བྱམས་པའི་སྒྲུབ་ཐབས།
རྒྱ་གར་སྐད་དུ། མཻ་ཏྲི་ཡ་སཱ་དྷ་ནཾ། བོད་སྐད་དུ། བྱམས་པའི་སྒྲུབ་ཐས། སྔར་བཤད་བའི་ཆོ་གའི་རིམ་པས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་མེ་སེར་པོ་ཡོངས་གྱུར་པ་ལས་འཕགས་པ་མགོན་པོ་བྱམས་པ་པདྨ་འདབ་མ་སྣ་ཚོགས་པའི་སྟེང་ན་བཞུགས་པའི་ཞལ་གསུམ་ཕྱག་བཞི་པ་སྟེ། གཡས་པ་དང་གཡོན་གྱི་ཞལ་དག་ནི་ནག་པོ་དང་དཀར་པོའོ། །གསེར་གྱི་མདོག་ལྟར་སེར་བར་གྱུར་པ་ཕྱག་གཉིས་ནི་ཆོས་བཤད་པའི་ཕྱག་རྒྱ་དང་ལྡན་པ། གཡས་ཀྱི་ཕྱག་གཉིས་པ་ནི་མཆོག་སྦྱིན་པར་མཛད་ཅིང༌། གཡོན་གྱི་ཕྱག་གཉིས་པ་ནི་མེ་ཏོག་ཁ་བྱེ་བའི་ཀླུ་ཤིང་གི་རྩེ་མོ་སྡུ་གུ་བསྣམས་པའོ། །ལྷ་རྫས་ཀྱི་རྒྱན་དང་ན་བཟས་རྣམ་པར་མཛེས་པར་གྱུར་པའི་སྐུར་བདག་ཉིད་མངོན་སུམ་དུ་བྱས་ཏེ། ཕྱག་རྒྱ་བཅིང་བར་བྱ་བ་ལས་དེ་ལ་ལག་པ་གཉིས་ཀྱིས་སོ་སོ་སོ་སོར་ཁུ་ཚུར་བཅངས་ལ་མཛུབ་མོ་གཉིས་མཐེ་བོང་དག་གི་དབུས་སུ་ཉེ་བར་བཞག་པས། མེ་ཏོག་གི་རྣམ་པར་གཤིབས་པར་བྱ་བའོ། །དེ་ནས་བཟླས་པ་ནི། ཨོཾ་མཻ་ཏྲི་ཡ་སྭཱ་ཧཱ། འཕགས་པ་བྱམས་པའི་སྒྲུབ་ཐབས། ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །