འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། འོད་ཟེར་ཅན་མ་ལ་ཕྱག་འཚལ་ལོ། །ཨོཾ་ཨཱཿ་ཧྲཱི་སྭཱ་ཧཱ། ཞེས་བྱ་བ་རྣམས་བདག་ཉིད་ཀྱི་མགོ་བོ་དང་དཔྲལ་བ་དང༌། མགྲིན་པ་དང༌། སྙིང་ག་དང༌། བུས་པོ་གཉིས་པོ་རྣམས་ལ་རྣམ་པར་བསྒོམས་ལ། ཡི་གེ་ཨོཾ་ལས་ངེས་པར་གྲུབ་པའི་རྡོ་རྗེ་དབྱིངས་ཀྱི་དབང་ཕྱུག་མའི་འོད་ཟེར་ཅན་སྐུ་མདོག་དམར་མོ་སྟེ། ཞལ་དྲུག་མ་ཕྱག་བཅུ་གཉིས་མ། གསུས་པ་འཇོལ་བ། དབུ་སྐྲ་སེར་པོ་གྱེན་དུ་འབར་བར་གྱུར་པ། ཐོད་པའི་ཕྲེང་བ་འཕྱད་བ། སྦྲུལ་གྱི་སྨད་ཀ་ད་ལྡན་པ། སྟག་གི་པགས་པའི་ཤམ་ཐབས་ཅན། ཞབས་གཉིས་ཀྱིས་བགེགས་ཀྱི་ཚོགས་དུ་མ་ཀུན་ནས་མནན་པ། མཆོད་རྟེན་གྱི་ནང་ན་ཉི་མའི་དཀྱིལ་འཁོར་ལ་གཡས་བསྐུམ་པས་བཞུགས་པ། རྣམ་པར་སྣང་མཛད་དབུ་རྒྱན་དང་ལྡན་པ། ཕག་སྣ་ཚོགས་ཀྱིས་འདྲེན་པའི་ཤིང་རྟ་ལའོ། །དམར་མོ་དང༌། ནག་མོ་དང༌། ལྗང་གུ་དང་སེར་མོ་དང༌། དཀར་མོ་ནི་དང་པོ་ལ་སོགས་པའི་ཞལ་ལྔ་པའོ། །ཞལ་གཅིག་ནི་སྟེང་ན་སྟེ་ཕག་གི་ཞལ་ནག་མོ། །གཡས་ཀྱི་རྣམས་ན་ནི་རལ་གྲི་དང་དབྱུག་ཏོ་དང་མདའ་དང་ལྕགས་ཀྱུ་དང་རྡོ་རྗེ་རྩེ་གཅིག་པ་དང་མདུང་རྣམས་སོ། །གཡོན་གྱི་རྣམས་ན་ནི་ཞགས་ཕ་དང་བཅས་པའི་སྡིགས་མཛུབ་དང་ཐོད་པ་དང༌། ཤིང་མྱ་ངན་མེད་ལོ་འདབ་དང་བཅས་པ་དང༌།
ཚངས་པའི་མགོ་བོ་དང༌། གཞུ་དང༌། མདུང་ཐུང་རྩེ་གསུམ་པ་རྣམས་བསྣམས་པར་མཛད་དོ། །སྤྱན་གསུམ་མ་ལྗགས་འདྲིལ་བར་མཛད་པ། ཞལ་མཆེ་བ་རྣམ་པར་གཙིགས་པ། ཤིན་ཏུ་འཇིགས་པ་ཆེན་པོར་མཛད་པར་བསམ་པར་བྱ་བའོ། །ཤིང་རྟའི་ནང་དུ་ཕྱག་གཉིས་མ་སྡིགས་མཛུབ་དང་ཤིང་མྱ་ངན་མེད་ལོ་འདབ་དང་ལྡན་པ་ཕྱག་ན་བསྣམས་ཤིང་ཤིང་རྟ་བསྐྱོད་པར་མཛད་པ། གདན་ལ་ཞབས་གཡས་བསྐུམ་པས་གནས་པ། འཇིགས་སུ་རུང་བར་མཛད་པར་བསམ་པར་བྱའོ། །སྤྲོ་བ་ལ་སོགས་པ་སྔོན་དུ་འགྲོ་བས་མ་རུངས་པའི་སེམས་ཅན་རྣམས་རེངས་པར་གྱིས་ཤིག་རྨོངས་པར་གྱིས་ཤིག་ཆོམས་ཤིག །ཨོཾ་རྡོ་རྗེ་དབྱིངས་ཀྱི་དབང་ཕྱུག་མ། སེམས་ཅན་མ་རུངས་པ་ཐམས་ཅད་ཧ་ན་ཧ་ན་ད་ཧ་ད་ཧ་པ་ཙ་པ་ཙ་ཨོཾ་འོད་ཟེར་ཅན་ཨོཾ་ཧཱུཾ་ཕཊ་སྭཱ་ཧཱ། ཞེས་བྱ་བའི་སྔགས་འདི་བཟླས་པར་བྱ་བའོ། །འོད་ཟེར་ཅན་གྱི་སྒྲུབ་ཐབས་སོ། །ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །