རྡོ་རྗེ་ལྕགས་སྒྲོག་མའི་སྒྲུབ་ཐབས།
རྒྱ་གར་སྐད་དུ། བཛྲ་ཤྲྀཾ་ཁ་ལེ་སཱ་དྷ་ནཾ། བོད་སྐད་དུ། རྡོ་རྗེ་ལྕགས་སྒྲོག་མའི་སྒྲུབ་ཐབས། སྔར་བཤད་པའི་ཆོ་གའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་ལ། སྣ་ཚོགས་པདྨ་དང་ཉི་མ་ལ་གནས་པའི་ཡི་གེ་ཧཱུཾ་ལྗང་གུ་ལས་བྱུང་བའི་སྐུ་མདོག་ལྗང་གུ་ཞལ་གསུམ་ཕྱག་བརྒྱད་མ་སྟེ། ཞལ་དང་པོ་ནི་ཅུང་ཟད་བཞད་པའི་མདངས་དང་ལྡན་པའོ། །གཡས་པ་ནི་སེར་བ་སྟེ་སྤྱན་ཡང་སེར་བའོ། །གཡོན་པ་ནི་དམར་བའོ། །ཁྲོ་གཉེར་དང་ལྡན་ཞིང་མཆེ་བ་རྣམ་པར་གཙིགས་པའོ། །གཡས་པའི་ཕྱག་བཞིས་ནི་མི་འཇིགས་པ་དང་རྡོ་རྗེ་དང་རྡོ་རྗེའི་ལྕགས་ཐག་དང་མདའ་བསྣམས་པའོ། །གཡོན་པའི་ཕྱག་བཞིས་ན་ཁྲག་གིས་བཀང་བའི་ཐོད་པ་དང༌། སྡིགས་མཛུབ་དང༌། ཞགས་པ་དང༌། གཞུ་བསྣམས་པའོ། །རོལ་པས་བསྐྱོད་པའི་གདན་ལ་བཞུགས་པ། བྱི་ལའི་པགས་པའི་སྟོད་ཤག་བསྣམས་པ། དོན་ཡོད་གྲུབ་པས་དབུ་བརྒྱན་པར་གྱུར་པ། དབུ་སྐྲ་ཁམ་སེར་གྱེན་དུ་འཕུར་པར་བསམས་ལ། ཨོཾ་བཛྲ་ཤྲྀཾ་ཁ་ལེ་ཧཱུཾ་ཕཊ་སྭཱ་ཧཱ། ཞེས་བྱ་བའི་སྔགས་བཟླས་པར་བྱ་བའོ། །གདམས་དག་གི་ཁྱད་པར་གཞན་གྱི་རྡོ་རྗེ་ལྕགས་སྒྲོག་མའི་སྒྲུབ་ཐབས་སོ།། །།ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །