གཤིན་རྗེ་གཤེད་ནག་པོའི་སྒྲུབ་ཐབས།
རྒྱ་གར་སྐད་དུ། ཀྲྀཥྞ་ཡ་མཱ་རི་སྭཱ་དྷ་ནཾ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས། གང་གི་ཐུགས་རྡོ་རྗེའི་དབང་གིས་ནང་ན་དགྱེས་པ་ཉིད་ཡིན་ཡང༌། །མ་རུངས་གདུལ་བྱའི་སྐྱེ་བོ་རྣམས་ལ་དྲག་པོར་ཡང་དག་སྟོན། །སྣ་ཚོགས་ཉེར་ཕན་ཚུན་གྱིས་གཤིན་རྗེ་གཤེད་ཡོད་ཀྱང༌། །གར་མཛད་པ་ཡི་སྐུ་དེ་བདག་གིས་རབ་ཏུ་དགོད་པར་བྱ། །དང་པོར་སྒྲུབ་པ་པོ་ཡི་མཆོག་དེས་བདེ་འབྱུང་སྟན་གནས་ལ། །བསམ་གཏན་གནས་ཁང་དྲི་ཞིམ་དྲི་ཡིས་ཡིད་ནི་དགར་གྱུར་པར། །བསྒོམ་པར་བྱ་སྟེ་མཉམ་གཞག་ཡིད་ཀྱིས་རང་གི་སྙིང་གར་ནི། འོད་ཟེར་གཏུམ་པོའི་གཟུགས་ཀྱི་དཀྱིལ་འཁོར་དམར་པོ་གཟི་ལྡན་པའོ། །དེ་སྟེང་གནས་པའི་ཧཱུཾ་ཡིག་མདོག་སྔོན་འོད་ཟེར་དང་ལྡན་པའི། །འོད་ཟེར་བརྒྱ་བྱུང་གཤིན་རྗེ་གཤེད་ལ་སོགས་པ་རྣམས་ལ་ནི། །ཡིད་ཀྱིས་སྤྲུལ་པའི་མེ་ཏོག་བདུག་པ་མར་མེ་ལ་སོགས་པ། །རྣམ་པ་མང་པོས་ལེགས་པར་མཆོད་བྱ་གུས་པས་ཕྱག་ཀྱང་བཙལ། །སྔོན་བྱས་པ་ཡི་སྡིག་པ་བཤགས་པ་ལ་སོགས་བྱས་པས་ནི། །སྟོང་པར་འཇིག་རྟེན་མ་ལུས་རབ་ཏུ་བརྩོན་པར་སྔོན་བྱ་བ། །ཨོཾ། སྟོང་པ་ཉིད་ལ་སོགས་པའི་གསང་སྔགས་ཚིག་མཆོག་རྣམས་ཀྱིས་བྱ། །བདག་ཉིད་ངོ་བོ་གུས་པ་ཉིད་ཀྱིས་ཡོངས་སུ་བསྒོམ་བྱ་བ། །བདུག་པའི་འོད་ཟེར་གཟི་བརྗིད་དང་ལྡན་དཀྱིལ་འཁོར་དམར་གནས་པའི། །ཧཱུཾ་ཡིག་སྔོན་པོའི་གཟུགས་ལས་རྡོ་རྗེས་མཚན་པའི་དབྱུག་སྔོན་ཏེ། །དབྱུག་པ་ལ་གནས་ཧཱུཾ་གཟུགས་མཆོག་ལས་འོད་ཟེར་དྲ་བ་རྣམས། །འཕྲོས་པས་ལེགས་བསྐུལ་མ་ལུས་རྒྱལ་བ་སྤྱན་དྲངས་རབ་བཅུག་པར། །བལྟས་ལ་དེ་དག་ཉིད་ནི་མ་ལུས་ཡོངས་སུ་གྱུར་པ་ལས་ནི་ཕྱིས། །བདག་ཉིད་མྱུར་བར་གཤིན་རྗེ་གཤེད་སྐུར་ཡོངས་སུ་བསྒོམ་བྱ་བ། །མཐིང་ནག་སྐུ་སྟེ་ཁྲོ་བ་
དད་ལྡན་ཞལ་གཅིག་ཕྱག་གཉིས་པ། །ཕྱག་གཡས་ན་ནི་རྡོ་རྗེས་མཚན་པའི་དབྱུག་ཏོ་སྔོན་པོ་སྟེ། །སྡིགས་མཛུབ་ཞགས་པ་དང་ལྡན་གཡོན་པའི་ཕྱག་ནི་ཐུགས་ཀར་རོ། །སྨད་སྨིན་སེར་འབར་བར་གྱུར་པའི་ཞལ་གྱི་པདྨའོ། །སྟག་དང་ཛི་ནའི་པགས་པ་གསང་བའི་ཕྱོགས་སུ་ལེགས་པར་བསྣམས། །ཁ་ནང་རྣམ་པར་འགྱུར་བའི་རོ་དང་ལྡན་པར་གྱུར་པའི་སྤྲུལ། །འདབ་སྣ་ཚོགས་པའི་པདྨ་དམ་པའི་སྟེང་ན་ཉི་མ་ཡི། །གདན་ལ་ལེགས་གནས་མ་ཧིཪྵ་གཏུམ་རབ་ཏུ་བརྩོན་གནོན་པའི། །གྲོད་འཇོལ་ཞལ་སྒྱུར་མཆེ་བ་རྣམ་པར་གཙིགས་པའི་བོང་ཐུང་ངོ༌། །ཉི་མའི་དཀྱིལ་འཁོར་གདན་བཞུགས་སྒྱུར་བར་མཛད་པའི་སྤྱན་གཉིས་པ། །ཁྲོས་པའི་ཀླུ་བརྒྱད་དག་གིས་སྤྲས་པའི་རྒྱན་ལྡན་ཐོད་ཕྲེང་གིས། །སེར་ཞིང་སྡུག་པའི་དབུ་སྐྲ་སྤོར་བའི་འཁོར་ལོ་ལེགས་པར་བཅིངས། །མི་མགོ་ལས་བྱས་དམ་པའི་ཚད་ལྡན་དོ་ཤལ་འཆང་བ་ཅན། །ཧ་ཧ་ཆེར་དགོད་ཉམས་ཀྱིས་བདུད་དཔུང་ཀུན་ནས་སྐྲག་པར་མཛད། །ཕྱི་ནས་བཅོམ་ལྡན་ཐུགས་ཀར་གནས་པའི་ཉི་མ་ལ་གནས་པར། །ཧཱུཾ་དབྱིབས་འོད་ཀྱིས་སྣ་ཚོགས་ཀུན་ནས་གསལ་བྱས་རྣམ་པར་བསམ། །དེ་ལ་ལེགས་གཞུག་དུས་མི་རིང་བར་ཡང་ནི་སྤྲོ་བར་བྱ། །རིམ་འདིས་སྤྲོ་དང་བསྡུ་བ་ཇི་སྲིད་འདོད་ཀྱི་བར་བྱས་ལ། །ཡང་ན་དམ་ཚིག་སྔོན་དུ་འགྲོ་བ་ཉིད་ཀྱིས་ཐམས་ཅད་ཀྱང༌། །ཐུན་ཚོད་བཞི་ནི་འདི་དག་མ་ལུས་རྣམ་པར་བསྒོམ་པར་བྱ། །ངལ་ན་ཇི་ལྟར་བརྗོད་པའི་སྔགས་ནི་རབ་ཏུ་བཟླས་པར་བྱ། །བཅོམ་ལྡན་གཤིན་རྗེ་གཤེད་ཀྱི་སྒྲུབ་ཐབས་ཡང་མོ་བྱམས་པའི་དཔལ། །བདག་གིས་བྱས་པའི་བསོད་ནམས་གྲངས་མེད་འདིར་ནི་གང་སྐྱེས་པ། །དེས་ནི་འཇིག་རྟེན་མ་ལུས་བཅོམ་ལྡན་གཤིན་རྗེ་གཤེད་སྐུར་ཤོག །བདག་ཀྱང་རིང་མིན་ཉིད་ནས་གཤིན་རྗེ་གཤེད་དུ་འགྱུར་བར་ཤོག །དེ་ལ་གསང་སྔགས་རྒྱལ་པོ་ནི་འདི་ཡིན་ཏེ། ཨོཾ་ཧྲཱྀཿཥྚྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཤིན་རྗེ་གཤེད་ནག་པོའི་སྒྲུབ་ཐབས་སོ།། །།ཨ་བྷ་ཡ་ལ་སོགས་པའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་པའོ། །