བརྟན་པའི་འཁོར་ལོ་སྒྲུབ་ཐབས།
རྒྱ་གར་སྐད་དུ། སྠི་ར་ཙ་ཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོ་སྒྲུབ་ཐབས། བརྟན་པའི་འཁོར་ལོ་འདི་ནི་དཔལ་དང་ལྡན། །འཇམ་པའི་རྡོ་རྗེ་སྐྱོབ་པར་མཛད་པ་ཉིད། །བཏུད་ནས་བྱིས་པ་རྣམས་ཀྱིས་རྟོགས་བྱའི་ཕྱིར། །རྣམ་པར་གསལ་བའི་ཚིག་གིས་བྲི་བར་བྱ། །བདེ་བའི་སྟན་ལ་ཉེ་བར་གནས་པའི་རྣལ་འབྱོར་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ནམ་མཁའ་ལ་གནས་པར་བསམས་ལ། དེ་རྣམས་ལ་ཡིད་ཀྱིས་རང་བཞིན་གྱི་མཆོད་པ་རྣམ་པ་སྣ་ཚོགས་པས་ཆོ་ག་བཞིན་དུ་མཆོད་དེ། སྡིག་པ་བཤགས་པ་ལ་སོགས་པ་རྣམས་བྱ་བའོ། །དེ་ནས་སྣ་ཚོགས་འདི་དག་སེམས་ཙམ་གྱི་ངོ་བོ་སྟེ་གཟུང་བ་དང་འཛིན་པ་དང་བྲལ་བ་རྨི་ལམ་དང་མཚུངས་ཞིང་གཟུགས་བརྙན་དང་མཚུངས་པར་བདག་ཉིད་ཀྱང་ངེས་པར་བྱས་ལ། གུར་གུམ་གྱི་འོད་དང་ལྡན་པའི་ཡི་གེ་མུཿལས་བྱུང་བའི་ཨ་ལ་སོགས་པའི་དབྱངས་ཡིག་གི་འོད་ཟེར་འཕྲོས་པ་ལས་ཟླ་བ་དམར་པོར་བལྟ་བའོ། །དེའི་སྟེང་དུ་ཡི་གེ་མུཿ་ཡི་གེ་འོད་འཕྲོས་བ་ལས་བྱུང་བའི་ཡི་གེ་ཀ་ལ་སོགས་པའི་འོད་ཟེར་གྱིས་ཉི་མའི་དཀྱིལ་འཁོར་དམར་པོ་བསྒོམ་པར་བྱ་བའོ། །དེའི་སྟེང་དུ་ཡི་གེ་མུཿ་ལས་བྱུང་ཞིང་དྲི་མ་མེད་ཅིང་འོད་འཕྲོ་བ་དང་ལྡན་པའི་ཨུཏྤལའི་མཆོག་ལྟེ་བ་ལ་ཡི་གེ་མུཿ་གནས་པར་བསམ་མོ། །དེ་ཡང་ཡོངས་སུ་གྱུར་པ་ལས་གུར་གུམ་གྱི་མདོག་དང་ལྡན་ཞིང་ཟུར་བུད་ལྔ་ལ་གཞོན་ནུའི་རྒྱན་ཅན་གཅིག་ཏུ་སྒེག་པའི་ཉམས་དང་ལྡན་པ་རལ་གྲི་གླེགས་
བམ་བསྣམས་པའི་ངག་གི་དབང་ཕྱུག་ཟླ་བ་ལ་བཞུགས་པར་བདག་ཉིད་བསྒོམ་པར་བྱའོ། །དེའི་ཐུགས་ཀར་ཡི་གེ་མུཿ་ལས་བྱུང་བའི་འཁོར་ལོ་བརྟན་པོ་རྩིབས་བརྒྱད་པ་སྟེ། འོད་ཟེར་གྱི་རང་བཞིན་འབར་བ་ལས་ཡི་གེ་ཨ་ལ་སོགས་པ་རྣམས་ཀྱི་ཕྲེང་བས་བསྐོར་བའོ། །འཕྲོས་པ་ལས་ཕྱི་རོལ་དུ་ཡི་གེ་ཀ་ལ་སོགས་པའི་ཕྲེང་བས་ཡོངས་སུ་བསྐོར་བའོ། །དེའི་ལྟེ་བ་ལ་ཡི་གེ་ཨའོ། །ཤར་གྱི་རྩིབས་ལ་རའོ། ལྷོའི་རྩིབས་ལ་པའོ། །ནུབ་ཀྱི་རྩིབས་ལ་རྩའོ། །བྱང་གི་རྩིབས་ལ་ནའོ། །མེ་ལ་སོགས་པའི་མཚམས་རྣམས་སུ་ཡང་ཡི་གེ་ནིཿ་པྲ་སཉྩ་རྣམས་གུར་གུམ་གྱི་མདོག་དང་ལྡན་པ་རྣམ་པར་བསམ་པར་བྱས་ལ། འཁོར་ལོའི་འོད་ཟེར་གྱི་ཚོགས་དེ་དག་རྣམས་ཀྱི་ནང་དུ་ལུས་ཀུན་དུ་གསལ་བར་བྱ་སྟེ། བ་སྤུའི་བུ་གའི་གསེབ་རེ་རེ་ནས་སྤྲོས་པས་ཕྱོགས་བཅུའི་འཇིག་རྟེན་གྱི་ཁམས་ཀུན་སྣང་བར་བྱས་ཤིང་སླར་ཡང་བ་སྤུའི་བུ་གའི་ཁུང་བུ་དེ་དག་རྣམས་ཉིད་དུ་ལེགས་པར་བཅུག་སྟེ། ལུས་ཀུན་ནས་གསལ་བར་བྱ་བ་ནི་དུས་ཡུན་རིང་དུ་རྣམ་པར་བསམ་པར་བྱའོ། །ཨོཾ་ཨ་ར་ཙ་ན་མུཿ་ཞེས་བྱ་བ་ནི་བཟླས་པའི་སྔགས་སོ། །བརྟན་འཁོར་སྒྲུབ་ཐབས་བྱས་པ་ཡིས། །བསོད་ནམས་བདག་ལ་གང་སྐྱེས་པ། །དེས་ནི་འགྲོ་བ་མ་ལུས་ཀུན། །གཟི་བརྗིད་འཇམ་རྡོར་མཚུངས་པར་ཤོག །ཚིག་ལྷུག་པའི་བརྟན་པའི་འཁོར་ལོའི་སྒྲུབ་ཐབས་སོ།། །།དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །