དབྱངས་ཅན་མའི་སྒྲུབ་ཐབས།
རྒྱ་གར་སྐད་དུ། སར་སྭ་ཏི་སྭཱ་དྷ་ནཾ། བོད་སྐད་དུ། དབྱངས་ཅན་མའི་སྒྲུབ་ཐབས། དབྱངས་ཅན་མ་ལ་ཕྱག་འཚལ་ལོ། །སྔོན་དུ་བརྗོད་པའི་རིམ་པ་དག་གིས་ཇི་སྲིད་དུ་སྟོང་པ་ཉིད་མངོན་དུ་བྱས་ཤིང་བྱིན་གྱིས་ཀྱང་བརླབས་ལ། པདྨ་དཀར་པོ་ཁྲུ་བདུན་གྱི་ཚད་དོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་དབུས་སུ་ཡི་གེ་ཧྲཱིཿ་དཀར་པོ་སྟེ། དེས་པདྨ་དཀར་པོ་རང་གི་ས་བོན་གྱི་སྙིང་པོ་ཅན་དུ་བསྒོམ་པར་བྱའོ། །དེ་ལས་ཀྱང་བཅོམ་ལྡན་འདས་མ་དབྱངས་ཅན་མ་ཆེན་མོ་རྗེས་སུ་བསམ་པར་བྱ་བའོ། །སྟོན་ཀའི་ཟླ་བའི་རྣམ་པ་ལྟར་སྣང་བ་པདྨ་དཀར་པོའི་སྟེང་ན་ཟླ་བའི་དཀྱིལ་འཁོར་ལ་བཞུགས་པ། ཕྱག་གཡས་པ་མཆོག་སྦྱིན་པར་མཛད་ཅིང༌། གཡོན་པས་པདྨ་དཀར་པོ་ཡུ་བ་དང་ལྡན་པ་བསྣམས་པ། བཞིན་འཛུམ་པ་དང་ལྡན་ཞིང༌། མཆོག་ཏུ་ཐུགས་རྗེའི་རང་བཞིན་ཅན། །ཙནྡན་དང་མེ་ཏོག་དང་ན་བཟའ་དཀར་པོ་དང་ལྡན་པ། མུ་ཏིག་གི་ངོ་ཤལ་གྱིས་ཐུགས་ཀ་ནས་མཛེས་པར་གྱུར་པ། རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ། ལོ་བཅུ་གཉིས་མིའི་ཚད་དུ་གྱུར་པ། རྐེད་པའི་སྐབས་དགའ་བར་གྱུར་པ། ཡངས་ལ་མཛེས་པའི་བྲང་ལྕོང་ཞིང་ཕྱལ་བ། འོད་ཟེར་གྱི་བཀོད་པ་མཐའ་ཡས་པ་སྤྲོ་བར་མཛད་པས་འཇིག་རྟེན་གསུམ་ཀུན་དུ་སྣང་བར་མཛད་པ། དེ་ནས་དེའི་མདུན་དུ་ནི་བཅོམ་ལྡན་འདས་ཤེས་རབ་མའོ། །གཡས་སུ་ནི་ཡིད་གཞུངས་མའོ། །རྒྱབ་ཏུ་ནི་བློ་གྲོས་མའོ། །གཡོན་དུ་ནི་དྲན་པ་མའོ། །དེ་དག་རྣམས་ནི་རང་གི་གཙོ་མོ་དང་ཁ་དོག་ལ་སོགས་པ་མཚུངས་པ་དང༌། མངོན་དུ་བལྟ་བས་གནས་པར་བསམ་པར་བྱ་བའོ། །དེ་ནས་རང་གི་ལྟེ་བའི་ཡུལ་ཕྱོགས་སུ་ཟླ་བའི་དཀྱིལ་འཁོར་ལ་ཡི་གེ་ཨོཾ་དཀར་པོ་བསྒོམ་པར་བྱ་བའོ། །དེ་ལས་ལྷག་མ་མ་ལུས་པའི་ངག་གི་རང་བཞིན་གྱི་ཕྲེང་བ་ངེས་པར་འཕྲོས་པར་གྱུར་པས་རྒྱུན་མི་འཆད་པར་རབ་ཏུ་འབྱུང་བར་བསམ་པར་བྱ་ཞིང་སྔགས་བགྲང་བར་བྱ་བའོ། །དེ་ལ་སྔགས་ནི་འདི་ཡིན་ཏེ། ཨོཾ་ཧྲཱིཿ་མ་ཧཱ་མ་ཡཱཾ་གེ་མ་ཧཱ་ས་ར་སྭ་ཏྱེ་ན་མཿ་དེ་ལྟར་ཡང་བསྙེན་གནས་ལ་གནས་པར་གྱུར་པ་དང༌། ངག་མི་སྨྲ་བར་གནས་པ་དང༌། རྟག་པར་རྒྱུན་མི་འཆད་པར་ལྷའི་ང་རྒྱལ་གྱིས་ལྷག་པར་གནས་པ་དང༌། སྔགས་རྒྱུན་དུ་ཟློས་པ་དང༌། ལས་གཞན་ལ་མི་སེམས་པས་ནི་དབྱངས་ཅན་
མའི་གསུང་འཐོབ་པའོ། །ཟླ་བ་གསུམ་ན་ཚངས་པ་ཡང་འགྲུབ་པར་འགྱུར་རོ། །ཟླ་བ་དྲུག་ན་དབྱངས་ཅན་མ་དང་མཉམ་པར་འགྱུར་བ་ཡིན་ནོ། །དེ་ནས་སྨན་བཤད་པར་བྱ་སྟེ། ར་འོ་འཇིགས་མེད་ཚ་གསུམ་པ་ཐ་དང༌། ཤུ་དག་སི་གུ་རྒྱམ་ཚ་རྣམས་བསྙམས་ལ། ལན་བདུན་མངོན་པར་བསྔགས་ཏེ་མར་སར་དང༌། འཐུངས་པས་དབྱངས་ཅན་མ་ཉིད་འགྲུབ་པ་ཡིན། །རའོ་བཞི་འགྱུར་དག་ཏུ་བྱ་བ་ཡིན། །མར་ནི་བསྐོལ་བ་སྲང་གཅིག་དག་ཡིན་ཏེ། །སྨན་རྣམས་སྲང་རེ་ཙམ་དུ་བྱས་པས་ནི། །དལ་གྱིས་འཇམ་པོར་མིང་ནི་བློ་གྲོས་བཟང༌། །ཟླ་བ་ཙམ་དུ་རབ་ཏུ་སྦྱར་བྱས་པས། །ངག་གི་དབང་ནི་བླ་ན་མེད་པ་འཐོབ། །ཟླ་བ་དྲུག་ཏུ་ཉེ་བར་སྦྱར་བྱས་པས། །དངོས་སུ་ངག་གི་དབང་ཕྱུག་ཉིད་དུ་འགྱུར། །མཉམ་མེད་ཁུ་བྱུག་སྐད་ནི་ངེས་སྒྲོགས་པའི། །སྙན་པའི་དབྱངས་ནི་སྐྱེ་བར་འགྱུར་བ་ཡིན། །དངོས་རྣམས་སྣ་ཚོགས་པ་ཡི་ནུས་ལྡན་ཕྱིར། །འདི་ལ་ཐེ་ཚོམ་ཟ་བར་བྱ་བ་མིན། །ཞེས་བྱ་བ་ནི་དབྱངས་ཅན་མ་ཆེན་མོའི་སྒྲུབ་ཐབས་སོ། །མཁས་པ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །