ངག་གི་དབང་ཕྱུག་གི་སྒྲུབ་ཐབས།
རྒྱ་གར་སྐད་དུ། བཱ་གཱི་ཤྭ་ར་སཱ་དྷ་ནཾ། བོད་སྐད་དུ། ངག་གི་དབང་ཕྱུག་གི་སྒྲུབ་ཐབས། །སྔར་བཤད་པའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་པདྨ་དང་ཟླ་བ་ལ་གནས་པའི་ཡི་གེ་ཧོཿ་དམར་པོ་ཡོངས་སུ་གྱུར་པ་ལས་ཞབས་བཞི་ཕྱག་བརྒྱད་པ་སྟེ། རྩ་བའི་ཞལ་ནི་དམར་སྐྱའོ། །ལྷོ་ནི་གུར་གུམ་དང་སྐྱ་རེངས་ཀྱིའོ། །ནུབ་ནི་པདྨ་རཱ་གའིའོ། །བྱང་ནི་དམར་སེར་རོ། །གཉིས་ཀྱིས་ནི་མདའ་གཞུ་བསྣམས་པའོ། །གཞན་གཉིས་ཀྱིས་ནི་ཞབས་པ་དང་ལྕགས་ཀྱུ་བསྣམས་པའོ། །གཞན་གཉིས་ནི་ཤེས་རབ་ཀྱི་ཕ་རོལ་དུ་ཕྱིན་པའི་བ་ཏི་དང་རལ་གྲི་བསྣམས་པའོ། །དེ་བཞིན་དུ་གཞན་གཉིས་ཀྱིས་ནི་རྡོ་རྗེ་དང་དྲིལ་བུ་བསྣམས་པའོ། །ཆགས་པ་ཆེན་པོའི་འཇོ་སྒེག་གི་རོ་མྱོང་པའི་འོད་ཟེར་གྱིས་མཆོག་ཏུ་འབར་བ། རོལ་པས་སྣ་ཚོགས་པདྨ་དང་ཟླ་བའི་གདན་ལ་བཞུགས་པ། ལྷའི་ན་བཟའ་བརྒྱད་དང་ལྡན་པ་རོལ་པ་དང་ཅོད་པན་ལ་སྣང་བ་མཐའ་ཡས་དང་ལྡན་པའོ། །སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་སེམས་དཔའ་རང་དབང་གིས་ལེགས་པར་གཞུག་ལ། སྔགས་བཟླས་པར་བྱ་བའོ། །ཨོཾ་མ་ཧཱ་རཱ་ག་ཡ་སརྦ་སཏྭ་ན་ཧོཿ་ཞེས་བྱ་བ་འདི་ནི་ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་སྒྲུབ་ཐབས་ལས་དབང་དུ་བྱ་བའི་ཆོ་གའོ། །ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །།རྒྱ་གར་སྐད་དུ། བཱ་གཱི་ཤྭ་ར་སཱ་དྷ་ནཾ། བོད་སྐད་དུ། ངག་གི་དབང་ཕྱུག་གི་སྒྲུབ་ཐབས། དེ་ཁོ་ན་ཉིད་བཞིན་དུ་སྟོང་པ་ཉིད་བསྒོམས་པའི་རྗེས་ཐོགས་ལ་ཆུའི་དཀྱིལ་འཁོར་ལ་པདྨ་དཀར་པོ་འདབ་མ་བརྒྱད་པའི་ལྟེ་པར། ཆོས་ཐམས་ཅད་ནི་འཆི་བ་ལས་ཀུན་ནས་བཟླས་པར་བྱའོ། །ཞེས་ལྷགས་པར་མོས་པར་བྱས་པས་ཟླ་བ་ལ་གནས་པའི་ཡི་གེ་ཨཾ་དཀར་པོ་ཡོངས་སུ་གྱུར་པ་ལས། དཀར་པོ་ཞལ་གཅིག་ཕྱག་གཉིས་པ་རྡོ་རྗེ་སྐྱིལ་མོ་ཀྲུང་གི་སྟེང་ན་ཕྱག་མཉམ་པར་གཞག་པའི་ཕྱག་རྒྱ་མཛད་ཅིང༌། གཞོན་ནུའི་རྒྱན་མ་
ལུས་པ་རྣམས་ཀྱིས་བརྒྱན་པ། ཟུར་ཕུད་ལྔ་དང་ལྡན་པའི་རྗེ་བཙུན་འཇམ་དཔལ་གྱི་སྐུར་བདག་ཉིད་སྐད་ཅིག་གིས་རྫོགས་པར་བྱས་ཏེ། རང་གི་སྙིང་གའི་ཟླ་བ་དང་པདྨའི་སྟེང་དུ་ཡི་གེ་ཁཾ་ལས་བྱུང་བའི་དུང་ངོ༌། །དེའི་དབུས་སུ་ཨོཾ་བཛྲ་ཧཱ་རཾ་ཞེས་བྱ་བས་རྡོ་རྗེ་ལྕེའོ། །ལྕེའི་སྟེང་དུ་པདྨ་དམར་པོའོ། དེའི་སྟེང་དུ་སངས་རྒྱས་སྣང་བ་མཐའ་ཡས་རྣམ་པར་བསམས་ལ། ཁ་འོག་ཏུ་བལྟས་ནས་བདུད་རྩི་འབབ་པའི་ཡི་གེ་བཾ་དཀར་པོ་རང་ཉིད་ཀྱི་རྐན་གྱི་ཕྱོགས་སུ་བསྒོམ་པར་བྱའོ། །ཨོཾ་བཱ་ཀྱེ་དཾ་ན་མཿ་བྱ་བ་ནི་བཟླས་པའི་སྔགས་སོ། །འདི་ནི་ཕན་ཡོན་ཆེན་པོ་དང་ལྡན་པ་སྟེ། ཆོས་ཀྱི་དུང་གི་ཏིང་ངེ་འཛིན་ཐོབ་པར་བྱེད་པ་ཆོས་ཀྱི་དབྱིངས་ཀྱི་ངག་གི་དབང་ཕྱུག་གི་སྒྲུབ་ཐབས་སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །