ཀུ་རུ་ཀུལླེའི་སྒྲུབ་ཐབས།
རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། །འཕགས་མ་རིགས་བྱེད་མ་ལ་ཕྱག་འཚལ་ལོ། །དེ་ནས་སྔགས་པས་སྐྱེས་པ་དང་བུད་མེད་དབང་དུ་བྱ་བར་འདོད་པས། དཀར་པོའི་ཚེས་གཅིག་ནས་བརྩམས་ནས། ཐུན་མཚམས་གསུམ་དུ་ཉི་མ་སོ་སོ་ལ་ཁྲི་ཕྲག་རེ་བཟླས་པར་བྱའོ། །བཅོམ་ལྡན་འདས་མའི་སྐུ་ལ་ན་བཟའ་དམར་པོ་རྣམས་དབུལ་པར་ཡང་བྱའོ། །དེ་ལ་རིམ་པ་འདིས་རང་གི་སྙིང་གར་ཉ་མ་ལ་གནས་པའི་ཧྲཱིཿདྨར་པོ་ལས་སྐྱེས་པའི་ཆུ་སྐྱེས་དམར་པོ་འདབ་མ་བརྒྱད་པ་སྡོང་པོ་ལས་སྐྱེ་གནས་ཀྱི་མཐར་ཐུག་པར་སོན་པ་རྣམ་པར་བསམས་ལ། དེའི་འདབ་མ་བརྒྱད་པ་རྣམས་སུ་བུད་པ་བརྒྱད་དེ། ཨཱ་ཨཱི་ཨཱུ་རཱྀ་ལཱྀ་ཨཻ་
ཨཽ་ཨཿ། ཞེས་པའི་དབྱངས་བརྒྱད་ཡོངས་སུ་གྱུར་གྱུར་པ་ལས་ཤིན་ཏུ་དགའ་བ་རྒྱས་ཤིང་ཁྲོ་བ་ཁ་དོག་དམར་པོ་རིམ་པ་བཞིན་དུ་གནས་པ་རང་གི་སྣ་བུག་གི་རླུང་གིས་བསྐུལ་བར་བལྟས་ལ། རང་གི་སྣ་བུག་གཡོན་ནས་འཐོན་ཏེ། བསྒྲུབ་བྱའི་སྣ་གཡས་ཀྱི་བུ་གནས་རབ་ཏུ་ཞུགས་ཏེ། །དེས་པདྨའི་སྡོང་བུ་གསར་པ་རྣམས་རྙིངས་ནས། ཨ་ཨི་ཨུ་རྀ་ལི་ཨེ་ཨོ་ཨཾ་ཞེས་པའི་དབྱངས་ཡིག་ཐུང་དུ་བརྒྱད་བསམས་ལ། དེ་ཡོངས་སུ་གྱུར་པ་ལས་རྣ་བའི་རྩར་བཀང་བའི་ཨུཏྤལ་དམར་པོའི་མདེའུ་ཅན་གྱི་མདའི་ཚོགས་ཀྱིས་བསྒྲུབ་བྱའི་པདྨའི་ཟེའུ་འབྲུ་ཕུག་ནས། དེ་འགྱེལ་ཞིང་མདའི་སྒྲས་སྣ་བུག་གཡོན་པའི་བུག་ནས་འཐོན་ཏེ་རྣལ་འབྱོར་པའི་སྣ་བུག་གཡས་ནས་རང་གི་སྙིང་གནས་ཞུགས་པར་རྣམ་པར་བསམ་པར་བྱའོ། །ཕྱི་ནས་ཨུཏྤལཱི་རང་བས་སྐེ་བཅིངས་ནས་ལྕགས་ཀྱིས་སྐྱེ་གནས་ཕུག་ཅིང་བཙིར་ནས་འོད་ཟེར་རབ་ཏུ་འབར་བས་གཞན་གང་ཞིག་དབང་དུ་བྱས་ཏེ། དེ་ལ་ཞོན་ནས་དེའི་དགའ་བའི་སྔགས་བཟླས་པར་བྱའོ། །ཨོཾ་ཀུ་རུ་ཀུལླེ་ཧྲཱིཿཆེ་གེ་མོ་བདག་གི་དབང་དུ་གྱིས་ཤིག་སྭཱ་ཧཱ་ཞེས་སོ། །བུང་བའི་སྦྱོར་བས་ཉི་མ་བདུན་གྱིས་འགྲུབ་པར་འགྱུར་རོ། །ཀུ་རུ་ཀུལླེའི་སྒྲུབ་ཐབས་རྫོགས་སོ།།