འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས།
དཔལ་འཛིན།
རྒྱ་གར་སྐད་དུ། ཨཱཪྻ་བཛྲ་སྭ་ར་སྭ་ཏཱི་སཱ་དྷ་ནཾ། བོད་སྐད་དུ། འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས། འཕགས་མ་རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །ཡང་དག་རྫོགས་སངས་རྒྱས་གསུངས་གསལ་སྦྱིན་ཡོན་ཏན་རང་བཞིན་རྡོ་རྗེ་དབྱངས་ཅན་མར་བཏུང་ནས། །རང་ལ་ཕན་པ་ཡང་དག་སྒྲུབ་མཛད་མཛེས་པའི་ཉམས་ལྔ་རྩོད་པས་ཐུབ་པར་དཀའ་མཛད་མ། །དེ་ཡི་སྒྲུབ་ཐབས་འདི་ནི་ཀུན་ནས་ཡང་དག་མི་བཟད་མི་ཤེས་མུན་པ་འཇོམས་མཛད་པ། །བློ་ངན་རྣམས་ཀྱིས་
རྟོགས་ཕྱིར་སེམས་ཅན་ཕན་ཕྱིར་ལེགས་པར་གསུངས་པའི་ཆོ་གས་བཤད་པར་བྱ། །དང་པོར་སྔ་བར་ཁ་ལ་སོགས་པ་དག་པའི་རང་བཞིན་སྙིང་རྗེ་དང་ལྡན་བཟོད་ལྡན་པས། །སྔགས་པས་གཙང་བའི་སྟན་ལ་བྱམས་པའི་དགའ་བས་མྱོས་ཤིང་གང་ཞིག་དགའ་བ་དང་ལྡན་པས། །གནས་ཀྱང་ཡིད་དུ་འོང་ཞིང་དབེན་བར་ཡང་ནི་རང་གི་སྙིང་གར་ཆུ་སྐྱེས་བལྟ་བར་བྱ། །དེ་ལས་སྤྲུལ་པ་ལས་བྱུང་རི་བོང་འཛིན་པ་ཡང་དག་བསྒོམ་པར་བྱའོ་དེ་ལ་ཡང༌། །དོཿཡིག་འོད་ཟེར་རྣམས་ཀྱིས་ཕྱོགས་དང་བར་རྣམས་ཀྱང་ནི་འདི་ཡིས་ཡོངས་སུ་གང་བར་གྱུར། །དེ་ནས་སངས་རྒྱས་ཚོགས་རྣམས་མདུན་དུ་བལྟས་ནས་འདིར་ནི་མཆོད་ཕལ་སོགས་བསྒོམ་པར་བྱ། །མེ་ཏོག་ལ་སོགས་དེ་ནས་ཕྱག་འཚལ་སླར་ཡང་འདིར་ནི་སྡིགས་པ་རབ་ཏུ་བཤགས་པ་བྱ། །དེ་བཞིན་བསོད་ནམས་རྗེས་སུ་ཡི་རང་སྔགས་རིག་པ་ཡིས་གསུམ་ལ་སྐྱབས་སུ་ཡང་དག་འགྲོ། །ཞེས་པ་ལ་སོགས་སྨོན་ལམ་ལེགས་བཏབ་དེ་ཡིས་བདག་ཉིད་ཀྱང་ནི་དམིགས་པ་རབ་ཏུ་བྱ། །གཅིག་དང་དུ་མ་དང་བྲལ་རང་བཞིན་ཡོངས་སུ་བརྗོད་པ་དྲི་མེད་ཡང་དག་ཤེས་རྟོགས་པ། །དེ་ནས་སྣ་ཚོགས་རྣམ་རྟོག་དྲ་བ་མ་ལུས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་ལས་བྱུང་བ་ཆུ་སྐྱེས་དང་ནི་ཟླ་བ་ལ་གནས་དོཿཡིག་དམར་པོ་སྟེ། སླར་ཡང་སྣ་ཚོགས་འོད་ཟེར་ཚོགས་རྣམས་ཤིན་ཏུ་མཛེས་པར་གྱུར་པའི་པདྨ་འདབ་བརྒྱ་ད་པ། །དེ་ལ་དམར་ཞིང་འོད་ཟེར་ཆེན་པོ་དང་ལྡན་བཅོམ་ལྡན་འདས་མ་མཛེས་པའི་རྒྱན་གྱིས་བརྒྱན། །གཡོན་བརྐྱང་བ་ཡི་ཞབས་ཀྱིས་ཡང་དག་གནས་ཤིང་ཞལ་གསུམ་ཕྱག་དྲུག་གིས་ནི་རབ་བརྒྱན་པ། །གཡས་པའི་ཞལ་ནི་སྔོ་ཞིང་ཕྱག་ན་པདྨ་རལ་གྲི་གྲི་གུག་རབ་ཏུ་བསྣམས་པ་སྟེ། །གཡོན་ཞལ་དཀར་ཞིང་ཕྱག་ན་ལྷུང་བཟེད་དང་བཅས་རིན་ཆེན་བཟང་དང་འཁོར་ལོ་དེ་བཞིན་ནོ། །སྙིང་གར་པདྨ་ལ་གནས་ཟླ་བའི་དབུས་སུ་གནས་པའི་དེར་ཡང་དོཿཡིག་འོད་གསལ་བས། །སྣ་ཚོགས་མི་ཤེས་མུན་བ་འཇོམས་པའི་འོད་ཟེར་གྱིས་ནི་འགྲོ་བ་མ་ལུས་འགེངས་མཛད་པ། །ཡང་དག་བསྡུས་ལ་རང་གི་སྙིང་གར་ཟླ་བ་ལ་གནས་ས་བོན་བལྟས་ལ་སླར་ཡང་སྤྲོ།།
དེ་ཉིད་ཡང་དང་ཡང་དུ་རྟག་ཏུ་སྙོམ་ལས་མེད་པར་ཉི་མ་སོ་སོར་བསམ་པར་བྱ། །བསམ་གཏན་ངལ་ན་ས་བོན་མཉམ་སྐྱེས་བསྡུས་ལ་སྔགས་འདི་ཡིས་ནི་བཟླས་པ་རབ་ཏུ་བྱ། །དོ་ཤལ་གཡོ་ཞིང་ཉིན་བྱེད་རིམ་པས་འབྱུང་བའི་ཡིད་བཞིན་དུ་ནི་སྔགས་ཀྱིས་བཟླས་པར་བྱའོ། །ཨོཾ་པི་ཙུ་པི་ཙུ་པྲཛྙ་ཝརྡྷ་ནི། ཛྲ་ལ་ཛྭ་ལ། མེ་དྷ་ཝརྡྷ་ནི། དྷི་རི་དྷི་རི་བུདྷི་ཝརྡྷ་ནི་སྭཱ་ཧཱ། ཐུན་མཚམས་ཐམས་ཅད་དུ་ནི་ལྷ་མོའི་སྐུ་ལ་ཡིད་ནི་རྟག་ཏུ་རབ་ཏུ་དགའ་བ་ཡིས། །ཡང་དག་གསུངས་པའི་ཆོ་གས་སེམས་ཅན་རྣམས་གྱི་དོན་གྱུར་སྔགས་འདི་ཡོངས་སུ་བཟླས་པར་བྱ། །བསོད་ནམས་ཀྱང་ནི་ཡོངས་སུ་བསྔོ་བྱ་དགོས་པ་བྱེད་ན་བསམ་གཏན་རྩེ་གཅིག་གནས་པར་སྤྱོད། །ཇི་སྲིད་འབུམ་ཕྲག་ཡོངས་སུ་མ་རྫོགས་པའམ་རྫོགས་ནས་ཀྱང་ནི་ལས་ཀྱི་རིམ་བཞིན་བྱ། །རྣམ་པ་ཐམས་ཅད་དུ་ནི་མི་མཐུན་ཕྱོགས་སུ་ཉེ་བར་ཡང་ཡང་དེ་ཉིད་བསམ་གཏན་བྱེད། །དཀར་པོའི་ཚེས་གཅིག་ནས་ནི་ཤིན་ཏུ་དགེ་བའི་ཡིད་ཀྱིས་ཇི་སྲིད་ཟླ་བ་གནས་ཀྱི་བར། །དེ་སྲིད་ལེགས་སྤྱར་དེ་བཞིན་ནུབ་རེ་བཞིན་དུ་ཇི་སྲིད་ཟླ་བ་གང་བ་བཞིན་དུ་བྱ། །དེ་ཉིད་ཀྱི་ནི་མཚན་མོ་ཐུབ་པར་དཀའ་བའི་སྙན་ངག་མཁན་གྱི་དངོས་གྲུབ་ཐོབ་པར་འགྱུར། །གང་ཞིག་དཔལ་ལྡན་གཤིན་རྗེ་གཤེད་ཀྱི་རྒྱུད་ལ་གནས་ཤིང་དཔལ་ལྡན་ནག་པོའི་གཟི་བརྗིད་ཀྱིས། །དཔལ་ལྡན་རྡོ་རྗེ་དབྱངས་ཅན་བཅོམ་ལྡན་འདས་མ་དེ་ཡི་ཡང་དག་སྒྲུབ་པའི་ཐབས་གྱུར་པ། །སེམས་ཅན་རྣམས་ལ་ཕན་པའི་དོན་དུ་བདག་གིས་བརྩམས་པའི་བསོད་ནམས་ཡང་དག་ཐོབ་གྱུར་པ། །དེ་ཡིས་འགྲོ་རྣམས་ནག་པོ་ལྟ་བུར་ཐུབ་པར་དཀའ་བའི་སྙན་ངག་མཁན་དུ་གྲུབ་པར་ཤོག །སངས་རྒྱས་རྣལ་འབྱོར་དཔལ་འཛིན་གྱིས། །དཔལ་ལྡན་རྡོ་རྗེ་དབྱངས་ཅན་གྱི། །འཇོམས་བྱེད་མཐར་ནི་བྱེད་པ་ཡི། །སྒྲུབ་པའི་ཐབས་ནི་ལེགས་བྱས་སོ། །འཕགས་མ་རྡོ་རྗེ་དབྱངས་ཅན་མའི་སྒྲུབ་ཐབས་སློབ་དཔོན་དཔལ་འཛིན་གྱིས་མཛད་པ་རྫོགས་སོ།།