སྒྲོལ་མ་དུག་སེལ་བའི་སྒྲུབ་ཐབས།
རྒྱ་གར་སྐད་དུ། ཛཱཾ་གུ་ལི་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དུག་སེལ་བའི་སྒྲུབ་ཐབས། སྒྲོལ་མ་དུག་སེལ་མ་ལ་ཕྱག་འཚལ་ལོ། །དུག་སེལ་མ་ཡི་གཟུགས་འཛིན་མའི། །བཅོམ་ལྡན་སྒྲོལ་མ་ལ་བཏུང་ནས། །སེམས་ཅན་རྣམས་ལ་སྙིང་བརྩེ་བས། །བྲི་བྱ་དེ་རབ་སྒྲུབ་བྱེད་ཐབས། །དང་པོར་རེ་ཞིག་སྔགས་པས་གཙང་མར་ཁྲུས་བྱས་ཤིང་གོས་དང་ཕྲེང་བ་དཀར་པོ་དང་ལྡན་པས་དབེན་པའི་ས་ཕྱོགས་ལེགས་པར་བྱུགས་པར་དྲི་དཀར་པོ་ཤིན་ཏུ་ཞིམ་པས་ཆག་ཆག་བཏབ་ཅིང༌། མེ་ཏོག་དཀར་པོའི་བྱེ་བྲག་རྣམས་ཀྱིས་སིལ་མར་བཀྲམ་པར་བདེ་བའི་སྟན་ལ་ཉེ་བར་གནས་ཏེ། སྐྱེ་དགུ་ལ་བྱམས་པ་དང་སྙིང་རྗེ་ཡང་རྣམ་པར་བསྒོམས་ལ། ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་བདག་ཡིན་ནོ་ཞེས་བརྗོད་པར་བྱའོ། །དེ་ནས་སྟོང་པ་ཉིད་མངོན་དུ་བྱས་ལ། ཡི་གེ་པཾ་དཀར་པོ་ལས་བྱུང་བའི་པདྨ་དཀར་པོ་འདབ་མ་བརྒྱད་པ། དེའི་སྟེང་དུ་ཡི་གེ་ཨ་ལས་སྐྱེས་པའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿདྐར་པོ་འོད་ཟེར་གྱི་ཚོགས་དུ་མ་སྤྲོ་བར་བྱེད་པ་བསམ་པར་བྱ་བའོ། །དེ་དག་ལས་བྱུང་བའི་བཅོམ་ལྡན་འདས་མ་དུག་སེལ་མ་བསྒོམ་པར་བྱ་སྟེ། སྐུ་མདོག་དཀར་བ། ཕྱག་བཞི་མ་རལ་པ་དང་དབུ་རྒྱན་དང་ལྡན་པ་འོད་ཟེར་དཀར་པོ་དང་སྟོད་གཡོགས་དང་ལྡན་པ། རིན་པོ་ཆེ་དཀར་པོའི་རྒྱན་དང་ལྡན་པ། སྤྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པའོ། །
རྩ་བའི་ཕྱག་གཉིས་ཀྱིས་ནི་པི་ཝང་སྦྲེང་བར་མཛད་དོ། །ཕྱག་གཡས་པ་དང་གཡོན་པ་གཉིས་ཀྱིས་ནི་སྤྲུལ་དཀར་པོ་བསྣམས་པས་མི་འཇིགས་པའི་ཕྱག་རྒྱ་མཛད་པ་སྟེ། ཟླ་བའི་འོད་ཟེར་གྱི་ཕྲེང་བ་ལྡན་པ་བསྒོམ་པར་བྱ་བའོ། །མགོ་བོ་དང་མགུལ་བ་དང་ནུ་མའི་བར་དུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨཱཿཧྲཱིཿ་ཧཱུཾ་རྣམས་ཇི་སྲིད་མི་སྐྱོ་བའི་བར་དུ་རྣམ་པར་བསྒོམ་པར་བྱ་བའོ། །དེའི་རྗེས་ལ་སྔགས་བཟླས་པར་བྱ་བ་ནི་ཧྲཱིཿསྟེ་འབུམ་ཕྲག་བདུན་བཟླས་པར་བྱ་བའོ། །རྒྱན་དཀར་པོ་དང་ལྡན་པ་དག་གིས་མེ་ཏོག་དཀར་པོ་ཁྲི་ཕྲག་བདུན་སྦྱིན་སྲེག་བྱའོ། །དེ་ནས་བྱ་ཁྱུང་གི་དབང་ཕྱུག་གི་ནུས་པ་དང་སྙན་དངགས་དང་བསྟན་བཅོས་ཐམས་ཅད་ལ་མཁས་པར་ཡང་འགྱུར་བ་ཡིན་ནོ། །འཕགས་མ་དུག་སེལ་མ་སྒྲོལ་མའི་སྒྲུབ་ཐབས་ཡོངས་སུ་རྫོགས་སོ།། །།ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །