ལྷ་མོ་ལྔའི་སྒྲུབ་ཐབས་མདོར་བསྟན་པ།
རྒྱ་གར་སྐད་དུ། པཉྩ་དེ་ཝ་ཏཱི་སཱ་དྷ་ནཾ་ཨུཏྡེ་ཤ། བོད་སྐད་དུ། ལྷ་མོ་ལྔའི་སྒྲུབ་ཐབས་མདོར་བསྟན་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་ཁྲུས་བྱས་པའི་མཐར་ལྷ་མོ་ལྔ་མདོར་བསྟན་པ་ནི། དེ་ལ་སོ་སོ་འབྲང་བ་ཆེན་མོ་ནི་སྐུ་མདོག་སེར་མོ་ཞལ་གསུམ་པ། ཞལ་སོ་སོ་ལ་སྤྱན་གསུམ་གསུམ་པ། ཕྱག་བཅུ་པའོ། །ནག་པོ་དང༌། དཀར་པོ་དག་ནི་གཡས་དང༌། ཅིག་ཤོས་ཀྱི་ཞལ་ལོ། །གཡས་ཀྱི་ཕྱག་ལྔ་རྣམས་ནི་གོ་རིམས་བཞིན་དུ་རལ་གྲི་དང༌། རྡོ་རྗེ་དང༌། མདའ་དང༌། མཆོད་སྦྱིན་དང༌། ཕྱག་ཐུགས་ཀར་གནས་པ་ལ་གདུགས་རྣམས་སོ། །དེ་བཞིན་དྲུག་དུ་གཡོན་གྱི་ཕྱག་ལྔ་རྣམས་ན་གཞུ་དང༌། རྒྱལ་མཚན་དང༌། རིན་པོ་ཆེའི་ཆུན་པོ་དང༌། དགྲ་སྟ་དང༌། དུང་རྣམས་སོ། །རིན་ཆེན་འབྱུང་ལྡན་ཀྱི་དབུ་རྒྱན་ཅན། ཤ་འགག་ནག་པོ་ཅན། སྟོད་གཡོགས་དམར་པོས་བརྒྱན་པ། སྐྱིལ་ཀྲུང་ཕྱེད་པས་འགྱིང་ཞིང་བཞུགས་པ། ལྷའི་རྒྱན་དང༌། གོས་ཐམས་ཅད་ཀྱིས་བརྒྱན་པའོ། །རྨ་བྱ་ཆེན་མོ་ནི་སྐུ་མདོག་ལྗང་གུ་ཞལ་གཅིག་པ། ཕྱག་གཉིས་པ། མཛེས་ཤིང་རྨ་བྱའི་མདོངས་དང་ལྡན་པ་མཆོག་སྦྱིན་གྱི་ཕྱག་རྒྱ་ཕྱག་གཡས་པ་དང་གཡོན་པ་དག་གིས་སོ་ཞེས་སོ། །སྟོང་ཆེན་མོ་རབ་ཏུ་འཇོམས་མ་ནི་སྔོན་མ་ཇི་ལྟ་བ་དེ་བཞིན་ནོ། །གསང་སྔགས་ཆེན་མ་རྗེས་སུ་འཛིན་མ་ནི་ཞལ་གཅིག་པ། ཕྱག་བཞི་པ། སྐུ་མདོག་ནག་མོ་ཕྱག་གཡས་པ་དག་གིས་རལ་གྲི་དང༌། མཆོག་སྦྱིན་གྱི་ཕྱག་རྒྱའོ། །ཕྱག་གཡོན་པ་དག་གིས་དགྲ་སྟ་དང༌། ཞགས་པ་བསྣམས་པའོ་ཞེས་སོ། །བསིལ་བའི་ཚལ་ཆེན་མོ་ནི་སྐུ་མདོག་དམར་མོ་ཞལ་གཅིག་པ་ཕྱག་བཞི་པ་ཕྱག་གཡས་པ་དག་གིས་རལ་གྲི་དང༌། མཆོག་སྦྱིན། །
གཡོན་པ་དག་གིས་དགྲ་སྟ་དང་ཞགས་པའོ་ཞེས་སོ། །ཡི་གེ་གསུམ་གྱིས་མཚན་ཅིང་རང་གི་ས་བོན་གྱི་དབུས་སུ་རང་གི་མིང་དང་བཅས་པ་ནི་འདི་རྣམས་ཀྱི་སྔགས་སོ། །ལྷ་མོ་ལྔའི་སྒྲུབ་ཐབས་མདོར་བསྟན་པ་རྫོགས་སོ།།