དགྱེས་པའི་རྡོ་རྗེའི་སྒྲུབ་ཐབས།
རྒྱ་གར་སྐད་དུ། ཧེ་བཛྲ་སཱ་དྷ་ནཾ། བོད་སྐད་དུ། དགྱེས་པའི་རྡོ་རྗེའི་སྒྲུབ་ཐབས། འཇིག་རྟེན་གསུམ་སྐྱོང་ཧེ་རུ་ཀ །བླ་མ་མགོན་ལ་ཕྱག་འཚལ་ནས། ཤཱནྟཱི་ཞལ་སྔ་ནས་གསུངས་དེའི། །སྒྲུབ་ཐབས་ཆོ་གར་རྣམ་པར་དབྱེ། །དཔའ་བོ་ཞལ་གཅིག་ཕྱག་གཉིས་པ། །མགུལ་པར་བདག་མེད་མ་ཡིས་འཁྱུད། །འཁོར་ལོ་ལ་སོགས་རྒྱན་དང་ལྡན། །སྤྱན་གསུམ་རྐང་གཉིས་རྒྱལ་པོའོ། །རྒྱུད་འདིར་བསྒོམ་པའི་དབང་དུ་བྱས་པའི་རྣལ་འབྱོར་པས། ནམ་མཁའ་བྱུང་བ་དང་སྟན་ལས་ལངས་ལ། རང་གི་སྙིང་གར་ཉི་མ་ལ་གནས་པའི་ཡི་གེ་ཧཱུཾ་བལྟས་ཏེ། དེའི་འོད་ཟེར་གྱིས་དཔལ་ཧེ་རུ་ཀ་ལེགས་པར་གསལ་བར་བྱས་ཤིང་སྤྱན་དྲངས་ལ། མེ་ཏོག་ལ་སོགས་པའི་ཉེ་བར་མཁོ་བའི་ཡོ་
བྱད་ལྔས་ཡང་དག་པར་མཆོད་དེ། དེའི་སྤྱན་སྔར་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། གསུམ་ལ་སྐྱབས་སུ་འགྲོ་བ་ཡང་བྱས་ལ་བྱང་ཆུབ་ཆེན་པོའི་སེམས་བསྐྱེད་དེ། སེམས་ཅན་རྣམས་ལ་ལྷ་རྫས་ཀྱི་བདེ་བ་ཉེ་བར་སྒྲུབ་པར་བྱེད་པའི་རྣམ་བའི་བྱམས་པ་དང༌། སྡུག་བསྔལ་ཐམས་ཅད་སྤོང་བར་བྱེད་པའི་སྙིང་རྗེ་དང༌། བདེ་བ་དེ་ཇི་སྲིད་དུ་རྒྱུན་མི་འཆད་པ་ཉིད་དུ་དགའ་བ་དང༌། ཉོན་མོངས་པ་དང་ཉེ་བའི་ཉོན་མོངས་པ་དང༌། གཟུང་བ་དང༌། འཛིན་པ་ལ་སོགས་པ་ཡིད་ལ་མི་བྱེད་པའི་མཚན་ཉིད་ཀྱི་བཏང་སྙོམས་ཀྱང་བསྒོམ་པར་བྱ་བའོ། །དེ་ནས་ཆོས་དང་གང་ཟག་ལ་སོགས་པ་རྣམ་པར་རྟོག་པའི་དྲི་མ་སྤངས་པའི་རང་བཞིན་སྟོན་ཀ་དྲི་མ་མེད་པའི་ནམ་ཕྱེད་ཀྱི་ནམ་མཁའ་དང་མཚུངས་པར་གཉིས་སུ་མེད་པའི་ཡེ་ཤེས་ཀྱི་རང་བཞིན་གཅིག་པོ་སྟོང་པ་ཉིད་རྣམ་པར་བསྒོམས་ལ། ཨོཾ་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ནི་ང་ཡིན་ནོ་ཞེས་བྱ་བ་འདིས་བྱིན་གྱིས་བརླབ་པར་བྱ་བའོ། །དེ་ནས་རབ་ཏུ་སད་པས་ནམ་མཁའི་དབྱིངས་སུ་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུཾ་བལྟས་ལ། དེ་ཡོངས་སུ་གྱུར་པ་ལས་རྡོ་རྗེའི་ལྟེ་བ་ལ་གནས་པའི་ཡི་གེ་ཧཱུཾ་བལྟ་བར་བྱ་བའོ། །དེ་ལས་འོད་སྤྲོས་པ་ལས་ཀུན་ནས་བྱུང་བའི་དཔལ་ཧེ་རུ་ཀའི་གཟུགས་རྣམས་ཀྱིས་འཇིག་རྟེན་གྱི་དོན་མཐའ་དག་བྱས་ནས་དེ་ཉིད་ལ་ལེགས་པར་གཞུག་པར་བྱེད་པའོ། །དེ་ཡོངས་སུ་གྱུར་པ་ལས་དཔལ་ཧེ་རུ་ཀ་སྟེ། པདྨ་འདབ་མ་སྣ་ཚོགས་པ་ལ་གནས་པའི་སྟེང་ན་ཉི་མའི་དཀྱིལ་འཁོར་ལ་བཞུགས་པ་སྤྱན་མིག་གསུམ་པ། ཕྱག་གཉིས་པའི་ཕྱག་གཡས་པས་ནི་རྡོ་རྗེའོ། །གཡོན་པས་ནི་རྡོ་རྗེས་མཚན་པའི་ཐོད་པ་བསྣམས་པའོ། །ཞབས་ངོས་ཤིག་གི་ལྗིད་ཀྱིས་འབེབས་པ། སྟག་གི་པགས་པའི་ཤམ་ཐབས་མནབས་པ། དབུ་ལ་མི་རུས་ལས་བྱས་པའི་མི་བསྐྱོད་པའི་བདག་ཉིད་ཀྱི་འཁོར་ལོ་དང་ལྡན་པ། སྙན་ལ་སྣང་བ་མཐའ་ཡས་ཀྱི་བདག་ཉིད་ཀྱི་མི་རུས་ཀྱི་རྣ་གདུབ་པོ། །མགུལ་པ་ན་རིན་ཆེན་འབྱུང་ལྡན་གྱི་བདག་ཉིད་ཀྱི་མགུལ་རྒྱན་དང་ལྡན་པའོ། །ལག་མགུལ་ན་རྣམ་པར་སྣང་མཛད་ཀྱི་བདག་ཉིད་ཀྱི་ལག་གདུབ་དང་ལྡན་པའོ། །རྐེད་པ་ན་དོན་ཡོད་གྲུབ་པའི་བདག་ཉིད་
ཀྱི་སྨད་ཀ་དང་ལྡན་པའོ། །སྐྲའི་ཐི་གུའི་དག་བྱེད་ཀྱི་ག་ཤ་དང༌། དཔུང་རྒྱན་དང༌། རྐང་རྒྱན་དང་ལྡན་པ་དབུ་སྐྲ་ཁམ་པ་གྱེན་ལ་ཕྱོགས་པའོ། །ཞལ་གཅིག་ཕྱག་གཉིས་མ། གྲི་གུག་དང་ཐོད་པ་བསྣམས་པའི་བདག་མེད་མ་ལ་ཀུན་ནས་འཁྱུད་པའོ། །དེ་ལྟ་བུར་གྱུར་པར་བདག་ཉིད་རྣམ་པར་བསྒོམ་པར་བྱ་བའོ། །དེ་ནས་འདིར་རྣ་བ་ལ་ནི་བདག་མེད་མའོ། །མིག་ལ་ནི་རྡོ་རྗེ་མའོ། །སྣ་ལ་ནི་གཽ་རཱི་སྦེད་མའོ། །ལྕེ་ལ་ནི་བཱ་རི་རྣལ་འབྱོར་མའོ། །ལུས་ཀྱི་དབང་པོ་ལ་ནི་རྡོ་རྗེ་མཁའ་འགྲོ་མའོ། །ཡིད་ལ་ནི་བདག་མེད་མར་མོས་པར་བྱའོ། །དེ་ནས་མགོ་བོ་ལ་ནི་པདྨ་འདབ་མ་སུམ་ཅུ་རྩ་གཉིས་པའི་སྟེང་དུ་ཁ་འོག་ཏུ་བལྟས་པའི་ཡི་གེ་ཧཱུཾ་ངོ༌། །ལྟེ་བར་པདྨ་འདབ་མ་དྲུག་ཅུ་རྩ་བཞི་པའི་སྟེང་དུ་ཁ་གྱེན་ལ་བལྟས་པའི་ཡི་གེ་ཨོཾ་བསམ་པར་བྱ་བའོ། །དེ་ནས་དམ་ཚིག་སེམས་དཔའ་དང་འདྲ་བའི་ཡེ་ཤེས་སེམས་དཔའ་སྤྱན་དྲངས་ལ། ཛཿ་ཧཱུཾ་བཾ་ཧོཿ་ཞེས་བྱ་བའི་སྔགས་འདིས་དྲངས་ཤིང་ལེགས་བར་བཅུག་ལ་བཅིངས་ཏེ། དབང་དུ་བྱས་པས་ཆུ་དང་འོ་མ་བཞིན་དུ་རོ་གཅིག་ཏུ་བྱ་བའོ། །དེའི་རྗེས་ཐོགས་ལ་རང་གི་སྙིང་གའི་ཉི་མ་ལ་རྡོ་རྗེའི་ལྟེ་བ་ལ་གནས་པའི་ཡི་གེ་ཧཱུཾ་གི་འོད་ཟེར་ཀུན་དུ་སྤྲོ་བར་བྱ་བའོ། །དེ་སྤྲོས་པས་དེ་བཞིན་གཤེགས་པ་རྣམས་ཐམས་ཅད་ཀྱི་རང་བཞིན་དུ་གྱུར་པའི་ཧེ་རུ་ཀ་སྤྱན་དྲངས་ལ་མཆོད་པ་བྱས་ཏེ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། བྱ་བ་འདིས་གསོལ་བ་གདབ་པར་བྱ་བའོ། །དེ་དག་གིས་བདུད་རྩི་ལྔས་གང་བའི་ནོར་བུའི་བུམ་པས་བདག་ཉིད་ལ་དབང་བསྐུར་བས་མགོན་པོ་མི་བསྐྱོད་པ་དེ་དབུ་རྒྱན་ལ་གནས་པ་བསྒོམ་པར་བྱ་ཞིང༌། རྣལ་འབྱོར་མའི་ཚོགས་དེ་ཐམས་ཅད་ཀྱིས་ཀྱང་བྱང་ཆུབ་ཀྱི་སེམས་ལ་སོགས་པ་རང་རང་གི་རྫས་རྣམས་ཀྱིས་མཆོད་པ་བྱེད་པར་ཡང་ངོ༌། །དེ་ནས་ནི། འཇིགས་བྱེད་ཆེན་པོ་མཚེ་གཙིགས་ཤིང༌། །རྒྱུ་མའི་ཕྲེང་བ་དག་གིས་བརྒྱན། །ཤ་ཆེན་གསོལ་བར་གྱུར་བ་ཡི། །ཧེ་རུ་ཀ་དཔལ་བདག་ཕྱག་འཚལ། །ཞེས་བྱ་བས་བསྟོད་པར་བྱ་བའོ། །དེ་ནས་ནམ་མཁའ་ཡི་གེ་ཧཱུཾ་ཡོངས་སུ་གྱུར་པས་ཞུ་བའི་རྫས་སོ། །དེའི་འོག་ཏུ་ནི་ཡི་གེ་ཨ་ཡོངས་སུ་གྱུར་པ་ལས་པདྨའི་སྣོད་དོ། །དབུས་སུ་ཡི་གེ་ཨོཾ་གྱིས་མཚན་པའི་གོ །ཀུ། ད། ཧ། ན། མ། ར། མུ། ཤུ། བི། ལ་སོགས་
