འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། དང་པོར་སྙིང་གར་ཉི་མའི་གདན་ལ་ཡི་གེ་ཧཱུཾ་ལས་འོད་སྤྲོས་པས་བཅོམ་ལྡན་འདས་མ་སྤྱན་དྲངས་ལ། མཆོད་པའི་རྣམ་པ་དུ་མ་རྣམས་དང་སྡིག་པ་བཤགས་པ་ལ་སོགས་པ་བྱས་ཏེ། སྟོང་པ་ཉིད་ཀྱང་བསྒོམ་པའི་རྗེས་ཐོགས་ལ། སྣ་ཚོགས་རྡོ་རྗེའི་རྣམ་པར་སེམས་ཀྱིས་ལེགས་པར་བསམ་མོ། །དེ་ཡོངས་སུ་གྱུར་པ་ལས་རྡོ་རྗེའི་ས་གཞི་དང་རྡོ་རྗེའི་ར་བ་ལ་སོགས་པ་ཡོངས་སུ་བསྒོམས་ལ། དེའི་དབུས་སུ་དཔལ་ཨུ་ཌྱན་གྱི་གདན་གྲུ་གསུམ་པ་ཤིན་ཏུ་དམར་པའོ། །དེའི་དབུས་སུ་ཉི་མ་ལ་གནས་པའི་རྡོ་རྗེ་རྩེ་ལྔ་པ་ཡི་གེ་ཨོཾ་གྱིས་ལྟེ་བ་ལ་བྱིན་གྱིས་བརླབ་པའོ། །དེ་ཡོངས་སུ་གྱུར་བ་ལས་བྱང་ཆུབ་ཀྱི་སེམས་ཀྱི་གཟུགས་ཀྱི་དུས་མཐའི་མེ་ལྟར་ཤིན་ཏུ་རྣམ་པར་འབར་བར་ཐུབ་པར་མི་ནུས་པ། གད་མོའི་སྒྲ་ཆེན་སྒྲོགས་པ། བདུད་བཞི་ལ་བརྐྱང་བསྐུམ་གྱི་ཞབས་ཀྱིས་ལེགས་པར་གནས་པ། ཕྱག་བཅུ་གཉིས་མ་ལ་ཞལ་གསུམ་སྤྱན་གསུམ་མ། སྐུ་མདོག་དམར་མོ་སྟེ། དང་པོ་གཡས་པའི་ཕྱག་དྲུག་པོ་རྣམས་ཀྱིས་ནི་རལ་གྲི་དང་སྣ་ཚོགས་རྡོ་རྗེ་རྩེ་གཅིག་པ་དང༌། མདུང་དང་མདའ་དང་དབྱུག་ཏོ་བསྣམས་པར་མཛད་པའོ། །གཡོན་པའི་ཕྱག་རྣམས་ཀྱིས་ནི་སྡིགས་མཛུབ་དང་བཅས་པའི་འཚེམ་བྱེད་དང་མདུང་ཐུང་རྩེ་གསུམ་དང་ཤིང་མྱ་ངན་མེད་ལོ་འདབ་དང་ལྡན་པ་དང་གཞུ་དང་ཞགས་པ་དང༌། ཆད་ས་པའི་མགོ་བོ་རྣམས་བསྣམས་པའོ། །མི་མགོའི་ཕྲེང་བ་ལེགས་པར་འཕྱང་བའི་
སྐུའི་ཡན་ལག་ཐམས་ཅད་མཛེས་པ། སྟག་གི་པགས་པའི་སྟོད་གཡོགས་དང་ཤམ་ཐབས་ཅན། རྩ་བའི་ཞལ་ནི་དམར་མོའོ། །དཀར་མོ་དང་ནག་མོ་ནི་གཡོན་པའི་ཞལ་གཉིས་སོ། །སེར་མོ་དང་ནག་མོ་གཡས་པའི་ཞལ་གཉིས་སོ། །ནག་མོ་སྟེང་ཞལ་ནི་ཕག་གི་ཞལ་ལོ། །ལྗགས་འདྲིལ་བར་མཛད་པ། སྐྲ་ཁམ་སེར་གྱེན་དུ་འབར་བར་གྱུར་པ། རྣམ་པར་སྣང་མཛད་དབུ་རྒྱན་ལ་གནས་པ། སྦྲུལ་དང་རུས་པའི་རྒྱན་གྱིས་བརྒྱན་པ། གཉུག་མའི་ས་བོན་གྱི་འོད་ཟེར་སྤྲོས་པས་ཐམས་ཅད་དུ་བདུད་རྣམས་འཇོམས་པར་མཛད་པ། ཕྱོགས་སྐྱོད་བ་བཅུ་དང༌། གཤིན་རྗེ་དང་མཁའ་འགྲོ་མ་དང༌། འབྱུང་པོ་དང༌། ཟ་བྱེད་རྣམས་ལ་ཕེ་ཊ་ཀཱ་རཱ། ཧ་ཧ་ཞེས་སྒྲོགས་པས་འཇིགས་པར་མཛད་པ། དུར་ཁྲོད་བརྒྱད་ཀྱིས་ཡོངས་སུ་བསྐོར་བ་དང་ལྡན་པའི་དཔལ་དང་ལྡན་མ་ཨུ་ཌྱན་གྱི་འོད་ཟེར་ཅན་དུ་བདག་ཉིད་སྐད་ཅིག་གིས་རྫོགས་བར་བྱས་ལ། མགོ་བོ་དང༌། མགྲིན་པ་དང༌། སྙིང་ག་རྣམས་སུ་ཨོཾ་ཨཱཿ་ཧཱུཾ་ངོ༌། །ཡན་ལག་ཐམས་ཅད་ལ་ཡང་ཡི་ག་ཕཊ་བསམ་པར་བྱ་བའོ། །དེ་ནས་ལྟེ་བའི་སྟེང་དུ་སྣ་ཚོགས་པདྨ་ལ་ཉི་མ་དང་ཟླ་བ་ཁ་སྦྱར་བའི་དབུས་སུ་པདྨའི་རྩ་རྒྱུན་གྱི་རང་བཞིན་གྱི་ཡི་གེ་ཧཱུཾ་ཁ་དོག་སྣ་ཚོགས་པའི་ཡི་གེ་བསམ་པར་བྱ་བའོ། །ཨོཾ་བཛྲ་སཏྭ་ཤྭ་རཱི་སརྦ་དུཥྚཱ་ན་ཧ་ན་ཧ་ན་ད་ཧ་ད་ཧ་པ་ཙ་པ་ཙ་ཨོཾ་མཱ་རཱི་ཙྱཻ་མཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་སྙིང་པོའི་སྔགས་སོ། །ཨོཾ་ཨཱཿ་ཧཱུཾ་བསྒོམ་པའི་སྔགས་སོ། །ཨོཾ་བཛྲ་བེཏཱ་ལི་ཧཱུཾ་ཕཊ། བཟླས་པའི་སྔགས་སོ། །ཨོཾ་མཱ་རཱི་ཙྱཻ་ཨཾ་མཾ་ཧཱུཾ་ཧཱུཾ་ཕཊ། བཟླས་པའི་སྔགས་གཉིས་པའོ། །དེའི་རྗེས་ལ་ཐུན་བཞི་ལ་གཏོར་མའི་སྔགས་ནི་ཨོཾ་ཨཱ་ར་ལླི་ཧོཿ་ཛཿ་ཧཱུཾ་བཾ་ཧོཿ་ཨོཾ་བཛྲ་ཌཱ་ཀི་ནཱི་ས་མ་ཡ་སྟཾ་དྲྀ་ཤྱ་ཧོ་ཁ་ཁ་ཁཱ་ཧི་ཁཱ་ཧི་གནོད་སྦྱིན་དང་སྲིན་པོ་དང༌། འབྱུང་པོ་དང་ཡི་དགས་དང་ཤ་ཟ་དང༌། སྨྱོ་བྱེད་དང༌། བརྗེད་བྱེད་དང་མཁའ་འགྲོ་མ་དང་མཁའ་འགྲོ་མ་ལ་སོགས་པ་རྣམས་ཐམས་ཅད་གཏོར་མ་འདི་ལོངས་ཤིག་འཐུངས་ཤིག་འདའ་བར་མ་བྱེད་ཅིག །བདེ་བ་ཆེན་པོ་རྣམ་པར་འཕེལ་བའི་དོན་དུ་བདག་གི་གྲོགས་སུ་འགྱུར་བར་གྱིས་ཤིག་ཧཱུཾ་ཧཱུཾ་ཕཊ་སྭཱ་ཧཱ། ཟས་ལ་སོགས་པ་རྣམས་ཀྱང་ཡི་གེ་ཧྲཱིཿའམ་ཡི་གེ་ཧུའི་ལ་སོགས་པས་ལེགས་པར་སྦྱངས་ལ་སྤྱད་པར་བྱ་བའོ། །ཨུ་ཌྱན་ནས་བྱུང་
བའི་བདག་བྱིན་གྱིས་རློབ་པའི་རིམ་པའི་སྒྲུབ་ཐབས་སོ། །པཎྜི་ཏ་ཆེན་པོ་ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །