འཕགས་མ་སྒྲོལ་མའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཏཱ་ར་སཱ་དྷ་ནཾ། བོད་སྐད་དུ། འཕགས་མ་སྒྲོལ་མའི་སྒྲུབ་ཐབས། སྔར་བཤད་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ། ཡི་གེ་ཨཱཿ་དམར་པོ་ལས་བྱུང་བའི་པདྨ་དམར་པོའི་སྟེང་དུ་ཡི་གེ་ཏཱཾ་དཀར་པོ་ལས་སྐྱེས་པའི་པདྨའི་སྣོད་དུ་ཉི་མ་ལ་གནས་པའི་ཡི་གེ་ཧཱུཾ་མཐིང་ནག་ལས་བྱུང་བའི་གྲི་གུག་ས་བོན་དང་བཅས་པ་ཡོངས་སུ་གྱུར་པ་ལས་
རྗེ་བཙུན་མ་འཕགས་མ་སྒྲོལ་མ་ནག་མོ་སྟེ་ཞལ་གཅིག་མ་སྤྱན་གསུམ་མངའ་བ། ཕྱག་བཞི་མ། གསུས་པ་འཕྱང་བ་ཞལ་མཆེ་བ་གཙིགས་པ། གཡས་བསྐུམས་པའི་ཞབས་ཀྱིས་རོ་མནན་པ། ཀླུ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། མགོ་བོའི་ཕྲེང་བ་འཕྱང་བར་གྱུར་པ། ཕྱག་རྒྱ་ལྔས་རྣམ་པར་བརྒྱན་པ། ཕྱག་གཡས་པ་དག་གིས་རལ་གྲི་དང་གྲི་གུག་བསྣམས་པ། ཕྱག་གཡོན་པ་དག་གིས་ཨུཏྤལ་དང་ཐོད་པ་བསྣམས་པ། མི་བསྐྱོད་པའི་དབུ་གནོན་དང་ལྡན་ཞིང་རལ་པ་སེར་པོ་དང་ལྡན་པ། ཤིན་ཏུ་སྐྲག་པར་བྱེད་པའི་གད་མོ་ཆེར་སྒྲོགས་པ། འཇིགས་སུ་རུང་བའི་གཟུགས་སུ་རྫོགས་པར་བྱས་ལ། ཧྲིཾ་ཧྲིཾ་ཧཱུཾ་ཕཊ་ཅེས་བྱ་བའི་སྔགས་འདི་དུག་དང༌། ཤེས་རབ་ཀྱི་དབང་དུ་བྱས་ལ་བཟླས་པར་བྱ་བའོ། །རལ་གྲིའི་གནས་སུ་སྒྲེན་པོ་ཡིས། །མི་རུས་ཕྲེག་བ་བསྒོམ་བྱས་ལ། །སྤྲོ་དང་བསྡུ་བའི་སྦྱོར་བ་ཡིས། །བླ་མེད་གསང་སྔགས་བཟླས་པར་བྱ། །ཞེས་བྱ་བའོ། །རྒྱ་ནག་ཆེན་པོའི་ལུགས་ཀྱི་འཕགས་མ་སྒྲོལ་མའི་སྒྲུབ་ཐབས་སོ། །མཁས་པ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །