བརྟན་པའི་འཁོར་ལོའི་སྒྲུབ་ཐབས།
རྒྱ་གར་སྐད་དུ། སྠིར་ཙཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོའི་སྒྲུབ་ཐབས། ཨོཾ་བརྟན་པའི་འཁོར་ལོ་ལ་ཕྱག་འཚལ་ལོ། །དཔལ་ལྡན་འཁྲུལ་བ་མ་ལུས་གཏན་ནས་སྤངས་པའི་རི་པོ་འཚར་བ་རྒྱ་ཆེར་འབར། །དྲི་མེད་དམར་སེར་འོད་ནི་རབ་ཏུ་འཕྲོ་བ་རྒན་ཡང་བྱིས་པ་ཉིད་ཀྱི་གཟུགས། །བྱིས་རྣམས་རྣམ་པར་འཁྲུལ་བྱེད་པ་ཡང་མཆོག་ཏུ་རྟོགས་པའི་ཤེས་རབ་ལ་ནི་དང་བས་འདུད། །དེ་ཡི་འཁོར་ལོ་རིན་ཆེན་འདི་ནི་རང་ཉིད་རྗེས་སུ་རྟོགས་པར་བྱ་ཕྱིར་བདག་གིས་བྲི། །ཀུན་མཁྱེན་ཡེ་ཤེས་རྒྱ་མཚོ་ཡིས། །མཐའ་ཡས་ཕྱོགས་ཀུན་ལེགས་དགོངས་ནས། །སེམས་ཅན་ཆུ་བོས་ཀུན་སྐྲག་རྣམས། །ཡོངས་སུ་བསྐྱབ་པར་བརྩོན་མཛད་པ། །ཡིད་བཞིན་ནོར་བུར་གྲགས་སེམས་ཀྱི། །དེ་དག་རྣམ་སྣ་ཚོགས་པས་མཆོད། །བྱས་ལ་འཇིག་རྟེན་བསྐྱབ་དོན་དུ། །བདག་ཉིད་སྐུར་ཡང་གསོལ་བ་གདབ། །དེ་ནས་དགེ་བ་མངོན་པར་འཕེལ་བར་བྱ་བའི་ཕྱིར་སྔགས་པས་འདི་དག་བྱ་སྟེ། འཇིགས་པའི་སྡིག་པ་རྣམས་ནི་ཐམས་ཅད་བཤགས་པར་བགྱི། །དགའ་བས་འགྲོ་བའི་བསོད་
ནམས་ལ་ནི་རྗེས་ཡི་རང༌། །དཀོན་མཆོག་གསུམ་ལ་བདག་ནི་ཅིས་ཀྱང་སྐྱབས་སུ་མཆི། །རྫོགས་སངས་རྒྱས་ཀྱི་བྱང་ཆུབ་སེམས་ནི་རྣམ་པར་བླང༌། །ཡང་དེའི་རྗེས་ལ་འདི་བརྩམ་པར་བྱ་སྟེ། གཟུང་འཛིན་དག་གིས་བཅོམ་པའི་འགྲོ་བ་འདི་དག་རྣམས་ནི་རྨི་ལམ་དང་ནི་མིག་འཕྲུལ་མཚུངས། །རང་བཞིན་གྱིས་ནི་འོད་གསལ་ཕྱིར་ན་དགའ་བ་ཉིད་ཀྱང་ནམ་མཁའ་མཉམ་པར་ཀུན་དུ་གནས། །བདག་ཉིད་ཀྱང་ནི་ཡིད་འོང་ཟླ་བ་ངེས་པར་བསམ་བྱ་མདོར་བསྡུ་ན་ནི་ཡི་གེ་མུཿ། །ཡང་ནི་འོད་ཟེར་དྲ་བ་འཁྲིགས་ཤིང་འཕྲོ་བ་དེ་ལས་ཡང་དག་བྱུང་བ་བསྒོམ་པར་བྱ། །དེ་གཞན་གྱུར་པ་ལས་ཀྱང་ཉམས་པ་མེད་པའི་དཀྱིལ་འཁོར་ནི། །གསེར་འོད་དང་ལྡན་གུར་ཀུམ་དག་གི་འདབ་བཞིན་སེར་གྱུར་པ། །དབྱངས་རྣམས་ཀུན་ན་འབར་བའི་ཕྲེང་བ་ཡིས་ནི་དཀྲིགས་གྱུར་ལས། །ཕྱོགས་ཀྱི་སྒོ་རྣམས་གསལ་བར་བྱེད་པའི་འོད་ནི་བསམ་པར་བྱ། །དེ་ནས་གཞན་ཡང་མུཿ་གཟུགས་ས་བོན་ལས་ནི་ལེགས་བྱུང་བའི། །འོད་ཟེར་དམར་པོར་གྱུར་པའི་དཀྱིལ་འཁོར་བསྒོམ་བྱ་སྟེ། །ཀ་ཁ་ལ་སོགས་ཡི་གེ་མ་ལུས་ཀུན་གྱིས་ལེགས་བསྐོར་བ། །གུར་གུམ་དམར་རེངས་ཤིན་ཏུ་འོད་འབར་བ་སྟེ་དེ་སྟོང་ངོ༌། །སྔགས་བ་ཡིས་ནི་དེར་ཡང་ཡི་གེ་མུཿ་ནི་བལྟ་བྱས་ལ། །དེ་ལས་ལེགས་པར་བྱུང་ཞིང་འོད་འབར་འདབ་མ་ལ་ལྡན་པའི། །ཨུཏྤལ་མཆོག་གྱུར་འོད་ཟེར་དྲ་བས་མ་ལུས་རྣམ་འཕྲོ་བ། །མུཿ་དབྱིབས་ས་བོན་དབུས་ནི་གནས་པ་རྣམ་པར་བསམ་པར་བྱ། །དེ་ལས་ལེགས་བྱུང་འོད་ཀུན་གྱིས་ནི་སངས་རྒྱས་སྤྲོ་བས་འཇིག་རྟེན་ཀུན་བཀང་ལ། །ཟླ་བས་བསྐོར་བའི་སྐུ་ནི་ཤིན་ཏུ་འོད་འབར་མཆོག་ཏུ་གསལ་ལྡན་ཟུར་ཕུད་ཅན། །འོད་ཟེར་དམར་པོའི་དྲ་བས་མི་བཟད་མུན་པའི་སྒྲིབ་གཡོགས་གཏན་ནས་འཇོམས་མཛད་པ། །རྣམ་པ་ཐམས་ཅད་མཆོག་རྣམས་མྱུར་བར་སྦྱིན་ལ་མཁས་པའི་དཔལ་ལྡན་རི་དབང་ཕྱུག །རོལ་ཅིང་སྒེག་པའི་ཉམས་དང་ལྡན་པས་མངོན་དགྱེས་པ། །ཆུ་སྐྱེས་ཕུན་ཚོགས་མངའ་མཛད་བརྗིད་པའི་འགྱིང་བག་ལྡན། །དཔའ་བོ་གཞོན་ནུར་གྱུར་བ་རྒྱན་རྣམས་ཀྱིས་བརྒྱན་པ། །དེ་ཡི་ཞབས་དང་ཉེ་བའི་ཡིད་ཀྱིས་བསྒོམ་པར་
བྱ། །དེ་ལྟར་ཀུན་བསམ་ངག་གི་དབང༌། །སྙིང་གར་ཡི་གེ་མུཿ་བསྒོམས་ཏེ། །འབར་བ་ཁ་དོག་དམར་པོར་སྣང༌། །འབར་བའི་དཀྱིལ་འཁོར་ཀུན་ནས་འཕྲོ། །དེ་ལས་སྐྱེས་པའི་རྩིབས་བརྒྱད་པའི། །འཁོར་ལོ་འོད་ཟེར་མུན་ཉེར་འཇོམས། །མ་ལུས་འོད་ཀྱིས་འགེངས་བྱེད་པའི། །ཡེ་ཤེས་རང་བཞིན་རྗེ་བོ་བལྟ། །སྤྲུལ་པའི་འཁོར་ལོ་ཕྱོགས་རྣམས་སུ། །ཡིད་འོང་འོད་ཟེར་ཚོགས་བཞིན་ཏེ། །མེ་ཏོག་དམར་པོས་གཏམས་པ་ལྟར། །ཡི་གེ་དམར་པོས་ཀུན་འཁྲིགས་པའོ། །དེ་ལ་རེ་ཞིག་ཡི་གེ་རྣམས་བསམ་པར་བྱ་སྟེ། འཁོར་ལོའི་རྩིབས་རྣམས་ཀྱི་ཤར་དང་ལྷོ་དང་ནུབ་དང་བྱང་རྣམས་ལ་ནི་རིམ་པ་ཇི་ལྟ་བ་བཞིན་དུ། ཨ་ར་པ་ཙ་རྣམས་སོ། །ལྟེ་བ་ལ་ནི་ཡི་གེ་ནའོ། །མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་སུ་ཡང་སྔར་བཞིན་དུ་ནིཿ་པྲ་པཉྩའོ། །དེ་ཁོ་ན་བཞིན་དུ་བར་དང་