མྱ་ངན་མེད་ལ་དགའ་བའི་འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། ཨ་ཤྭ་ཀ་ཀཱ་ན་ཏཱ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་ལ་དགའ་བའི་འོད་ཟེར་ཅན་གྱི་སྒྲུབ་ཐབས། རང་གི་སྙིང་གར་སྣ་ཚོགས་པདྨ་ཟླ་བའི་སྟེང་དུ་ཡི་གེ་མཾ་སེར་པོ་རྣམ་པར་བཀོད་ལ་དེ་ཁོ་ན་བཞིན་དུ་ཐམས་ཅད་དང་བདག་ཉིད་ཀྱང་སོ་སོར་སྣང་བ་ཙམ་དུ་བསྡུས་ཏེ། ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་རྒྱས་རྣམ་པར་དག་པ་ནི་བདག་ཡིན་ནོ་ཞེས་བརྗོད་པར་བྱའོ། །དེ་ནས་ཡི་གེ་མཾ་དེ་ཡོངས་སུ་གྱུར་པ་ཤིང་མྱ་ངན་མེད་ཀྱི་ཕུང་པོའོ། །ཡང་ཡི་གེ་མཾ་མོ། དེ་དག་ཐམས་ཅད་ཡོངས་སུ་གྱུར་པས་ཀྱང་བཅོམ་ལྡན་འདས་མ་སྐུ་མདོག་སེར་མོ་ཞལ་གཅིག་ཕྱག་གཉིས་མ་སྟེ། རྣམ་པར་སྣང་མཛད་ཀྱིས་ཉེ་བར་མཛེས་པར་བྱས་པའི་རིན་པོ་ཆེའི་དབུ་རྒྱན་དང་ལྡན་པ། ལྷག་པར་གསལ་བར་བྱེད་པའི་གསེར་གྱི་མདོག་ཅན། སྣ་ཚོགས་པདྨ་དང་ཟླ་བ་ལ་གཡོན་བསྐུམ་པས་གནས་པའི་ཕག་ལ་བཅིབས་པ། གཞོན་པ་ལང་ཚོལ་བ་བཅིང་དྲེགས་བ་དང་ལྡན་པ། མཐོར་བཏེག་པའི་ཕྱག་གཡོན་པས་ནི་ཤིང་ལྗོན་པ་མྱ་ངན་མེད་ཀྱི་ཡལ་ག་བསྒྲིལ་ཏེ་བསྣམས་པ། གཡས་པས་ནི་མཆོག་སྦྱིན་པའོ། །དོ་ཤལ་ལ་སོགས་པས་སྐུ་བརྒྱན་པར་གྱུར་པ། ན་བཟའ་དཀར་པོ་སྨད་གཡོགས་སུ་བསྣམས་པ། རང་གི་སྙིང་གའི་ཡི་གེ་མཾ་ལས་ཕག་གི་གཟུགས་ཀྱི་འོད་ཟེར་དུ་མ་སྤྲོས་པས་མ་རུངས་པ་རྣམས་འཇོམས་པར་བྱེད་པར་བསམ་པར་བྱ་བའོ། །ཨོཾ་མཱ་རཱི་ཙྱཻ་སྭཱ་ཧཱ། དེ་ནས་ཇི་ལྟ་བ་བཞིན་དུ་གཤེགས་སུ་གསོལ་པར་ཇི་ལྟར་བ་དེ་བར་རྒྱུ་བར་བྱ་བའོ། །ཡུལ་གཞན་དུ་འཇུག་ན་ལམ་དུ་འགྲོ་བར་གྱུར་ན་ནི། བདག་ཉིད་ཀྱིས་སྟོད་གཡོགས་ཀྱི་གྲྭ་ནས་བཟུང་ལ་སྔགས་འདི་ལན་བདུན་གྱི་བར་དུ་ཡོངས་སུ་བསྔགས་ཤིང༌། བཟླས་པའི་གོས་ཀྱི་ཐ་མ་བཟུང་སྟེ་ཇི་ལྟ་བ་བཞིན་དུ་མདུད་པ་བྱས་ལ་འགྲོ་བར་བྱ་སྟེ། ཆོམ་རྐུན་ལ་སོགས་པས་འཚེ་བར་མི་འགྱུར་རོ། །མངོན་པར་འདོད་པའི་ཡུལ་དུ་ཕྱིན་ནས་ནི་མདུད་པ་འགྲོལ་བར་བྱ་བའོ། །འདི་ནི་གདམས་ངག་གོ །མྱ་ངན་མེད་ལ་དགའ་བའི་འོད་ཟེར་ཅན་གྱི་སྒྲུབ་ཐབས་རྫོགས་སོ། །ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །