རྡོ་རྗེ་ཧཱུཾ་མཛད་ཀྱི་སྒྲུབ་ཐབས།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། བཛྲ་ཧཱུཾ་ཀཱ་ར་སཱ་དྷ་ནཾ། བོད་སྐད་དུ། རྡོ་རྗེ་ཧཱུཾ་མཛད་ཀྱི་སྒྲུབ་ཐབས། སྔར་བཤད་པའི་ཆོ་གའི་རིམ་པས་ནམ་མཁའི་དབྱིངས་སུ་ཡི་གེ་ར་ལས་བྱུང་བའི་ཉི་མ་ལ། ཡི་གེ་ཧཱུཾ་འབར་བའི་འོད་དཔུང་བསྐལ་པའི་མེ་ལྟར་ཤིན་ཏུ་འབར་བ་ཁ་དོག་ནག་པོ་གཟི་བརྗིད་ཆེན་པོས་འཁྲིགས་པའོ། །དེ་བྱུང་དྲག་པོ་ཆེན་པོ་ནི། རྡོ་རྗེ་ཧཱུཾ་མཛད་ཅེས་བྱ་བ། གདུག་ཆེན་འཇིགས་པའི་གང་རྒྱངས་ཅན། །ཁམས་གསུམ་པ་ནི་བསྐྱོད་པར་མཛད། །རྡོ་རྗེ་དྲིལ་བུའི་སྦྱོར་བ་ཡིས། །ཕྱག་གཉིས་ཕྱག་རྒྱ་འཆང་བར་མཛད། །གཡས་བསྐུམས་པ་ཡི་ཞབས་གཉིས་ཀྱིས། །འཇིགས་བྱེད་གནོན་མཛད་འཇིགས་མཛད་པོ། །སྙིང་མགུལ་མགོ་ལ་དགོད་བྱ་བ། །ཨོཾ་ཨཱཿ་ཧཱུཾ་གི་ཡི་གེ་གསུམ། །དབང་བསྐུར་བ་ཡི་ཆོ་ག་ཡིས། །རྡོ་རྗེ་སེམས་ཀྱིས་རྒྱས་བཏབ་པའོ། །སྔགས་ནི་ཨོཾ་ཧཱུཾ་ཧཱུཾ་ཕཊ་སྭཱ་ཧཱ། རྡོ་རྗེ་ཧཱུཾ་མཛད་ཀྱི་སྒྲུབ་ཐབས་སོ།། །།ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །