣམས་ལ་འོད་དཔག་མེད་ཀྱིས་སོ། །རྡོ་རྗེ་ལས་ལ་སོགས་པ་བཞི་དང༌། རྡོ་རྗེ་འབེབས་པ་དང༌། གཟུངས་བཅུ་གཉིས་དང་སྤོབས་པ་སོ་སོ་ཡང་དག་པར་རིག་པ་མ་དང༌། གར་མ་དང་འོད་དཔག་མེད་ལ་སོགས་པ་བཞི་དང་དྲི་ཆ་བ་མ་དང་རྡོ་རྗེ་རེག་བྱ་མ་དང། བྱང་ཕྱོགས་ན་གནས་པའི་ལྷ་རྣམས་ལ་དོ་ཡོད་གྲུབ་པས་རྒྱས་བཏབ་པའོ། །འཇམ་པའི་དབྱངས་ཀྱི་ཐུགས་ཀའི་ས་བོན་ནི་མུའོ། །ཨ་ཨཱ་སརྦ་ཏ་ཐ་ག་ཏ་ཧྲྀ་ད་ཡ་ཧ་ར་ཧ་ར་ཨོཾ་ཧཱུཾ་ཧྲཱིཿ་བྷ་ག་ཝཱ་ན་ཛྙཱ་ན་མཱུ་རྟི་ཝཱ་གཱི་ཤྭ་ར་མཧཱ་ཝཱ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་
དྷཱ་ཏུ་ཛྙཱ་ན་གརྦྷ་ཨཱཿ་ཞེས་བྱ་བ་ནི་སྙིང་པོའི་སྔགས་སོ། །ཨོཾ་ཨ་མྲི་ཏ་ཀུཎྜ་ལི་བགྷྣཱ་ནྟ་ཀ་ཧཱུཾ་ཞེས་བྱ་བ་ནི་བདུད་རྩི་འཁྱིལ་པ་སྟེ་ལས་ཐམས་ཅད་པའི་སྔགས་སོ།། །།ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་ས་དང་རི་རབ་ཀྱི་སྟེང་དུ་གཞལ་ཡས་ཁང་གི་དབུས་སུ་ནང་གི་དཀྱིལ་འཁོར་ལ་འཁོར་ལོ་རྩིབས་བརྒྱད་པ་སེར་པོ། རྡོ་རྗེ་ཕྲེང་བ་སྔོན་པོས་བསྐོར་བ་སྟེ། འགའ་ཞིག་ཏུ་འཁོར་ལོ་རྩིབས་བརྒྱད་པ་སྔོན་པོར་གསུངས་སོ། །གཞན་ནི་འདིའི་འཁོར་ལོའི་ལྟེ་བ་སྔོན་པོ་ཤར་གྱི་རྩིབས་དཀར་པོ་ལྷོ་ནག་པོ་ནུབ་དམར་པོ་བྱང་ལྗང་གུའོ་ཞེས་གསུངས་སོ། །འཁོར་ལོའི་ལྟེ་བ་ལ་སྣ་ཚོགས་པདྨ་ལ་གནས་པའི་སེང་གེའི་སྟེང་དུ་བཅོམ་ལྡན་འདས་ཤཱཀྱ་སེང་གེ་རྣམ་པར་སྣང་མཛད་ཆེན་པོ་ཤིན་ཏུ་གསེར་གྱི་མདོག་ཅན་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །ཤར་གྱི་རྩིབས་ལ་རྡོ་རྗེ་གཙུག་ཏོར་དཀར་པོས་གནོན་གྱི་ཕྱག་རྒྱ་ཅན་ནོ། །ལྷོའི་རྩིབས་ལ་རིན་ཆེན་གཙུག་ཏོར་སྔོན་པོ་མཆོག་སྦྱིན་གྱི་ཕྱག་རྒྱ་མཛད་པའོ། །ནུབ་ཀྱི་རྩིབས་ལ་པདྨ་གཙུག་ཏོར་དམར་པོ་བསམ་གཏན་གྱི་ཕྱག་རྒྱ་ཅན་ནོ། །བྱང་གི་རྩིབས་ལ་སྣ་ཚོགས་གཙུག་ཏོར་ལྗང་གུ་མི་འཇིགས་པ་རབ་ཏུ་སྦྱིན་པའི་ཕྱག་རྒྱའོ། །མེའི་རྩིབས་ལ་གཙུག་ཏོར་གཟི་བརྗིད་སྐུ་མདོག་དཀར་དམར་ཕྱག་གཉིས་ཀྱིས་ཉི་མ་འཛིན་པ་ཕྱག་གཡོན་པ་དཀུར་བརྟེན་པའོ། །བདེན་བྲལ་གྱི་རྩིབས་ལ་གཙུག་ཏོར་རྒྱལ་མཚན་སྐུ་མདོག་དམར་ནག་འདྲེས་པས་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །རླུང་གི་རྩིབས་ལ་གཙུག་ཏོར་རྣོན་པོ་ནམ་མཁའ་ལྟར་སྔོ་བསངས་ཕྱག་གཡས་པས་རལ་གྲི་འཛིན་པ་གཡོན་པས་པོ་ཏི་འཛིན་པའོ། །དབང་ལྡན་གྱི་རྩིབས་ལ་གཙུག་ཏོར་གདུགས་དཀར་སྐུ་མདོག་དཀར་པོ་ཕྱག་གཉིས་ཀྱིས་གདུགས་འཛིན་པའོ། །རྡོ་རྗེ་ཕྲེང་བའི་ཕྱི་རོལ་མི་ལ་སོགས་པའི་མཚམས་སུ་སྒེག་མོ་དང་ཕྲེང་བ་མ་དང་གླུ་མ་དང་གར་མ་རྣམས་སྐུ་མདོག་དཀར་མོ་དང་སེར་མོ་དང་དམར་མོ་དང་སྣ་ཚོགས་ཅན་མ་ཕྱག་གཉིས་པའོ། །སྣམ་བུ་ལ་སྒོའི་གཡོན་ལོགས་སུ་བྱང་ཆུབ་སེམས་དཔའ་གཉིས་དང་གཡས་ལོགས་སུ་གཉིས་སོ། །དེ་ལ་ཤར་
གྱི་སྣམ་བུ་ལ་བྱམས་པ་སེར་པོ། གཡས་པའི་ཕྱག་གིས་ཀླུ་ཤིང་གི་མེ་ཏོག་དང༌། གཡོན་པས་སྤྱི་བླུགས་འཛིན་པའོ། །མཐོང་བ་དོན་ཡོད་སེར་པོ་ཕྱག་གཡས་པས་སྤྱན་དང་བཅས་པའི་པདྨ་འཛིན་པ། གཡོན་པས་ཁུ་ཚུར་དཀུར་བརྟེན་པའོ། །ངན་སོང་ཀུན་འདྲེན་དཀར་པོ་ཕྱག་གཉིས་ཀྱིས་ལྕགས་ཀྱུ་འཛིན་པའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་དཀར་སེར་འདྲེས་པའི་མདོག་ཅན་ཕྱག་གཡས་དབྱུག་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ལྷོ་ཕྱོགས་ཀྱི་སྣམ་བུ་ལ་སྤོས་ཀྱི་གླང་པོ་དཀར་ལྗང་གཡས་ཀྱིས་དྲིའི་དུང་ཕོར་འཛིན་པ། གཡོན་པ་ཁུ་ཚུར་དཀུར་བརྟེན་པའོ། །དཔའ་བར་འགྲོ་བ་དཀར་པོ་གཡས་པས་རལ་གྲི་གཡོན་པས་ཁུ་ཚུར་དཀུར་བརྟེན་པའོ། །ནམ་མཁའ་མཛོད་དཀར་སེར་གཡས་པས་པདྨ་ལ་གནས་པའི་ཆོས་ཀྱི་མཛོད་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ཡེ་ཤེས་ཏོག་སྔོན་པོ་ཕྱག་གཡས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་པ་གཡོན་པས་ཁུ་ཚུར་དཀུར་བརྟན་པའོ། །ནུབ་ཀྱི་སྣམ་བུ་ལ་བདུད་རྩིའི་འོད་དཀར་པོ་གཡས་པས་ཅོད་པན་གྱི་སྟེང་དུ་བདུད་རྩིས་གང་བའི་བུམ་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ཟླ་བའི་འོད་དཀར་པོ་གཡས་པས་པདྨ་ལ་གནས་པའི་ཟླ་བ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །བཟང་སྐྱོང་དཀར་པོ་གཡས་པས་རིན་པོ་ཆེ་འབར་བ་དང་བཅས་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །དྲ་བ་ཅན་གྱི་འོད་དམར་པོ་གཡས་པས་རྡོ་རྗེའི་གུར་འཛིན་པ། གཡོན་པས་ཁུ་ཚུར་དཀུར་བརྟེན་པའོ། །བྱང་གི་སྣམ་བུ་ལ་རྡོ་རྗེ་སྙིང་པོ་སྔོ་སྐྱ་གཡས་རྡོ་རྗེ་དང་བཅས་པའི་ཨུཏྤལ་སྔོན་པོ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །བློ་གྲོས་མི་ཟད་པ་དཀར་པོ་ཕྱག་གཉིས་ཀྱིས་བདུད་རྩིས་གང་བའི་བུམ་པ་འཛིན་པའོ། །སྤོབས་པ་བརྩེགས་པ་དམར་པོ་གཡས་པས་ཆུ་སྐྱེས་ལ་གནས་པའི་རཏྣ་བརྩེགས་པ་བསྣམས་པ་གཡོན་པས་ཁུ་ཚུར་དཀུར་བརྟེན་པའོ། །ཀུན་དུ་བཟང་པོ་གསེར་གྱི་མདོག་ཅན་ཕྱག་གཡས་པས་རིན་པོ་ཆེའི་སྙེ་མ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །དཀྱིལ་འཁོར་གྱི་མི་ལ་སོགས་
བ་རྣམས་ལ་མེ་ཏོག་མ་དང་བདུག་སྤོས་མ་དང་མར་མེ་མ་དང༌། དྲི་ཆབ་མ་རྣམས་ནི་དཀར་མོ་དང་ནག་མོ་དང་དམར་མོ་དང༌། ལྗང་གུ་ཕྱག་གཉིས་ཀྱིས་མེ་ཏོག་ལ་སོགས་པ་འཛིན་པའོ། །ཤར་སྒོར་རྡོ་རྗེ་ལྕགས་ཀྱུ་དཀར་པོ་ཕྱག་གཉིས་ཀྱིས་ལྕགས་ཀྱུ་འཛིན་པའོ། །ལྷོ་རུ་རྡོ་རྗེ་ཞགས་པ་སྔོན་པོ་ཕྱག་གཉིས་ཀྱིས་ཞགས་པ་འཛིན་པའོ། །ནུབ་ཏུ་རྡོ་རྗེ་ལྕགས་སྒྲོག་དམར་མོ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པའོ། །བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པའོ། །ལྷ་སུམ་ཅུ་སོ་བདུན་པོ་འདི་དག་ཀྱང་གོས་སྣ་ཚོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་རཏྣའི་ཅོད་པན་ཅན་ཞལ་གཅིག་སྤྱན་གཉིས་པ་ཕྱག་གཉིས་པ་སྣ་ཚོགས་པདྨ་དང་ཟླ་བ་རྣམས་ལ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །འདིར་རྣམ་པར་སྣང་མཛད་ཆེན་པོ་ནི་རང་ཉིད་དང་མཚུངས་པའི་རྣམ་སྣང་གིས་རྒྱས་བཏབ་པོ། །རྡོ་རྗེ་གཙུག་ཏོར་ལ་སོགས་པ་བཞི་ལ་རྣམ་པར་སྣང་མཛད་ཆེན་པོས་སོ། །ཤར་གྱི་ཕྱོགས་དང་མེའི་མཚམས་ན་གནས་པའི་ལྷ་རྣམས་ལ་རྡོ་རྗེ་གཙུག་ཏོར་གྱིས་སོ། །ལྷོ་ཕྱོགས་དང་བདེན་བྲལ་གྱི་མཚམས་ན་གནས་པ་རྣམས་ལ་རིན་ཆེན་གཙུག་ཏོར་གྱིས་སོ། །ནུབ་ཕྱོགས་དང་རླུང་གི་མཚམས་ན་གནས་པ་རྣམས་ལ་པདྨ་གཙུག་ཏོར་གྱིས་སོ། །བྱང་ཕྱོགས་དང་དབང་ལྡན་གྱི་མཚམས་ན་གནས་པ་རྣམས་ལ་སྣ་ཚོགས་གཙུག་ཏོར་གྱིས་སོ། །འདིར་ཕྱི་རོལ་གྱི་དཀྱིལ་འཁོར་གྱི་ལྷའི་གནས་ཀྱི་སྣམ་བུ་ལ་ཟླ་བའི་དཀྱིལ་འཁོར་ཉི་ཤུ་རྩ་བརྒྱད་པོ་ལྟའོ་ཞེས་རྒྱུད་ལས་གསུངས་པའི་ཕྱིར་འདོད་ཡོན་གྱི་སྣམ་བུ་རྣམས་ལ་བྱང་ཆུབ་སེམས་དཔའ་བཅུ་དྲུག་དགོད་པར་མི་རིགས་སོ། །འགའ་ཞིག་ནི་ནང་གི་དཀྱིལ་འཁོར་ཞེས་རྒྱུད་དུ་གསུངས་པས་ཕྱི་རོལ་གྱི་གཞལ་ཡས་ཁང་གི་ནང་དུ་གཞལ་ཡས་ཁང་གཉིས་པའོ་ཞེས་སྨྲའོ། །འགའ་ཞིག་ཏུ་ནི་རྣམ་པར་སྣང་མཛད་ཆེན་པོ་ལ་སོགས་པ་དེ་བཞིན་གཤེགས་པ་དགུ་གཙུག་ཏོར་དང་བཅས་པ་དགེ་སློང་གི་ཆ་ལུགས་འཛིན་པར་གསུངས་སོ། །པདྨའི་ཕྲེང་བས་ཡོངས་སུ་བསྐོར་བ་དང༌། ཁོར་ཡུག་གི་ནང་དུ་དབང་ལྡན་གྱི་མཚམས་ནས་བརྩམས་ནས་
གཡས་སྐོར་གྱིས་མགྲིན་པ་སྔོན་པོ་ལ་སོགས་པ་བསྐྱེད་པར་བྱ་སྟེ། །དེ་ལ་དབང་ལྡན་དུ་གླང་ལ་མགྲིན་པ་སྔོན་པོ་དཀར་པོ་མཆོད་ཕྱིར་ཐོགས་པ་ཅན་ཕྱག་གཡས་གཉིས་ན་རྡོ་རྗེ་དང་མཆོད་སྦྱིན་གྱི་ཕྱག་རྒྱ་གཡོན་གཉིས་ན་རྩེ་གསུམ་དང་རལ་གྲི་འཛིན་པའོ། །མགྲིན་སྔོན་མ་མགྲིན་བ་སྔོན་པོ་ལྟ་བུའོ། །ནམ་མཁའ་ལྡིང་ལ་ཁྱབ་འཇུག་ནག་པོ་གཡས་གཉིས་ན་དབྱུག་ཐོ་དང་རྡོ་རྗེ་གཡོན་གཉིས་ན་དུང་དང་འཁོར་ལོའོ། །གསེར་གྱི་རྡོ་རྗེ་མ་ཁྱབ་འཇུག་ལྟ་བུ་ཁྱད་པར་གསེར་གྱི་མདོག་ཅན་ནོ། །རྨ་བྱ་ལ་རྡོ་རྗེ་དྲིལ་བུ་ཞལ་དྲུག་པ་དམར་བ་གཡས་པ་གཉིས་ན་ཤཀ་ཏི་དང་རྡོ་རྗེ་གཡོན་པ་གཉིས་ན་ཁྱིམ་བྱ་དང་རྡོ་རྗེ་དྲིལ་བུའོ། །རྡོ་རྗེ་གཞོན་ནུ་མ་རྡོ་རྗེ་དྲིལ་བུ་ལྟ་བུའོ། །ངང་པ་ལ་མི་སྨྲ་རྡོ་རྗེ་སེར་པོ་ཞལ་བཞི་པ་གཡས་པ་གཉིས་ན་རྡོ་རྗེ་དང་སྔགས་བཟླ་བའི་ཕྲེང་བ་གཡོན་པ་གཉིས་ན་དབྱུག་པ་དང་སྤྱི་བླུགས་སོ། །རྡོ་རྗེ་ཞི་བ་མ་ཚངས་པ་ལྟ་བུའོ། །གླང་པོ་ཆེ་མཆེ་བ་དྲུག་པའི་དབང་པོ་དཀར་པོ་དང་ཟླ་བ་ལ་རྡོ་རྗེ་མཚོན་ཆ་དཀར་པོ་རོལ་པའི་ཀུན་དུ་བསྐྱོད་པས་གནས་པ་ཕྱག་གཡས་ན་རྡོ་རྗེ་རྩེ་ལྔ་པ་གཡོན་པས་རྡོ་རྗེ་རྩེ་གསུམ་དཀུར་བརྟེན་པའོ། །ལྷ་མོ་རྡོ་རྗེ་ཁུ་ཚུར་མ་ནི་རྡོ་རྗེ་མཚོན་ཆ་ཇི་ལྟ་བུའོ། །རྟ་བདུན་གྱི་ཤིང་རྟ་ལ་རྡོ་རྗེ་འཁྱིལ་བ་དམར་པོ་ཁྲོས་པ་གཡས་པ་ན་པདྨ་གཡོན་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །རྡོ་རྗེ་བདུད་རྩི་མ་རྡོ་རྗེ་འཁྱིལ་པ་བཞིན་ནོ། །ངང་པ་ལ་རྡོ་རྗེ་འོད་དཀར་པོ་ཁྲོ་བོ་ཕྱག་གཡས་པ་རྡོ་རྗེ་གཡོན་པ་པདྨ་ལ་གནས་པའི་ཟླ་བ་འཛིན་པའོ། །རྡོ་རྗེ་མདོག་མ་རྡོ་རྗེ་འོད་ལྟ་བུའོ། །ར་ལ་རྡོ་རྗེ་དམར་སེར་ཁྲོ་བོ་གཡས་ཀྱིས་རྡོ་རྗེ་དམར་པོ་འཛིན་ཅིང་གཡོན་པས་མི་བཟུང་ནས་ཟ་བའི་ཚུལ་ལོ། །རྡོ་རྗེ་སྐེ་རགས་མ་རྡོ་རྗེ་དམར་སེར་བཞིན་ནོ། །པདྨ་ལ་རྡོ་རྗེ་ཞི་བ་ཁྲོ་བོ་སེར་པོ་མདའ་དང་གཞུ་འཛིན་པའོ། །རྡོ་རྗེ་ཞི་བ་མ་རྡོ་རྗེ་ཞི་བ་བཞིན་ནོ། །སྦལ་པ་ལ་རྡོ་རྗེ་བླ་མ་ཁྲོ་བོ་སེར་པོ་གཡས་བགྲང་ཕྲེང་དང་གཡོན་སྤྱི་བླུགས་འཛིན་པའོ། །རྡོ་རྗེ་བླ་མ་མ་རྡོ་རྗེ་བླ་མ་བཞིན་ནོ། །པདྨ་ལ་རྡོ་རྗེ་པ་ཝ་སངས་ཁྲོ་བོ་དཀར་པོ་གཡས་ན་བགྲང་ཕྲེང་དང་གཡོན་ན་སྤྱི་བླུགས་འཛིན་པའོ། །རྡོ་རྗེ་པ་ཝ་སངས་མ་རྡོ་རྗེ་པ་ཝ་སངས་པ་བཞིན་ནོ། །རུས་སྦལ་ལ་རྡོ་རྗེ་དབྱུག་པ་ཁྲོ་བོ་ནག་པོ་གཡས་པ་
ན་རྡོ་རྗེ་གཡོན་པ་ན་དབྱུག་པའོ། །རྡོ་རྗེ་དབྱུག་པ་མ་ནི་རྡོ་རྗེ་དབྱུག་པ་དང་འདྲ་བའོ། །རྡོ་རྗེ་སྒྲ་གཅན་ཁྲོ་བོ་མ་དམར་ནག་གཡས་པས་ཟླ་བའི་དཀྱིལ་འཁོར་དང་གཡོན་པ་ཉི་མ་འཛིན་པའོ། །རྡོ་རྗེ་ལྷ་མིན་མ་ནི་རྡོ་རྗེ་སྒྲ་ཅན་དང་འདྲ་བའོ། །རྡོ་རྗེ་མཇུག་རིངས་ཁྲོ་བོ་མདོག་ནག་པོ་གཡས་པས་རལ་གྲི་གཡོན་པས་སྤྲུལ་ཞགས་འཛིན་པའོ། །རྡོ་རྗེ་གླུ་མ་རྡོ་རྗེ་མཇུག་རིངས་བཞིན་ནོ། །བཞི་པོ་འདི་དག་དང་རྡོ་རྗེ་ཞི་བ་ལ་སོགས་པ་རྒྱུད་གཞན་ལས་གསུངས་པ་ལྟར་བདག་གིས་བྲིས་སོ། །གླང་པོ་ཆེ་ལ་རྡོ་རྗེ་གླང་སྣ་དཀར་པོ་གཡས་རྡོ་རྗེ་གཡོན་པས་གཤོལ་འཛིན་པའོ། །རྡོ་རྗེ་འདུལ་བ་མ་རྡོ་རྗེ་གླང་སྣ་བཞིན་ནོ། །དེའི་ཁྱད་པར་ནི་གཡོན་པས་ཁ་ཊྭཱཾ་ག་འཛིན་པའོ། །བྱ་ཀོ་ཀི་ལའི་ཤིང་རྟ་ལ་རྡོ་རྗེ་ཕྲེང་བ་ཅན་ལྗང་གུ་གཡས་པ་ན་རྡོ་རྗེ་གཡོན་པ་ན་མེ་ཏོག་གི་ཕྲེང་བ་འཛིན་པའོ། །རྡོ་རྗེ་བརྟན་མ་རྡོ་རྗེ་ཕྲེང་བ་ཇི་ལྟ་བ་ལས་ཁྱད་པར་ནི་ཕྱག་གཡོན་པ་ན་མདུང་ངོ༌། །ནེ་ཙོའི་ཤིང་རྟ་ལ་རྡོ་རྗེ་དབང་ཅན་སེར་པོ་གཡས་ན་རྡོ་རྗེ་གཡོན་པ་ན་ཆུ་སྲིན་གྱི་རྒྱལ་མཚན་འཛིན་པའོ། །རྡོ་རྗེ་དབང་ཅན་མ་རྡོ་རྗེ་དབང་ཅན་དང་འདྲ་བའོ། །ཁྱད་པར་ནི་སྐུ་མདོག་དམར་བའོ། །སྦལ་པ་ལ་རྡོ་རྗེ་རྣམ་པར་རྒྱལ་བ་དཀར་པོ་རྡོ་རྗེ་དང་རལ་གྲི་འཛིན་པའོ། །རྡོ་རྗེ་གདན་མ་རྡོ་རྗེ་རྣམ་པར་རྒྱལ་བ་དང་འདྲ་བའོ། །མེ་ཏོག་ལ་རྡོ་རྗེ་གཏུན་ཤིང་སེར་པོ་གཡས་གཡོན་གྱིས་རྡོ་རྗེ་གཏུན་ཤིང་འཛིན་པའོ། །རྡོ་རྗེ་ཕོ་ཉ་མོ་རྡོ་རྗེ་གཏུན་ཤིང་ལྟ་བུའོ། །ཁྱད་པར་ནི་གཡོན་པས་ཁ་ཊྭཱཾ་ག་འཛིན་པའོ། །རལ་རྡོ་རྗེ་མེ་དམར་པོ་གཡས་གཉིས་ཀྱིས་རྡོ་རྗེ་དང་གོ་ཆ་གཡོན་གཉིས་དབྱུག་ཏོ་དང༌། སྤྱི་བླུགས་འཛིན་པའོ། །རྡོ་རྗེ་འབར་མ་རྡོ་རྗེ་མེ་ལྟ་བུའོ། །མ་ཧེ་ལ་རྡོ་རྗེ་ནག་པོ་སྐུ་མདོག་ནག་པོ་རྡོ་རྗེ་དང་ལྕགས་ཀྱུ་འཛིན་པའོ། །རོ་ལངས་ལ་རྡོ་རྗེ་ནག་པོ་སྐུ་མདོག་ནག་མོ་རྡོ་རྗེ་དང་ཁ་ཊྭཱཾ་ག་འཛིན་པའོ། །ལྷག་པར་ཀླུ་ལ་རྡོ་རྗེ་ལྕགས་ཀྱུ་སྔོན་པོ་ཕག་པའི་ཞལ་རྡོ་རྗེ་དང་ལྕགས་ཀྱུ་འཛིན་པའོ། །མི་ལ་རྡོ་རྗེ་གདོང་མ་སྔོན་མོ་ཕག་གདོང་རྡོ་རྗེ་དང་རལ་གྲི་འཛིན་པའོ། །ཆུ་སྲིན་ལ་རྡོ་རྗེ་ཀླུ་དཀར་པོ་སྤྲུལ་མགོ་བརྒྱད་དང་ལྡན་པ་གཡས་པས་རྡོ་རྗེ་གཡོན་པས་ཀླུའི་ཞགས་པའོ། །ཆུ་སྲིན་ལ་ཆུ་སྲིན་མ་དཀར་མོ་སྤྲུལ་མགོ་བརྒྱད་དང་ལྡན་
པ་གཡས་པས་རྡོ་རྗེ་དང་གཡོན་པས་རྡོ་རྗེས་མཚན་པའི་ཆུ་སྲིན་འཛིན་པའོ། །རི་དགས་ལ་རྡོ་རྗེ་རླུང་སྔོན་པོ་གཡས་པས་རྡོ་རྗེ་གཡོན་པས་རླུང་སྒྲིབ་པའི་གོས་འཛིན་པའོ། །རྡོ་རྗེ་ཤུགས་ཅན་མ་རྡོ་རྗེ་རླུང་ལྟ་བུའོ། །རོ་ལངས་ལ་རྡོ་རྗེ་འཇིགས་བྱེད་སྔོན་པོ་རྡོ་རྗེ་དང་དབྱུག་ཏོ་འཛིན་པའོ། །རྡོ་རྗེ་རྣམ་པར་གཙིགས་མ་རྡོ་རྗེ་འཇིགས་བྱེད་ལྟ་བུའོ། །ཁྱད་པར་ནི་གཡོན་པས་ཞགས་པ་འཛིན་པའོ། །བྱི་བ་ལ་རྡོ་རྗེ་ལོག་འདྲེན་དཀར་པོ་གླང་པོ་ཆེའི་ཞལ་ཕྱག་གཡས་པ་གཉིས་ཀྱིས་རྡོ་རྗེ་དང་དགྲ་སྟ་གཡོན་པ་གཉིས་ཀྱིས་རྩེ་གསུམ་པ་དང༌། དབྱུག་ཏོ་འཛིན་པ་སྤྲུལ་གྱི་མཆོད་ཕྱིར་ཐོགས་པའོ། །བྲ་བ་བྱི་བ་ལ་སྤྲུལ་མོ་སྔོན་མ་གཡས་པས་རྡོ་རྗེ་གཡོན་པས་ཕྱགས་ཤིང་འཛིན་པའོ། །བསྡིགས་མ་ལྗང་གུ་གཡས་པས་རྡོ་རྗེ་གཡོན་པས་རལ་གྲིའི་བྱེ་བྲག་ཕེ་ཊ་ཀ་འཛིན་པའོ། །དཔལ་མོ་སྐུ་མདོག་སེར་མོ་གཡས་པས་རྡོ་རྗེ་གཡོན་པས་པདྨ་འཛིན་པ། དབྱངས་ཅན་མ་དཀར་མོ་གཡས་ན་རྡོ་རྗེ་གཡོན་པ་ནི་པི་ཝང་འཛིན་པའོ། སེང་གེ་ལ་བགྲོད་དཀའ་མ་ལྗང་གུ་ཕྱག་གཡས་པ་གཉིས་ན་རྡོ་རྗེ་དང་ཙཀྲ་གཡོན་པ་གཉིས་ན་ལྡེ་མིག་དང་རལ་གྲི་འཛིན་པའོ། །འདིར་མགྲིན་པ་སྔོན་པོ་ལ་སོགས་པའི་ལྷ་འདི་དག་གི་ཕྱག་གཡས་པ་རྣམས་ན་ཇི་ལྟར་རིགས་པར་རྡོ་རྗེ་རྩེ་གསུམ་པར་རིག་པར་བྱའོ། །ནུབ་ཏུ་རྡོ་རྗེ་ཀླུ་དང་ཉེ་བར་པདྨ་ལ་གནས་པའི་ལྷ་མོ་གསེར་གྱི་མདོག་ལྟ་བུ་ཕྱག་གཉིས་ཀྱིས་བདུད་རྩིས་གང་བའི་བུམ་པ་བསྣམས་པའོ། །ལྷ་མ་ཡིན་རྣམས་ནི་སྐུ་མདོག་སྣ་ཚོགས་པ་གོ་ཆ་སྣ་ཚོགས་པ་བགོས་ནས་རལ་གྲི་འཛིན་པ་རས་བལ་གྱི་གདན་འཇམ་པ་ལ་གནས་པའོ། །ཀླུ་རྣམས་ནི་ནོར་བུ་དང་ལྡན་པའི་གདེངས་ཀ་ཅན་བཙུན་མོ་དང་བཅས་པའི་ཐལ་མོ་སྦྱར་བའོ། །ཁོར་ཡུག་གི་ཕྱི་རོལ་དུ་མེའི་མཚམས་སུ་མནར་མེད་པའི་དམྱལ་བ་ལ་སོགས་པ་རྣམས་སོ། །བདེན་བྲལ་གྱི་མཚམས་སུ་ཡི་དགས་རྣམས་སོ། །རླུང་གི་མཚམས་སུ་དུད་འགྲོའི་འགྲོ་བ་རྣམས་སོ། །དབང་ལྡན་དུ་མིའི་འགྲོ་བ་རྣམས་སོ། །རིམ་པ་བཞིན་འདི་ནི་རྒྱུད་གཞན་གྱི་ཚུལ་གྱིས་བྲིས་སོ། །གཞན་ནི་རྡོ་རྗེ་འཇིགས་བྱེད་དང་ཉེ་བར་སའི་ལྷ་མོ་དང་གནོད་སྦྱིན་རྣམས་སོ། །རྡོ་རྗེ་ནག་མོ་དང་
ཉེ་བར་ལྷ་མ་ཡིན་རྣམས་སོ་ཞེས་བྱ་བ་ལ་སོགས་པ་བརྗོད་པར་བྱེད་དོ། །དཀྱིལ་འཁོར་གྱི་བདག་པོའི་ཐུགས་ཀར་ཟླ་བ་ལ་ཨོཾ་མུ་ནེ་མུ་ནེ་མ་ཧཱ་མུ་ནེ་ཡེ་སྭཱ་ཧཱ། ཞེས་བྱ་བའི་སྔགས་དགོད་དོ། །དེ་ཉིད་ནི་སྙིང་པོའི་སྔགས་སོ། །ཨོཾ་ན་མོ་བྷ་ག་ཝ་ཏེ་སརྦ་དུ་རྒ་ཏི་བ་རི་ཤོ་དྷ་ནི་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ་ཤུདྡྷེ་བི་ཤུ་དྷེ་སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། ཞེས་བྱ་བ་ནི་ཕྲེང་བའི་སྔགས་སོ། །རྡོ་རྗེ་འབེབས་པའི་སྔགས་སོ། ཨོཾ་སརྦ་བིད་སརྦ་ཨ་པཱ་ཡ་ག་ཏི་ག་ཧ་ན་བི་ཤོ་དྷ་ནི་ཧཱུཾ་ཧོཿ་ཕཊ་ཅེས་བྱ་བ་ནི་ལས་ཐམས་ཅད་པའི་སྔགས་སོ། །ཨོཾ་བཛྲ་ཡཀྵ་ཧཱུཾ་ཞེས་གཞན་དག་གོ །འབྱུང་པོ་འདུལ་བྱེད་ཀྱི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་དུ་སྣ་ཚོགས་པདྨའི་ཟེ་འབྲུ་ལ་གནས་པའི་རྡོ་རྗེ་རྒྱ་གྲམ་གྱི་ལྟེ་བའི་དབུས་སུ་གཞལ་ཡས་ཁང་གི་ལྟེ་བ་ལ་གླང་པོ་ཆེའི་རྒྱལ་པོའི་སྟེང་ངམ་དེ་མེད་ཀྱང་རུང་སྟེ་སྣ་ཚོགས་པདྨ་དང་ཟླ་བ་ལ་འབྱུང་པོ་གཞན་གྱིས་མི་ཐུབ་པ་དཀར་པོ་ཟླ་བ་ཕྱེད་པས་མཚན་པའི་འོད་ཟེར་དང་ལྡན་པ་རལ་པའི་ཐོར་ཅོག་ཅན་སྨ་ར་དམར་སེར་ཐོད་པ་ལྔ་དང་ལྡན་པ་མིག་གསུམ་པ་མཆེ་བ་གཙིགས་པ་འཇིགས་སུ་རུང་བ་གསུས་པ་འཕྱང་བ་སྤྲུལ་གྱི་མཆོད་ཕྱིར་ཐོགས་པ་ཅན་སྟག་གི་པགས་པས་ཕྱེད་དཀྲིས་པ་ལག་པ་བཞི་པ་གཡས་པ་གཉིས་གྲི་གུག་དང་ཌ་མ་རུ་གཡོན་པ་གཉིས་ཀྱིས་ཐོད་པ་དང་རྩེ་གསུམ་འཛིན་པ་དྲག་པོ། གཡོན་བརྐྱང་གིས་མནན་པའི་བཅོམ་ལྡན་འདས་འབྱུང་པོ་འདུལ་བྱེད་དྲག་པོ་ཆེན་པོ་སྐུ་མདོག་སྔོན་པོ་ཐོད་པ་ལྔས་མཚན་པའི་ཅོད་པན་ལ་དེ་བཞིན་གཤེགས་པ་ལྔའི་དབུ་སྐྲ་དམར་སེར་གྱེན་དུ་འབར་བས་བཅིངས་པ་གོས་སྔོན་པོ་གོན་པ་ཞལ་མཆེ་བ་གཙིགས་པ་སྤྱན་གསུམ་དམར་བ་སྒེག་པའི་གད་མོ་མཛད་པ། ཕྱག་བཞི་པའི་གཡས་པས་རྡོ་རྗེ་སྔོན་པོ་འཇིགས་པ་གསོར་ཞིང་གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པ་ཕྱག་གཉིས་ཀྱིས་ཕྱག་རྒྱ་མཛད་པའོ། །ཕྱག་རྒྱ་ནི་སྲིན་ལག་གཉིས་བསྣོལ་ནས་མཛུབ་མོ་གཉིས་བསྐུམ་པར་བྱའོ། །མཐེ་ཆུང་དང་གུང་མོ་ཡང་མཐེ་བོང་རྒན་པོས་མནན་པར་
བྱའོ་ཞེས་པ་འདི་གསུངས་སོ། །ཀླུའི་རྒྱལ་པོ་བརྒྱད་ཀྱིས་བརྒྱན་པ་སྟེ་དེ་ལ་ཀ་རྐོ་ཊ་སྔོན་པོས་དབུ་སྐྲ་བཅིངས་པ། འཇོག་པོ་དམར་པོས་མགུལ་རྒྱན་བྱས་པ། དགའ་བོ་དང་ཉེར་དགའ་བོ་སེར་པོས་རྣ་བ་བརྒྱན་པ་སེར་པོ་གཅིག་པས་གཅིག་ཏུ་བགྲང་ངོ༌། །མཐའ་ཡས་དཀར་པོས་ཚངས་སྐུད། ནོར་རྒྱས་དཀར་པོས་སྐ་རགས། ཕྱག་རྒྱ་བཅིངས་པའི་ཕྱག་གཉིས་ཀྱིས་དཔུང་པར་རིགས་ལྡན་ཕུག་རོན་གྱི་མདོག་ལྟ་བུས་བརྒྱན་པ། དུང་སྐྱོང་དཀར་པོས་ཕྱག་གཞན་གཉིས་ཀྱིས་དཔུང་པ་ལ་བརྒྱན་པ། པདྨ་དང་པདྨ་ཆེན་པོ་དམར་པོས་རྐང་གདུ་བ་བྱས་པའོ། །མདོག་གཅིག་པས་གཅིག་ཉིད་དོ། །ཤར་ཕྱོགས་ཀྱི་རེ་མིག་ལ་གླང་དང་ཉི་མ་ལ་དབང་ཕྱུག་ཆེན་པོ་མཚན་མ་གྱེན་དུ་ལངས་ལ་ཐོད་པ་ཅན་ཐལ་བའི་མདོག་སྤྱན་གསུམ་པ་ཟླ་བ་ཕྱེད་ཀྱིས་མཚན་པའི་རལ་པའི་ཐོར་ཅོག་ཅན་སྦྲུལ་གྱི་མཆོད་ཕྱིར་ཐོགས་པ་དང་བཅས་པའི་ཕྱག་བཞི་པ་ཕྱག་གཡས་པ་གཉིས་ཀྱིས་གྲི་གུག་དང་ཌ་མ་རུ་འཛིན་པ་གཡོན་གཉིས་ཀྱིས་ཐོད་པ་དང་རྩེ་གསུམ་པའོ། །ལྷོ་རུ་ནམ་མཁའ་ལྡིང་གི་སྟེང་དུ་ཉི་མ་ལ་ཁྱབ་འཇུག་ནག་པོ་ཅོད་པན་དམར་པོ་ཅན། ཕྱག་གཡས་པ་གཉིས་ཀྱིས་རྔ་ཡབ་དང་དུང་འཛིན་པ། གཡོན་པ་གཉིས་ཀྱིས་འཁོར་ལོ་དང་དབྱུག་ཏོ་འཛིན་པའོ། །ནུབ་ཏུ་ངང་པ་དང་ཟླ་བའི་སྟེང་དུ་ཚངས་པ་དཀར་པོ་ཞལ་བཞི་པ་གཡས་པ་གཉིས་ཀྱིས་བགྲང་ཕྲེང་དང་གདུགས་ཀྱི་ཡུ་བ་འཛིན་པ་གཡོན་པ་གཉིས་ཀྱིས་པདྨ་དང་སྤྱི་བླུགས་འཛིན་པའོ། །བྱང་དུ་རྨ་བྱ་དང་ཉི་མའི་སྟེང་དུ་སྨིན་དྲུག་གི་བུ་དམར་པོ་གཙུག་ཕུད་གསུམ་དང་ལྡན་པ་གཡས་པས་རྔ་ཡབ་གཡོན་པས་ཤ་ཀ་ཏི་འཛིན་པའོ། །དབང་ལྡན་དུ་བྲ་བ་བྱི་བ་དང་ཟླ་བ་ལ་ཚོགས་བདག་དཀར་པོ་གླང་པོ་ཆེའི་ཞལ་སྤྱན་གསུམ་པ་སྤྱི་བོར་ཟླ་བ་ཕྱེད་པས་མཚན་པ་ཕྱག་གཡས་པ་གཉིས་ན་ལ་ཕུག་དང་དགྲ་སྟ་གཡོན་གཉིས་ན་རྩེ་གསུམ་དང་ཐོད་པ་འཛིན་པའོ། །མེར་ཉི་མའི་དཀྱིལ་འཁོར་ལ་ཉི་མ་དམར་པོ་གཡས་པ་དང་གཡོན་པ་གཉིས་ཀྱིས་མཚོ་སྐྱེས་ལ་གནས་པའི་ཉི་མའི་དཀྱིལ་འཁོར་འཛིན་པའོ། །བདེན་བྲལ་དུ་ཤིང་རྟའི་སྟེང་དུ་ཉི་མ་དང་ཟླ་བ་ལ་གནས་པའི་སྒྲ་གཅན་དམར་ནག་དབུ་སྐྲ་དམར་སེར་གྱེན་དུ་བརྫེས་པ་སྨིན་མ་དང་མིག་དང་སྨ་ར་
དམར་སེར་འབར་བ་མཆེ་བ་བཞི་པ་ཞལ་གདངས་པ་གཡས་གཡོན་གྱི་ཕྱག་གཉིས་ཀྱིས་ཉི་མ་དང་ཟླ་བར་བཅས་པའི་ཐལ་མོ་སྦྱར་བའོ། །རླུང་དུ་ཟླ་བའི་སྟེང་དུ་དགའ་བྱེད་དབང་ཕྱུག་སེར་པོ་གར་བྱེད་ཅིང་སྤྱི་བོར་ཟླ་བ་ཕྱེད་བ་ཅན་སྦྲུལ་གྱི་མཆོད་ཕྱིར་ཐོགས་པ་དང་ལྡན་པ། གཡས་པ་དང་ཅིག་ཤོས་དག་གིས་ཌ་མ་རུ་དང་རྩེ་གསུམ་པ་འཛིན་པའོ། །རིམ་པ་གཉིས་པ་ལ་ཤར་གྱི་ཕྱོགས་སུ་ཟླ་བ་ལ་དཔལ་མོ་དཀར་མོ་ཐུགས་ཀར་ཐལ་མོ་སྦྱར་བས་མེ་ཏོག་པདྨ་འཛིན་པའོ། །ལྷོའི་ཕྱོགས་སུ་ཟླ་བ་ལ་ཐིག་ལེ་མཆོག་མ་དམར་མོ་གར་བྱེད་ཅིང་སྤོས་སྣོད་འཛིན་པའོ། །ནུབ་ཏུ་ཟླ་བ་ལ་ཟླ་བ་མོ་དམར་མོ་མར་མེ་འཛིན་པའོ། །བྱང་དུ་ཟླ་བ་ལ་དཀའ་བཟློག་མ་སེར་མོ་གདེངས་ཀའི་ལག་པ་བཟློག་ནས་སྤྱི་བོར་བཞག་ནས་གར་བྱེད་པའོ། །མེར་ཟླ་བ་ལ་རིན་ཆེན་དཔལ་མོ་དམར་མོ་དྲིའི་དུང་ཆོས་འཛིན་པའོ། །བདེན་བྲལ་དུ་ཟླ་བ་ལ་དབྱངས་ཅན་མ་ལྗང་གུ་བི་ཝང་གི་སྒྲ་སྒྲོགས་པའོ། །རླུང་དུ་ཟླ་བ་ལ་ལྷ་མཛེས་མ་ནག་མོ་རིན་པོ་ཆེའི་ཕྲེང་བ་འཛིན་པའོ། །དབང་ལྡན་དུ་ཟླ་བ་ལ་དབང་པོ་འབྱོར་མ་སེར་མོ་གར་བྱེད་མ་ཕྱག་ན་རྡོ་རྗེ་རྩེ་གསུམ་པ་འཛིན་པའོ། །རིམ་པ་གསུམ་པའི་ཤར་དུ་གླང་པོས་སྲུང་དཀར་པོ་དང་ཟླ་བ་ལ་བརྒྱ་བྱིན་སེར་པོ་མིག་སྟོང་དང་ལྡན་པ་རིན་པོ་ཆེའི་ཅོད་པན་ཅན་ཕྱག་གཡས་པ་སྐྱབས་སྦྱིན་གཡོན་པས་རྡོ་རྗེ་འཛིན་པའོ། །ལྷོར་མ་ཧེ་དང་ཉི་མ་ལ་གཤིན་རྗེ་ནག་པོ་གསུས་པ་འཕྱང་བ་སྤྱན་གསུམ་དང་སྨིན་མ་དང་སྨར་དང་རལ་པ་དམར་སེར་ཅན་ན་བཟའ་སེར་པོ་མན་བས་པ་ཕྱག་གཡས་པས་ཐོད་པས་མཚན་པའི་དབྱུག་པ་འཛིན་པ། གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །ནུབ་ཏུ་སྦྲུལ་དང་ཟླ་བ་ལ་ཆུ་ལྷ་དཀར་པོ་སྦྲུལ་གྱི་གདེངས་ཀ་བདུན་དང་ལྡན་པ། གཡས་པས་མཆོག་སྦྱིན་གྱི་ཕྱག་རྒྱ་མཛད་པ། གཡོན་པས་སྤྲུལ་གྱི་ཞགས་པ་འཛིན་པའོ། །བྱང་དུ་གནོད་སྦྱིན་གྱི་སྟེང་དུ་ལུས་ངན་པོ་སེར་པོ་ཤ་རྒྱས་ཤིང་གསུས་པ་འཕྱང་བ་རིན་པོ་ཆེའི་ཅོད་པན་ཅན་གཡས་བ་དང་གཡོན་པ་གཉིས་ཀྱིས་དབྱུག་ཏོ་དང་ནེའུ་ལེ་འཛིན་པའོ། །མེར་ར་དང་ཉི་མ་ལ་མེ་ལྷ་དམར་པོ་རལ་པ་གསུམ་དང་ལྡན་པ་སྐྲ་དང་སྨར་སེར་ཞིང་འབར་བ་གསུས་པ་འཕྱང་
