དུག་སེལ་མའི་སྒྲུབ་ཐབས།
རྒྱ་གར་སྐད་དུ། ཛཱཾ་གུ་ལཱི་སཱ་དྷ་ནཾ། བོད་སྐད་དུ། དུག་སེལ་མའི་སྒྲུབ་ཐབས། སྔར་བཤད་པའི་ཆོ་གའི་རིམ་པས་རང་ཉིད་ཀྱི་སྙིང་གའི་དཀྱིལ་འཁོར་དམར་པོར་ཡི་གེ་ཛཱཾ་གི་ཡེ་ཤེས་ངེས་པར་རྫོགས་པ་ལས་རིག་པའི་མཚན་དུ་གྱུར་བ་ནི་དུག་སེལ་མ་སྟེ། སྐུ་མདོག་སེར་མོ་གདེངས་ཀ་བདུན་གྱི་ཀུན་ནས་
ལོངས་སྤྱོད་པ་འབར་བར་གྱུར་པའི་རིན་པོ་ཆེ་དམ་པས་བརྒྱན་པ། ཞལ་གསུམ་སྤྱན་གསུམ་མ། ཕྱག་དྲུག་མ། རོལ་པས་བསྐྱོད་པ་དབུ་ལ་མི་བསྐྱོད་པ་ལེགས་པར་བཞུགས་པ་གཞོན་ནུ་མའི་མདུན་ཉིད་ཀྱིས་མཆོག་ཏུ་འབར་བར་གྱུར་བ་ཁྲོ་བ་དང་བཅས་པའི་བཞད་པ་ཉིད་དང་སྦྲུལ་གྱི་སྨད་ཀ་དང་ལྡན་པ། གཡས་པའི་ཕྱག་ན་རྡོ་རྗེ་བསྣམས། །གཉིས་པས་རལ་གྲི་གདེངས་པར་མཛད། །གསུམ་པ་གར་གྱི་སྟངས་ཀྱིས་འདུད། །སྐྲག་མཛད་མདའ་ནི་གསོར་བར་མཛད། །གཡོན་པ་སྡིགས་མཛུབ་ཞགས་པ་སྟེ། །གཉིས་པ་དུག་གི་མེ་ཏོག་ཅན། །གསུམ་པའི་ཕྱག་ན་གཞུ་བསྣམས་ཤིང༌། །སྨད་ཀ་ལ་ནི་མེ་ཏོག་ལྡན། །པདྨའི་གདན་ལ་བཞུགས་པ་གསེར་གྱི་མདོག་དང་ལྡན་ཞིང་འོད་དམར་པོའི་དཀྱིལ་འཁོར་ལས་འོད་ཟེར་སྤྲོ་བར་མཛད་བ། དྲི་མ་མེད་པའི་འཇའ་ཚོན་འབར་བས་ཉེ་འཁོར་ཡོངས་སུ་ཁྱབ་པ། སངས་རྒྱས་རྒྱ་མཚོའི་སྐུ་རྣམས་སྤྲོ་བར་མཛད་ཅིང་རང་གི་ཕྱག་ན་ཟླ་བ་དང་བུམ་པ་དང་ལྡན་པས་དུག་གིས་ཟིན་པ་ཉལ་བ་ལ་འཁྲུ་བར་མཛད་པ། ཁ་ལ་ཡི་གེ་ཛཱཾ་གིས་བརྒྱན་པ་སྟེ། སྐུ་གསུམ་དུག་སེལ་རྟག་པར་ཡང༌། །དུག་གིས་ཟིན་ལ་བསྒོམ་པར་བྱ། །གང་ཕྱིར་དེ་ལྟར་བསྒོམས་གྱུར་པས། །རིང་མིན་བྱང་ཆུབ་སེམས་དཔའ་ཐོབ། །ལག་པ་གཉིས་སྤྲུལ་ཟ་བའི་རྣམ་པས་སྤྱི་བོ་ནས་འགེབས་པར་བྱེད་པ། གདུགས་ལྟར་བྱས་པ་ནི་དུག་སེལ་མའི་ཕྱག་རྒྱའོ། །སྔགས་བཟླ་བར་བྱ་སྟེ། ཨོཾ་ན་མཿཤར་ཀུ་མཱ་རི་ཡེ་ཙུར་ཙྪ་ཙཱ་ཊི་ཙཱ་ལ་ཡ་ཙུ་ཙྪ་ལ་ཡ་སཾ་གྷཊྚ་ནི་མཱ་ཏྟཱཾ་གི་ཨི་ཌ་བིདྡྷེ་ཨ་ཧེ་ཨོཾ་ཛཱཿསྭཱ་ཧཱ། འཕགས་མ་དུག་སེལ་མའི་སྒྲུབ་ཐབས་སོ།། །།མཁས་པ་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །