སྒྲོལ་མ་ནོར་སྦྱིན་མའི་སྒྲུབ་ཐབས།
རྒྱ་གར་སྐད་དུ། དྷ་ན་དཱ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་ནོར་སྦྱིན་མའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །སྒྲོལ་མ་ལྗང་གུ་ཞལ་གཅིག་ཕྱག་བཞི་མ། །སྤྱན་གཉིས་དང་ལྡན་ཀུན་དུ་དགའ་མཛད་མ། །ངག་གི་དཀྱིལ་འཁོར་གྱི་ནི་འཁོར་ལོའི་ཡང༌། །ལྷ་མོ་བཅུ་གཉིས་ཀྱང་ནི་སྤྱན་གཉིས་མ། །ཁྱད་པར་འཕགས་དང་རྙེད་པར་དཀའ་བ་ཡི། །བཅོམ་ལྡན་འདས་མ་འཕགས་མ་སྒྲོལ་མ་ཡི། །ནོར་སྦྱིན་མ་ཡི་རིམ་པའི་སྒྲུབ་པའི་ཐབས། །མདོར་བསྡུས་པ་ནི་ལེགས་པར་བདག་གིས་བཤད། །རྣལ་འབྱོར་པས་ནང་པར་སྔ་མོར་བྱང་ཆུབ་ཏུ་སེམས་བསྐྱེད་ལ། རང་གི་སྙིང་གར་ཡི་གེ་ཏཱཾ་སྔོན་པོ་བལྟ་སྟེ། གདོང་བཀྲུ་བ་ལ་སོགས་པ་བྱས་ནས། ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་བདག་ཡིན་ནོ་ཞེས་བརྗོད་ལ། ཨོཾ་ཨ་མྲྀ་ཏེ་ཧཱུཾ་ཕཊ་ཅེས་བྱ་བ་འདི་དང༌། སེ་གོལ་གྱིས་ཕྱོགས་བཅུའི་བགེགས་རྣམས་ཚར་བཅད་ལ། རང་གི་སྙིང་གར་ཡི་གེ་པཾ་ལས་བྱུང་བའི་པདྨ་དམར་པོའི་སྟེང་དུ་ཡི་གེ་ཨཾ་གིས་བསྐྱེད་པའི་ཟླ་བ་ལ་གནས་པར་རང་ཉིད་ཀྱི་ས་བོན་རྣམ་པར་བསྒོམས་ཏེ། དེ་ལས་སྤྲོས་པས་སྤྱན་དྲངས་པའི་བླ་མ་
དང། སངས་རྒྱས་དང་བྱང་ཆུབ་སེམས་དཔའ་ནམ་མཁའ་ལ་གནས་པ་རྣམས་ལེགས་པར་མཆོད་ཅིང༌། སྡིག་པ་བཤགས་པ་ལ་སོགས་པ་རྣམས་ཀྱང་ཆོག་བཞིན་དུ་བྱས་ཤིང༌། སྟོང་པ་ཉིད་ཀྱང་བསྒོམས་ཏེ། བྱིན་གྱིས་ཀྱང་བརླབས་ལ། མདུན་དུ་ཡི་གེ་ར་དམར་པོ་ཡོངས་སུ་གྱུར་པ་ལས་ཉི་མ་ལ་གནས་པའི་ཡི་གེ་ཧཱུཾ་ནག་པོ་ལས་བྱུང་བའི་སྣ་ཚོགས་རྡོ་རྗེ་རྣམ་པར་བལྟས་ཏེ། དེ་ལས་རྡོ་རྗེ་འཕྲོས་པས་རྡོ་རྗེའི་ས་གཞི་དང༌། རྡོ་རྗེའི་ར་བ་དང༌། རྡོ་རྗེའི་གུར་བསྒོམ་པར་བྱ་བའོ། །དེ་ནས་སྣ་ཚོགས་རྡོ་རྗེའི་ལྟེ་བ་ལ་ཡི་གེ་པ་དམར་པོ་ལས་བྱུང་བའི་པདྨའི་སྟེང་དུ་ཡི་གེ་ཨ་ལས་བྱུང་བའི་ཟླ་བ་ལ་གནས་པའི་བྷྲཱུཾ་དཀར་པོ་དང་བ་ཡོངས་སུ་གྱུར་པ་ལས་འཁོར་ལོ་དཀར་པོ་དབུས་ན་ཡི་གེ་བྷྲཱུཾ་གནས་པ་དམིགས་ལ། པདྨ་དང་ཟླ་བ་དང་འཁོར་ལོ་དང་ས་བོན་རྣམས་ཡོངས་སུ་གྱུར་པས་བསྐྱེད་པའི་གཞལ་ཡས་ཁང་སྟེ། ཐམས་ཅད་ཀྱང་རིན་པོ་ཆེ་ལས་གྱུར་པ་གྲུ་བཞི་པ་ལ་སོགས་པའི་ཡོན་ཏན་རྣམས་དང་ལྡན་པ། རིམ་པ་གཉིས་པ་ནང་རིམ་གྱི་ལྟེ་བ་ལ་གནས་པའི་པདྨ་འདབ་མ་བརྒྱད་པའི་སྙིང་པོ་ལ་ཟླ་བ་ཚེས་པས་ཉེ་བར་མཛེས་པར་བྱས་པ། སྒོ་བཞི་ན་གནས་པའི་ཉི་མ་བཞི་ཤིན་ཏུ་འོད་འཕྲོ་བར་བལྟ་བར་བྱའོ། །དེ་ནས་དབུས་ཀྱི་ཟླ་བའི་སྟེང་དུ་ས་བོན་གྱི་ཡི་གེ་དེ་ཉིད་དོ། །དེ་ནས་འོད་སྤྲོ་བ་དང་བསྡུ་བའོ། །དེ་ནས་ས་བོན་དེ་ལས་བཅོམ་ལྡན་འདས་མ་སྒྲོལ་མར་བདག་ཉིད་བསྒོམ་པར་བྱ་སྟེ། ཟླ་བའི་གདན་དང་འོད་ཟེར་དང་ལྡན་ཞིང་ཞི་བ་སེམས་དཔའི་སྐྱིལ་མོ་ཀྲུང་གིས་བཞུགས་པ། སྐུ་མདོག་ལྗང་སྔོན་ཞལ་གཅིག་མ། སྤྱན་གཉིས་ཕྱག་བཞི་མ། ཕྲེང་བ་དང༌། མཆོག་སྦྱིན་པ་དང༌། ཨུཏྤལ་དང༌། པོ་ཏི་བསྣམས་པ། སྣ་ཚོགས་པའི་རྒྱན་དང་ན་བཟའ་དང་ལྡན་པའོ། །དེ་ནས་ཨོཾ་ནི་མགོ་ལའོ། །ཏཱ་ནི་དཔྲལ་བར་རོ། །རེ་ནི་མིག་གཉིས་ལའོ། །ཏུ་ནི་མགུ་ལ་པར་རོ། །ཏྟཱ་ནི་ངག་ལའོ། །རེ་ནི་སྙིང་ལའོ། །ཏུ་ནི་ལྟེ་བར་རོ། །རེ་ནི་གསང་བར་རོ། །སྭཱ་ནི་པུས་མོ་གཉིས་ལའོ། །ཧཱ་ནི་རྐང་པ་གཉིས་ལ་དགོད་པར་བྱའོ། །སྙིང་གར་ཟླ་བ་དང་པདྨ་ལ་གནས་པའི་ས་བོན་གྱི་འོད་ཟེར་གྱིས་ལེགས་པར་བསྐུལ་བ་ལ་སོགས་པའི་
སྤྱན་མ་ལ་སོགས་པའི་ལྷ་མོ་རྣམས་ཀྱིས་དབང་བསྐུར་བར་གྱུར་པས་དོན་ཡོད་གྲུབ་པ་ཅོད་པན་ལ་བསྒོམ་པར་བྱ་བའོ། །དེ་ནས་ཕྱི་རིམ་ལ་གནས་པའི་ཟླ་བ་ལ་རྡོ་རྗེ་སྒྲོལ་མ་ལ་སོགས་པའི་ལྷ་མོ་རྣམས་སྐད་ཅིག་གིས་བལྟས་པས། ཕྱི་ནས་རྣམ་པར་བསྒོམ་པར་བྱ་བ་ལས་ཤར་དུ་རྡོ་རྗེ་སྒྲོལ་མ་ནག་མོ་རྡོ་རྗེ་ཕྱག་ན་བསྣམས་པའོ། །ལྷོ་ན་རིན་ཆེན་སྒྲོལ་མ་སེར་མོ་རིན་པོ་ཆེ་ཕྱག་ན་བསྣམས་པའོ། །ནུབ་ན་པདྨའི་སྒྲོལ་མ་དམར་པོ་པདྨ་དཀར་པོ་ཕྱག་ན་བསྣམས་པའོ། །བྱང་ན་སངས་རྒྱས་སྒྲོལ་མ་དཀར་མོ་འཁོར་ལོ་བསྣམས་པའོ། །མེ་མཚམས་ན་མེ་ཏོག་སྒྲོལ་མ་དཀར་མོ་མེ་ཏོག་གི་ཕྲེང་བ་བསྣམས་པའོ། །བདེན་བྲལ་གྱི་མཚམས་ན་བདུག་པའི་སྒྲོལ་མ་ནག་མོ་ཕྱག་ན་སྤོས་ཕོར་བསྣམས་པའོ། །རླུང་མཚམས་ན་མར་མེའི་སྒྲོལ་མ་སེར་མོ་མར་མེའི་སྣོད་བསྣམས་པའོ། །དབང་ལྡན་གྱི་མཚམས་ན་དྲིའི་སྒྲོལ་མ་དམར་མོ་དྲིའི་དུང་ཆོས་བསྣམས་པའོ། །འདི་དག་རྣམས་ནི་སྣ་ཚོགས་པདྨའི་འདབ་མའི་ཟླ་བ་ལ་སྟེ། བརྒྱད་ཀ་ཡང་ཟླ་བའི་འོད་དང་ལྡན་ཞིང་སེམས་དཔའི་སྐྱིལ་ཀྲུང་གིས་བཞུགས་པ་གཡོན་པས་ཨུཏྤལ་བསྣམས་པ། ཞལ་འཛུམ་པ་སྣ་ཚོགས་པའི་རྒྱན་དང་ན་བཟའ་དང་ལྡན་པའོ། །ཤར་གྱི་སྒོར་ནི་རྡོ་རྗེ་ལྕགས་ཀྱུ་མ་སྟེ་ནག་མོ་ཕྱག་ན་རྡོ་རྗེ་ལྕགས་ཀྱུ་བསྣམས་པའོ། །ལྷོ་ན་ནི་རྡོ་རྗེ་ཞགས་པ་མ་སྟེ་སེར་མོ་རྡོ་རྗེའི་ཞགས་པ་ཕྱག་ན་བསྣམས་པའོ། །ནུབ་ན་ནི་རྡོ་རྗེ་ལྕགས་ཐག་མ་སྟེ་དམར་མོ་རྡོ་རྗེའི་ལྕགས་ཐག་བསྣམས་པའོ། །བྱང་ན་ནི་རྡོ་རྗེ་དྲིལ་བུ་མ་སྟེ་དཀར་མོ་རྡོ་རྗེ་དྲིལ་བུ་ཕྱག་ན་བསྣམས་པའོ། །དེ་དག་རྣམས་ནི་སྒོ་བཞིར་ཉི་མ་ལ་བལྟ་བར་བྱ་སྟེ། ཉི་མའི་གཟི་བརྗིད་དང་ལྡན་པ། སྐྲ་སེར་པོ་གྱེན་དུ་འབར་བ། །གཡོན་བསྐུམ་པའི་ཞབས་ཀྱིས་གནས་པ། སྤྲུལ་གྱིས་བརྒྱན་ཅིང་བཞིན་རྣམ་པར་བསྒྱུར་བ་སྟག་གི་པགས་པའི་ཤམ་ཐབས་བསྣམས་པ། ཕྱག་གཡོན་པ་རྣམས་ཀྱིས་ཨུཏྤལ་བསྣམས་པ་ཡིན་ནོ། །དེ་ནས་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ལ། རང་གི་སྙིང་གའི་པདྨ་ལ་གནས་པའི་རང་གི་ས་བོན་ཤིན་ཏུ་ཕྲ་བ་མི་གཡོ་བའི་ཡིད་ཀྱིས་བསྒོམས་པ་སྔགས་
བཟླས་པར་བྱ་བའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་དྷ་ན་མྨེ་ད་ད་སྭཱ་ཧཱ། དེ་ལས་ལངས་པའི་དུས་སུ་ནི། ཨོཾ་ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པའི་སྔགས་དང་ཨུཏྤལའི་ཕྱག་རྒྱས་གཏོར་མ་བཏང་ལ། སྨོན་ལམ་ཡང་བཏབ་སྟེ། ལྷའི་འཁོར་ལོ་རང་གི་ས་བོན་གྱི་ནང་དུ་བསྡུས་ནས། རང་ཉིད་ཀྱི་ལྷའི་རྣམ་པ་དང་ལྡན་པས་ཇི་ལྟར་བདེ་བར་རྒྱུ་བར་བྱའོ། །ཉི་མ་ཕྱེད་ཀྱི་དུས་དང་ཕྱི་དྲོའི་དུས་ཀྱི་ཐུན་དག་ལ་ནི་རང་གི་སྙིང་གའི་ས་བོན་ལས་སྐད་ཅིག་གིས་ལྷའི་འཁོར་ལོ་ཀུན་དུ་སྤྲོས་ལ་སྔར་བཞིན་དུ་བསྒོམ་པ་དང་བཟླས་པ་ལ་སོགས་པ་བྱ་བའོ། །ཕྱི་དྲོའི་དུས་དང་གུང་གི་དུས་ཀྱི་ཐུན་ལ་ནི་འདི་དག་ཁྱད་པར་ཡིན་ཏེ། མེ་ཏོག་ལ་སོགས་པས་ཡེ་ཤེས་ཀྱི་དཀྱིལ་འཁོར་ལེགས་པར་མཆོད་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་མུཿཞེས་བྱ་བ་འདིས་གཤེགས་སུ་གསོལ་བར་བྱ་བ་ཡིན་ནོ། །སྒྲོལ་མ་ནོར་སྦྱིན་མའི་སྒྲུབ་ཐབས་སོ། །པཎྜི་ཏ་ཆེན་པོ་ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །