ངག་གི་དབང་ཕྱུག་གི་སྒྲུབ་ཐབས།
རྒྱ་གར་སྐད་དུ། ཝཱི་གཱི་ཤྭ་ར་སཱ་དྷ་ནཾ། བོད་སྐད་དུ། ངག་གི་དབང་ཕྱུག་གི་སྒྲུབ་ཐབས། །དེ་ཁོ་ན་བཞིན་དུ་སྟོང་པ་ཉིད་དུ་ལ་སོགས་པ་བསྒོམས་པའི་རྗེས་ལ་སྣ་ཚོགས་པདྨའི་སྟེང་དུ་ཟླ་བ་ལ་ཡི་གེ་ཨ་དཀར་པོ་ལས་བྱུང་པའི་དཔལ་ཆོས་ཀྱི་དབྱིངས་ཀྱི་ངག་གི་དབང་ཕྱུག་སྟེ། སྐུ་ཐམས་ཅད་དཀར་བ་ཞལ་བཞི་པ། ཕྱག་བརྒྱད་པ། སངས་རྒྱས་ལྔ་དང་རིན་པོ་ཆེའི་དབུ་རྒྱན་དང་ལྡན་པ། ལྷ་རྫས་ཀྱི་རྒྱན་དང་ན་བཟའ་མངའ་བ། སྒེག་པ་ལ་སོགས་པའི་ཉམས་དང་ལྡན་པའོ། །ཕྱག་གཉིས་ཆོས་བཤད་ཀྱི་ཕྱག་རྒྱས་མཚོན་པ་རལ་གྲི་དང་མདའ་དང་རྡོ་རྗེ་ནི་གཡས་པའི་ཕྱག་གསུམ་ནའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང༌། གཞུ་དང་རྡོ་རྗེ་དྲིལ་བུ་ནི་གཡོན་པའི་ཕྱག་གསུམ་ན་སྟེ། རྡོ་རྗེ་སྐྱིལ་མོ་ཀྲུང་དུ་བདག་ཉིད་རྫོགས་པར་བྱས་ལ། སྙིང་གར་ཟླ་བ་ལ་ཧཱུཾ་མཐིང་ནག་ལས་བྱུང་བའི་ས་བོན་དང་བཅས་པའི་རྡོ་རྗེ་ནི་ཕྱག་རྒྱ་ཆེན་པོའི་རང་བཞིན་ནོ། །སྨིན་མཚམས་སུ་ཡི་གེ་ཏཾ་སེར་པོ་ལས་ས་བོན་དང་བཅས་པའི་རིན་པོ་ཆེ་སྟེ་ཆོས་ཀྱི་ཕྱག་རྒྱའི་རང་བཞིན་ནོ། །མགྲིན་པར་ཡི་གེ་ཧྲཱིཿ་དམར་པོ་ལས་བྱུང་བའི་ས་བོན་དང་བཅས་པའི་པདྨ་ནི་དམ་ཚིག་གི་ཕྱག་རྒྱའི་རང་བཞིན་ནོ། །སྤྱི་བོར་ཡི་གེ་ཨཱཿ་ལྗང་གུ་ལས་བྱུང་པའི་ས་བོན་དང་བཅས་པའི་སྣ་ཚོགས་རྡོ་རྗེ་ནི་ལས་ཀྱི་ཕྱག་རྒྱའི་རང་བཞིན་ནོ། །ཕྱག་རྒྱ་བཞི་དང་ལྡན་པ་འདིར་བདག་ཉིད་རྣམ་པར་བསྒོམས་ལ། ཨོཾ་ཧཱུཾ་ཧྲཱིཿ་བྷ་ག་བཱ་ན་ཛྙཱ་ན་མཱ་རྟྟི་བཱ་གཱི་ཤྭ་ར་མ་ཧཱ་ཝཱ་ཙ་སརྦ་དྷ་རྨཱ་ག་ག་ནཱ་མ་ལ་སུ་བ་རི་ཤུདྡྷ་དྷ་རྨ་དྷཱ་ཏུ་ཛྙཱ་ན་གྲྒྷ་ཨཿ་བྱ་བའི་སྔགས་འདིས་བྱིན་གྱིས་བརླབ་པར་བྱའོ། །དེ་ནས་རྡོ་རྗེ་བཅིངས་ལ་གུང་མོ་གཉིས་ཀྱི་ཚིགས་གསུམ་པ་བཅག་པས་རལ་གྲིའི་རྣམ་པར་ལྟ་བུར་གཟུང་པར་བྱ་ཞིང་མཛུབ་མོ་གཉིས་བསླང་སྟེ། མཐེ་བོང་གཉིས་ཀྱིས་སྟོང་པ་བཀག་ལ་གཟུང་བར་བྱ་བ་འདི་ནི་དམ་ཚིག་གི་ཕྱག་རྒྱའོ། །དེ་ནས་རང་གི་ལྕེ་ལ་ཟླ་བ་ལ་གནས་པའི་ཡི་གེ་ཧྲཱིཿ་དམར་པོ་ས་བོན་གྱིས་བྱིན་གྱིས་བརླབས་པ་བསྒོམས་ལ་ཁྲོ་བོའི་ཚིག་གིས་སྔགས་བཟླས་པར་བྱ་བའོ། །དེ་ལ་བཟླས་པའི་སྔགས་ནི་འདི་ཡིན་ཏེ། ཨོཾ་བཛྲཱ་
ཏི་ཀྵྞ་དུཿ་ཁཙྪེད་པྲ་ཛྙཱ་ན་མུ་རྟ་ཡེ། ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ན་མཿ་གྲངས་བརྒྱ་རྩ་བརྒྱད་དུ་མཚན་བརྗོད་པས་ཀྱང་མཚན་ཡང་དག་པར་བརྗོད་པ་དུས་ཇི་ལྟ་པར་བཀླག་པར་བྱ་བ་ཡིན་ནོ། །ཆོས་ཀྱི་དབྱིངས་ཀྱི་དག་གི་དབང་ཕྱུག་གི་སྒྲུབ་ཐབས་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་པའོ། །