བར་རྣམས་ཀྱི་ནི་ཨ་ལ་སོགས་པའི་དབྱངས་ཡིག་གི་ཚོགས་རྣམས་སོ། །ཕྱི་རོལ་དུ་ནི་ཡི་གེ་ཀ་ལ་སོགས་པའི་གསལ་བྱེད་རྣམས་སོ། །འདི་དག་གཡོ་བ་མེད་ཅིང་ངེས་པར་ཡང་བྱས་ལ། ཕྱི་ནས་འཁོར་ལོའི་ཡི་གེའི་ཚོགས་དང་འོད་ཟེར་གྱི་ཚོགས་ཀྱི་འོད་ཀྱིས་མུན་པའི་དཀྱིལ་འཁོར་ཀུན་ནས་འཇོམས་པར་བྱེད་པ་རྣམས་རང་གི་ལུས་ཀྱི་བ་སྤུའི་ཁུང་བུ་རྣམས་ནས་འཕྲོས་པས། ཕྱོགས་བཅུ་འཇིག་རྟེན་གྱི་ཁམས་ན་རྣམ་པར་བཞུགས་པའི་དེ་བཞིན་གཤེགས་པ་རྣམས་ཀྱི་ཐུགས་ཀྱི་ཡེ་ཤེས་ཀྱི་བདུད་རྩི་དག་དང་ལྷན་ཅིག་རོ་གཅིག་ཏུ་གྱུར་ནས། །སླར་ཡང་དེ་དག་ཉིད་ཕྱིར་བསྡུས་ལ་བ་སྤུའི་ཁུང་བུ་དེ་དག་ཉིད་དུ་ལེགས་པར་བཅུག་ལ། རང་གི་ལུས་ཀུན་དུ་གསལ་བར་བྱེད་པར་རིང་དུ་བསྒོམ་པར་བྱ་བའོ། །སེམས་བརྟན་པ་དང་ཕྱི་ནས་ནི་སྤྲོ་བ་དང་བསྡུ་བའི་རིམ་པས་ཇི་སྲིད་དུ་མངོན་སུམ་དུ་གསལ་བར་མ་གྱུར་པ་དེ་སྲིད་དུ་བསྒོམ་པར་བྱ་བའོ། །འཇམ་དཔལ་ངེས་རྟོགས་ནས་སྐབས་དག་ནི་སྦྱིན་བྱེད་པ། །ཡི་གེ་དག་ནི་ལྷན་ཅིག་ཉིད་དུ་ཡིད་འོང་བའོ། །འཁོར་ལོ་གསལ་སྣང་ཁོ་ནར་ཉེ་བར་རྟོགས་པ་འདི། །ཉིན་མཚན་བསམ་གཏན་ལ་ནི་མངོན་པར་བརྩོན་ལས་ཡིན། །སྔར་མ་མཐོང་བའི་ངག་གི་རང་བཞིན་རྣམས་དང་ནི། །བཟོ་དང་རིག་པའི་གནས་རྣམས་མ་ལུས་པ་ལ་དེའི། །བློ་ཡི་ནོར་བུའི་སྣང་བ་གསལ་བྱེད་ཇི་ལྟ་བར། །རབ་འཇུག་
འོད་ཀྱིས་མུན་པ་གཏན་ནས་འཇོམས་པ་ཡིན། །གང་ཕྱིར་འཁོར་ལོ་འདི་ཡང་ཕན་འདོད་ཡིན་ཅན་གྱིས། །ངོ་མཚར་དུ་ཡང་ཟླ་བ་ཕྱེད་ནི་འདིར་བརྟགས་ན། །རིང་པོ་མིན་པ་ཉིད་ན་ཁྱེད་ཅག་ལ་ཡང་ནི། །བདེར་གཤེགས་ངོ་བོ་ཉིད་ཀྱིས་རབ་ཏུ་སད་བྱེད་འགྱུར། །འཁོར་ལོ་རྣམ་བཀོད་ལས་བྱུང་བསོད་ནམས་གང་ཡིན་འདིས་ནི་གཞན་ཅི་སྨོས། །བདག་ཡིད་ལས་ནི་སྐྱེས་ཀུན་གསལ་བར་བྱེད་པ་དེས་ནི་འཁོར་ལོ་ཉིད། །གསར་ཤར་བཞིན་དུ་འདིས་ནི་གཏི་མུག་མུན་ནག་མཐང་ས་ནི་འབྱེད་ཅིང༌། །ཤིན་ཏུ་གསལ་དང་གསུང་གི་མངའ་བདག་དཔལ་དགྱེས་འདིར་ནི་སྐྱེ་བོ་ཤོག །བརྟན་པའི་འཁོར་ལོའི་སྒྲུབ་ཐབས་རྫོགས་སོ། །