ཛམྦྷལ་ཚོན་པོའི་སྒྲུབ་ཐབས།
རྒྱ་གར་སྐད་དུ། ཨུ་ཙྪུཥྨ་ཛམྦྷ་ལ་སཱ་དྷ་ནཾ། བོད་སྐད་དུ། ཛམྦྷ་ལ་ཚོན་པོའི་སྒྲུབ་ཐབས། དཔལ་དང་ལྡན་པའི་ཛམྦྷ་ལ་ཆེན་པོ་ལ་ཕྱག་འཚལ་ལོ། །མིག་གསུམ་རྩ་ལག་གིས་ནི་སྤྱི་གཙུག་བརྒྱན་པ་ཡི། །ནོར་བུས་ཞབས་དག་ལ་ནི་གཏུགས་པ་གང་ཡིན་པ། །ཕུན་ཚོགས་ཕན་ཆེན་དང་ལྡན་མཆོག་གྱུར་ཐུབ་དབང་སྲས། །ལྷ་དེ་ཐུབ་པ་གཞོན་ནུར་གྱུར་པ་ཉིད་ཡིན་ཏེ། བླ་མེད་ཡོན་ཏན་གཉིས་མེད་པའི། །རིན་ཆེན་ཆར་འབེབས་འདྲེན་པ་པོ། །ཉིད་ཀྱི་ཕུན་ཚོགས་སྐྱེ་དགུ་ལ། །མྱུར་འབྱུང་འདི་ནི་བསྟེན་བྱ་ཡིན། །དེ་ལ་ཐོག་མར་རེ་ཞིག་བདག་གིས་དཔལ་ཛམྦྷ་ལ་མཉེས་པར་བྱས་ལ་ས་དང་མངོན་པར་རྟོགས་པའི་རིམ་པས་དེའི་བདག་ཉིད་དུ་གྱུར་ཏེ། སྐྱེ་དགུ་རྣམས་མངོན་པར་མཐོ་བ་ནག་ངེས་པར་ལེགས་པའི་ཕུན་སུམ་ཚོགས་པ་ལ་རབ་ཏུ་དགོད་པར་བྱ་བའོ་ཞེས་བྱ་བའི་བསམ་པ་དང་
ལྡན་པས་སྙིང་གི་ནང་གི་བུག་ཕར་དང་བར་འགྱུར་ཞིང་འོད་ཟེར་འཕྲོ་བ་དང་ལྡན་པའི་ཡི་གེ་ཨ་ཀླད་ཀོར་མེད་པ་སྟེ། དེ་ལས་བྱུང་བའི་ཟླ་བའི་དཀྱིལ་འཁོར་རོ། །དེའི་དབུས་སུ་ནི་ཡི་གེ་ཧཱུཾ་མགོ་གྱེན་ལ་བསྟན་པ་སྟེ། ཕྱི་རོལ་གྱི་ཉེ་འཁོར་ན་ཅུང་ཟད་སེར་བའི་འོད་ཟེར་གྱི་ཚོགས་འཕྲོ་བར་གྱུར་བའོ། །དེས་བསྐྱེད་པ་ནི་རྡོ་རྗེ་སྟེ་དབུས་ཀྱི་རྩེ་མོ་ལ་འབྲེལ་བའི་རྩེ་དགུ་པ་སྟེང་དང་འོག་གཅིག་ཏུ་བྱས་པས་གསུང་རབ་ཡན་ལག་དབུ་རྣམ་པར་དག་པའོ། །ཁ་དོག་ནི་ཡི་གེ་ཧཱུཾ་བཞིན་དུ་བྱ་སྟེ། ལྟེ་བའི་ནང་དུ་ཆུད་པའི་ཟླ་བ་ལ་གནས་པར་དེ་དང་འདྲ་བའི་ཧཱུཾ་དང་ལྡན་པ་བསྒོམ་པར་བྱ་པའོ། །དེ་ནས་ཡི་གེ་ཧཱུཾ་དང་རྡོ་རྗེ་ལས་འོད་ཟེར་སྤྲོས་པར་གྱུར་པས་ཨོཾ་ཨཿ་ཞེས་བྱ་བའི་སྔགས་བརྗོད་པ་སྔོན་དུ་འགྲོ་བ་ཅན་གྱིས་ཕྱོགས་བཅུར་སེམས་ཅན་རྣམས་ཀྱི་དོན་མཛད་པའི་ཛམ་བྷ་ལའི་སྐུ་མཐའ་ཡས་བ་མར་མེ་གཅིག་ནས་གཅིག་ཏུ་མཆེད་བའི་ཚུལ་གྱིས་སྤྱན་དྲངས་ལ་མདུན་དུ་དེའི་སྐུ་གཅིག་ལ་རྣམ་པར་བསྒོམ་པར་བྱ་བའོ། །འོད་ཟེར་གྱིས་ཉེ་བར་མཁོ་བའི་མཆོད་པ་རྣམ་པ་ལྔ་དང་སྡིག་པ་བཤད་པ་དང་ཇི་སྲིད་དུ་བཏང་སྙོམས་ཀྱི་བར་དུའོ། །དེའི་རྗེས་ཐོགས་ལ་ཧཱུཾ་དང་རྡོ་རྗེའི་འོད་ཟེར་རྣམས་མཐའ་དག་ལུས་ཀྱི་ནང་དུ་བསྟིམས་ལ་སྤྲོས་པ་ཐམས་ཅད་དང་བྲལ་བ་ཉིད་ཀྱིས་ནང་སྟོང་པ་ཉིད་ཀྱི་རང་བཞིན་དུ་གྱུར་པ་ཟླ་བ་དད་རྡོ་རྗེ་དང་ས་བོན་དང་འོད་ཟེར་ཏེ། ཨོཾ་ཨཿ་བྱ་བ་འདི་སྤྲོས་པ་དེས་ལེགས་པར་དྲངས་ལ་བཅོམ་ལྡན་འདས་གཞུག་པར་བྱ་བའོ། །ལེགས་པར་བཅུག་པའི་རྗེས་ལ་སྐད་ཅིག་གིས་ཟླ་བ་ལ་སོགས་པ་ལས་ལེགས་པར་གྲུབ་པའི་བཅོམ་ལྡན་འདས་ཚོན་བོར་བདག་ཉིད་དེ་ལོ་ལྔ་ལོན་པའི་གཞོན་ནུའི་རྣམ་པ་བོངས་ཐུང་བ། སྣ་ཚོགས་པདྨ་ལ་གནས་པའི་ཟླ་བའི་སྟེང་ན་རྒྱན་རྣམས་ཐམས་ཅད་ཀྱིས་བརྒྱན་ཅིང་རིན་པོ་ཆེའི་དབུ་རྒྱན་དང་ལྡན་པ་ཁ་ནས་རིན་པོ་ཆེ་སྐྱུགས་པ་ལུས་ཀྱི་མདོག་སེར་པོ་ཕྱི་བཀན་ལ་ཉལ་བའི་ནོར་སྦྱིན་དཔྲལ་བར་ནི་ཞབས་གཡས་པས་སོ། །རྐང་བ་གཉིས་གཡོན་པས་གནོན་པར་མཛད་པ་ཞབས་གཡས་པ་བསྐུམ་པས་གྱེན་དུ་འཇོག་པ་གཅེར་བུ་རྟགས་གྱེན་ལ་ལངས་པ་གསུས་པ་འཇོལ་བ། ཁྲག་གིས་གང་བའི་ཐོད་པ་ཕྱག་གཡས་པས་ཐུགས་ཀར་བསྣམས་པ་ལ་ཞལ་མངོན་དུ་
ཕྱོགས་ནས་གཟིགས་པ། ཁ་འོག་ཏུ་བསྟན་ནས་རིན་པོ་ཆེའི་ཚོགས་སྐྱུགས་པར་གྱུར་པའི་ནེའུ་ལེ་བརླ་གཡོན་པ་ལ་ལེགས་པར་འཁྲིལ་བར་ཕྱག་གཡོན་པས་བསྣམས་པ། ནང་ཆེ་བའི་རྣ་བ་མ་ཕུག་པ་ཟླ་བ་ཚེས་བ་ལྟ་བུའི་ཞལ་མཆེ་བ་རྣམ་པར་གཙིགས་པ། སྤྱན་གཉིས་དམར་ཞིང་ཟླུམ་བ་ཁྲོ་གཉེར་དང་ལྡན་པ་དཔྲལ་བར་ཐོད་ལེབ་མས་བཅིངས་པའི་དབུ་སྐྲ་ཁམ་སེར་གྱེན་དུ་འཕྱུར་བ། ས་གནོན་གྱི་ཕྱག་རྒྱ་དང་ལྡན་པའི་ཐུབ་པ་མི་བསྐྱོད་པ་མཐིང་ནག་གིས་དབུ་ལ་རྒྱན་བཏབ་པ། ཏ་མཱ་ལ་སྔོན་པོ་དང་དགའ་བོས་དགུ་སྐྲ་བཅིངས་པ། འཇོག་པོ་དམར་པོས་རྣ་བའི་གདུབ་ཀོར་དུ་བྱས་པ་པདྨ་དཀར་པོ་དང་པདྨ་ཆེན་པོས་དོ་ཤལ་བྱས་པ་དཱུར་བ་ལྗང་གུ་དང་ཀརྐོ་ཊ་ཀ་ཚངས་པའི་དག་བྱེད་དུ་བྱས་པ་ནོར་རྒྱས་དཀར་པོས་སྨད་ཀར་བྱས་པ་འཁྱིལ་པ་ལེགས་པ་དང་པདྨས་རྐང་རྒྱན་དུ་བྱས་པ། དུང་སྐྱོང་སེར་པོས་ལག་གདུབ་ཏུ་བྱས་པ་དུད་མདོག །ཀར་བུར་དང་རིགས་ལྡན་གྱི་དབུ་རྒྱན་དུ་བྱས་པ། ཁ་དོག་མཐིང་ནག་ལ་ཕྱི་རོལ་གྱི་ཉེ་འཁོར་ཅུང་ཟད་སེར་བའི་འོད་ཟེར་སེར་པོའི་ཚོགས་རྣམས་སྤྲོ་བར་བྱེད་པར་བསྒོམས་ལ། དཔྲལ་བ་དང་ཁ་དང་དཔུང་པ་གཡས་པ་དང་གཡོན་པ་དང་གཡོན་པ་དང་སྙིང་ག་དང་རྡོ་རྗེའི་སྟེང་དང༌། བརླ་གཡས་པ་དང་གཡོན་པ་དང་རྐང་པ་གཡས་གཡོན་རྣམས་ཀྱི་ནང་གི་སྦུབས་ན་གནས་པའི་ཟླ་བ་ཚེས་པའི་དཀྱིལ་འཁོར་རྣམས་ལ་ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ་ཞེས་བྱ་བའི་ཡི་གེ་སེར་པོ་འོད་སེར་པོ་དང་ལྡན་པ་བལྟ་བར་བྱ་བའོ། །དེའི་རྗེས་ལ་སྣ་བུག་གི་རླུང་ཕྱིར་འབྱུང་བའི་དུས་སུ་ཨོཾ་ལ་སོགས་པ་རྣམས་ཀྱི་འོད་ཟེར་དང་སྙིང་གའི་རྡོ་རྗེ་དང་ཧཱུཾ་གི་འོད་ཟེར་གྱིས་ཀྱང་ཕྱོགས་རྣམས་སུ་སྤྲོས་པས་རེག་པ་ཙམ་གྱིས་བཅོམ་ལྡན་འདས་ཀྱི་སྐུར་བྱས་པའི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བ་དབུགས་འཇུག་པའི་དུས་སུ་ཡི་གེ་ཧཱུཾ་ལ་ལེགས་པར་བཅུག་ལ་སེམས་གནས་པར་བྱ་བའི་དོན་དུ་མནན་པར་བྱ་བའོ། །འཇིག་རྟེན་གྱི་ཁམས་ཐམས་ཅད་ན་གནས་པའི་རིན་པོ་ཆེ་སྣ་ཚོགས་པ་རྣམས་ཀྱང་ཀླུ་དང་ནེའུ་ལེ་དང་ནོར་སྦྱིན་རྣམས་ཀྱི་ཁར་ལེགས་པར་གཞུག་པར་བྱ་བའོ། །ཡང་རླུང་ཕྱིར་རྒྱུ་བ་ན་ནི་ཀླུ་ལ་སོགས་པ་རྣམས་ཀྱིས་མེད་པའི་རིན་པོ་ཆེ་རྣམས་མདུན་གྱི་གཡོན་དུ་བསྒོམ་པར་བྱའོ།
