སྐུལ་བྱེད་མའི་སྒྲུབ་ཐབས།
རྒྱ་གར་སྐད་དུ། ཙུནད་སཱ་དྷ་ནཾ། བོད་སྐད་དུ། སྐུལ་བྱེད་མའི་སྒྲུབ་ཐབས། སྐུལ་བྱེད་མ་ལ་ཕྱག་འཚལ་ལོ། །དང་པོ་ནི་སྙིང་གའི་ཟླ་བའི་དབུས་ན་གནས་པའི་ས་བོན་ཙཱུཾ་ལས་རྣམ་པར་འཕྲོས་པའི་འོད་ཟེར་སྣ་ཚོགས་པ་ལས་ངེས་པར་གྲུབ་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་བལྟས་ལ། མཆོད་པ་ལ་སོགས་པ་རྣམས་བྱ་སྟེ། ཨོཾ་རྡོ་རྗེའི་མེ་ཏོག་ཧཱུཾ་བྱ་བ་ལ་སོགས་པའི་སྔགས་ཀྱིས་སོ།།
དེ་ནས་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་པར་བྱའོ། །དེའི་རྗེས་ཐོགས་ལ་སྟོང་པ་ཉིད་རྣམ་པར་བསྒོམ་པར་བྱ་ཞིང༌། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ། །ཞེས་བརྗོད་པར་བྱ་བའོ། །དེ་ནས་ཙུཾ་ལས་ངེས་པར་གྲུབ་པའི་ཙུནད་སྟེ། སྟོན་ཀའི་ཟླ་བའི་འོད་ཟེར་དང་མཚུངས་མ། ཕྱག་བཞི་མ། རྒྱན་རྣམས་ཐམས་ཅད་ཀྱིས་བརྒྱན་པའོ། །གཡས་པས་ནི་མཆོག་སྦྱིན་པ། གཡོན་པས་ནི་པོ་ཏི་དང་བཅས་པའི་པདྨ་བསྣམས་པ། ཕྱག་ལྷག་མ་གཉིས་ཀྱིས་ནི་ལྷུང་བཟེད་བསྣམས་པའོ། །པདྨ་དང་ཟླ་བ་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་བསྒོམས་ལ། ཕྱི་ནས་ནི་ཕྱག་རྒྱ་སྙིང་ག་དང༌། མགྲིན་པ་དང༌། སྨིན་མཚམས་དང༌། སྤྱི་བོ་རྣམས་སུ་རེག་པས་སྲུང་བ་བྱས་ལ་བཟླས་པ་བྱ་བའོ། །ཨོཾ་ཙ་ལེ་ཙུ་ལེ་ཙུན་དེ་སྭཱ་ཧཱ། དེ་ལ་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཀྱིས་སྙིམ་པ་བྱས་ལ་མཛུབ་མོ་གཉིས་དང་གུང་མོ་གཉིས་དབུས་སུ་གཞོང་བུའི་རྣམ་པ་ལྟ་བུར་བྱས་པ་ལ་གློར་མཐེ་བོང་གཉིས་ཀྱིས་སྦྱར་བས་གནས་པའོ། །སྐུལ་བྱེད་མའི་སྒྲུབ་ཐབས་རྫོགས་སོ།། །།ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །