སྤྲོས་པ་མེད་པའི་སྒྲུབ་ཐབས།
རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། སྤྲོས་པ་མེད་བའི་སྒྲུབ་ཐབས། ཟླ་བ་ལྟ་བུར་ཤིན་ཏུ་དངས་ཤིང་རལ་གྲི་གླེགས་བམ་ཕྱག་ན་བསྣམས། །ཤིན་ཏུ་ཞི་ཞིང་གཞོན་ནུ་ཟུར་ཕུད་ལྔ་པ་མཆོག་ཏུ་ཡིད་འོང་བ། །དགའ་བ་རྒྱ་ཆེན་ཐར་པ་མཆོག་གི་སྤྱན་ནི་དཀྱུས་རིང་པདྨའི་བདག །བློ་གྲོས་དམན་པ་བསྲེག་མཁས་འཇམ་དབྱངས་ལ་ནི་ལེགས་པར་ཕྱག་འཚལ་ལོ། །གང་གིས་ཐོགས་ཀྱང་སྐྱེ་འདིར་ཨ་ར་པ་ཙན་ནི་ལེགས་གྲུབ་ཕྱིར། །ཤིན་ཏུ་ཉུང་དུས་འཁོར་ལོ་རིན་ཆེན་དག་གིས་གདམས་ངག་བདག་གིས་བྱ། །བར་ཆད་མེད་པར་མངོན་པར་བརྩོན་པས་ལོ་ཕྱེད་དག་ནི་བསྒོམས་གྱུར་ན། །ཚིག་རྐང་མ་ལུས་རྣམ་རིག་བློ་ལྡན་པ་ཡི་བློ་ཡི་མཆོག་ཉིད་ཐོབ། །སྔགས་རིག་ས་ཡི་ཆ་ནི་མཉམ་ཞིང་གཙང་ལ་ཤིན་ཏུ་ཡིད་འོང་བར། །དྲི་ཞིམ་ཆུ་ཡིས་ཉེར་བཏབ་དྲི་བཟངས་མེ་ཏོག་སིལ་མར་བཀྲམ་བྱ་སྟེ། །ཤིན་ཏུ་འཇམ་ཞིང་དགའ་བར་གྱུར་བའི་སྟན་འགའ་ཞིག་ལ་ཉེར་གནས་པ། །བདེ་བའི་བློ་ཡིས་མཚན་མ་མེད་པར་བྱང་ཆུབ་སེམས་ནི་བསྒོམ་པར་བྱ། །རང་བཞིན་དག་པའི་སྔགས་ནི་ཀུན་དུ་གསལ་བྱས་ལ། །ཐམས་ཅད་མ་ལུས་སྟོང་པ་ཉིད་དུ་རྣམ་པར་བསྒོམ། །ཡང་ནི་དངོས་པོ་རྣམས་དང་ལྷན་ཅིག་བདག་ཉིད་ལུས། །འོད་གསལ་ཉིད་དུ་སྐད་ཅིག་ཁོ་ནར་བལྟ་བར་བྱ། །དེ་ནས་ནམ་མཁར་རང་སྙིང་ཟླ་བའི་དཀྱིལ་འཁོར་ནི། །དབྱངས་ཀྱང་དང་པོ་འབར་བ་ལས་ནི་རྣམ་བསྒོམ་བྱ། །དེ་ནས་འདི་ལ་ཡིད་དཀར་དྷཱིཿ་ནི་ངེས་བལྟས་ལ། །དེ་ལས་འཇམ་དབྱངས་དྲི་མ་མེད་པར་རྟོགས་བྱ་སྟེ། །གཅིག་ཏུ་བསམ་གཏན་ལ་གཞོལ་པདྨའི་སྟེང་གནས་པ། །ཐམས་ཅད་རྒྱན་རྣམས་ཀྱིས་ནི་མཆོག་ཏུ་འབར་གྱུར་ཅིང༌། །ཆགས་བྱས་ཅུང་ཟད་བཞད་པར་མཛད་
པས་ཡིད་འོང་བ། །ཟླ་བ་བྱེ་བའི་འོད་ལྡན་དབུས་སུ་དགོད་པར་བྱ། །རང་གི་སྙིང་ག་དག་ཏུ་ཡི་གེ་ཨ་མཆོག་རྣམ་པར་སྤྲོས་ལེགས་བལྟ། །མཚུངས་མེད་འོད་ཀྱི་དྲ་བ་དང་ལྡན་འཁོར་ལོའི་གཟུགས་ནི་རྩིབས་བརྒྱད་པ། །དེ་ཡི་སྟེང་དུ་ཟླ་བའི་དཀྱིལ་འཁོར་སྔགས་པ་དེས་ནི་བསྒོམ་བྱས་ལ། །ཟླ་བ་བཞིན་དུ་ཤིན་ཏུ་དཀར་བར་གྱུར་པའི་དབྱངས་ཉིད་དོ། །གྲུ་གསུམ་པདྨ་རྒྱས་དག་སྤྱན་མངའ་མཛེས་པའི་གཟུགས་ལྡན་མ། །དཀུ་གཉིས་ཤིན་ཏུ་ལེགས་པའི་སྐྲ་ཅན་མ་ནི་གཡས་སུ་བལྟ་བར་བྱ། །གཡོན་དུ་ཉེ་བའི་སྐྲ་ཅན་ཡིད་འོད་ལུས་ནི་འགྱིང་བག་དང་ལྡན་མ། །ཡོན་ཏན་མཐའ་དག་གཏེར་གྱུར་དེ་དག་ཙ་ན་གཉིས་ལས་བསྒོམ་པར་བྱ། ཤིན་ཏུ་དངས་བའི་ཉིད་ལས་བྱུང་དྲི་མེད་པའི། །དྲ་བའི་འོད་ནི་ངེས་པར་མདུན་དུ་གཡས་སུ་དགོད་པར་བྱ། །པ་ཡིག་ལས་བྱུང་འོད་ཀྱི་རང་བཞིན་ཡིད་འཕྲོག་པ། །ཟླ་འོད་དེ་ནི་རྒྱབ་ཏུ་བཞུགས་སུ་གསོལ་བ་ཡིན། །ཡང་ན་འབར་བའི་ཟླ་བ་དག་ལ་ཡི་གེ་ནི། །རྒྱ་ཆེན་གཟི་བརྗིད་དང་ལྡན་རྣམ་པར་བསྒོམ་བྱ་ཞིང༌། །གཏི་མུག་བྲག་ཆེན་དག་ནི་རྣམ་པར་འཇོམས་བྱེད་ཅིང༌། །ཆོག་ཤེས་རྙོག་པ་མེད་པ་དེ་ཡང་བྱེད་པ་ཡིན། །གཏི་མུག་མུན་སྟུག་མ་ལུས་རྣམ་པར་འཇོམས་བྱེད་པའི། །འོག་ཏུ་འཁོར་ལོ་ཉུང་དུ་འཁོར་བར་རྣམ་པར་བསམ། །ཟླ་བའི་གཟུགས་ནི་རྒྱ་ཆེན་འོད་ཟེར་དྲ་བ་ཅན། །ལྷ་དང་བཅས་པ་རྣམས་ཀྱིས་མི་གཡོ་བལྟ་བྱ་སྟེ། །ཟླ་བ་ལས་ནི་ཕལ་ཆེན་འོད་ཟེར་སྤྲིན་གྱི་ཚོགས། །ཀུན་ནས་བཀྱེ་ལ་ཕྱོགས་བཅུ་རྣམས་ནི་གསལ་བྱས་བལྟ། །སེམས་ཅན་དག་བྱས་དེ་བཞིན་བདག་ཉིད་ཀྱི་ཡང་ལུས། །ཐ་མར་ཕྱིར་འོངས་ཟླ་བ་ལས་ནི་ལེགས་པར་བཞུགས། །ཁ་བློ་བརྟན་ཞིང་གདམས་བས་དམ་པ་ཨ་ར་པ་ཙ་ཡི་སྔགས། །ལེགས་པར་ཟློ་དང་སྒོམ་པར་བྱེད་པའི་སྔགས་པས་དུས་རྣམས་ནི། །མཆོག་ཏུ་དྲི་མེད་ཡིད་འོང་ཕ་རོལ་ཕྱིན་པ་དང་ནི་གཞན་དག་ཀྱང༌། །ཡིད་གཉིས་སྐྱོན་རྣམས་ཐམས་ཅད་གཏན་ནས་སྤངས་པའི་རྒྱལ་བ་རྣམས་ཀྱིས་འཐོབ། །དམ་ཆོས་མཛོད་ཀྱི་རབ་གྱུར་བླ་མའི་མཆོག་ནི་དགའ་བའི་རྡོ་རྗེ་ཡིས། །བདེ་གཤེགས་ཚོགས་ཀྱི་སྤྱན་སྔར་ཆོ་ག་བཞིན་དུ་དང་པོར་དབང་བསྐུར་བའི། །བློ་བཟངས་སྒོ་བྱེད་བཤེས་གཉེན་དེས་ནི་ལེགས་སྡེ་བས་ཨ་ར་པ་ཙ་ན། །འཁོར་ལོ་དམ་པ་གང་ཕྱིར་
རྟོགས་པ་སྐྱེ་བ་འདི་ལ་གྲུབ་དོན་ནོ། །ཆོ་ག་བཟང་པོས་འཁོར་ལོ་ལེགས་སྤེལ་ལས་བྱུང་བའི། །ཀུན་ནས་རྣམ་ཡངས་བསོད་ནམས་བདག་གིས་གང་ཐོབ་དེས། །འཇིག་རྟེན་མཐའ་དག་སྡིག་པ་ཀུན་ལས་རྣམ་རྒྱལ་ནས། །འཇམ་དབྱངས་བདེ་བ་དམ་པར་གཅིག་ཏུ་ངེས་གྱུར་ཅིག །སྤྲོས་པ་མེད་པའི་སྒྲུབ་ཐབས་རྫོགས་སོ།། །།ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །