པདྨ་གར་གྱི་དབང་ཕྱུག་གི་སྒྲུབ་ཐབས།
རྫོགས་པའི་སངས་རྒྱས།
རྒྱ་གར་སྐད་དུ། པདྨ་ན་རྟེ་ཤྭ་ར་སཱ་དྷ་ནཾ། བོད་སྐད་དུ། པདྨ་གར་གྱི་དབང་ཕྱུག་གི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་ག་འདིས་སྣ་ཚོགས་པདྨ་དང་ཟླ་བ་ལ་ཧྲཱིཿཡིག་དམར་པོ་ཡོངས་སུ་གྱུར་པ་ལས་པདྨ་གར་གྱི་དབང་ཕྱུག་ཏུ་བདག་ཉིད་བསྒོམ་པར་བྱ་སྟེ། སེམས་དཔའི་སྐྱིལ་ཀྲུང་གིས་བཞུགས་པ། ཕྱག་གཉིས་པ། ཞལ་གཅིག་པ། སྐུ་མདོག་དམར་པོ་རྒྱན་ཐམས་ཅད་ཀྱིས་བརྒྱན་པ། འོད་དཔག་ཏུ་མེད་པའི་ཅོད་པན་ཅན། གཡོན་ཕྱོགས་སུ་གོས་དཀར་མོ་དང་སྙོམས་པར་ཞུགས་ཤིང་འཁྱུད་པའི་ཚུལ་གྱིས་བཞུགས་པ། ཕྱག་ཡོན་ན་པདྨ་དམར་པོ་བསྣམས་པ། གཞན་ཕྱག་གཡས་པ་ན་གར་གྱི་ཚུལ་གྱིས་ཁབ་ཀྱི་ཕྱག་རྒྱས་པདྨ་ཁ་འབྱེད་པའོ། །དེ་ནས་ཨོཾ་ཀཱ་ཡ་བཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་སྔགས་བརྗོད་པར་བྱའོ། །དེའི་རྗེས་སུ་ཕྱོགས་མཚམས་བརྒྱད་དུ་ལྷ་མོ་བརྒྱད་བསམ་པར་བྱའོ།།
དེ་ལ་པདྨ་དམར་པོ་འདབ་མ་བརྒྱད་པའི་ཤར་གྱི་འདབ་མ་ལ་རྣམ་པར་གཟིགས་མ་དཀར་མོ་པདྨ་དམར་པོ་བསྣམས་པའོ། །ལྷོའི་འདབ་མ་ལ་སྒྲོལ་མ་ལྗང་གུ་པདྨ་ལྗང་གུ་བསྣམས་པའོ། །ནུབ་ཀྱི་འདབ་མ་ལ་དབང་ཕྱུག་མ་སེར་མོ་འཁོར་ལོ་དང་པདྨ་བསྣམས་པའོ། །བྱང་གི་འདབ་མ་ལ་ཁྲོ་གཉེར་ཅན་དཀར་མོ་པདྨ་སེར་པོ་བསྣམས་པའོ། །ཤར་གྱི་མཚམས་ཀྱི་འདབ་མ་ལ་པདྨའི་གནས་ཅན་སེར་མོ་བཙོད་ཀྱི་ཁ་དོག་ལྟ་བུའི་པདྨ་བསྣམས་པའོ། །ལྷོའི་མཚམས་ཀྱི་འདབ་མ་ལ་རྡོ་རྗེ་པདྨའི་དབང་ཕྱུག་མ་ནམ་མཁའི་མདོག་ལྟ་བུ་པདྨ་དཀར་པོ་བསྣམས་པའོ། །ནུབ་ཀྱི་མཚམས་ཀྱི་འདབ་མ་ལ་སྣ་ཆོགས་པདྨ་དཀར་མོ་པདྨ་ནག་པོ་བསྣམས་པའོ། །བྱང་གི་མཚམས་ཀྱི་འདབ་མ་ལ་སྣ་ཚོགས་རྡོ་རྗེ་མ་ཁ་དོག་སྣ་ཚོགས་པདྨ་བསྣམས་པའོ། །དེ་རྣམས་ཐམས་ཅད་སེམས་དཔའི་སྐྱིལ་ཀྲུང་ཅན་ཕྱག་གཉིས་པ། ཞལ་གཅིག་པ་ཞི་བའོ། །ཟེའུ་འབྲུའི་དབུས་སུ་བཅོམ་ལྡན་འདས་ལྟ་བུའོ། །དེ་ནས་སྔགས་བཟླས་པར་བྱའོ། །ཨོཾ་ཧྲཱིཿཔདྨ་ན་རྟེ་ཤྭ་ར་ཧཱུཾ། འཇིག་རྟེན་མགོན་པོ་པདྨ་གར་གྱི་དབང་ཕྱུག་གི་སྒྲུབ་ཐབས་རྫོགས་སོ།།