བ་ཕྲག་པ་ལ་ཕྱག་ཚང་ཀུ་བ་བཏགས་པ་མཆོད་ཕྱིར་ཐོགས་པ་ཅན་གཡས་པ་གཉིས་ཀྱིས་མཆོག་སྦྱིན་དང་བགྲང་ཕྲེང་འཛིན་པ་གཡོན་པ་གཉིས་ཀྱིས་དབྱུག་པ་རྩེ་གསུམ་པ་དང་སྤྱི་བླུགས་འཛིན་པའོ། །བདེན་བྲལ་དུ་རོ་ལངས་དང་ཉི་མ་ལ་སྲིན་པོ་ནག་པོ། སྨིན་མ་ནག་པོ་དང༌། སྨ་ར་དམར་སེར་འབར་བ་དང་ལྡན་པ་ཕྱག་གཡས་ཀྱིས་རལ་གྲི་དང་གཡོན་གྱིས་མི་ཤས་གང་པའི་ཐོད་པ་འཛིན་པའོ། །རླུང་དུ་རི་དགས་དང་ཟླ་བ་ལ་རླུང་ལྷ་སྔོན་པོ་གཙུག་ཕུད་གསུམ་དང་ལྡན་པ་ཕྱག་གཉིས་ཀྱིས་རླུང་རས་འཛིན་པའོ། །དབང་ལྡན་དུ་ངང་པ་དང་ཟླ་བ་ལ་ཟླ་བ་དཀར་པོ་གཡས་པས་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་གཡོན་པས་མཆོག་སྦྱིན་ནོ། །དབང་ལྡན་ཡང་དབང་ཕྱུག་ཆེན་པོ་ལྟ་བུའོ། །རིམ་པ་བཞི་པའི་ཤར་དུ་ཟླ་བ་ལ་སེང་གེའི་རྒྱལ་མཚན་འཛིན་མ་དཀར་མོ་སེང་གེའི་རྒྱལ་མཚན་འཛིན་པའོ། །ལྷོར་ཟླ་བ་ལ་གནས་པའི་རྣམ་པར་རྒྱལ་མ་དམར་མོ་ལྕགས་ཀྱུ་འཛིན་པའོ། །ནུབ་ཏུ་ཟླ་བ་ལ་པད་ལྡན་མ་ཆེན་མོ་དཀར་མོ་གཞུ་དང་མདའ་འཛིན་པའོ། །བྱང་དུ་ཟླ་བ་ལ་ཆང་འཕྲོག་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །དབང་ལྡན་དུ་ཟླ་བ་ལ་མཆོག་འཕྲོག་མ་སེར་མོ་ཐུགས་ཀར་མེ་ཏོག་དང་བཅས་པའི་ཐལ་མོ་ཁ་སྦྱོར་བའོ། །མེར་ཟླ་བ་ལ་རིན་ཆེན་དབང་ཕྱུག་མ་སེར་མོ་སྤོས་ཕོར་འཛིན་པའོ། །བདེན་བྲལ་དུ་ཟླ་བ་ལ་རྒྱན་མ་སེར་མོ་དྲིའི་དུང་ཆོས་འཛིན་པའོ། །རླུང་དུ་ཟླ་བ་ལ་འགྲོ་སྐྱོང་མ་སེར་མོ་མར་མེའི་མཆོད་སྡོང་འཛིན་པའོ། །འདིར་གང་ལ་ཁྱད་པར་གྱི་ཚིག་མེད་པ་དེ་རྣམས་ལ་ཉི་མ་དང་ཟླ་བ་ཐམས་ཅད་ནི་སྣ་ཚོགས་པདྨ་ལ་གནས་པའོ། །ལྷ་ཐམས་ཅད་སེམས་དཔའི་སྐྱིལ་ཀྲུང་ཅན་གོས་དང་རིན་པོ་ཆེ་སྣ་ཚོགས་ཀྱིས་བརྒྱན་པའོ། །འདིར་དཀྱིལ་འཁོར་གྱི་བདག་པོའི་རིགས་ཀྱི་བདག་པོ་ནི་མི་བསྐྱོད་པའོ། །ཐུགས་ཀའི་ས་བོན་ནི་ཧཱུཾ་ངོ༌། །ཧཱུཾ་བཛྲ་ཕཊ་ཅེས་པ་ནི་སྙིང་པོའོ། །ཡང་ན་ཨོཾ་བྷཱུཾ་ཧ་ཌ་མ་ར་བྷཱུ་ཏ་ཨདྷི་པ་ཏི་ཨཀྵོ་བྷྱ་ཀཱི་རཱི་ཊི་ན་སརྦ་བྷཱུ་ཏ་པྲེ་ཏ་པི་ཤཱ་ཙ་ན་ས་དྷཱ་ཡ་ཧཱུཾ་ཕཊ་ཅེས་བྱ་བ་ནི་ལས་ཐམས་ཅད་པའི་སྔགས་ཀྱང་དེ་ཉིད་དོ། །ཡང་ན་བགེགས་མཐར་བྱེད་ཀྱིས་སོ།། །།མཁའ་འགྲོ་ལྔའི་དཀྱིལ་འཁོར་ལ། རྡོ་རྗེའི་ས་གཞི་ལ་སོགས་པ་
ནས་བཟུང་ནས་གཞལ་ཡས་ཁང་གི་བར་དུ་སྔར་གྱི་འཇམ་པའི་རྡོ་རྗེའི་དཀྱིལ་འཁོར་བཞིན་དུ་ཤེས་པར་བྱའོ། །དེ་ལ་དབུས་ཀྱི་གཞལ་ཡས་ཁང་གི་དབུས་སུ་བཅོམ་ལྡན་འདས་རྡོ་རྗེ་མཁའ་འགྲོའོ། །ཤར་ལ་སོགས་པའི་སྒོ་རྣམས་སུ་གཽ་རཱི་ལ་སོགས་པ་རྣམས་དང༌། དབང་ལྡན་ལ་སོགས་པའི་མཚམས་རྣམས་སུ་པུཀྐ་སཱི་ལ་སོགས་པའོ། །དེ་ལ་གཽ་རཱི་དཀར་མོ་གཡས་པས་ལྕགས་ཀྱུ་འཛིན་པའོ། །ཙཽ་རཱི་དམར་མོ་ཞགས་པ་འཛིན་པའོ། །བེ་ཏཱ་ལཱི་དམར་མོ་ཕྱག་གཉིས་ཀྱིས་ལྕགས་སྒྲོག་འཛིན་པའོ། །གྷ་སྨ་རཱི་ལྗང་གུ་རྡོ་རྗེ་དང་དྲིལ་བུ་འཛིན་པའོ། །པུཀྐ་སཱི་སྔོན་མོ་ཕྱག་ན་བྱང་ཆུབ་སེམས་ཀྱི་བུམ་པ་འཛིན་པའོ། །ཤ་པ་རཱི་དཀར་མོ་རི་རབ་འཛིན་པའོ། །ཙཎྜ་ལཱི་སྔོན་མོ་མེ་ཐབ་འཛིན་པའོ། །ཌོཾ་བི་ནཱི་སྐུ་མདོག་སྣ་ཚོགས་མ་རྒྱལ་མཚན་ཆེན་པོའི་བ་དན་འཛིན་པའོ། །ཤར་ཕྱོགས་ཀྱི་གཞལ་ཡས་ཁང་གི་དབུས་སུ་ཟླ་བའི་སྟེང་དུ་སངས་རྒྱས་མཁའ་འགྲོ་དཀར་པོ་སྟེ། རྩ་བའི་ཞལ་དཀར་པོ་གཡོན་པ་དམར་པོ་གཞན་ཐམས་ཅད་སྔོན་པོའོ། །གཡས་པའི་ཕྱག་བརྒྱད་ཀྱི་ཐོད་པ་ན་རྨ་བྱ་དང་མ་ཧེ་དང༌། ཆུ་སྲིན་དང་ཉ་དང་རྒྱལ་པོ་དང་རུས་སྦལ་དང༌། ལྷག་པའི་ཀླུ་དང་ངང་པ་རྣམས་སོ། །གཡོན་པ་བརྒྱད་ཀྱི་ཐོད་པ་རྣམས་ནི་དཔྱིད་དང་སྲོག་ཆགས་ཛྱེཥྛ་དང་སྦྲུལ་ཧ་ལ་ཧ་ལ་དང་ཨ་ཛ་ནཱ་བྷྱོ་དང་བྱི་བ་དང་གཡག་དང་དྲི་ཅན་དང་ཅོ་ག་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པ་རྣམས་སུ་རིམ་པ་བཞིན་དུ་སྐམ་པ་མོ་ལ་སོགས་པའི་ལྷ་མོ་རྣམས་སོ། །དེ་ལ་སྐམ་པ་མོ་སྔོན་མོ་ཕྱག་གཡས་པ་ན་སྐམ་པ་འཛིན་པ། ཞགས་ལྡན་མ་སེར་མོ་ཞགས་པ་འཛིན་པའོ། །དོལ་ཟླུམ་མ་དམར་མོ་ཉ་རྒྱ་ཟླུམ་པོ་འཛིན་པའོ། །ལྕགས་ཀྱུ་མ་ལྗང་གུ་ལྕགས་ཀྱུ་འཛིན་པའོ། །མེ་ཏོག་མ་དཀར་མོ་མེ་ཏོག་གི་ཟ་མ་ཏོག་འཛིན་པའོ། །བདུག་སྤོས་མ་ནག་མོ་སྦོས་ཕོར་འཛིན་པའོ། །མར་མེ་མ་སེར་མོ་མར་མེའི་མཆོད་སྡོང་འཛིན་པའོ། །དྲི་ཆབ་མ་སེར་མོ་དྲི་སེར་པོས་བཀང་བའི་དུང་འཛིན་པའོ། །ལྷོ་ཕྱོགས་ཀྱི་གཞལ་ཡས་ཁང་གི་དབུས་སུ་རིན་ཆེན་མཁའ་འགྲོ་སེར་པོ་སྟེ། འདིའི་རྩ་བ་དང་གཡོན་པ་གཉིས་སེར་པོ་དང་དཀར་པོ་ལྷག་མ་རྣམས་ནི་སྔོན་པོ། གཡས་པའི་ཐོད་
བ་རྣམས་ན་བྱ་ཀ་རཎྜ། དུར་བ་དང་ལུག་དང་བྱ་ཙ་ཀོ་ར་དང་ཁྲ་དང་ཧོར་བ་དང་འོལ་བ་དང་བྱ་ཀུ་རའོ། །གཡོན་པ་རྣམས་ན་སྟོབས་ཀྱི་རྒྱུ་དང་དུང་སྐྱོང་དང་རིགས་ལྡན་དང་པདྨ་དང་པདྨ་ཆེན་པོ་དང༌། འཇོག་པོ་དང་ནོར་རྒྱས་དང་མཐའ་ཡས་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པའི་མཚམས་སུ་ལྷ་མོ་རྣམས་ཏེ། དེ་ལ་ཉི་ཕྱག་མ་དཀར་མོ་ཉི་མའི་དཀྱིལ་འཁོར་འཛིན་པའོ། །མར་མེ་མ་སྔོན་མོ་མར་མེའི་མཆོད་སྡོང་འཛིན་པའོ། །རིན་ཆེན་དཀར་མདའ་མ་སེར་མོ་རིན་པོ་ཆེ་འཛིན་པའོ། །གློག་ཕྱག་མ་ལྗང་གུ་གློག་གི་ཕྲེང་བ་འཛིན་པའོ། །སྒེག་མོ་དམར་མོ་སྙེམས་པ་དང་བཅས་པའི་ཕྱག་གཉིས་ཀྱིས་རྡོ་རྗེ་འཛིན་པའོ། །ཕྲེང་བ་མ་དམར་མོ་ཕྱག་གཉིས་ཀྱིས་རིན་པོ་ཆེའི་ཕྲེང་བ་འཛིན་པའོ། །ཀླུ་མ་དམར་སྐྱ་ཕྱག་གཉིས་ཀྱིས་ཏིང་ཏིང་ཤག་འཛིན་པའོ། །གར་མ་སྣ་ཚོགས་པའི་མདོག་ཕྱག་གཉིས་ཀྱིས་རྡོ་རྗེ་དང་བཅས་པས་གར་བྱེད་པའོ། །ནུབ་ཀྱི་གཞལ་ཡས་ཁང་གི་དབུས་སུ་པདྨ་མཁའ་འགྲོ་དམར་པོ་སྟེ། འདིའི་རྩ་བའི་ཞལ་དང་གཡོན་པ་ནི་དམར་པོ་དང་དཀར་པོ་དང་ལྷག་མ་རྣམས་ནི་ནག་པོའོ། །ཕྱག་གཡས་པའི་ཐོད་པ་རྣམ་ན་དོམ་དང་བྱ་རྒོད་དང༌། བསེ་དང་པ་མན་དང་སྟག་དང་སྤྲེའུ་དང༌། ཆུ་སྲིན་ནཱ་ཀྲ་དང་ཅེ་སྤྱང་རྣམས་སོ། །གཡོན་པ་རྣམས་ན་ཁྭ་དང་འུག་པ་དང་སོ་བྱ་དང་སེང་གེ་དང་བྱ་ས་ར་ས་དང་ར་དང་རི་དགས་དང་ཕག་པ་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པ་རྣམས་ལ་ལྷ་མོ་རྣམས་སོ། །དེ་ལ་ཤར་ཕྱོགས་སུ་པདྨ་དཀར་པོ་པདྨ་འཛིན་པའོ། །ཆོས་འབྱུང་མ་སེར་མོ་ཆོས་འབྱུང་འཛིན་པའོ། །ལྕགས་སྒྲོག་མ་ནག་མོ་ཕྱག་གཉིས་ཀྱིས་ལྕགས་སྒྲོག་འཛིན་པའོ། །རང་འཁྱུད་མ་ལྗང་གུ་སངས་རྒྱས་ཐམས་ཅད་ལ་རྗེས་སུ་ཆགས་པའི་ཕྱག་ན་རྡོ་རྗེ་དང་ཐོད་པ་བཟུང་བས་རང་ལ་འཁྱུད་པའོ། །གླིང་བུ་མ་དམར་མོ་ཕྱག་གཉིས་ཀྱིས་གླིང་བུ་བཟུང་ནས་སྒྲ་སྒྲོགས་པའོ། །པི་ཝང་མ་སེར་མོ་ཕྱག་གཉིས་ཀྱིས་པི་ཝང་བསྒྲེང་བ་ལ་བརྩོན་པའོ། །མུ་ཀུཎྜ་མ་དཀར་མོ་ཕྱག་གཉིས་ཀྱིས་རྔ་པོ་ཆེ་བརྡུང་བའོ། །རྫ་རྔ་མ་དུ་བའི་མདོག་ཅན་ཕྱག་གཉིས་ཀྱིས་རྫ་རྔ་བརྡུང་བའོ། །བྱང་གི་གཞལ་ཡས་ཁང་གི་
དབུས་སུ་སྣ་ཚོགས་མཁའ་འགྲོ་དཱུར་བ་ལྟར་ལྗང་གུ་སྟེ། དེའི་རྩ་བའི་ཞལ་ནི་རྟའི་གདོང་ལྗང་གུའོ། །གཞན་རྣམས་ལྷའི་ཞལ་ལོ། །ཕྱོགས་གཅིག་ལ་རྩ་བའི་ཞལ་ཡང་ལྷའི་ཞལ་ལོ། །གཡོན་པ་དཀར་པོ་ལྷག་མ་རྣམ་ནག་པོའོ། །ཕྱག་གཡས་པའི་ཐོད་པ་རྣམས་ན་གཟའ་ལག་པ་དང་ཕུར་བུ་དང་མཇུག་རིངས་དང་སྒྲ་གཅན་འཛིན་དང་མིག་དམར་དང་པ་ཝ་སངས་དང་སྦེན་པ་དང་ཁྱབ་འཇུག་རྣམས་སོ། །གཡོན་པ་རྣམས་ལ་དབང་པོ་དང་ཆུ་ལྷ་དང་ཚངས་པ་དང་དྲག་པོ་དང་འདོང་པའི་ལྷ་དང་སྟོབས་བཟངས་དང་ཐགས་བཟངས་རིས་དང་སྟོབས་ཅན་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པར་ལྷ་མོ་རྣམས་སོ། །དེ་ལ་སྒོ་ལྕགས་མ་དཀར་མོ་ནི་སྒོ་ལྕགས་འཛིན་པའོ། །ལྡེ་ཀྱོག་མ་སེར་མོ་ལྡེ་ཀྱོག་འཛིན་པའོ། །སྒོ་གླེགས་མ་དམར་མོ་སྒོ་གླེགས་འཛིན་པའོ། །ཡོལ་བ་འཛིན་མ་ནག་མོ་ཕྱག་གཉིས་ཀྱིས་ཡོལ་བ་འཛིན་པའོ། །སྤྱན་མ་དཀར་མོ་འཁོར་ལོ་འཛིན་པའོ། །མཱ་མ་ཀཱི་སྔོན་མོ་རྡོ་རྗེ་འཛིན་པའོ། །གས་དཀར་མོ་དམར་མོ་ཕྱག་ན་པདྨ་འཛིན་པའོ། །སྒྲོལ་མ་ལྗང་གུ་ཕྱག་ན་ཨུཏྤལ་སྔོན་པོ་འཛིན་པའོ། །གཞལ་ཡས་ཁང་ཆེན་པོའི་སྒོ་རྣམས་དང་དབང་ལྡན་ལ་སོགས་པ་རྣམས་སུ་གཽ་རཱི་ལ་སོགས་པ་དང་པུཀྐ་སཱི་ལ་སོགས་པ་སྟེ་སྔར་བཞིན་ནོ། །འདིར་རྡོ་རྗེ་མཁའ་འགྲོ་ནི་གདན་དང་མདོག་དང་དབྱིབས་དང་ཞལ་དང་ཕྱག་ལ་སོགས་པ་རྣམས་ནི་ཧེ་རུ་ཀ་ལྷ་དགུའི་བདག་ཉིད་ཅན་གྱི་དཀྱིལ་འཁོར་ལ་ཇི་ལྟར་ཕྱག་བཅུ་དྲུག་པའི་དགྱེས་པའི་རྡོ་རྗེ་དང་འཁྱུད་པའི་ཡུམ་བདག་མེད་མ་ཡང་དེ་བཞིན་ནོ། །འཁོར་ལོའི་མཁའ་འགྲོ་མ་ལ་སོགས་པ་བཞི་པོ་འདི་ནི་བཤད་པའི་ཁྱད་པར་རྣམས་ལས་ཁྱད་པར་གཞན་རྣམ་ནི་རྡོ་རེ་མཁའ་འགྲོ་དང་མཚུངས་པའོ། །དེ་ནས་འཁྱུད་པའི་ལྷ་མོ་རྣམས་ནི་གོ་རིམས་ཇི་ལྟ་བར་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ནི་དཀར་མོ་དང་སེར་མོ་དང་དམར་མོ་དང་ལྗང་གུ་སྟེ་གྲི་གུག་དང་སྡིགས་མཛུབ་དང་ལྡན་པའི་ཕྱག་གཉིས་པ་རྣམས་སོ། །མཁའ་འགྲོ་མ་ལྔ་པོ་རྣམས་ཀྱང་རེ་རེ་ཞིང་དེ་བཞིན་གཤེགས་པ་ལྔའི་ཅོད་པན་ཅན་ནོ། །གཞལ་ཡས་ཁང་གི་ལྷ་མོ་རྣམས་ནི་གཅེར་བུ་སྤྱན་གསུམ་དམར་ལ་ཟླུམ་པ་མཆེ་བ་གཙིགས་པ་ཞལ་གཅིག་པ་ཕྱག་གཉིས་པ་དབུ་སྐྲ་
འབར་བ་གྱེན་དུ་བརྫེས་པ་དཔྲལ་བའི་དབྱེས་ལ་ཐོད་པ་ལྔ་དང་མི་མགོ་སྐམ་པོའི་དོ་ཤལ་དང་ཕྱག་རྒྱ་ལྔས་བརྒྱན་པའོ། །སྣ་ཚོགས་པདྨ་དང་རོ་དང་ཉི་མ་རྣམས་ལ་གཡས་བསྐུམ་གཡོན་བརྐྱང་གི་གར་གྱིས་གནས་པའོ། །གང་ཁྱད་པར་མ་བཤད་པ་རྣམས་ནི་གཡོན་པའི་ཁུ་ཚུར་གྱིས་སྡིགས་མཛུབ་སྙིང་གར་འཛིན་པས་སྡིགས་པར་མཛད་དོ། །འཁྱུད་པའི་ལྷ་མོ་རྣམས་ལ་ནི་གདན་ཐ་དད་པ་མེད་དོ། །གཽ་རཱི་ལ་སོགས་པ་བརྒྱད་ལ་རིམ་པ་བཞིན་དུ་རོ་གདན་གྱི་གནས་སུ་ཚངས་པ་དང་དབང་པོ་དང་ཉེ་བའི་དབང་པོ་དང༌། དྲག་པོ་དང་གཤིན་རྗེ་དང༌། ལུས་ངན་པོ་དང་སྲིན་པོ་དང༌། ཐགས་བཟངས་རིས་རྣམས་ཞེས་པ་ནི་ཕྱོགས་གཞན་ནོ། །མཁའ་འགྲོ་མ་རྣམས་དང་གཽ་རཱི་ལ་སོགས་པ་རྣམས་རྡོ་རྗེ་མཁའ་འགྲོ་ལ་ཞལ་མངོན་པར་ཕྱོགས་པའོ། །ལྷ་གཞན་རྣམས་ནི་རང་རང་གི་བདག་པོ་ལ་མངོན་པར་ཕྱོགས་པའོ། །དགྱེས་པ་རྡོ་རྗེའི་སྤྱི་བོར་རྡོ་རྗེ་འཛིན་པ་དག་རྡོ་རྗེའོ། །སྒོ་དང་མཚམས་ཀྱི་ལྷ་མོ་རྣམས་ལ། ཐུགས་དང༌། རྟག་པ་དང༌། རིན་འབྱུང་དང༌། འོད་དཔག་མེད་རྣམས་སོ། །རྟག་པའི་སྤྱི་བོར་འཁོར་ལོ་འཛིན་པ་དན་འཁོར་ལོའོ། །སྒོ་དན་མཚམས་ཀྱི་ལྷ་མོ་རྣམས་ལ་ཐུགས་དང༌། རིན་འབྱུང་དང་འོད་དཔག་མེད་དང༌། དོན་ཡོད་གྲུབ་པ་རྣམས་སོ། །རྡོ་རྗེ་ཉི་མའི་སྤྱི་བོར་རིན་འབྱུང་དང་ཡིད་བཞིན་ནོར་བུའོ། །དེའི་སྒོ་དང་མཚམས་ཀྱི་ལྷ་མོ་རྣམས་ཀྱི་ནི་སྐུ་དང་ཐུགས་དང༌། འོད་དཔག་མེད་དན་དོན་ཡོད་གྲུབ་པ་རྣམས་སོ། །པདྨ་གར་གྱི་དབང་ཕྱུག་གི་སྤྱི་བོར་པདྨ་འཛིན་པ་དང༌། རྡོ་རྗེ་པདྨའོ། །དེའི་སྒོ་དང་མཚམས་ཀྱི་ལྷ་མོ་རྣམས་ཀྱི་ནི་སྐུ་རྡོ་རྗེ་དང་རིན་ཆེན་འབྱུང་ལྡན་དང་མི་བསྐྱོད་པ་དང་ཚེ་དཔག་མེད་རྣམས་སོ། །རྟ་མཆོག་གི་སྤྱི་བོར་རལ་གྲི་འཛིན་པ་དང་རལ་གྲིའོ། །སྒོ་དང་མཚམས་ཀྱི་ལྷ་མོ་རྣམས་ཀྱི་ནི་སྐུ་རྡོ་རྗེ་དང་གསུང་རྡོ་རྗེ་དང༌། འོད་དཔག་མེད་དང་དོན་ཡོད་གྲུབ་པ་རྣམས་སོ། །ཕྱི་རོལ་གྱི་གཽ་རཱི་ལ་སོགས་པ་རྣམས་སྔར་དང་མཚུངས་པའོ། །རྡོ་རྗེ་མཁའ་འགྲོ་ལ་སོགས་པའི་མཁའ་འགྲོ་རྣམས་ཀྱི་ཐུགས་ཀའི་ས་བོན་ནི་གོ་རིམས་བཞིན་དུ་ཧཱུཾ་ཨོཾ་ཏྲཱཾ་ཨཱཿ་ཁཾ་ཞེས་བྱ་བ་རྣམས་སོ། །སྙིང་པོའི་སྔགས་རྣམས་ནི། ཨོཾ་དྷ་ར་དྷ་ར། དྷཱ་ར་ཡ་དྷཱ་ར་ཡ། མརད་མརད་བཛྲ་དྷྲྀཀ་ཕཊ་སྭཱ་ཧཱ། ཨོཾ་ཤཱ་ཤྭ་ཏ་པ་ར་མ་ཤཱ་ཤྭ་ཏེ་ཨེ་ཧྱེ་ཧི་ཛི་ན་ཛིཀ་ཧཱུཾ་ཕཊ་སྭཱ་ཧཱ། ཨོཾ་བཛྲ་སཱུཪྻ་ཏ་མོ་བིདྷ་མ་ནས་
མ་ཡ་སྟྭཾ། ཨ་ཧཾ་རཏྣ་དྷྲྀཀ་ཕཊ་སྭཱ་ཧཱ། ཨོཾ་བཛྲ་དྷརྨཱ་ས་མ་ཡ་སྟྭཾ་ཧུ་ལུ་ཧུ་ལུ་ཨཱ་རོ་ལྀ་ཀ་ཕཊ་སྭཱ་ཧཱ། ཨོཾ་ཕུ་ཕུ་ཧི་ཧི་པྲཛྙཱ་དྷྲྀཀ་ཕཊ་སྭཱ་ཧཱ། ཞེས་བྱ་བའོ། །ན་མཿ་ས་མནྟ་བུདྡྷེ་བྷྱོ། ན་མོ་བཛྲ་ཀྲོ་དྷ་ཡ་མ་ཧཱ་དཾ་ཥྚོ་ཏྐ་ཊ་བྷཻ་ར་བཱ་ཡ། བཛྲ་སནྡོ་ཧ་ད་རྤཱཡ་ཨམྲྀ་ཏ་ཀུཎྜ་ལི་ཧཱུཾ་ཞེས་བྱ་བ་ནི་བགེགས་མཐར་བྱེད་ཀྱི་སྔགས་ཏེ། ལས་ཐམས་ཅད་པའོ། །མཁའ་འགྲོ་ལྔ་པོ་འདི་དག་གང་ཡང་རུང་བའི་དཀྱིལ་འཁོར་གྱི་དབུས་སུ་བསྒོམ་པར་བྱ་བ་དེ་རེ་རེ་ཡང་སོ་སོའི་དཀྱིལ་འཁོར་དུ་བཅོམ་ལྡན་འདས་ཀྱིས་གསུངས་ཏེ། སངས་རྒྱས་མགོན་པོ་གང་ཞིག་ཉིད། །དབུས་སུ་གྱུར་པའི་དཀྱིལ་འཁོར་ནི། །དེ་ཉིད་ཀྱི་ནི་དཀྱིལ་འཁོར་གསུངས། །སྙིང་པོ་ལེན་ཕྱིར་དཀྱིལ་འཁོར་ཏེ། དཀྱིལ་འཁོར་རེ་རེ་བསྒོམ་པའམ། ཡང་ན་བསྡུས་པའི་དཀྱིལ་འཁོར་རོ། །ཞེས་གསུངས་སོ།། །།འཁོར་ལོས་སྒྱུར་བ་དྲུག་གི་དཀྱིལ་འཁོར་ལ། །རྡོ་རྗེའི་ས་གཞི་ལ་སོགས་པ་དང༌། འཁོར་ལོ་རྩིབས་བཅུ་པའི་བར་དུ་འཇམ་པའི་རྡོ་རྗེའི་དཀྱིལ་འཁོར་དུ་བཤད་པ་ཇི་ལྟ་བའི་རྩིབས་བཅུ་པའི་འཁོར་ལོའོ། །ཁྲོ་བོ་བཅུ་ནི་གཞན་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་ཁྲོ་བོའི་དཀྱིལ་འཁོར་ལས་བཤད་པའི་རྡོ་རྗེའི་དབྱུག་པ་ལ་སོགས་པ་ནས་རྡོ་རྗེས་འོག་གི་བར་ལྟ་བུའོ་ཞེས་པར་ནི་ཁྱད་པར་རོ། །འཁོར་ལོ་རྩིབས་བཅུ་པ་འདིའི་ལྟེ་བའི་ནང་གི་ཆོས་འབྱུང་གི་དབུས་སུ་རླུང་དང་མེ་དང་ཆུ་དང་གསེར་གྱི་རང་བཞིན་གྱིས་གཞིའི་དཀྱིལ་འཁོར་དང༌། རི་རབ་ཀྱི་སྟེང་དུ་སྣ་ཚོགས་ཆུ་སྐྱེས་དང་སྣ་ཚོགས་རྡོ་རྗེའི་ལྟེ་བ་ལ་གཞལ་ཡས་ཁང་ཆེན་པོའོ། །ཕྱོགས་གཞན་ལ་འདིར་ཆོས་འབྱུང་མེད་དོ་ཞེས་པའོ། །གཞལ་ཡས་ཁང་ཆེན་པོའི་ལྟེ་བར་གནས་པའི་ལྟེ་བར་གནས་པའི་གཞལ་ཡས་ཁང་གི་དབུས་སུ་གནས་སེང་གེའི་སྟེང་དུ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་གྱི་སྟེང་དུ་བཞུགས་པའི་རྡོ་རྗེ་སེམས་དཔའ་བསྒོམ་པར་བྱའོ་ཞེས་མངོན་པར་བརྗོད་པའི་རྒྱུད་བླ་མ་ལས་གསུངས་པས། །ཉི་མ་ལ་གནས་པའི་འཇིགས་བྱེད་དང་གཽ་རཱི་དག་གི་སྟེང་དུ་རྡོ་རྗེ་སྐྱིལ་གྲུང་གིས་གནས་པའི་ཡེ་ཤེས་མཁའ་འགྲོ་རྡོ་རྗེ་སེམས་དཔའ་དཀར་པོའམ་ནག་པོ་རྡོ་ཇེ་དང་བཅས་པའི་རྡོ་རྗེ་དྲིལ་བུ་དང་ལྡན་པའི་གཡས་པ་དང་ཅིག་ཤོས་ཀྱི་ཕྱག་གིས་ཡུམ་ལ་འཁྱུད་པའོ། །ལྷ་མོ་དེ་ནི་རྡོ་ཇེ་དང་སྡིགས་མཛུབ་དང་བཅས་པའི་ཕྱག་གཡས་བརྐྱང་པ་
ཁྲག་གིས་གང་བའི་ཐོད་པ་དབུལ་བའི་ཕྱག་གཡོན་གྱིས་ཡབ་ལ་འཁྱུད་པ་སྐུ་མདོག་དམར་མོ་ཡེ་ཤེས་མཁའ་འགྲོ་མ་སྟེ། མིང་གཞན་ཆོས་ཀྱི་དབྱིངས་ཀྱི་དབང་ཕྱུག་མ་ཞེས་པ་དང་རྡོ་རྗེ་ཕག་མོ་ཞེས་ཀྱང་གྲགས་སོ། །དེ་ནས་ཤར་ལ་སོགས་པའི་ཕྱོགས་ལ་གཡས་སྐོར་གྱིས་སངས་རྒྱས་མཁའ་འགྲོ་ལ་སོགས་པ་ལྔ་པོ་དགོད་པར་བྱ་སྟེ། དེ་དག་གི་འཁོར་རྣམས་དཀྱིལ་འཁོར་སོ་སོར་ཤར་ལ་སོགས་པའི་སྒོ་རྣམས་སུ་གཡོན་སྐོར་གྱིས་དགོད་ཅིང་མེ་ལ་སོགས་པའི་མཚམས་རྣམས་སུ་གཡས་སྐོར་གྱིས་དགོད་པར་བྱའོ། །རྡོ་རྗེ་སེམས་དཔའ་ཕྱོགས་བྲལ་རྣམས་ལ་རིམ་པ་ཇི་ལྟ་བས་མཁའ་འགྲོ་མ་དང་ལཱ་མ་དང༌། དུམ་སྐྱེས་མ་དང༌། གཟུགས་ཅན་མ་རྣམས་ནི་སྔོན་མོ་དང༌། སེར་མོ་དང༌། དམར་མོ་དང༌། ལྗང་གུ་རྣམས་གཡས་བརྐྱང་གིས་བཞུགས་པའོ། །སྒོ་རྣམས་སུ་ཐོད་པའི་དུམ་བུ་དང༌། ཀེང་རུས་ཆེན་པོ་དང་ཀེང་རུས་དང༌། ཀེང་རུས་ཆེན་པོ་དང་ཀེང་རུས་དང༌། མཆེ་བ་རྣམས་པར་གཙིགས་པ་རྣམས་སྐུ་མདོག་ནག་པོ་རྡོ་རྗེ་དང་རྡོ་རྗེ་དྲིལ་བུ་དང་བཅས་པའི་ཕྱག་གཉིས་ཀྱིས་རབ་ཏུ་གཏུམ་མོ་དང་གཏུམ་པའི་མིག་ཅན་དང༌། འོད་ལྡན་མ་དང་སྣ་ཆེན་མ་ཐལ་བ་དཀར་པོའི་མདོག་ཅན་རྣམས་ལ་འཁྱུད་པའོ། །དེ་ནས་རྣམ་པར་སྣང་མཛད་ཀྱི་གཞལ་ཡས་ཁང་གི་དབུས་སུ་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་གནས་པའི་ཚངས་པའི་སྙིང་གར་སངས་རྒྱས་མཁའ་འགྲོ་རྡོ་རྗེ་སྐྱིལ་ཀྲུང་གིས་བཞུགས་པ་སྐུ་མདོག་དཀར་པོ་འཁོར་ལོ་དང་འཁོར་ལོས་མཚན་པའི་དྲིལ་བུ་འཛིན་པའི་ཕྱག་གཡས་དང་གཡོན་གཉིས་ཀྱིས་སངས་རྒྱས་མཁའ་འགྲོ་མ་ལ་འཁྱུད་པའོ། །སྒོ་རྣམས་ལ་ཆང་དགྲ་དང༌། འོད་དཔག་མེད་དང༌། རྡོ་རྗེ་འོད་དང་རྡོ་རྗེ་ལུས་རྣམས་ནི་སྐུ་མདོག་དཀར་པོ་འཁོར་ལོ་དང་འཁོར་ལོས་མཚན་པའི་དྲིལ་བུ་འཛིན་པའི་ཕྱག་གཉིས་ཀྱིས་དཔའ་བོའི་བློ་གྲོས་མ་དང་མིའུ་ཐུང་མ་དང་ལང་ཀའི་དབང་ཕྱུག་མ་དང་ཤིང་གྲིབ་མ་རྣམས་སེར་མོ་ལ་འཁྱུད་པའོ། །རིན་ཆེན་འབྱུང་ལྡན་གྱི་གཞལ་ཡས་ཁང་གི་དབུས་སུ་རྟའི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་ལྷའི་བུ་ཉི་མའི་སྙིང་གར་རིན་ཆེན་མཁའ་འགྲོ་རྡོ་རྗེ་སྐྱིལ་ཀྲུང་དུ་བཞུགས་པ་སྐུ་མདོག་སེར་པོ་རིན་པོ་ཆེ་དག་རིན་པོ་ཆེས་མཚན་པའི་དྲིལ་བུ་འཛིན་པའི་ཕྱག་གཡས་པ་དང་གཡོན་པ་གཉིས་ཀྱིས་རིན་ཆེན་མཁའ་འགྲོ་མ་སེར་མོ་ལ་འཁྱུད་པའོ། །སྒོ་རྣམས་ལ་མྱུ་གུ་ཅན་
དང། རྡོ་རྗེ་རལ་པ་ཅན་དང༌། དཔའ་བོ་ཆེན་པོ་དང༌། རྡོ་རྗེ་ཧཱུཾ་མཛད་རྣམས་སྐུ་མདོག་སེར་པོ་རིན་པོ་ཆེ་དང༌། རིན་པོ་ཆེས་མཚན་པའི་དྲིལ་བུ་འཛིན་པའི་ཕྱག་གཉིས་ཀྱིས་ས་སྲུང་མ་དང་འཇིགས་བྱེད་ཆེན་མོ་དང་རླུང་ཤུགས་མ་དང་ཆང་འཐུང་མ་རྣམས་ལྗང་གུའི་ཁ་དོག་དང་ལྡན་པ་ལ་འཁྱུད་པའོ། །སྣང་བ་མཐའ་ཡས་ཀྱི་དཀྱིལ་འཁོར་གྱི་དབུས་སུ་རྨ་བྱའི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་དབང་ཕྱུག་ཆེན་པོའི་སྙིང་གར་པདྨ་མཁའ་འགྲོ་དམར་པོ་རྡོ་རྗེ་སྐྱིལ་ཀྲུང་གིས་བཞུགས་པ་སྐུ་མདོག་དམར་པོ་པདྨ་དང་པདྨས་མཚན་པའི་དྲིལ་བུ་དང་ལྡན་པའི་ཕྱག་གཡས་པ་དང་གཡོན་པ་གཉིས་ཀྱིས་པདྨ་མཁའ་འགྲོ་དམར་མོ་ལ་འཁྱུད་པའོ། །སྒོ་རྣམས་ལ་ཤིན་ཏུ་བཟང་པོ་དང་རྡོ་རྗེ་བཟང་པོ་དང་འཇིགས་བྱེད་ཆེན་པོ་དང༌། མིག་མི་བཟང་རྣམས་དམར་མོ་པདྨ་དང་ཉི་མས་མཚན་པའི་དྲིལ་བུ་དང་བཅས་པའི་ཕྱག་གཉིས་ཀྱིས་ལྷ་མོ་སྔོ་བསངས་མ་དང༌། ཤིན་ཏུ་བཟང་མོ་དང༌། རྟ་རྣ་མོ་དང། བྱ་རོག་གདོང་རྣམས་སྐུ་མདོག་དཀར་མོ་ལ་འཁྱུད་པའོ། །མི་བསྐྱོད་པའི་གཞལ་ཡས་ཁང་གི་དབུས་སུ་གླང་པོ་ཆེའི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་ཁྱ་བ་འཇུག་གི་སྙིང་གར་རྡོ་རྗེ་སྐྱིལ་ཀྲུང་གིས་བཞུགས་པའི་རྡོ་རྗེ་མཁའ་འགྲོ་ནག་པོ་རྡོ་རྗེ་དང་རྡོ་རྗེས་མཚན་པའི་དྲིལ་བུར་ལྡན་པའི་ཕྱག་གཡས་དང་གཡོན་པ་གཉིས་རྡོ་རྗེ་མཁའ་འགྲོ་མ་ལ་འཁྱུད་པ་སྟེ། ལྷ་མོ་དེ་ནི་དམར་མོའམ་ནག་མོའོ། །སྒོ་རྣམས་ལ་སྟོབས་པོ་ཆེ་དང༌། རིན་ཆེན་རྡོ་རྗེ་དང༌། རྟ་མགྲིན་དང༌། ནམ་མཁའི་སྙིང་པོ་རྣམས་ནག་པོ་རྡོ་རྗེ་དང་རྡོ་རྗེས་མཚན་པའི་དྲིལ་བུ་དང་བཅས་པའི་ཕྱག་གཉིས་ཀྱིས་འཁོར་ལོའི་ཤུགས་ཅན་མ་དང༌། དུ་མ་སྐྱེས་མ་དང༌། ཆང་འཐུང་མ་དང༌། འཁོར་ལོའི་གོ་ཆ་མ་རྣམས་སེར་མོ་ལ་འཁྱུད་པའོ། །དོན་ཡོད་གྲུབ་པའི་གཞལ་ཡས་ཁང་གི་དབུས་སུ་ནམ་མཁའ་ལྡིང་གི་སྟེང་དུ་སྣ་ཚོགས་པདྨ་དང་ཉི་མ་ལ་གནས་པའི་ལྷའི་བུ་ཟླ་བའི་སྙིང་གར་རྡོ་རྗེ་སྐྱིལ་ཀྲུང་གིས་བཞུགས་པའི་སྣ་ཚོགས་མཁའ་འགྲོ་སྐུ་མདོག་ལྗང་གུ་སྣ་ཚོགས་རྡོ་རྗེ་དང༌། སྣ་ཚོགས་རྡོ་རྗེས་མཚན་པའི་དྲིལ་བུ་བཟུང་བའི་ཕྱག་གཉིས་ཀྱིས་སྣ་ཚོགས་མཁའ་འགྲོ་མ་ལྗང་གུ་ལ་འཁྱུད་པའོ། །སྒོ་རྣམས་སུ་ཧེ་རུ་ཀ་དང་པདྨ་གར་གྱི་དབང་ཕྱུག་དང༌། རྣམ་པར་སྣང་མཛད་དང༌། རྡོ་རྗེ་སེམས་དཔའ་རྣམས་སྐུ་མདོག་
ལྗང་གུ་སྣ་ཚོགས་རྡོ་རྗེས་མཚན་པའི་དྲིལ་བུ་འཛིན་པའི་ཕྱག་གཉིས་ཤིན་ཏུ་དཔའ་མོ་དང༌། སྟོབས་ཆེན་མོ་དང༌། འཁོར་ལོས་སྒྱུར་བ་དང༌། བརྩོན་འགྲུས་ཆེན་མོ་རྣམས་དུ་བ་ལྟ་བུའི་སྔོ་སྐྱའི་མདོག་ཅན་མ་ལ་འཁྱུད་པའོ། །དེ་ལྟར་དཔའ་མོ་ཉི་ཤུ་རྩ་བཞི་ནི་གཡས་བརྐྱང་གིས་གནས་པའོ། །འདིར་མཁའ་འགྲོ་མ་ལ་སོགས་པ་བཞི་ནི་གཡོན་པ་ཐོད་པ་དང་ཁ་ཊྭཱཾ་ག་འཛིན་པ་གཡས་པས་ཌ་མ་རུ་འཛིན་པའོ། །ཡེ་ཤེས་མཁའ་འགྲོ་མ་དང་རབ་ཏུ་གཏུམ་མོ་ལ་སོགས་པ་རྣམས་ནི་ཕྱག་གཡས་པས་རྡོ་རྗེ་དང་བཅས་པའི་སྡིགས་མཛུབ་གདེངས་པའོ། །སངས་རྒྱས་མཁའ་འགྲོ་མ་དང་དཔའ་བོའི་བློ་གྲོས་མ་ལ་སོགས་མ་རྣམས་ཀྱིས་ནི་འཁོར་ལོ་དང་བཅས་པའི་སྡིགས་མཛུབ་བོ། །རིན་ཆེན་མཁའ་འགྲོ་མ་དང་ས་སྲུང་མ་ལ་སོགས་པ་རྣམས་ནི་རིན་པོ་ཆེ་དང་བཅས་པའི་སྡིགས་མཛུབ་བོ། །པདྨ་མཁའ་འགྲོ་མ་དང་ལྷ་མོ་སྔོ་བསངས་མ་ལ་སོགས་པ་རྣམས་ནི་པདྨ་དང་བཅས་པའི་སྡིགས་མཛུབ་པོ། །རྡོ་རྗེ་མཁའ་འགྲོ་མ་དང་ཤུགས་ཅན་མ་འཁོར་ལོ་ལ་སོགས་པ་རྣམས་ནི་རྡོ་རྗེ་དང་བཅས་པའི་སྡིགས་མཛུབ་པོ། །སྣ་ཚོགས་མཁའ་འགྲོ་མ་དང་ཤིན་ཏུ་དཔའ་མོ་ལ་སོགས་པ་རྣམས་ནི་སྣ་ཚོགས་རྡོ་རྗེ་དང་བཅས་པའི་སྡིགས་མཛུབ་པོ། །ཡེ་ཤེས་མཁའ་འགྲོ་མ་ལ་སོགས་པ་ཐམས་ཅད་ལ་ཡང་འཁྱུད་པར་བྱེད་པའི་གཡོན་པའི་ཕྱག་ཏུ་འཛག་པ་དང་བཅས་པའི་ཁྲག་གིས་བཀང་པའི་ཐོད་པ་འཛིན་པའོ། །དཀྱིལ་འཁོར་ཆེན་པོའི་སྒོ་རྣམས་ལ་ཁྭ་གདོང་མ་དང༌། འུག་གདོང་མ་དང་ཁྱི་གདོང་མ་དང་ཕག་གདོང་མ་རྣམས་མིང་གི་རྗེས་སུ་མཐུན་པའི་ཞལ་ཏེ་རིམ་པ་ཇི་ལྟ་བས་སྔོན་པོ་དང་སེར་པོ་དང་དམར་པོ་དང་ལྗང་གུའི་མདོག་ཅན་རྣམས། ཕྱག་གཡས་པ་རྣམས་ན་ལྕགས་ཀྱུ་དང༌། ཞགས་པ་དང༌། ལྕགས་སྒྲོག་དང༌། དྲིལ་བུ་འཛིན་པའོ། །མཚམས་རྣམས་ལ་གཤིན་རྗེ་བརྟན་མ་དང༌། གཤིན་རྗེ་ཕོ་ཉ་མ་དང༌། གཤིན་རྗེ་མཆེ་པ་མ་དང༌། གཤིན་རྗེ་འཇོམས་མ་རྣམས་ནི་མི་མོའི་གདོང་པ་ཅན་ནོ། །གཡས་དང་གཡོན་པའི་ལྷ་མོའི་ཁ་དོག་གཡས་གཡོན་གྱི་སྐུ་ཕྱེད་ཕྱེད་དང་ལྡན་པ་རྣམས་ཏེ། ཕྱག་གཡས་པ་ན་མེ་ལོང་དང་པི་ཝང་དང་དྲིའི་དུང་ཆོས་དང་རོའི་སྣོད་རྣམས་འཛིན་པའོ། །ལྷ་མོ་བརྒྱད་པོ་འདི་དག་ཀྱང་ཕྱག་གཡོན་པས་ཐོད་པ་དང་ཁ་ཊྭཱཾ་ག་འཛིན་པ་གཡས་བརྐྱང་གིས་གནས་པའོ། །གཞལ་ཡས་ཁང་དྲུག་
པོ་རྣམས་ཀྱི་ཡང་མཚམས་སུ་སྣ་ཚོགས་པདྨ་ལ་གནས་པའི་བྱང་ཆུབ་སེམས་ལ་སོགས་པས་གང་བའི་ཐོད་པ་རྣམས་སོ། །མཁའ་འགྲོ་མ་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའི་རོ་རྣམས་ལ་བཞུགས་པའོ། །འཁོར་ལོས་སྒྱུར་བ་རྣམས་ཀྱང་རོ་ལ་གནས་པའོ་ཞེས་པ་ཕྱོགས་གཞན་ནོ། །ལྷ་མོ་རྣམས་ནི་སྐུ་རྒྱབ་ཏུ་འཕྱང་བའི་སྟག་གི་པགས་པའི་ཤམ་ཐབས་དཀྲིས་པ་མཆོད་ཕྱིར་ཐོགས་པ་ཅན་མི་མགོ་རློན་པའི་ཕྲེང་བ་མགྲིན་པ་ལ་འཕྱང་བ་རལ་པ་ནག་པོའི་ཐོར་ཅོག་ཅན་ནོ། །ལྷ་མོ་རྣམས་ནི་གཅེར་བུ་སྐྲ་ནག་པོ་གྲོལ་ཞིང་མི་མགོ་སྐམ་པོའི་ཕྲེང་བ་མགྲིན་པ་ལ་འཕྱང་བའོ། །ལྷ་བཞི་བཅུ་རྩ་གཉིས་ཀྱང་ཞལ་གཅིག་པ་ཕྱག་གཉིས་པ་སྤྱན་གསུམ་པ་རྡོ་རྗེ་ཕྲེང་བས་མཚན་པའི་དཔྲལ་པའི་སྟེང་དུ་ཐོད་པ་ལྔས་བརྒྱན་པ་དཔུང་རྒྱན་དང་གཡེར་ཁ་ལ་སོགས་པས་བརྒྱན་པ་ཕྱག་རྒྱ་ལྔ་དང་ལྡན་པའོ། །འཁོར་ལོས་སྒྱུར་བ་རྣམས་ཁོ་ན་ཕྱག་རྒྱ་དྲུག་དང་ལྡན་པ། ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན་དག་གོ །ལྷ་མོ་སུམ་ཅུ་རྩ་བཞི་རྣམས་རང་རང་གི་དཀྱིལ་འཁོར་གྱི་བདག་པོ་ལ་མངོན་པར་ཕྱོགས་པའོ། །འཁོར་ལོས་སྒྱུར་བ་རྣམ་པ་ལྔ་དང་ཁྭ་གདོང་མ་ལ་སོགས་པ་རྣམས་ཀྱིས་དབུས་ཀྱི་དཀྱིལ་འཁོར་གྱི་བདག་པོ་ལ་མངོན་པར་ཕྱོགས་པའོ། །དཔའ་པོ་རྣམས་ནི་རང་རང་གི་ཤེས་རབ་མ་ལ་མངོན་པར་ཕྱོགས་པའོ། །དེ་ལྟར་བཤད་པ་འདི་ནི་ཕྱོགས་གཅིག་གོ །འཁོར་ལོས་སྒྱུར་བ་དྲུག་པོ་འདི་དག་ཀྱང་ཞབས་གཡས་བརྐྱང་ངོ་ཞེས་བྱ་བ་ནི། ཁྱད་པར་ནི་ཕྱོགས་གཉིས་པའོ། །ཕྱོགས་གཉིས་པོ་འདི་དག་ལ་ཡེ་ཤེས་མཁའ་འགྲོ་དང་སངས་རྒྱས་མཁའ་འགྲོ་དང་དེ་དག་གི་འཁོར་རྣམས་ཀྱང་སེང་གེའི་སྟེང་དུ་གནས་པ་དང༌། རིན་ཆེན་མཁའ་འགྲོ་དང་དེའི་འཁོར་རྣམས་ཀྱང་རྟའི་སྟེང་དུ་གནས་པ་དང༌། པདྨ་མཁའ་འགྲོ་དང་དེའི་འཁོར་རྣམས་ཀྱང་རྨ་བྱའི་སྟེང་དུ་གནས་པ་དང༌། རྡོ་རྗེ་མཁའ་འགྲོ་དང་དེའི་འཁོར་རྣམས་ཀྱང་གླང་པོ་ཆེའི་སྟེང་དུ་གནས་པ་དང༌། སྣ་ཚོགས་མཁའ་འགྲོ་དང་དེའི་འཁོར་རྣམས་ཀྱང་ནམ་མཁའ་ལྡིང་གི་སྟེང་དུ་གནས་པའོ། །ཡེ་ཤེས་ཀྱི་མཁའ་འགྲོ་མ་ལ་སོགས་པ་འདི་དག་རྡོ་རྗེ་སྐྱིལ་ཀྲུང་ཅན་ནོ། །ཁྭ་གདོང་མ་ལ་སོགས་པ་བརྒྱད་པོ་འདི་དག་ཕྱོགས་སྐྱོང་བརྒྱང་རྣམས་ལ་གཡས་བརྐྱང་གིས་གནས་
པའོ་ཞེས་པ་ནི་ཕྱོགས་གསུམ་པའོ། །ཕྱོགས་འདི་རྣམས་དང་ཕྱོགས་གཞན་རྣམས་ལ་ཡང་ཡེ་ཤེས་མཁའ་འགྲོ་མ་ལ་སོགས་པ་རྣམས་ནི་ཞལ་གཅིག་ཕྱག་བཞི་པ་ལ་སོགས་པ་ཉིད་དང༌། ཞལ་གསུམ་ཕྱག་དྲུག་ལ་སོགས་པ་ཉིད་དང༌། ཞལ་ལྔ་ཕྱག་བརྒྱད་པ་ལ་སོགས་པ་ཉིད་དང༌། ཞལ་བཞི་ཕྱག་བཅུ་གཉིས་པ་ལ་སོགས་པ་ཉིད་དང༌། ཞལ་བརྒྱད་ཕྱག་བཅུ་དྲུག་པ་ལ་སོགས་པ་ཉིད་ཀྱང་བཅོམ་ལྡན་འདས་ཀྱིས་རབ་ཏུ་སྤྲོས་ནས་གསུངས་ཏེ། གཞུང་མངས་པས་འཇིགས་པས་འདིར་མ་བསྟན་ཏོ། །རང་རང་གི་འཁོར་རྣམས་ལ་དཀྱིལ་འཁོར་གྱི་རིགས་ཀྱི་བདག་པོ་ནི་འཁོར་ལོས་སྒྱུར་བ་དྲུག་གིས་སོ། །འཁོར་ལོས་སྒྱུར་བ་ལྔ་ལ་ནི་རྡོ་རྗེ་མཁའ་འགྲོས་སོ། །དེ་ཉིད་ལ་ནི་ཡེ་ཤེས་མཁའ་འགྲོས་སོ། །ཁྭ་གདོང་མ་ལ་སོགས་པ་རྣམས་ལ་ནི་སྣ་ཚོགས་མཁའ་འགྲོ་སྟེ། ཡེ་ཤེས་མཁའ་འགྲོའི་ཞེས་བྱ་བ་ནི་ཁ་ཅིག་གོ །ཡེ་ཤེས་མཁའ་འགྲོ་ལ་སོགས་པའི་རིམ་པ་ཇི་ལྟ་བར་ཐུགས་ཀའི་ས་བོན་རྣམས་ལ་ནི་བཾ་བྷཱུཾ་ཨཱཾ་ཏྲཾ་ཧཱུཾ་ཁཾ་ངོ། །སྙིང་པོའི་སྔགས་རྣམས་ནི་ཨོཾ་ཤྲཱི་མ་ཧཱ་སུ་ཁ་བཛྲ་སཏྭ་ཌཱ་ཀི་ནཱི་ཛཱ་ལ་སཾ་བ་རཾ་ཕཊ་སྭཱ་ཧཱ། ཨོཾ་ཤྲཱི་བུདྡྷ་ཌཱ་ཀ་ཨ་ལ་ལ་ལ་བྷྲཱུཾ་ཨཱཿ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་རཏྣ་ཌཱ་ཀ་ཏྲཱཾ་ཨཱཿ་ཧཱུཾ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་པདྨ་ཌཱ་ཀ་ཧྲཱིཿ་ཨཱཿ་ཧཱུཾ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བཛྲ་ཌཱ་ཀ་ཨཱཿ་ཧཱུཾ་ཕཊ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བི་ཤྭ་ཌཱ་ཀ་ཧོཿ་ཁཾ་ཨཱཿ་ཧཱུཾ་ཌཱ་ཀི་ནཱི་ཛཱ་ལ་སཾ་བ་རཾ་ཧཱུཾ་ཕཊ་སྭཱ་ཧཱ། ཞེས་བྱ་བའོ། །ཨོཾ་ཁཾ་ཧཱུཾ་ཕཊ། ཅེས་བྱ་བ་ནི་དུ་མ་སྐྱེས་མ་སྟེ་ལས་ཐམས་ཅད་པའི་སྔགས་སོ།། །།དཔལ་དུས་ཀྱི་འཁོར་ལོའི་དཀྱིལ་འཁོར་ལ། རྡོ་རྗེ་གུར་གྱི་ནང་དུ་སྲུང་པའི་འཁོར་ལོ་རྩིབས་བཅུ་པ་སྟེ། དེའི་ཤར་དང་ལྷོ་དང་ནུབ་དང་བྱང་གི་རྩིབས་རྣམས་ལ་ཤིན་ཏུ་སྟོབས་བྱེད་དང༌། རྨོངས་བྱེད་དང༌། རེངས་བྱེད་དང༌། རྒྱལ་བྱེད་རྣམས་ཏེ། གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་ཅེས་བྱ་བ་མིང་གི་རྣམ་གྲངས་སོ། །མེ་ལ་སོགས་པའི་རྩིབས་རྣམས་ལ་དབྱུག་པ་སྔོན་པོ་དང་འདོད་པའི་རྒྱལ་པོ་དང༌། སྟོབས་པོ་ཆེ་དང་མི་གཡོ་བ་རྣམས་སོ། །སྟེང་གི་རྩིབས་ལ་གཙུག་ཏོར་འཁོར་ལོས་སྒྱུར་བའོ། །འོག་གི་རྩིབས་ལ་གནོད་མཛེས་རྒྱལ་པོའོ། །དེ་སྐད་དུ་ཡང་རྩ་བ་ལས། དེ་རྗེས་འཁོར་ལོ་རྩིབས་བཅུ་པ་ནི་ཕྱོགས་དང་ཕྱོགས་བྲལ་ལ་གནས་ཁྲོ་
བོའི་ཚོགས་རྣམས་བསྒོམ་པར་བྱ། ཞེས་པ་དང༌། དྲི་མ་མེད་པའི་འོད་ལས་ཀྱང་སྲུང་པའི་འཁོར་ལོ་ལས་ཁྲོ་བོ་ལ་སོགས་པ་སྤྲོ་བར་བྱ་སྟེ། དཀྱིལ་འཁོར་གྱི་ས་གཞི་སྲུང་བའི་དོན་དུའོ་ཞེས་གསུངས་སོ། །ཁྲོ་བོ་འདི་རྣམས་འཆད་པར་འགྱུར་བའི་གཟུགས་ཅན་ནོ། །སྲུང་བའི་འཁོར་ལོའི་ལྟེ་བའི་ནང་དུ་ཆོས་འབྱུང་ངོ༌། །དེ་སྐད་དུ་དྲི་མ་མེད་པའི་འོད་ལས་གསུངས་པ་ཕྱི་རོལ་དུ་སྐྱེ་བའི་དོན་དུ་ནམ་མཁའི་ཁམས་མཐའ་ཡས་པ་སྟེ། ནང་དུ་ཤེས་རབ་ཆོས་འབྱུང་ཟུར་གསུམ་པའོ་ཞེས་སོ། །དཀྱིལ་འཁོར་དུ་ནམ་མཁའི་ཁམས་ཉིད་ཆོས་འབྱུང་གི་གཟུགས་སུ་བསྒོམ་པའོ། །ཆོས་འབྱུང་གི་དབུས་སུ་རླུང་དང་མེ་དང་ཆུ་དང་སའི་དཀྱིལ་འཁོར་ལ་གནས་པའི་རི་རབ་དང་སྣ་ཚོགས་པདྨ་དང་ཟླ་བ་དང༌། ཉི་མ་དང༌། ཐིག་ལེ་ནག་པོའི་གཟུགས་སྒྲ་གཅན་གྱི་དཀྱིལ་འཁོར་གྱི་སྟེང་དུ་གནས་པའི་ཕྱི་རོལ་ནས་རྡོ་རྗེ་འོད་ཟེར་དང་ནམ་མཁའ་དང་རླུང་དང་མེ་དང་ཆུ་དང་སའི་ཁོར་ཡུག་གིས་ཡོངས་སུ་བསྐོར་བཞིན་པའི་གཞལ་ཡས་ཁང་ཆེན་པོའོ། །ཡང་ན་སྲུང་བའི་འཁོར་ལོ་ནི་བགེགས་ཉེ་བར་ཞི་བ་ཙམ་གྱི་དགོས་པའོ་ཞེས་པ་སྟེ། བགེགས་བཅོམ་པའི་རྗེས་ལ་བསྒོམ་པར་མ་བྱས་ཤིང་ཆོས་འབྱུང་ཡང་བསྒོམ་པར་མ་བྱས་ནས་སྲུང་བའི་གུར་གྱི་ནང་དུ་ནམ་མཁའི་ནང་དུ་རླུང་ལ་སོགས་པའི་དཀྱིལ་འཁོར་དང་སྒྲ་གཅན་གྱི་དཀྱིལ་འཁོར་གྱི་མཐར་ཐུག་པའི་སྟེང་དུ་གནས་པའི་ཕྱི་རོལ་ནས་འོད་ཟེར་ལ་སོགས་པའི་ཟླུམ་པོ་རྣམས་ཀྱིས་ཡོངས་སུ་བསྐོར་བའི་གཞལ་ཡས་ཁང་ཆེན་པོའོ། །དེའི་ཕྱེད་ཀྱིས་གསུང་གི་དཀྱིལ་འཁོར་རོ། །དེའི་ཕྱེད་ཀྱིས་ཐུགས་ཀྱི་དཀྱིལ་འཁོར་རོ། །དེའི་ཕྱེད་ཀྱིས་བདེ་ཆེན་གྱི་འཁོར་ལོའོ། །དེའི་ཕྱེད་ཀྱིས་བཅོམ་ལྡན་འདས་ཀྱི་པདྨ་ལྗང་གུའོ། །པདྨའི་སུམ་ཆ་གཅིག་གིས་ཟེ་འབྲུའོ། །དེའི་སྟེང་ནས་སྟེང་དུ་གནས་པའི་ཟླ་བ་དང་ཉི་མ་དང་སྒྲ་གཅན་དང་དུས་ཀྱི་མེའི་དཀྱིལ་འཁོར་གྱི་སྟེང་དུ་གན་རྐྱལ་དུ་གནས་པའི་ཡན་ལག་མེད་པ་དང་དྲག་པོའི་སྙིང་གར་གཡས་བརྐྱང་གིས་གར་བྱེད་པའི་བཅོམ་ལྡན་འདས་དུས་ཀྱི་འཁོར་ལོ་ནག་པོ། ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཚུགས་ཅན། རྡོ་རྗེ་ནོར་བུ་དང་རྡོ་རྗེའི་རྣ་ཆ་དང༌། རྡོ་རྗེའི་མགུལ་རྒྱན་དང༌། རྡོ་རྗེའི་ལག་གདུབ་དང༌། རྡོ་རྗེའི་སྐ་རགས་
དང། རྡོ་རྗེའི་རྐང་གདུབ་དང༌། རྡོ་རྗེའི་དར་དབྱངས་དང༌། རྡོ་རྗེའི་ཕྲེང་བ་དང༌། སྟག་གི་པགས་པ་འཕྱང་བའི་གོས་བསྣམས་པ་ཞལ་བཞི་པ་ཕྱག་བཅུ་གཉིས་པའོ། །དེ་ལ་རྩ་བའི་ཞལ་ནི་ནག་པོ་མཆེ་བ་གཙིགས་པ་དྲག་པོ་གཡས་དམར་པོ་ཆགས་བ་དང་བཅས་པ། ནུབ་སེར་པོ་ཏིང་ངེ་འཛིན་ལ་གནས་པ། གཡོན་དཀར་པོ་ཞི་བའོ། །སྔོན་པོ་དང་དམར་པོ་དང་དཀར་པོ་དབུས་དང་གཡས་དང་གཡོན་གྱི་མགྲིན་པ་གསུམ་སྟེ། བཅོམ་ལྡན་འདས་མགྲིན་པ་གསུམ་པའོ། །གཡས་པའི་དཔུང་མགོ་དང་པོ་སྔོན་པོ་གཉིས་པ་དམར་པོ་གསུམ་པ་དཀར་པོའོ། །དེ་བཞིན་དུ་གཡོན་པ་སྔོན་པོ་དང་དམར་པོ་དང་དཀར་པོ་སྟེ། འདི་དག་དཔུང་མགོ་དྲུག་གོ །བར་ལྷུ་དཔུང་བ་བཅུ་གཉིས་སོ། །ཉེ་བའི་ཕྱག་དཔུང་པ་ནས་བརྩམས་ནས་ཕྱག་ཉི་ཤུ་རྩ་བཞིའོ། །དེ་ལ་གཡས་ཀྱི་དཔུང་པ་གཉིས་སྔོན་པོའོ། །གཉིས་དམར་པོ། གཉིས་དཀར་པོ་སྟེ། དེ་བཞིན་དུ་གཡོན་པ་དག་ཀྱང་ངོ༌། །དེ་བཞིན་དུ་ཕྱག་བཞི་ནག་པོ་བཞི་དམར་པོ་བཞི་དཀར་པོ་སྟེ། གཡས་པ་དང་གཡོན་པ་རྣམས་ཀྱང་ངོ༌། །ཕྱག་རེ་རེ་ལ་སོར་མོ་ལྔ་ལྔ་སྟེ། དེ་དག་རེ་རེ་ཞིང་ཚིགས་རྣམ་པ་གསུམ་གསུམ་མོ། །དེ་ལ་མཐེ་བོང་སེར་པོ་མཛུབ་མོ་དཀར་པོ་གུང་མོ་དམར་པོ་སྲིན་ལག་ནག་པོ་མཐེའུ་ཆུང་ལྗང་གུའོ། །ཕྱག་གི་མཐིལ་ནས་སོར་མོ་ཐམས་ཅད་ཀྱི་ཚིགས་དང་པོའི་ཕྲེང་བ་ནག་པོ་གཉིས་པ་དམར་པོ་གསུམ་པ་དཀར་པོ་སྟེ། དེ་རྣམས་ཀྱང་སོར་གདུབ་རྣམས་ཀྱི་འོད་དང་ལྡན་པའོ། །གཡས་པའི་ཕྱག་ནག་པོ་རྣམས་ལ་རྡོ་རྗེ་དང་རལ་གྲི་དང་རྩེ་གསུམ་དང་གྲི་གུག་གོ །དམར་པོ་རྣམས་ལ་མེའི་མདའ་དང་རྡོ་རྗེ་ལྕགས་ཀྱུ་དང། ཌ་མ་རུ་དང་ཐོ་བའོ། །དཀར་པོ་རྣམས་ལ་འཁོར་ལོ་དང་མདུང་དང་དབྱུག་པ་དང༌། དགྲ་སྟ་རྣམས་སོ། །གཡོན་པའི་ནག་པོ་རྣམས་ལ་རྡོ་རྗེ་དྲིལ་བུ་དང་ཕུབ་དང་ཁ་ཊྭཱཾ་ག་ཁ་བྱེ་བ་དང༌། ཁྲག་གིས་གང་བའི་ཐོད་པའོ། །དམར་པོ་རྣམས་ལ་གཞུ་དང་ཞགས་པ་དང་ནོར་བུ་རིན་པོ་ཆེ་དང་པདྨ་དཀར་པོ་རྣམས་སོ། །དཀར་པོ་རྣམས་ལ་དུང་དང༌། མེ་ལོང་དང་རྡོ་རྗེ་ལྕགས་སྒྲོག་དང༌། ཚངས་པའི་མགོ་པོ་རྣམས་སོ། །བརླ་ནས་བརྩམས་ནས་ཞབས་གཡས་པ་དམར་པོའི་མཐིལ་དམར་པོས་འདོད་པའི་ལྷ་དམར་པོ་ཞལ་གཅིག་ཕྱག་བཞིན་མེ་ཏོག་ལྔའི་མདའ་དང་གཞུ་དང་ཞགས་པ་དང༌།
ལྕགས་ཀྱུ་འཛིན་པའི་སྙིང་གར་མནན་པའོ། །བརླ་ནས་བརྩམས་ནས་ཞབས་གཡོན་པ་དཀར་པོའི་མཐིལ་དཀར་པོས་དྲག་པོ་དཀར་པོ་ཞལ་གཅིག་སྤྱན་གསུམ་པ་ཕྱག་བཞི་པ་རྩེ་གསུམ་ཌ་མ་རུ་དང་ཐོད་པ་དང་ཁ་ཊྭཱཾ་ག་འཛིན་པའི་སྙིང་གར་མནན་པའོ། །འདོད་ལྷའི་གཞོགས་སུ་དགའ་བ་མོ་དང་དབང་ཕྱུག་ཆེན་པོའི་གཞོགས་སུ་དཀར་མོའོ། །ལྷ་མོ་འདི་དག་ནི་བཅོམ་ལྡན་འདས་ཀྱི་ཞབས་ལ་འཇུས་པ་དམན་པའི་བཞིན་ཅན་ནོ། །བཅོམ་ལྡན་འདས་ཀྱིས་འཁྱུད་པའི་སྣ་ཚོགས་ཡུམ་ནི་གཡོན་བརྐྱང་གིས་གནས་པ་གསེར་གྱི་མདོག་ལྟ་བུ་ཕྱག་གཡས་པ་རྣམས་ཀྱིས་གྲི་གུག་དང་ལྕགས་ཀྱུ་དང་ཌ་མ་རུ་དང༌། བགྲང་ཕྲེང་དང༌། གཡོན་པ་རྣམས་ན་ཤཀྟི་དང་ཞགས་པ་དང༌། པདྨ་དཀར་པོ་དང་རིན་པོ་ཆེ་རྣམས་འཛིན་པའོ། །ཤར་གྱི་འདབ་མ་ལ་ནག་མོ་འབར་མ་ནི་ནག་མོ་ཕྱག་གཡས་པ་རྣམས་ཀྱིས་སྤོས་སྣོད་དང་ཙནྡན་གྱི་སྣོད་དང་གུར་གུམ་གྱི་སྣོད་དང་གླ་རྩི་དང་བཅས་པའི་ག་པུར་གྱི་སྣོད་དང༌། གཡོན་པ་རྣམས་ཀྱིས་དྲིལ་བུ་དང་པདྨ་དང་ལྷའི་ལྗོན་ཤིང་གི་མེ་ཏོག་དང་མེ་ཏོག་སྣ་ཚོགས་ཀྱི་ཕྲེང་བ་འཛིན་པའོ། །ལྷོ་ཕྱོགས་ཀྱི་འདབ་མ་ལ་དམར་མོ་འབར་མ་དམར་མོ་གཡས་པ་རྣམས་ཀྱིས་མར་མེ་དང་དོ་ཤལ་དང་ཅོད་པན་དང་ལག་གདུབ་དང༌། གཡོན་པ་རྣམས་ཀྱིས་གོས་དང་སྐ་རགས་དང་རིན་པོ་ཆེའི་རྣ་རྒྱན་དང༌། རྐང་གདུབ་འཛིན་བའོ། །ནུབ་ཏུ་སེར་མོ་འབར་མ་སྐུ་མདོག་སེར་མོ། གཡས་པ་རྣམས་ཀྱིས་དུང་དང་གླིང་བུ་དང་ནོར་བུ་དང༌། ཅང་ཏེའུ་དང༌། གཡོན་པ་རྣམས་ཀྱིས་པི་ཝང་དང་རྔ་ཟླུམ་དང་འཁར་རྔ་དང་དུང་འཛིན་པའོ། །བྱང་དུ་དཀར་མོ་འབར་མ་དཀར་མོ་གཡས་པ་རྣམས་ཀྱིས་འོ་མའི་སྣོད་དང་ཆུའི་སྣོད་དང་ལྷའི་སྨན་གྱི་སྣོད་དང་ཆང་གི་སྣོད་དང༌། གཡོན་པ་རྣམས་ན་བདུད་རྩིའི་སྣོད་དང༌། བཅུད་ལེན་གྲུབ་པའི་སྣོད་དང་ཤིང་ཐོག་གི་སྣོད་དང་བཟའ་བའི་སྣོད་འཛིན་པའོ། །མེ་ལ་སོགས་པ་རྣམས་སུ་དུ་བ་མ་དང་སྨིག་རྒྱུ་མ་དང་མར་མེ་མ་དང་མཁའ་གསལ་མ་རྣམས་ཀྱི་ལྷ་མོ་སྟེ། རིམ་པ་ཇི་ལྟ་བར་ནག་མོ་དང་དམར་མོ་དང་སེར་མོ་དང༌། དཀར་མོའི་མདོག་ཅན་ཕྱག་བརྒྱད་ཀྱིས་རང་རང་གི་མདོག་དང་མཚུངས་པའི་རྔ་ཡབ་བརྒྱད་འཛིན་པའོ། །དེ་དག་གི་རྒྱབ་ཀྱི་ཕྱི་རོལ་དུ་ཡིད་བཞིན་གྱི་ནོར་བུ་དང་ཆོས་
ཀྱི་གཎྜཱི་དང་དཔག་བསམ་གྱི་ཤིང་དང་ཆོས་ཀྱི་དུང་རྣམས་ནག་པོ་དང་དམར་པོ་དང་སེར་པོ་དང་དཀར་པོའོ། །ནག་པོ་འབར་མ་ལ་སོགས་པ་འདི་བརྒྱད་ནི་ཞབས་གཉིས་མཉམ་པའི་སྟང་སྟབས་ཀྱིས་གནས་པའོ། །སྣ་ཚོགས་ཡུམ་ལ་སོགས་པའི་ལྷ་མོ་ཐམས་ཅད་ནི་ཕྱག་རྒྱ་ལྔ་དང་ལྡན་པ་ཕྱག་བརྒྱད་བ་ཞལ་བཞི་པ་སྤྱན་བཅུ་གཉིས་པའོ། །དེ་ལ་སྣ་ཚོགས་ཡུམ་གྱི་ཤར་དང་ལྷོ་དང་ནུབ་དང་བྱང་གི་རིམ་པས་སེར་པོ་དང་དཀར་པོ་དང༌། སྔོན་པོ་དང་དམར་པོའི་ཞལ་རྣམས་ཏེ་དེ་ལྟར་ལྷ་མོ་སེར་མོ་རྣམས་སོ། །ནག་པོ་རྣམས་ཀྱི་ནི་ནག་པོ་དང་དམར་པོ་དང་སེར་པོ་དང་དཀར་པོའི་ཞལ་རྣམས་སོ། །དམར་པོ་རྣམས་ཀྱི་ནི་དམར་པོ་དང་སེར་པོ་དང༌། དཀར་པོ་དང་སྔོན་པོའི་ཞལ་རྣམས་སོ། །དཀར་པོ་རྣམས་ཀྱི་ནི་དཀར་པོ་དང༌། ནག་པོ་དང་དམར་པོ་དང་སེར་པོའི་ཞལ་རྣམས་སོ། །རིམ་པ་གཉིས་པ་དང་གསུམ་པ་དག་གི་ལྷ་རྣམས་ནི་ཕྱག་དྲུག་པ་ཞལ་གསུམ་པ་སྤྱན་དགུ་པ་རྣམས་སོ། །དེ་ལ་ཤར་གྱི་ཕྱོགས་རྣམས་སུ་དོན་ཡོད་གྲུབ་པ་ནག་པོ་དང་དམར་པོ་དང་དཀར་པོའི་ཞལ་ལོ། །ཕྱག་གཡས་པ་རྣམས་ཀྱིས་རལ་གྲི་དང་གྲི་གུག་དང་རྩེ་གསུམ་པ་དང༌། གཡོན་པ་རྣམས་ཀྱིས་ཕུབ་དང༌། ཐོང་པ་དང་ཁ་ཊྭཱཾ་ག་འཛིན་པ་སྤྱན་མས་འཁྱུད་པའོ། །ལྷོའི་ཕྱོགས་སུ་རིན་ཆེན་འབྱུང་ལྡན་དམར་པོ་དམར་པོ་དང་དཀར་པོ་དང་ནག་པོའི་ཞལ་ལོ། །གཡས་པ་རྣམས་ཀྱིས་མེའི་མདའ་དང་རྡོ་རྗེ་ལྕགས་ཀྱུ་དང་ཅང་ཏེའུ་བསྣམས་པ། གཡོན་པ་རྣམས་ནི་གཞུ་དང་རྡོ་རྗེ་ཞགས་པ་དང་རིན་པོ་ཆེ་ཆ་དགུ་པ་འཛིན་པ་མཱ་མ་ཀཱི་ལ་འཁྱུད་པའོ། །ནུབ་ཏུ་རྣམ་པར་སྣང་མཛད་སེར་པོ་སེར་པོ་དང་དཀར་པོ་དང་ནག་པོའི་ཞལ་ལོ། །གཡས་པ་རྣམས་ཀྱིས་འཁོར་ལོ་དང་དབྱུག་པ་དང༌། མི་འཇིགས་པའི་ཕྱག་རྒྱས་རྡོ་རྗེའོ། །གཡོན་པ་རྣམས་ཀྱིས་མདུང་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་འཛིན་པ་སྒྲོལ་མ་ལ་འཁྱུད་པའོ། །བྱང་དུ་སྣང་བ་མཐའ་ཡས་དཀར་པོ་དཀར་པོ་དང་ནག་པོ་དང་དམར་པོའི་ཞལ་ལོ། །གཡས་པ་རྣམས་ཀྱིས་ཐོ་བ་དང་མདུང་དང་རྩེ་གསུམ་པའོ། །གཡོན་པ་རྣམས་ཀྱིས་པདྨ་དཀར་པོ་དང༌། མེ་ལོང་དང་བགྲང་ཕྲེང་རྣམས་འཛིན་པ་གོས་དཀར་མོ་ལ་འཁྱུད་པའོ། །བཞི་པོ་འདི་དག་ནི་པདྨ་དཀར་པོ་དང་ཉི་མ་ལ་གནས་པ་རལ་པའི་ཐོར་ཚུགས་ཅན་རྩ་བ་དང་གཡས་གཡོན་གྱི་
རིམ་པས་ཞལ་རྣམས་སོ། །མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་རྣམས་སུ་པདྨ་དམར་པོ་དང་ཟླ་བའི་གདན་ལ་སྒྲོལ་མ་དང་གོས་དཀར་མོ་དང༌། སྤྱན་མ་དང་མཱ་མ་ཀཱི་རྣམས་རིམ་པ་བཞིན་དུ་དོན་ཡོད་གྲུབ་པ་དང་རིན་ཆེན་འབྱུང་ལྡན་དང༌། རྟག་པ་དང༌། སྣང་བ་མཐའ་ཡས་དང་མཚུངས་པ་རྣམ་པར་སྣང་མཛད་དང༌། སྣང་བ་མཐའ་ཡས་དང༌། དོན་ཡོད་གྲུབ་པ་དང༌། རིན་ཆེན་འབྱུང་ལྡན་རྣམས་ཀྱིས་སྙོམས་པར་ཞུགས་པའོ། །ཡང་ན་སྒྲོལ་མའི་ཁ་ཊྭཱཾ་གའི་གནས་སུ་ཨུཏྤལའོ། །གཞོགས་བརྒྱད་དུ་བདུད་རྩིའི་བུམ་པ་བརྒྱད་དོ། །རིམ་བ་གསུམ་པའི་སྣམ་བུ་ལ་ཤར་སྒོའི་གཡོན་ངོས་སུ་ཀུན་དུ་བཟང་པོ་སྔོན་པོ་གཡས་པ་རྣམས་ཀྱིས་རྡོ་རྗེ་དང༌། གྲི་གུག་དང་དགྲ་སྟ་འཛིན་པ་གཡོན་པ་རྣམས་དྲིལ་བུ་དང༌། ཐོད་པ་དང་ཚངས་པའི་མགོ་བོ་འཛིན་པ་སྟེ་ཚངས་པའི་མགོ་བོའི་གནས་སུ་ཡང་ན་ཨུཏྤལའོ། །འདི་ནི་ཆོས་ཀྱི་དབྱིངས་ཀྱི་རྡོ་རྗེ་མ་ལ་སྙོམས་པར་ཞུགས་པའོ། །ཤར་སྒོའི་ལྷོ་རུ་ནམ་མཁའི་སྙིང་པོ་དོན་ཡོད་གྲུབ་པ་ལྟ་བུའི་དྲི་རྡོ་རྗེ་མ་ལ་འཁྱུད་པའོ། །ལྷོ་སྒོའི་གཡོན་ལོགས་སུ་ཕྱག་ན་རྡོ་རྗེ་ལྗང་གུ་གཡས་པ་རྣམས་ཀྱིས་རྡོ་རྗེ་དང་གྲི་གུག་དང་དགྲ་སྟ་དང༌། གཡོན་པ་རྣམས་ཀྱིས་དྲིལ་བུ་དང༌། ཐོད་པ་དང་ཚངས་པའི་མགོ་བོ་འཛིན་པ། སྒྲ་རྡོ་རྗེ་མ་ལ་འཁྱུད་པའོ། །གཡས་སུ་སའི་སྙིང་པོ་རིན་ཆེན་འབྱུང་ལྡན་ལྟ་བུ་གཟུགས་རྡོ་རྗེ་མ་ལ་སྙོམས་བར་ཞུགས་པའོ། །ནུབ་ཀྱི་སྒོའི་གཡོན་ལོགས་སུ་ཆོས་ཀྱི་དབྱིངས་ཀྱི་རྡོ་རྗེ་མ་ཕྱག་ན་རྡོ་རྗེ་ལྟ་བུ་ཀུན་དུ་བཟང་པོས་འཁྱུད་པའོ། །གཡས་ལོགས་སུ་སྒྲིབ་པ་ཐམས་ཅད་རྣམ་པར་སེལ་བ་རྣམ་པར་སྣང་མཛད་ལྟ་བུ་རེག་བྱ་རྡོ་རྗེ་མ་ལ་འཁྱུད་པའོ། །བྱང་སྒོའི་གཡོན་ལོགས་སུ་སྒྲ་རྡོ་རྗེ་མ་ཀུན་དུ་བཟང་པོ་ལྟ་བུ་ཕྱག་ན་རྡོ་རྗེས་འཁྱུད་པའོ། །གཡས་ལོགས་སུ་འཇིག་རྟེན་དབང་ཕྱུག་འོད་དཔག་མེད་དང་མཚུངས་པ་རོ་རྡོ་རྗེ་མ་ལ་འཁྱུད་པའོ། །ཕྱོགས་བྲལ་རྣམས་ཀྱི་མེར་རེག་བྱ་རྡོ་རྗེ་མ་སྒྲོལ་མ་ལྟ་བུ་སྒྲིབ་པ་རྣམ་པར་སེལ་བས་སྙོམས་པར་ཞུགས་པའོ། །བདེན་བྲལ་དུ་རོ་རྡོ་རྗེ་མ་གོས་དཀར་མོ་ལྟ་བུ་འཇིག་རྟེན་དབང་ཕྱུག་གིས་འཁྱུད་པའོ། །རླུང་དུ་དྲི་རྡོ་རྗེ་མ་སྤྱན་མ་ལྟ་བུ་ནམ་མཁའི་སྙིང་པོས་འཁྱུད་པའོ། །དབང་ལྡན་དུ་གཟུགས་རྡོ་རྗེ་མ་མཱ་མ་ཀཱི་ལྟ་བུ་སའི་
སྙིང་པོས་འཁྱུད་པའོ། །འདིར་དོན་ཡོད་གྲུབ་པ་ལ་སོགས་པ་དེ་བཞིན་གཤེགས་པ་རྣམས་དང༌། བྱང་ཆུབ་སེམས་དཔའ་རྣམས་ནི་རྡོ་རྗེའི་གདན་གྱིས་བཞུགས་བའོ། །སྒྲོལ་མ་ལ་སོགས་པའི་ལྷ་མོ་རྣམས་ནི་པདྨའི་གདན་གྱི་འདུག་སྟངས་ཀྱིས་བཞུགས་པའོ། །ཤར་གྱི་སྒོ་ལ་ཁྲོ་བོ་ཤིན་ཏུ་སྟོབས་དོན་ཡོད་གྲུབ་པ་ལྟ་བུ་རེངས་བྱེད་མས་ཡང་དག་བར་འཁྱུད་པ་དེ་ཡང་སྤྱན་མ་ལྟ་བུའོ། །ལྷོ་སྒོ་ལ་རྨོངས་བྱེད་ནི་རིན་ཆེན་འབྱུང་ལྡན་ལྟ་བུ་ལ་རྒྱལ་བྱེད་མས་ལ་རྒྱལ་བྱེད་མས་སྙོམ་པར་ཞུགས་པ་དེ་ཡང་མཱ་མ་ཀཱི་ལྟ་བུའོ། །ནུབ་སྒོར་རེངས་བྱེད་ནི་རྣམ་པར་སྣང་མཛད་ལྟ་བུ་ཤིན་ཏུ་སྟོབས་མ་ལ་འཁྱུད་པ་དེ་ཡང་སྒྲོལ་མ་ལྟ་བུའོ། །བྱང་སྒོར་ང་རྒྱལ་བྱེད་ནི་ཆེ་དཔག་མེད་ལྟ་བུ་རྨོངས་བྱེད་མ་ལ་ཡང་དག་པར་འཁྱུད་པ་དེ་ཡང་གོས་དཀར་མོ་ལྟ་བུའོ། །འོན་ཀྱང་ཁྲོ་བོ་འདི་རྣམས་ནི་གཡས་བརྐྱང་གིས་གནས་པའོ། །ཁྲོ་བོའི་ལྷ་མོ་རྣམས་ནི་གཡོན་བརྐྱང་གིས་གནས་པའོ། །དེ་ལ་ལྷ་མོ་རྣམས་ཀྱི་གདན་ནི་པདྨ་དཀར་པོ་དག་ལ་ཉི་མ་རྣམས་སོ། །ལྷ་མོ་རྣམས་ཀྱི་གདན་ནི་པདྨ་དམར་པོ་དག་ལ་ཟླ་བའི་དཀྱིལ་འཁོར་རྣམས་སོ། །ཡང་ན་ནག་པོ་དང༌། དཀར་པོ་དང༌། ལྗང་གུ་རྣམས་ཟླ་བ་ལ་གནས་པའོ། །དམར་པོ་རྣམས་དང༌། སེར་པོ་རྣམས་དང༌། ཀུན་དུ་བཟང་པོ་དང༌། སྒྲ་རྡོ་རྗེ་མ་ནི་ཉི་མ་ལ་གནས་པའོ། །དེ་དག་གི་རིགས་པ་ཡང་དྲི་མ་མེད་པའི་འོད་ལས་གསུངས་སོ། །འདིར་ནི་གང་གི་གནས་སུ་ལྷ་རྣམས་གང་གསུངས་པ་དེ་དང་དེར་ནི་གཙོ་བོ་ཡིན་པའི་ཕྱིར་དཀྱིལ་འཁོར་གྱི་བདག་པོ་ལ་ཞལ་མངོན་པར་ཕྱོགས་པ་སྟེ་དེའི་པང་དུ་གནས་པ་ནི་མ་ཡིན་ནོ། །འདིར་འདབ་མ་ལ་གནས་པའི་ལྷ་མོ་བརྒྱད་དང༌། བུམ་པ་རྣམས་དང༌། ཆོས་ཀྱི་དུང་ལ་སོགས་པ་སྤངས་པར་འགྱུར་བས་ཉི་ཤུ་རྩ་ལྔའི་བདག་ཉིད་ཀྱི་དཀྱིལ་འཁོར་ཡང་བསྒོམ་པར་བྱའོ། །དེའི་ཚེ་བཅོམ་ལྡན་འདས་སྟེང་དུ་གནས་པར་གྱུར་ཏེ་དཔལ་གསང་བ་འདུས་པ་ལྟ་བུའོ། །ཤར་གྱི་འདོད་ཡོན་ལ་རྟ་བབས་ཀྱི་གཡོན་གྱི་ཀ་བའི་རྩ་བའི་གཡོན་པ་ལ་དྲི་ཆབ་མ་ནག་མོ་དྲིའི་དུང་ཕོར་ཕྱག་ན་འཛིན་པའོ། །གཡས་ཀྱི་ཀ་བའི་རྩ་པའི་གཡས་ལ་ཕྲེང་བ་མ་སྔོན་མོ་མེ་ཏོག་གི་ཕྲེང་བ་འཛིན་པའོ། །ལྷོའི་སྣམ་བུ་ལ་བདུག་སྦོས་མ་
དམར་མོ་ཕྱག་ན་བདུག་སྤོས་ཀྱི་སྣོད་འཛིན་པའོ། །མར་མེ་མ་དམར་མོ་ཕྱག་ན་མར་མེའི་མཆོད་སྡོང་འཛིན་པའོ། །ནུབ་ཏུ་སྒེག་མོ་སེར་མོ་ཅོད་པན་སེར་པོ་འཛིན་པའོ། །བཞད་མ་སེར་མོ་དོ་ཤལ་སེར་པོ་འཛིན་པའོ། །བྱང་དུ་བདུད་རྩི་མ་ཞལ་ཟས་མ་ཞེས་བྱ་བའི་མིང་གི་རྣམ་གྲངས་ཅན་དཀར་མོ་ཕྱག་ན་འབྲས་བུ་དཀར་པོ་འཛིན་པའོ། །འབྲས་བུ་མི་ཟད་པའམ། བདུད་རྩིའི་འབྲས་བུ་ཞེས་མིང་གི་རྣམ་གྲངས་ཅན་ཕྱག་ན་བདུད་རྩི་དཀར་པོས་གང་བའི་སྣོད་འཛིན་པའོ། །སྟེགས་བུ་ཐམས་ཅད་ལ་ཡང་མཆོད་པ་སྣ་ཚོགས་འཛིན་པའི་ལྷ་མོ་གྲངས་མེད་པའོ། །ཤར་གྱི་རྟ་བབས་ཀྱི་མཆོད་པའི་ལྷ་མོའི་གནས་སུ་གར་མ་སྔོན་མོ་གར་གྱི་ཚུལ་གྱིས་གོས་འཛིན་པའོ། །ལྷོར་འདོད་པ་མ་དམར་མོ་པདྨ་ཕྱག་ན་ལྡན་པའོ། །ནུབ་ཏུ་སྒྲ་མ་སེར་མོ་རྔ་པ་ཊ་ཧ་བརྡུང་པའོ། །བྱང་དུ་གླུ་མ་དཀར་མོ་རྡོ་རྗེ་འཛིན་མའོ། །བདུད་རྩི་མ་ལ་སོགས་པའི་དགོད་པ་འདི་དག་ནི་དབང་བསྐུར་བའི་ལེའུའི་འགྲེལ་པའི་རིམ་པའོ། །དེ་སྐད་དུ་སྒྲུབ་ཐབས་ཀྱི་ལེའུའི་འགྲེལ་པ་ལས་བྱང་ཕྱོགས་སུ་སྒྲ་མ་དང༌། གར་མ་དང༌། ནམ་མཁའ་རུ་གླུ་མ་དང་འདོད་མའོ། །འོག་གི་འདོད་ཡོན་གྱི་སྣམ་བུ་ལ་ཞལ་ཟས་མ་དང༌། བདུད་རྩིའི་འབྲས་བུ་མ་ཞེས་གསུངས་པ། དེ་དག་ལ་ཡང་དབང་བསྐུར་གྱི་ལེའུ་ལས་གསུངས་པའི་དགོད་པ་ཁོ་ནས་རིག་པར་བྱ་སྟེ། དེའི་རྗེས་སུ་མཐུན་པའི་གཞུང་གི་སྦྱོར་བ་ཉིད་ཀྱིས་སོ། །དེ་ལས་གཞན་དུ་ནི་སྔ་མ་དང་ཕྱི་མ་འགལ་བར་འགྱུར་རོ། །ལྷ་མོ་བཅུ་གཉིས་པོ་འདི་དག་ནི་པདྨའི་འདུག་སྟངས་ཀྱིས་གནས་པའོ། །གསུང་གི་དཀྱིལ་འཁོར་ལ་ཕྱོགས་ཀྱི་པདྨ་རྣམས་ནི་དམར་པོ་དང༌། མཚམས་ཀྱི་རྣམས་ནི་དཀར་པོའོ། །དེ་རྣམས་ཟླ་བ་དང༌། ཉི་མའི་གདན་དང་བྲལ་བ་ས་གའི་འདུག་སྟངས་ཀྱིས་གནས་པའི་ལྷ་མོ་རྣམས་སོ། །དེ་ལ་ཡི་དགས་དམར་པོའི་སྟེང་དུ་གནས་པའི་ཤར་གྱི་ཆུ་སྐྱེས་ཀྱི་ཟེ་འབྲུ་ལ་རྩ་རྩི་ཀ་ནག་པོ་ཞལ་གཅིག་པ་སྤྱན་གསུམ་པ་གཡས་པའི་ཕྱག་གཉིས་ཀྱིས་གྲི་གུག་དང༌། རྩེ་གསུམ་པ་གཡོན་པ་གཉིས་ཀྱིས་ཐོད་པ་དང༌། ཁ་ཊྭཱཾ་ག་འཛིན་པ་དབང་པོ་ལ་འཁྱུད་པའོ།།
ཤར་ལ་སོགས་པའི་འདབ་མ་བརྒྱད་ལ་འཇིགས་བྱེད་མ་དང༌། དྲག་མོ་དང༌། མཆེ་བ་ནག་མོ་དང༌། ཁ་ནས་མེ་འབར་བ་དང༌། རླུང་ཤུགས་མ་དང༌། རབ་གཏུམ་མོ་དང༌། དྲག་མིག་མ་དང༌། སྣ་སྦོམ་མོ་རྣམས་སོ། །ནམ་མཁའ་ལྡིང་གི་སྟེང་དུ་མེའི་ཆུ་སྐྱེས་ཀྱི་ཐེ་འབྲུ་ལ་ཁྱབ་འཇུག་མ་ནག་མོ་གཡས་དག་གིས་འཁོར་ལོ་དང་དབྱུག་ཏོ། གཡོན་པ་གཉིས་ཀྱིས་པདྨ་དང༌། དུང་འཛིན་པ་ཚངས་པ་ལ་འཁྱུད་པའོ། །འདབ་མ་རྣམས་ལ་དཔལ་མོ་དང༌། སྒྱུ་མ་མོ་དང༌། གྲངས་མ་དང༌། ཕུན་སུམ་ཚོགས་མ་དང༌། རྣམ་པར་རྒྱལ་མ་དང༌། དཔལ་རྒྱལ་བྱེད་མ་དང༌། དཔལ་འཁོར་ལོ་མ་རྣམ་སོ། །མ་ཧེའི་གདན་ལ་ལྷོའི་པདྨའི་ཟེ་འབྲུ་ལ་གནས་པའི་ཕག་མོ་དམར་མོ་ཕག་གདོང་མ་གཡས་གཉིས་ན་དབྱུག་པ་དང་རལ་གྲི། གཡོན་པ་གཉིས་ན་ལྕགས་སྒྲོག་དང༌། ཕུབ་འཛིན་པ་དྲག་པོ་ལ་འཁྱུད་པའོ། །འདབ་མ་རྣམས་ལ་ཀེང་རུས་མ་དང༌། དུས་མཚན་མ་དང༌། རབ་ཏུ་ཁྲོ་གདོང་མ་དང༌། ལྕེ་ནག་མ་དང༌། གཙིགས་མ་དང༌། ནག་མོ་དང༌། འཇིགས་མ་དང༌། གཟུགས་ངན་མ་རྣམས་སོ། །རྨ་བྱའི་སྟེང་དུ་བདེན་བྲལ་གྱི་ཆུ་སྐྱེས་ཀྱི་ཟེ་འབྲུ་ལ་གནས་པའི་གཞོན་ནུ་མ་དམར་མོ་ཞལ་དྲུག་མ། ཕྱག་གཡས་པ་གཉིས་ན་ཤ་ཀ་ཏི་དང་ལྕགས་ཀྱུ། གཡོན་པ་གཉིས་ན་རིན་པོ་ཆེ་དང༌། ཞགས་པ་ཚོགས་ཀྱི་བདག་པོ་ལ་ཡང་དག་པར་འཁྱུད་པའོ། །འདབ་མ་རྣམས་ལ་པདྨ་དང༌། ཡན་ལག་མེད་མ་དང༌། གཞོན་ནུ་མ་དང༌། རིགས་ཀྱི་བདག་པོའི་འགྲོས་མ་དང༌། རིན་ཆེན་ཕྲེང་མ་དང༌། ཤིན་ཏུ་སྤྱན་མ་དང༌། སྡུག་མ་དང་བཟང་མོའོ། །ས་སྲུང་གི་སྟེང་དུ་ནུབ་ཀྱི་པདྨའི་ཟེ་འབྲུ་ལ་དབང་མོ་སེར་མོ་གཡས་པ་གཉིས་ན་རྡོ་རྗེ་དང་མདའ། གཡོན་པ་གཉིས་ན་དྲིལ་བུ་དང༌། གཞུ་འཛིན་པ་བདེན་བྲལ་གྱིས་འཁྱུད་པའོ། །འདབ་མ་རྣམས་ལ་རྡོ་རྗེ་འོད་མ་དང༌། རྡོ་རྗེ་ལུས་ཅན་མ་དང༌། གསེར་ལྡན་མ་དང༌། ལས་དབང་མ་དང༌། རི་མོ་སྣ་ཚོགས་མ་དང༌། ཆུ་ཤིང་མ་དང༌། ཨ་ཉ་ལགས་དང༌། ཤིན་ཏུ་མིག་འབྲས་མ་རྣམས་སོ། །ངང་པའི་སྟེང་དུ་རླུང་གི་ཆུ་སྐྱེས་ཀྱི་ཟེ་འབྲུ་ལ་ཚངས་པ་མ་སེར་མོ་ཞལ་བཞི་མ་ཕྱག་གཡས་པ་གཉིས་ན་པདྨ་དང༌། ཚངས་པའི་དབྱུག་པ་དང༌། གཡོན་པ་གཉིས་ན་སྤྱི་བླུགས་དང་སྣོད་འཛིན་
པ་ཁྱབ་འཇུག་ལ་ཡང་དག་པར་འཁྱུད་པའོ། །འདབ་མ་རྣམས་ལ་སཱ་བིད་ཏྭཱི་དང༌། པདྨ་ཅན་དང༌། ཆུ་སྐྱེས་ཅན་མ་དང༌། བློ་མ་དང༌། ངག་གི་དབང་ཕྱུག་མ་དང༌། གླུ་མཁན་མ་དང༌། གློག་མ་དང༌། དྲན་མ་རྣམས་སོ། །གླང་གི་སྟེང་དུ་བྱང་གི་ཆུ་སྐྱེས་ཟེ་འབྲུ་ལ་དྲག་མོ་དཀར་མོ་གཡས་པ་གཉིས་ན་རྩེ་གསུམ་པ་དང་ཅང་ཏེའུ། གཡོན་པ་གཉིས་ན་ཁ་ཊྭཱཾ་ག་དང༌། སྦྲུལ་འཛིན་པ། གཤིན་རྗེ་ལ་འཁྱུད་པའོ། །འདབ་མ་རྣམས་ལ་གཽ་རཱི་དང༌། གང་ག་མ་དང༌། གཏུམ་མ་དང༌། མྱུར་མ་དང༌། ཏེ་ཏེ་ལ་དང༌། མཚན་ཉིད་མ་དང༌། དམར་སེར་མ་དང། ནག་མོ་རྣམས་སོ། །སེང་གེའི་སྟེང་དུ་དབང་ལྡན་གྱི་པདྨའི་ཟེ་འབྲུ་ལ་ཕུན་སུམ་ཚོགས་མ་དཀར་མོ་གཡས་པ་གཉིས་ན་པདྨ་དང་བགྲང་ཕྲེང༌། གཡོན་པ་གཉིས་ན་པདྨ་དང་རིན་ཆེན་འཛིན་པ། གདོང་དྲུག་གིས་འཁྱུད་པའོ། །འདབ་མ་རྣམས་ལ་དཔལ་མོ་དང༌། ཟླ་བའི་རི་མོ་དང། རི་བོང་འཛིན་པའི་ཞལ་མ་དང༌། ངང་པའི་མདོག་ཅན་མ་དང༌། ཉམས་དགའ་མ་དང༌། པདྨའི་དབང་ཕྱུག་མ་དང༌། སྤྱན་མྱུར་མ་དང༌། དྲི་མ་མེད་པའི་རི་བོང་འཛིན་པའོ། །ཙ་རྩི་ཀ་ལ་སོགས་པ་ལྷ་མོ་བདུན་ཅུ་རྩ་གཉིས་པོ་འདི་དག་ནི་ཕྱག་བཞི་པ་སྤྱན་གསུམ་པ་སྟེ། འདིར་ཁྱད་པར་ནི་འདབ་མའི་ལྷ་མོ་རྣམས་ནི་རོལ་པའི་འདུག་སྟངས་ཀྱིས་གནས་པ་ཁ་དོག་ལ་སོགས་པ་རྣམས་རང་རང་གི་གཙོ་མོ་དང་མཚུངས་པ། རང་རང་གི་གཙོ་མོ་ལ་གཟིགས་པའོ། །གཙོ་མོ་བརྒྱད་པོ་འདི་དག་ནི་ས་གའི་རྐང་སྟབས་ཀྱིས་གནས་པ། འཁོར་ལོའི་དབང་ཕྱུག་ལ་གཟིགས་པའོ། །བརྒྱད་པོ་འདི་རྣམས་ཀྱིས་འཁྱུད་པ་ས་གའི་རྐང་སྟབས་ཀྱིས་གནས་པ། རྗེས་སུ་གཙོ་བོ་རྣམས་དེ་ལ་མངོན་དུ་ཕྱོགས་པའོ། །སྐུའི་དཀྱིལ་འཁོར་གྱི་སྣམ་བུ་རྣམས་ལ་ཉི་ཟླ་གཉིས་དང་བྲལ་བའི་པདྨ་བཅུ་གཉིས་སོ། །དེ་ལ་ཕྱོགས་ཀྱི་པདྨ་རྣམས་ནི་དམར་པོའོ། །མཚམས་ལ་གནས་པ་རྣམས་ནི་དཀར་པོའོ། །པདྨ་རེ་རེ་ལ་འདབ་མ་རྣམས་ཀྱི་རིམ་པ་དང་པོ་ལ་འདབ་མ་བཞི་དང༌། གཉིས་པ་ལ་བརྒྱད་དང༌། གསུམ་པ་ལ་བཅུ་དྲུག་སྟེ། དེ་དག་གི་ཕྱི་རོལ་གྱི་རིམ་པའི་ཤར་གྱི་འདབ་མ་ནས་བརྩམས་ནས་གཡས་སྐོར་གྱིས་ཆོས་
གཅིག་ལ་སོགས་པའི་ཚེས་བརྒྱད་ཀྱི་ལྷ་མོ་རྣམས་དགོད་པར་བྱའོ། །ཟེ་འབྲུ་ལ་ཉ་དང་སྟོང་ནི་གཙོ་བོ་ཉིད་ཀྱིས་གནས་པའོ། །དེ་ལ་ཉ་ནི་ཤེས་རབ་མ། སྟོང་ནི་ཐབས་བདེན་བྲལ་ལ་སོགས་པའོ། །ལྷ་དེ་རྣམས་ཐམས་ཅད་ཀྱང་ཕྱག་བཞི་པའོ། །དེ་ལ་ཤར་གྱི་སྒོའི་གཡས་ལོགས་སུ་ཡི་དགས་དམར་པོའི་སྟེང་དུ་པདྨའི་ཟེ་འབྲུ་ལ་བདེན་བྲལ་ནག་པོ་ཕྱག་གཡས་གཉིས་ན་རལ་གྲི་དང་གྲི་གུག་གོ །གཡོན་གཉིས་ན་ཕུབ་དང་ཐོད་པའོ། །ཁ་ལ་མེ་འབར་བའི་སྲིན་མོ་ལ་ཡང་དག་པར་འཁྱུད་པའོ། །འདིའི་ནག་པ་ཟླ་བའི་ཚེས་རྣམས་སོ། །མེར་རི་དགས་ཀྱི་སྟེང་དུ་པདྨའི་ཟེ་འབྲུ་ལ་རླུང་ལྷ་ནག་པོ་གཡས་པ་གཉིས་ན་དཔག་བསམ་ཤིང་དང༌། མེ་ཏོག་པ་རི་ཛ་ཏའོ། །གཡོན་པ་གཉིས་ན་རིན་པོ་ཆེ་ཨིནྡྲ་ནཱི་ལ་དང༌། ཨུཏྤལ་སྔོན་པོ་འཛིན་པའོ། །རབ་ཏུ་གཏུམ་མོ་ལ་འཁྱུད་པའོ། །འདིའི་ས་གའི་ཟླ་བའི་ཚེས་རྣམས་སོ། །ལྷོ་སྒོའི་གཡོན་ལོགས་སུ་མ་ཧེའི་སྟེང་དུ་པདྨའི་ཟེ་འབྲུ་ལ་གཤིན་རྗེ་དམར་པོ་ནག་པོ་ལ་ཡང་དག་པར་འཁྱུད་པ་གཡས་གཉིས་ན་དབྱུག་པ་དང་རལ་གྲི་གཡོན་གཉིས་ན་ལྕགས་སྒྲོག་དང་ཞགས་པའོ། །འདིའི་སྤོའི་ཟླ་བའི་ཚེས་རྣམས་སོ། །གཡས་ངོས་སུ་ལུག་གི་སྟེང་དུ་ཆུ་སྐྱེས་ཀྱི་ཟེ་འབྲུ་ལ་མེ་ལྷ་དམར་མོ་ཆུ་ལྷ་མ་ལ་འཁྱུད་པ་ཕྱག་གཉིས་ན་ཤཀྟི་དང་དབྱུག་པ། གཡོན་པ་གཉིས་ན་པདྨ་དང་སྤྱི་བླུགས་སོ། །འདིའི་སྣྲོན་གྱི་ཟླ་བའི་ཚེས་རྣམས་སོ། །བདེན་བྲལ་དུ་རྨ་བྱའི་སྟེང་དུ་ཆུ་སྐྱེས་ཀྱི་ཟེ་འབྲུ་ལ་གདོང་དྲུག་དམར་པོ་གཡས་པ་གཉིས་ན་ཤཀྟི་དང་མདུང༌། གཡོན་པ་གཉིས་ན་རིན་པོ་ཆེ་དང་མེ་ལོང་འཛིན་པ། ཕུན་སུམ་ཚོགས་མ་ལ་འཁྱུད་པའོ། །འདིའི་ཆུ་སྟོད་ཀྱི་ཟླ་བའི་ཚེས་རྣམས་སོ། །ནུབ་ཀྱི་སྒོའི་གཡོན་ངོས་སུ་གླང་པོ་ཆེའི་སྟེང་དུ་པདྨའི་ཟེ་འབྲུ་ལ་ལུས་ངན་པོ་སེར་པོ་ལུས་ངན་མ་ལ་ཡང་དག་པར་འཁྱུད་པ་ཕྱག་གཡས་པ་གཉིས་ན་ནོར་བུ་རིན་པོ་ཆེ་དང་དབྱུག་ཏོ། གཡོན་པ་གཉིས་ན་ནེའུ་ལེ་དང་པདྨའོ། །འདིའི་རྒྱལ་གྱི་ཟླ་བའི་ཚེས་རྣམས་སོ། །གཡས་ཕྱོགས་སུ་གླང་པོ་ཆེའི་སྟེང་དུ་པདྨའི་ཟེ་འབྲུ་ལ་དབང་པོ་སེར་པོ་རླུང་ལྷ་མ་ལ་ཡང་དག་པར་འཁྱུད་པའོ། །གཡས་པ་གཉིས་ན་རྡོ་རྗེ་དང་མེའི་མདའ་གཡོན་གཉིས་ན་དྲིལ་བུ་དང་གཞུའོ། །འདིའི་ཐ་སྐར་གྱི་ཟླ་བའི་
ཚེས་རྣམས་སོ། །རླུང་དུ་ངང་པའི་སྟེང་དུ་ཆུ་སྐྱེས་ཀྱི་ཟེ་འབྲུ་ལ་ཚངས་པ་སེར་པོ་གློག་མ་ལ་ཡང་དག་པར་འཁྱུད་པ། གཡས་པ་གཉིས་ན་ཁབ་དང་བགྲང་ཕྲེང་ངོ༌། །གཡོན་གཉིས་ན་པདྨ་དང་རྫ་སྣོད་དོ། །འདིའི་སྨིན་དྲུག་གི་ཟླ་བའི་ཚེས་རྣམས་སོ། །བྱང་སྒོའི་གཡོན་ངོས་སུ་གླང་གི་སྟེང་དུ་པདྨའི་ཟེ་འབྲུ་ལ་དྲག་པོ་དཀར་པོ་གཽ་རཱི་ཡང་དག་པར་སྙོམས་པར་ཞུགས་པ་གཡས་གཉིས་ན་རྩེ་གསུམ་དང་མདའ། གཡོན་གཉིས་ན་སྦྲུལ་གྱིས་དཀྲིས་པའི་ཁ་ཊྭཱཾ་ག་དང་གཞུའོ། །འདིའི་མགོའི་ཟླ་བའི་ཚེས་རྣམས་སོ། །གཡས་སུ་ཆུ་སྲིན་གྱི་སྟེང་དུ་པདྨའི་ཟེ་འབྲུ་ལ་རྒྱ་མཚོའི་ལྷ་དཀར་པོ་གཡས་གཉིས་ཞགས་པ་དང་རིན་པོ་ཆེའོ། །གཡོན་པ་གཉིས་ན་སྦྲུལ་ཞགས་དང་ཆུ་ཤེལ་གྱི་ནོར་བུ་ཕག་མོ་ལ་ཡང་དག་པར་འཁྱུད་པའོ། །འདིའི་གྲོ་བཞིན་གྱི་ཟླ་བའི་ཚེས་རྣམས་སོ། །དབང་ལྡན་དུ་བྱའི་སྟེང་དུ་པདྨའི་ཟེ་འབྲུ་ལ་ཚོགས་ཀྱི་བདག་པོ་དཀར་པོ་གཞོན་ནུ་མ་ལ་ཡང་དག་པར་འཁྱུད་པ། གཡས་པ་གཉིས་ན་དགྲ་སྟ་དང་རྡོ་རྗེ་གཡོན་པ་གཉིས་ན་ཞགས་པ་དང་རིན་པོ་ཆེའོ། །འདིའི་ཁྲུམས་ཀྱི་ཟླ་བའི་ཚེས་རྣམས་སོ། །ཤར་གྱི་སྒོའི་གཡོན་ངོས་སུ་ནམ་མཁའ་ལྡིང་གི་སྟེང་དུ་པདྨའི་ཟེ་འབྲུ་ལ་ཁྱབ་འཇུག་ནག་པོ་དཔལ་མོ་ལ་ཡང་དག་པར་འཁྱུད་པ། གཡས་གཉིས་ན་འཁོར་ལོ་དང་དབྱུག་ཏོ། གཡོན་གཉིས་ན་པདྨ་དང་མདུང་ངོ༌། །འདིའི་མཆུའི་ཟླ་བའི་ཚེས་རྣམས་སོ། །འདིར་ལྷ་རྣམས་རྡོ་རྗེའི་གདན་གྱི་འདུག་སྟངས་ཀྱིས་གནས་པའོ། །དཔྱིད་ཟླ་འབྲིང་པོ་ལ་སོགས་པའི་ཚེས་ཀྱི་ལྷ་མོ་རྣམས་ནི་རོལ་པའི་འདུག་སྟངས་ཀྱིས་གནས་པ། རང་རང་གི་བདག་པོ་བདེན་བྲལ་ལ་སོགས་པའི་མདོག་དང་ཕྱག་མཚན་དང་དབྱིབས་རྣམས་མཚུངས་པ་དེ་རྣམས་ལ་ལྟ་བར་བྱེད་པ་རྣམས་ཏེ། དེ་རྣམས་ནི་དཀྱིལ་འཁོར་གྱི་གཙོ་བོ་ལ་གཟིགས་པའོ། །དེ་རྣམས་ཀྱིས་འཁྱུད་པའི་ལྷ་རྣམས་ཀྱིས་དེ་ཉིད་ལ་ཞལ་ཕྱོགས་པའོ། །ཤར་གྱི་སྒོ་རུ་ཕག་པ་ནག་པོ་བདུན་གྱིས་དྲངས་པའི་ཤིང་རྟ་ནག་པོ་ལ་དབྱུག་པ་སྔོན་པོ་དོན་ཡོད་གྲུབ་པ་ལྟ་བུའོ། །འདི་ཡིས་འཁྱུད་པའི་འོད་ཟེར་ཅན་མ་ནི་སེར་མོ་གཡས་པའི་ཕྱག་གཉིས་ཀྱིས་འཁོར་ལོ་དང་དབྱུག་པ་གཡོན་པ་གཉིས་ཀྱིས་དུང་དང་རིན་པོ་ཆེ་འཛིན་པའོ། །ལྷོ་ཕྱོགས་སུ་རྟ་དམར་པོ་བདུན་གྱིས་དྲངས་པའི་ཤིང་རྟ་དམར་པོ་ལ་
འདོད་པའི་རྒྱལ་པོ་རིན་ཆེན་འབྱུང་ལྡན་ལྟ་བུའོ། །འདིས་འཁྱུད་པའི་ཙུནད་དཀར་པོ་གཡས་པ་གཉིས་ཀྱིས་ཐོ་བ་དང་དུང༌། གཡོན་པ་གཉིས་ཀྱིས་པདྨ་དང་མེ་ལོང་ངོ༌། །ནུབ་དུ་གླང་པོ་ཆེ་སེར་པོ་བདུན་གྱིས་དྲངས་པའི་ཤིང་རྟ་སེར་པོ་ལ་སྟོབས་པོ་ཆེ་རྣམ་པར་སྣང་མཛད་ལྟ་བུའོ། །འདིས་འཁྱུད་པའི་རྡོ་རྗེ་ལྕགས་སྒྲོག་མ་ནག་མོ་གཡས་པ་གཉིས་ཀྱིས་རལ་གྲི་དང་རྡོ་རྗེ་གཡོན་པ་གཉིས་ཀྱིས་བུམ་པ་དང་སྦྲུལ་འཛིན་པའོ། །བྱང་དུ་སེང་གེ་དཀར་པོ་བདུན་གྱིས་དྲངས་པའི་ཤིང་རྟ་དཀར་པོ་ལ་མི་གཡོ་བ་འོད་དཔག་མེད་ལྟ་བུའོ། །འདིས་འཁྱུད་པའི་ཁྲོ་གཉེར་ཅན་དམར་པོ་གཡས་པ་གཉིས་ཀྱིས་མདའ་དང་ལྕགས་ཀྱུ། གཡོན་པ་གཉིས་ཀྱིས་གཞུ་དང་ཞགས་པ་འཛིན་པའོ། །དཀྱིལ་འཁོར་གྱི་བདག་པོའི་སྟེང་གི་ནམ་མཁའ་ལ་ཁ་དོག་ལྔ་པ་མིག་གསུམ་པའི་ནམ་མཁའ་ལྡིང་གིས་དྲངས་པའི་ཤིང་རྟ་ལྗང་གུ་ལ་གཙུག་ཏོར་འཁོར་ལོས་སྒྱུར་བ་ཕྱག་ན་རྡོ་རྗེ་ལྟ་བུའོ། །འདིའི་ཤེས་རབ་མ་ཤིན་ཏུ་སྔོན་མོ་ཁ་དོག་སྔོན་མོ་གཡས་པ་གཉིས་ཀྱིས་གྲི་གུག་དང་རྡོ་རྗེ། གཡོན་པ་གཉིས་ཀྱིས་ཐོད་པ་དང་དྲིལ་བུ་འཛིན་པའོ། །དཀྱིལ་འཁོར་གྱི་གཙོ་བོའི་འོག་གི་ས་འོག་ཏུ་རྐང་པ་བརྒྱད་པའི་སེང་གེ་ནག་པོ་བདུན་གྱིས་དྲངས་པའི་ཤིང་རྟ་ནག་པོ་ལ་གནོད་མཛེས་རྒྱལ་པོ་ཀུན་དུ་བཟང་པོ་ལྟ་བུའོ། །འདིའི་ཤེས་རབ་མ་དྲག་མིག་མ་ལྗང་གུ་གཡས་པ་གཉིས་ཀྱིས་དགྲ་སྟ་དང་རྩེ་གསུམ་པ་གཡོན་པ་གཉིས་སྤྲུལ་གྱི་ཞགས་པ་དང་ཁ་ཊྭཱཾ་ག་འཛིན་པའོ། །འདིར་དབྱུག་པ་སྔོན་པོ་ལ་སོགས་པ་ཁྲོ་བོ་རྣམས་ནི་ཤིང་རྟའི་སྟེང་ན་པདྨ་དཀར་པོ་དང་ཉི་མ་རྣམས་ལ་གཡས་བརྐྱང་གིས་གནས་པ་གཙོ་བོ་རྣམས་ནི་རང་རང་གི་གནས་ན་གནས་པའི་ཕྱི་རོལ་ལ་དཀྱིལ་འཁོར་གྱི་བདག་པོ་ལ་གཟིགས་པའོ། །འོད་ཟེར་ཅན་མ་ལ་སོགས་པ་ནི་གཡོན་བརྐྱང་གིས་གནས་པ་རྗེས་སུ་གཙོ་མོ་སྟེ། གཞན་གྱི་གནས་སུ་ཕྱིན་པའི་ཕྱིར་ཁྲོ་བོ་རྣམས་ལ་བལྟ་བའོ། །འདིར་ཤིང་རྟ་རྣམས་ཀྱི་ནག་པོ་ལ་སོགས་པའི་ཁ་དོག་ཉིད་ནི། སྒོའི་དབུས་སུ་ཤིང་རྟ་དག་ནི་རིགས་ཀྱི་དབང་གི་འགྱུར་བ་ཡིན་ཞེས་བྱ་བ་འདིས་གསུངས་སོ། །དེའི་རྗེས་སུ་འབྲངས་ནས་ཕག་པ་ལ་སོགས་པའི་མདོག་ཀྱང་ཤེས་པར་བྱའོ། །རྟ་བབས་ཀྱི་ཀ་བ་འདི་རྣམས་ཀྱི་འོག་ཏུ་འདོད་ཡོན་གྱི་སྣམ་བུའི་གནས་ཀྱི་སྟེང་དང་འོག་ཏུ་
ཀླུ་རྣམས་སོ། །དེ་ལ་ཤར་གྱི་སྒོའི་གཡོན་དང་གཡས་དག་ཏུ་རླུང་གི་དཀྱིལ་འཁོར་གཉིས་ཀྱི་སྟེང་དུ་རིམ་པ་ཇི་ལྟ་བས་པདྨ་དང་སྟོབས་ཀྱི་རྒྱུ་གཉིས་ཀ་ནག་པོ་ཁྱི་གདོང་མ་དང༌། ཁྭ་གདོང་མ་ལ་འཁྱུད་པའོ། །ལྷོ་སྒོའི་མེའི་དཀྱིལ་འཁོར་གཉིས་ཀྱི་སྟེང་དུ་ནོར་རྒྱས་དང་དུང་སྐྱོང་གཉིས་དམར་པོ་ཕག་གདོང་མ་དང༌། བྱ་གདོང་མ་ལ་འཁྱུད་པའོ། །ནུབ་ཀྱི་སྒོར་སའི་དཀྱིལ་འཁོར་གཉིས་ལ་འཇོག་པོ་དང་པདྨ་ཆེན་པོ་གཉིས་སེར་པོ་ཅེ་སྤྱང་མ་དང་ནམ་མཁའ་ལྡིང་གི་གདོང་མ་ལ་འཁྱུད་པའོ། །བྱང་སྒོའི་ཆུའི་དཀྱིལ་འཁོར་གཉིས་ཀྱི་སྟེང་དུ་མཐའ་ཡས་དང་རིགས་ལྡན་གཉིས་དཀར་པོ་སྟག་གདོང་མ་དང་འུག་གདོང་མ་གཉིས་ལ་འཁྱུད་པའོ། །སྟེང་གི་ནམ་མཁའ་སྟོང་པའི་དཀྱིལ་འཁོར་ལ་རྒྱལ་བ་ལྗང་གུ་སྔོན་མོ་ལ་འཁྱུད་པའོ། །འོག་ཏུ་ས་འོག་ལ་སྟོང་པའི་དཀྱིལ་འཁོར་ལ་རྣམ་པར་རྒྱལ་བ་སྔོན་པོ་རྡོ་རྗེ་མིག་ཅན་མ་ལ་ཡང་དག་པར་འཁྱུད་པའོ། །ཀླུ་ཐམས་ཅད་ཀྱང་རྡོ་རྗེ་གདན་གྱི་འདུག་སྟངས་ཀྱིས་གནས་པ་ཕྱག་བཞི་དང་ལྡན་པས་གཡས་པ་གཉིས་ན་བདུད་རྩིའི་བུམ་པ་དང་རྡོ་རྗེ། གཡོན་པ་གཉིས་ཀྱིས་པདྨ་དང་རིན་པོ་ཆེ་འཛིན་པའོ། །སའི་དཀྱིལ་འཁོར་གྱི་ཕྱོགས་བྲལ་དབང་ལྡན་ལ་ཉའི་ཟླ་བའི་དཀྱིལ་འཁོར་ཤར་བའོ། །བདེན་བྲལ་དུ་ཉི་མའི་དཀྱིལ་འཁོར་ནུབ་པའི་ཚུལ་ལོ། །མེ་དང་རླུང་གི་དཀྱིལ་འཁོར་གྱི་དབུས་སུ་དུར་ཁྲོད་ཆེན་པོ་རྣམས་ལ་འཁོར་ལོ་རྩིབས་བརྒྱད་པ་རྣམས་ཏེ་ཕྱོགས་རྣམས་སུ་དམར་པོ་དང་མཚམས་སུ་དཀར་པོའོ། །དེ་ལ་ཤར་གྱི་འཁོར་ལོ་ལ་ཁྱི་གདོང་མ་ནག་མོའོ། །ལྷོར་ཕག་གདོང་མ་དམར་མོའོ། །ནུབ་ཏུ་ཅེ་སྤྱང་གདོང་མ་སེར་མོའོ། །བྱང་དུ་སྟག་གདོང་མ་དཀར་མོའོ། །མེའི་མཚམས་ལ་སོགས་པ་ལ་ཁྭ་གདོང་མ་དང་བྱ་རྒོད་གདོང་མ་དང་ནམ་མཁའ་ལྡིང་གི་གདོང་མ་དང་འུག་གདོང་མ་རྣམས་ནི་ནག་མོ་དང་དམར་མོ་དང་སེར་མོ་དང་དཀར་མོའོ། །སྟེང་གི་ནམ་མཁའི་ཤིང་རྟ་ལ་སྔོན་མོ་ནི་ཁ་དོག་སྔོན་མོ་སྟེ། འདིའི་ཤིང་རྟ་ནི་ཤིན་ཏུ་སྔོན་མོའི་ལྟ་བུའོ། །འོག་ཏུ་ས་འོག་གི་ཤིང་རྟ་ལ་རྡོ་རྗེ་མིག་ཅན་མ་ལྗང་གུ་སྟེ་འདིའི་ཤིང་རྟ་ནི་དྲག་མིག་མའི་ལྟ་བུའོ། །ཁྱི་གདོང་མ་ལ་སོགས་པ་འདི་དག་ཟླུམ་པོའི་སྟང་སྟབས་ཀྱིས་གནས་པ་གོང་དུ་བསྟན་པའི་ཀླུ་པདྨ་ལ་སོགས་པ་རྣམས་ཀྱིས་འཁྱུད་པ་གཡས་དང་གཡོན་གྱིས་གྲི་གུག་དང་ཐོད་པ་འཛིན་པ། སྤྱན་གསུམ་པ་གཅེར་བུ་ཕྱག་རྒྱ་ལྔ་དང་ལྡན་པ་མི་མགོའི་
ཕྲེང་བ་མགུལ་དུ་འཕྱང་བའོ། །སྔར་གྱི་འཁོར་ལོ་བརྒྱད་པ་རྣམས་ཀྱི་འོག་ཏུ་རིམ་པ་བཞིན་དུ་བསེ་དང་དོམ་དང་སེང་གེ་དང་གཡག་དང་བེ་རུཎྜ་དང༌། རུང་བ་དང་མིག་སྔོན་དང་བྱ་མ་བྱི་རྣམས་སོ། །དུད་ཁྲོད་འདི་དག་ཉིད་ལ་རླུང་གི་དཀྱིལ་འཁོར་གྱི་ཤར་དང་མེའི་མཚམས་ཀྱི་ཕྱོགས་གཉིས་སུ་རླུང་གི་དཀྱིལ་འཁོར་གཉིས་ཀྱི་སྟེང་དུ་གནས་པའི་ཟླ་བ་དང་ཉི་མའོ། །ལྷོ་དང་བདེན་བྲལ་གཉིས་སུ་མེའི་དཀྱིལ་འཁོར་ལ་གནས་པའི་གཟའ་ལག་པ་དང་མིག་དམར་རོ། །ནུབ་དང་རླུང་གི་མཚམས་ལ་སའི་དཀྱིལ་འཁོར་ལ་གནས་པ་མཇུག་རིངས་དང་སྤེན་པའོ། །བྱང་དང་དབང་ལྡན་གྱི་མཚམས་སུ་ཆུའི་དཀྱིལ་འཁོར་ལ་གནས་པའི་པ་བ་སངས་དང་ཕུར་བུའོ། །སྟེང་དུ་ནམ་མཁའི་དཀྱིལ་འཁོར་ལ་སྒྲ་གཅན་ནོ། །འོག་ཏུ་ནམ་མཁའི་དཀྱིལ་འཁོར་ལ་དུས་ཀྱི་མེའོ། །དེ་བཞིན་དུ་འདིར་རླུང་གི་དཀྱིལ་འཁོར་གྱི་ནང་དུ་དྷྲུ་བ་དང་ཨ་ག་ཏྱོ་དང་སྐར་མ་ཉི་ཤུ་རྩ་བརྒྱད་དང་ཁྱིམ་བཅུ་གཉིས་དང༌། ཆ་བཅུ་དྲུག་དང་ཕྱོགས་བཅུའི་འཇིག་རྟེན་སྐྱོང་བ་དང་དགའ་བ་ཅན་དང་ནག་པོ་ཆེན་པོ་དང༌། དྲིལ་བུའི་རྣ་བ་ཅན་དང༌། ཉམ་ཆུང་དང་ཞིང་སྐྱོང་རྣམས་དང༌། ཕོ་ཉ་མོ་རྣམས་དང་འཕྲོག་མ་དང་གྲུབ་པ་ཐམས་ཅད་ཅེས་བྱ་བ་ལ་སོགས་ཏེ། འབྱུང་པོའི་བྱེ་བྲག་སྐུ་མདོག་དང་ཕྱག་མཚན་དང་གཟུགས་སྣ་ཚོགས་ཅན་བྱེ་བ་ཕྲག་ཕྱེད་དང་བཞིའོ། །འདི་ལྟར་ཟླ་བ་ལ་སོགས་པའི་ལྷ་རྣམས་རྡོ་རྗེའི་གདན་གྱི་འདུག་སྟངས་ཀྱིས་གནས་པའོ། །ལྷ་མོ་རྣམས་ནི་རོལ་པའི་སྟང་སྟབས་ཀྱིས་གནས་པའོ།། །།གསུང་གི་དཀྱིལ་འཁོར་གྱི་སྟེགས་བུ་ལ་ལྷ་མོ་འདོད་མ་རྣམས་སོ། །དེ་ལ་ཤར་གྱི་སྟེགས་བུ་ལ་སྒོའི་གཡས་སུ་ཞེ་སྡང་འདོད་མ་སྒྲོལ་མའོ། །གོས་འདོད་མ་རེག་མ་རྡོ་རྗེ་མ་ལྟ་བུ། ལུས་འཕྲུག་འདོད་མ་ལྷ་མོ་ཙ་མུཎྜཱ་ལྟ་བུ། ཁ་ལུད་འདོར་འདོད་མ་ཁྱབ་འཇུག་མ་ལྟ་བུ། སྐྲོད་འདོད་མ་ཤིན་ཏུ་སྟོབས་ལྟ་བུའོ། །སྒོའི་གཡོན་ངོས་སུ་རབ་ཏུ་ཚ་བ་འདོད་མ་ཤིན་ཏུ་སྔོན་མོ་ལྟ་བུའོ། །རེག་བྱ་འདོད་མ་རྡོ་རྗེ་ལྕགས་སྒྲོག་མ་ལྟ་བུའོ། །ཡན་ལག་ཐམས་ཅད་དཀྲུག་འདོད་མ་ཁྱི་གདོང་མ་ལྟ་བུའོ། །ལྷག་མ་ཟ་འདོད་མ་ཁྭ་གདོང་མ་ལྟ་བུའོ། །ལྷོའི་སྒོའི་གཡས་ལོགས་སུ་བསྟོད་པར་འདོད་མ་གོས་དཀར་མོ་ལྟ་བུའོ། །ཟས་འདོད་མ་རོ་རྡོ་རྗེ་མ་ལྟ་བུའོ། །ཡན་ལག་གི་སྐུ་མཉེད་འདོད་མ་ཕག་གདོང་མ་ལྟ་བུའོ། །གར་འདོད་མ་གཞོན་ནུ་མ་ལྟ་བུའོ། །སྐམ་འདོད་མ་རྨོངས་བྱེད་མ་ལྟ་
ལྟ་བུའོ། །སྒོའི་གཡོན་ལོགས་སུ་འགུགས་འདོད་མ་ཁྲོ་གཉེར་མ་ལྟ་བུ། རྒྱུད་འདོད་མ་དྲག་མིག་མ་ལྟ་བུའོ། །དྲིན་ཆེན་དྲི་ཆུ་སྤོང་འདོད་མ་ཕག་གདོང་མ་ལྟ་བུའོ། །གཡུལ་ངོ་འདོད་མ་བྱ་རྒོད་གདོང་མ་ལྟ་བུའོ། །ནུབ་ཀྱི་སྒོའི་གཡས་ལོགས་སུ་རེངས་འདོད་མ་སྤྱན་མ་ལྟ་བུ། དྲི་ཆབ་འདོད་མ་དྲི་རྡོ་རྗེ་མ་ལྟ་བུ། ཉལ་འདོད་མ་དབང་མོ་ལྟ་བུ། ཆུ་ལ་འཛུལ་འདོད་མ་ཚངས་མ་ལྟ་བུ། བཅིངས་འདོད་མ་རེངས་མ་ལྟ་བུའོ། །སྒོའི་གཡོན་ངོས་སུ་འཁྲིག་པ་འདོད་མ་ཆོས་ཀྱི་དབྱིངས་ཀྱི་རྡོ་རྗེ་མ་ལྟ་བུའོ། །ཕུར་བུ་འདེབས་འདོད་མ་འོད་ཟེར་ཅན་མ་ལྟ་བུ། སླུ་འདོད་མ་ཅེ་སྤྱང་གི་གདོང་མ་ལྟ་བུ། སྤྲུལ་གྱིས་བཅིངས་འདོད་མ་ནམ་མཁའ་ལྡིང་གི་གདོང་མ་ལྟ་བུའོ། །བྱང་གི་སྒོའི་གཡས་སུ་རྒྱས་འདོད་མ་མཱ་མ་ཀཱི་ལྟ་བུ། རྒྱན་འདོད་མ་གཟུགས་རྡོ་རྗེ་མ་ལྟ་བུ། གདན་འདོད་མ་དྲག་མོ་ལྟ་བུ། རྒྱལ་པོའི་སྲིད་འདོད་མ་ཕུན་སུམ་ཚོགས་མ་ལྟ་བུ། འཇམ་པར་སྨྲ་འདོད་མ་ང་རྒྱལ་བྱེད་མ་ལྟ་བུ། སྒོའི་གཡོན་ངོས་སུ་སྒྲ་འདོད་མ་སྒྲ་རྡོ་རྗེ་མ་ལྟ་བུའོ། །ཕྱག་འཚལ་འདོད་མ་ཙུནད་ལྟ་བུ་འཐབ་མོ་མང་པོ་འདོད་མ་སྟག་གདོང་མ་ལྟ་བུ། ཁྱེའུ་ལ་ཁྲོ་འདོད་མ་འུག་གདོང་མ་ལྟ་བུའོ། །ལྷ་མོ་སུམ་ཅུ་རྩ་དྲུག་པོ་འདི་དག་བསྒོམ་པར་བྱའོ། །གང་གསོད་འདོད་མ་ནི་རྡོ་རྗེ་དབྱིངས་ཀྱི་དབང་ཕྱུག་མའི་བསྐྱེད་བྱ་དང་བསྐྱེད་འདོད་མའི་སྣ་ཚོགས་ཡུམ་གྱི་བསྐྱེད་བྱའོ་ཞེས་གསུངས་པའི་འདོད་མ་གཉིས་པོ་དེ་ཇི་ལྟར་རིགས་པར་འདོད་མ་གཞན་གཉིས་ལ་འདུ་བའི་ཕྱིར་ཐ་དད་དུ་བསྒོམ་པ་མ་ཡིན་ནོ། །གཞན་ཡང་གང་དང་གང་འདོད་མ་དེ་དག་ཐམས་ཅད་འདོད་མ་སུམ་ཅུ་རྩ་དྲུག་པོ་ཉིད་ལ་ཇི་ལྟར་རིགས་པ་འདུ་བར་བྱའོ་ཞེས་པའི་བསམ་པ་ཁོ་ནའོ། །བསྡུ་བར་བྱ་བའམ་འདོད་མར་གཅིག་སྟེ། ཉེ་བར་མཚོན་པའི་བརྡ་ཉིད་ཀྱིས་སོ། །དེ་ལྟར་འདོད་མ་ནི་སུམ་ཅུ་རྩ་བདུན་ཞེས་གསུངས་སོ། །དེ་ཉིད་ཀྱི་ཕྱིར་དྲི་མ་མེད་པའི་འོད་ལས་གསུངས་པ་གཞན་ཡང་གང་དང་གང་ལ་སེམས་ཅན་གྱི་བྱ་བ་དེ་ཐམས་ཅད་འདོད་མ་དེ་ཐམས་ཅད་འདིར་རྣལ་འབྱོར་མའི་བྱ་བ་ཁམས་ཀྱི་བྱེ་བྲག་གིས་ཞེས་གསུངས་སོ། །དེ་བས་ན་རྡུལ་ཚོན་གྱི་དཀྱིལ་འཁོར་ལ་ལྷ་སུམ་ཅུ་རྩ་དྲུག་གི་ས་བོན་དགོད་པར་བྱ་བར་བཤད་དོ། །འོན་ཀྱང་འདེབས་འདོད་པའི་ས་བོན་ནི་སཿ་ཞེས་བྱ་བས་ཤར་སྒོའི་གཡོན་ངོས་སུ་དགོད་པར་གསུངས་སོ། །སླུ་འདོད་པའི་ས་བོན་ནི་ཀ །ཞེས་བྱ་བ་ལྷོ་སྒོའི་གཡོན་ངོས་སུའོ། །སྦྲུལ་བཅིང་འདོད་མའི་ས་བོན་ལཿ་ཞེས་བྱ་བ་ནི་བྱང་སྒོའི་གཡོན་དུའོ། །དེ་ལྟར་འདོད་མའི་ལྷ་མོ་སྒོམ་པ་ནི་མ་ཡིན་
ནོ། །གང་དྲི་མ་མེད་པའི་འོད་ལས་འདོད་མ་སུམ་ཅུ་རྩ་བདུན་གྱི་གསུང་གི་དཀྱིལ་འཁོར་གྱི་རང་རང་གི་ཕྱོགས་ལ་རང་རང་གི་རིགས་ཀྱིས་དབྱེ་བས་སོ་ཞེས་གསུངས་པ་འདི་དག་ཐམས་ཅད་ངེས་པར་འདོད་པར་བྱེད་པའོ། །དེ་ལྟར་མ་ཡིན་ན་ཡང་དང་ཡང་དུ་འདོད་མ་སུམ་ཅུ་རྩ་དྲུག་ཅེས་གསུངས་པའི་ཚིག་རྣམས་དང་ཕན་ཚུན་འགལ་པར་འགྱུར་རོ། །འདོད་མ་འདི་དག་ཟློག་པའི་རང་བཞིན་མ་འདོད་མ་སུམ་ཅུ་རྩ་དྲུག་སྐུའི་དཀྱིལ་འཁོར་གྱི་སྟེགས་བུ་རྣམས་ལ་སྔར་བཞིན་དུ་རང་རང་གི་རིགས་ཀྱི་དབང་གིས་རང་རང་གི་ཕྱོགས་རྣམས་སུའོ། །དུས་ཀྱི་འཁོར་ལོ་ལ་སོགས་པའི་དེ་བཞིན་གཤེགས་པ་རྣམས་ལས་གཞན་པའི་ལྷ་རྣམས་ཐམས་ཅད་རིན་པོ་ཆེ་སྣ་ཚོགས་ཀྱི་ཅོད་པན་ཅན་ནོ། །འདིར་གང་གི་ཚེ་བཅོམ་ལྡན་འདས་དཔལ་དུས་ཀྱི་འཁོར་ལོ་རྡོ་རྗེ་སེམས་དཔའི་ངོ་བོར་རྣམ་པར་བཞག་ན་དེའི་ཚེ་མི་བསྐྱོད་པ་ལྗང་གུའི་མདོག་གིས་རྒྱས་བཏབ་པའོ། །དེ་བཞིན་དུ་སྣ་ཚོགས་ཡུམ་གང་གི་ཚེ་མི་བསྐྱོད་པའི་རང་བཞིན་དེའི་ཚེ་མི་བསྐྱོད་པ་སྔོན་པོ་གཟུགས་ཀྱི་རྡོ་རྗེ་སེམས་དཔས་སོ། །དེ་བཞིན་དུ་སྣ་ཚོགས་ཡུམ་རྡོ་རྗེ་དབྱིངས་ཀྱི་དབང་ཕྱུག་མའི་རང་བཞིན་ནོ། །དེ་ལྟར་ན་ཡེ་ཤེས་དང་རྣམ་པར་ཤེས་པ་གཉིས་ལ་ཕན་ཚུན་རྒྱས་བཏབ་པར་འགྱུར་རོ། །དེ་སྐད་དུ་དྲི་མ་མེད་པའི་འོད་ལས། རྒྱལ་བའི་བདག་པོའི་མཆོག་ནི་ཡེ་ཤེས་ཀྱི་ཕུང་པོའོ། །སྣ་ཚོགས་ཡུམ་གྱི་རྣམ་པར་ཤེས་པའི་ཁམས་སོ། །རྣམ་པར་ཤེས་པ་ནི་ནམ་མཁའི་ཁམས་སོ་ཞེས་གསུངས་སོ། །འདིར་ཡེ་ཤེས་ནི་སྟོང་པ་ཉིད་དང་སྙིང་རྗེ་རོ་གཅིག་པའི་མི་འགྱུར་བའི་བདེ་བ་ཆེན་པོའི་ཡེ་ཤེས་སོ། །གང་གི་ཚེ་དུས་ཀྱི་འཁོར་ལོ་རྣམ་པར་ཤེས་པའི་ཕུང་པོ་དེའི་ཚེ་སྣ་ཚོགས་ཡུམ་ནམ་མཁའི་ཁམས་རྡོ་རྗེ་དབྱིངས་ཀྱི་དབང་ཕྱུག་མའི་རང་བཞིན་ནོ་ཞེས་བྱ་བའི་དོན་ཏོ། །དེའི་ཕྱིར་གསུངས་པ་འཁྱུད་པར་འགྱུར་བ་ནི་དོ་རྗེ་དབྱིངས་ཀྱི་དབང་ཕྱུག་མ་སྣ་ཚོགས་ཡུམ་ཞེས་གསུངས་སོ། །རྡོ་རྗེ་དབྱིངས་ཀྱི་དབང་ཕྱུག་མ་དང་ལྷན་ཅིག་རྣམ་པར་ཤེས་པ་པདྨའི་སྙིང་པོ་ལ་བདེ་བ་ཆེན་པོ་ཞེས་གསུངས་སོ། །དོན་ཡོད་གྲུབ་པ་དང། རིན་ཆེན་འབྱུང་ལྡན་དང༌། རྣམ་པར་སྣང་མཛད་དང༌། འོད་དཔག་མེད་རྣམས་ནི་མི་བསྐྱོད་པ་ལྗང་གུས་རྒྱས་བཏབ་པའོ། །ཡང་ན་དོན་ཡོད་གྲུབ་པ་ནི་རིན་ཆེན་འབྱུང་ལྡན་གྱིས་སོ། །རིན་ཆེན་འབྱུང་ལྡན་ནི་སྣང་བ་མཐའ་ཡས་ཀྱིས་སོ། །དེ་ནི་རྣམ་པར་སྣང་མཛད་ཀྱིས་སོ། །དེ་ནི་མི་བསྐྱོད་པ་ལྗང་གུས་སོ། །ཀུན་དུ་
བཟང་པོ་དང༌། སྒྲ་རྡོ་རྗེ་མ་དང༌། གནོད་མཛེས་རྒྱལ་པོ་དང༌། ཤིན་ཏུ་སྔོན་མོ་དང༌། སྔོན་མོ་དང༌། དྲག་མོ་དང༌། རྨུགས་བྱེད་དང༌། རྣམ་པར་རྒྱལ་བའི་ཀླུ་རྣམས་ནི་མི་བསྐྱོད་པ་སྔོན་པོའི་གཟུགས་ཀྱི་རྡོ་རྗེ་སེམས་དཔས་རྒྱས་བཏབ་བ་རྣམས་སོ། །ཕྱག་ན་རྡོ་རྗེ་དང་ཆོས་ཀྱི་དབྱིངས་ཀྱི་རྡོ་རྗེ་མ་དང༌། གཙུག་ཏོར་འཁོར་ལོས་སྒྱུར་བ་དང༌། དྲག་མིག་མ་དང༌། ཁྱབ་འཇུག་མ་དང༌། གཤིན་རྗེ་དང༌། རྒྱལ་བའི་ཀླུ་ནི་མི་བསྐྱོད་པ་ལྗང་གུས་སོ། །ལྷ་གཞན་ནག་པོ་རྣམས་ནི་དོན་ཡོད་གྲུབ་པས་སོ། །དམར་པོ་རྣམས་ནི་རིན་ཆེན་འབྱུང་ལྡན་གྱིས་སོ། །སེར་པོ་རྣམས་ནི་རྣམ་པར་སྣང་མཛད་ཀྱིས་སོ། །དཀར་པོ་རྣམས་ནི་སྣང་བ་མཐའ་ཡས་ཀྱིས་སོ། །རྒྱས་འདེབས་པའི་དེ་བཞིན་གཤེགས་པ་དྲུག་པོ་འདི་དག་ནི་གཙུག་ཏོར་དང་བཅས་པ། སྣམ་སྦྱར་འཛིན་པས་གནོན་ལ་སོགས་པའི་ཕྱག་རྒྱ་དང་ལྡན་པའོ། །བཅོམ་ལྡན་འདས་དཀྱིལ་འཁོར་གྱི་དབང་བོའི་ཐུགས་ཀའི་ས་བོན་ནི་ཧཱུཾ་ངོ༌། །སྔགས་གཞན་རྣམས་ནི་མངས་བས་འཇིགས་པས་མ་བྲིས་སོ། །དེ་ལྟར་བཤད་པར་བྱ་མོད་ཀྱི། །ཕུན་ཚོགས་སྐུ་ནི་དཔག་མེད་དེ། །རྒྱ་མཚོ་ལ་ནི་ཆུ་འཛིན་གྱིས། །ཆུ་བླངས་ཟད་པར་མི་འགྱུར་རོ། །རྡོ་རྗེ་འཛིན་དཔལ་སྐུ་ཡི་བདུད་རྩིའི་ཆུ་རྒྱུན་ལས། །འདོར་བར་བྱས་པའི་བསོད་ནམས་བདུད་རྩིའི་ཚོགས་ཀྱིས་ནི། །དཔག་མེད་སྐུ་ཡི་རླབས་ནི་རིམ་པར་བརྒྱུད་པ་ཡིས། །མཁས་པའི་དབང་ཕྱུག་འཇིགས་མེད་གཞན་དོན་བྱེད་གྱུར་ཅིག །རྡོ་རྗེ་ཕག་མོས་མངོན་སུམ་དུ་བྱིན་གྱིས་བརླབས་པའི་པཎྜི་ཏ་ཆེན་པོ་འཇིགས་མེད་འབྱུང་གནས་སྤས་པའི་ཞལ་སྔ་ནས་མཛད་པ་རྫོགས་པའི་རྣལ་འབྱོར་གྱི་ཕྲེང་བ་ཞེས་བྱ་བ་རྫོགས་སོ།། །།འདིའི་གཞུང་ཚད་ནི་སྟོང་ཉིས་བརྒྱ་བཞུགས་སོ། །རྒྱ་གར་གྱི་པཎྜི་ཏ་ཆེན་པོ་ཐམས་ཅད་མཁྱེན་པའི་དཔལ་བཟང་པོས་འགྱུར་རྙིང་པ་ལ་བརྟེན་ནས་སྨོན་འགྲོའི་གཙུག་ལག་ཁང་དུ་རང་འགྱུར་མཛད་པའོ།། །།པཎྜི་ཏ་དེ་ཉིད་ཀྱིས་ལན་གཉིས་སུ་ཞུས་ཤིང་གཏུགས་སོ། །སླད་ཀྱི་རྒྱ་གར་གྱི་པཎྜི་ཏ་ཆེན་པོ་མཁས་བཙུན་མཆོག་གི་གྲུབ་པ་བརྙེས་པ། བླ་མ་རྗེ་བཙུན་ཆེན་པོ་རཏྣ་རཀྵི་ཏའི་ཞབས་དང༌། བླ་མ་རྗེ་བཙུན་པཎྜི་ཏ་ཆེན་པོ་རེ་བེནྡྲའི་ཞལ་སྔ་ནས། ཆག་ལོ་ཙཱ་བ་ཤཱཀྱའི་དགེ་སློང་དཔལ་གྱི་མཐའ་ཅན་གྱིས་ཞུས་ཤིང་དག་པར་བསྒྱུར་ཏེ་གཏན་ལ་ཕབ་པའོ།། །།