དེ་ལྟར་ཡང་དང་ཡང་དུ་ཀུན་དུ་སྤྲོ་བ་དང་ལེགས་པར་བསྡུ་བ་ལ་སོགས་པ་ཡང་བྱའོ། །སྐྱོ་ན་དེའི་རྗེས་ལ། ན་མོ་རཏྣ་ཏྲ་ཡཱ་ཡ། ན་མོ་ན་ཎི་བྷ་དྲཱ་ཡ་རྨ་ཧཱ་ཡཀྵ་སེ་ན་པ་ཏ་ཡེ། ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ། ཞེས་བྱ་བའི་སྔགས་འདི་བཟླས་པར་བྱ་སྟེ། བགོད་པའི་ཡི་གེ་བཅུ་པོའི་སྔགས་ཀྱང་རུང་ངོ༌། །ཆུ་སྦྱིན་པའི་དུས་སུ་ནི་ལག་པ་གཡས་པའི་ཁ་བཀན་པའི་དབུས་སུ་ཡི་གེ་བཾ་གྱི་འོད་ཟེར་གྱིས་ལག་པ་བུམ་པ་བཟང་པོ་བཞིན་དུ་བྱས་ཤིང་ལག་མགུལ་དུ་ནི་ཡི་གེ་ཨོཾ་གྱི་འོད་ཀྱིས་ལག་གདུབ་ཀྱི་རྣམ་པ་དང་ལྡན་བར་ཏེ། བཾ་གྱི་དབུས་སུ་ནི་ཛི་ངོ༌། །མཛུབ་མོ་དང་གུང་མོ་དང་སྲིན་ལག་དང་མཐེའུ་ཆུད་དང་མཐེ་བོང་རྣམས་ཀྱི་རྩེ་མོ་ལ་ནི་ཛམྦྷ་ལ་ཛ་ལེནྡྲའི་ཡི་གེ་རྣམས་རིམ་པ་བཞིན་ནོ། །ཨོཾ་དང་བཾ་གཉིས་ཀྱི་བར་དུ་ནི་ཡའོ། །ཡི་གེ་ཨའི་གཡས་དང་གཡོན་གྱི་གློ་གཉིས་ལ་ནི་ཡི་གེ་སྭཱ་དང་ཧཱའོ། །ཡི་གེ་ལ་སོགས་པ་དེ་དག་རྣམས་ནི་རང་རང་གི་གནས་ཀྱི་སྦུབས་ན་ཟླ་བ་ལ་གནས་པ་སྟེ། ཁ་དོག་སེར་པོ་དང་འོད་ཟེར་པོ་ཅན་དུ་བསྒོམས་ལ་ཆུ་དང་བཅས་པ་མེ་ཏོག་གི་སྙིང་པོ་ཅན་གྱི་ལག་པ་ཁ་དང་ཐག་ཉེ་བར་བྱས་ཏེ། ཨོཾ་ཨིནྡྲ་ནི་མུ་ཁཾ་བྷྲ་མ་རི་སྭཱ་ཧཱ། ཞེས་བྱ་བའི་སྔགས་ཀྱིས་ལན་བདུན་དུ་མངོན་པར་བསྔགས་སོ། །དེའི་རྗེས་ཐོགས་ལ་ལག་པ་བརྐྱང་བས་སྦྱིན་པར་གྱུར་པ་ན་ཆུ་རང་གི་ཁ་ནས་ཞུགས་པར་གྱུར་ཏེ་ཡི་གེ་ཛཾ་གྱི་འོད་ཟེར་དང་སྙིང་ག་ན་གནས་པའི་ཛ་དང་རྡོ་རྗེ་དང་ཡི་གེ་ཧཱུཾ་གི་འོད་ཟེར་གྱིས་ཀྱང་བྱས་པས་རྡོ་རྗེ་ཁ་དོག་སེར་པོའི་ཁ་ནས་ངེས་པར་བྱུང་སྟེ། ལག་པ་ནས་བབ་པས་སྐད་ཅིག་གིས་མདུན་དུ་བསྒོམས་ནས་མདུན་གྱིས་ཕྱོགས་པ་དེའི་འམ། བཅོམ་ལྡན་འདས་འདིའི་སྐུ་གཟུགས་ཀྱང་རུང་སྟེ། ཞལ་གྱི་སྒོ་ཨོཾ་ཛླུཾ་སྭཱ་ཧཱ། ཞེས་བྱ་བའི་སྔགས་ཀྱིས་ལན་བརྒྱ་རྩ་བརྒྱད་དང༌། ན་མོ་རཏྣ་ཏྲ་ཡཱ་ཡ། ཞེས་བྱ་བ་ལ་སོགས་པས་ཀྱང་ལན་བདུན་དུ་སྦྱིན་པར་བྱའོ། །ཡང་ན་མོ་རཏྣ་ཞེས་བྱ་བ་ལ་སོགས་པ་ལན་ཅིག་བརྗོད་པས་བུ་རམ་དང་བསྲེས་པའི་སྐྱ་ཁུར་རམ་འབྲུ་ལ་སོགས་པའི་གཏོར་མ་བཅོམ་ལྡན་འདས་ལ་དབུལ་བར་བྱ་བའོ། །དེ་དག་དེ་ལྟར་ནུས་པ་ཇི་ལྟ་བ་བཞིན་དུ་ཐུན་གསུམ་མམ་ཐུན་གཅིག་ལ་རྗེས་སུ་བསྒྲུབ་པར་བྱ་ཞིང༌། བསྟོད་པ་དང་སྨོན་
ལམ་ཡང་གདབ་པར་བྱའོ། །དེའི་རྗེས་ལ་བསྒོམས་པའི་བཅོམ་ལྡན་འདས་ཨོཾ་བཛྲ་མུཿཞེས་བྱ་བས་གཤེགས་སུ་གསོལ་ལོ། །གཞན་ཡང་སྨིན་དྲུག་དང་རྟ་དང་ས་ག་དང་ཆུ་སྟོད་རྣམས་སམ། ཉ་གཞན་གང་ཡང་རུང་བའམ། དགེ་བའི་ཉི་མ་གཞན་དག་ལ་ཡང་རུང་སྟེ། རྡོ་བ་རངས་པར་སྐད་ཅིག་གིས་བཅོམ་ལྡན་འདས་ཀྱི་སྐུར་བསྐྱེད་པར་བྱ་ཞིང་ལེགས་པར་ཡང་མཆོད་ལ། བཟོ་བོ་བསྙེན་གནས་བླངས་པར་གྱུར་པས་ཉི་མ་གཅིག་གཉིས་ལ་སྐུ་བཞེངས་སུ་གསོལ་བར་བྱ་སྟེ་དཔའ་བོ་ཉོ་བ་ནི་མ་ཡིན་པས་སོ་བྱས་ལ་ཡང་བདག་ཉིད་བཞིན་དུ་བཅོམ་ལྡན་འདས་ཀྱི་སྐུ་རིམ་པ་ཇི་ལྟ་བ་བཞིན་དུ་ཡི་གེ་དགོད་པ་དང་བཅས་པ་རྣམ་པར་བསྒོམ་ལ། ཆུ་སྦྱིན་པ་ལ་སོགས་པས་མཉེས་པར་བྱ་བའོ་ཞེས་བྱ་བ་འདི་ནི་གདམས་དག་གོ །དེའི་ཚེ་ན་ནི་གཤེགས་སུ་གསོལ་བར་མི་བྱ་སྟེ། སྐུ་གཟུགས་ཀྱི་སྐུའི་བཅོམ་ལྡན་འདས་ནི་གང་གི་ཕྱིར་རྟག་ཏུ་གནས་པ་ཡིན་པས་བསྙེན་བཀུར་བར་བྱ་བ་ཡིན་ནོ་ཞེས་བྱ་བའོ། །པཎྜི་ཏ་ཨ་བྷ་ཡ་ཀ་ར་གུ་གུཔྟས་མཛེས་པར་སྦྱར་བའི་ཛམྦྷ་ལ་ཚོན་པོའི་སྒྲུབ་ཐབས་རྫོགས་སོ།། །།པཎྜི་ཏ་མཁས་པ་དེ་ཉིད་དང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །