ཀུ་རུ་ཀུལླེའི་སྒྲུབ་ཐབས།
ཨིནྡྲབྷཱུཏི།
རྒྱ་གར་སྐད་དུ། ཀུ་རུ་ཀུལླཱ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །སྔར་བཞིན་དུ་སྟོང་པ་ཉིད་པ་ཉིད་ཀྱི་མཐར་ཐུག་པར་རྣམ་པར་བསྒོམས་ལ། ཡི་གེ་ར་ཡོངས་སུ་གྱུར་པ་ལས་ཉི་མ་ལ་ཡི་གེ་ཧྲཱིཿ་ལས་སྤྲོ་བ་དང་བསྡུ་བའི་ཚོགས་རྣམས་ཀྱང་བསྒོམ་ཞིང༌། སྐད་ཅིག་གིས་དེ་ཡོངས་སུ་གྱུར་པ་ལས་བཅོམ་ལྡན་འདས་མ་ཀུ་རུ་ཀུལླེ་སྟེ། ཕྱག་བརྒྱད་མ། སྐུ་མདོག་དམར་མོ་པདྨ་དམར་པོ་འདབ་མ་བརྒྱད་པ་དང་ཉི་མ་ལ་རྡོ་རྗེ་སྐྱིལ་ཀྲུང་གིས་
བཞུགས་ཤིང༌། གཞལ་ཡས་ཁང་གི་ནང་ན་གནས་པ། ཕྱག་དང་པོ་གཉིས་ཀྱིས་ཁམས་གསུམ་རྣམ་པར་རྒྱལ་བའི་ཕྱག་རྒྱ་མཛད་པ། གཡས་པའི་ཕྱག་ལྷག་མ་རྣམས་ཀྱིས་ནི་ལྕགས་ཀྱུ་དང༌། རྣ་བའི་དྲུང་དུ་བཀང་བའི་མདའ་དང༌། མཆོག་སྦྱིན་པའི་ཕྱག་རྒྱ་མཛད་པ། གཡོན་པའི་ཕྱག་ལྷག་མ་རྣམས་ཀྱིས་ནི་ཞགས་པ་དང་གཞུ་དང་ཨུཏྤལ་བསྣམས་པའོ། །རྒྱན་ཐམས་ཅད་དང་ལྡན་པ་བསྒོམ་པར་བྱ་བའོ། །ཤར་གྱི་འདབ་མ་ལ་རབ་ཏུ་དང་བའི་སྒྲོལ་མའོ། །ལྷོའི་འདབ་མ་ལ་གྲུབ་པའི་སྒྲོལ་མའོ། །ནུབ་ཀྱི་འདབ་མ་ལ་རྒྱལ་བའི་སྒྲོལ་མའོ། །བྱང་གི་འདབ་མ་ལ་རྣ་བའི་སྒྲོལ་མའོ། །དབང་ལྡན་གྱི་འདབ་མ་ལ་ཙུནྡྲའོ། །མེའི་འདབ་མ་ལ་གཞན་གྱིས་མི་ཐུབ་པའོ། །བདེན་བྲལ་གྱི་འདབ་མ་ལ་མར་མེ་རབ་ཏུ་གསལ་བར་སྣང་བའོ། །རླུང་གི་འདབ་མ་ལ་སྒྲོལ་མ་དཀར་མོ་བསྒོམ་པར་བྱ་བའོ། །དེ་དག་ཐམས་ཅད་ཀྱང་ཁ་དོག་དམར་མོ་དེ་བཞིན་གཤེགས་པ་ལྔ་དབུ་རྒྱན་དུ་གྱུར་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། གཡས་པའི་ཕྱག་དག་གིས་མཆོག་སྦྱིན་པའི་ཕྱག་རྒྱ་དང༌། རྣ་བའི་བར་དུ་བཀང་བའི་མདའ་བསྣམས་པ། གཡོན་པའི་ཕྱག་གིས་ཨུཏྤལ་དང་གཞུ་བསྣམས་པ། ཤར་གྱི་སྒོར་ནི་རྡོ་རྗེ་འཇིགས་བྱེད་མ་སྟེ་གསུས་པ་འཇོལ་བ་ཞལ་རྣམ་པར་བསྒྱུར་བ་མདོག་དམར་བ་མི་བསྐྱོད་པ་དབུ་རྒྱན་ལ་བཞུགས་པ། གཡས་པའི་ཕྱག་གཉིས་ཀྱིས་སྡིགས་མཛུབ་དང་ལྕགས་ཀྱུ་བསྣམས་པ། གཡོན་པའི་ཕྱག་གཉིས་ཀྱིས་རྡོ་རྗེའི་དྲིལ་བུ་དང་ཞགས་པ་བསྣམས་པའོ། །ལྷོ་སྒོར་ནི་གཞན་གྱིས་མི་ཐུབ་མ་སྟེ་ཁ་དོག་སེར་མོ་དབུ་རྒྱན་ལ་རིན་ཆེན་འབྱུང་ལྡན་བཞུགས་པ། ཕྱག་གཡས་པ་གཉིས་ཀྱིས་ནི་དབྱུག་པ་དང་ལྕགས་ཀྱུ་བསྣམས་པ། གཡོན་པའི་ཕྱག་གཉིས་ཀྱིས་ནི་དྲིལ་བུ་དང་ཞགས་པ་བསྣམས་པའོ། །ནུབ་སྒོར་ནི་རལ་གཅིག་མ་སྟེ་ཁ་དོག་ནག་མོ་སྐྲ་ནི་གྱེན་ལ་གསུས་པ་འཕྱང་བ། ཚེམས་ཀྱིས་མ་མཆུ་ཀུན་ནས་བསྡམས་པ། དབུ་རྒྱན་ལ་སྣང་བ་མཐའ་ཡས་བཞུགས་པ། གཡས་ཀྱི་ཕྱག་གཉིས་ན་རྡོ་རྗེ་དང་ལྕགས་ཀྱུ་བསྣམས་པ། གཡོན་གྱི་ཕྱག་གཉིས་ན་དྲིལ་བུ་དང་
ཞགས་པ་བསྣམས་པའོ། །བྱང་གི་སྒོར་ནི་རྡོ་རྗེ་དྲི་ཟ་མ་སྟེ་སེར་ལྗང་མ་དོན་ཡོད་གྲུབ་པ་དབུ་རྒྱན་ལ་བཞུགས་པ། ཞལ་རྣམ་པར་བསྒྱུར་པ། གསུས་པ་འཇོལ་བ། ཕྱག་གཡས་པ་གཉིས་ཀྱིས་ནི་ཁ་ཊྭཱཾ་ག་དང་ལྕགས་ཀྱུ་བསྣམས་པ། གཡོན་པའི་ཕྱག་གཉིས་ཀྱིས་ནི་དྲིལ་བུ་དང་ཞགས་པ་བསྣམས་པ་བསམ་པར་བྱ་སྟེ། བཞི་པོ་དེ་དག་རྣམས་ནི་གཡོན་བསྐུམ་པའི་ཞབས་ཀྱིས་བཞུགས་པའོ། །དེ་ལ་ཁམས་གསུམ་རྣམ་པར་རྒྱལ་བའི་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཀྱི་རྒྱབ་གཉིས་སྤྲད་ལ་སྲིན་ལག་གཉིས་མདུད་པ་བྱས་ཤིང་མཐེའུ་ཆུང་གཉིས་དང་གུང་མོ་གཉིས་ཀྱིས་ཀུན་ནས་དཀྲིས་ཏེ། མཛུབ་མོ་གཉིས་ལྕགས་ཀྱུའི་རྣམ་པ་ལྟར་བྱས་པ་འགྱིང་བ་དང་ལྡན་པས་དཔྲལ་བའི་ཕྱོགས་སུ་གཟུང་བར་བྱ་བའོ། །བསྒོམས་པས་དུབ་ན་སྔགས་བཟླས་པར་བྱ་སྟེ། ཨོཾ་ཀུ་རུ་ཀུལླེ་ཧྲཱིཿ་སྭཱ་ཧཱ། ཁྲི་བཟླས་པས་སྐྱེ་བོ་ཐམས་ཅད་དབང་དུ་འགྱུར་རོ། །ཁྲི་ཕྲག་གིས་ནི་བཀའ་བློན་པའོ། །ཨུཏྤལ་དང་མར་དང་སྦྲང་རྩིས་བྱུགས་པའི་ཤིང་ཨ་ཤྭདྠ་དང་ཡམ་ཤིང་རྣམས་ཀྱིས་སྦྱིན་སྲེག་བྱས་ན་འདོད་པའི་གོ་འཕང་ཐོབ་པར་འགྱུར་རོ། །དཔལ་འབྲས་ཀྱི་ཤིང་གི་མེ་ལེགས་པར་སྦར་ལ་མར་དང་སྦྲང་རྩིས་བྱུགས་པའི་དཔལ་འབྲས་འཇུག་སྦྱིན་སྲེག་བྱས་པས་ནི་རྒྱལ་པོའི་བློན་པོ་དབང་དུ་འགྱུར་རོ། །ཨུཏྤལ་སྟོང་སྦྱིན་སྲེག་བྱས་ཤིང་ལྷ་མོའི་མདུན་དུ་མར་གྱི་མར་མེ་སྟོང་ཕུལ་བས་ནི་རྒྱལ་པོ་ཐམས་ཅད་དབང་དུ་འགྱུར་རོ། །ཀུ་རུ་ཀུལླེའི་སྒྲུབ་ཐབས་རྫོགས་སོ།། །།འདི་ནི་ཨིནྡྲ་བྷཱུ་ཏི་བའི་ཞལ་སྔ་ནས་མཛད་པ་ཡིན་ནོ། །ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།།