པའི་དམ་ཚིག་གི་རྫས་རྣམས་རྡོ་རྗེ་དང་པདྨ་མཉམ་དུ་སྦྱོར་བས་མེ་སྦར་བར་བྱ་བའོ། །དེས་རྫས་རྣམས་བསྐོལ་བར་བྱའོ། །སྨིན་པ་ན་ཁུ་བར་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་མཐོང་བར་བྱེད་པའི་ཡེ་ཤེས་ཀྱི་ཉི་མའི་འོད་འབར་བ་དང༌། ཡེ་ཤེས་ཀྱི་ས་བོན་དེ་འབར་བ་དག་གིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་ཀུན་ནས་དྲངས་ཏེ་རྫས་དེ་དག་རྣམས་དང་ལྷན་ཅིག་ཏུ་བྱས་ལ། ཨོཾ་ཨཱཿ་ཧཱུཾ་ཞེས་བྱ་བའི་ཡི་གེ་གསུམ་གྱིས་བྱིན་གྱིས་ཀྱང་བརླབས་ཏེ། ཡི་གེ་ཧཱུཾ་དཀར་པོ་ལས་བྱུང་བའི་ལྕེ་རྡོ་རྗེའི་བདག་ཉིད་དུ་བྱས་ལ། དེས་བདག་ཉིད་ལེགས་པར་ཚིམ་པར་བྱ་བའོ། །དེ་ནས་སྙིང་གའི་ཉི་མ་ལ་རྡོ་རྗེའི་ལྟ་བ་ལ་གནས་པའི་ཡི་གེ་ཧཱུཾ་ཀུན་ནས་ལེགས་པར་བསྐོར་ནས་གནས་པའི། ཨོཾ་ཏྲཻ་ལོ་ཀྱཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བྱ་བའི་སྔགས་ཀྱི་ཕྲེང་བ་ཡི་གེ་བཅུ་གཉིས་པོ་རྣམས་མར་མེའི་ཕྲེང་བ་བཞིན་དུ་འབར་བར་གྱུར་པར་ཡིད་ལ་བྱས་ཏེ། རིམ་པས་བརྗོད་པ་བཞིན་དུ་ཀུན་ནས་བསམས་པས་བཟླས་པར་བྱ་བའོ། །སྔ་དྲོ་དང༌། ཉི་མ་གཅིག་གི་ཐུན་དག་ལ་ནི་སྐད་ཅིག་གིས་དཔལ་ཧེ་རུ་ཀའི་གཟུགས་སུ་བདག་ཉིད་ཀུན་ནས་དམིགས་ལ། དེ་ནས་མིག་ལ་སོགས་པ་རྣམ་པར་དག་པ་དང༌། འཁོར་ལོ་བཞི་བསྒོམ་པ་དང༌། མཆོད་པ་དང༌། བསྟོད་པ་དང༌། བདུད་རྩི་མྱང་བ་དང༌། བཟླས་པ་ལ་སོགས་པ་བྱ་བའོ། །དཔའ་བོ་འཇིག་རྟེན་གསུམ་བསྐྱོད་པའི། །སྒྲུབ་ཐབས་དམ་པ་བྱས་པ་ལས། །བསོད་ནམས་བདག་ལ་གང་སྐྱེས་དེས། །འགྲོ་ཀུན་རྡོ་རྗེ་འཛིན་པར་ཤོག །དགྱེས་པའི་རྡོ་རྗེ་ཕྱག་གཉིས་པའི་སྒྲུབ་ཐབས་རྫོགས་སོ།། །།པཎྜི་ཏ་དཱ་དང་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བག་ཚ་བ་མེད་པར་བསྒྱུར་བའོ། །