འཇིག་རྟེན་དབང་ཕྱུག་དམར་པོའི་སྒྲུབ་ཐབས་ཞེས་བྱ་བ།
རྒྱ་གར་སྐད་དུ། རཀྟ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་དམར་པོའི་སྒྲུབ་ཐབས་ཞེས་བྱ་བ་འཇིག་རྟེན་དབང་ཕྱུག་དམར་པོ་ལ་ཕྱག་འཚལ་ལོ། །ཨོཾ་ཚི་ཊི་ཚི་ཊི། བི་ཀློ་ལི་བི་ཀློ་ལི། ཆེ་གེ་མོ་འཁོར་དང་བཅས་པ་བདག་གི་དབང་དུ་འགྱུར་བར་སྒྲུབས་སྭཱ་ཧཱ། སྔོན་དུ་འགྲོ་བ་ཁྲི་ཕྲག་བཟླས་ལ་ཕྱི་ནས་བསྒྲུབ་པ་བརྩམ་པར་བྱ་བའོ། །ལྷོ་དང་བྱང་གི་
ངོས་ན་ལྷ་མོ་སྒྲོལ་མ་དང་ཁྲོ་གཉེར་ཅན་དང་བཅས་པའི་རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དམར་པོ་དབྱུག་པ་དང་ཕྲེང་བ་དང་ན་བཟའ་དམར་པོ་དང་ལྡན་པ་ཕྱག་བཞིན་ཞགས་པ་དང་ལྕགས་ཀྱུ་དང་མདའ་དང་གཞུ་བསྣམས་པ་གཅིག་ཏུ་སྒེག་པའི་སྙིམ་པ་མེ་ཏོག་དམར་པོས་མཛེས་པར་གྱུར་པའི་ཤིང་མྱ་ངན་མེད་དེའི་དྲུང་ན་བཞུགས་པར་བདག་ཉིད་ཐུན་ཚོད་གསུམ་དུ་བསམ་པར་བྱ་བའོ། །ལན་ཚྭ་དང་ཨ་ཧུ་ཏའི་ཞེས་བྱ་བ་བརྒྱ་རྩ་བརྒྱད་སྦྱིན་སྲེག་བྱས་ན་སྐྱེས་པའམ་བུད་མེད་ཀྱང་རུང་སྟེ། ཞག་བདུན་ན་དབང་དུ་འགྱུར་རོ། །བདུན་ཕྲག་གསུམ་གྱིས་ནི་སྐྱེས་བུ་ཆེན་པོ་ཡང་ངོ༌། །ལན་ཚྭ་དང་བསྲེས་པའི་སྤྲ་ཚིལ་གྱི་ཆད་བུ་བྱས་ལ་སོར་བཞིའི་ཚད་ཀྱི་གཟུགས་བརྙན་བྱས་ཏེ་དུ་བ་མེད་པའི་སེང་ལྡེང་གི་སོལ་མེ་ལ་སྔགས་ཟློ་ཡིན་ཐུན་ཚོད་གསུམ་དུ་སྲེག་པར་གྱུར་ན་གང་གི་མིང་བྱས་པ་དབང་དུ་འགྱུར་རོ། །རྡོ་རྗེའི་ཆུས་བསྒོས་པའི་ལན་ཚྭ་ལ་ལན་བརྒྱ་རྩ་བརྒྱད་དུ་ཡོངས་སུ་བསྔགས་ནས་གང་ལ་བྱིན་པར་གྱུར་པ་དེས་ཟོས་པ་ཙམ་ཉིད་ན་དབང་དུ་འོང་བ་ཡིན་ནོ། །འཇིག་རྟེན་དབང་ཕྱུག་དམར་པོའི་སྒྲུབ་ཐབས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །