ཨཽ་ཌྱན་ནས་བྱུང་བའི་འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། ཨཽ་ཊི་ཡ་ན་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨཽ་ཊྱན་ནས་བྱུང་བའི་འོད་ཟེར་ཅན་གྱི་སྒྲུབ་ཐབས། ཨཽ་ཊྱན་ནས་འབྱུང་བའི་འོད་ཟེར་ཅན་གྱི་སྒྲུབ་ཐབས་སུ་གྱུར་པ་ནི་དང་པོར་རེ་ཞིག་རང་གི་སྙིང་གར་ཡི་གེ་ཨཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ས་བོན་དང་པོའི་བཅུ་གསུམ་པ་ཟླ་བ་ཚེས་པ་དང༌། ཐིག་ལེས་བརྒྱན་པའོ། །དེ་ཁོ་ན་བཞིན་དུ་སྡིག་པ་བཤགས་པ་ལ་སོགས་པ་ཐམས་ཅད་བྱས་ལ། དེ་ཉིད་ཡོངས་སུ་རྫོགས་པ་ལས་ནི་མཾ་མོ། དེ་དག་ཐམས་ཅད་ཡོངས་སུ་གྱུར་པ་ལས་འོད་ཟེར་ཅན་དེ། སྐུ་མདོག་དམར་མོ། ཞལ་དྲུག་མ། ཕྱག་བཅུ་གཉིས་མའོ། །ཞལ་དང་པོ་ནི་དམར་མོའོ། །གཉིས་པ་ནི་ནག་མོའོ། །གསུམ་པ་ནི་ལྗང་གུའོ། །བཞི་པ་ནི་སེར་མོའོ། །ལྔ་པ་ནི་དཀར་མོའོ། །དབུས་ལ་གནས་པའི་དྲུག་པ་ནི་སྟེང་ན་སྟེ་ཕག་གི་ཞལ་ནག་མོའོ། །ཤིང་མྱ་ངན་མེད་ཀྱི་མཆོད་རྟེན་རྒྱན་དུ་བྱས་པ། རྣམ་པར་སྣང་མཛད་སེར་པོ་དབུ་ལ་བཞུགས་པ། གསུས་པ་འཇོལ་བ། ཐོད་པའི་ཕྲེང་བས་རྣམ་པར་བརྒྱན་པ་སྐྲ་ཁམ་སེར་གྱེན་དུ་འཕུར་པ། བྱ་ཁྱུང་གིས་རྣམ་པར་བརྒྱན་པ། སྟག་གི་པགས་པའི་ཤམ་ཐབས་བསྣམས་པ། བགེགས་མནན་པའི་ཕག་ལ་གཡས་བསྐུམ་པས་གནས་པ། གཡས་པའི་ཕྱག་རྣམས་ན་ནི་རལ་གྲི་དང་རྡོ་རྗེ་དང་དབྱུག་ཏོ་དང་མདའ་དང་རྡོ་རྗེ་རྩེ་གཅིག་པ་དང་མདུང་རྣམས་སོ། །གཡོན་པའི་ཕྱག་རྣམས་ན་ནི་སྡིགས་མཛུབ་མཛད་པས་ཞགས་པ་དང་ཐོད་པ་དང་ཤིང་མྱ་ངན་མེད་འདབ་མ་དང་ལྡན་པ་དང་ཚངས་པའི་མགོ་བོ་དང་གཞུ་དང་མདུང་ཐུང་རྩེ་གསུམ་པའོ། །སྤྱན་གསུམ་དམར་ཞིང་ཟླུམ་པ། ཞལ་མཆེ་བ་རྣམ་པར་གཙིགས་པ་ཤིང་རྟའི་དབུས་ན་བཞུགས་པའོ། །ལྷ་མོ་གཞན་ནི་ཕྱག་གཉིས་མ་སྟེ་སྡིགས་མཛུབ་མཛད་ཅིང་ཞགས་པ་དད་ལོ་འདབ་དང་བཅས་པ་བསྣམས་པའི་བཅོམ་ལྡན་འདས་མ་ཉིད་ང་ཡིན་ནོ་བར་བསྒོམ་པར་བྱ་བའོ། །དེ་ནས་ཕྱག་རྒྱ་བཅིང་བར་བྱ་སྟེ། རྡོ་རྗེའི་སྙིམ་པ་ལེགས་པར་བཅིངས་ལ། གུང་མོ་དག་ཅུང་ཟད་བསྐུམ་པས་རྩེ་སྤྲད་དེ་སྒྲེང་ཞིང་དཀྱིལ་བ་ཀུག་ནས་བསྐུམ་པའི་རྩེ་མོ་ལ་མཐེ་བོང་གཉིས་ཀྱིས་མནན་པའོ། །སྔགས་ནི་ཨོཾ་མཱ་རཱི་ཙྱཻ། ཨོཾ་མཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨཽ་ཊྱན་གྱི་འོད་ཟེར་ཅན་གྱི་སྒྲུབ་ཐབས་སོ། །ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །