གསུང་གི་མངའ་བདག་གི་སྒྲུབ་ཐབས།
རྒྱ་གར་སྐད་དུ། བཱ་གཱི་རཱ་ཊ་སཱ་དྷ་ནཾ། བོད་སྐད་དུ། གསུང་གི་མངའ་བདག་གི་སྒྲུབ་ཐབས། དངོས་གྲུབ་ཐམས་ཅད་རབ་བྱིན་པའི། །ཡེ་ཤེས་རང་བཞིན་མགོན་ལ་འདུད། །ཀྲི་ཡའི་རྒྱུད་ཀྱི་རྗེས་འབྲངས་ལ། །དེ་ཡི་སྒྲུབ་ཐབས་བདག་གིས་བཤད། །དེ་ལ་རེ་ཞིག་དང་པོར་སྔགས་པས་ཡིད་དང་མཐུན་པའི་གནས་སུ་ཇི་ལྟར་བདེ་བར་ཉེ་བར་གནས་ལ། སྡུག་བསྔལ་གྱི་ཆུ་བོར་བྱིང་བར་གྱུར་པའི་སེམས་ཅན་གྱི་ཁམས་རྣམས་ལ་བལྟས་པས་སྨོན་ལམ་གདབ་པར་བྱ་སྟེ། སྡུག་བསྔལ་བར་གྱུར་པའི་སེམས་ཅན་འདི་དག་རྣམས་འཁོར་པ་ན་འཁོར་བར་གྱུར་པ་དེ་དག་འཇམ་པའི་དབྱངས་སུ་གྱུར་ནས། བླ་ན་མེད་པའི་གོ་འཕང་ལ་ལེགས་པར་དགོད་པར་བྱའོ་
ཞེས་བྱ་བར་རོ། །དེ་ནས་ཐང་ཀ་ལ་སོགས་པར་གྱུར་པའི་བཅོམ་ལྡན་འདས་འཇམ་པའི་དབྱངས་དང་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་ཡང་དག་པར་དམིགས་ལ། མེ་ཏོག་ལ་སོགས་པས་ལེགས་པར་མཆོད་ཅིང་ཡན་ལག་ལྔས་ཕྱག་འཚལ་ཏེ། སྡིག་པ་བཤགས་པ་དང་སླན་ཆད་མི་བྱེད་པར་སྔོམ་པ་དང༌། བསོད་ནམས་ལ་རྗེས་སུ་ཡི་རང་བ་དང་བདག་ཉིད་ཀྱི་དངོས་པོ་ཡོངས་སུ་དབུལ་བ་དང་གསུམ་ལ་སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་པ་རྣམས་ཀྱང་བྱ་བ་ནི། ཚིགས་སུ་བཅད་པ་གཉིས་པོ་འདི་དག་གིས་ཡིན་ཏེ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །བདག་གིས་བྱང་ཆུབ་སེམས་ནི་བསྐྱེད་བགྱི་ཞིང༌། །འགྲོ་བ་མ་ལུས་བདག་གིས་མགྲོན་དུ་གཉེར། །བྱང་ཆུབ་མཆོག་གི་སྤྱོད་པ་སྤྱད་བགྱི་ཞིང༌། །འགྲོ་ལ་ཕན་ཕྱིར་སངས་རྒྱས་གྲུབ་པར་ཤོག །དེ་ནས་ལམ་ལ་བརྟེན་པར་བྱ་བའོ། །ཨོཾ་ཆོས་ཐམས་ཅད་རང་བཞིན་གྱིས་རྣམ་པར་དག་པས་བདག་ཀྱང་རང་བཞིན་གྱིས་རྣམ་པར་དག་པའོ། །འདིའི་དོན་རྗེས་སུ་རྟོགས་པས་ལན་གསུམ་བརྗོད་ལ་རང་བཞིན་གྱིས་རྣམ་པར་དག་པར་མོས་པར་བྱ་སྟེ། ཆོས་ཐམས་ཅད་བདག་མེད་བར་བསྒོམ་མོ། །ཁམས་གསུམ་སྟོང་ཞིང་མཚན་ཉིད་མེད་པ་གཟུང་བ་དང་འཛིན་པ་དང་བྲལ་བར་བལྟས་ལ། རང་གི་སྙིང་གར་ཡི་གེ་ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་གསེར་བཙོ་མའི་མདོག་ལྟ་བུའི་ཡི་གེ་མུཿའོ། །དེ་ལས་ཀུན་དུ་བྱུང་བའི་འོད་ཟེར་གྱི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་བྱས་ཤིང་ཀུན་དུ་སྣང་བར་ཡང་བྱ་སྟེ། སྐལ་བ་ཇི་ལྟ་བ་བཞིན་དུ་སེམས་ཅན་རྣམས་ཀྱི་དོན་བྱས་ཤིང་དེ་བཞིན་གཤེགས་པ་རྣམས་ཀྱང་བསྐུལ་ནས། ས་བོན་དེ་ཉིད་ལ་ལེགས་པར་གཞུག་པར་བྱ་བའོ། །དེ་དག་ཐམས་ཅད་ཡོངས་སུ་རྫོགས་པ་ལས་བདག་ཉིད་འཇམ་པའི་དབྱངས་ཀྱི་ངོ་བོ་ཉིད་དུ་བསྒོམ་པར་བྱ་སྟེ། སྐུ་གསེར་བཞུ་བའི་མདོག་དང་མཚུངས་པ་ཞལ་གཅིག་ཕྱག་གཉིས་པ་སེང་གེའི་སྟེང་ན་པདྨ་དང་ཟླ་བའི་གདན་ལ་ཕྱེད་སྐྱིལ་གྱིས་བཞུགས་པ། ཟུར་ཕུད་གསུམ་པ་རིན་
པོ་ཆེའི་དབུ་རྒྱན་ཅན་ཟླ་བའི་འོད་ཀྱི་དབུ་ཡོལ་དང་ལྡན་པ་གཞོན་ནུའི་རྣམ་པའི་གཟུགས་མངའ་བརྒྱན་རྣམས་ཐམས་ཅད་ཀྱིས་བརྒྱན་ཅིང༌། སྒེག་པའི་ཉམས་དང་ལེགས་པར་ལྡན་པ་སྟེ། ཕྱག་གཉིས་ཀྱིས་ཆོས་ཀྱི་འཁོར་ལོའི་ཕྱག་རྒྱ་མཛད་ཅིང་ཕྱག་གཡོན་པས་ཤེས་རབ་ཀྱི་ཕ་རོལ་ཏུ་ཕྱིན་པ་དང་བཅས་པའི་ཨུཏྤལའི་མཆོག་བསྣམས་པའོ། །ལྗང་ངར་གཡོན་པ་ལ་བརྟེན་ནས་ནི་ཁྲོ་བོ་ཆེན་པོ་གཤིན་རྗེ་གཤེད་དེ། མདོག་མཐིང་ནག་ཞལ་བསྒྱུར་ཞིང་མཆེ་བ་རྣམ་པར་གཙིགས་པ་སྐྲ་ཁམ་སེར་འཁྱིལ་བ་སྤྱན་ཤིན་ཏུ་དམར་ཞིང་ཟླུམ་པས་ཕྱག་གཡས་པས་བཅོམ་ལྡན་འདས་ཀྱིས་ལྗང་ངར་ལ་འཇུས་པ་གཡོན་པས་དབྱུག་ཐོ་འཛིན་པའོ། །དེ་ལྟར་རྣམ་བར་བསྒོམས་ལ་སྐུ་གསུང་ཐུགས་ཀྱི་ཟླ་བའི་དཀྱིལ་འཁོར་ལ་ཨོཾ་ཨཱཿ་ཧཱུཾ་ཞེས་བྱ་བའི་ཡི་གེ་གསུམ་པོ་དཀར་པོ་དང་དམར་པོ་དང་སྔོན་པོའི་མདོག་ཏུ་རིམ་པ་ཇི་ལྟ་བ་བཞིན་དུ་དགོད་པར་བྱ་བའོ། །དེ་ནས་ནུ་མ་གཉིས་ཀྱི་བར་དུ་ཟླ་བའི་དཀྱིལ་འཁོར་ལ་ཡི་གེ་མུཿ་བསམས་ལ་དེ་ནས་མཆོད་པར་བྱ་བ་དང་མཆོད་པར་བྱེད་པ་པོ་ཐ་དད་མེད་པར་དམིགས་ཏེ། རྣམ་པ་སྣ་ཚོགས་པའི་ལྷ་རྣམས་ཀྱིས་ཡང་དག་པར་བསྟོད་པར་གྱུར་བ་བདག་ཉིད་ལྟ་ཞིང་སྤྲོ་བ་དང་བསྡུ་བས་ཇི་སྲིད་དུ་སྐྱོ་བར་གྱུར་པ་མ་ཡིན་པ་དེ་སྲིད་དུ་བསྒོམ་པར་བྱ་བའོ། །དེ་ལྟར་རྟག་ཏུ་བསྒོམ་བྱས་ན། །སངས་རྒྱས་བྱང་ཆུབ་རབ་ཏུ་འགྲུབ། །སྐྱེ་བ་འདི་ཉིད་རང་ལ་ཡང༌། །ཐུགས་རྗེ་ཆེན་པོ་འཇམ་མགོན་འཐོབ། །བསྒོམས་པས་སྐྱོ་བར་གྱུར་ན་རང་གི་སྙིང་གར་ཟླ་བའི་དཀྱིལ་འཁོར་ལ་སྔགས་རྣམ་པར་བཀོད་ལ་ཞེ་ན་པ་མེད་པའི་ཡིད་ཀྱིས་བཟླས་པར་བྱ་བའོ། །དེ་ལ་སྔགས་ནི་འདི་ཡིན་ཏེ། ཨོཾ་དྷ་རྨ་དྷཱ་ཏུ་བཱ་གཱི་ཤྭ་རི་མུཾ། དེ་ལྟར་བཟླས་པ་བྱས་ལ་བསྒོམས་པས་ཀྱང་སྐྱོ་བར་གྱུར་ནས་གལ་ཏེ་ལངས་བར་འདོད་ན། དེ་ཁོ་ན་བཞིན་དུ་ལེགས་པར་མཆོད་ཅིང་ཡང་དག་པར་བསྟོད་ལ། དགེ་བ་ཡོངས་སུ་བསྔོས་ཏེ་ཚིགས་སུ་བཅད་པ་འདིས་བཟོད་པར་གསོལ་བར་བྱ་བའོ། །རྨོངས་པའི་བློ་ཅན་བདག་གིས་ནི། །ནོངས་པ་ཅུང་ཟད་གང་བགྱིས་པ། །དེ་ལས་ལུས་ཅན་སྐྱོབ་པའི་མགོན། །ཁྱོད་ཀྱིས་སླར་ཡང་དེ་བཟོད་མཛོད། །སྐྱེ་དགུ་རྣམས་ལ་ཕན་པའི་དོན་དུ་སྨོན་ལམ་གདབ་པར་བྱ་སྟེ། དགེ་བ་འདིས་ཀྱང་བདག་གིས་སངས་
རྒྱས་ཉིད་ཐོབ་ནས་སྲིད་པའི་རྒྱ་མཚོ་རྒལ་བར་དཀའ་བ་ལས་འགྲོ་བ་མཐའ་དག་སྒྲོལ་བར་ཤོག །དེ་ནས་ཆོས་ཐམས་ཅད་མཉམ་པ་ཉིད་དུ་ལྷག་པར་དམིགས་ལ་ཐམས་ཅད་འཇམ་པའི་དབྱངས་ཀྱི་རང་བཞིན་དུ་བལྟས་ཏེ་རང་གི་ལྷའི་ད་རྒྱལ་དང་ལྡན་པས་ཇི་ལྟར་བདེ་བར་གནས་པར་བྱ་བ་ཡིན་ནོ། །དེ་ལྟར་ཐུན་བཞིའམ་ཐུན་གསུམ་དུ་ཡང་རུང་སྟེ་བྱ་བ་ཡིན་ནོ། །སྒྲུབ་ཐབས་འདི་བྱས་ལས་བྱུང་བའི། །འབྲས་བུ་བདག་གིས་གང་ཐོབ་པ། །དེས་ནི་སྲིད་གསུམ་འཇིག་རྟེན་འདི། །མ་ལུས་འཇམ་དབྱངས་ཉིད་གྱུར་ཅིག །འཕགས་པ་དཔལ་དང་ལྡན་པ་འཇམ་དཔལ་གསུང་གི་མངའ་བདག་གི་སྒྲུབ་ཐབས་རྫོགས་སོ། །