འཇམ་དཔལ་གྱི་སྒྲུབ་ཐབས།
རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། འཇམ་དཔལ་ལ་ཕྱག་འཚལ་ལོ། །ཁ་དོག་དམར་པོ་རབ་འབར་འོད་ཟེར་ཕུང་པོ་ཅན། །འཇམ་པའི་རྡོ་རྗེའི་སྐུ་ནི་ཆོ་ག་བཞིན་བསྐྱེད་དེ། །དབྱངས་ཡིག་བཅུ་དྲུག་པོ་ནི་ཡང་དག་རྫོགས་པ་ལས། །སྙིང་གི་པདྨའི་དབུས་སུ་རྡོ་རྗེ་ལེགས་པར་བསམ། །མེ་ཏོག་བནྡྷུ་ཀ་ཡི་ཁ་དོག་དང་མཚུངས་གཟུགས། །ངེས་པར་དམིགས་བྱ་རྐང་དྲུག་པ་ཞེས་གྲགས་གྱུར་པ། །དབུགས་འབྱུང་རླུང་དག་གིས་ནི་དལ་གྱིས་མ་ལུས་པར། །རྒྱུ་བར་བྱེད་ཅིང་གཉིད་ཀྱང་སད་པ་ཉིད་བྱས་ནས། །བསྒྲུབ་བྱ་མདུན་ན་གནས་པ་ལེགས་པར་བསམ་བྱ་ཞིང༌། །ཐལ་སྦྱར་མིག་གཉིས་ལ་ནི་བུང་བའི་སྒྲ་བསྒྲགས་ནས། །བུང་བ་དེ་ནི་སྣ་སྒོ་གཉིས་ཀྱི་བུ་ག་ལས། །བསྒྲུབ་བྱ་སྐལ་ལྡན་སྙིང་ལ་རྣམ་པར་འཇུག་པ་ཡིན། །དབང་དུ་བྱེད་པའི་འཇམ་དཔལ་གྱི་སྒྲུབ་ཐབས་སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །།རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། སྔར་བཤད་པའི་ཆོ་གས་ཡི་གེ་མུཿ་སེར་པོ་ཡོངས་སུ་གྱུར་པ་ལས་འཇམ་དཔལ་གཞོན་ནུར་གྱུར་པ་ཞལ་གསུམ་ཕྱག་དྲུག་པ་སྟེ། ཞལ་གུར་གུམ་འོད་ཀྱི་མདོག་དང༌། གཡས་པ་དང་ཅིག་ཤོས་ནི་སྣོན་པོ་དང་དཀར་པོ། སེམས་དཔའི་སྐྱིལ་ཀྲུང་གིས་བཞུགས་པ། གཡས་པའི་ཕྱག་གསུམ་ནི་རལ་གྲི་དང༌། མདའ་དང་མཆོག་སྦྱིན་པ་དང་ལྡན་ལ། གཡོན་པའི་ཕྱག་གསུམ་ན་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དང༌། གཞུ་དང༌། ཨུཏྤལ་སྔོན་པོས་བྲེལ་ཞིང༌། སྒེག་པའི་ཉམས་བག་དང་ལྡན་པའི་གཞོན་ནུའི་རྒྱན་དང༌། ན་བཟའ་ལ་སོགས་པ་ཅན། མེ་ཏོག་ལ་སོགས་པས་མཛེས་པ་ཆེན་པོར་གྱུར་པའི་ཟུར་ཕུད་གསུམ་གྱིས་རྣམ་པར་མཛེས་པ། དེ་བཞིན་གཤེགས་པའི་རྡུལ་ཕྲ་རབ་ལས་གྲུབ་པར་བདག་ཉིད་བསྒོམས་ལ། ཨོཾ་མུཿ་ཞེས་བྱ་བའི་སྔགས་འདི་བཟླས་པར་བྱ་བའོ། །འཇམ་དཔལ་གྱི་སྒྲུབ་ཐབས། །ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །