རྡོ་རྗེ་དབྱངས་ཅན་མའི་སྒྲུབ་ཐབས།
རྒྱ་གར་སྐད་དུ། བཛྲ་སཱ་ར་སྭ་ཏི་སཱ་དྷ་ནཾ། བོད་སྐད་དུ། རྡོ་རྗེ་དབྱངས་ཅན་མའི་སྒྲུབ་ཐབས། སྔར་བཤད་པའི་ཆོ་གའི་ཚུལ་གྱིས་སྙིང་གར་པདྨ་དམར་པོ་དང༌། ཟླ་བ་ལ་ཡི་གེ་ངོཿ་དམར་པོའི་ས་བོན་ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པ་རང་གི་ས་བོན་གྱི་སྙིང་པོར་གྱུར་པའོ། །དེ་ཡོངས་སུ་གྱུར་པ་ལས་བཅོམ་ལྡན་འདས་དབྱངས་ཅན་མ་སྟེ། ཞལ་གསུམ་ཕྱག་དྲུག་མ། སྐུ་མདོག་ཐམས་ཅད་དམར་བ། སྤྱན་གསུམ་མ་སྔོན་པོ་དང་དཀར་པོ་ནི་གཡས་པ་དང་གཡོན་པའི་ཞལ་ལོ། །པདྨ་དང་རལ་གྲི་དང་གྲི་གུག་གཡས་པའི་ཕྱག་ན་བསྣམས་པའོ། །ཐོད་པ་དང་རིན་པོ་ཆེ་དང་འཁོར་ལོ་ནི་གཡོན་པའི་ཕྱག་ན་བསྣམས་པའོ། །གཡས་བསྐུམ་པས་གནས་པ། གཞོན་ནུ་མ་གསར་ཞིང་ལང་ཚོ་དང་ལྡན་པ་རྒྱན་སྣ་ཚོགས་པ་དང་ལྡན་པ། མཚན་མ་དང་ས་བོན་གྱིས་ཐུགས་ཀ་ནས་བྱིན་གྱིས་བརླབས་པ། གཞན་གྱི་དོན་མཛད་པ་ལ་བརྩོན་པར་གྱུར་པར་བདག་ཉིད་རྣམ་པར་བསྒོམ་པར་བྱ་བའོ། །ཨོཾ་བི་ཙུ་པི་ཙུ་པྲཛྙཱ་བརྡྷ་ནི་ཛྭ་ལ་ཛྭ་ལ་མེ་དྷ་བརྡྷ་ནི་དྷི་རི་དྷི་རི་བུ་དྷི་བརྡྷ་ནི་སྭཱ་ཧཱ། ཞེས་བྱ་བའི་སྔགས་འདི་བཟླས་པར་བྱ་བའོ། །རྡོ་རྗེ་དབྱངས་ཅན་མའི་སྒྲུབ་ཐབས་སོ། །མ་ལ་བ་ཞེས་བྱ་བ་དྷའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །