གསུང་གི་མངའ་བདག་གི་སྒྲུབ་ཐབས།
རྒྱ་གར་སྐད་དུ། ཝཱ་གཱི་རཱ་ཊ་སཱ་དྷ་ནཾ། བོད་སྐད་དུ། གསུང་གི་མངའ་བདག་གི་སྒྲུབ་ཐབས། སྔགས་པས་རེ་ཞིག་ཐོག་མ་ཉིད་དུ་ས་གཞིའི་ཆ་དྲི་ཞིམ་པོས་ཉེ་བར་བྱུགས་པ་དང༌། མེ་ཏོག་སྣ་ཚོགས་ཀྱིས་ཀྱང་ལེགས་པར་བཀང་ལ། དེའི་དབུས་སུ་སྟན་བདེ་བ་ལ་ལེགས་པར་གནས་ཏེ། གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་པར་བྱའོ། །དེའི་ཕྱི་ནས་ནི་རང་གི་སྙིང་གར་ཡི་གེ་ཨ་བལྟ་བར་བྱའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཡི་གེ་མུཿ་རྣམ་པར་བསམ་པར་བྱའོ། །ཡི་གེ་མུཿ་དེ་ལས་བྱུང་བའི་ཁ་དོག་ལྔ་དང་ལྡན་པའི་འོད་ཟེར་གྱི་ཚོགས་རྣམས་རང་གི་བ་སྤུའི་བུག་རྣམས་ནས་སྤྲོ་བར་བྱ་སྟེ། འོད་ཟེར་དེ་དག་རྣམས་ཀྱིས་ཀྱང་འཇམ་པའི་དབྱངས་ཀྱི་སྐུས་ནམ་མཁའ་གང་པར་བལྟ་བར་བྱའོ། །དེ་ནས་དེ་དག་རྣམས་མེ་ཏོག་ལ་སོགས་པས་མཆོད་པར་བྱ་བའོ། །དེ་ནས་དེའི་རྗེས་ལ་སྡིག་པ་བཤགས་པ་དང་བསོད་ནམས་ལ་རྗེས་སུ་ཡི་རང་བ་དང༌། སྨོན་ལམ་ལ་སོགས་པ་རྣམས་བྱ་བའོ། །དེ་ནས་ཚངས་པའི་གནས་བཞི་བསྒོམ་པར་བྱ་བའོ། །ཕྱིས་དེ་དག་རྣམས་ཐམས་ཅད་ཀྱང་སྟོང་པ་ཉིད་དུ་བསྒོམས་ཏེ། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ་ཞེས་སྔགས་བརྗོད་པར་བྱའོ། །དེ་ནས་ཡང་རང་གི་སྙིང་གར་ཡི་གེ་ཨ་བལྟ་བར་བྱའོ། །དེ་ཡོངས་སུ་སྨིན་པས་ཟླ་བའི་དཀྱིལ་འཁོར་རོ། །དེའི་དབུས་ན་ཡི་གེ་མུཿའོ། །དེ་དག་ཡོངས་སུ་གྱུར་པ་ལས་འཇམ་པའི་དབྱངས་ཀྱི་སྐུར་བདག་ཉིད་བལྟ་བར་བྱ་སྟེ།
སེང་གེ་ལ་བཞུགས་པ། །གསེར་གྱི་མདོག་ཏུ་སེར་བའི་སྐུ་རྒྱན་ཐམས་ཅད་ཀྱིས་བརྒྱན་པ་ཕྱག་ཆོས་བཤད་པའི་ཕྱག་རྒྱས་བྲེལ་ཅིང་གཡོན་ངོས་ན་ཨུཏྤལ་འཛིན་པ་མི་བསྐྱོད་པས་དབུ་བརྒྱན་ཅིང༌། གཡས་ཕྱོགས་ན་གཞོན་ནུ་ནོར་བཟངས། གཡོན་དུ་ནི་གཤིན་རྗེའི་གཤེད་བལྟ་བར་བྱ་བ་ཡིན་ནོ། །བསྒོམས་པས་དུབ་ན་སྔག་བཟླས་པར་བྱ་བ་ནི། ཨོཾ་ཝཱ་གཱི་ཤྭ་རི་མུཿ་གསུང་གི་མངའ་བདག་གི་སྒྲུབ་ཐབས་རྫོགས་སོ།། །།ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །